رواية نقطة عمياء الفصل الثامن عشر18 بقلم منة احمد
في المستشفى...
وصلت عربية الإسعاف قدام المستشفى، والباب الخلفي اتفتح بسرعة، والمسعفين نزلوا النقالة اللي عليها معتز، بينما نسمة كانت لسه ماسكة إيده ومش راضية تسيبه.
المسعف: يا آنسة، لو سمحتي ابعدي شوية، لازم ندخله الطوارئ بسرعه.
نسمة وهي بتشد على إيده ودموعها نازلة: مش هسيبه! أنا هدخل معاه، أرجوكوا متبعدونيش عنه!
خديجة وهي بتحاول تهديها: يا نسمة، حبيبتي، سيبيهم يلحقوه... إنتي كده بتعطليهم.
نسمة: ماما، أنا خايفة عليه... مش قادرة أسيبه لوحده!
المسعف: يا مدام، لازم نتحرك دلوقتي، الحالة محتاجة تدخل سريع.
فضلت نسمة ماشية جنب النقالة وهي ماسكة إيد معتز، وعينيها مش بتفارق وشه الشاحب وقالت بصوت متقطع: معتز... اسمعني، أرجوك متسبنيش... إنت وعدتني إنك هتفضل معايا.
لكن معتز مكنش بيستجيب، وده زوّد خوفها أكتر.
دخلوا بيه من باب الطوارئ، والممرضين اتحركوا حواليه بسرعة، وواحد منهم طلب تجهيز غرفة العمليات.
الممرضة: جهزوا غرفة العمليات بسرعة، الحالة عندها نز..يف!
نسمة: أنا هدخل معاه!
الممرضة: لا يا آنسة، مينفعش تدخلي معاه، لازم تفضلي بره.
نسمة وهي بتتمسك بإيده أكتر: طب استنوا بس... أنا عايزة أفضل جنبه!
حاولت الممرضة تفصل إيدها عن إيده، لكن نسمة كانت متشبثة بيه بكل قوتها: أرجوكي... أرجوكي متبعدينيش عنه!
الممرضة بحزم: يا آنسة، إحنا لازم نلحقه، ابعدي من فضلك!
وبمساعدة ممرض تاني، قدروا يبعدوها عن النقالة، واتقفل باب العمليات قدام عينيها وفضلت واقفة مكانها ثواني، بتبص للباب كأنها مستنية حد يخرج يقولها إن كل ده كان كابوس، لكن رجليها خانتها ووقعت على الأرض.
نسمة بانهيار: معتز... لا، يا رب... مش هو، يا رب!
خديجة جريت عليها ونزلت لمستواها، وحاوطت راسها بإيديها وهي بتحاول تضمها لحضنها: اهدي يا بنتي... اهدي، ربنا معاه، وهيقوم بالسلامة إن شاء الله.
نسمة رفعت إيديها قدام عينيها، وبصت للد..م اللي مغطي كفوفها وهدومها، وبدأت تهز راسها بعدم تصديق: ماما... الدم ده كله منه... أنا كنت حاسة بيه وهو بيفارقني من بين إيديا.
خديجة ودموعها بتلمع: متقوليش كده يا نور، معتز قوي، وربنا مش هيضيعنا.
نسمة: معقولة هو ممكن يروح مني؟ معقولة أكون آخر مرة شوفته فيها كانت وهو بينز..ف قدامي؟
خديجة معرفتش ترد، اكتفت إنها تضمها أكتر وتمسح على شعرها: ادعيله يا حبيبتي... ادعيله، ربنا قادر على كل حاجة.
في اللحظة دي ندي وصلت وجريت ناحيتهم، وأول ما شافت نسمة قاعدة على الأرض قربت منها بسرعة: نسمة! إنتي كويسة؟ طمنيني، في أي أخبار عن معتز؟!
خديجة: لسه يا بنتي... دخل العمليات من شوية، وحالته صعبة أوي.
ندي قعدت جنب نسمة ومسكت إيديها، وبصتلها بقلق وهي شايفة آثار الد..م عليها: يا حبيبتي، اهدي هيكون كويس.
نسمة بصوت مبحوح: أنا خايفة أوي يا ندي... مش قادرة أنسى منظره وهو بين إيديا، كنت بكلمه ومش بيرد عليا.
ندي: اهدي يا نسمة، ربنا كبير، وإن شاء الله معتز هيقوم بالسلامة. إحنا كلنا مستنيينه يخرج ويطمنّا عليه.
قبل ما نسمة ترد، سمعوا صوت ست جاي من آخر الممر وهي بتعيط بصوت عالي: معتز! فين معتز؟! أبو ابني هيروح مني!
خديجة رفعت عينيها ناحية الصوت، وأول ما شافت راندا قدامها، ملامحها اتغيرت: إنتي بتعملي إيه هنا؟!
راندا وهي بتحط إيديها على بطنها: إنتي لسه بتسألي؟! جوزي... أبو ابني جوه بين الحياة والمو..ت!
خديجة: جوزك؟! هو مش إنتوا اتطـ..لقتوا؟ إيه اللي جابك دلوقتي؟!
راندا: آه اتطلقنا، بس ده مش معناه إنه مبقاش أبو ابني! أنا مش هقبل إن ابني يتولد من غير أب، ومش هسمح إن أبوه يمو..ت قبل ما يشوفه!
خديجة بسخرية وغضب: فاكرة إنك بمجرد ما تقولي أبو ابني يبقى معتز لازم يرجعلك؟ ده معتز أصلًا مش معترف باللي إنتي بتعمليه، ولا بالطفل اللي بتستخدميه عشان ترجعي تدخلي حياته!
راندا: هو دلوقتي مش وقت حسابات يا ست خديجة! أنا عايزاه يعيش، ولما يفوق هحاول أخليه يسامحني... أنا عارفة إنه ممكن يسامحني.
نسمة كانت بتسمع الكلام وهي مش مستوعبة، فبصت لخديجة باستغراب: ماما... هي دي طليقته؟!
خديجة بصتلها لحظة، وبعدها هزت راسها بهدوء.
نسمة سكتت، ورجعت بعينيها لراندا، وبطنها الواضحة قدامها. حسّت بحاجة تقيلة جوا صد..رها، وكأنها فجأة افتكرت إن معتز كان له حياة قبلها، وإن الست اللي واقفة قدامها شايلة طفل منه وندي لاحظت نظرات نسمة، فقربت منها وربتت على كتفها من غير ما تتكلم.
راندا بصت لنسمة من فوق لتحت، وبعدين اتكلمت بنبرة مليانة غيرة واحتقار: وإنتي بقى إيه اللي موقفك هنا؟ مش كفاية اللي حصل بسبـبك؟!
ندي بسرعة وعصبيه: إنتي بتتكلمي معاها إزاي؟!
راندا: أنا بكلم اللي أنا عايزاه، وإنتي مالك؟!
ندي قربت منها بسخرية: بصي يا حبيبتي، لو ملمتيش نفسك وهتعديها على خير، هتطلعي منها سليمة. إنما لو جاية في شغل المشاكل، فأنا بحب المشاكل!
راندا باستهزاء: إيه البيئة دي؟! هو أنا هقعد أتناقش معاكم إنتوا مين أصلًا؟!
نسمة: أنا مش جاية أعمل مشاكل مع حد، أنا كل اللي يهمني إن معتز يقوم بالسلامة.
راندا بضيق: لا، إنتي بالذات تبعدي عنه! ومش هسمحلك تقربي منه تاني، كفاية اللي حصل له بسببك!
خديجة بغضب: اخرسي! إنتي دلوقتي بتتكلمي عن بنتي نور، اللي اتخطفت مني سنين، واللي رجعتلي بعد عمر من العذاب! هي مش السبب في اللي حصل لمعتز، ومحدش فيكم له حق يحاسبها على حاجة!
راندا اتفاجئت من كلام خديجة، وبصت لنسمة باستغراب: بنتك؟!
خديجة: أيوه، بنتي! وبدل ما تفضلي ترمي كلامك عليها، ادعيله يقوم بالسلامة، لأن آخر واحدة ليها حق تلومه أو تلوم حد عليه هي إنتي.
وقبل ما راندا ترد، خرجت ممرضة من باب الطوارئ بخطوات سريعة، وبصت عليهم وهي بتتكلم بجدية.
الممرضة: أهل المريض معتز مين؟!
خديجة قامت بسرعة: احنا اهو ، خير يا دكتوره؟!
الممرضة: المريض فقد كمية كبيرة من الد..م، ومحتاج نقل د..م بشكل عاجل. هل في حد من أهله يقدر يتبرع؟
نسمة قامت من مكانها فورًا، من غير ما تفكر لحظة: أنا! خدوا مني أنا.
خديجة: يا نور، استني يا حبيبتي...
نسمة وهي بتبص للممرضة: أنا مستعدة أتبرع، اعملوا اللي إنتوا عايزينه بس الحقوه.
الممرضة: طيب تعالي معايا بسرعة، بس لازم نعمل تحليل ونشوف فصيلة د..مك ومدى التوافق الأول.
نسمة اتحركت معاها بسرعة، لكن قبل ما تلحق تمشي، راندا مدت إيدها وشدتها من دراعها بعـ..نف.
راندا: استني عندك! إنتي فاكرة إنك هتعملي نفسك البطلة دلوقتي؟!
نسمة اتفاجئت من شدتها، وفقدت توازنها ووقعت على الأرض: يا مصيبتك! إنتي اتجننتي؟!
ندي جريت تساعد نسمة تقوم، وخديجة سندتها من الناحية التانية.
ندي وهي بتبص لراندا بغضب: إنتي إيه اللي بتعمليه ده؟! مش كفاية اللي إحنا فيه؟!
راندا: أنا مش هسمح لها تقرب منه!
ندي: لو مدّيتي إيدك عليها تاني، مش هتلاقي مني غير اللي يزعلك!
راندا: إنتي فاكرة نفسك مين؟!
ندي: أنا اللي مش هسمحلك تلمسيها تاني، فاهمة ولا أقولك تاني؟!
الممرضة بصتلهم بضيق، ورفعت صوتها: يا جماعة، من فضلكم! إحنا مش في وقت خناق، الحالة جوه بتتدهور ومحتاجين الدم بسرعة!
نسمة مسحت دموعها بسرعة وحاولت تقف: أنا جاهزة، يلا بينا.
ندي وهي بتسندها: روحي يا نسمة، ربنا يجعل فصيلة د..مك مناسبة، وتكوني سبب في إنقاذه.
راندا وهي بتتقدم ناحية الممرضة: طب خديني أنا كمان! أنا هتبرعله، حتى لو هفدي بروحي عشانه!
ندي بصتلها من فوق لتحت باستغراب، وبعدها هزت راسها بسخرية.
الممرضة وهي بتبص على بطن راندا: لا يا مدام، مش هينفع.
راندا: يعني إيه مش هينفع؟ أنا مستعدة أتبرع!
الممرضة: حضرتك حامل، والتبرع بالد..م أثناء الحمل مش آمن ليكي ولا للجنين، ومينفعش نعرّضكم للخطر.
راندا بدموع: يعني هتسيبوه يمو..ت وأنا واقفة أتفرج؟!
الممرضة: محدش هيسيب حد يمو..ت، إحنا بنعمل كل اللي نقدر عليه، بس حضرتك مش هتقدري تتبرعي.
الممرضة رجعت تبص لنسمة ومدت إيدها ناحيتها: اتفضلي معايا بسرعة يا آنسة.
خديجة مسكت إيد نسمة قبل ما تمشي، وباستها وهي بتحاول تتمالك نفسها: ربنا يحفظك يا بنتي... ويحفظهولنا.
نسمة وهي بتبص في عينيها: ادعيلي يا ماما.
خديجة: ربنا يستجيب، يا رب.
دخلت نسمة مع الممرضة غرفة سحب الد..م، واتعملت لها التحاليل اللازمة، وبعد انتظار قصير ظهرت النتيجة: فصيلة د..مك متوافقة، هنبدأ سحب الكمية المطلوبة دلوقتي.
نسمة مدت دراعها من غير تردد، وعينيها فضلت معلقة في باب الغرفة: هو هيبقى كويس، صح؟
الممرضة: إحنا بنعمل اللي نقدر عليه، وإنتي ساعدتيه كتير بتبرعك. حاولي ترتاحي شوية بعد ما نخلص.
بعد ما خلصوا، ضغطت الممرضة على مكان الإبرة وحطت عليه شاش، وبعدها خرجت نسمة وهي حاسة بإرهاق واضح، وضامة إيديها على مكان التبرع.
أول ما راندا شافتها، قربت منها بنظرة مليانة غضب: على فكرة، أنا مش هعديها، ومش هخليكي تقربي منه عشان تكوني فاهمة!
نسمة بصتلها من غير ما ترد، مكنش عندها طاقة تدخل في أي نقاش.
ندي بضيق: ششش... اخرسي بقى! إنتِ عاملة دوشة وصدعتينا، مش كفاية اللي إحنا فيه؟!
راندا اكتفت إنها بصتلها بنظرة باردة، ورجعت وقفت بعيد شوية.
مرت فترة طويلة عليهم، وكل دقيقة كانت بتعدي عليهم كأنها ساعة. خديجة كانت رايحة جاية قدام باب العمليات، ونسمة قاعدة على الكرسي، شاحبة ومرهقة، لكن عينيها ثابتة على الباب.
لحد ما باب العمليات اتفتح أخيرًا، وخرج الدكتور وهو بيخلع الجوانتي وبيمسح العرق من على جبينه.
كلهم قاموا في نفس اللحظة واتجمعوا حواليه: طمني يا دكتور، ابني عامل إيه؟!
الدكتور: إحنا خلصنا الجراحة، لكن الحالة كانت صعبة جدًا. المريض وصلنا بنزيف شديد نتيجة الإصابة، وكان فيه نزيف داخلي، واضطرينا نتدخل بسرعة عشان نسيطر عليه.
خديجة: طب هو كويس دلوقتي؟!
الدكتور: الرصاصة كانت مسببة تلف شديد في إحدى الكليتين، وللأسف الضرر كان كبير لدرجة إننا اضطرينا نستأصلها عشان نوقف النزيف ونحافظ على حياته.
خديجة حطت إيدها على بقها، وعينيها اتمليت بالدموع: يعني ابني... هيعيش بكلية واحدة؟!
الدكتور: الإنسان يقدر يعيش بكلية واحدة طالما الكلية التانية سليمة وبتشتغل كويس، وده اللي هنفضل نتابعه. لكن لسه بدري نحكم على حالته بشكل نهائي.
ندي: طب والنز..يف يا دكتور؟ وقف؟
الدكتور: قدرنا نسيطر على النزيف، وتم تعويض جزء من الد..م اللي فقده، لكن محتاج يفضل تحت الملاحظة الدقيقة في العناية المركزة.
نسمة بصوت خايف ودموعها نازله: هو لسه في خطـ.ر؟
الدكتور سكت لحظة قبل ما يرد.
الدكتور: الحالة لسه حرجة، ومش هقدر أديكم ضمانات دلوقتي. كمان التحاليل بينت وجود آثار لمواد مهدئة بشكل كبير في جسمه، وده مع فقدان الد..م الشديد وانخفاض مستوى وعيه زوّد خطورة الحالة. هنحتاج نتابع تنفسه ووظائف جسمه كويس جدًا.
نسمة اتجمدت مكانها، وافتكرت شكله في الفيلا، تعبه، وعدم اتزانه، وكل مرة حاولت تقنع نفسها إنه بخير.
خديجة ودموعها بتنزل: يعني هو لسه ممكن يحصل له حاجة؟!
الدكتور: إحنا عملنا كل اللي نقدر عليه في الجراحة، ودلوقتي هننقله العناية ونراقب علاماته الحيوية باستمرار. ادعوله.
خديجة غطت وشها بإيديها وبدأت تعيط، بينما نسمة رجعت خطوتين لورا، ووشها اتغير تمامًا، وقالت بصوت مكسور: أنا السبب...
ندي: نسمة، إنتي بتقولي إيه؟
نسمة: أنا السبب يا ندي... إنتي مشوفتيهوش قبل ما يدخل المستشفى. كان تعبان، ومش قادر يقف على رجليه، وأنا كنت شايفة ده ومفهمتش... أذى نفسه بسببي.
ندي: يا نسمة، إنتي مالكيش ذنب في اللي هو عمله. معتز كان شايل جواه وجع كبير، ومش كل حاجة حصلت له ينفع تحمّلي نفسك مسؤوليتها.
نسمة وهي بتبص للدم اللي على هدومها: طب أعمل إيه بالد..م ده يا ندي؟ كل ما أبص على إيدي أفتكر إنه كان بينزف قدامي، وأنا مش قادرة أعمله حاجة!
مكنتش قادرة تكمل كلامها، فلفت بسرعة ومشيت ناحية باب الخروج.
ندي: نسمة! استني يا بنتي!
خديجة بتنادي عليها بقلق: نسمة! استني يا حبيبتي!
لكن نسمة موقفتش، وخرجت للممر الخارجي، ووقفت بعيد عن الناس، وحاولت تاخد نفسها، لكن شهقاتها سبقتها. حطت إيديها على وشها وانفجرت في العياط.
خديجة وقفت مكانها للحظة، وبعدين بصت لندي وقالت بصوت متقطع من العياط: روحي شوفيها يا حبيبتي، أنا خايفة عليها... مش قادرة أشوفها بالحالة دي.
ندي: حاضر يا طنط، متقلقيش عليها.
خرجت ندي ورا نسمة، وأول ما قربت منها ضمتها لحضنها: طلعي اللي جواكي يا حبيبتي... عيطي، متكتميش في نفسك.
نسمة: أنا خايفة يا ندي... خايفة أخسره، مش مستعدة أشوفه بيمو..ت قدامي.
ندي: مش هنفترض الأسوأ، هو لسه بيحارب، ولازم نفضل عندنا أمل إنه يقوم بالسلامة.
نسمة سكتت لحظة، وبعدها قالت بصوت واطي: أنا حاسة إنه أذى نفسه يوم خطوبتي بسببي... هو مكنش مستحمل فكرة إني هتخطب لآدم، ولما شافني خلاص بقيت لحد غيره مقدرش يستحمل.
ندي: متحمليش نفسك ذنب حاجة إنتي مكنتيش تعرفي عنها.
نسمة وهي بتمسح دموعها: أنا مكنتش عايزة منه حاجة يا ندي... كنت عايزاه يعيش، حتى لو مش ليا.
أما راندا، فكانت واقفة بعيد عنهم، بتتابع اللي بيحصل بغيظ شديد، وعينيها متعلقة بنسمة، وكأن وجودها قدامها لوحده مستفزها.
ندي سكتت لحظة، وفهمت من كلامها أكتر بكتير من اللي نسمة كانت قادرة تقوله.
في اللحظة دي، دخل عزام وآدم المستشفى بسرعة، وكان واضح عليهم القلق. أول ما شافوا ندي ونسمة، جريوا ناحيتهم.
عزام: معتز فين؟! طمنوني عليه، حصل إيه؟!
آدم: هو خرج من العمليات؟ حالته عاملة إيه؟!
ندي بحزن وحاولت تتكلم بهدوء: خرج من العمليات، بس حالته لسه حرجة
عزام حط إيده على راسه بصدمة، وبعدها قبض إيده بغضب: يا رب احفظهولي... أنا معرفتش أوصل لطليقتي وجوزها هربوا، بس أقسم بالله ما هسيبهم، ولا هسيب حق معتز يضيع.
آدم: طب هو فين دلوقتي؟
ندي: هيودوه العناية المركزة، والدكتور قال إنهم لازم يراقبوه كويس.
عزام: أنا لازم أشوفه.
اتحرك عزام بسرعة ناحية الداخل، وسابهم وراه.
أما آدم، ففضل واقف مكانه للحظة، وعينيه راحت ناحية نسمة. شاف وشها الشاحب، ودموعها اللي مش بتقف ،والدم اللي على فستانها.
أما آدم، فبص لنسمة بحزن. كان عارف إنها بتحب معتز، وعارف إن معتز بيبادلها نفس المشاعر، ورغم وجعه قرر يخبّي مشاعره ويقرب منها يطمنها: نسمة...
نسمة رفعت عينيها ليه، وحاولت تمسح دموعها: آدم... هو معتز هيبقى كويس، صح؟
آدم بص في عينيها، وكان نفسه يقدر يوعدها، لكنه مقدرش يكذب عليها: متقلقيش يا نسمة، معتز أخويا وقدها، وهيكون كويس بإذن الله.
مد إيده ومسك إيدها برفق، وبعدها رفع إيده التانية ومسح دمعة نزلت على خدها: إنتي كمان لازم ترتاحي، ومينفعش تفضلي واقفة كده.
نسمة: أنا مش هرتاح غير لما أشوفه فتح عينه.
آدم هز راسه بهدوء، وضغط على إيدها ضغطة خفيفة قبل ما يسيبها: خير ان شاء الله.
وبعدها مشي وراه ابوه، وساب نسمة واقفة مكانها، عينيها معلقة بباب العناية، وقلبها مع معتز اللي لسه بيصارع عشان يفضل عايش.
**بعد مرور يومين...**
كانت الأيام اللي فاتت تقيلة على الكل، خصوصًا نسمة اللي مكنتش بتسيب المستشفى، وكل شوية تسأل الدكتور عن حالة معتز، لحد ما جه الصبح اللي كانوا مستنيينه.
كانت خديجة ونسمة وندي واقفين قدام العناية، وعزام كان بيتكلم مع الدكتور، لحد ما خرج الدكتور وابتسم ابتسامة بسيطة وقالت بلهفة: خير يا دكتور؟ طمني، ابني عامل إيه؟!
الدكتور: الحمد لله، فيه تحسن واضح في حالته، ومعتز بدأ يستعيد وعيه، وفتح عينه من شوية.
نسمة حطت إيدها على بقها، ودموع الفرحة نزلت من عينيها: بجد يا دكتور؟! هو فاق؟!
الدكتور: أيوه، بس لسه تعبان ومحتاج راحة، وممنوع عليه أي مجهود أو انفعال.
عزام ابتسم بفرحة وهو بيحمد ربنا، وخديجة مقدرتش تمنع دموعها: الحمد لله يا رب... الحمد لله إنك طمنت قلبي عليه.
الدكتور: هو طلب يشوف حد معين، وفضل يسأل عليه.
نسمة بصتله بلهفة: مين يا دكتور؟!
الدكتور ابتسم وبص ناحيتها: بيسأل على نسمة.
نسمة اتجمدت مكانها للحظة، وبعدها ابتسمت وسط دموعها.
ندي جريت عليها وحضنـ..تها: يلا يا بنتي، ادخلي له! مستنيكي من ساعة ما فاق.
خديجة مسكت إيد نسمة وباستها: روحي يا نور، ربنا يسعدكم يا بنتي.
نسمة ابتسمت وسط دموعها، واتحركت بسرعة ناحية باب العناية.
في اللحظة دي، كان آدم واقف بعيد شوية، وأول ما شاف نسمة وهي داخلة لمعتز، ابتسامتها وفرحتها اللي عمره ما شافها بالشكل ده، حس بغصة كبيرة في قلبه.
حاول يبتسم، لكن ملامحه خانته. نزل عينه ولف وشه بعيد عنهم، وبعدها اتحرك ناحية باب المستشفى وخرج.
ندي لاحظت خروجه، فبصت وراه باستغراب، وبعدها استأذنت خديجة وراحت وراه.
**في برا المستشفى...**
كان آدم واقف بعيد عن المدخل من برا، حاطط إيديه على وسطه، وبيتنفس بعمق كأنه بيحاول يخرج الوجع اللي جواه. عينيه اتمليت بالدموع، ومقدرش يمنعها من النزول.
مسح وشه بإيده، لكنه رجع يبص للأرض وهو بيهز راسه بحزن وقال بصوت واطي: للدرجة دي يا آدم؟ حتى وأنت شايفها فرحانة إنه فاق، لسه قلبك بيوجعك؟!
فضل واقف شوية، لحد ما ندي رجعت بكوبايتين قهوة، وقربت منه بهدوء: آدم... إنت كويس؟
آدم انتفض شوية من صوتها، ومسح دموعه بسرعة وبصلها: أيوه، أنا كويس... إنتي خرجتي ليه؟
ندي: شوفتك خرجت، فقلت أجيلك. جبتلنا قهوة، شكلك محتاج تفوق شوية.
آدم ابتسم ابتسامة باهتة: تسلمي يا ندي، مكنش ليه لزوم تتعبي نفسك.
ندي مدتله كوباية القهوة: تعب إيه بس؟ اتفضل، دي ليك.
آدم أخدها منها: شكرًا.
ندي بصتله شوية وقالت بهدوء: على فكرة، مش لازم كل مرة تقول إنك كويس، عادي لو مش كويس... وعادي لو تعبت.
آدم نزل عينه على الكوباية وقال: ساعات الواحد بيبقى عارف إن مفيش حاجة في إيده يغيرها، ومع ذلك بيفضل يتمنى إنها تتغير. وده يمكن أصعب إحساس ممكن يمر بيه.
ندي فهمت قصده، لكنها سألته بهدوء: إنت بتتكلم عن إيه يا آدم؟
آدم: مفيش... سيبك.
ندي: آدم، إنت كنت واقف معانا من شوية، وأول ما عرفت إن معتز فاق ونسمة دخلت تشوفه، خرجت من غير ما تقول حاجة.
آدم أخد نفس طويل، وبص بعيد عنها: ندي، أنا مش زعلان من حد... بالعكس، أنا فرحان إن معتز فاق، ده أخويا وصاحبي، ومش عايز له غير كل خير. بس ساعات الواحد بيتمنى حاجة من قلبه، ويكتشف إنه كان بيحلم لوحده.
ندي بصتله بحزن، وبعدها قعدت على أول درجة من سلم برا المستشفى: اقعد يا آدم.
آدم قعد جنبها، وفضل ساكت وهو بيبص لكوباية القهوة اللي في إيده وهي بصتله وقالت: إنت كنت بتعيط، صح؟ فيه حاجة مضايقاك؟
آدم ابتسم ابتسامة صغيرة من غير ما يبصلها: لا مفيش حاجة، أنا كويس.
ندي: طب بصلي وقولي إنك كويس.
آدم رفع عينه ليها، وبعدها رجع بص للكوباية: مش عارف ليه يا ندي كل حاجة بنتمناها مش بنقدر نوصلها ، ومش كل حب بيكون ليه نصيب. أنا حاولت، ويمكن كنت فاكر إن مع الوقت ممكن الأمور تتغير، بس واضح إن قلبي كان متعلق بأمل ملوش مكان.
ندي سكتت لحظة، وبعدها قالت بهدوء: نسمة من زمان بتحب معتز يا آدم، ومعتز كمان عمره ما شاف غيرها.
آدم ضحك بسخرية من غير ما يبصلها: متقوليش، أنا عارف إنهم بيحبوا بعض. ومش هيفرق هما حبوا بعض إمتى، ولا رجعوا لبعض إزاي... المهم إنهم أخيرًا بقوا مع بعض.
ندي: أنا عارفة إنك بتحب نسمة، وعارفة إن الموضوع مش سهل عليك، بس صدقني إنت تستاهل واحدة تحبك بنفس القدر اللي إنت ممكن تحبها بيه. واحدة تختارك من وسط كل الناس، وتكون فرحانة إنها معاك، مش محتاجة تقنع نفسها إنها تكمل.
آدم فضل ساكت، وندي كملت: متخليش إنك محبتش من الشخص الصح يخليك تفتكر إنك مش هتتحب. يمكن ربنا شايلك حاجة أحلى، وواحدة تكون من نصيبك وتقدّر قلبك، بس كل حاجة ليها وقتها.
آدم بص لها، وعينيه كانت بتلمع بالدموع، وقال بابتسامة خفيفة: إنتي طلعتي كويسة يا ندي... وعندك كلام حلو أهو، أمال بتستخدميه في الخناق ليه؟
ندي ضحكت بخفة، وبعدها هربت بعينيها من نظراته: أصل الخناق محتاج أسلوب تاني، وبعدين متفتكرش إني هبطل أرخم عليك عشان قلتلي كلمتين حلوين.
آدم ضحك لأول مرة من قلبه، ولو للحظة صغيرة، وبعدها رجع بص قدامه.
**داخل العناية المركزة...**
كانت نسمة قاعدة جنب معتز، وماسكة إيده بإيديها الاتنين، وعينيها بتتنقل بين ملامحه وكأنها بتحاول تحفظ كل تفصيلة في وشه ومعتز كان باصلها بحب، وابتسامة خفيفة مرسومة على وشه رغم تعبه وقال بصوت ضعيف: كنتي خايفة عليا؟
نسمة قربت إيده من شفايفها وباستها، وقالت والدموع في عينيها: كنت همو..ت لو حصلك حاجة يا معتز... إنت متعرفش أنا عشت اليومين اللي فاتوا دول إزاي.
معتز ابتسم بحب، وفضل باصص في عينيها شوية: كان نفسي تبقي معايا ونكبر سوا... كنت بتخيل إننا نعيش عمرنا كله جنب بعض، من غير ما حاجة تفرقنا.
نسمة مسحت دموعها بإيدها، وهو كمل بصوت متقطع: أنا آسف يا نور... آسف على كل وجع شوفتيه بسببي، وعلى كل مرة كنت السبب في دموعك. أنا عارف إنك اتأذيتي كتير، وإن جزء كبير من اللي حصل كان بسبب عيلتي... أمي كانت سبب في وجع كبير عشتيه، وأنا عمري ما هقدر أسامح نفسي على ده.
نسمة هزت راسها بسرعة، وباست إيده تاني: بس بقى يا معتز، متقولش الكلام ده. إنت ملكش ذنب في اللي حصل، ولا إنت كنت تعرف إن حياتنا هتتقلب بالشكل ده. أنا مش عايزاك تفضل تعاقب نفسك على حاجة مكنتش بإيدك.
معتز فضل باصصلها بحزن، وبعدها حاول يبتسم وقال: بس وحشتيني أوي يا نور.
نسمة ابتسمت وسط دموعها: وإنت كمان وحشتني أكتر مما تتخيل.
معتز سكت لحظة، وبعدها سألها بصوت ضعيف: قوليلي بقى... إنتي اتخطبتي لآدم ولا لسه؟
نسمة بصتله باستغراب من سؤاله، وبعدها ابتسمت: لا، متخطبتش.
معتز: ليه؟!
نسمة: هو إنت لسه هتسأل؟!
معتز ابتسم ابتسامة صغيرة، وبعدها قال بجدية: أنا بحبك يا نور، وعمري ما حبيت حد غيرك. بس القرار قرارك إنتي، عشان أنا عارف إني أذيتك كتير، ومش هسمح لنفسي أكرر ده تاني. لو قررتي تبعدي، مش هضغط عليكي، حتى لو ده هيكسرني.
نسمة قربت منه أكتر، وبصت في عينيه بحب: أنا مش عايزة أبعد يا معتز، ومش عايزة حد غيرك. أنا اخترتك من زمان، ولسه بختارك لحد دلوقتي. كل اللي أنا عايزاه إننا نبدأ من جديد، وننسى كل اللي وجعنا.
معتز ابتسم، وعينيه فضلت متعلقة بيها: طب قوليلي... هقولك يا نسمة ولا يا نور؟
نسمة ابتسمت بخجل: أي حاجة تطلع منك هتبقى حلوة.
معتز: يبقى نور... عشان كنتي حبيبتي وإنتي صغيرة، ولسه حبيبتي لحد دلوقتي.
نسمة ضحكت بخفة، وعينيها لمعت بالدموع: وأنا من يوم ما عرفتك وإنت ليك مكان جوايا محدش قدر ياخده... حتى لما حاولت أبعد، قلبي مكنش بيعرف يروح لحد غيرك.
معتز ضغط على إيدها برفق، وابتسامته وسعت: يعني لسه ليا مكان عندك؟
نسمة ضحكت وسط دموعها: لأ، إنت مالكش مكان بس... إنت واخد قلبي كله.
معتز ضحك بخفة، لكن الضحكة تحولت لتأوه بسيط من الوجع.
نسمة انتفضت من مكانها بخوف: مالك؟! إيه اللي وجعك؟! أنادي الدكتور؟!
معتز مسك إيدها بسرعة وقال بابتسامة خفيفة: استني يا بنتي، أنا كويس... هو أنا مش من حقي أضحك شوية بعد اللي حصل ده؟
نسمة حطت إيدها على صد..رها وهي بتاخد نفسها: حرام عليك! قلبي كان هيقف منك.
معتز ابتسم وهو باصص في عينيها: كنت عايز أتأكد إنك لسه بتخافي عليا كده.
نسمة بصتله بغيظ مصطنع: إنت بجد مش طبيعي! أنا كنت هموت من الخوف عليك وإنت قاعد تهزر؟!
معتز ضحك بخفة: خلاص يا ستي، مش ههزر تاني... بس تعالي هنا.
شد إيدها برفق ناحيته، فنسمة قربت منه بحذر، وهي بتحاول متضغطش عليه وقالت بصوت واطي: إنت عايز إيه؟
معتز بص في عينيها، وبعدها نزل بعينه ناحية شفايفها للحظة وقال بابتسامة: وحشتيني... وكنت محتاج أشوفك قريبة مني كده.
نسمة بلعت ريقها، وابتسمت بخجل وهي بتقرب منه أكتر، لكنه قرب وشه منها ببطء...
وفجأة الباب اتفتح!
الممرضة: يا جماعة، معلش، وقت الزيارة خلص، والمريض محتاج يرتاح دلوقتي.
نسمة بعدت بسرعة عن معتز، وبصت للممرضة بإحراج، بينما معتز رجع راسه على المخدة وهو بيحاول يخبي ابتسامته: حاضر، أنا خارجة أهو.
الممرضة: معلش يا آنسة، لازم نلتزم بمواعيد الزيارة عشان حالته.
نسمة ابتسمت لمعتز وبعدها رفعتها ناحية شفا..يفها وبعتتله بوسة في الهوا وقالت بابتسامة: خلي بالك من نفسك، وأنا هاجي أشوفك تاني، اتفقنا؟
معتز ابتسم بحب، وهز راسه بالموافقة: هستناكي يا نوري.
نسمة فضلت باصة له لحظة أخيرة، وخرجت من الأوضة، بينما معتز فضل متابعها بعينيه لحد ما الباب اتقفل، وابتسامته لسه مرسومة على وشه.
قدام غرفة العناية المركزة...
خرجت نسمة من عند معتز وهي مبتسمة، ولسه عينيها مليانة دموع من الفرحة. لكن قبل ما تلحق ترجع لخديجة، لقت راندا واقفة قدامها وبتبصلها بغيظ وقالت بعصبية: إنتي كنتي بتعملي إيه جوه عند معتز؟!
نسمة باستغراب: وإنتي مالك؟
راندا مسكت دراعها بعنف وهزتها: إنتي فاكرة نفسك إيه عشان تدخلي له وتتكلمي معاه بالطريقة دي؟!
نسمة شدت دراعها منها: إبعدي إيدك عني! وبعدين هو اللي طلب يشوفني، أنا مجتش غصب عنه.
راندا بحدة: ومش هسمحلك تقربي منه تاني! معتز لسه جوزي وأم ابنه، ومش هسمح لواحدة زيك تاخد مكاني!
نسمة ردت بثبات: معتز طلقك يا راندا، وده قراره هو. وأنا مش باخد مكان حد، هو اللي طلب يشوفني بنفسه.
راندا قربت منها ورفعت صوتها: بس أنا حامل في ابنه! يعني هفضل موجودة في حياته غصب عن أي حد، ومش هسمحلك تدخلي بينا!
في اللحظة دي، خديجة كانت جاية من بعيد، وأول ما شافت راندا ماسكة بنتها، جريت ناحيتهم.
خديجة بغضب: إنتي إيدك على بنتي ليه؟! سيبيها حالًا!
راندا سابت دراع نسمة وبصتلها بضيق: وإنتي كمان داخلة في الموضوع؟ أنا مش هسمح لبنتك تاخد مني معتز!
خديجة بحدة: بنتي ملهاش دعوة بيكي، ومعتز حر في حياته، هو اللي طلقك. فابعدي عنها بدل ما أتصرف معاكي بطريقة مش هتعجبك!
راندا بصت لنسمة بتحدي: انتي فاكرة إن الموضوع انتهى؟ أنا أم ابنه، ومهما حصل مش هسيبك تاخدي مكاني!
نسمة حاولت تبعدها عنها وهي بتقول بعصبية: خلاص بقى! ابعدي عني!
لكن راندا فضلت تقرب منها وتمسك فيها، فنسمة زقتها بإيديها عشان تبعدها عنها، من غير ما تقصد، لكن راندا اختل توازنها ورجعت لورا ووقعت على الأرض.
راندا صرخت وهي حاطة إيديها على بطنها: آآه! بطني... ابني!
خديجة اتصدمت، ونسمة وقفت مكانها مش مستوعبة اللي حصل.
راندا بدموع وألم: ابني يا معتز! الحقوني... آآه! شكلي بولد!
في اللحظة دي، عزام قرب منهم بسرعة، وأول ما شاف راندا واقعة على الأرض، اتخض وقال بقلق: راندا! مالك؟!
راندا وهي بتعيط: بطني يا عمي... ابني!
عزام بص حواليه بسرعة وصرخ: حد يجيب دكتور بسرعة! إنتوا واقفين بتتفرجوا ليه؟!
نسمة فضلت واقفة مكانها، عينيها على راندا، ووشها اتغير من الخوف، بينما خديجة قربت منها ومسكتي إيديها.
خديجة بصوت واطي: اهدي يا نور، متخافيش.
في نفس الوقت، خارج المستشفى...
كان آدم قاعد جنب ندي، وفجأة سمعوا صوت صريخ عالي جاي من ناحية المدخل.
ندي بصت ناحية الصوت وقالت باستغراب: فيه إيه؟! هو في إيه؟
آدم قام من مكانه: مش عارف، تعالي نشوف.
قاموا واتجهوا ناحية الصوت، وأول ما وصلوا شافوا راندا واقعة على الأرض، وعزام واقف جنبها بينادي على الدكتور.
ندي بصت للمشهد باستغراب وقالت: هي إيه اللي حصلها دي؟
آدم فضل باصص من بعيد من غير ما يتكلم.
وفي نفس اللحظة... داخل غرفة العناية المركزة.
كان معتز مغمض عينيه، مستريح على السرير، لكن صوت الصريخ اللي جاي من بره بدأ يوصل له.
فتح عينيه بصعوبة، وحاول يركز مع الأصوات اللي بره، لحد ما سمع صوت نسمة وقال بصوت ضعيف: نور...؟!
حاول يرفع راسه ويبص ناحية الباب، لكنه مسمعش أي رد.
معتز بقلق: نور... إنتي فين؟!
مد إيده يحاول يشيل الغطا ويتحرك من السرير، رغم الألم الشديد اللي كان حاسس بيه.
معتز بتعب: لازم أشوفها...
حاول ينزل رجله على الأرض، لكنه أول ما اتحرك حس بوجع شديد في بطنه، ومع ذلك أصر يقوم.
وفجأة، رجله خانته، ووقع على الأرض بقوة، وشد معاه الأجهزة والأسلاك المتوصلة بجسمه، فوقعوا على الأرض واتكسر جزء منها.
معتز بصراخ ألم: ااااه!
الصوت اتردد جوه الأوضة، ومعاه صوت تكسير الأجهزة.
قدام غرفة العناية...
نسمة كانت لسه واقفة مكانها، بتبص لراندا بخوف، وفجأة سمعت صوت التكسير جاي من جوه الأوضة، وبعده صوت معتز وهو بيتألم.
اتجمدت مكانها، ولفت بسرعة ناحية الباب.
نسمة بصدمة: معتز؟!
جريت ناحية الأوضة وفتحت الباب، لكن أول ما دخلت وشافت معتز واقع على الأرض، والأجهزة حواليه، ووشه متألم وهو بيحاول يتحرك...
وقفت مكانها مصدومة، وصرخت بكل قوتها:
نسمة: معتــــــــز!!!