رواية فستان وجزمة وعيلة في ازمة الفصل الاول1بقلم شيماء يسري زهران



رواية فستان وجزمة وعيلة في ازمة الفصل الاول1بقلم شيماء يسري زهران


- بقى كده ياولا! كده يا ولا تعمل كده يا ولا! طب وقلبي! وحبي! انا خلاص مش عايزة احب تاني..

وقعت في الأرض وانا بمثل في اوضتي وقومت فرحانة بسقف لنفسي قدام المرايا، خـ.بطت اختي ع الباب بقوة:

- انا مش عارفة اتـ.نيل اذاكر من صوت الموسيقى، احنا مش قاعدين في مسرح.

فتحت باب الاوضة:

- انا في اوضتي على فكرة! اروحلكم فين تاني!

قال بابا وهو قاعد بيشرب الشاي في الصالة:

- يابنتي وطي الصوت مش كده، الجيران يقولوا علينا ايه، امبارح جارنا اللي فوق نازل يـ.خبط عليا الفجر يقولي مش عارف ينام.

- يا بابا افهمني، لازم الفنان صوت مزيكته في الخلفية يبقى عالي عشان يقدر يعيش الأجواء بتاعت الشخصية.

ردت فاطمة اختي:

- تاني هتقولي أجواء! ...يادي النيلة اهو الباب بيـ.خبط.

كان هيقوم بابا يفتح، قربت افتح انا:

- نعم؟

قال جارنا، اللي كانت العمارة بتخاف منه اصلا وراجل شر.اني:

- نعم؟

قال في زعيق:

- هو ايه اللي نعم؟؟ جرا ايه يا استاذة!!! هو أنا كل يوم هنزل واقول صوت الموسيقى مخليني مش عارف انام!!!

رديت في قر.ف ونبرة قوية:

- والله ده شغلي هنا، انا بشتغل ممثلة.

رد وهو بيـ.خبط في باب الشقة بايده:

- ما تشتغلي على نفسك مش عارفين ننام..هو في ايه!!!!

رجعت لورا وانا ببلع ريقي في خوف:

- على فكرة مش مستاهلة الزعيق ده كله، هوطي الموسيقى شوية عادي.

قام بابا من على الكرسي:

- ما خلاص يا استاذ عبده قالتلك هنوطي الموسيقى، انا محدش يعلي صوته على بناتي، لا عاش ولا كان!

قربت فاطمة من بابا وهو متعصب تهديه في خوف:

- خلاص يا بابا ادخل انت.

رد بابا وهو بيفك القميص اللي هو لابسه في غـ.ضب:

- مش داخل! اوعي يابنت ادخلي انتي جوا! انت بتزعق لبناتي ليه ياعم انت!

قال عبده في صوت عالي:

- بجد؟ طب فين ايجار الشهر ده بتاع البيت؟

بص بابا في احراج شمال ويمين وهو بيعدل قميصه:

- احمم، بناتي زي بناتك عادي بس يعني متبقاش تزعق اوي.

ضحك ضحكة استعطاف كده في الاخر وقال:

- يلا عن اذنك يا استاذ عبده..يلا يا بنات خشوا جوا.

فتح عبده الباب تاني بايده قبل ما يقفله وقال في صوت عالي وهو بيـ.دب ع الباب وبيمسك بابا من اللياقة:

- انا عايز ايجار الشهر ده بدل ما اكـ. سر الشقة دي على دماغكم.

قال بابا في نبرة خوف:

- طب بلاش التليفزيون وحياتك..لسه جايبه قسط.

طلع اخويا من ع السلم يجري على الصوت:

- ايه ده!! اوعى ايدك على بابا، اوعى يراجل يا عِـ.جل.

- انا عِـ.جل؟

- اه، وانا هنـ.دمك انك فكرت تمد ايدك على ابويا.

| بعد نص ساعة|

كان قاعد بابا واخويا محمد على كرسي الانتريه بحطلهم انا وفاطمة وماما تلج على وشهم.

اتأوه بابا من ايد ماما:

- اه، ايدك مش قادر، اه يا وشي.

قولت في غـ.ضب:

- الراجل ده عايز يتربى.

شخط بابا عليا:

- طب اقسم بالله لو مانتي اللي اتربيتي لأكون مكـ. سرلك الأو.ضة بتاعتك حتة حتة يا مرام! ايه رايك بقى!

ردت ماما:

- يابت كفاية مشا.كل بقى وشوفيلك شغلانة بدل المسرح والكلام الفاضي ده.

- يا ماما انا اتخلقت عشان اكون فنانة!

- أنتِ اتخلقتي عشان تطلعي عين اللي خلفوني، مشوها من وشي.

- يوه يا بابا! هو أنا عملت ايه يعني ما كنت لازم الموسيقى تبقى عالية ده بكرة اختبار مهم في المسرح اللي قدمت فيه ده يارب يقبلوني، وبعدين سيبوني انطلق وفي يوم هبقى ولا ياسمين عبد العزيز واجيبلكم فلوس تعوموا فيها.

رد محمد وهو حاطط كيس التلج على وشه:

- ياستي تمثيل ايه، اذا كنت انا بحاول الاقي شغل جمب المدرسة مش لاقي، وبعدين مفيش حد من عيلتنا مخرج ولا حاجة كبيرة كان حققلك حلمك، انسي الموضوع ده.

قولت في تريقة:

- الشخص لما بيعتمد على نفسه ده اللي بيخليه شخص ناجح، مش أنه يعتمد على غيره يا حمادة، حمادة ياللي بتكلم ناس تديهم فلوس ويدوك الإمتحانات.

نفخ محمد في الهوا في استفزاز، قالت فاطمة:

- عدي يومك بقى يا مرام خشي نامي، وانا كمان هدخل انام ورايا شغل كتير بكرة في الشقة.

- طيب، تصبحوا على بنتكم وهي زي مي عمر كده.
ــــــــــــــــــــــــــــــــــ

|في مطعم|

- مراد، ودي الطلبات للترابيزة رقم سابعة بسرعة انت اتأخرت ليه!

- كنت بكلم امي في التليفون.

- طب يابني لو صاحب المكان شافك هتبقى مشكلة أنجز.

- يابني بطل تبقى خيخة كده وكل حاجة خايف، هو كل ما يشوفك كده هيدو.س عليك.

- مراد أنا جاي هنا اشتغل، لازم اطاطي راسي ياعم.

- لأ أنا مش بطاطي راسي لحد والله، مش كفاية اصلا أم المرتب اللي الواحد بياخده هنا وساكت.

- ياعم الجا.مد اوي طب ايه مقعدك ما تروح تدور على مكان مرتبه أعلى.

- على أساس هلاقي يعني؟ ده انا لما صدقت ان واحد معارفي جابلي الشغلانة دي، واهي لايقة على قسم فنادق اللي درسته.

- طب يلا روح ودي الطلبات.

شال مراد الصينية اللي فيها العصاير وقرب من طرابيزة رقم سابعة، وقف تنح قدامها، كانت واحدة شكلها من طبقة غنية، لابسة چيبة قصيرة خالص على بلوزة ضيقة، صفر غصب عني وهو بيحط الصينية.

- افندم!!!

بلع ريقه في خضة:

- حضرتك بتكلميني انا؟

- اه بكلمك انت يا قليل الزوق!

- انا عملت ايه!

علت صوتها وقالت:

- واقف قدامي تبص عليا وتصفر! مش ده المفروض مكان محترم!!

قال في توتر:

- طب وطي صوتك طيب.

- فين صاحب المكان!

خرج المدير يسأل:

- ايه ده في ايه!

- اسأل البيه اللي واقف يعاكس بدل ما يشوف شغله!!

- انا اسف يا فندم..على مكتبي حالًا!!!

| في مكتب المدير|

- كام مرة اقولك ميصحش اللي انت بتعمله ده!

عمل مراد بلونة باللبانة اللي في بوقه وفرقعها، اتخض المدير ع الكرسي وقال:

- وقولتلك وانت بتشتغل ممنوع اللبان! وكمان ممنوع السلسلة دي!

قعد مراد ع الكرسي:

- انا هفهمك في هدوء بس..

- فِز قوم!!!

قام مراد مخضوض يقف معدول تاني.

- لازم تعرف يا استاذ إن المطعم ده مطعم محترم! مطعم شنباته وواجباته عايش بقاله عشر سنين في حفظ وأمان!

خلص جملته وعدل شنبه الطويل من الأطراف، قال مراد:

- يا استاذ مجيتش جمبها اصلًا، دي واحدة من الناس اللي فوق دول وشايفة نفسها، جاية تقطع عيش الناس الغلابة.

- هتتبلى عليك ليه!

- اهو افترى زي ما بقولك..وانت عشان راجل طيب بتتعاطف مع الناس بسرعة يا استاذ شنباته والله.

ابتسم وهو بيعدل شنبه:

- أيوة عندك حق انا طول عمري طيب ..بس الحقيقة إن الطيبة دي مخسرانا كتير وجايبلنا قلة التقدير.

ابتسم مراد في خبـ.ث وهو بيمضغ اللبانة، كمل شنباته:

- تخيل إن المدام بقت تستغل طيبتي؟ 

رد مراد وهو بيقعد ع الكرسي تاني قدام مكتبه:

- فعلًا؟

- أيوة، بتزعقلي وتقولي اني مدير فالسو وعلى الله صوتي يطلع في البيت عليها.

- ملهاش حق يا استاذ، شوفت القلب الطيب بيعمل ايه بقى.

- عندك حق.

- بس انت بردو متسكتلهاش..

سأل شنباته في احراج كده:

- احممم، طب قولي اعمل ايه؟

- هقولك..اولًا عايزك شديد معاها كده، يعني تزعقلك تقوم معلي صوتك اكتر ومش كل حاجة تطلبها تعملهالها..الستات دي مينفعلهاش الدلع الما.سخ.

- مانا ..مانا اصلي بضعف لما بتقولي يا شنبوبتي.

- بتقولك ايه يا فندم؟

- شنبوبتي.

- لأ ليك حق تضعف اه، ما ده بقى اللي بنتكلم عليه، الطيبة الزايدة يا استاذ..

- يعني تفتكر لو عملت اللي بتقولي عليه هتتعدل معايا؟

- طبعًا يا استاذ..بس ليا طلب.

- طلب ايه؟

- مينفعش تزودني في المرتب شوية؟

- منين! مانت اديك شايف عدد الزوار للمطعم مبقاش كتير زي زمان.

قام مراد وقف وهو قالب وشه:

- طيب..اقوم اشوف شغلي انا بقى.

د.ب على المكتب وقال:

- يعني ايه!! واللي انت عملته فاكرني هعديهولك!

- خلاص بقى يا استاذ نهارك ابيض.

قرب مراد يخرج من الباب، قال:

- هي كانت حلوة بصراحة.

ضحك مراد:

- شوفت بقى يا خلبوص؟

ضحك المدير ثواني وبعدين قال في غـ.ضب:

- انا خلبوص!!

اتوتر مراد وخرج من المكتب يقفل الباب، ضحك المدير وهو بيعدل شنباته وبيقول:

- خلبوص.

| في اليوم التاني|

كنت مجهزة نفسي ولابسة الشخصية وكل واحد بيطلع يقدم دوره على المسرح في حين أنه ممكن يتقبل.. كاستينج تمثيل يعني.

لكن وانا بعدل الطرحة الفلاحي اللي لبساها، بما اني عاملة دور ست فلاحة يعني..ببص قدامي لقيت اللي داخلة المسرح، جريت عليها في صوت عالي قدام الناس كلها:

- استاذة اسعاد!!! استاذة اسعاد!!!!

بصت وراها مخضوضة:

- ايه ده في ايه؟ اهلًا حبيبتي اهلًا.

بشاور في وشها وانا فرحانة:

- استاذة اسعاد يونس!!!! مؤسسة السعادة في مصر!!!!

- يا حبيبتي، حبيبتي تسلميلي.

- استاذة اسعاد !!! اسعاد يونس!!!

 زعقت في وشي:

- وربنا أيوة أنا! هو تحقيق هوية!

- انا اسفة يا استاذة، بس مش قادرة اصدق يعني اني واقفة قدامك!

- أنتِ عاملة دور فلاحة ولا ايه؟

- ايوى، اعجبك اوي والله يا استاذي..بصي كدى، طب ده اني كمان اعرف اعملك دور فاتن حمامي في أفواه وارانب.

بصيتلي بصات غريبة كده وهي مش فاهمة حاجة وسابتني ومشيت لجوا..جريت وراها تاني:

- في ايه بس يا استاذة! دوري مش عاجب حضرتك؟

- لأ كويسة، هنشوف لما تقدمي ع المسرح دلوقتي.

خرجت فوني وقولت وانا ببو.س خدها:

- طب صورة بالله عليكي.

اتخضت مني وانا بفعصها في الصورة.

عدى شوية وقت، كنت قاعدة بتفرج على الناس اللي بتقدم أدوارها قاعدة براجع دوري في صوت كده، زعق حد من أصحاب اللجنة:

- الصوت لو سمحتي!

اعتذرت وسكت ورجعت اتفرج ع المسرح..عدى شوية وقت واسمي اتنادى، شربت بوق ماية وانا قلبي بيترعش.

طلعت ع المسرح وعيني جات ع استاذة اسعاد يونس، بحاول ابعد وشي عنها عشان متوترش..

- اتفضلي يا استاذة ابدأي.

بدأت في دوري لكن فجأة نسيت الكلام واتوترت..قالت استاذة اسعاد:

- براحة..اتلغبطي؟

- ماهو بردو..يعني محدش قال على الاعلان اللي في انستجرام إن حضرتك هتكوني موجودة..حضرتك وجودك موترني، كان مكتوب اللجنة مكونة من شوية مخرجين.

قال اللي جمبها في زعيق:

- ايه شوية مخرجين دي! 

- مقصدش والله.

قالت الأستاذة:

- انا اسفة ليكم، هي بس متوترة، اتفضلي كملي.

بدأت اكمل وفجأة بصيتلها وقولت:

- طب ينفع حضرتك تغمضي عينك؟

| في المطعم|

وصل مراد المطعم لقى صاحبه بيندهله:

- المدير عايزك من ساعة ما جيه.

- في ايه؟

- مش عارف، بس شكله مش طايقك وعلى آخره، انت هببـ.ت ايه؟

سابه مراد ودخل مكتب المدير، لقى اللي مديله ضهره بالكرسي ع المكتب..

- صباح الخير يا استاذ شنباته.

لف بالكرسي، لقى وشه مـ. ضروب وعامل علامة، قبض حواجبه وقال:

- يا ساتر يارب سلامتك يا استاذ! مالك حصل ايه!

قام من على الكرسي بتاعه وهو بيرفع بنطلونه ومكشر في غـ.ضب:

- بقى تعمل نفسك بتنصحني وتقولي اعلي صوتي عليها ومش كل حاجة موافقش عليها!

رجع مراد خطوة لورا، قرب منه:

 - عجبك منظر وشي ده! 

بص مراد على وشه:

- طب ما المد.ام اللي عنـ. يفة شوية انا مالي؟

- انت كمان هتستظر.ف!

رجع مراد لورا اكتر وقال:

- يا استاذ انا مقولتش تزعقلها جا.مد يعني..كل شيء بالهداوة بيكون احسن.

- اسكت!! مخصوم منك الشهر ده.

- مخصوم مني ايه إن شاءالله اذا كنت انا بقبض ملاليم، قصدك مفيش قبض الشهر ده بقى.

صرخ في ودنه:

- اطلع برا!

كان هيقع مراد مسك في الكرسي وخرج يـ.هبد الباب وراه.

| في الليل|

كنت قاعدة قدام التلفزيون مع اخواتي وبابا، ماما كانت نايمة:

- بس يلا محصلش نصيب للأسف.

قال محمد:

- اتحكمي في التوتر، يعني لولاه كان ممكن يتوافق عليكي يابنتي.

ردت فاطمة:

- يابني بتقولك اسعاد يونس، واحدة زي اختك مهووسة بالتمثيل طبيعي هتشوف فنانين كبار هتتوتر.

رد بابا:

- هو حصل ايه مش فاهم، طردوكي ليه؟

- قولتلها غمضي عينك عشان اعرف أمثل لقيتني برا في الشارع.

ضحكوا كلهم، فجأة لقينا الاخبار على التلفزيون، بتقول المذيعة:

" بعد وفاة الخواجة روبرت توفيق صاحب اشهر محلات الفضة في مصر وفرع امريكا، مرة أخرى طبعًا خالص التعازي لعيلة الخواجة ومن مصر كلها بنقدم قلوبنا ليكم."

" ولكن بعد اسبوع من وفاته سمعنا اخبار بتقول إن العيلة بتدور على أبناءه اللي في امريكا من سنين ومفيش اي تواصل ليهم.."

" والحقيقة إن ضرورية الوصول ليهم مهمة لأن الأخبار المتداولة بتقول الوصية مينفعش تتفتح غير في وجود أبناءه وتقسيم الميراث..ومن هنا بنناشد حملات السوشال ميديا اعملوا هاشتاج أو اي شيء وسيلة نقدر نساعد بيها عيلة الخواجة ، الحقيقة الخواجة روبرت داوني ليه مواقف عديدة كويسة مع المصريين معتقدش حد مننا هيتردد أنه يرد الجميل للأهل.."

" ياما اتبرع للأيتام وساعد الفقراء، وكان بيتعبر مصر وطنه التاني بعد امريكا بعد ما قضى نص عمره هنا وكمان قرر يد.فن فيها..فمثلًا بقترح لو نعمل اي حملة بأسماء أولاده استاذة عزيزة وأستاذ جمال نطالب برجوعهم إلى مصر بشكل ضروري لأن يُقال كان من زمان في خلافات وتفاصيل شخصية محبش أتطرق إليها على الهواء مباشرة."

" اعزائي الكرام فاصل وسنعود سريعًا"

ساب مراد طبق الاندومي اللي في ايده وسرح مع الإعلان يفكر في حاجة..

سرحت مرام وعينها على التلفزيون وكأنها بتفكر في حاجة..

تعليقات



<>