رواية زين وعاليا الفصل التاسع والعشرون29بقلم ملك ابراهيم

"في حب بيبدأ بفرحة.. وفي حب بيبدأ باختبار.

عاليا وزين في الحلقة اللي فاتت اختاروا بعض بقلبهم.. هي اختارت إنها تبقى مراته بجد، وهو وعدها إنه مش هيكون وجعها.

بس أول ما النور دخل حياتهم، الدنيا قررت تمتحنهم. خبطة على الباب، وخبر مش متوقع" 

ظهرت عربية فجأة واتجهت لمكان جانيت بأقصى سرعة وصد..متها بقوة وكمل سائق العربية طريقه بسرعة جنونية.

..... 

عند زين وعاليا ضمها زين بسعادة واتكلم بحنية: "مبروك يا حبيبتي..؟!".

عاليا أخفت وجهها في صدره بخجل.. ابتسم زين وزاد من ضمها واتكلم بمشاكسة:" أخيرا بقيتي مراتي بجد..".

اتكلمت عاليا بصوت ضعيف من شدة الخجل: " زين اسكت بجد أنا حاسة إن هيغمى عليا".

وضمت وجهها في صدره أكتر وتابعت كلامها بكسوف: "أنا مش عارفة أصلا أنا وافقت على كده إزاي".

رفع زين حاجبه واتكلم بجدية مصطنعة: "وافقتي على إيه معلش..!! حبيبتي المفروض ده كان يحصل من زمان أصلا".

ردت عاليا بخجل: "لا يا زين أنا بجد حاسة إن هيغمى عليا".

لتتابع كلامها بجدية مصطنعة: "بس انت اللي ضحكت عليا مليش دعوة".

ضحك زين واتكلم بهزار:" بعد كل دا وانا اللي ضحكت عليكي ؟؟ ".

اتكلمت عاليا بخجل وهي بتحاول تبعد عنه: " زين اسكت بقى".

زين بمشاكسة: "اسكت إيه ده انتي طلعتي عيني معاكي".

ابتسمت وهو قرب منها وهو بيهزر معاها وفجأة سمع صوت دقات قوية متتالية على الباب..

اتكلمت عاليا بتلقائية مرحة: "هو عبد التواب جه هنا ولا إيه..".

بص لها زين بغيظ واتكلم بتوعد: "ده لو عبد التواب بجد أنا كنت أقتـ.. له المرادي".

زاد الخبط بعنف وظهر صوت إحدى الخدم وهي بتنادي عليه بر.. عب.

قلق زين ولبس قميصه بسرعة واتجه لفتح الباب..

وقفت البنت اللي بتخبط واتكلمت بسرعة: "الحق يا زين بيه.. البيه الكبير جد حضرتك بيقولك انزله بسرعة.. جانيت هانم عملت حادثة كبيرة أوي والمستشفى لسه مكلمين البيه دلوقتي..".

بص لها زين بصدمة واتكلم بسرعة: "طب قوليله ثواني ونازل".

وقفل زين الباب ووقف بصدمة.. قربت منه عاليا واتكلمت بخوف: " زين هو إيه اللي حصل.. إزاي جانيت عملت حادثة".

تأملها زين وهو بيفكر.. معقول اللي حصل لجانيت ده بفعل فاعل..!!!

هز زين راسه بهدوء واتكلم مع عاليا وهو بيحاول يطمنها: "حبيبتي ما تقلقيش إن شاء الله هتكون حاجة بسيطة".

هزت عاليا راسها بخوف.. ضمها زين وهو بيحاول يهديها وأخدها وقعدها واتكلم معاها بهدوء: "حبيبتي اهدي خالص واطمني.. أنا لازم أنزل دلوقتي وأروح معاهم المستشفى وانتي عشان خاطري ما تخرجيش من البيت خالص مهما حصل.. اتفقنا".

هزت عاليا راسها بخوف واتحرك زين ودخل على الحمام بسرعة وبعد وقت قليل خرج وكمل لبسه بسرعة ووقف واتكلم بتأكيد مرة تانية: "عاليا حبيبتي.. عشان خاطري ما تخرجيش خالص مهما حصل..".

ردت عاليا بقلق: "حاضر بس ابقى طمني.. أنا بجد قلقانة عليها".

طمنها زين وخرج من الغرفة بسرعة ونزل لقى جده ووالده في غرفة المكتب وبيتكلموا بغضب.

والد زين: "أنا مش عارف إيه اللي يصحيها بدري وتخرج وأنا نايم وتروح المكان ده".

قرب منهم زين واتكلم بقلق: "هو إيه اللي حصل؟.".

اتكلم الجد بقلق: "كمال جاتله مكالمة دلوقتي إن مراته عملت حادثة..".

اتكلم زين: "وهي فين دلوقتي".

رد كمال بانفعال: "في المستشفى".

زين: "طب يلا نروح نطمن عليها ونفهم الحادثة دي حصلت إزاي".

رد كمال بملل: "أنا مش هروح لأي مكان وأنا أصلا بفكر أطلقها".

اتكلم الجد بصدمة: "تطلقها..!! جاي دلوقتي تفكر تطلق مراتك وهي في أكتر وقت محتاجاك فيه.. طب فين كلمة أطلقها دي وهي عايشة حياتها بالطول والعرض وسهر طول الليل وشرب وقرف طول النهار".

رد كمال بعصبية: "هو مش حضرتك كنت عايزني أطلقها واديني أهوه هطلقها.. إيه اللي مزعلك بقى".

حاول زين يتدخل واتكلم بهدوء: "اسمحلي يا بابا جدي عنده حق وفعلا مش ده الوقت المناسب اللي تتخلى عنها فيه وهي مهما حصل شايلة اسمك ولازم تقف جنبها".

رد كمال بعنف وبصوت عالي: "وأنا هنتظر منك إيه غير كده.. ما انت لازم تقف في صف جدك بعد ما فضلك عليا وكتب لك انت وأخوك كل حاجة وخلاني زي الطفل الصغير اللي بيمد إيده لكم كل شهر ياخد المصروف".

اتصدم زين من كلام والده ورد الجد بقوة: "أنا كتبت لهم كل حاجة عشان عارف ومتأكد إنهم هما اللي هيحافظوا على تعبي وشقايا وعارف إن انت لو طولت أي حاجة هتضيعها زي اللي ضيعته قبل كده".

وقفت قسمت وجيلان وهما بيسمعوا صوت صراخهم العالي ونزلت عاليا من غرفتها بسرعة لما سمعت صوت الصراخ الغاضب المرتفع.. وقربت منهم واتكلمت بقلق: "هو فيه إيه..؟".

ردت قسمت بتمثيل: "شكل زين بيتخانق مع باباه وجده..".

لتتابع باقي حديثها بمكر: "مش عارفة إيه اللي حصله ده كان طول عمره مش بيحب الصوت العالي ولا المشاكل".

كملت جيلان حديث والدتها وهي بتنظر لعاليا بحقد: "شكل زين ما بقاش عارف هو بيعمل إيه واختياراته كلها بقت غلط وأكيد ده مزعل جده وباباه ".

اندهشت عاليا من حديثهم وهي مش فاهمة هما يقصدوا إيه...

خرج كمال من غرفة المكتب بانفعال واتجه للخارج.. وقفت عاليا تتابع خروجه بقلق وقربت من غرفة المكتب عشان تطمن على زين...

وقف زين جنب جده وهو بيحاول يهديه.. قعد الجد بتعب وحط إيده على قلبه..

اتكلم زين مع جده بهدوء: "جدي عشان خاطري ما تزعلش وحاول تاخد نفس بهدوء".

دخلت عاليا غرفة المكتب وقربت من الجد ونظرت لزين بقلق: " زين هو إيه اللي حصل..".

واتجهت بنظرها للجد وتابعت كلامها بخوف: "هو جدي ماله..؟".

طمنها زين وقرب من مكتب جده وأخد الدواء وأعطاه لجده.. أخد جده الدواء وبعد دقايق قليلة شعر بالراحة.. زين باس إيد جده بحزن واتكلم بهدوء: "جدي عشان خاطري بلاش تزعل نفسك".

ابتسم الجد بتعب وهو بيتأمل نظرات الخوف اللي كانت في عيون زين وعاليا واتكلم بتعب: "أنا كويس يا حبيبي اطمن.. المهم انت روح شوف موضوع جانيت ده.. عشان أنا قلبي حاسس إنه بفعل فاعل واحنا لازم نعرف كل حاجة بتحصل حوالينا عشان نعرف الضربة بتيجي منين".

نظرت عاليا لزين وجده بعدم فهم وتابعت زين وهو بيرد على جده.

اتكلم زين برفض: "بس حضرتك تعبان يا جدي ومش هقدر أسيبك لوحدك".

رد الجد بتعب: "ما تقلقيش أنا كويس وكمان مراتك معايا اطمن".

ليتابع الجد كلامه بتأكيد: "مرات أبوك مهما عملت شايلة اسم العيلة يا زين ومسؤولة مننا يعني لو احتاجت تتعالج خارج مصر أو احتاجت أي حاجة هي مسؤولة مننا.. انت فاهم".

رد زين بتأكيد: "طبعا يا جدي اطمن".

وقرب زين من عاليا واتكلم بهدوء: "حبيبتي خليكي جنب جدي وأنا هروح المستشفى ومش هتأخر.. ما تقلقيش".

هزت عاليا راسها بتأكيد.. باس زين أعلى راسها.. وطمن جده إنه هينفذ كل اللي هو طلبه وخرج في طريقه للمستشفى.

رواية زين وعاليا بقلمي ملك إبراهيم. 

قعدت قسمت في غرفتها وهي بتحاول تتصل على والدتها عشان تبلغها إن جانيت اتعرضت لحادثة وتحكي لها المشكلة اللي حصلت بين كمال وزين وجده.

..... 

في شركة جديدة للهندسة المعمارية دخلت جدة زين واتكلمت مع أول موظف قابلها: "لو سمحت كنت عايزة أقابل الباشمهندس حمزة".

رد الموظف بتأكيد: "طبعا يا فندم.. اتفضلي لحظة واحدة هبلغه".

وقفت جدة زين وهي بتنظر حولها وافتكرت حديث دار بينها وبين عاليا في إحدى الأيام لما كانت عاليا عايشة معاها وهي زعلانة من زين.. افتكرت كلام عاليا عن حمزة وذكرها لموضوع سلسلة مامتها اللي حمزة اشتراها ورجعهالها.. حكت لها عاليا بحسن نية لكنها كانت بتسمعها بمكر وقررت تستخدم حمزة في خطتها وهي واثقة إن زين أكيد هيفقد عقله أول ما يعرف إن فيه أي علاقة بين حمزة ومراته وإنه أكيد هيصدق أي حاجة يشوفها أو يسمعها زي ما حصل لما شاف الفيديو اللي كان مع جانيت لما شاف حمزة وهو بيلبس عاليا السلسلة..

سمعت رنة تليفونها ولقت المتصل قسمت.. خرج الموظف واتكلم باحترام: "اتفضلي يا هانم الباشمهندس في انتظارك.. أغلقت جدة زين تليفونها بعد ما رفضت المكالمة ودخلت مكتب حمزة.

وقف حمزة ورحب بها: "أهلا يا فندم اتفضلي".

قعدت واتكلمت بغرور: "أنا أبقى جدة زين الشافعي".

وتابعت كلامها بمكر: "زوج عاليا".

رواية زين وعاليا بقلمي ملك إبراهيم.

عند زين. 

وصل زين المستشفى وسأل عن المصابة اللي جت في حادثة اصطدام سيارة.. قربت منه إحدى الممرضات واتكلمت بسرعة: "هو حضرتك زوج المصابة".

رد زين: "لا أنا من عيلتها.. هي فين..؟".

ردت الممرضة: "لسه في العمليات أصل حالتها خطيرة أوي".

لتتابع الممرضة حديثها برغي: "أصلهم بيقولوا إن العربية اللي خبطتها.. صاحبها خبطها وهرب على طول وحتى العربية مكنش عليها نمر عشان يعرفوا يوصلوله.. ربنا معاها.. ولاد الحرام بقوا كتير".

اتكلم زين بزهق من حديثها الكتير: "طب فين غرفة العمليات اللي هي فيها".

ردت الممرضة: "اتفضل من هنا".

اتجه زين لغرفة العمليات ووقف بالخارج في انتظار خروج الدكتور.. وبعد أكتر من ساعة خرج الدكتور ومعاه مساعديه.. قرب منه زين واتكلم: "لو سمحت يا دكتور أنا زين الشافعي من عيلة المصابة.. ياريت تطمني عليها".

رد الدكتور بأسف: "أهلا بحضرتك.. أنا آسف جدا بس الحادثة كانت صعبة وللأسف اضطرينا.......".

بص له زين بصدمة وهو بيسمع باقي حديثه.

رواية زين وعاليا بقلمي ملك إبراهيم. 

خرجت جدة زين من مكتب حمزة وهي بتبتسم بمكر بعد اتفاقها مع حمزة على خطتها الجديدة في الإيقاع بعاليا وتشكيك زين فيها.. وكانت سعيدة جدا من تحمس حمزة ولهفته في تنفيذ خطتها للحصول على عاليا.. ورجعت الفيلا وهي بتفكر إزاي تقنع عاليا إنها تشتغل مع حمزة.. لأن شغلها مع حمزة هيساعدهم كتير في تنفيذ خطتهم.

رواية زين وعاليا بقلمي ملك إبراهيم. 

عند الجد.

جلست عاليا جانبه بقلق وكانت كل شوية تسأل يا ترى ليه زين ما اتكلمش لحد دلوقتي يا ترى إيه اللي حصل لجانيت وكانت قلقانة عليها جدااا.

ابتسم الجد بهدوء واتكلم بفضول: "انتي غريبة أوي يا عاليا.. يعني بعد اللي عملته معاكي جانيت وزعلانة عليها دلوقتي.. دي كانت هتدمر حياتك وكنتي برضه هتموتي بسببها".

ردت عاليا بصدق: "بس الحمد لله ربنا حفظني وهي مهما كان روح واللي حصلها صعب ومحزن".

ابتسم الجد بهدوء واتكلم بجدية: "بس مش كل الناس تستاهل تعاطفك ده يا عاليا.. فيه ناس موجودين بس عشان أذيتكم".

بصت له عاليا بعدم فهم..

شرد الجد لحظات وبص لعاليا واتكلم بإيمان: "بس ربنا إن شاء الله هيحفظكم وهيرد مكرهم في نحورهم".

رواية زين وعاليا بقلمي ملك إبراهيم. 

وصلت جدة زين الفيلا.

وقابلتها جيلان واتكلمت بتوتر: "كنتي فين يا تيتة.. ما عرفتيش اللي حصل".

نظرت لها جدتها بدهشة واتكلمت: "فيه إيه جيلان إيه اللي حصل..؟".

ردت جيلان وهي بتبص حواليها: "مش هينفع نتكلم هنا تعالي في غرفة ماما".

رواية زين وعاليا بقلمي ملك إبراهيم. 

وقف زين بصدمة وهو بيستمع لكلام الدكتور وشرحه لحالة جانيت.

الدكتور: "للأسف الحادثة كانت صعبة جدا وحصل تشوه في الوجه من شدة الاصطدام والواضح إن العربية دفعتها بقوة للأمام وكمل السائق طريقه ودهست العربية النصف السفلي من جسدها وللأسف اضطرينا لعمل بتر للقدمين..".

فتح زين عينه بصدمة كبيرة.. وتابع باقي حديث الدكتور.

ليتابع الدكتور حديثه بحزن: "احنا عملنا اللي علينا.. ادعيلها يعدي 24 ساعة على خير لأن حالتها صعبة جدا".

وقف زين بصدمة وبدأت صورة جانيت تظهر قدام عينيه في أول مرة شافها في الجامعة وهي ماشية بتتهادى بخطواتها وبتتباهى بجمالها.. قد إيه كانت بتحب نفسها وكانت بتتباهى بجمالها وهي فخورة بنفسها.. كانت بتفكر في الشيء اللي يسعدها وبس.. كانت مستهترة في كل حاجة .. وأكيد ده عقاب من ربنا ليها.. لأنها استخدمت نعمة ربنا في الشر.. أكيد الصدمة هتكون شديدة عليها جدا.. أكيد مش هتقدر تستحمل حاجة زي دي..بقلمي ملك إبراهيم. 

"النعمة إذا شكرت قرت.. وإذا كفرت فرت".

قال تعالى: {وَرَبُّكَ الْغَفُورُ ذُو الرَّحْمَةِ لَوْ يُؤَاخِذُهُمْ بِمَا كَسَبُوا لَعَجَّلَ لَهُمُ الْعَذَابَ}.

اللي حصل ل جانيت كان صعب 💔