
رواية فرصة ثانية الفصل السادس عشر16 بقلم همس هشام
دلف يحيى إلى المكتبة يبحث عنها، فوجدها تجلس في إحدى الزوايا وتمسك رسمتها تتأملها بابتسامة صغيرة، اقترب وجلس بجانبها فقالت ملك بفزع:
- إيه الدخلة دي ما تكح ولا تحمحم ولا أي حاجة
- إنتي اللي سرحانة في قدراتي الفنية، لكن أنا جيت وقعدت عادي
- اتأخرت أوي كدا ليه ده أنا كنت هروح أنام
- عشان كنت هجيبك من قفاكي
رفعت حاجبها وقالت بتحدي:
- تجيب مين من قفاها يا حبيبي
أشار عليها وقال ببرود:
- إنتي
- وريني اللي تقدر عليه
تنهد وقال:
- أنا أقدر على كتير، لكن مش كل مرة لينا نتخانق، وأنا عايزك تقرئي الكتاب ونخلص من الاتفاق ده
- قول اسمه خلينا نخلص
- البؤساء
- من ناحية إننا بؤساء فإحنا بؤساء فعلًا
قالت جملتها بمرح، فضحك على مزاحها، ثم نهض يأتي بالكتاب وجلس بجانبها، فقالت بتسأل:
- إنت هتخليني أقرأ الخمس أجزاء ولا الأول بس
دفع الكتاب أمامها وقال:
- اقرئي بس الأول ونشوف
لتمد يدها تأخذ الكتاب وتفتح أول صفحاته وتروي له كلماته.
_____________
دلفت ملك إلى المنزل ليستقبلها عادل بعناق دافئ كانت بحاجته، تمسكت به وقالت:
- كنت محتاجة حضنك أوي يا بابا
مسد على ظهرها بحنان وقال:
- أنا دايمًا جنبك يا حبيبة بابا
ابتعدت عنه وحاوط كتفها بيده وسارا سويًا إلى غرفة المعيشة، جلس عادل، ومسح على الأريكة بجانبه لكي تجلس، فجلست بالفعل وقال:
- روحي غيري وتعالي
نهضت مرة أخرى وقالت بتعب:
- حاضر
ذهبت إلى غرفتها صاحبة الألوان الزاهية، دلفت وأغلقت الباب خلفها وسندت عليه، لتسمع صوت هاتفها يرن، أخرجته من الحقيبة وكان المتصل ماهر، أجابت وهَدرت به:
- إنت إزاي تيجي المصحة كدا وتقف قدامه، إنت عارف كان ممكن يحصل إيه، كان ممكن يرجع لنقطة الصفر تاني، إنت عايز تضيع تعب كل اللي حواليك، عشان نبقى زيك فاشلين، أوعى يا ماهر تيجي تاني المصحة، فاهم أوعى أشوفك في المصحة
استمع إلى صراخها عبر الهاتف وقال لها بعد أن انتهت:
- أولًا يا ملك إنتي تكلميني بصوت واطي ومن غير زعيق، أنا أخوكي الكبير...
لتقاطعه قائلة:
- أخويا الكبير... ومش بتتصرف زي الكبار ليه، ما سألتنيش ليه قبل ما تيجي المصحة ده لو كانت نيتك خير، لكن بأفعالك دي إنت بينتلي إنك مش ناوي على خير أبدًا.
- إنتي مش هتدخلي جوايا وتعرفي نيتي، أنا كنت جاي أطلب منه إنه يسامحني، وهخلي شريك مع خالد في الشركة
- تيجي وتسألني أنا الدكتورة بتاعته وأدرى بحالته، قبل ما تعمل أي تصرف يخص يحيى تسألني، ويلا سلام
ثم أغلقت الهاتف بوجهه، وأبدلت ملابسها بغضب، لتجلس على الفراش تحاول أن تهدئ أعصابها قبل الخروج لوالدها، وبعد أن أجرت تمارين التنفس وقد أتمتها في عشر دقائق، خرجت لعادل بوجه مبتسم وجلست بجانبه، فقال لها:
- أكتر حاجة بحبها فيكي وواخداها من مامتك، إنك رغم كل حاجة بتضحكي والابتسامة على وشك
- بحاول أبقى كويسة يا بابا واللي حواليا ملهمش ذنب باللي بمر بيه
- بس أنا أبوكي، تقدري تبقي على طبيعتك، زعلانة ازعلي، فرحانة افرحي،
اقتربت منه تضع رأسها على كتفه وقالت:
- ربنا يخليك ليا يا بابا أنا من غيرك كان زماني ضايعة
مسح على شعرها بحنان وقال:
- عملتي إيه مع يحيى
تنهدت بعمق وقالت:
- كملت علاجه تحت إشراف دكتور، لكن لسه ما قلتلوش إن أنا أخت ماهر، الوقت مش مناسب خالص إنه يعرف دلوقتي
- أنا واثق إنك هتقدري تحلي المشكلة وهتطلعي بأقل الخسائر
- يا رب يا بابا يا رب
______________
صعد حسام إلى السطح بحماس، يتمنى لو إنها هنا يريد أن يزف لها الخبر السعيد، فقد اقترب من أن تكون رحمة زوجته وحبيبته أمام الناس أجمعين، جلس ينتظرها بحماس، وطال انتظاره طال كثيرًا ولم تأتِ، وعلى الناحية الأخرى كانت رحمة تدرس، لتأتي لها دينا تقول:
- ما تيجي يا بت نقعد شوية على السطح نشم شوية هوا
- بذاكر يا دينا عندي امتحانات
لكزتها قائلة:
- يا بت تعالي نطلع شوية صغيرة متبقيش غلسة بقى
فصاحت بها:
- اطلعي لوحدك يا دينا وسيبيني في حالي
- مالك متعصبة ليه كدا
أخذت نفسًا عميقًا وزفرته ببطء وقالت:
- ما فيش حاجة، الامتحانات بس
جلست دينا بجانبها وقالت:
- لا أكيد مش مذاكرة، أنا عارفاكي، حاجة تخص حسام ولا أمك مضايقاكي
نظرت إلى الأرض وقالت بخجل:
- حسام بقاله كام يوم مش ظاهر
- لا أنا بشوفه وأنا راجعة الشغل كل يوم
نفت برأسها وقالت:
- لا مش قصدي كدا
- أمال
- ساعات لما بطلع السطح بيبقى موجود، وبنتكلم لكن بقاله كام يوم مش ظاهر
- طب ما تطلعي النهاردة ممكن يبقى موجود
- لا مش عايزة أتَعشّم ويطلع مش موجود
نظرت بتفكير ثم التقطت الشال ولفته على كتفها وقالت:
- أنا هطلع أشوفهولك ولو كدا هاجي أقولك
غادرت دينا ترى إذا كان حسام موجود أم لا فهي عاشقة وتفهم شقيقتها حتى لو كان لكل واحدة طريقة للوصول إلى معشوقها، دلفت إلى السطح فوجدته يهم بالرحيل، لتوقفه قائلة:
- استنى رايح فين
التفت لها وقال:
- عايزة إيه يا دينا
- اصبر دقيقة
ثم غادرت سريعًا، ودلفت المنزل ومنه إلى غرفتها هي ورحمة التي كانت تنتظرها فقالت لها دينا:
- حسام فوق، روحي شوفيه
هزت رأسها عدة مرات بالنفي وقالت:
- لا مش هروحله
- نعم يا أختي أمال خلتيني أروح أشوفه ليه
- لا خلاص رجعت في كلامي هتكسف أوي
لفت الشال على كتفها ودفعتها قائلة:
- يلا يا بت ومتتأخريش وأنا هشتت أمك على ما تيجي وهسيبلك الباب مفتوح
دفعتها إلى الخارج وتركت الباب مواربًا، ثم اتجهت إلى والدتها في المطبخ، مدت يدها التقطت خيارة تأكلها فقالت صباح:
- طمنيني يا بت يا دنيا على الموضوع إياه قبل ما ييجي حد وما نعرفش نتكلم
زفرت بضيق وقالت:
- زي الزفت يا ماما، الاتنين أخدولي إجازة وقاعدين في البيت، ولا كأنهم بيقضوا شهر عسل جديد
فقالت صباح في حيرة:
- إزاي ده فات يجي أسبوع ولا حاجة
- معرفش شكله فستك ولا هو بيقربلي ولا هي فيها حاجة
- طب ما تتلحلي كدا وشوفيه هو هيعمل إيه هيصدك ولا لا
قضمت الخيارة وقالت:
- هشوف يا ماما هشوف
على الناحية الأخرى، كانت تقف رحمة أمام حسام ووجهها متورد خجلًا، وكان هو يشعر بخجلها هذا، فقال:
- عاملة إيه، بقالي كام يوم مشوفتكيش
أجابته بخفوت:
- كويسة الحمد لله، إنت عامل إيه
- بخير وجايبلك أخبار كلها خير إن شاء الله
رفعت نظرها وقالت بتسأل:
- أخبار إيه
ليقول بابتسامة واسعة:
- أنا لاقيت شغل وهبدأ من بكرا
فقالت بسعادة جلية:
- إنت بتتكلم بجد يا حسام
فقال بصوته الرخيم:
- بجد يا قلب حسام
وعندما سمعت كلمته نظرت مرة أخرى للأرض بخجل وقال:
- تعرفي إنك وحشتيني في الأيام اللي مشوفتكيش فيهم، وحشتيني أوي بجد
لم تجبه وظلت تنظر إلى الأرض ووجهها يزداد تورّدًا، ليكمل:
- أنا مش قادر أستنى اللحظة اللي هتكوني في بيتي وحلالي يا رحمة، عارفة أنا أول قبض ليا ولا هاكل ولا أشرب بيه أنا هروح أجيب بيه دبلتين وأخطبك، وتبقي بتاعتي قدام كل المنطقة
- حسام، اسكت
قالتها بخفوت خجول بالكاد سمعه، فقال لها:
- حاضر يا عيون حسام
- أنا هنزل
فقال برجاء:
- خليكي شوية
- مينفعش دينا قالتلي متتأخريش
- طيب خلاص لكن هشوفك بكرا، هستناكي
أومأت له سريعًا، ثم غادرت مسرعة متجهة إلى منزلها ومنه إلى غرفتها، وكانت دينا تنتظرها وفور أن رأتها:
- هاا عملتي إيه
اقتربت منها بسعادة وقالت:
- حسام لاقى شغل يا دينا، وقالي هيجي يخطبني قريب
وضعت دينا يدها فوق فمها واصطنعت الزغرودة وقالت:
- ألف مبروووك
لتتعانقا، فقالت دينا:
- ربنا يكملك أمورك على خير يا حبيبتي
عانقتها بقوة تبث فيها كل سعادتها وقالت:
- اللهم آمين يا رب
________________
دخل أمير المنزل والعتمة كانت في كل أرجائه، مد يده يفتح النور، وبحث عنها، يريد أن ينتهي اليوم بمصالحتهم، لكن وجدها قد نامت بالفعل، تنهد بضيق، ثم اقترب منها يقبل جبينها، وأمسك هاتفه وشغل القرآن الكريم ووضعه بجانبها لعل الكوابيس تذهب عنها ودلف إلى المرحاض يأخذ دوش سريع، لتفتح عينيها بانزعاج، فترى هاتف أمير بجانبها ويصدر منه صوت القرآن الكريم، لتقوم بغلقه والنوم مرة أخرى، وبعد أن ذهبت في النوم زارها كابوس مرعب، لنفس الفتاة ذات الوجه البشع، تقترب منها وتمد يدها على بطنها ثم تبعدها وقد امتلأت بالدماء، فتنظر نهى إلى بطنها فتجد أن الدماء تنزل منها بغزارة، فتحت عينيها بفزع وكان أمير بجانبها ينظر لها بقلق، لترتمي بين أحضانه تبكي بحرقة، وأمير يمسد على ظهرها برفق، وضعت نهى يدها على قلبها وتأخذ أنفاسها بصعوبة وقالت بتقطع:
- نفسي أنام مطمنة يا أمير... كل ما أنام أحلم بكابوس أوحش من اللي قبله... أنا تعبت أوي، الأصوات في ودني على طول لدرجة هتجنني... أنا معرفش مالي، معرفش
شدد عليها بين ذراعيه وقال:
- أنا جنبك يا حبيبتي، جنبك وهتبقي كويسة إن شاء الله
أجابته ببكاء:
- إمتى، إمتى هبقى كويسة أنا عايزة حد يقولي إمتى وأنا هستحمل لحد الوقت ده، لكن أنا حاسة بخنقة وحشة أوي
أبعدها عنه واحتوى وجهها بين يديه وقال:
- بكرا هقولك نعمل إيه، لكن دلوقتي تعالي ننام
مسح دموعها وقبّل جبينها وقال:
- تعالي نامي في حضني والكوابيس مش هتيجي
تمدد وتمددت بجانبه، أخذها بين أحضانه ووضعت رأسها على صدره، يمسح هو على شعرها بحنان، حتى ذهبت في النوم، وظل هو مستيقظًا يفكر فيما تمر به، مد يده وأخذ هاتفه وبحث عن الأعراض التي تحدث لها، وكانت النتائج تدور بين الحسد والسحر ومشكلة نفسية، ليستبعد النتيجة الثانية ويجعل الاحتمالية بين الحسد ومشكلة نفسية، ثم أغلق الهاتف وقد عقد العزم بمحادثة ملك غدًا.
_______________
صباح يوم جديد، يجلس كل من يحيى وحياة على طاولة الفطور، يتناولون الطعام ويتناقشون في الرواية، فقال يحيى:
- أنا مش فاهم يعني إيه يسرق عيش يتسجن ٢٠ سنة
وضعت العيش المغموس بالجبن في فمها وقالت:
- السرقة سرقة يا يحيى
- ماشي بس مش لدرجة ٢٠ سنة الدنيا نسبة وتناسب
- كان القانون كدا ساعتها هنعمل إيه
- بس كويس إنه قابل الأسقف وعامله كويس ومهتمش إنه كان مسجون
ثم قال بحماس:
- بقولك إيه هتكمليهالي إمتى
نظرت له ولأول مرة ترى الحماس في عينه، فقالت وهي تمضغ الطعام:
- ارحمني شوية أنا لسه قرأت ١٠٠ صفحة امبارح
- طب بذمتك مش حلوة؟
- حلوة لكن بالعقل وأنا كمان بقرأ بصوت عالي ريقي نشف
ابتسم لها وقال:
- هعمل حسابي في مية وعصير وبعدين ده اتفاق لازم تنفذيه
زفرت بقوة وقالت:
- افطر يا يحيى افطر ونشوف الموضوع ده
نظر لها نظرة سريعة وأكمل طعامه، كانت هادئة اليوم على غير المعتاد، فقال لها بتسأل:
- مالك هادية كدا النهاردة
- هو أنا في كل حالاتي مش بعجب
نهضت بضيق قائلة:
- أنا هقوم أحسن وأسيبك تفطر على رواقه
أخذت ورقة مطوية على الطاولة ورحلت، نظر لظهرها وهي ترحل بعدم فهم، لينهض خلفها وناداها:
- حياة استني
أسرعت في خطوتها عندما سمعت صوته، لكن أسرع يحيى قليلًا، وأمسكها من مرفقها وجعلها تنظر له، ليجد أن عينيها ممتلئتان بالدموع، ليسألها بقلق:
- مالك يا حياة بتعيطي ليه
مسحت دموعها ورفعت الورقة أمامه وقالت:
- جالي جواب من بابا
سار بها إلى أقرب مقعد وقال:
- طب وإيه اللي يخليكي تعيطي، ده باباكي باعتلك جواب
فقالت بين شهقاتها:
- لا مش عايزة أعرف حاجة عنه، هو السبب في كل حاجة بتحصلي دلوقتي
مسد على كتفها برفق، وقال بنبرة حنونة:
- ممكن تبطلي عياط
ثم مد يده بتردد يمسح دموعها، فنظرت له بعيونها البنية التي تلمع إثر الدموع، لأول مرة ترى منه فعلًا حنونًا، لم تكن تدرك أن وراء هذا الشخص الغاضب عابس الوجه شخصًا حنونًا ، ثم قال:
- أنا معرفش إيه اللي حصل بينك وبين باباكي ولا إيه علاقته بأنك هنا، لكن ممكن تقولي لدكتور إبراهيم وهو هيساعدك، ولو عوزتي تحكيلي أنا موجود
توقفت عن البكاء وتستمع له وتصدر منها شهقات إثر البكاء، فهمست له:
- أنا مش عايزة أفتحه
- الأحسن إنك تفتحيه وتشوفي قالك إيه
- تلاقيه كالعادة بيطلب إنه يشوفني وإني أسامحه، وآخر مرة قولتله مش عايزة أسمع صوتك فعشان كدا كتب جواب
اتسعت عيناه من تصرفاتها القاسية تجاه والدها، فقال:
- هو عملك إيه لكل ده
ابتسمت بألم وقالت:
- ما فيش أعداءه عشان ياخدوا حقهم منه خلوني مدمنة، فيلم عربي قديم
قالت جملتها الأخيرة بسخرية مريرة.
- إزاي يعني مش فاهم
- زي ما بقولك كدا، أنا البنت الوحيدة لطارق سرحان اللي كل شغله غلط في غلط، فحبوا ينتقموا منه وما لقوش غير بنته، ينتقموا منه فيها
أغمض عينيه بقوة وقد تذكر الآن من هو طارق سرحان، فقد أخبره عنه حمص في إحدى المرات وأخبره إنه رجل فاسد وعمله غير مشروع، فقال لها:
- وإزاي عملوا فيكي كدا
أغمضت عينيها بقوة تريد أن تتلاشى تلك الذكريات من عقلها، ثم نهضت وهي تشد على الجواب بين يديها:
- ممكن أروح الأوضة دلوقتي ونبقى نتكلم في الموضوع ده بعدين
تحركت سريعًا نحو غرفتها، وكان ينظر إلى أثرها بحيرة، أيتركها بمفردها أم يذهب خلفها، ثم حسم أمره بتركها بمفردها قليلًا من الوقت ثم سيبحث عن غرفتها ويذهب يطمئن عليها.
_______________
كان حسين يقف أمام مدرسة أنس بعد أن أخبرته نسمة بالأمس أن هناك مسرحية في المدرسة ويقوم أنس بدور البطولة ويجب عليه الحضور، أغلق زر جاكيت بدلته، واتجه إلى الداخل، ومن ثم إلى المسرح، سأل عن نسمة وأنس، ليجدهم في الكواليس، كانت نسمة تعطيه ظهرها وتهندم ملابس أنس فكان يرتدي زي أمير، اقترب منهم وفور أن رآه أنس قفز يصرخ قائلًا:
- بابا جه... بابا جه
ترك نسمة واتجه إلى حسين يضمه بقوة وقال:
- وحشتني يا بابا
- وإنت كمان يا حبيبي وحشتني
اقتربت منهم نسمة وعلى وجهها ابتسامة دافئة، فقال حسين فور أن رآها تقترب:
- عاملة إيه يا نسمة
- بخير
هز برأسه، ثم وجهت نظرها إلى أنس وقالت:
- قرب يا أنس عشان أظبطلك هدومك
التفت لها أنس وعادت تهندم ملابسه وبعد أن انتهت، التقطت التاج:
- كدا إنت تمام
قالت جملتها وهي تضع التاج فوق رأسه ليركض إلى المرآة وينظر إلى نفسه بفخر كأنه أمير بحق، كانت تتأمله نسمة بسعادة لسعادة، ليقترب منها حسين ومد يده في جاكيت بدلته وأخرج لوح شوكولاتة ومد يده أمامها وقال:
- اتفضلي
انتبهت على يده إثر صوته، لتجد الشوكولاتة المفضلة لها، أخذتها بابتسامة واسعة وقالت:
- شكرًا يا حسين
تأمل ابتسامتها الرقيقة المميزة بالنسبة له لأنه السبب فيها، فقال:
- العفو يا نسمتي
نظرت إلى لوح الشوكولاتة بخجل وقد تدرجت الحمرة في وجنتها، ركض نحوهم أنس وقال وهو ينظر إلى الشوكولاتة:
- بابا اللي جابلك الشوكولاتة اللي بتحبيها
- أيوه يا حبيبي
أجابته نسمة، ليقول بخفوت وهو ينظر إلى الأرض ويداعب الأرض بقدمه:
- طب بابا عارف كل اللي بتحبيه وبيعمله وإنتي يا ماما عارفة كل اللي بابا بيحبه وبتعمليه ليه منرجعش سوا كلنا
تبادل نسمة وحسين النظرات بتوتر، ثم انخفض لمستواه قائلًا:
- أنا وماما بنحبك يا أنس، لكن إننا نعيش سوا تاني صعب شوية
لينظر له قائلًا:
- بس مش مستحيل صح
ابتسم له وقال ببساطة:
- ما فيش حاجة مستحيلة على ربنا
- يعني أدعي ربنا
داعب شعره قائلًا:
- على طول ادعي ربنا في أي حاجة وكل حاجة وخلي عندك يقين إنه هيقبل
هز أنس رأسه بحماس وقال:
- أنا هروح أخلص المسرحية وأول ما أروح هدعي ربنا على طول
ثم ركض متجهًا إلى فتاة يبدو إنها الأميرة، نهض حسين ونظر إلى نسمة نظرة سريعة ولم يتحدث، وهي التي كانت مستعدة لخطاب الرجوع الذي سوف يقوله لها لكنه لم يتحدث، ثم سمعوا صوت المشرفة تنبه ببدء المسرحية، فقال لها حسين:
- يلا عشان نروح نتفرج على أنس
سارت أمامه وهي تنظر إلى لوح الشوكولاتة بتفكير، حتى وصلوا إلى أماكنهم، جلسا والتفتت له تسأله:
- عملت إيه في موضوع حمص
- اسمه حسام يا نسمة وبقى بيشتغل عندي والنهاردة كان أول يوم ليه وكان كويس جدًا
فقالت بعيون متسعة:
- نعم!!!
ليقول ببساطة:
- هو اتكلم معايا بكل صراحة وأنا حبيت أدي له فرصة
فقالت بسخرية:
- فرصة آه اديت لبياع مخدرات فرصة
- أنا حسيت إنه يستحقها يا نسمة وكمان اديته وقت يثبت فيه نفسه، كان ملتزم هعينه ما كنش يبقى مع السلامة
تنهدت بغضب فلم يرق لها تصرفه لكن لم تتحدث وقالت في نفسها إنه ليس من شأنها، لينظر لها بطرف عينيه ولم يتحدث مرة أخرى.
_____________
تجلس ملك في مكتبها تحتسي مشروبها المفضل الشاي بنكهة التوت، ليصدع صوت هاتفها معلنًا عن اتصال أمير، أمسكت الهاتف وأجابت قائلة:
- إيه يا كناريا
ابتسم ابتسامة صغيرة وقال:
- إيه يا غرابة، عاملة إيه
- كويسة، إنت والكنارياية بتاعتك قاطعين بيا آخر مرة كلمتني كانت بعد ما كنت عندكوا في البيت
تنهد بثقل وقال:
- من ساعتها ونهى مش نهى يا ملك
- يعني إيه
- تصرفاتها غريبة، وبتشتكي من حاجات أغرب، ومش عايز أقول لطنط ناهد تقلق عليها
تركت الكوب واعتدلت في جلستها وقالت:
- قلقتني في إيه
- بتشتكي إنها بتسمع أصوات مش مفهومة وبتقولي إنها حاسة بنفس جنبها، وكوابيس على طول
- كنت فاكراك هتقولي تعب وإرهاق من الحمل
- لا يا ملك ملهوش علاقة بالحمل، أنا خايف عليها أوي وتصرفاتها غريبة جدًا شغلتلها قرآن قبل ما تنام امبارح قامت قفلته وكملت نوم
عقدت حاجبيها وقالت بدهشة:
- إيه ده فيه إيه
أجابها بصوت مختنق:
- مش عارف يا ملك مش عارف لأول مرة أحس إني عاجز كدا مش فاهمها ولا فاهم حاجة
- طب خلاص أنا هاجي وأشوفها ونشوف حل للموضوع ده
- خلاص هنستناكي على الغدا
- تمام اتفقنا
ثم نظر إلى ساعته في معصمه الأيسر:
- هقفل دلوقتي عشان عليا جلسة ومش هتأخر عليكوا
- تمام سلام
- سلام
أغلقت ملك الهاتف وقد ذهب عقلها لدى ابنة خالتها، فما قاله أمير غريب للغاية، نهضت والتقطت كوب الشاي ترتشفه حتى النهاية ثم أخذت دفترها واتجهت إلى يحيى، دقت باب غرفته عدة مرات، لكن لم تسمع إجابة، لتفتح الباب بخوف لعله نائم لكن لم تجده، سألت عنه إحدى الممرضات، فأجابتها أنه كان بالممر منذ دقائق، ذهبت في اتجاه الممر التي أشارت عليه الممرضة لتجد أن يحيى يقف أمام غرفة وينظر إلى الباب ويرفع قبضة يده ثم يخفضها مرة أخرى فيبدو عليه التوتر، اقتربت منه وسألته بخفوت:
- بتعمل إيه هنا يا يحيى
ليجيبها بنفس الخفوت:
- بشوف حياة
لتعلق بخفوت:
- رايح لها أوضتها!!! كدا مينفعش
أجابها بنفس النبرة:
- كنت عايز أطمن عليها بس
ثم قال بنبرة عادية:
- هو أنا ممكن أفهم إحنا بنتكلم كدا ليه
ضحكت قائلة:
- بهزر معاك
ليبتسم قائلًا متأملًا ضحكتها:
- والله لو أعرف إن الهزار هيرجع ضحكتك كنا هزارنا من بدري
سحبته من ذراعه بعيدًا عن الغرفة وهي تقول:
- تعالى بس نبعد عن الأوضة عشان شكلنا وحش وإحنا واقفين قدامها كدا
سار معها قائلًا:
- إحنا رايحين فين، أنا عايز أشوف حياة
- عندنا جلسة يا أستاذ
- محدش قالي إن معاد جلستنا دلوقتي
- أنا بدرتها عشان عندي مشوار مهم
وصلوا إلى غرفة يحيى، ليفتح يحيى الباب ليدخل وتدخل وراءه ملك، جلست على المقعد أمامه وقالت:
- إيه حكاية حياة اللي عايز تطمن عليها دي
- كانت بتعيط جامد الصبح، فقلت أسيبها براحتها شوية تهدى وأشوفها، صعبت عليا أوي
نظرت له وقالت بمكر:
- نصيحة، مينفعش تسيب ست تهمك تهدى، إنك تسيبها تهدى ده أكبر غلط
- تهمني!!!! هي متهمنيش هي صعبانة عليا بس، قصتها صعبة
رفعت حاجبها بدهشة وقالت:
- عرفت الحكاية بالسرعة دي
هز رأسه بالنفي:
- هي حكت حتت منها وهي بتعيط يا دكتورة ملك لكن معرفهاش كلها
أضافت مازحة:
- إنت شكلك لئيم يا باشمهندس يحيى
نظر لها وقال:
- والله معرفش مين فينا اللئيم يا دكتورة ملك
ضحكت ملك على حديثه وقالت:
- كلمت أهلك واطمنت عليهم
- آه وكلهم كويسين وقلتلهم ييجوا ومعاهم أنس حاسس إني بقيت أحسن وشكلي بقى طبيعي شوية ويقدر يشوفني
- أنس ابن أختك
- آه هو، عايز حضرتك تبقي موجودة تتعرفي عليهم
ابتسمت برقة وقالت:
- ده شرف ليا يا يحيى