رواية رشيد وكارمن الفصل الثالث والعشرون23بقلم ملك ابراهيم

رواية رشيد وكارمن الفصل الثالث والعشرون23بقلم ملك ابراهيم 

"خرج رشيد من بيت الهواري ومعاه مراته في طريقهم للرجوع للقاهرة"
...... 
في المساء.
سهير عاملة حفلة صغيرة في بيتها، معزوم عليها عدد من رجال الأعمال وستات مجتمع، عشان تقنعهم يشاركوها في مشروع خاص بيها، بعد ما الفلوس اللي خدتها مقابل ورثها في أرض الهواري قربت تخلص.

قعدت تتفاخر قدامهم بالأرض اللي بتملكها في الصعيد، وإنها ممكن تبيعها عشان المشروع، بس مستنية سعرها يعلى أكتر.

عرض عليها واحد من رجال الأعمال يشاركها. حاولت تخبي فرحتها.

سمعت الخادمة جرس الباب وراحت تفتح.

دخل راجل الخادمة مشافتوش قبل كده وقال ليها: "مدام سهير موجودة؟"

بص للبيت من جوه وابتسم بسخرية لما شاف كل العز ده اللي سهير عايشة فيه من جديد، وسمع أصوات كتير جاية من جوه. مستناش الخادمة ترد ودخل جوه وهو بيبص حواليه وبيبتسم بسخرية.

حاولت الخادمة تمنعه لكنه دخل على قعدة سهير مع ضيوفها من غير ما يهتم بحد.

انتفضت سهير من مكانها لما شافته قدامها، بص ليها وللبيت وقال بسخرية: "مصدقتش لما قالولي انك رجعتي ومعاكي كل الفلوس دي!"

قربت منه سهير وهي بتبص ليه بغضب وبتهمس ليه بصوت واطي خوفً من ان ضيوفها يسمعوها: "انت ايه اللي جابك هنا؟ مش انا كنت خلصت منك وانتهينا."

غمز ليها بطرف عينيه وكمل: "اللي بينا عمره ما ينتهي كده يا سوسو."

رمقته باشمئزاز وبعدين بصت وراها للضيوف بتوتر وقالت ليهم: "انا بعتذر جدا منكم.."

وبعدين بصت ليه وقالت ليه بهمس: "تعالى معايا نتكلم جوه."

أخدته معاها لواحدة من الأوض، بص الضيوف لبعض وقالت واحدة من الستات ليهم بهمس: "دا تقريبا جوزها الاخير اللي اتجوزته قبل ما تسافر."

بص واحد من رجال الاعمال لصاحبه اللي عرض علي سهير المشاركة معاها بمشروعها: "انت اتجننت!!..انت عايز تشارك سهير سالم.. دي نصابه والبلد كلها عرفاها!"

بص ليه التاني بمكر وقال: "وانت فاكر ان انا هشاركها فعلا.. انا كنت عايز اعرف بس ايه حكاية الفلوس اللي ظهرت معاها فجأة وفين الأرض اللي هي بتملكها دي يمكن نعرف نطلع منها بمصلحة."

قالت واحدة من الستات: "مفيش حد بيعرف يطلع من سهير بمصلحة."

قال راجل تاني: "انا من رأيي كفايه كده وخلونا نمشي."

وافقه الجميع وقاموا عشان يمشوا.

جوه الأوضة اللي واقفة بيها سهير قدام المتطفل ده اللي دخل بيتها من غير استأذان، قالت ليه بصوت واطي وهي غضبانة: "انت ازاي تيجي هنا لحد بيتي وكمان من غير استأذان!؟"

جاوب عليها ببرود: "هو في حد بيستأذن برضه قبل ما يدخل بيت مراته!"

هتفت بغضب وهي بتحذره بايديها: "مراتك اللي انت سر..قتها! وبعدين احنا اطلقنا من زمان خلاص.. بقولك ايه.. انت تبعد عن طريقي ومش عايزة اشوفك قدامي مرة تانيه والا هسجنك."

ابتسم ساخرًا وهو ماسك بايديها اللي بتشاور ليه بتحذير وكمل بمكر: "براحة بس عشان ايدك الرقيقه دي متتكسرش.. انتي ناسيه ان انا اللي اقدر اسجنك!"

بصت ليه بتوتر وبلعت ريقها بصعوبة، دفع ايديها بعيد عنه وكمل ساخرًا: "خليكي حلوة كده يا سهير وبلاش نهدد بعض لانك اول واحدة هتتسجني انتي وبنتك لو حد عرف اللي انا اعرفه."

بلعت ريقها وقالت بتوتر: "انت عايز ايه بالظبط؟"

بص حواليه وكمل بطمع: "عايز نصيبي من العز اللي انتي عايشه فيه ده."

ضحكت ساخرة: "عز ايه!.. دا كان زمان قبل ما انت تسرق كل فلوسي."

بص حواليه وقال بطمع: "يعني ايه؟ اومال كل العز ده منين وازاي!؟"

جاوبت عليه بغضب: "دا شئ ميخصكش.. ياريت ترجع مكان ما كنت وتنساني خالص."

ابتسم بسخرية وقال: "عايزاني انسى ايه بالظبط! انسى الراجل اللي بنتك قتـ..لته وانا دفنته بإيدي ولا انسى اللي انتي عملتيه في جوز بنتك!؟"

بصت ليه بصدمة وبعدين جريت بسرعة لباب الأوضة وفتحته واتأكدت من عدم سماع حد لكلامهم وبعدين قفلت الباب مرة تانية ورجعت ليه بتقول ليه بصوت واطي: "انت اتجننت! انت عارف لو حد سمع كلامك ده هيحصل فينا ايه؟"

ضحك ساخرًا: "انا مفيش اثبات عليا.. انتي وبنتك اللي هتروحوا في ستين داهية لو انا قولت اللي اعرفه."

رمقته بغضب وقالت ليه بنبرة حادة: "قول من الاخر انت عايز ايه وخلصني؟"

قعد فوق واحد من الكراسي براحة وبعدين قال ببرود وهو حاطط رجل فوق التانية: "انا محتاج فلوس."

قربت منه وقالت بغضب: "وانا هجبلك فلوس منين؟ متتخدعش في كل اللي انت شايفه ده! الشقه دي ايجار وانا معيش حتى ادفع ايجارها الشهر الجاي!"

ابتسم بسخرية وقال: "وبنتك.. برضه معهاش تدفع تمن سكوتي؟"

بصت ليه وفكرت جواها، مش عارفة ايه اللي حصل مع كارمن وجوازها من رشيد وفراج، سكتت شوية وبعدين قالت ليه بغضب: "سبني كام يوم كده افكر واقدر اجهزلك مبلغ تاخده وبعدها مش عايزة اشوفك تاني."

ابتسم ببرود وبعدين وقف من مكانه وقال ليها: "طب مفيش اي حاجة امشي بيها حالي دلوقتي.. الحكاية مقشفرة معايا على الاخر."

قالت ليه بصوت غاضب واطي: "قولتلك مش معايا اي فلوس دلوقتي."

بص ليها بصمت وبعدين قلع العقد اللي لابساه في رقبتها في حركة سريعة، صرخت سهير وهي حاطة ايديها فوق رقبتها بصدمة، ابتسم ببرود وهو بيبص للعقد وقال: "اهو امشي نفسي بيه لحد ما تجهزيلي مبلغ معتبر."

رمقته بغضب وهو بيبعد عنها وبيخرج من الأوضة، لحقت بيه بسرعة عشان ميقربش من ضيوفها ويتكلم معاهم. اتصدمت لما شافت الخادمة بتنضف وبترتب بعد ذهاب الضيوف، قربت منها وقالت بصدمة: "الضيوف راحوا فين؟!"

جاوبت الخادمة باحترام: "مشيو يا هانم من شوية."

ضحك التاني بسخرية وقال ليها: "معلش يا سوسو.. خيرها في غيرها."

رمقته بغضب وهو بيخرج من بيتها، وقفت بتبص حواليها بغضب ومش بتفكر في حل دلوقتي غير كارمن وورثها في الارض.
رواية رشيد وكارمن بقلمي ملك إبراهيم.
وصل رشيد ومعاه كارمن قدام البرج اللي فيه شقته اللي اتجوز بيها كارمن من أربع سنين.

طلعت معاه كارمن وهي خايفة منه وبتتساءل جواها هيعمل بيها ايه بعد ما يقفل عليهم باب الشقة لوحدهم.

دخل رشيد الشقة وهو شايل شنطتها وبيفتكر لما جه بيها من أربع سنين بعد جوازهم وكان شايل شنطتها بنفس الطريقة.

دخلت كارمن الشقة وهي بتبص حواليها بخوف وتوتر، نور رشيد الأنوار وقفل باب الشقة عليهم جوه باستخدام المفتاح.

بصت ليه كارمن بصدمة وارتعش جسمها بخوف وقالت بفزع: "انت بتقفل الباب بالمفتاح ليه يا رشيد؟!"

بعدت عنه خطوات لورا وهي بتبص ليه بهلع وبتضيف: "انت هتمو..تني بجد ولا ايه؟"

استغرب كتير من كلامها وخوفها الشديد منه وحاول يقرب منها وقال: "انتي شايفه ان اللي عملتيه فيا يستاهل اني امو..تك؟"

بكت بخوف وجاوبت عليه وهي بتبعد عنه وجسمها بيرتعش بقوة: "كان غصب عني والله يا رشيد.. انا اسفه."

جن جنونه وهو بيهتف بيها صارخًا: "انتي بتجننيني بكلمة اسفه دي! نفسي تنطقي وتقولي انتي اسفه علي ايه؟ انتي ليه عملتي فيا كده؟!"

بكت بخوف لما قربت من الحيطة ومش هتقدر ترجع لورا وتبعد عنه أكتر. قرب منها وهو بيضيف: "اتكلمي يا كارمن.. انتي كنتي فين طول الاربع سنين اللي فاتوا؟ ايه اللي حصل معاكي؟ قولي اي حاجة وانا هسمعك للاخر.. عرفيني انتي ليه عملتي فيا كده؟ في حد خوفك؟ حد هددك بحاجة وانتي خايفه تقوليلي؟!"

هزت راسها بخوف وهي بتبكي وجاوبت بهلع: "انا معملتش حاجه.. صدقني والله انا مليش دعوه بكل اللي حصل."

قرب منها أكتر ومسك بدراعاتها بقوة وقال: "طب مين اللي عمل فيا كده وانتي ليه اختفيتي وروحتي فين؟ وليه روحتي تزوري سعد بشار؟ انتي تعرفيه منين؟ هو اللي خوفك وهددك تعملي فيا كده؟"

كانت بتبكي بخوف وهلع وهو ماسك بدراعاتها وبيضغط عليها بقوة وعايز يعرف الحقيقة. متحملتش ضغطه عليها ووقعت بين ايديه فاقدة الوعي من شدة الخوف والتوتر. خفق قلبه من شدة الخوف عليها وشالها بسرعة لأوضة النوم وحطها فوق الفراش وهو بيربت علي خدودها بقلق وبينطق اسمها بلهفة وهي مش بتستجيب ليه.

أخد تليفونه بسرعة وقال لطبيب العيلة وطلب منه سرعة الحضور لشقته. وبعدين قفل التليفون وقعد جنبها وهي فاقدة الوعي وبعدين عانقها بقوة وهمس ليها بندم علي اللي عمله من ضغطه عليها: "انا اسف."
رواية رشيد وكارمن بقلمي ملك إبراهيم.
بعد ساعة كان الدكتور جوه الأوضة بيكشف علي كارمن ورشيد واقف جنبه وبيبص ليها بحزن.

اداها الدكتور حقنة واستنى شوية لحد ما تستعيد وعيها. سأله الدكتور ايه اللي حصل معاها عشان تفقد الوعي؟ تأملها رشيد بحزن وجاوب عليه: "كان في مشكلة بينا واتعصبت عليها شويه وفجأة لقيتها وقعت بين ايديا."

قال الدكتور وهو بيحاول يساعدها علي استعادة الوعي: "هي دايما بيغمى عليها كده ولا دي اول مرة؟"

جاوب رشيد: "لا مش اول مرة.. هي دايما بتفقد القدرة علي الحركة كل ما بتتعرض لأي خوف او توتر وللسبب ده انا كنت ناوي اعرضها على دكتور نفسي بكره ان شاء الله."

هز الدكتور راسه بتفهم وتابع تحرك رموش عينيها وهي بتستعيد الوعي ببطئ، تابعها رشيد بلهفة، قال ليها الدكتور بهدوء عشان يجذب انتباهها ليه وترجع للوعي: "مدام كارمن.. سمعاني؟"

فتحت عينيها ببطئ وهي بتستجيب ليه وترجع للوعي، قرب منها رشيد وقال ليها بلهفة: "كارمن .. حبيبتي انتي كويسه؟"

بصت ليه وبعدين بصت للدكتور وهمست بصوت واطي: "انا فين؟"

قال ليها الدكتور: "مدام كارمن قوليلي انتي حاسه بإيه دلوقتي؟"

بصت ليه وجاوبت بصوت واطي: "مش حاسه بأي حاجة."

بص ليها الدكتور بدهشة وقال: "يعني ايه مش حاسه بأي حاجة؟"

تابع رشيد الكلام بينهم بقلق وخوف عليها، جاوبت علي الدكتور بتعب: "مش حاسه بأي حاجة.. مش حاسه بجسمي كله."

بص ليها الدكتور بصدمة وقال: "طب ممكن ترفعي ايدك كده!"

غمضت عينيها وفتحتها وهي بتجاوب عليه بتعب: "مش قادرة.. حاسه ان ايدي تقيله اوي وكل جسمي مش حاسه بيه."

بص ليها رشيد بصدمة وبعدين تبادلت النظرات بينه وبين الدكتور بدهشة. أخده الدكتور وخرج من الأوضة عشان يتكلم معاه بعيد عنها: "لازم دكتور متخصص يشوفها ضروري.. انا هرشحلك دكتور كويس جدا وقدر يعالج حالات كتير مشابهه.. بس اهم حاجة بلاش تضغط عليها او تزعلها في اي حاجة لحد ما الدكتور يشوفها."

قال رشيد بقلق: "انا ممكن اسفرها تتعالج خارج مصر لو هيكون هناك افضل لها؟"

جاوب الدكتور: "الدكتور اللي هيتابع معاها هو اللي هيقول ايه الافضل لها متقلقش."

هز رشيد راسه بالموافقة وشكر الدكتور. ذهب الدكتور ووقف رشيد بيبص قدامه بحزن، اتنهد بتعب وهو بيبص لأوضة النوم، قلبه بيخفق بقوة من شدة الخوف عليها.. افتكر اللي قالته قبل ما تفقد الوعي، من المؤكد ان فيه حاجة بتخوفها كتير ومش هتقدر تقوله بيه!

كانت نايمة فوق الفراش بتفكر بخوف بعد ذهاب الدكتور، بتتمنى الموت عشان ترتاح من كل العذاب ده اللي عايشة بيه. دموعها بتنزل على خدودها بصمت.

دخل الأوضة وهو بيبص ليها، قرب منها وقعد جنبها فوق الفراش. بعدت بوشها بعيد عنه عشان ميشوفش دموعها. رفع ايديه لوشها وجفف دموعها بايديه وقال ليها بحنان: "انا اسف.. المفروض مكنتش اضغط عليكي كده."

بكت أكتر وهي بتسمع كلماته الحنونة. قرب منها أكتر وقبل أعلى راسها بحب وقال: "بحبك."

وبعدين استند براسه فوق مقدمة راسها وكمل بثقة: "عايزك تعرفي اني مصدقتش لحظة واحدة انك ممكن تخونيني وتكوني السبب في كل اللي حصلي."...

تعليقات



<>