
رواية فرصة ثانية الفصل الثاني والعشرون22بقلم همس هشام
رأى في عينيها ما يجعله يريد أن يفعل أي شيء ليسكن فيها الطمأنينة بدلًا من ذلك الخوف، وضع يده على يدها قائلًا بصوته الحاني:
- قولي يا نسمتي، إيه اللي قررتيه؟
فتحت فمها لكن ضاعت الكلمات، فأغلقته بصمت، فقال مرة أخرى:
- مالك، ليه التردد ده كله؟
- أنا مش مترددة، أنا بس مش عارفة أقول.
فقام بسؤالها ليخفف عنها الأمر:
- طب هي حاجة حلوة ولا حاجة وحشة؟
- حلوة.
هز رأسه بالإيجاب والتقط منديلًا، ليطرد ما بأنفه، ثم التفت لها مرة أخرى قائلًا:
- طب هي حلوة بالنسبالك وبالنسبالنا إحنا الاتنين؟
- بالنسبالنا إحنا الاتنين.
انفرجت أساريره، لعل ما يفكر به صحيح، دنا منها ووضع يده على يدها فأصبح يحتويها بين راحتيه، ثم قال:
- نسمة... إنتي عايزة تدينا فرصة؟
نظرت له بعيون تلمع إثر الدموع، وهزت رأسها بخفوت، لتتسع ابتسامته ويأخذها في عناق شدد فيه من ضمته لها، تدفق لها شعور الأمان الغائب عنها عند غيابه، كم اشتاقت له، لفت يدها حوله ودفنت رأسها به تبكي، وكأنها تخرج ما في داخلها من سوء لتبدأ من جديد، ابتعد عنها يمسح دموعها بإبهامه، وقال بتأثر:
- وعد مني يا نسمة، دموعك مش هتنزل تاني، أنا عمري ما هزعلك، ولا هجرحك تاني سواء بتصرفاتي أو بكلامي.
هزت رأسها وهي تبتسم، ثم قالت:
- وأنا واثقة فيك يا حسين.
نظر إلى عينيها بإسهاب:
- وأنا عمري ما أضيع الثقة دي.
_________________
فتحت ملك الباب بعد أن سمح يحيى بالدخول، دلفت تطالعه فلم تجد إلا نظرات الغضب المكتوم، جلست قائلة بخفوت:
- صباح الخير.
جلس على المقعد أمامها وقال باستخفاف:
- صباح الخير يا دكتورة ملك... عادل... الديب.
نظرت له وقالت بجدية:
- أي شيء صدر مني كان بهدف مصلحتك.
- بجد!!! مصلحتي، مصلحتي إنك تكذبي عليا، ليه على الأقل مصارحتنيش لما سألتك بدل المرة اتنين؟
نظر لها بخذلان وكادت أن تتحدث لكنه قاطعها قائلًا:
- امبارح لما قولتيلي بردو إنك متعرفيش خالد... صدقتك لحد ما عيني جت على اللوحة اللي عليها اسمك في المكتب.
ابتلعت ملك ريقها وقالت:
- يحيى، مقدرة غضبك لكن لازم تسمعني.
صاح:
- أسمع إيه... أسمع كدب تاني، كان معاكي فرصة تصارحيني لكن إنتي اختارتي الكدب.
- أنا مكذبتش، إني أخبي معلومة عن مريضي لو هتضره فده مش كدب.
- دكتورة ملك، أنا خلاص مش عايز أسمع حاجة تاني.
ضبطت ملك انفعالاتها وقالت:
- أنا سمعتك وسمعت اتهاماتك ليا وجه دوري تسمعني.
ابتعد بنظره عنها، فتابعت:
- أنا عرفت بالصدفة، فاكر لما كنت بتقولي إنك حاسس إني متغيرة؟
هز رأسه وهو يرمقها، فتابعت:
- أنا عرفت في الوقت ده، وساعتها مكونتش عارفة أعمل إيه، قررت إني أتخلى عن علاجك مع إني عمري ما عملتها، لكن إنت رفضت...
فقاطعها غاضبًا:
- هتجيبيها فيا بقى... أنا اتمسكت بيكي لأني مكونتش أعرف إنك أخته، لكن لو كنت أعرف أنا مكونتش بصيت في وشك.
رفعت نظرها تنظر له بعيون متسعة، فالجملة الأخيرة جرحتها، لعنت لحظتها ماهر وأخوته التي لم تجلب لها إلا الوجع، نظرت أسفلها تحاول أن تستجمع نفسها وتهدئ من روعها، رمقها يحيى بعد أن طال صمتها، وقد أدرك مدى فقدان سيطرته على غضبه، رفعت ملك رأسها بثبات وقالت:
- إنك تاخد حد بذنب حد ده مش صح، اللي أذاك ماهر مش أنا، أنا الدكتورة ملك اللي اعتبرتها زي أختك ووثقت فيها، وما زلت أنا رغم معرفتك إني أخت ماهر، مقدرة غضبك من ماهر، لكن أنا لما خبيت عنك المعلومة دي كان لمصلحتك، أنا مكونتش عايزاك تنتكس، كانت مصلحتك رقم واحد عندي، ومش مهم الضغط النفسي ووجع الضمير اللي كنت بعيشه وأنا عارفة إن أخويا كان عامل من العوامل اللي خلتك بالحالة دي.
أخذت نفسًا عميقًا ثم زفرت ببطء وأكملت عندما لاحظت انتباهه لها:
- أنا كنت هخلي دكتور إبراهيم يكمل علاجك، لكن لما لاقيتك متمسك بيا، قولت أنا مش هضيع ثقتك فيا وهعالجك وهصلح أخطاء ماهر.
نهضت قائلة:
- أنا كنت معاك الدكتورة ملك، مش أخت ماهر... هسيبك تفكر في كلامي.
ثم غادرت بهدوء، وتركته يصارع ذاته بين تعلقه بها كطبيبة اعتبرها بمثابة شقيقته وطوق النجاة من هلاكه، وأنها شقيقة زميله الذي دمر حياته.
______________
أخذت دينا المحاليل التي قد دونتها نهى في الورقة، واتجهت تضعهم في أوردة المرضى وعقلها يتخبط بين وائل الذي يريد أن يتقدم لخطبتها، وبين حبها لأمير وعدم سريان السحر عليه، ونهى التي تقف عقبة أمامها، انتهت من وضع المحاليل لجميع المرضى ثم جلست في مكتب استقبال القسم، ولم تمر دقائق كثيرة حتى صدر إنذار الطوارئ في إحدى غرف المرضى التي كانت تضع له محلوله، ركضت سريعًا ودلفت الغرفة لتجد أمير بها يقوم بفحص المريض الذي كان ينازع، وقفت بجانبه تساعده، فحص عينيه بالكشاف، ثم وضع قناع الأكسجين، وصاح باسم إبرة طبية، لتأتي بها سريعًا، اقترب يحقنها في المحلول وهو لا يعلم لما أتته تلك النوبات، ليتوقف قبل أن يضع الحقنة، فالمحلول لا يناسب حالة المريض، انتزعه بصمت وطلب محلولًا آخر منها لتأتي به، ثم وضعه أمير وحقن الحقنة فيه ثم ظل دقائق يطالع المريض وحالته تهدأ تدريجيًا، ثم التفت يسألها:
- فين الورقة اللي ادتهالك الدكتورة نهى؟
مدت يدها في جيبها وأخرجتها منها، ليقوم بقراءتها بصمت ثم نظر لها، قائلًا وهو يشير بيده على اسم المحلول:
- شايفة المحلول المكتوب؟
ثم مد يده يأخذ المحلول الموضوع على الطاولة وقال:
- وشايفة اللي إنتي حطاه؟
كادت أن تفتح فمها لكن قطعهم صوت إنذار آخر في الغرفة المجاورة، ليرمقها أمير بغضب وركض إلى الغرفة المجاورة، يفحص المريض ليعرف سبب نوباته تلك، تفقد المحلول وكان المحلول الخاطئ أيضًا، فيبدو أنها بدلتهم بالخطأ، بينما هي تقف وراءه بقدم ترتعش من التوتر، لتنتفض إثر صياحه لطلبه محلولًا آخر، ذهبت سريعًا تأتي بالمحلول، فأخذه أمير ووضعه للمريض، وعمل اللازم لجعل حالته تتحسن، فكانت حالته متدهورة عن الآخر، نظر لها بنظرات حارقة ثم غادر الغرفة بعد أن اطمئن على المريض، وقف بالخارج أمامها هادرًا:
- إنتي فين عقلك، المحاليل مكتوبالك في ورقة وبردو اتلغبطي، كنتي هتموتي مريضين، دول مرضى سكر الغلطة معاهم بفورة.
كانت تستمع إلى توبيخه برأس منتكس، فعاد يصيح مرة أخرى وقد اجتمع الأطباء والممرضون حوله:
- أنا هقدم فيكي تقرير، إنتي لازم تتحولي للتحقيق.
لترفع دينا رأسها بعيون متسعة، ثم قالت وهي تقترب منه تترجاه:
- أنا آسفة يا دكتور أمير، أنا مخدتش بالي والله.
- مخدتيش بالك، ولو كانوا راحوا فيها كنتي هتقولي إيه لربنا، طالما مش قد الشغلانة متشتغليهاش.
ليقترب منه وائل يحدثه بخفوت قائلًا:
- خلاص يا أمير مادام عدت على خير.
نظر له أمير بصدمة، فكان وائل لا يقبل بالخطأ وخاصة في مهنتهم، أيعقل أن انجذابه لها جعله يتخلى عن مبادئه، ثبت نظره على دينا وقال:
- أنا اللي عندي قولته.
ثم تركهم وغادر متجهًا إلى مكتب نهى، بينما دينا واقفة والدموع تنهمر من مقلتيها فقد خسرت مهنتها، لتنتبه إلى وائل الذي اقترب يخفف عنها قائلًا:
- متخافيش أنا جنبك، كل حاجة هتبقى كويسة.
لترمقه دينا وتعود للبكاء مرة أخرى.
دلف أمير إلى غرفة نهى، الجالسة على فراش كشف المرضى، وعلى وجهها علامات الذعر وتحاول تنظيم تنفسها، اقترب منها بقلق قائلًا:
- مالك يا حبيبتي، إيه اللي حصل؟
أجابته بصوت مرتعش:
- الكوابيس... الكوابيس رجعت تاني.
احتواها بين ذراعيه، يمسح على ظهرها، فقد اختفت الكوابيس يومين فظنت نهى أنها قد شفيت بعد أن سارت على خطى الشيخ، لكن باغتها أحد الكوابيس اليوم، ابتعد عنها أمير يمسح دموعها ويبعد شعرها خلف أذنها قائلًا:
- إيه يا حبيبتي خلاص بطلي عياط، أنا معاكي خلاص.
هزت رأسها بالنفي قائلة:
- كابوس غريب أوي... أنا مش عايزة أقعد في المستشفى، أنا عايزة أمشي، أنا مش مرتاحة.
- اهدي يا نهى، احكيلي إيه اللي حصل، حلمتي بإيه، تعالي ريحي على الكنبة واحكيلي.
نظرت إلى الكنبة بذعر قائلة:
- لا مش عايزة أقعد على الكنبة.
اقترب منها يربت على ظهرها بحنان وهمس:
- متخافيش يا حبيبتي، الكنبة كانت في الحلم.
نظرت إلى الأريكة بعيون مرتعبة:
- حلمت إن في قطة سودة شكلها مرعب كانت عايزة تهجم عليا، بعد كدا راحت الكنبة وقعدت تخربش فيها جامد أوي لحد ما اتقطعت وخدت حاجة في بوقها وجريت من الشباك، وجريت عليك في مكتبك لاقيت قطة بتعمل نفس الحاجة عندك.
اقترب أمير من الأريكة وجلس عليها قائلًا:
- ما فيش حاجة على الكنبة.
مدت يدها بخوف قائلة:
- لا يا أمير، قوم.
أدخل يده في الفراغ الضيق بين مقعد الكنبة وظهرها، قائلًا:
- يا بت متخافيش، حتى مفيش حاجة القطة تاخدها.
ليعقد حاجبيه عندما شعر بوجود ثقب، فقالت نهى بقلق:
- في إيه... في حاجة صح؟
لتعود للبكاء مرة أخرى قائلة:
- أنا قلتلك، والنبي تعالى نمشي من هنا، أنا مش عايزة أجي هنا تاني.
أشار بيده لكي تنتظر وهو يضع يده في الثقب ليشعر بكيس بلاستيكي، ليقوم بسحبه وإخراجه إلى الخارج، يتفحصه بيده، ابتلع ريقه وقد بدأ يتسلل إليه القلق، فتساءلت نهى وقد توقفت عن البكاء:
- ده إيه ده؟
نهض يتفحصه بين يديه قائلًا:
- معرفش، بلاش نلعب فيه، نوريه للشيخ أحسن.
وضعت يدها على فمها وعادت تبكي مرة أخرى، لينظر لها بأسف وهو يدس الكيس في جيبه واقترب يمسك يديها قائلًا:
- نهى، حبيبتي اهدي عشان خاطري، العياط الكتير ده غلط عليكي وعلى الحمل، اهدي يا حبيبتي.
قبل كلتا يديها وقربها له يضمها بقوة لعلها تشعر بالأمان وتهدأ قليلًا، ثم قال لها:
- تعالي ناخد إذن ونروح سوا.
لملم أشياءها واتجه بها إلى الخارج وفي عقله تعج الكثير من الأفكار.
_____________
يجلس يحيى على الطاولة أمام حياة، التي تثرثر في أمور عدة لكن عقله ليس معها، فلاحظت هي ذلك فقالت:
- إيه يا يحيى، روحت فين؟
رمش عدة مرات وقال:
- معاكي، كملي.
- لا أنت مش معايا خالص، حتى مش بتاكل.
ثم ابتسمت وقالت بمشاكسة:
- ولا مبقتش أفتح نفسك زي الأول؟
ابتسم وهز رأسه بالنفي:
- لا، أنا مش عارف هعمل إيه بعد ما تمشي.
ثم أكمل بسخرية:
- هموت من الجوع.
عبست وقالت:
- ده أنا مشيت ٣ أيام لاقيتك خاسس النص، تخيل بقى لما علاقتنا تتقطع.
صمت على أثر جملة انقطاع علاقتهم فقال:
- إحنا بعد ما نخرج من هنا علاقتنا هتتقطع؟
ابتسمت وقالت بلامبالاة تخفي بها ما بداخلها:
- آه خلاص، كنا زمايل وخلاص.
بهذه البساطة، أصدقاء مقربين في المصحة وبعد الخروج غرباء، لاحظت حياة استياءه فقالت تغير دفة الحديث:
- هاا قولي سرحان في إيه... كلمت الدكتورة ملك؟
رفع أحد حاجبيه قائلًا:
- وإنتي عايزة تعرفي ليه، إنتي ماشية بكرا ولا بعده، فبلاش توجعي دماغك بحوارات يومين وهتفرقيها.
نهض وهو يشعر بأن الدنيا بأكملها تطبق على صدره، قرب المقعد من الطاولة وهو ينظر لها نظرة جعلتها تريد البكاء، تحاشت النظر له وهي تقنع نفسها أن ذلك أحسن قرار، ويجب أن تصارع مشاعرها، فلن ينجح ذلك الأمر، رمقته وهو يبتعد وابتلعت غصة مريرة، اتجه يحيى إلى الحديقة يحاول أن يستجمع نفسه ويقف على قدمه بمفرده، يشعر في تلك اللحظة أنه يريد عناق والدته، الذي لا يستطيع كبير أو صغير الاستغناء عنه، يشعر بداخل أحضانها بدفء لن تشعر به في أحضان أي بشر، تشعر وكأن عقلك قد توقف عن التفكير، تخرج منه قادرًا على مجابهة العالم، جلس على أحد المقاعد الخشبية يمسح على وجهه.
____________
تجلس ناهد ونهى بين ذراعيها، تمسح على ظهرها تبث فيها الأمان، ويجلس أمير مع الشيخ يخبره بما حدث، فقال له:
- طب أنت شوفت في مكتبك، ليكون فعلًا فيه ليك بردو؟
هز رأسه بالنفي قائلًا:
- لا مشوفتش، أنا أصلًا كنت بعمل كدا أطمنها على إن الكنبة عادية عشان كانت خايفة، لكن طلعت ده.
قلب الشيخ محمد الكيس بيده وقال:
- طب شوف بردو عشان نطمن.
تنهد الشيخ بأسى وقال:
- هاتي طبق كبير فيه ماية وملح خشن.
- ليه مش المفروض يتحرق؟
- لا لا الحرق غلط، هاتلي ماية وملح.
نهض أمير وأتى له بالماء والملح، أمسك الشيخ الملح ورش القليل من الماء وهو يبسمل، ثم فك عقدة الكيس، وأخذ قطعة القماش وفكها برفق وهو يقرأ المعوذتين بصوت مسموع، ليخرج منها وشاح نهى الضائع، نظرت له بصدمة وعيون متسعة وقالت:
- ده الإسكارف بتاعي يا ماما... ضاع مني في المستشفى.
ضمتها لها ناهد وقالت بأسى:
- حسبي الله ونعم الوكيل في اللي ميعرفوش ربنا.
أخرج الشيخ الوشاح ووضعه في الماء، ثم أكمل يخرج ورقة بها طلاسم، وضع الورقة في الماء وهو يقرأ ما تيسر من القرآن ويفرك الورقة بين يديه حتى تلاشت وذابت في الماء، ثم توقف عن القراءة وقال:
- الماية دي متتفضاش في الحوض، ارميها في جنينة.
ثم نظر إلى نهى المنهارة تمامًا:
- حمد لله على سلامتك، كدا مافيش ولا كوابيس أو أصوات، بس خلي بالك من القريبين منك، اللي ياخد حاجة منك بالسهولة دي فكدا هو قريب أوي.
صمتت الغرفة لثوانٍ ثقيلة بعد كلمات الشيخ، لم يكسرها سوى صوت أنفاس نهى المرتعشة. تلاقت عينا أمير بعينيها، ثم نهض الشيخ قائلًا لأمير:
- واتأكد من الكنبة بتاعتك ولو في أي حاجة كلمني.
- مافيش أمل نعرف مين اللي عمل كدا؟
هز رأسه بالنفي قائلًا:
- أنا معرفش الغيب يا بني، أنا بعالج بالقرآن، شوفتني عملت أي حاجة تانية غير إني كنت بقرأ قرآن؟
هز رأسه بالنفي وهو يغمض عينيه بقوة، ليدله أمير للباب ليغادر، أغلق الباب خلفه، واستند عليه يمسح على وجهه ويزفر بقوة، فالحمل ثقيل عليه فما بال نهى الآن، أرجع شعره للوراء واتجه إلى نهى التي تبكي في حضن ناهد، وناهد تبكي على بكائها، ليرسم أمير ابتسامة ويقترب يركع أمامها قائلًا:
- بتعيطي ليه دلوقتي، ما كل الوحش راح، وبقيتي زي الفل.
أجابته بنحيب:
- بس القطة كانت في مكتبك بردو، يعني ممكن أنت كمان...
ليقاطعها قائلًا:
- يا حبيبتي أنا زي الفل، متخافيش، وبكرا هروح أشوف بنفسي إذا في حاجة.
ابتعدت عن ناهد قائلة:
- أنا عايزة أصلي.
فقالت ناهد:
- تعالي نتوضى كلنا وأمير يأم بينا يلا.
___________
تقف ملك أمام منزلها بعد أن أوصلها إبراهيم، أمسكت هاتفها وضغطت على زر الاتصال بماهر، ثم قالت باستياء:
- ألو يا ماهر، تعالى على البيت حالًا.
قال بقلق:
- إنتوا كويسين، في حاجة حصلت؟
أجابته بحزم:
- تعالى يا ماهر.
ثم أغلقت الهاتف بعد أن سمعت إجابته بالقدوم، دلفت إلى المنزل فوجدت صوت التلفاز من غرفة المعيشة، اتجهت إليها فوجدت أن والدها يشاهد التلفاز، وفور أن رآها ابتسم وقال:
- أهلًا وسهلًا يا ملك.
اصطنعت الابتسامة وقالت:
- أهلًا يا بابا.
شعر من نبرتها وابتسامتها أنه يوجد خطب فقال بتوجس:
- مالك يا حبيبتي، في حاجة، امبارح بردو مكنتيش كويسة بس مردتش أضغط عليكي.
جلست بجانبه وزفرت بقوة، قائلة باستياء:
- يحيى عرف إني أكون أخت ماهر.
زم شفتيه بأسف واقترب منها يضع يده على ظهرها قائلًا:
- إنتي اللي قولتيله ولا عرف لوحده؟
أشارت بيدها بعصبية وهي تتذكر ما حدث:
- ماهر قالي إنه رجع نص الشركة لخالد لكن خالد جالي امبارح وطلع إنه متفق معاه إنه يقول كدا مقابل فلوس، فالتاني بيبتزه بقى، جيب الفلوس عشان مقولش على السر، فلما ماهر مدهوش فلوس جه يقولي، يحيى شافه عندي.
كان يستمع عادل لها بذهول من تفكير ابنه، فقال لها:
- أنا كان المفروض أدور ورا كلامه لكن أنا انشغلت أوي.
- بابا متجبش اللوم عليك، ماهر مش صغير عشان يتصرف كدا.
تنهدت بضيق:
- أنا هقوم أغير، أنا اتصلت بيه ييجي عشان عايزاه يعرف إني عرفت الكدبة.
- ماشي يا حبيبتي قومي غيري وارتاحي وأنا لما ييجي هقولك.
نهضت واتجهت إلى غرفتها، بينما عادل ينظر إلى الأشياء بأسف، ويقول في نفسه هل رغبته بأن يجعل ابنه رجلًا يحمل مسؤولية نفسه كان خطأ، أيجب أن يأتي به ويعطيه شركة ضخمة ذات مشاريع عملاقة ويخبره أنها ملكه ويفعل بهم ما يحلو له، هز رأسه بيأس فلن يفيد ذلك التفكير بشيء.
لم يمر ساعة وكان ماهر يجلس في غرفة المعيشة وملك تصرخ بوجهه:
- بتتصل بيا تقولي ندمان ليه، وإنت متفق مع خالد على الكدب مقابل فلوس ليه، ليه كل الأفلام دي، ليه من الأول أصلًا تعمل في يحيى كدا، أنا تعبت منك وتعبت من تصرفاتك.
ظل ماهر يستمع إلى صراخها في وجهه ويهز قدمه بغضب فلم يعجبه صراخها في وجهه، فنهض يصرخ أمامها قائلًا:
- وإنت بتكلمي أخوكي الكبير توطي صوتك، إنتي سامعة؟
نظرت له بسخرية ولوحت بيدها، فقال عادل:
- مش لما تتصرف زي الكبار الأول، أنا نفسي أفهم إنت بتفكر إزاي.
- دلعك فيها ده اللي مخليها كدا.
- ليه عملت إيه، سرقت، نصبت، بتضحك على الناس وبتدمر حياتهم؟
جلس ماهر يحاول أن يضبط نفسه، فهو الآن يتحدث أمام والده، فقال:
- أنا فعلًا ندمان، من ساعة ما رحت المصحة وشوفته، أنا مستعد أديله الشركة كلها، أنا عايز أصلح غلطي فعلًا، وكلمتها قولتلها إن أنا عايز يحيى يسامحني، وحوار خالد ده كان من بدري.
فقالت له ملك بسخرية:
- قولي فعل واحد يدل إنك فعلًا ندمان، كل أفعالك تدل إنك ولا في دماغك حاجة.
- لا يا ملك، أنا بقولك مستعد أول ما يخرج أنقل ملكية الشركة باسمه، بس يسامحني.
نظرت له باستياء وقالت:
- نفسي أصدقك، لكن لو كل حاجة بتقول إنك صادق أنا بردو مش هعرف أصدقك، بجد مش عارفة أقولك إيه.
رمقته بخذلان وتركتهما واتجهت إلى غرفتها، فجلس عادل بجانبه فالتفت له ماهر قائلًا:
- بابا، أنا فعلًا عايز أصلح اللي عملته.
رمقه عادل ولم يتحدث، فأكمل ماهر:
- أنا لما روحتله المصحة وشوفته، وإحساس الذنب مش مفارقني، عايزه يسامحني بأي شكل، واتصلت على ملك علشان تساعدني.
نظر له عادل وقد التمس الصدق في حديثه، وساعده الشعور بالذنب اتجاهه فقال:
- هكلم ملك وهشوف إيه اللي هيحصل.
دنا منه ماهر قائلًا:
- أنت هتساعدني بجد يا بابا؟
هز رأسه بالإيجاب وقد ارتسمت ابتسامة سعادة على وجه ماهر، فقال بامتنان:
- شكرًا يا بابا.
- العفو.
ثم نهض ماهر قائلًا:
- أنا هروح عشان الوقت اتأخر.
فقال عادل وهو يتحاشى النظر له:
- خليك هنا أوضتك متروقة ونضيفة.
نظر له ماهر بتردد، فقال عادل:
- بدل ما تسوق بليل يعني.
ابتسم ماهر على تعليق والده وقال:
- ماشي، هبات هنا.
ثم التفت له عادل وقال:
- آه وحاجة كمان... خف رجلك شوية عن السكك الشمال، والبنت اللي إنت ماشي معاها اليومين دول مش مريحاني... عينها مش سالكة، وبلاش تفتكر إنك ناصح على طول، ياما دواهي وقعوا في شبر مية.
حمحم ماهر بحرج من كلام أبيه:
- متقلقش عليا يا بابا.
____________
فوق سطح البناية، يقف حسام أمام رحمة، تمسك ديوان «في عينيك عنواني»، فقالت له:
- أنا خلصت الديوان.
- عجبك؟
أجابته بابتسامة واسعة:
- جدًا.
فقال لها:
- مبسوط إنه عجبك، بكرا هيكون عندك كتاب تاني.
ثم صمت وقال وهو يتكأ على حافة السور قائلًا:
- وعلى أول الشهر الجاي، هعمل حاجة هتعجبك بردو.
أنهى حديثه بغمزة أربكتها، فقالت بتلعثم:
- هتعمل إيه؟
رفع كتفه وأنزله قائلًا:
- مفاجأة.
فقالت بتذمر:
- حسام، قول بقى مش هستنى لأول الشهر، عشان خاطري.
ليضحك قائلًا:
- كدا هضعف يا ست المحاميين.