ـ اتفضلى ادخلى
دخلت بخوف و تعب من دموعى اللى لحد الآن مش عارفة أوقفها ، سمعت قفلت الباب اتخضيت و انا ببص حواليا و انا مش مصدقة أنه مع اكتر شخص بخاف منه فى النفس البيت ، رفعت عينى ابصله كان لسه واقف عند الباب ، خد نفسه و قرب منى بحذر و انا قلبى دقاته بتزيد من الخوف ، وقف على بعد مسافة منى و اتكلم بنبرة هادية :
ـ تقدرى تدخلى اى اوضة فى الشقة و ترتاحى شكلك مرهق بسبب العياط
اخر جملة شاور بايده على وشى ، فضلت واقفة مش عارفة اتحرك و خايفة بصلى و اتكلم بتعب :
ـ طيب قوليلى اعمل ايه عشان اخليكِ متخافيش منى !
سكت و هو بيمسح على وشه بتعب و هو بيقولى بارهاق :
ـ والله اتغيرت يا دينا ، مبقتش الشخص اللى تعرفيه
كان ردى على كلامه السكوت التام مش عارف أكلمه ، خايفة اقول حاجه يتعصب و يضربنى ، اتكلم تانى و هو بيبعد :
ـ طيب انا نازل و خليكِ انتى قاعدة عشان ترتاحى
قالها و مشى نحيت بالباب و هو بيفتحه ، اتكلمت بصوت واطى :
ـ استنى
فضل واقف كام ثانية و بعدين لف و بصلى و على وشه ابتسامة ، اتكلمت و انا برجع اعيط تانى :
ـ انـ..أنا بخاف متمشيش و تسبنى لوحدى
ابتسامته اختفت و لف يقفل الباب و هو بيقرب من تانى :
ـ انا هسيبك عشان إنتِ بتخافى مين و عايزكِ ترتاحى
= انـ..أنا قولتلك امتى أنه خايفة منك
قولتها و انا بمسح دموعى بكم أيدى ، ابتسم و هو بيتكلم بفرحة :
ـ بجد !! قصدى يعنى مش خايفة منى خالص؟
= خايفة شوية صغيرين بس
ـ و انا عندى استعداد امحى اى خوف ليكِ منى بس إنتِ اسمحيلى بـ دا ممكن !
= مم...مش هتاذينى و لا هتضربنى !!!
ـ هقطع أيدى لو فى يوم فكرت ارفعها عليكِ
سكت و انا حاسة من نبرة صوته صادقة برتياح شويه ، اتكلم تانى و هو بيقرب بفرحة و توتر :
ـ ها ممكن نبقى أصحاب ؟!!
قعدت افكر شوية ، أنا معنديش حل تانى و هو باين عليه أنه اتغير فعلا بس عقلى مش قادر يستوعب دا ، هزيت رأسى ببطء ، ابتسم بفرحة و عيونه بتلمع و هو بيقولى :
ـ طيب ادخلى ارتاحى شوية عشان إنتِ تعبانة
هزت رأسى و لفيت و اتجهت للاوضة بسمع صوت أصوات غريبة ورايا لفيت تانى لقيته بيرقص و اول ما شافنى اتعدل فى وقفته و هو بيقول بتوتر :
ـ انـ...أنا بس كنت بحمى قبل اما ادخل اتمرن
هزيت رأسى ولفيت و انا ببتسم على حركاته ، دخلت اول اوضة قابلتنى و قفلت الباب بالمفتاح من جوا ، فتحت الشنطة و بدأت أرتب الهدوم فى الدولاب ،و بعد اما خلصت خدت بيجامة عليها فيونكات لونها بينك و دخلت خدت دوش سخن عشان يهدى اعصابى شوية و افكر فى اللى جاى ، خلصت و طلعت قعدت قدام المراية سرحت شعرى و عملت ضفرتين و رطبت أيدى و بشرتى و حطيت ليب بالم نود و رشيت رشة اسبلاش ريحتها كاندى ، خلصت و روحت قعدت فى نص السرير و شديت البطانية عليا.
مش قادرة اصدق أنه خلاص بقيت متجوزة ، لا و من منين؟ من اكتر شخص بخاف منه ، بس دا ميمنعش أنه حسيت من نحيته براحة غريبة عليا ، مش عارفه ازاى بس لما حسيت أنه ممكن يسبنى و يمشى خوفت ، بس ثانكس جود ريحة الاسبلاش تحفة ، ابتسمت على تفاهتى و انا بحط وشى بين كفوفى.
سمعت صوت خبط خفيف يكاد يكون مسموع ، مش عارفه هو بقى هادى اوى كدا ازاى ، قومت و وقفت ورا الباب و انا بكلمه من غير ما افتحه
ـ نعم ؟
= احمم ممكن تتوضى و نطلع نصلى مع بعض
اتصدمت من كلامه و فضلت ثوانى مصدومة لحد اما هو خبط تانى فـ قولته
ـ حاضر
= فى انتظارك
قالها و سمعت خطواته و هو بيبعد عن الاوضة ، ابتسمت بسماجة و انا مش فاهمة هو اتغير ازاى كدا ، أنا اتوضيت اصلا و انا كنت باخد دوش فـ لبست الاسدال و فتحت الباب ببطء و طلعت الصالة لقيته واقف عاطينى ضهره و هو بيرش معطر فى الجو ، و كان فاتح نور هادى فى المكان و فارش مصليتين على الارض ، جو هادى جميل ينفع جدا للصلاة.
لف و بصلى و ابتسم بتوتر لما شافنى ، و انا بفرك فى أيدى و بقوله :
ـ ليه كل التجهيزات دى !
= عشان نصلى
ـ اه بردوا ليه كل دا !
= عشان نهيّأ نفسنا للصلاة، ونبعد أي حاجة ممكن تشتت انتباهنا، المعطر والهدوء والإضاءة دي كلها بتساعدنا نركز في صلاتنا ونخشع فيها، مش مجرد إننا نأدي الفرض وخلاص و بعدين أنا مستنى الصلاة دى من زمان
استغربت من نظراته و هو بيقول اخر جملة و بيبتسم بفرحة ، اتكلمت بتسأل:
ـ مش فاهمة يعنى اشمعنى الصلاة دى ما هو الانسان دايما بيصلى كل يوم خمس اوقات
= يا ستى عارف و الله بس انا كنت مستنيها من زمان اوى فوق ما تتخيلى
بصتله بعدم فهم فـ هو كمل :
= بوصى متشغليش بالك إنتِ تعالى نصلى
هزيت رأسى و انا بقرب منه بحذر و بقف على المصلية ، فضل واقف بصصلى و على وشه ابتسامة غريبة مش فهمها ، اتعدل و وقف قدامى على المصلية و بدأ يصلى ، صوته كان جميل أوى مكنتش مصدقة أنه صوته حلو كدا ، خلصنا صلى و قعدنا على المصلية نسبح و نقراء أية الكرسى ، لقيته بيرفع أيده اتجاهى خوفت منه فـ رجعت راسى لورا بتوتر و هو قرب و حط أيده على رأسى فـ محاولة أنه يثبتها مكانها ، غمض عيونه و بدأ يقول دعاء الزواج ، رفعت عينى على ملامحه و هو مغمض عيونه ، وشه هادى هدوء غريب و فيه راحة خلت عيونى متتحركش من عليه ، مش فاهمة ازاى هو دا ايسو المزعج ، دا الشخص اللى كنت اول ما المح وشه اترعب ، ازاى وشه بقى يخلى عيونى مرتاحة و هى بصاله، فتح عيونه ببطء و هو بيبصلى و بيسحب أيده من على رأسى و هو بيقول بحنيه طاغية على صوته :
= ممكن نتكلم شوية !
بصتله و انا بفرك فى أيدى فـ هو كمل بتوضيح :
= لا مش عايزة براحتك و..
قطعته : ـ معنديش مانع
ابتسم و هو بياخد نفسه و بيطلعه بهدوء :
= احمم عارف أنك خايفة من. و شيفانى مدمن و صايع و عندك حق و الله لأنه دا لأني فعلًا كنت كدا ويمكن أسوأ كمان ، أنا غلطت كتير يا دينا، وضيعّت من عمري سنين في حاجات مكانتش تستاهل، وكنت فاكر إن القوة إني أخلي الناس تخاف مني، وإن الرجولة إني أبقى محدش يقدر يقف قصادي، لحد ما اكتشفت إني كنت أضعف من إني أسيطر على نفسي.
سكت لحظة و بعدين كمل :
= اللي عايزك تعرفيه إني توبت بجد، ولسه بجاهد نفسي كل يوم عشان مارجعش للي كنت فيه ، عارف إن جوازنا جه بطريقة مش حلوة، وإن أخوكي ظلمك وظلمني معاه، بس صدقيني أنا مكنتش أعرف إنك مش موافقة، ولو كنت أعرف مكنتش رضيت أبدأ بـ دا
ـ انا عارفه أنه ملكش ذنب و عارفة كمان أنه حسين هو اللى قالك كدا
= شكراً انك فهمتينى
هزيت رأسى بأبتسامة و هو كمل :
= معندكيش اى اسأله ليا ؟
اتكلمت بتوتر و انا بفرك فى أيدى : ـ هـ..هو انت بقيت كدا ازاى ؟!
سكت و مردتش و ثبت عيونه فى المجهول اتكلمت بتوتر :
ـ لو..لو مش عايز تقول براحتك
ضحك و هو بيبصلى :
= سيف
ـ سيف !
= ايوا كان اعز اصحابى مكنش عندى حد غيره ، كن دايما مع بعض ، بس كونا عكس بعض فى كل حاجة هو يحاول يشدنى للطريق الصح و انا كنت أزيد فى الطريق الغلط لحد اما...
عيونه لمعوا بالدموع و هو بيكمل :
= لحد اما فى يوم اتلم عليا شوية شباب عشان يخلصوا عليا بس هو اللى وقف قدامى وخط الطعنة بدالى و مات بينا أيدى
دموعوا زادت و هو بيمسحها بايده و بيكمل :
= عدى على موتوا خمس شهور ، و لحد الان شايف أنه كان لسه امبارح بينصحنى و بيشدنى معاه عشان اصلى و التزم
ـ هو اكيد فرحانة دلوقتى بتغييرك
ابتسم و هو بيبصلى :
= اممم اكيد ، بس انا كنت عايزوا يبقى معايا دلوقتى و يشفنى و انا ملتزم
كان بعيط زى طفل صغير أمه سابته و مشيت ، قربت من بتردد و انا بشده لحضنى ، اتمسك بحضنى و هو صوت عياطه بيزيد ، مش قادرة اصدق أنه دا يوسف اللى كان بيخلى الحارة كلها تقف على رجل لما يعدى بس من الطريق ، ملست على ضهره و انا مش عارفة اعمل ايه ، اول مرة اشوف راجل بيعيط فى حياتى ، كنت عارفة أنه الراجل بيبقى قوى جدا لدرجة أنه مش بيعيط عكس البنات بيعيطوا من أقل حاجه دا لو ضفرهم اتكسر بيزعلوا يومين بسبب كدا ، همس بكلمات هو فى حضنى :
= متسبنيش زيه يا دينا المرادى مش هقدر و الله
ايدى و قفت على ضهره و انا مش فاهمة ليه بيقولى كدا ، بس هو دلوقتى محتاج حد يطمنه و مفيش غيرى ، اتكلمت و انا بحاول اطمنه و مش عارفة عواقب اللى هقوله:
ـ انا هنا معاك و مش هسيبك
****
عدى شهر ، حسيت فيها أنه زى الطير اللى بيطير بـ حرية فى السماء بعد حبسه فى القفص لوقت طويل ، يوسف كان حنين عليا اول مرة احس بالحنية كانت مع اكتر شخص بخاف منه أول مرة اضحك من قلبى و انا معاه ، فاكرة اول مرة فيها داق اكلى و هو بيقول إنه دا احلى اكل داقه فى حياته ، و فاكرة و هو بيساعدنى فى كل شغل البيت ، و فرحتى اول مرة لما سمعت صوته و هو بيصلى بالناس و انا واقفة فى البلكونة احلى شعور فى الدنيا.
اكتشفت أنه فيه حاجات حلوة كتير فى الدنيا ، زى أنه نقعد بالليل فى البلكونة و علينا بطانية و عاملين كوبايتين شاى و احنا بنبص على النجوم و نتكلم لحد اخر الليل ، و اكتشفت بقيت اطمن فى وجوده و يوم ورا يوم لقتنى بقع و بحبه مش عارفة ازاى بس بقيت احب وجوده ، و احب تفاصيله ، و احب ضحكته.
= بتعملى ايه ؟
ـ انت شايف ايه ؟!
= شايف انك بتعملى الأكل و من غير ما تستنينى
ـ المفروض أنا اللى اعمله انت بتتعب طول اليوم فى الشغل و انا مش بعمل حاجه
= بس انا قولتلك مليون مرة إن برتاح كدا صح !
ـ صح بس انا بقى مش برتاح كدا عشان...
قبل اما اكمل سمعت صوت جرس الباب ، فـ هو طلع يفتح و انا كملت الاكل لحد اما سمعت صوت بنت ، غسلت أيدى بسرعة و انا بطلع من المطبخ ، لقيته واقف عند الباب و فيه بنت شايلة طفل على أيدها و بيتكلموا ، قربت منهم و انا بقوله بغيرة واضحة عليا :
ـ مين دى ؟!!
اتكلمت و هى بتعدل الطفل على أيدها و بتقول بتملك :
ـ انا مراته و دى بنته اللى على أيدى !