رواية خبئني بقلبك من قسوة العالم الفصل الرابع عشر14 بقلم ميمو
ليالي مقدرتش تمسك نفسها وفضلت تضحك.
فارس... ما صدقتي! امشي امشي، يلا خلينا ندخل.
بيدخل فارس وجنبه ليالي، وأول ما بيدخلوا بيستقبلهم عمار وزوجته.
عمار... أهلًا أهلًا، نورتوا الحفلة يا شباب. هالة مراتي.
فارس بجدية، وهو بيسلم على عمار ومراته... ده نور صحاب الحفلة.
مازن بمرح... هو إنتوا في اجتماع ولا إيه؟ إيه الأُفورة دي؟ هو إنت عشان بقيت مستثمر معانا يا عمار هنقضيها رسميات وجو رجال أعمال؟ إنت كنت معانا في الجامعة يا يالا!
عمار... يالا! إنت إيه جابك يا مازن؟ إنت إزاي رجل أعمال أصلًا وعندك شركات؟
فارس... والله أنا بفكر أخليه يغير النشاط ويشتغل على توكتوك أحسن، إيه رأيك يا عمار؟
عمار... عين العقل يا باشا.
مازن... والله إنتوا خسارة فيكوا الفرفشة، إنتوا صنم!
وهنا ليالي مقدرتش تمسك نفسها وفضلت تضحك، وكان صوت ضحكها عالي.
فارس بصلها مرة واحدة... عجبتك أوي؟
ليالي، ومش قادرة تبطل ضحك، وباستفزاز... آه أوي، ههههه.
هالة... طب مش تعرفونا بالقمر دي، ولا هتفضلوا تتخنقوا من أول ما دخلتوا؟
فارس بيبص لليالي بغيظ... ليالي بنت عمي وشغالة معانا في الشركة.
هالة بابتسامة، بتسلم على ليالي وبتحضنها... أهلًا يا حبيبتي، اسمك حلو زيك.
ليالي بتسلم عليها... حياتي، دي عيونك الحلوة.
مازن بيمد إيده... نورتي يا آنسة ليالي.
ليالي لسه هترفع إيديها، فارس بيكون سابقها وبيسلم مكانها عمار بيتحرج.
مازن بمرح، محاولًا يخرج من جو التوتر... طب إيه يا عمار، إنت جايبنا تذنبنا ولا إيه يا عم؟
عمار بابتسامة وإحراج... لا طبعًا، اتفضلوا ترابيزتكم أهي.
مازن... فين الكتكوتة صاحبة الحفلة بقى؟
هالة... هروح أشوفها وأجيبهالكو، عن إذنكم.
مازن بيستأذن ويمشي هو كمان يقابل الناس.
أول ما مشيوا، ليالي بصت لفارس بضيق...
ليالي... هو إيه اللي بتعمله ده؟
فارس ببرود... عملت إيه؟
ليالي بضيق... فارس، بلاش برود دي تاني مرة.
فارس، وما زال على بروده... تاني مرة إيه؟ أنا مش فاهم.
ليالي بغيظ... مين قالك تسلم مكاني؟ أنا عديت بتاعة المطعم بمزاجي، ولسه متكلمناش فيها.
فارس بضيق... الأحسن متجيبيش سيرة المطعم.
مازن، وهو بيتابعهم ولاحظ عصبية فارس اللي هتبدأ... أنا برضه بقول كده.
ليالي بتبص لمازن... اسكت لو سمحت.
مازن... هو بعد اسكت في لو سمحت؟ العيلة دي مجانين!
ليالي بتبص لفارس بغيظ... فارس، ياريت بعد كده متقولش حاجة ولا تعمل حاجة نيابة عني.
فارس بعصبية خفيفة قدر يخفيها... إنتِ كنتِ عايزة تسلمي عليهم؟
ليالي ببرود واستفزاز... حاجة تخصني، أسلم أو لأ، ملكش فيها.
فارس بعصبية بيحاول يتحكم فيها... مش بتفشلي إنك تعصبيني يا ليالي، وأنا بدأت أفقد أعصابي، وده مش في مصلحتك.
ليالي بابتسامة واستفزاز... مكنتش أعرف إن كتلة تلج زيك حد يقدر يعصبه.
فارس بيبصلها ويبتسم بغيظ... مانتي قدرتي تلاشيني بقى دلوقتي خالص، ولينا كلام في البيت.
وبعدها بيقوم يقف.
مازن... إنت رايح فين؟
فارس... هخرج أشرب سيجارة قبل ما أعمل حاجة مش هتعجب حد.
وبيمشي خطوتين، وبعدين يرجع يبص لمازن بنظرة تحذير.
فارس... مازن.
مازن بصله بتوتر... باشا، أوامر.
فارس... أتمنى أرجع متكونش عملت حاجة تخليني أسكنك المستشفى فترة.
وبعدين بيبص لليالي...
فارس... وإنتِ متتحركيش من مكانك.
ليالي بتبصله بضيق وتسكت.
مازن بيبلع ريقه ويبتسم... متخفش، هتلاقي كل حاجة زي الفل.
فارس... أتمنى.
وبيخرج بره الحفلة عشان يطلع عصبيته وضِيقه في السجاير.
مكتفاش بواحدة أو اتنين، ده خلص العلبة كلها.
بعد شوية في الحفلة...
ليالي... أنا زهقت، إيه الملل ده!
مازن... شوية وهتخلص ونمشي.
ليالي بضيق... هو كل ده بيشرب سيجارة؟
مازن بتلقائية... هو كده شرب العلبة، مش سيجارة.
ليالي بصدمة... علبة؟ إنت بتهزر!
بيدخل عليهم عمار وهالة وملك بنتهم.
عمار... أومال فارس راح فين؟
مازن... خرج يشرب سيجارة.
ليالي بتريقة... سجاير بقى، مش سيجارة!
مازن في سره... شكلي هروح المستشفى النهارده.
هالة بابتسامة... سلمي يا ملك على طنط.
ملك بتقرب من ليالي وبتسلم عليها وتقولها... طنط، إنتِ حلوة أوي.
ليالي بابتسامة... يا حياتي، إنتِ كمان حلوة أوي أوي. هاتي حضن.
وبتحضن ليالي ملك.
ملك بطفولة... هو أنا لما أكبر هبقى حلوة زيك كده؟
ليالي بضحك... وأحلى مني كمان.
ملك... إنتِ اسمك إيه؟
ليالي بابتسامة... اسمي ليالي يا ستي، حلو؟
ملك... الله، حلو أوي! تعالي ارقصي معايا.
وبتشدها.
هالة... ههههه، عيب يا ملك، سيبي طنط.
ليالي بابتسامة... ههههه، سيبيها، دي عسولة خالص.
ملك بتشد ليالي... طب يلا بقى يا لي لي، تعالي ارقصي معايا.
ليالي بضحك... إنتِ جبتي الدلع ده منين يا ملوك؟
ملك بتحرك كتفها بطفولة... معرفش، بس هو حلو أوي عليكي.
يلا بقى تعالي.
ليالي... ههههه، طب يلا.
بتروح ليالي مع ملك، وتمسك إيدها وترقص معاها، وهالة وعمار ومازن كانوا واقفين حواليهم، والناس بدأت تتجمع حواليهم.
ملك... مامي، بابي، تعالوا ارقصوا معانا!
وبيدخل هالة وعمار في الرقصة.
مازن في سره، وهو بيبص على ليالي... ربنا يستر النهارده.
بعد شوية...
فارس راجع الحفلة، لقى الكل متجمع حوالين حاجة، ومش عارف هي إيه. بيقرب يشوف، وسمع شاب بيقول لصاحبه...
الشاب... شوفت الصاروخ الأسود اللي في النص؟
صاحبه... أووف، بطل يا أخي! أكيد مش مصرية، أنا لازم أتعرف عليها.
فارس بيقرب منهم... إنتوا بتتكلموا على مين يا شباب؟
شاب... إنت إزاي متعرفش؟ ده التجمع اللي هناك ده كده من أول ما بدأت ترقص.
فارس... ترقص؟!
الشاب... أيوة، بترقص مع البنوتة.
فارس بيحاول يكذب إحساسه، وبيلف يبص ناحية التجمع، محاولًا يشوف اللي جوه، ويتفاجئ بليالي بترقص في النص.
فارس للشاب... إنتوا بتتكلموا على البنت اللي لابسة فستان أسود؟
الشاب بإعجاب... آه، صاروخ! ولا عيونها يا لهوي...
مش بيلحق يكمل كلامه، وبيلاقي فارس بكل عصبية وغل بيضرب فيهم، والناس بدأت تتلم حواليهم وتفرق بينهم.
مازن في سره... والله كنت حاسس هيحصل كده.
وبيبدأ يبعد فارس عن الشاب.
مازن... خلاص يا فارس، اهدى، العيال هتموت في إيدك!
فارس بغضب... أشوف حد منكم في حتة مش هسيبه!
الناس أخدوا الشاب، ومازن خد فارس بعيد.
ليالي بخوف وعدم فهم... فارس! إيه اللي عملته ده؟
فارس... إنتِ متتكلميش خالص يا ليالي، خالص! وهاتي شنطتك، هنمشي.
ليالي بتروح تجيب شنطتها بضيق وزعل.
عمار... فارس، مالك؟ في إيه؟ عملوا إيه العيال دي؟
فارس بهدوء... خلاص يا عمار، غلطوا والحساب اتصفّى، وحقك عليا، الحفلة باظت.
عمار بتفهم... ولا باظت ولا حاجة، ولا يهمك. أنا عارف إن أكيد غلطهم كبير، وإلا مكنتش اتعصبت كده.
ليالي بضيق وزعل... جبت الشنطة.
فارس بجمود... مازن، إحنا هنمشي. هتفضل إنت؟
مازن... لا، أنا جاي معاكوا. يلا.
فارس ومازن بيسلموا على عمار، وبيخرجوا من الحفلة عشان يروحوا للعربيات.
عند العربيات...
فارس بيفتح الباب بجمود... ادخلي يلا.
ليالي بضيق وغصة كاتماها من طريقته... مش همشي معاك.
فارس... ليااالي، اركبي خلينا نمشي، أنا على تكة.
ليالي بخنقة... أنا مش هركب معاك بالطريقة دي، أنا هروح لوحدي.
ولسه هتمشي، بيمسك إيدها جامد.
فارس بغضب وضغط على إيدها... ليالي، مش هطوّل بالي كتير، اركبي خلينا نمشي.
ليالي والدموع في عينيها من ألم إيديها، وبصوت مختنق... فارس، سيب إيدي، عايزة أمشي.
فارس... قولت مش هتمشي لوحدك.
ليالي مقدرتش تستحمل، وبدأت تعيط...
ليالي... فارس، سيب إيدي، بتوجعني!
فارس أول ما بيبص على دموعها بيستوعب اللي عمله، وبيسيب إيدها على طول...
فارس... ل... ليالي، مكنش قصدي، أنا...
ليالي بتقاطعه بدموع وعصبية، وهي ماسكة إيدها من الألم...
إنت روبوت يا فارس، مش بتحس! مش هروح معاك، سامع؟
فارس من جواه، ولأول مرة يحس بالحزن من كلام ليالي. هو مكنش متخيل إنه وجعها بالشكل ده.
مازن بيقرب منهم بهدوء...
مازن... ليالي، اهدي، فارس مكنش...
فارس بهدوء... ليالي، لو سمحتي اركبي نروح، وبعد كده نتكلم زي ما إنتِ عايزة.
ليالي... أنا مش عايزة أتكلم معاك في حاجة ولا أتعامل معاك يا فارس.
فارس بتنهدة تعب... تمام، حقك، بس أنا محستش والله إني بوجعك.
مازن بيتابع صاحبه، ومن جواه عارف ومتأكد إن كلام ليالي أثر على صاحبه.
ليالي... إنت مش بس وجعت إيدي، إنت كمان أحرجتني بطريقتك معايا في الحفلة. ليه ده كله؟ إيه اللي حصل؟ كل ده عشان خوفت عليك وسألتك إيه اللي حصل؟
فارس... خفتي عليا؟
ليالي بتوتر... أكيد، مش ابن عمي؟! وإنت في الآخر كلمتني بأبشع طريقة.
فارس بتنهيدة... صدقيني غصب عني، وكله بسببك.
ليالي بضيق... هو إيه اللي بسببى؟ هو أنا اللي قولتلك تتخانق أو تكلمني كده؟
فارس بيحط إيده على شعره بغضب... لا، سيادتك كنتِ بترقصي، وكل اللي في الحفلة كان بيتغزل فيكي. عايزاني لما أسمع واحد بيتغزل فيكي أعمله إيه؟ أصفقله؟ ومين سمحلك أصلًا ترقصي؟ أنا قولتلك متتحركيش!
وبيضحك باستهزاء...
فارس... بس إزاي؟ لازم السنيوريتا ليالي تعند، لو معملتش كده ممكن يحصلها حاجة، صح؟
ليالي بضيق من استهزائه... أنا كنت برقص مع الطفلة عادي، وكمان عمار وهالة كانوا بيرقصوا معانا. ملهاش داعي الأُفورة دي ، وأنا مليش ذنب في عقلية ناس مريضة زيهم. وبعدين مكنش لازم تضربهم، إنت اتسرعت أوي وأفورت.
فارس... بجد؟ هو ده مبررك؟ ولا إيه؟ عمار كمان كان بيرقص معاكوا، هو أخوكي وأنا معرفش؟ إنتِ عبيطة؟
ليالي... فارس، خد بالك من كلامك.
فارس... اركبي.
ليالي... أنا مش...
فارس بهدوء شديد ومخيف... ليالي، مش إنتِ شايفة إنك مش غلطانة، وأنا اللي غلطان ومأفور؟
ليالي بتوتر... آه.
فارس... طيب اركبي يا ليالي، وأنا أوعدك إن مش هأفور خالص، وإنتِ كان عندك حق في كل حاجة. بعد كده أنا غلطان ومش هاخدك في حتة معايا تاني.
ليالي بتوتر... فارس، إنت بتقول إيه؟ أنا مش فاهمة حاجة.
فارس بهدوء... يعني براحتك، اللي إنتِ عايزاه اعمليه. أقولك، أوقفلك تاكسي.
مازن... احمم، فارس، بتقول إيه؟ يلا يا ليالي، اركبي وروحوا.
ليالي بصدمة من تحوله... إنت بتتكلم جد؟
فارس وما زال على هدوئه... أيوة طبعًا، أهم حاجة أرضي سيادتك، لأنك مش بتغلطي، وفارس روبوت معندوش دم وغلطان.
ليالي بخوف من هدوئه وتحوله... فارس، إنت بتقول إيه؟
فارس... بقول كلامك. تحبي أروح أعتذر للضربتهم بالمرة وأقولهم آسف، تعالوا نرجع نكمل غزل في جمال الأميرة ليالي؟ تحبي تسمعي كانوا بيقولوا إيه؟
ليالي بخوف ودموع... فارس، إنت بتقول إيه؟ يلا نمشي.
فارس... لا، إزاي؟ استني بس، لازم تعرفي.
مازن... فارس، خلاص، اتكلموا بعدين. امشي دلوقتي.
فارس... ملكش دعوة دلوقتي يا مازن، لو سمحت. روح إنت.
مازن... فارس، بس...
فارس بمقاطعة... مازن، خد عربيتك وامشي، ملكش دخل.
مازن... ماشي يا فارس، شكرًا، أنا ماشي.
وبيمشي مازن بزعل.
فارس بيبص لليالي...
فارس... إيه يا أميرة ليالي؟ مش عايزة تعرفي؟
ويقرب منها، فترجع لورا لحد ما ضهرها يسند على باب العربية، وهو بيسند إيده حواليها على العربية.
ليالي... فارس، خلينا نروح.
فارس... إزاي بس؟ قبل ما تعرفي قالوا إيه؟ عشان لو تحبي أروح أعتذر ونكمل، اسمعي بقى كان بيقولوا إيه.
فارس بيحط إيده على وشها ويبص في عينيها...
فارس... مثلًا عجبهم عيونك أوي أوي...
ويكمل بغضب مكتوم...
فارس... لو تسمعي قالوا إيه عليها!
ويبص على الفستان...
فارس... ولا الفستان بقى عجبهم أوي أوي، واللي جواه الفستان، عشان أبقى أدق!
ويرجع يبص لعيونها، وكله غضب، ويتكلم من بين سنانه...
فارس... إيه رأيك؟ ها، أكمل؟
ويغبط بإيده جامد على باب العربية.
ليالي بخضة ودموع، بتبص في عينه...
ليالي... ف... فارس، أ... أنا آسفة، مكنتش أعرف كل ده. بليز خلينا نمشي.
فارس بزعل داخلي بيتنهد على الحالة اللي وصلها ليها، وبيفكر بينه وبين نفسه إنه كان لازم يتصرف بشكل أحسن، وإنها عنيدة أوي.
وبهدوء بيمسح دموعها...
فارس... اهدي واركبي يلا.
ليالي بعياط من الخوف والتوتر، بتدخل في حضن فارس بتلقائية، وهي بتعيط وبترتعش وبتستخبى منه فيه. فبرغم إنه السبب في حالتها، إلا إنها بتشعر بالأمان معاه.
فارس بيتفاجئ للحظة، وبعد كده بيحاوطها ويطبطب عليها، وبهمس...
فارس... حقك عليا يا لي لي، اهدي، اهدي.
بعد شوية بتهدى وتخرج من حضنه، وهو بيمسح دموعها، وبصوت فيه حنان الدنيا...
فارس... أنا آسف، حقك عليا.
ليالي بصوت بكاء... أنا اللي آسفة.
فارس... ممكن تبطلي عياط وتهدي؟
ليالي... أنا مكنتش متخيلة إن في ناس كده. أنا كنت برقص مع ملك عادي والله. فارس، إنت مصدقني صح؟
فارس... مصدقك طبعًا يا لي لي، بس عايزك إنتِ كمان تصدقي كلامي وتسمعيه.
ليالي بتمسح عيونها بطفولة... أوكيه، هحاول.
فارس... ههههه، عنيدة مفيش كلام.
ليالي... بس إنت وجعتلي إيدي أوي، مكفكش ضهري الصبح؟ بقى إيدي كمان!
فارس بيمسك إيدها بتلقائية ويبوسها...
فارس... حقك عليا.
ليالي بتحس برعشة في جسدها أول ما شفايفه لمست إيدها، وبتسحب إيدها بسرعة وتوتر...
ليالي... طب يلا نمشي.
فارس بيفتح باب العربية...
فارس... اركبي يلا.
ليالي وهي بتركب بتلاحظ إيده ازرقت من أثر خبطه في الباب، وبيلف فارس عشان يركب جنبها.
فارس بيتفاجئ بليالي بتمسك إيده...
فارس... في إيه؟
ليالي... فارس، إيدك ازرقت أوي! تعالى نروح المستشفى.
فارس بضحك... مستشفى إيه يا ليالي؟ ده مية دافية ومرهم وتبقى زي الفل.
ليالي بقلق... أكيد؟
فارس... آه أكيد يا لي لي.
ليالي... طب أقف بقى عند أي صيدلية نجيب المرهم.
فارس وهو بيبص قدامه... مفيش داعي، عندي منه كتير.
ليالي باستغراب... عندك منه كتير؟ إنت واخد على كده بقى؟
فارس... يعني حاجة زي كده.
ليالي... فارس، هو إنت كده طبيعي؟
فارس باستغراب... إزاي يعني؟ قصدك إيه؟
ليالي... يعني عمو حمزة الله يرحمه مكنش بيجلدك، فبقيت كده؟
فارس... ههههه، لا مكنش بيجلدني، أنا كده طبيعي.
ليالي... ربنا يكون في عون اللي في حياتك.
فارس... ويكون في عونك إنتِ يا لي لي.
ليالي بتبصله وتسكت.
وفجأة فارس بيقف بالعربية مرة واحدة...
ليالي... وقفت ليه؟