ملك بفزع شديد: عشق
ونهضت بسرعة وخوف شديد وركضت إلى الخارج وركض معها مالك الذي ذهب إلى عشق بسرعة وقال بخوف شديد وهو وضع يده على رأس عشق: عشق في إيه
هبطت ملك إلى مستوى عشق وقالت وهي تفحصها بخوف شديد: عشق مالك يا حبيبتي حد عاملك حاجة في إيه ما تنطقي يا بت وقولي إيه اللي حصل
عشق بصدمة وهي تشير بيدها إلى الباب الداخلي إلى القصر: فيه الأتراك في القصر يا ماما
ونظرت ملك مكان ما نظرت ونظرت إليها باستغراب وقالت: أتراك إيه يا بت الهبلة دول مصريين
ونظرت إليها عشق بصدمة وذهول شديد وقالت: يعني دول إنتاج بلدي يا ملك
نفخت ملك بغضب شديد منها ومن أفعالها وقال مالك بصوت عالي: في إيه يا عشق إيه اللي حصل
ابتعدت عشق عن ملك وقالت بردح وصوت عالي: تعالى شوف أمك يا مالك أمك جايبه مزز في البيت تعال شوف دي مش جايبه شاب واحد لا دول تلاته يا مالك تلاته
أنهت حديثها بحزن مصطنع ونظرت إلى ملك وقالت: يعني مصعبتش عليكي بنتك حبيبتك يا ملك مليش دعوة أنا عاوزه واحد
نفخت ملك لكي تهدئ نفسها عليها قليلا وقالت: انتي كل الصراخ واللي عاملاه ده علشان كده يا عشق وأنا اللي قلقت عليكي وفكرت إن في حاجة
نظرت إليها عشق وقالت بصدمة مصطنعة: يعني كل ده ومفيش حاجة يا ملك
ضغطت ملك على شفتيها بقوة لكي تصبر عليها قال فهد ببرود واستغراب ونظر إلى ملك: مين دول
نظرت إليه ملك وقالت ببرود شديد: ولادي
فهد وأدهم وعمر الثلاثة بصدمة شديدة وصوت عالي: ولادك
نظرت إليهم ملك وقالت باستغراب من صدمتهم: أيوه في إيه لكل ده
عشق بغيظ شديد: شوف يا مالك أمك زعلانه وهي بتقول ولادي ازاي وكأنها ندمانة إنها جابتنا على الدنيا
نظرت إليها ملك بغضب شديد وكادت أن تتحدث لكن قال مالك بهدوء: استني يا عشق مين دول يا ملكة
نفخت ملك بقوة وقالت وهي تشير على الشباب: دول رجالتي
شعر مالك بأن يوجد شيء خلف هذا ونظر إلى الشباب وقال بهدوء شديد: تمام هنتكلم بعد ما أرجع من المدرسة يلا يا عشق
عشق بهيام وهي تنظر إلى الشباب: والله ما يحصل أنا لازم أسلم عليهم الأول
ذهبت إلى الشباب الذين قد صدموا بأن ملك تمتلك أطفال فهي لا يظهر عليها ذلك ولم يتوقعوا بأنها تكون أما من الأساس وقفت عشق أمام فهد ووضعت يدها أسفل وجهها بهيام وقالت: هاي أنا عشق وانت يا قمر بلدك
ابتسم فهد إليها هبط لمستواها وقال: وأنا فهد يا عسل
عشق بصدمة وهي تنظر إلى عينيه: يا لهوي عينك دي ولا لينسيز
ضحك فهد على صدمتها ضحكة لا تظهر سوى القليل بشدة وقال: لا عيني يا قمر
عشق بغيظ شديد: يا عم انت بتضحك عليا أنا هروح أتعرف على المز التاني أحسن هو مش هيضحك عليا أكيد
ذهبت ووقفت أمام أدهم وقالت بنفس الهيام الشديد: وانت يا مز مصر والدول المجاورة مين
أدهم بضحك عليها: أنا أدهم
عشق بهيام شديد: يخرب بيت ضحكة أمك القمر دي
نظرت إلى عمر وقالت: وانت بقى يا عسل انت
ضحك عمر على هذه الطفلة المشاغبة وقال: أنا عمر يا قمرية
مالك بغضب شديد وهو ينظر إلى عشق: يلا يا عشق علشان نروح المدرسة
عشق برفض شديد وهي تنظر إليه: لا أنا مش هروح المدر
قطعت حديثها ملك التي قالت بغضب شديد: يلا يا عشق مش عاوزه كلام كتير على مدرستك يلا
نظرت إلى مالك وقالت: خلي بالك من أختك ونفسك كويس يا مالك يلا هتروحوا مع السواق هو مستنيكم بره
نظر إليها مالك باستغراب شديد وقال: ليه يعني ما احنا بنروح مع الباص كل يوم اشمعني النهارده يعني
ملك بهدوء شديد: أنا لغيت الباص اليومين دول وانتوا هتروحوا مع السواق والحرس دلوقتي
ابتسم مالك وذهب وضمها بقوة وقال: ماشي سلام
قبلته ملك وقالت: سلام
نظرت إلى عشق وقالت: يلا يا عشق هانم
عشق بهمس وغضب شديد: ربنا على الظالم يا شيخة
ملك برفعة حاجب: بتقولي حاجة يا عشق
ذهبت عشق وضمتها بقوة وقالت: بقولك أنا همشي يا ماما بس وحياة أمك متمشيهم وخليهم هنا لحد ما أرجع عايزه أتفرج عليهم شوية
ضحك عمر بقوة وقال: لا يا قمري متقلقيش روحي انتي واحنا مش هنمشي دلوقتي
أرسلت عشق إليه قبلة وقالت: تسلملي يا مز انت
غضب مالك بشدة وذهب وسحبها من يدها إلى الخارج وهو غضب منها ومن تصرفاتها بشدة
نظرت ملك إلى الشباب ونظرت إلى نصار وقالت بهدوء: روح انت النهارده الشركة أنا مش رايحة خليك انت مكاني
أومأ لها نصار ونظر إلى الشباب وابتسم وقال: تمام يا ملكة
ذهب إلى الخارج ونظرت خلفه ملك ونظرت إلى الشباب وقالت ببرود شديد: إيه هتفضلوا واقفين كده كتير
فهد ببرود وسخرية: الواضح إن صاحبة البيت متعرفش حاجة في الواجب علشان كده مخليانا واقفين لحد دلوقتي
نظرت إليه ملك وقالت بصوت عالي: سعاد سعاد
أتت سعاد بسرعة وقالت: تحت أمرك يا هانم
ملك وهي تنظر فهد ببرود شديد: شوفي الشباب يشربوا إيه وهاتيلي قهوة
أنهت حديثها وذهبت وجلست على الكرسي وجلس الشباب وأخذت سعاد طلباتهم وأتت بهم بعد فترة صغيرة وأخرجت ملك علبة السجائر ووضعت سيجارة في فمها وأشعلتها وقالت: أولا من النهارده انتوا رجالتي أنا يعني شغلكم كله معايا انسوا كل شغل المخابرات واللي بتعملوه خلاص
رفع فهد حاجبه وقال: ازاي يعني احنا في مهمة تبع شغل المخابرات يعني احنا في المخابرات برضه
ابتسمت ملك ببرود شديد وقالت: تؤ تؤ المافيا حاجة والمخابرات حاجة تانية خالص وانتوا انسوا انكم في مهمة وخليكم في المافيا أحسن علشان هنطول مع بعض شوية
نفخ فهد بنفاد صبر وقال: تعرفي الحاجة الوحيدة اللي مخليني قاعد دلوقتي هنا اسمك في المافيا وعلشان عايز أثبت للواء إنه غلط لما طلب منك إنك تدخلي المهمة دي معانا غير كده أنا مشتغلش تحت إيد حد وخصوصا ولو كانت بنت
أمسكت ملك القهوة الخاصة بها وشربت منها القليل وقالت: ولما انت جامد كده عارف الشحنة دي هتدخل امتى مصر
جز فهد على أسنانه بقوة وقال بغضب مكتوم: لا معرفش
ابتسمت ملك وأخذت نفسا من السيجارة وقالت: مين اللي هيدخلها
نهض فهد بغضب من هذا برودها الشديد وقال بصوت عالي: معرفش مين اللي هيدخلها أنا داخل في المهمة دي بسبب اللواء وهو مقالش معلومات كتير بس اللي قاله إن الشحنة دي تخص اللودر غير كده مقالش حاجة
ملك باستفزاز شديد: ده شغل المخابرات اتفضل وشوف بقى شغل المافيا عامل ازاي ويا رب تتعلم حاجة تنفعك في الزمن
فهد بسخرية شديدة: وعلى أساس إن يوم ما أتعلم حاجة تنفعني هتعلمها منك انتي مش كده ثم الواضح انك اسم على الفاضي وداخلة كل ده بصدفة مش أكتر
نظرت إليه ملك ولم تتحدث أو تجيبه عليه ليبتسم فهد بسخرية أشد وشعر بأنه أخذ حق استفزازه منها بهذه الطريقة
نهضت ملك وقالت ببرود شديد: عاوزه أشوف قدرتكم الجسدية الأول
نظر إليها الشباب باستغراب وابتسمت ملك ببرود وقالت بصوت عالي: منصورررر
دخل رجل في الخامسة والثلاثين من عمره وهو رئيس حرس الملكة وقال باحترام كبير: تحت أمرك يا ملكة
ملك ببرود دون أن تنظر إليه: الرجالة جاهزين
منصور بجدية واحترام: أيوه ومستنيين أوامرك يا ملكة
ابتسمت ملك ونظرت إليه وقالت: خليهم في الجنينة وأنا جاية دلوقتي
أومأ لها منصور باحترام وطاعة وذهب ليفعل كما قالت ونظرت ملك إلى الشباب الذين استغربوا بشدة وقالت: يلا تعالوا
ذهبت إلى الخارج وذهب الشباب خلفها لكي يرون ماذا سوف تفعل الآن ورأوها تقف وتنظر إليهم وقالت وهي تشير إلى رجال يقفون في نصف الحديقة: دول اللي هتتدربوا معاهم يلا جهزوا نفسكم
نظر الشباب مكان ما أشارت وصدموا بشدة وهم يرأوا رجالا ضخاما بشدة
شهق عمر وقال بحسرة شديدة: يا لهوي على شبابك يا عمر آه يا صغير على الموت يا طيب يا اللي ملكش حظ في الدنيا دي
نظر إليه أدهم ونظر إلى الرجال وقال: حقك يا واد يا عمر الصراحة بقولكم إيه ما تعالوا نهرب من كل ده أحسن
نظر إليهم فهد بغضب شديد وقال بصوت لا يصل سوى إليهم: في إيه يا $$$$ منك لي احنا فريق الوحوش ولا نسيتوا هنقدر عليهم وعلي ابوهم بطلوا شغل ال$$$ ده فاهمين
نظر إليه أدهم ونظر إلى الرجال وابتسم ببرود وقال: فهد معاه حق إهدى كده يا عمر علشان شكلنا بقى زبالة اظبط نفسك
وكاد عمر أن يتحدث لكن قالت ملك وهي تنظر إليهم: جاهزين
وأومأ إليها فهد وأدهم ولم يفعل عمر شيئا لتنظر إليه ملك وتقول ببرود شديد: يلا يا عمر ابدأ انت
عمر بغيظ شديد: واشمعنى عمر يعني ما تبدأي بواحد تاني ولا علشان أنا الغلبان فيهم
ملك بغضب شديد: يلا يا عمر
ونظر عمر إلى الرجال وبلع ريقه وقال: حاضر حاضر متزقيش كده
وبالفعل ذهب عمر وبدأت المعركة بينه وبين واحد من الرجال وملك تراقب كل شيء ببرود شديد وبعد فترة رفعت ملك يدها وقالت: خلاص كفاية
وقف الرجل وعمر الذي قال بتعب شديد: شالله يخليكي يا شيخة
نفخت ملك ونظرت إلى أدهم وقالت: يلا يا أدهم انت اللي هتلعب دلوقتي
قالت هذا وهي تشير إلى أحد الرجال الذي أومأ لها باحترام وطاعة وذهب أدهم وبدأت المعركة بينه وبين أدهم ونظرت إليه ملك وأشارت إليهم ووقفوا بالفعل وقالت ببرود شديد وهي تنظر إلى رجل يقف: انت هتلاعب الفهد
قالت هذا بابتسامة مستفزة بشدة إلى فهد الذي نظر إليها ببرود شديد ابتسم وذهب إلى الرجل الذي يقف في انتظاره وأعطى لكمة قوية بشدة وبدأت المعركة بينه وبين هذا الرجل وهو ضربه بعنف وأخرج غضبه من هذه الفتاة به وقالت ملك وهي لاحظت فوز فهد على هذا الرجل: بس كفاية
فهمها فهد بشدة ولكم الرجل لكمة قوية بشدة وسقط الرجل بعنف على الأرض فاز الفهد بالفعل وصفق عمر بقوة وصفر وقال بتشجيع شديد: هو ده الكلام يا أبو الفهود
نظرت ملك إلى فهد وقالت ببرود شديد: برافو يا فهد
فهد بسخرية وبرود: وانتي مش هتتدربي ولا مبتعرفيش أنا ممكن أدربك عادي على فكرة
قال هذا باستفزاز شديد فهمته ملك وقالت ببرود شديد: أنا مش محتاجة تدريب ويلا علشان أقولكم الشغل ماشي ازاي
ذهبوا إلى الداخل وجلسوا نظرت إليهم ملك وقالت ببرود شديد: أولا انتوا رجالتي يعني الخيانة بالموت ولو دماغكم الصغيرة وزتكم تعملوا حاجة أو تخونوا اهربوا أحسن لكم من اللي هيحصل
ابتلع عمر ريقه وقال: ليه بس يا ملكة الكلام اللي يزعل ده
نظرت إليه ملك واستكملت وكأنها لم تسمع شيئا: ثانيا محدش يقاطعني طول ما أنا بتكلم انتوا دخلتوا قصر الملكة يعني طول ما انتوا هنا في أمان محدش يقدر يجي ناحيتكم غير لو هجمنا على حد في وقتها يقدر يقتلكم عادي بس حد عايز يقول حاجة
نظر إليها فهد وقال باستغراب شديد: ليه يعني محدش يقدر يقتلنا واحنا في القصر ما ممكن حد يدخل ويقتلنا دلوقتي عادي
ملك بهدوء شديد: علشان ده اتفاقي مع المافيا محدش يقرب على عيلتي ورجالتي غير لما أنا أهجم على حد يتقتل في وقت الهجوم عادي غير كده لا
أدهم وهو ينظر إليها: وعلى كده ولو في حد هجم عليكي انتي يقتلك عادي
ابتسمت ملك ببرود شديد وقالت: أنا لوحدي عادي بس لو في حد اتصاب من عيلتي أو رجالتي حقي إني أصفيه هو وعيلته من غير حساب
رفع فهد حاجبه وقال: وإيه اللي يخليهم يقبلوا بحاجة زي دي من الأساس
ملك بجمود شديد: أنا معملتش اسم الملكة من فراغ يا سيادة المقدم
عمر بمرح وفضول: آه صح ليه لقبوكي بالملكة
ملك ببرود: علشان عارفين إن أنا ملكة الاقتصاد وكمان مفيش بنت في المافيا عملت اللي أنا عملته فآخده اللقب في المافيا كمان
فهد ببرود شديد: تمام يا ملكة احنا رجالتك دلوقتي
ملك: أيوه بس هتبدأوا من بكرة
فهد برفعة حاجب: وليه مش النهارده
نظرت إليه ملك وقالت: علشان النهارده ههجم على حد ومش عايزه شغلكم معايا يبدأ كده
ابتسم فهد ببرود وقال: واحنا هنكون معاكي يا ملكة
نفخت ملك وقالت: بس ده مش من المهمة بتاعتكم يبقى خليكم بعيد أحسن
فهد باستغراب: وهتروحي تهجمي ليه من الأساس
ملك بغموض وبرود شديد: في حاجة تخصني هروح أجيبها
فهد ببرود: احنا رجالتك دلوقتي يبقى هنروح معاكي برضو
أدهم بهدوء واستغراب: آه صح يا ملكة أومال فين رجالتك اللي بيشتغلوا معاكي
نظرت إليه ملك وقالت ببرود: في شغل مهم وهيجوا على بالليل دلوقتي انتوا هتسلموا سلاح الملكة
فهد باستغراب: ده إيه احنا معانا سلاحنا
ملك ببرود شديد: اللي معاك ده سلاح المخابرات لكن دلوقتي انتو رجالتي أنا يعني تستخدموا سلاح مختوم بختم الملكة
عمر وهو ينظر إليها: أنا لأول مرة أعرف إن في سلاح مختوم عليه بختم الملكة
ابتسمت ملك ببرود وقالت: في حاجات كتير هتعرفوها في الشغل معايا تمام منصوووووووور
دخل منصور القصر بسرعة كبيرة وقال: تحت أمرك
ملك ببرود شديد: سلم السلاح للشباب وتذهب إلى الأعلى وذهب منصور وأتى بعد مدة قصيرة وأعطى فهد سلاحا وقال: خد ده سلاحك دلوقتي
أمسك فهد هذا السلاح ونظر إليه وابتسم ببرود وأعطى منصور الشباب ونظر عمر إليه وقال بإعجاب شديد: واو أنا أول مرة أشوف سلاح زي ده
ابتسم منصور وقال: ده من خمس الأسلحة في العالم كله هتعرفوا تستخدموه ولا أقولكم ازاي
لعب فهد بالسلاح وقال ببرود: روح انت سكتك خضرا
أومأ له منصور وذهب إلى الخارج بالفعل ونظر أدهم إلى السلاح الذي لم يكن مجرد سلاح بل كان هيبة عائلة كاملة مسدس ذهبي لامع يبرق تحت الضوء كقطعة من المجوهرات القاتلة ومقبضه من الجلد الأسود الخشن يثبت في اليد بثقة من يمسكه لا يحتاج أن يتكلم فالكل يعرف من هو
قال بابتسامة: بس السلاح جامد قولتلك هنتعلم وهنعمل حاجة جديدة يا فهد
نفخ فهد بقوة وهو ليس موافق على كل ما يحدث وقال: الأيام اللي جاية سواد يلا خلينا نشوف هننام فين في أم القصر ده
عمر بتعب وألم في أنحاء جسده: آه والله أنا اتكسرت خلاص منهم لله على اللي حصلي ده أنا مش مسامح على كل ده والله
فهد بسخرية شديدة: مين كان يصدق إن الوحوش يعيشوا في بيت تاجرة سلاح ومخدرات لا وكمان تساعدنا في مهمة الدنيا دي بتخلينا نعمل حاجات محدش يتوقعها ويا عالم إيه اللي هيحصل تاني
تنهد أدهم بقوة كبيرة وقال: ربنا يسترها
أنهى حديثه وفكروا في الذي سيحدث معهم وهم مع هذه الملكة التي لا أحد يعلم إلى أين ذهب بهم القدر وهم معها فماذا سوف يحدث معهم