رواية في بيت ليلي الفصل التاسع عشر19بقلم حبيبه منصور


 رواية  في بيت ليلي الفصل التاسع عشر19بقلم حبيبه منصور

Part 19 
مراد قام يفتح الباب، لكن أول ما شاف اللي واقف قدامه، اتجمد مكانه للحظة.
مراد بصدمة وغضب: إنت؟!
يوسف وقف قصاده، وعينه في الأرض قبل ما يرفعها ويبص لمراد.
يوسف: مساء الخير يا عمي..
مراد بصله بعصبيه و شده من القميص : انت جاي لحد بنفسك 
يوسف : اهدى بس يا عمي انا جاي احل
مراد : تحل ايه و زفت ايه على دماغك 
مراد مسكه ضربوا .... ، مسح ب كرامته الأرض حرفياً
زين شاله من تحت أيده بالعافيه 
زين : اهدى بس يا عمي ، متضيعش نفسك عشانه 
مراد : جاي هنااا ليه يا بجح!!!!!!!!! 
يوسف خد نٓفٓسه بالعافيه 
يوسف بتنهد: ممكن بس اتكلم مع ليلى 
مراد : امشي اطلع برا بدل ما اقتلك هنا ، بتخون الامانه يا كلب!!!!! 
ده انا دخلتك بيتي و آمنتك على بنتي تغدر بينا كده؟؟ 
يوسف : يا عمي انت فاهم الموضوع غلط  
مراد: تحل إيه وزفت إيه على دماغك؟! أنت فاكر إنك ممكن تدخل بيتي بعد كل اللي عملته وتتكلم عادي؟!
يوسف: يا عمي أنا عارف إنك زعلان، بس اسمعني للآخر.
مراد: زعلان؟! أنت فاكر الموضوع زعل؟! ده أنت لو كنت غريب عننا مكناش هنتوجع بالشكل ده!
يوسف حاول يتكلم، لكن مراد كمل وهو بيشاور عليه بغضب.
مراد: أنا ائتمنتك على بنتي يا يوسف، وكنت فاكر إنك راجل وقد المسؤولية، كنت لما بشوفها مبسوطة معاك بحمد ربنا إني اخترت لها حد يصونها... طلعت أنا اللي كنت محتاج حد يفوقني من اللي كنت فيه!
يوسف: أنا معترف إني غلطت، بس الموضوع مكنش بإيدي.
ليلى اللي كانت واقفة من بعيد اتحركت خطوة لقدام
ليلى: مكنش بإيدك؟!
يوسف بص ناحيتها
ليلى: يعني إيه مكنش بإيدك يا يوسف؟هو حد غصبك تكدب عليا؟ حد كان واقف فوق راسك وأنت بتوعدني ببيت وحياة سوا؟!
يوسف: ليلى، أنا...
ليلى: لأ، المرة دي هتسمعني. أنا سمعتك كتير أوي، وصدقتك أكتر مما تستحق
سكتت لحظة، وبصتله بعينين مليانين خذلان
ليلى: فاكر لما كنت بتكلمني عن شقتنا؟ عن اليوم اللي هنعيش فيه سوا؟ كنت بتكلم وأنا بفرح وأحلم، وأنت كنت عارف إن كل ده كدب
 كنت بتبص في عيني وتطمني، وأنت أكتر واحد كان عارف إني المفروض أخاف منه.
يوسف: أنا مكنتش عايز أأذيكي.
ليلى: بس أذيتني. وكنت بتأذيني كل يوم، وكل مرة كنت بترجع فيها تمثل إن كل حاجة طبيعية، أنت مدتش لنفسك فرصة واحدة تكون صريح معايا، حتى لما كان لسه عندك فرصة تنهي كل حاجة باحترام.
يوسف: أنا كنت بحبك يا ليلى.
ليلى ابتسمت بسخرية 
ليلى: متقولش الكلمة دي تاني، عشان مش لايقه عليك، الحب مش إنك تختار لنفسك وتسيب اللي قدامك يدفع تمن اختيارك، والحب مش إنك تخلي حد يثق فيك لدرجة إنه ميشكش فيك، وأنت أكتر واحد عارف إنه لازم يشك.
يوسف نزل عينه، وفضل ساكت.
ليلى: أنا مش زعلانة إن محصلش نصيب ، أنا زعلانة على كل مرة كنت فيها صادقة معاك وأنت مش صادق،  وكل مره اديتك حب انت متستحقوش،على كل حلم بنيته وأنا فاكرة إنك شريكي فيه، وعلى نفسي اللي فضلت تدافع عنك قدام الناس وأنت مكنتش تستاهل حتى إني أديك فرصة تشرح.
مراد كان واقف بيسمع كلامها، والعصبيه اللي جواه اتحولت لوجع وهو شايف بنته بتتكلم بالشكل ده.
مراد: كفاية يا ليلى، متتعبيش نفسك أكتر من كده.
ليلى رجعت وقفت جنب أبوها، فمراد بص ليوسف تاني.
مراد: وبالنسبة لحق بنتي، متفتكرش إن الموضوع انتهى عند كده، حق بنتي مش هسيبه، والفلوس اللي أخدتها هترجعها غصب عنك، جنيه جنيه، ومش هسيب الموضوع غير لما كل قرش يرجع لصاحبه.
يوسف: يا عمي أنا مش معايا المبلغ دلوقتي، اديني فرصة أتصرف 
مراد: الكلام خلص خلاص ، مفيش فرص ، والفلوس هترجع 
يوسف: أنا مش هعرف اديكم فلوس دلوقت ، مش هعرف اسحبهم من هناك 
مراد: يبقى تسمع الكلام ده كويس، من النهارده ملكش أي علاقة ببنتي، وحقها هجيبه بالقانون وبكل الطرق اللي تحفظ حقها، ومش هسمحلك إنك تستغل سكوتنا أو احترامنا ليك مرة تانية.
زين كان واقف جنب مراد، بيتابع الكلام من غير ما يتدخل.
يوسف بص لليلى للمرة الأخيرة.
يوسف: يعني خلاص؟ كل اللي كان بينا انتهى كده؟
ليلى: اللي كان بينا انتهى من وقت ما اكتشفت إنك شخص تاني غير اللي كنت أعرفه. أنت مش خسرتني النهارده يا يوسف، أنت خسرتني من زمان، بس أنا آخر واحدة عرفت.
مراد فتح الباب و شاورله بالخروج.
مراد: اتفضل
يوسف خرج من غير ما ينطق بكلمة، والباب اتقفل وراه.
مراد فضل واقف مكانه ثواني، وبعدها لف ناحية ليلى.
مراد: حقك عليا يا بنتي.
ليلى: متقولش كده يا بابا
ليلى قربت منه وحضنته.
ليلى: أنا مش عايزة غير إنك تفضل جنبي.
مراد: أنا جنبك يا حبيبتي، ومش هسمح لحد يكسرك أو يستغلك 
هند قربت منهم، وحطت إيدها على كتف ليلى.
هند: يلا يا حبيبتي، كفاية لحد كده النهارده.
سارة كانت واقفة متأثرة، ومش عارفة تقول إيه، خصوصًا إن يوسف أخوها، وفي نفس الوقت ليلى صاحبتها وأختها اللي بتحبها
ليلى لاحظت سكوتها، فبصتلها
ليلى: سارة، متحمليش نفسك ذنب حاجة انتي معملتهاش.
سارة قربت منها وحضنتها.
سارة: أنا زعلانة عشانك يا ليلى، وعمري ما كنت أتمنى تشوفي حاجة زي دي، وزعلانه عليه ف نفس الوقت لانه اخويا 
ليلى: عارفة يا سارة.
علي قرب من مراد.
علي: خلاص يا بابا خلينا نقعد كلنا، وليلى ترتاح شوية.
مراد هز راسه و دخل ، بينما زين وقف لحظة قبل ما يمشي.
زين: ليلى.
ليلى بصتله.
زين: متشيليش هم أي حاجة دلوقتي، خدي وقتك، وكل حاجة هتتحل.
ليلى: شكرًا يا زين
زين اكتفى بهزة بسيطة من راسه، وبعدها استأذن ومشي.
==============================
في مكان تاني...
يوسف كان قاعد في عربيته، وبعد يوم طويل ومليان مشاكل، قرر يراجع حسابه ويشوف الفلوس اللي كان واخدها للسفر ، عرف خلاص أن مفيش مفر وهياخدوا الفلوس غصب عنه 
فتح الابلكيشن عشان يحول الفلوس مصري ويديها ل ليلى، لكنه اتفاجئ إن الرصيد مش زي ما كان متوقع
راجع الحساب مرة واتنين، وبعدها اتصل بخدمة العملاء.
يوسف: ألو، لو سمحت أنا عايز أستفسر عن عملية سحب من حسابي.
الموظف: تحت أمرك يا فندم.
يوسف: أنا عندي مبلغ في الحساب، وعايز أعرف حصل فيه إيه.
الموظف: لحظة واحدة يا فندم...
بعد لحظات رجع الموظف يتكلم.
الموظف: حضرتك المبلغ تم سحبه بالفعل، وبعدها تم تحويله للجنيه المصري.
يوسف باستغراب: إيه؟! سُحب إزاي؟! ومين اللي سحبه؟!
الموظف: العملية تمت من خلال وسيلة الوصول المسجلة للحساب، ونقدر نستقبل من حضرتك طلب مراجعة للعملية.
يوسف: يعني الفلوس مش موجودة؟!
الموظف: للأسف الرصيد الحالي صفر يا فندم.
يوسف قفل المكالمة، وبدأ يراجع تفاصيل التحويل، لحد ما اكتشف إن دينا هي اللي نفذت العملية.
فضل باصص للشاشة، وبعدها فتح محادثتها واتصل بيها.
مفيش رد.
حاول مرة تانية، لكن تليفونها كان مقفول.
يوسف فتح المحادثة وبعت:
يوسف: دينا، انتي عملتي إيه؟!
يوسف: ردي عليا.
يوسف: انتي سحبتي الفلوس؟!
لكن مفيش أي رد.
رجع بذاكرته لكل مرة كان بيكدب عليها فيها، ولكل وعد كان بيوعدهولها عشان تفضل معاه وتصدق إنه هيبدأ معاها حياة جديدة.
ضحك بسخرية وهو بيستوعب اللي حصل.
يوسف: طلعتي أذكى مني يا دينا...
سند راسه على الكرسي، ولأول مرة مكنش عنده أي خطة يخرج بيها من اللي هو فيه.
كان فاكر إنه بيضحك على الكل، لكن في الآخر اتضحك عليه 
لكن الأهم هيرجع الفلوس ازاي 
=====================================
في بيت صابرين...
يوسف دخل البيت وهو مرهق، ورمى مفاتيحه على الترابيزة وقعد على الكنبة، وصابرين كانت قاعدة في الصالة.
صابرين: رجعت؟
يوسف: أيوه.
صابرين: عملت إيه عند مراد؟
يوسف: زي ما توقعت، طردني ومكنش عايز يسمع مني كلمة.
صابرين: ومن حقه يا يوسف، بعد اللي حصل مش مستنية منه يستقبلك بالشربات يعني.
يوسف: أنا عارف يا ماما، بس أنا كنت عايز أتكلم مع ليلى وأفهمها...
صابرين قاطعته: تفهمها إيه تاني؟! مش كفاية اللي فهمته وشافته؟!
يوسف سكت، وصابرين كملت بعتاب:
صابرين: أنت لسه مش مستوعب حجم اللي عملته، البنت دي كانت واثقة فيك، وأنت خذلتها.
يوسف: خلاص يا ماما، أنا مش قادر أتكلم في الموضوع ده.
صابرين: طب والفلوس؟ هتعمل فيها إيه؟
يوسف رفع عينه ليها، واتردد قبل ما يرد.
يوسف: الفلوس راحت.
صابرين: راحت إزاي؟!
يوسف: دينا سحبتها من الحساب.
صابرين اتعدلت في قعدتها وبصتله بصدمة.
صابرين: إيه؟! دينا مين؟! سحبت الفلوس إزاي؟!
يوسف: دينا يا ماما... هي اللي كانت معايا في إسكندرية. اكتشفت إنها سحبت المبلغ كله وحولته.
صابرين: وهي عملت كده إمتى؟!
يوسف: مش عارف، أنا اكتشفت بالصدفة لما دخلت أشوف الحساب.
صابرين: طب كلمتها؟ سألتها؟!
يوسف: حاولت أتصل بيها كتير، مش بترد، وبعتلها رسايل ومفيش أي رد.
صابرين حطت إيدها على صدرها من الصدمة.
صابرين: يعني إنت كنت سايب بنت الناس ومضيع أمانتها عشان واحدة تانية، وفي الآخر دي كمان ضحكت عليك وأخدت فلوسك؟!
يوسف بعصبية: يا ماما أنا مش ناقص الكلام ده!
صابرين: وأنا أقولك إيه؟! أقولك معلش يا حبيبي؟! أنت كنت فاكر نفسك بتلعب بيهم الاتنين، وفي الآخر خسرت الاتنين!
يوسف نزل عينه وسكت.
صابرين: والفلوس دي هتعمل فيها إيه؟ مراد مش هيسيب حق بنته، وده حقه.
يوسف: عارف، بس أنا مش معايا المبلغ دلوقتي.
صابرين: يبقى تشوف هتجيبه منين، دي نتيجة قراراتك ولازم تتحملها.
يوسف: أنا هتصرف.
صابرين: أتمنى المرة دي تفكر كويس قبل ما تتصرف، لأنك خلاص خسرت ثقة ناس كتير، ومش هينفع تفضل تخسر أكتر من كده.
يوسف قام من مكانه واتجه ناحية أوضته من غير ما يرد.
صابرين فضلت قاعدة مكانها، مش مصدقة إن ابنها وصل نفسه لكل ده، وإنه بدل ما يرجع يصلح اللي كسره، بقى محتاج يصلح حياته كلها من جديد.
====================================
في بيت علي وسارة...

سارة كانت قاعدة على الكنبة، وسرحانة ، وعلي لاحظ إنها مش على طبيعتها من ساعة ما رجعوا.
علي: مالك يا سارة؟ انتي ساكتة ليه من ساعة ما دخلنا؟
سارة: مفيش يا علي.
علي: سارة، أنا عارف إن في حاجة مضايقاكي  اتكلمي.
سارة اترددت شوية قبل ما تقول:
سارة: أنا مش عارفة هقعد مع اهلك إزاي بعد اللي حصل.
علي: أهلي؟ ليه بس؟
سارة: إنت مش متخيل أنا حاسة بإيه. كل ما أفكر إني هقعد قدام باباك أو مامتك أو ليلى، بحس إني مش عارفة أبص في وشهم. يوسف أخويا يا علي، وهو اللي عمل كل ده في ليلى أختك،  مش عارفة إزاي هقدر أقعد وسطكم وكأن مفيش حاجة حصلت.
علي: انتي ذنبك إيه في اللي يوسف عمله؟
سارة: عارفة إن ماليش ذنب، بس الموضوع صعب عليا. أنا زعلانة على ليلى، وزعلانة على أخويا في نفس الوقت. مش قادرة أستوعب إنه يعمل فيها كده، ومش قادرة أشوفه وهو بيضيع نفسه بالطريقة دي.
علي قرب منها وقال بهدوء:
علي: بصي يا سارة، انتي مراتي، وأهلي أهلك، ومحدش فيهم هيبصلك على إنك مسؤولة عن تصرفات يوسف. ليلى نفسها عارفة إنك مالكيش ذنب، ومش شايلة منك 
سارة: بس أنا خايفة يتغيروا معايا.
علي: ولو حد اتغير، أنا هفهمه إنك مالكيش علاقة باللي حصل. انتي مش مطالبة تعتذري عن غلطة مش غلطتك، ولا تشيلي هم حاجة مش مسؤوليتك.
سارة سكتت، وعلي كمل:
علي: وبعدين حق ليلى هيرجع، وماما وبابا مش هيسيبوه يضيع، وإحنا كلنا واقفين جنبها. إنما يوسف هو اللي لازم يتحمل نتيجة اللي عمله، وده مش معناه إنك تبعدي عن أخوكي أو تفضلي تعاقبي نفسك عشانه.
سارة: أنا بس نفسي ليلى تبقى كويسة، ونفسي يوسف يفوق لنفسه قبل ما يخسر أكتر من كده.
علي: ربنا يهديه ويصلح حاله، بس انتي  بلاش تشيلي كل ده جواكي. أنا معاكي، ومش هسمح إنك تحسي إنك غريبة وسط أهلي.
سارة ابتسمت ابتسامة خفيفة:
سارة: ربنا يخليك ليا.
علي: ويخليكي ليا يا ستي، ويلا بقى كفاية تفكير عشان أنا جعان ومحتاج حد يقوم يعملنا حاجة ناكلها
سارة ضحكت: أهو ده اللي شاغلك في الآخر!
علي: طبعًا، كل واحد وله أولوياته
===============================
(بعد يومين)
في شقة يوسف...
يوسف كان قاعد على طرف الكنبة، الموبايل في إيده، وبقاله فترة بيحاول يتصل بدينا، لكن من غير أي رد.
فتح المحادثة وبعتلها رسالة جديدة.
يوسف: انتي فاكرة إنك كده خلصتي؟ ردي عليا يا دينا.
فضل مستني، لكن مفيش رد. رمى الموبايل جنبه بعصبية، وبعد دقائق الموبايل رن، ولما شاف اسم دينا ظهر على الشاشة، رد بسرعة.
يوسف: أخيرًا افتكرتي تردي؟!
دينا: إيه يا يوسف؟ وحشتك ولا إيه؟
يوسف: انتي عملتي إيه في الفلوس؟!
دينا ضحكت بسخرية:
دينا: الفلوس؟ آه، تقصد الفلوس اللي كنت فاكر إنك هتبدأ بيها حياتك الجديدة؟
يوسف: انتي اتجننتي؟ انتي  حولتي كل المبلغ من غير ما تقوليلي ليه؟!
دينا: عشان أنا مش غبية يا يوسف، وعارفة كويس إنت كنت ناوي تعمل إيه.
يوسف: أنا كنت بعمل كل ده عشاننا!
دينا: عشاننا؟ ولا عشان تخلص من ليلى وتضمن إنك تفضل ماسك كل الخيوط بإيدك؟ إنت فاكر إني مش فاهمة طريقتك؟
يوسف: يعني انتي كنتي بتخططي من ورايا طول الوقت؟
دينا: أنا كنت مستنياك تغدر بيا زي ما غدرت بيها، وكنت عارفة إن اليوم ده جاي، فسبقتك بخطوة.
يوسف: رجعي الفلوس يا دينا، أنا مش بهزر!
دينا: وأنا كمان مش بهزر. الفلوس بقت معايا، ومش هرجع فيها جنيه واحد.
يوسف: انتي مش عارفة انتي عملتي إيه!
دينا: لا، أنا عارفة كويس أوي. سلام يا يوسف.
وقبل ما يلحق يرد، قفلت المكالمة.
يوسف فضل باصص للموبايل، مش مستوعب اللي بيحصل 
حط الموبايل على الترابيزة، وسند ضهره وهو بيحاول يستوعب اللي وصل له.
كان فاكر إنه أذكى من الكل، وإنه يقدر يخرج من كل موقف كسبان... لكنه في الآخر خسر ليلى، وخسر دينا، وخسر حتى الفلوس اللي كان فاكر إنها هتأمّن مستقبله 
=================================
في بيت مراد...

مراد كان قاعد في الصالة، وقدامه ملف فيه الإيصالات والشيكات، وملامحه باين عليها القلق. زين دخل وقعد قصاده.
زين: قلقان ليه 
مراد: مش عارف أعمل إيه يا زين. أنا كل اللي يهمني إن ليلى متدخلش في أي مشكلة بسبب يوسف، بس الورق اللي مضته لسه موجود، وده مقلقني
زين: عشان كده أنا شايف إننا لازم نتحرك بسرعة ونروح لمحامي يفهمنا موقفنا القانوني.
مراد: أنا خايف يكون فيه إجراء ضد ليلى بسبب الشيكات خصوصًا لو يوسف اتأخر في السداد.
زين: وده اللي لازم نتأكد منه، المحامي هيشوف الإيصالات والشيكات ويقولنا نعمل إيه عشان ننقل المسؤولية ليوسف بشكل قانوني، ونضمن إن صابر ميبقاش ليه أي مطالبة على ليلى.
مراد: بس يوسف لازم يكون موجود، ومش هينفع يفضل يتهرب من الموضوع.
زين: أكيد، هو اللي استلم الفلوس وهو اللي لازم يتحمل مسؤوليتها. هنخليه ييجي معانا، والمحامي هو اللي هيشرحله موقفه وحقوق كل طرف.
مراد: أنا مش عايز أظلمه، بس في نفس الوقت مش هسمح إنه يظلم بنتي تاني. ليلى كفاية عليها اللي حصل.
زين: ومحدش هيطلب منك غير كده. إحنا هنمشي في الموضوع بالقانون، وحق ليلى لازم يرجعلها.
مراد سكت شوية، وبعدها قفل الملف اللي قدامه.
مراد: خلاص، بكرة الصبح نروح للمحامي، وكلم يوسف وخليه يعرف إن وجوده مش اختياري و ليلى تكلم صابر يروح على هناك 
زين: حاضر يا عمي، هكلمه وأبلغه.
مراد: وربنا يستر ونخلص من الموضوع ده على خير.
زين: إن شاء الله، متقلقش. المهم نتحرك صح من البداية , هقوم ادخل الورق جوا بدل ما يضيع تبقى مصيبه ....
ليلى : انا بصراحه مش عارفه اقولك ايه يا زين ، انت تعبت اوي ف حوار ملكش اي ذنب أو علاقه بيه 
وشايل اهم اكتر مننا 
زين بجديه: عشان انتي تهميني، أو هتهميني 
ليلى : مش فاهمه 
زين : هتفهمي بعدين 
=================================
في مكتب المحامي...

كان مراد قاعد على الكرسي اللي قدام المكتب، وجمبه ليلى وزين، وفي الناحية التانية يوسف وصابر.

المحامي كان قدامه ملف الأوراق، وفضل يراجع الإيصالات والشيكات بعناية قبل ما يبدأ كلامه.

المحامي: أنا راجعت المستندات اللي حضراتكم قدمتوها، وفيه نقطة مهمة لازم تكونوا فاهمينها كويس،الإيصالات والشيكات الموقعة باسم الآنسة ليلى بتخلي موقفها القانوني محتاج معالجة رسمية، ومينفعش نكتفي بمجرد إن يوسف يعترف إنه هو اللي استلم الفلوس
مراد: يعني إيه يا أستاذ؟ بنتي ممكن تتحمل مسؤولية مبلغ هي أصلًا ما استفادتش منه؟
المحامي: خليني أوضح لحضرتك، القانون بياخد بالمستندات والتوقيعات، وكل ورقة ليها طبيعتها وأثرها. وبالنسبة لخيانة الأمانة، المادة 351 من قانون العقوبات بتتناول حالات معينة من التصرف في المال المسلم على سبيل الأمانة، لكن انطباقها بيتحدد حسب طبيعة التسليم والأدلة الموجودة، مش لمجرد وجود دين أو تأخير في السداد.
صابر: أنا مش هدفي أضر حد، أنا عايز فلوسي ترجع، واللي استلم المبلغ هو اللي يتحمل مسؤوليته.
المحامي: وده حقك. لكن لازم نفرّق بين المسؤولية عن الدين وبين المسؤولية الجنائية، وكل واحدة ليها شروطها وإجراءاتها.
المحامي التفت ليوسف.
المحامي: أستاذ يوسف، هل حضرتك بتقر إنك استلمت المبلغ من الأستاذ صابر، وإنك كنت المسؤول عن التصرف فيه؟
يوسف: أيوه، أنا اللي استلمت الفلوس، وأنا اللي كنت مسؤول عنها.
المحامي: وهل ليلى استلمت أي جزء من المبلغ أو تصرفت فيه؟
يوسف: لأ، ليلى مالهاش علاقة بالفلوس دي، وأنا اللي كنت بتعامل مع صابر.
ليلى كانت قاعدة ساكتة، عينيها ثابتة على الأوراق اللي قدام المحامي. مدت إيدها ناحية الإيصالات، وفضلت تبص على توقيعها الموجود عليها، قبل ما تسحب إيدها تاني.
ليلى: أنا مش مصدقة إني مضيت الورق ده بإيدي... كنت فاكرة إني بساعد الشخص اللي هكمل معاه حياتي، مكنتش متخيلة إن ثقتي فيه توصلني للموقف ده.
مراد بص لها بحزن، وزين لاحظ إنها بدأت تتوتر، فمال ناحيتها وقال بصوت واطي:
زين: ليلى، متخافيش... كل حاجة هتتحل، وأنا معاكي.
ليلى بصتله للحظة، وبعدها رجعت عينيها للأوراق، وحاولت تتمالك نفسها.
المحامي: مفهوم. لكن لازم أوضح إن إقرار يوسف وحده مش كفاية لإسقاط الالتزام الثابت على ليلى في الأوراق. لازم نراجع طبيعة كل مستند، ونعمل اتفاق مكتوب مع صابر، يتضمن إبراء ذمتها صراحةً، وقبول يوسف بتحمل الدين، مع استكمال الإجراءات اللازمة بالنسبة للشيكات والإيصالات.
صابر: أنا موافق، طالما حقي محفوظ والاتفاق واضح.
المحامي: تمام. هنثبت المبلغ بالكامل، وهنحدد جدول سداد بمواعيد واضحة، والتزام يوسف بالسداد، وأي تأخير هيكون وفقًا للاتفاق والإجراءات القانونية المترتبة عليه.
يوسف: أنا موافق، ومش هتهرب من الفلوس. هسددها مهما أخد مني وقت.
المحامي: الكلام ده لازم يتحول لالتزام مكتوب، لأن حضرتك مش بتتعامل مع وعد شخصي، إحنا بنتكلم عن حق مالي ثابت.
مراد بص ليوسف بنبرة حاسمة:
مراد: أتمنى تكون فاهم إنك مش بس ضيعت ثقة بنتي فيك، إنت كمان حطيتها في موقف مكنتش تستحقه أبدًا
يوسف نزل عينه ومردش.
ليلى فضلت ساكتة، وبعد شويه قامت من مكانها بهدوء.
زين قام معاها، ومراد بدأ يتكلم مع المحامي في باقي الإجراءات.
أما يوسف، ففضل قاعد مكانه، وعينه وقعت على ليلى للحظة، لكنه ملاقاش منها حتى نظرة واحدة.
===================================
في كافيه...
تمارا كانت قاعدة على ترابيزة جنب الشباك، قدامها اللابتوب وكشكول مفتوح، مركزة في المذاكرة وبتكتب ملاحظات، لحد ما سمعت صوت يونس.
يونس: مساء الخير.
رفعت عينيها من الكشكول، واتعدلت في قعدتها.
تمارا: مساء النور.
يونس: بتذاكري؟
تمارا: لا، فاتحة الكتاب للديكور
يونس ضحك بخفة.
يونس: لسه زي ما انتي 
تمارا: وإنت لسه بتحب تبدأ كلامك بتعليقات مستفزة؟
يونس: طب ينفع أقعد؟
تمارا بصت على  للكرسي اللي قدامها من غير ما تتكلم، فقعد.
يونس: مش هعطلك كتير، أنا بس كنت عايز أتكلم معاكي في حاجة.
تمارا: اتفضل.
يونس: أنا عارف إن حصل بينا خلافات قبل كده، وإن كل واحد فينا كان عنده وجهة نظره، بس أنا مش حابب إننا نفضل كده. أنا مسامحك يا تمارا، وعايز نفتح صفحة جديدة.
تمارا قفلت الكشكول بهدوء.
تمارا: كويس إنك مسامح، بس إنت عايز إيه بالظبط يا يونس؟
يونس: عايز أخد خطوة ناحيتك، وأدي نفسنا فرصة نتعرف على بعض من غير اللي حصل زمان.
تمارا: والفرصة دي هتكون إزاي؟
يونس: نتكلم، ونتعامل بشكل طبيعي، ولو لقينا نفسنا متفاهمين ومرتاحين، أنا ناوي أكلم باباكي وأدخل البيت من بابه.
تمارا سكتت لحظة، وبعدين قالت:
تمارا: إنت عارف إن الموضوع مش بالبساطة دي، صح؟
يونس: عارف.
تمارا: وكمان مش عايزة كلام يتقال النهارده وبكرة يتغير.
يونس: عشان كده بقولك إني مش مستعجل على حاجة. أنا بس حبيت أوضحلك نيتي.
تمارا: طيب، خلينا نشوف الأيام هتقول إيه. دلوقتي مش وقت خطوات ولا كلام مع بابا، خصوصًا في الظروف اللي إحنا فيها، انت عارف اللي يوسف عمله 
يونس: أنا متفق معاكي، ومش هعمل أي حاجة من غير ما تكوني عارفة و حابه اني اخد خطوه ،
تمارا فتحت الكشكول تاني وقالت بهدوء:
تمارا: تمام، بس مش هيبقى في اي كلام بيننا خالص ف العموم 
و يلا بقى انا عندي مذاكرة كتير ومش عايزة أتأخر.
يونس ابتسم وقام.
يونس: مش هعطلك. ربنا يوفقك.
تمارا: شكرًا.
مشي يونس، وتمارا رجعت تبص في الكشكول، وبعد ثواني رفعت عينيها ناحية المكان اللي كان قاعد فيه، وبعدين رجعت لمذاكرتها 
=============================

«في بيت مراد»
دخل مراد وليلى وزين الشقة، وكانت هند قاعدة في الصالة مع سارة وتمارا.
هند أول ما شافتهم قامت من مكانها.
هند: أهو جيتوا! طمنوني، عملتوا إيه؟
مراد: الحمد لله، المحامي وضّح لنا الدنيا، وفي اتفاق هيتعمل بين يوسف وصابر، ويوسف هيتحمل مسؤولية الفلوس ويسددها.
هند: يعني كده ليلى هترتاح من الموضوع ده؟
مراد: إن شاء الله، لسه فيه إجراءات هنخلصها، بس إحنا كده خدنا أول خطوة صح.
ليلى: الحمد لله يا ماما، أنا ارتحت شوية لما المحامي شرحلنا كل حاجة.
هند قربت منها وطبطبت على كتفها.
هند: ربنا يريح قلبك يا حبيبتي، ويعوضك خير.
سارة: الحمد لله يا ليلى، وإن شاء الله كل حاجة تخلص على خير ، وربنا معاه بقى ف التسديد
تمارا: أهو كده نقدر نتنفس بقى.
مراد ضحك: هو إنتوا كنتوا حابسين نفسكم؟
تمارا: أيوه يا بابا، من ساعة ما خرجتوا وإحنا مستنيين الخبر.
هند: طب اقعدوا، أعملكم حاجة تشربوها.
زين: متتعبيش نفسك يا طنط، أنا مش هقعد كتير.
هند بضحك:  يا ابني إنت كل مرة تقول مش هقعد كتير، وفي الآخر بتقعد معانا أكتر مننا.
ليلى ضحكت: سيبيه يا ماما، هو بيحب يعمل نفسه مشغول.
زين بص لها: طب ما أنا فعلًا مشغول.
ليلى: أهو كلنا عرفنا.
وقبل ما يكملوا كلامهم، الباب اتفتح ودخل علي.
علي: السلام عليكم.
هند: وعليكم السلام، حمد لله على السلامة يا حبيبي.
علي: الله يسلمك. إيه ده، رجعتوا؟ عملتوا إيه عند المحامي؟
مراد: الحمد لله يا ابني، الأمور ماشية كويس، والمحامي هيجهز الاتفاق.
علي: طب الحمد لله، ربنا يخلص الموضوع ده على خير.
قعد علي جنب سارة، وبص لزين.
علي: إيه يا زين، أخبارك إيه؟
زين: الحمد لله، تمام.
علي: عامل إيه في الشغل؟ الدنيا معاك؟
زين: ماشية الحمد لله، ضغط شوية بس كله تمام.
علي: ربنا يعينك، بس إنت شكلك واخد شغل زيادة اليومين دول.
زين :   فعلا والله 
علي: طب بعيدًا عن مشاكل الشغل، إنت بتساعد ليلى ليه بالشكل ده يا زين؟
زين رد ببساطة: عشان ليلى طيبة، ومنستاهلش كل اللي حصلها.
علي بصله بابتسامة: عشان طيبة بس؟
زين: أيوه، هو فيه إيه؟
علي: لا أصل هو أي حد طيب هتساعده كده؟
زين: لو محتاج مساعدة، ليه لأ؟
علي: الله! ده إنت طلعت بتاع خير أوي يا زين.
سارة ضحكت: سيبه يا علي، الراجل مش مقصر معانا.
علي: ما أنا بقول، ربنا يكرمه، بس أنا بسأل عادي.
زين: ماشي يا علي، اسأل براحتك.
علي: طب ماشي، بس إنت من ساعة ما عرفت ليلى وإنت متابع معاها كل حاجة، حتى موضوع المحامي جيت معاهم النهارده.
زين: ما هو الموضوع مش بسيط، وبعدين أنا عارف تفاصيله من الأول.
علي: أيوه، بس برضه مش أي حد بيعمل كده.
زين ابتسم وهو بيحاول يغير الكلام: طب قولي إنت، الورشة أخبارها إيه؟
علي: الورشة زي ما هي، متحاولش تغير الموضوع.
ضحكت سارة وتمارا، ومراد كان متابع كلامهم بابتسامة.
علي كمل وهو بيهزر: أنا بس عايز أفهم، إنت عامل معانا كل ده ليه؟ خايف ليلى تزعلك ولا إيه؟
زين: يا ابني أنا بساعدها عشان هي محتاجة حد يساعدها، مش كل حاجة لازم يبقى وراها سبب.
علي: طب ما هو أنا مش مقتنع إن مفيش سبب خالص.
زين بصله وسكت لحظة، وبعدها قال:
زين: خلاص يا علي، تحب أقولك السبب؟
علي: قول يا سيدي، سامعينك.
زين عدّل قعدته وبص لمراد وهند، وبعدها قال بهدوء:
زين: أنا عايز أتجوز ليلى.
ليلى رفعت عينيها بسرعة وبصتله، وهند سابت الكوباية اللي في إيدها وبصت لمراد، وسارة وتمارا اتبادلوا النظرات.
علي: نعم يا أخويا؟!

                   الفصل العشرون من هنا
تعليقات



<>