"عاليا كانت بتدور على كلمة حلوة تطمنها، بقت محبوسة جوه جسمها.. سامعة اسمه، وحاسة بإيده على شعرها، ونفسها تقوم تحضنه وتقوله اللي حصل مش ذنبي.. بس الكلام محبوس.
وزين كان فاكر إنه لما يسافر أسبوع، هيرجع يلاقيها هديت وهتقوله وحشتني.. عمره ما تخيل انه يرجع يلاقيها نايمة على سرير مستشفي"
جانيت ردت على أحمد بغضب:" اعمل حسابك إن في خلال يومين لو زين ما طلقش عاليا انت هتشوف مني وش أتمنى ما تشفهوش".
وقفلت التليفون في وشه وهي بتسب في غبائه اللي ممكن يضيع كل اللي هي بتعمله.
بص أحمد لتليفونه وابتسم بسخرية وهو بيتحدى نفسه إن عاليا مستحيل هتفضل على ذمة جوزها بعد اللي حصل فيها.
......
في المستشفى دخلت عاليا أوضة العمليات واتعملها فحص كامل عشان يتأكدوا إن مفيش أي نزيف داخلي أو كسور.
وقفت البنت اللي صدمت عاليا بعربيتها وهي بتعيط وبعد وقت دخل باباها وهو بيقرب منها بلهفة: "مريم حبيبتي انتي كويسة.. هو إيه اللي حصل".
مريم ببكاء وخوف: "معرفش يا بابا أنا كنت ماشية بالعربية وفجأة ظهرت بنت ورمت نفسها قدام عربيتي".
ضمها والدها وهو بيحاول يطمنها واتكلم بهدوء: "وهي فين البنت دي".
مريم بخوف: "في أوضة العمليات.. وشكل حالتها صعبة جدا.. أنا خايفة تموت".
ضمها والدها بحزن وهو بيطمنها.
قرب منهم أحد رجال الشرطة وكلم مريم: "انتي صاحبة العربية اللي صدمت البنت".
هزت مريم راسها بخوف واتكلم والد مريم بهدوء: "يا فندم بنتي ملهاش ذنب والمصابة هي اللي رمت نفسها تحت العربية".
اتكلم الظابط بجمود: "الموضوع ده اللي هتحدده المصابة والشهود طبعا".
اتكلمت مريم وهي ماسكة في والدها بخوف: "والله هو ده اللي حصل وهي اللي رمت نفسها قدام عربيتي".
الظابط بتفهم: "المهم إن البنت تكون بخير لأن لو جرالها حاجة هيكون موقفك صعب".
بكت مريم وهي بتمسك إيد والدها بخوف وخرج الدكتور من أوضة العمليات وقرب من الظابط ووالد مريم واتكلم والد مريم بقلق: "طمني يا دكتور.. البنت بخير".
الدكتور بحيرة: " أنا مش هقدر أقول إنها بخير غير لما تفوق.. وترجع للوعي بالكامل".
الظابط بهدوء: "يعني البنت فيها أي إصابات خطيرة".
الدكتور بتأكيد: "احنا عملنا ليها فحص شامل واتأكدنا إن مفيش أي نزيف داخلي.. لكن فيه كسر في الذراع الأيمن وبعض الكدمات والجروح في الوجه والجسم بالكامل.. لكن كلها جروح سطحية وبسيطة ما تقلقوش".
ضم والد مريم بنته وهو بيشكر الله.
اتكلم الظابط وسأل الدكتور: "يعني نقدر نستجوبها".
رد الدكتور: "للأسف مش هينفع".
هز الظابط راسه بتفهم وسأل: "طب حضرتك لقيتوا مع البنت أي إثبات شخصية أو تليفون نقدر نوصل لأهلها".
الدكتور: "للأسف المصابة مجهولة الهوية ومفيش معاها أي إثبات شخصية".
نظر الظابط لمريم وتحدث بهدوء: "يعني كده الآنسة مريم هتتفضل معانا على القسم لحين ظهور أهل المصابة".
بكت مريم وهي بتمسك في والدها أكتر واتكلم والدها مع الظابط: "يا فندم بنتي ملهاش ذنب وبستأذن حضرتك بلاش موضوع القسم ده".
وكمل كلامه برجاء: "بنتي عمرها ما دخلت قسم شرطة وأنا مستعد لأي ضمانات إنها هتكون موجودة وتحت أمركم في أي وقت بس بلاش تدخل قسم الشرطة وسط المجرمين".
الظابط باعتراض: "هو ده القانون حضرتك ومفيش حد فوق القانون".
والد مريم: "بس فيه حاجة اسمها روح القانون".
الظابط: "وفيه كمان روح إنسانة كانت ممكن تروح بسبب بنت حضرتك".
وكمل الظابط كلامه بهدوء وهو بيبص لمريم اللي بتعيط بدون توقف: "أنا متفهم خوف بنت حضرتك بس هو ده القانون.. وممكن حضرتك تيجي معانا القسم وتكون جنبها واحنا بنعمل المحضر.. وإن شاء الله يظهر أهل المصابة ويتنازلوا عن المحضر".
وقف والد مريم وهو بيبص لبنته بحزن وطمنها إنه هيكون جنبها وراح معاها قسم الشرطة.
رواية زين وعاليا بقلمي ملك إبراهيم.
وقف الجد هو وزياد حفيده في منزل جدة زين وهما مش عارفين ممكن عاليا تكون راحت فين واتكلم زياد واقترح إنهم يكلموا زين ويبلغوه لأنه ممكن يكون عنده علم بأي مكان ممكن عاليا تروحه.. رفض جده اقتراحه عشان ما يقلقش زين وقرر إنه يكلف ناس تبحث عن عاليا في كل مكان ولو ما قدرش يوصل لمكانها يبقى يبلغ زين.. وكلم الجد رجالته وكلفهم إنهم يبحثوا عن زوجة حفيده في كل المستشفيات وأقسام الشرطة وأخد زياد وراحوا على شقة والدها يتأكدوا إنها مش موجودة هناك.
رواية زين وعاليا بقلمي ملك إبراهيم.
رجع أحمد بيته وهو سعيد جدا وبيحلم باللحظة اللي عاليا تطلق فيها من جوزها ويتجوزها هو.. دخل أوضة النوم وهو بيتخيل عاليا وبينتظر اليوم اللي هتبقى فيه في حضنه طول العمر.. دخلت زوجته وهي بتبص له بمكر: "كنت بايت فين امبارح يا أحمد".
قعد أحمد على السرير بملل: "بقولك إيه أنا جاي تعبان ومش فايق لزنك ده".
زوجته بغضب: "والله.. وجاي تعبان من إيه بقى يا ترى".
أحمد بانفعال: "بقولك إيه انتي مش ملاحظة إن انتي كاتمة على نفسي زيادة عن اللزوم".
زوجته بسخرية: "هات من الآخر يا أحمد وما تغيرش الموضوع.. انت.. كنت.. فيين".
أحمد بسخرية: "كنت عند مراتي التانية".
زوجته بغضب: "تعملها يا أحمد وصدقني مش هستغرب لو عرفت إن انت فعلا اتجوزت واحدة تانية".
أحمد ببرود: "طب حاولي تتقبلي الفكرة عشان هو ده اللي هيحصل".
زوجته وهي بتضحك بسخرية: "يحصل إزاي وانت مش معاك حتى تصرف على نفسك وأنا اللي بصرف عليك".
وقربت منه وكملت كلامها بقسوة: "هو انت ما تعرفش إن اللي بيتجوز اتنين ده لازم يكون راجل وهو اللي بيصرف على بيته".
وضحكت بسخرية وكملت باقي كلامها: "ولا العروسة معاها قرشين هي كمان وهتساعدني إننا نصرف عليك".
رد أحمد بغيظ: "أنا راجل غصب عنك ومش محتاج اللي يصرف عليا.. وعلى فكرة بقى أنا زهقت منك وبصراحة كده بفكر أطلقك".
فاجأته زوجته وهي بتضحك: "بجد هتطلقني؟ طب ما تنساش بقى المؤخر بتاعي اللي انت ماضي عليه".
كملت كلامها بهمس وهي بتغمز له: "نص مليون جنيه.. أوعى تكون نسيت.. ازعل ههههه".
وتركته وهي بتضحك وخرجت من الأوضة وهو وقف بصدمة لما فكرته بالمؤخر اللي وقع عليه وعرف إن من الصعب إنه يخلص منها.. وابتسم فجأة وقال: "بس مش مستحيل".
ومسك تليفونه واتصل على جانيت.
ردت عليه جانيت بعصبية.
جانيت: "أفندم عايز إيه".
أحمد: "نص مليون جنيه".
جانيت بصدمة: "نعم انت مجنون ولا إيه.. نص مليون بتوع إيه".
أحمد: "حق الفيديو اللي انتي عايزاه".
جانيت بانفعال: "نعم.. انت عايز كمان تبيعلي الفيديو بعد مساعدتي ليك.. هو انت فاكر إن انت كنت تقدر توصل لعاليا من غير مساعدتي".
أحمد بهدوء: "اسمعيني بس.. الفلوس دي مش ليا.. دي مؤخر العقربة اللي أنا متجوزها وعايز أخلص منها عشان أتجوز عاليا".
جانيت بغضب: "وأنا مالي تتجوز عاليا ولا ما تتجوزهاش.. أنا كل اللي يهمني إن زين يطلقها وبس".
أحمد بمكر: "وزي ما انتي قلتي ممكن يرفض يطلقها والحاجة الوحيدة اللي هتخليه يمحيها من حياته.. هي الفيديو اللي معايا".
جانيت بمكر: "أوكي يا أحمد.. سيبني يومين أفكر في الموضوع وأشوف أقدر أدبر المبلغ ده إزاي".
أحمد بسعادة: "منتظرك يا قمر.. بس ما تتأخريش عليا".
قفلت جانيت المكالمة وبصت قدامها بمكر: "ما تقلقش مش هتأخر عليك أبدا".
رواية زين وعاليا بقلمي ملك إبراهيم.
في المساء.
في المستشفى دخل الدكتور يطمن على عاليا بعد ما بلغته إحدى الممرضات إنها فاقت لكن ما بتتكلمش.. قرب منها الدكتور وكانت عاليا فاتحة عنيها لكن في حالة من الجمود.. عنيها مش بتتحرك.. مفيش أي حركة أو إشارة منها تدل إنها على قيد الحياة.. اتفاجئ الدكتور من حالتها وطلب مجموعة من الدكاترة في جميع التخصصات عشان يفحصوها ويعرفوا تفسير للحالة اللي هي عليها وكان التفسير الأقرب واللي تقريبا اتفقوا عليه معظم الدكاترة هو إنها في حالة صدمة وده دخلها في شبه غيبوبة.. وما قدروش يحددوا هي هتفوق منها امتى.
قفل الظابط التليفون بعد ما تواصل مع إدارة المستشفى وعرف بتشخيص حالة المصابة وإنها تقريبا في شبه غيبوبة.. وبلغ والد مريم إن البنت المصابة دخلت في غيبوبة ولازم حد من أهلها هو اللي يتنازل عن المحضر.
والد مريم بحزن: "طب واحنا هنوصل لأهلها إزاي والبنت معهاش أي إثبات شخصية".
الظابط: "مقدمناش حل غير الانتظار وأكيد أهل البنت هيبحثوا عنها وهيعملوا على الأقل محضر باختفائها".
وقف والد مريم بحزن وهو بيفكر إزاي يلاقي أهل البنت بسرعة ومسك تليفونه وبدأ ينشر خبر عن الحادثة في جميع مواقع التواصل الاجتماعي وذكر إن المصابة بنت في أوائل العشرين من عمرها وذكر إنها معهاش أي إثبات شخصية وكتب رقمه للتواصل.
رواية زين وعاليا بقلمي ملك إبراهيم.
بداخل شركة الشافعي.
قعد الجد على مكتبه وقدامه كمال ابنه.. دخل عليهم زياد بتعب بعد بحث عن عاليا طول اليوم وبلغهم إنهم ما قدروش يوصلوا لأي حاجة واقترح والد زين إنهم لازم يبلغوا زين باختفاء مراته.. بص الجد قدامه وهو حزين إنه مش قادر يلاقي زوجة حفيده ولا قادر يعرف إيه اللي حصلها.. سمع زياد رنة تليفونه وكانت سجدة.. رد عليها بتعب ووقف من مكانه فجأة وهو مش مصدق اللي هي بتقوله..
سجدة ببكاء: "زياد أنا قرأت خبر دلوقتي إن في حادثة حصلت الصبح والبنت المصابة معهاش أي إثبات شخصية وذكروا إنها في أوائل العشرين من عمرها".
وكملت سجدة كلامها ببكاء أكتر: "زياد أنا حاسة إن البنت دي ممكن تكون عاليا.. هبعتلك رقم ناشر الخبر هو كاتب رقمه للتواصل".
اتصدم زياد وهو بيبص لجده ووالده بذهول.. وسمع صوت استلام رسالة وكان فيها الرقم اتصل بسرعة بالرقم ورد عليه والد مريم.
زياد: "لو سمحت الرقم ده منزل خبر عن حادثة والمصابة بنت".
والد مريم بلهفة: "أيوا يا فندم.. حضرتك من أهلها؟..".
زياد: "في الحقيقة زوجة أخويا مختفية من الصبح وهي تقريبا في نفس العمر اللي حضرتك ذكرته".
والد مريم بتوتر: "هبعت لحضرتك اسم المستشفى الموجودة فيها وهكون في انتظارك هناك".
شكره زياد وقفل المكالمة وهو بيبص لجده ووالده واتكلم بصدمة: "لازم نروح المستشفى حالا".
رواية زين وعاليا بقلمي ملك إبراهيم.
وصل زياد وجده ووالده المستشفى وهما بيسألوا عن البنت اللي جت في حادثة.. قابلهم والد مريم وعرفهم إن هو اللي كلمهم وحاول يشرحلهم الحادثة حصلت إزاي.. اتكلم الجد بلهفة وقاطع كلامه: "أنا لازم أشوف البنت الأول وأتأكد إنها عاليا ولا لأ وبعدين نتكلم في أي حاجة".
قرب منهم الدكتور المتابع لحالة عاليا لما عرف إنهم أهلها وبدأ يشرح لهم إنها في شبه غيبوبة بسبب تعرضها لصدمة قوية جدا وإن من المؤكد إن الصدمة دي جتلها وقت وقوع الحادث وإن مخها تقريبا متوقف عن العمل وعن إصدار أي إشارات.. اتصدموا وطلب الجد بضرورة إنه لازم يشوفها ويتأكد الأول إذا هي زوجة حفيده أو لأ.. وسمح له الدكتور إنه يشوف المصابة.
دخل الجد وكانت عاليا نايمة على فراش المستشفى ووشها كله كدمات من أثر الحادثة وذراعها داخل الحامل الطبي.. وعنيها مفتوحة لكن مفيش أي حركة من عنيها أو من جسمها.. قرب الجد منها وغصب عنه دموعه نزلت بحزن لما شاف إنها عاليا وشاف الحالة اللي هي عليها.. حط إيده على شعرها وهو بيمسد عليه واتكلم بحزن: "إيه اللي حصلك يا بنتي.. وليه خرجتي من البيت لوحدك".
نزلت دموعها بدون ما تحرك عنيها.. اتفاجئ الجد من دموع عنيها اللي بتنزل وعنيها ما بتتحركش وكأنها نفسها تحكيله عن اللي حصلها.. لكن كلامها وإحساسها محبوس جواها.. خرج الجد من عندها وهو حزين ومتأثر جدا بحالتها.
قرب منه زياد وسأله بلهفة: "طمني يا جدي.. هي؟".
هز الجد راسه بحزن إنها هي واتكلم بقوة: "زين لازم يعرف اللي حصل لمراته.. زين لازم يرجع يا زياد".
هز زياد راسه بتأكيد ومسك تليفونه عشان يبلغ زين..
رواية زين وعاليا بقلمي ملك إبراهيم.
عند زين.
أنهى زين شغله بعد يوم متعب وصعب جدا.. رجع الأوتيل وهو حاسس بوجع غريب جواه.. كان عارف إن الوجع ده سببه اشتياقه لحبيبته اللي مانع نفسه عنها عشان ما يضغطش عليها.. رن تليفونه وكان المتصل زياد.. رد عليه زين وهو بيتكلم بمرح: "ما تقلقش عارف إن خطوبتك آخر الأسبوع ومش ناسي".
توقف صوت زين عن الحديث أول ما سمع صوت زياد الحزين وهو بيبلغه إن عاليا في المستشفى وإنه لازم يرجع ضروري.. انتفض زين من مكانه وكأن سكينة غرزت في قلبه وفجأة اختفى صوته وبقى عاجز عن الكلام من شدة الصدمة.. اتكلم زياد بقلق لما صوت أخوه اختفى: "زين انت سامعني".
زين بصوت متقطع: "في مستشفى إيه".
قاله زياد على اسم المستشفى وطمنه إن هو وجده ووالده جنبها وكمان جده اتصل على جدته عشان تروحلهم وحاول يطمنه لكن زين مكنش سامع أي حاجة وقفل تليفونه وكلم المطار بسرعة وحجز طيارة خاصة يرجع بيها مصر.
رواية زين وعاليا بقلمي ملك إبراهيم.
وصلت جدة زين المستشفى وطلبت من جد زين إنها لازم تشوف عاليا.. لكن جد زين رفض لأن حالة عاليا صعبة جدا وكان عارف إنها مش هتقدر تستحمل إنها تشوفها بالحالة دي..
ووصلت جانيت المستشفى بعد ما جوزها بلغها باللي حصل لعاليا وقربت منهم وهي بتدعي خوفها على عاليا ببكائها المزيف وطلبت من جوزها إنها تدخل تطمن عليها.. لكن جد زين رفض بإصرار وطلب إن يكون فيه حراسة مشددة على عاليا وممنوع عنها الزيارة نهائي..
وصل أحد رجال الشرطة وطلب مقابلة أهل البنت المصابة وقعد مع الجد وكمال والد زين وقعد معاهم والد مريم اللي خبطت عاليا وحاول يشرح لهم إن بنته ملهاش ذنب وإن على حسب كلام بنته والشهود إن عاليا هي اللي رمت نفسها قدام العربية.. اتكلم الظابط وأكد على كلام والد مريم وقال إن الشهود قالوا في المحضر إن المصابة هي اللي رمت نفسها قدام العربية.. اتفاجئ الجد ووالد زين وبدأوا يسألوا ليه عاليا تعمل في نفسها كده والكل كان عارف إن الوحيدة اللي عندها إجابة السؤال ده هي عاليا نفسها.. وطلب والد مريم إنهم يتنازلوا عن المحضر عشان بنته تخرج من القسم..
رد عليه جد زين بحسم: "الموضوع ده مش في إيدينا.. كلها ساعات وجوزها يوصل وهو اللي في إيده إنه يتنازل أو لأ".
رواية زين وعاليا بقلمي ملك إبراهيم.
الساعة 3 بعد منتصف الليل.
وصل زين القاهرة واتجه بأقصى سرعة للمستشفى.. استقبله زياد وسأله زين بلهفة عن عاليا.. بص له زياد وهو مش عارف يقول له إيه وشاور على أوضة عاليا ودخل زين بسرعة واتصدم لما شافها..
يتبع