بعد ما فارس قرر يطلع عند ليالي عشان تنزل العشاء....
عند ليالي...
كانت ليالي قاعدة في أوضتها، سرحانة في أفكارها، لحد ما سمعت خبط على الباب.
ليالي بضيق: أوووف، ما قولتلك يا داده إني مش جعانة!
وفجأة، الباب اتفتح ودخل فارس بكل هدوء.
فارس ببرود: بس أنا مش داده.
ليالي بصتله بصدمة، واتعدلت في قعدتها بسرعة، والتوتر ظهر على ملامحها.
ليالي بتلعثم: أ... إنت!
فارس رفع حاجبه باستفزاز: أنا إيه؟!
وبدأ يتمشى في الأوضة، بيتفرج على تفاصيلها باهتمام، لحد ما عينه وقعت على المكتب اللي عليه دفتر ليالي.
مد إيده ياخده، لكن ليالي جريت بسرعة وخطفته من إيده قبل ما يفتحه.
ليالي بضيق: هات ده! وبعدين إنت جاي ليه أصلًا؟!
فارس بص لها باستغراب من رد فعلها، لكنه ما علّقش على الدفتر.
فارس بهدوء وهيبة: مش عايزة تنزلي تتعشي ليه؟
ليالي ببرود: قولت مش جعانة.
فارس: وإنتِ آخر مرة كلتي إمتى؟
ليالي سكتت، وبدأت تفكر فعلًا في آخر مرة أكلت فيها.
فارس لاحظ سكوتها، فضيّق عينيه وقال بضيق:
فارس: بجد يا ليالي؟! إنتِ مش فاكرة آخر مرة كلتي إمتى؟
ليالي بتوتر وهي بتحاول تدارِي ارتباكها: احم... لا طبعًا فاكرة، امبارح بليل.
فارس رفع صوته بعصبية:
فارس: إنتِ بتستعبطي يا ليالي؟! من امبارح ماكلتيش، وكمان مش عايزة تتعشي؟! ولما تتعبي بعد كده، هتعملي إيه؟!
ليالي اتوترت من صوته، وبدأت الدموع تتجمع في عينيها، لكنها حاولت تتمالك نفسها.
ليالي بضيق: أنا حرة! وإنت مالكش دعوة بيا، ولا حد له دعوة أنا باكل أو ماكلش!
فارس بص لها بحدة، واتكلم بنبرة حاسمة:
فارس: وأنا مش أي حد يا ليالي، أنا ابن عمك و ليا حق أخاف عليكي
ليالي بعناد، وعيونها بدأت تدمع أكتر:
ليالي: لأ، أنا حرة وبراحتي! ومحدش له إنه يتحكم فيا!
فارس كان لسه هيرد عليها، لكن أول ما شاف دموعها وهي بتحاول تمنعها، سكت فجأة.
اتغيرت ملامحه، وأخد نفس عميق عشان يهدى نفسه، وبعدها قرب منها بهدوء.
فارس بصوت أوطى: إنتِ بتعيطي ليه دلوقتي؟! هو أنا جيت جنبك؟
لكن كأن سؤاله كان آخر حاجة ليالي محتاجاها عشان تنهار.
دموعها نزلت أكتر، وبدأت شهقاتها تعلى وهي بتحاول تتكلم وسط عياطها.
ليالي بصوت متقطع: أنا... أنا مبحبش حد يتعصب عليا، ولا بحب الصوت العالي! ومش من حق حد يقولي أنا حرة ولا لأ، ولا يحكم عليا لمجرد إنه شاف حاجة من اللي هو عايز يشوفها، ومش عارف أنا مريت بإيه أصلًا!
وقفت لحظة تحاول تاخد نفسها، ومسحت دموعها بعصبية، وكملت:
ليالي: مش كل حاجة بتبان قدام الناس بتبقى الحقيقة... ومش معنى إن حد ساكت إنه ضعيف، ولا معنى إنه مش بيتكلم إنه معندوش وجع!
فارس فضل باصص لها في صمت.
كان واضح قدامه إن كلامها أكبر بكتير من مجرد خناقة على العشا، وإن فيه وجع مستخبي جواها، وجع هو لسه ميعرفش عنه أي حاجة.
لكنه قرر ما يضغطش عليها بأسئلة.
قرب منها أكتر، ورفع إيده يمسح دموعها برفق، واتكلم بنبرة هادية مكنتش معتادة منه.
فارس: خلاص يا ليالي، اهدي... حقك عليا.
ليالي فضلت تعيط، فكرر كلامه بهدوء:
فارس: حقك عليا يا ستي، مش هعلي صوتي عليكي تاني. بس اهدي بقى، عشان خاطري.
وبص لها بحنان خفيف، وكمل:
فارس: اهدي يا لي لي.
ليالي بدأت تحاول تهدى، لكنها لسه متأثرة بالموقف.
ليالي بصوت ضعيف: أنا مش هنزل أتعشى... مش عايزة...
فارس قاطعها بهدوء:
فارس: خلاص، خلاص يا ستي. مش عايزة تنزلي، متنزليش.
اعملي اللي إنتِ عايزاه، بس اهدي.
ليالي سكتت شوية، ولما بدأت تستوعب الموقف، أخدت بالها من قربه منها، ومن إيده اللي لسه بتمسح دموعها.
اتوترت، وبعدت عنه بسرعة وهي بتمسح وشها بإيديها.
فارس لاحظ ارتباكها، لكنه قرر ما يحرجهاش.
فارس بهدوء: ليالي... إنتِ كويسة؟
ليالي بصتله، وردت برقة وهي بتحاول تخفي أثر العياط:
ليالي: آه، كويسة.
فارس فضل باصص لها لحظة، وبعدها قرر يغيّر الموضوع ويخرجها من الحالة اللي هي فيها.
فارس باستعطاف مصطنع: طب خلاص، بس في مشكلة كبيرة أوي دلوقتي.
ليالي باستغراب: مشكلة إيه؟
فارس بحزن تمثيلي: أنا بقى! أنا اللي هموت من الجوع!
ليالي بصتله بعدم فهم.
ليالي: وإنت مالك يا سيدي؟! ما تنزل كل!
فارس محاولا استعطافها و مكمل تمثيله:
فارس: آكل إزاي بس؟! ده أنا من الصبح ماكلتش، وبسببك كده هفضل جعان لحد بكرة!
ليالي بدأت تستغرب أكتر، وبعدها قالت بسخرية:
ليالي: أيوه، وأنا ذنبي إيه؟! هو أنا اللي قفلت المطبخ عليك؟!
فارس هز راسه بأسى مصطنع.
فارس: لا حول ولا قوة إلا بالله! دي بنت عمي اللي لسه تاني مرة أشوفها، واللي كنت مستني اليوم اللي نتجمع فيه كلنا، وفي الآخر مش عايزة حتى تتعشى معانا!
ليالي بصتله شوية، وبعدها طلعت تنهيدة باستسلام.
ليالي: خلاص، هنزل! بس عشان ما أشيلش ذنبك لو مت من الجوع.
وبينزلوا
───
على سفرة العشا...
أول ما ليالي دخلت مع فارس، كانت فاطمة قاعدة على السفرة، وبمجرد ما شافتهم، مصمصت شفايفها وقالت بتلميح واضح:
فاطمة: كل ده عشان الأميرة تتكرم وتنزل تقعد معانا؟!
فارس مال ناحية ليالي وهمس لها:
فارس: مترديش عليها، ولا كأنك سمعتي حاجة.
وبعدها رفع عينه ناحية فاطمة، وبص لها بجمود.
فارس: بتقولي حاجة يا عمتي؟! معلش، أصل صوتك مش واصل لحد هنا!
فاطمة اتجمدت مكانها، وبصت له بغيظ، لكنها اضطرت تسكت.
فارس سحب الكرسي وقعد، وليالي قعدت جنبه، وكأن مفيش أي حاجة حصلت.
نور كانت متابعة اللي حصل من أوله، وأول ما لقت فرصة، قربت من ليالي وهمست لها وهي بتحاول تمنع ضحكتها:
نور: أووووع! بتولع! اتنين لصفر!
ليالي بصتلها باستغراب وهمست:
ليالي: إيه الـ 2-0 دي يا مجنونة؟! إنتِ بتحسبي إيه؟!
نور كتمت ضحكتها بالعافية.
نور: بحسب كام مرة فارس خرّس عمتك النهارده! دي هتفرقع من الغيظ!
نور قربت منها أكتر، وقالت بفضول:
نور: سيبك من ده كله، قوليلي بقى... فارس قالك إيه فوق عشان تنزلي معاه؟!
ليالي بهدوء: ولا قال حاجة! أنا بس نزلت عشان ما أحرجوش. مهما كان ابن عمنا، ودي أول مرة نتجمع كلنا كده.
نور بصتلها بنظرة شك.
نور: آه طبعًا! عشان ما تحرجيهوش، وابن عمنا، وأول مرة نتجمع... كلام جميل جدًا! هحاول أصدقك.
ليالي لفتت ناحيتها بجدية مصطنعة:
ليالي: صدقي يا حبيبتي، عشان دي الحقيقة فعلًا. وكلي بقى، كفاية رغي!
نور ضحكت وهي بترجع لطبقها.
في اللحظة دي، أحمد بص لهم بضيق خفيف.
أحمد: يا ريت ناكل في هدوء شوية.
الكل سكت وبدأ ياكل، وبعد دقائق، فارس حط المعلقة واتكلم بهدوء:
فارس: جدي، أنا حبيت أقولك إني هقعد هنا فترة، لحد ما أخلص التجديدات اللي في شقتي.
المحمدي ابتسم بحب.
المحمدي: حبيبي يا فارس، دي كلها أملاكك، اقعد براحتك. البيت بيتك يا ابني.
فارس هز راسه من غير ما يتكلم.
أما فاطمة، فبصت لبنتها يارا نظرة ذات مغزى، كأنها بتفكرها إن وجود فارس في الفيلا فرصة لازم تستغلها.
يارا فهمت نظرة أمها، لكنها اكتفت بابتسامة خفيفة.
وانتهى العشا، وكل واحد بدأ يطلع أوضته.
───
في أوضة ليالي...
كانت ليالي نايمة على سريرها، بتتقلب يمين وشمال، وكل شوية تبص في الساعة بضيق.
ليالي وهي بتشد المخدة على وشها: أووووف بقى! هو أنا مش هنام النهارده ولا إيه؟!
غمضت عينيها وحاولت تنام، لكن عقلها رجع غصب عنها للموقف اللي حصل بينها وبين فارس.
افتكرت صوته وهو بيهديها، وطريقته وهو بيمسح دموعها، وكلمته اللي فضلت تتردد في ودنها:
«اهدي يا لي لي.»
فتحت عينيها فجأة، واعتدلت في قعدتها.
ليالي وهي بتكلم نفسها: إيه يا بنتي اللي إنتِ فيه ده؟! هو ناقصاكِ إنتِ كمان؟!
حاولت تطرد الأفكار من دماغها، لكن الحقيقة إنها من وقت وفاة أمها، ما افتكرتش إنها حست بالأمان والحنية بالشكل ده.
الإحساس كان غريب عليها، وده اللي خوفها أكتر.
مش لأنها مش محتاجة الحنية، بالعكس... لكنها كانت خايفة تتعلق بإحساس هي مش ضامنة إنه هيفضل موجود.
ليالي أخدت نفس عميق، وبعدها بصت ناحية المكتب.
ليالي: خلاص، طالما النوم مش راضي ييجي، يبقى نكمل الرواية أحسن!
قامت من سريرها، وخدت دفترها، ونزلت المطبخ عشان تعمل لنفسها فنجان قهوة يساعدها تركز.
───
في المطبخ...
أول ما دخلت، اتفاجئت بفارس واقف قدام الرخامة، بيحضّر قهوته.
ليالي وقفت مكانها للحظة.
فارس لاحظ وجودها، ولف ناحيتها باستغراب.
فارس: إنتِ لسه صاحية؟! في حاجة ولا إيه؟
ليالي حاولت تخفي توترها، وردت بشكل طبيعي:
ليالي: لا، بس عندي أرق ومش عارفة أنام. فنزلت أعمل قهوة وأكمل روايتي.
فارس رفع حاجبه بدهشة، وبص للدفتر اللي في إيدها.
فارس بصدمة واعجاب ... مش بس حلوة وبتكتبي روايات كمان كدة كتير عليا كل شوية بكتشف حاجة جديدة فيكي .
ليالي ابتسمت بخجل بسيط، وحاولت تداريه.
ليالي: وإنت بقا صاحي ليه ؟
فارس بابتسامة وهو بيصب القهوة.
فارس: عندي شغل الكلاينت عايزني شخصيآ اصمملو الديكور ، وبعدها مد إيده بكوباية قهوة ناحيتها.
فارس: اتفضلي، دي قهوتك.
ليالي أخدتها منه، وارتشفت منها رشفة صغيرة، وبعدها ابتسمت بإعجاب.
ليالي: واااو! حلوة أوي، تسلم إيدك.
فارس: بالهنا والشفا.
ليالي بصتله باهتمام، وبعدها قالت بعفوية:
ليالي: على فكرة، أنا ممكن أساعدك في التصميمات لو محتار بين حاجتين. يعني لو محتاج رأي تاني، ممكن تسألني.
بيخرجوا من المطبخ واتجهوا للجنينة، وكل واحد فيهم ماسك كوباية القهوة بتاعته.
كان الجو هادي، والهوا لطيف، وإضاءة الجنينة عاملة جو مريح للأعصاب.
فارس بيضحك: وإنتِ بتفهمي كمان في الديكور؟
ليالي بغرور وثقة: على فكرة، أنا مهندسة ديكور وشغالة في شركة كمان.
فارس بنظرة إعجاب: مش بقولك؟ كل مرة باكتشف فيكي حاجات أكتر، وبتصدميني!
ليالي بغرور .. اتعود بقا على كدة كتيير
فارس بضحك ... ههه طب براحة علينا بس
ليالي بابتسامة ورقة: بس غريبة! أول مرة أشوفك بتضحك. أنا كنت فاكراك مبتضحكش خالص، وبتخاف تضحك.
فارس بابتسامة: وحلو ولا وحش على كده؟
ليالي بعدم فهم: هي إيه؟
فارس بيقرب ويبص في عيونها أكتر.
فارس: ضحكتي حلوة؟
ليالي بتوهان وتوتر: آه، حلوة... اضحك على طول!
فارس بيبعد وبمشاكسة: وأنا بقول كده برضه!
ليالي بتفوق بضيق وتوتر: يعني أنا قصدي طبيعي، أي حد بيضحك بيبقى أحلى... قصدي ضحكته بتبقى حلوة. بص، أنا... أنا بجملك وخلاص، بدل ما إنت عامل زي الروبوت وخايف تضحك كده!
فارس بيضحك: خلاص، خلاص، اهدي كده. أنا فاهم قصدك.
ليالي بتبصله بضيق وتوتر: فاهم إيه؟
فارس بضحك أكتر: بس خلاص، اهدي! في إيه؟ خلينا نشوف الشغل.
ليالي وهي بتحاول تهدى من التوتر: أنا بقول كده برضه. يلا
شوف شغلك وأنا أشوف روايتي.
وقعدوا على الكراسي، وكل واحد بيشوف اللي هيعمله.
بدأ فارس يشتغل على اللابتوب.
فتحت ليالي الدفتر...
«لا أنت بعيد فأنتظرك، ولا أنت قريب فألقاك...
ولا أنت لي فاطمئن قلبي، ولا أنا محروم منك فأنساك...
أنت في منتصف كل شيء...
في منتصف قلبي تحديدًا...»
محمود درويش
«أخاف من احتياجي للأمان أن يوقعني في الأوهام.»
ليالي المحمدي
بقلم 𝓜𝓮𝓶𝓸 ✍️🏻
بعد شوية
فارس: لي لي، لي لي!
قفلت ليالي الدفتر.
ليالي: إيه يا فارس؟
فارس: تعالي، هاخد رأيك في حاجة، ونشوف المهندسة اللي جواكي.
ليالي بتقرب وتقعد جنبه بثقة: هتشوف! وريني بقى.
فارس: بصي يا لي لي.
بيوريها التصميم ويقولها:
فارس: حاسس إن في حاجة ناقصة، أو في حاجة غلط.
ليالي بتركيز: أممم، بص يا فارس، دلوقتي الريسبشن تحسه زحمة. من وجهة نظري، إحنا نبدل الركنة الكبيرة بواحدة أصغر شوية ومودرن، والصالون ممكن عادي نسيبه زي ما هو، ونشيل التمثال الكبير ده ونحط مكانه حاجة أنتيكة وتبقى أصغر.
والألوان محتاجة تبقى أهدى ومريحة للعين، لأن مع الإضاءة بتختلف.
آه، والسقف، أنا شايفة إن الجبس بورد لو بقى واحدة بس في النص هيبقى أحلى وأهدى كده.
تحس إن في زحمة كتير. كل ما الحاجة كانت أهدى وأرق، كانت أحلى ومريحة للنفسية والعين.
يعني لازم الواحد يحس إنه حر في المكان الموجود فيه، مش محبوس وسط زحمة.
دي وجهة نظري، إيه رأيك؟
فارس بإعجاب: بتبهريني أكتر وأكتر! شاطرة يا لي لي، بجد.
ليالي بترجع شعرها لورا بغرور: ميرسي، ميرسي!
فارس: ههههه، طب بقولك إيه، ما تيجي تشتغلي معايا في الشركة أحسن بدل ما تشتغلي عند الغريب؟
ليالي: هههه، لا شكرًا، أنا مبسوطة في الشركة اللي أنا فيها.
فارس: فكري بس، وحطي السالاري اللي إنتِ عايزاه. وكمان يا بنتي، دي من أكبر الشركات اللي في السوق.
ليالي وعملت نفسها بتفكر: أممم، مدام أنا هحط السالاري، خلاص موافقة!
فارس: ههههه، مادية يعني؟
ليالي: مش أوي، ههههه!
يالهوي، الوقت اتاخر اوي! أنا محتاجة أنام، مش قادرة خلاص.
وبدأت تتثاءب.
فارس: وأنا كمان هقوم. أنا كلها ساعات وهروح الشركة. تحبي تيجي تشوفيها عشان تعرفي تحطي السالاري صح؟ هههه.
ليالي: أممم، فكرة! ليه لأ؟ ههههه.
ابقى ابعت أم خالد تصحيني بقى لما تصحى.
فارس في باله: أم خالد؟ آه، وماله!
فارس: أوكيه، اتفقنا.
وهما طالعين، ليالي افتكرت حاجة ووقفته.
ليالي: فارس!
فارس في سر يالهوي على فارس وبعدين يبصلها : إيه يا ليالي؟
ليالي: إنت قولتلي إنك عايش في شقتك ومش عايش هنا، وأنا مفهمتش حاجة، وقولت...
فارس بابتسامة وهدوء: أنا من يوم ما رجعت وأنا مستقل في شقة تخصني، بعيد عن هنا. ما بقعدش هنا أصلًا.
ليالي باستغراب: بس ليه يعني؟
فارس: عادي، بحب أعيش لوحدي، منفرد بحياتي الخاصة.
ليالي بتسأل بفضول: طب وإيه اللي رجعك؟
فارس بابتسامة: متهيألي جاوبت على السؤال ده على السفرة. ودلوقتي اطلعي نامي عشان تقدري تصحي، أنا ما عنديش تأخير.
ليالي وهي بتطلع: على فكرة، مش مقنعة بالإجابة!
فارس ببرود: مش لازم تقتنعي يا لي لي.
ليالي دخلت أوضتها وهي بتقول في سرها:
كتلة تلج!