رواية زين وعاليا الفصل الثالث والثلاثون33 بقلم ملك ابراهيم

"زين حس بحاجة خوفته.. حس إن عاليا طيبة أوي، وبرئية أوي، وبتثق في أي حد يقولها كلمتين حلوين.. وده اللي خلاه يقرر إنه لازم يصارحها بكل حاجة، ويحكيلها حقيقة اللي حواليها، قبل ما طيبتها دي تكون هي السبب في وجعها"

جيلان قالت بدهشة : "بتقول إيه..؟!! يعني إيه عايز مرات زين".

رد باسل ببساطة: "يعني عايزك تستدر..جيها وتجبيها للمكان اللي أنا هقولك عليه".

اتصد..مت جيلان واتكلمت بتحذ..ير: "باسل فوق انت ما تعرفش زين بيحب مراته دي قد إيه.. انت عارف احنا لو بس قربنا منها زين هيعمل فينا إيه".

رد بقوة: "ولا هيقدر يعمل حاجة لأن روحه هتبقى في إيدي".

اتكلمت جيلان بقلق: "لا يا باسل.. الموضوع كده كبر أوي وبقى خـ..طر علينا كلنا".

رد عليها بغضب: "الموضوع كبير من الأول يا جيلان.. وأنا خلاص ما بقاش عندي اللي أخاف عليه ".

اتكلمت جيلان بعصبية: "بس أنا عندي اللي أخاف عليه يا باسل".

رد بمكر: "ماهو أنا عايزك تساعديني عشان تحافظي على اللي عندك".

ليتابع بقوة: "انتي عارفة إن احنا خلاص ما بقاش حيلتنا أي حاجة وعلينا فلوس لناس ما بترحمش وبكره جانيت تفوق وتقول لزين على كل حاجة ووقتها مش بعيد يخلص علينا ولا يسجنا وحتى لو سابنا.. فيه غيره هيخلص علينا لو ما رجعناش ليهم فلوسهم".

فكرت جيلان في كلامه وكانت شايفة إن عنده حق في كل كلمة واتكلمت بتوتر: "طب انت أخدت رأي تيتة في الموضوع ده".

رد بحدة: "لأ طبعا وانتي أوعي تقوليلها حاجة..".

ليتابع كلامه بتخطيط : "كله دلوقتي بقى بيلعب لحسابه وجدتك أول واحدة هتبيعنا لو وقعنا وهتقول ما أعرفش عنهم أي حاجة".

هزت جيلان راسها بتأكيد على كلامه وبدأت تقتنع واحدة واحدة.. ليتابع باسل كلامه بجدية: "احنا خلاص يا جيلان مفيش قدامنا دلوقتي حل غير إننا نخـ.. طف مرات زين ولازم محدش يعرف مين اللي خطـ.. فها ونساومه على مبلغ كبير من الملايين اللي عنده دي وأول ما ناخد الفلوس نرجعله مراته ونسدد الديون اللي علينا ونعمل بالباقي مشروع ونقف على رجلينا من تاني".

ردت جيلان بقلق: "طب ولو زين عرف إن احنا اللي خطـ.. فنا مراته تفتكر هيسكت عادي كده".

اتكلم بعصبية: "وتفتكري حتى لو ما خطـ.. فناش مراته واكتشف كل اللي احنا عملناه ده وعرف إن احنا ورا كل اللي حصلهم.. تفتكري هيسكت".

ردت جيلان بحيرة: "طب انت عايزني أعمل إيه دلوقتي".

اتكلم بمكر: "تقربي من مراته على قد ما تقدري بس خلي بالك عشان جدتك ما تاخدش بالها وتشك في حاجة".

ردت جيلان: "ما تقلقش بس برضه أنا ما فهمتش هعمل إيه".

باسل بمكر: "أنا هقولك تعملي إيه".

رواية زين وعاليا بقلمي ملك إبراهيم. 

وصلت عاليا الفيلا وهي شايلة كل الملفات اللي المفروض تخلصها.

قابلها زياد وفضل يضحك: "إيه كل ده يا عاليا.. انتي أخدتي كل ده من أول يوم".

ردت عاليا بثقة: "شوفت بقى.. لأني موظفة مجتهدة.. هخلص أنا شغل الشركة كله لوحدي.. عشان بس تعرفوا قيمتي".

بص لها زياد بحاجب مرفوع واتكلم بفضول: "معقول انتي هتخلصي كل الشغل ده لوحدك..؟".

ردت عاليا بتلقائية: "لأ طبعا..".

ضحك زياد واتكلم بثقة: "ما أنا قلت كده برضه".

بصت عاليا حواليها واتكلمت بصوت واطي: "بقولك إيه يا زياد.. ما تساعدني في الشغل ده ربنا يخليك".

ضحك زياد واتكلم بسرعة: "لااا معاكي ربنا.. أنا عندي ميعاد مع سجدة ومش فاضي خالص".

اتغاظت عاليا واتكلمت وهي بتدعي الزعل: "ماشي يا زياد.. خليك فاكرها".

بصت حواليها وتابعت كلامها بهدوء: "طب بقولك إيه هو زين هنا ولا لسه ما جاش؟ ".

رد زياد وهو بيضحك: "لأ لسه ما جاش.. وعايز أقولك إن الملفات اللي معاكي دي كلها ما تاخدش من زين أكتر من عشر دقايق ويكون مخلصها".

فتحت عاليا عينيها بسعادة واتكلمت بحماس: "بجد...".

هز زياد راسه بتأكيد وهو بيضحك وقالها: "طبعا بجد.. ده انتي ما تعرفيش زين بقى".

ابتسمت عاليا وهي بتضم الملفات في حضنها وبتفكر إزاي تطلب من زين إنه يخلص لها كل الملفات دي.

ضحك زياد بعد ما دبس أخوه وهو بيتخيل شكل زين وهو بيخلص لعاليا شغلها وسط المشاكل والمشغوليات الكتير اللي عنده.

رواية زين وعاليا بقلمي ملك إبراهيم. 

طلعت عاليا أوضتها بحماس وحطت الملفات اللي معاها على السرير واتجهت لخزنة الملابس وأخدت لبس منزلي خفيف ودخلت تاخد شاور.

بعد وقت قليل خرجت من الحمام وهي بتنشف شعرها ووقفت قدام المراية صففته ورفعته لفوق بطريقة فوضوية وبصت للملفات اللي على السرير وهي بتفكر إنها تحاول ترتبهم زي ما "دنيا" علمتها.. وقبل ما تقرب من السرير سمعت دقات خفيفة على باب الأوضة.

قربت وفتحت لقت جيلان.. اندهشت عاليا وهي بتبص لها.

حاولت تبتسم جيلان واتكلمت بهدوء: "عاليا إزيك".

ردت عاليا بدهشة: "الحمد لله".

بصت جيلان حواليها واتكلمت بتوتر: "عاليا أنا كنت جاية أعتذر لك على اللي حصل الصبح".

اندهشت عاليا أكتر واتكلمت بعدم فهم: "تعتذري ليا أنا؟ أنا مش فاهمة حاجة..".

جيلان وهي بتدعي البراءة: "هو ينفع نتكلم مع بعض شوية".

عاليا بهدوء: "آه طبعا اتفضلي..".

دخلت جيلان الأوضة وهي بتبص حواليها بتوتر ومرعوبة جدا من فكرة خـ.. طف عاليا وعارفة ومتأكدة إن زين مستحيل يسيبهم لو عملوا حاجة زي دي.

بصت لها عاليا بدهشة واتكلمت: "اتفضلي نقعد هنا".

هزت جيلان راسها بتوتر واتجهت للكنبة اللي في الأوضة واتكلمت مع عاليا بارتباك: "عاليا أنا مش عيزاكي تزعلي من طريقتي الحادة معاكي.. بس صدقيني غصب عني".

ابتسمت عاليا واتكلمت بهدوء: "أنا حقيقي مش زعلانة ولا حاجة وياريت انتي كمان ما تزعليش مني".

اتكلمت جيلان بتوتر: "عاليا أنا وانتي تقريبا من نفس السن وده شجعني إني أجي أتكلم معاكي دلوقتي".

اندهشت عاليا واتكلمت بهدوء: "اتفضلي طبعا أنا سامعاكي".

اتكلمت جيلان وهي بتحاول تداري ارتباكها: "أنا يا عاليا متجوزة وعندي طفل".

فتحت عاليا عينيها بصدمة وتابعت جيلان كلامها بثقة بعد ما شافت نظرات عاليا المصدومة اللي بتأكد لها إنها هتصدقها بسهولة.

جيلان: "ومفيش مخلوق يعرف إن أنا متجوزة لأنه كان اتقدم لماما عشان يخطبني وماما رفضت لأن مستواه المالي والاجتماعي أقل مننا".

اتكلمت عاليا بصدمة: "يعني لما مامتك رفضته انتي اتجوزتيه من وراها".

ردت جيلان وهي بتدعي الحزن: "للأسف وبعد ما اتجوزته طلعت ماما عندها حق وهو فعلا مش مناسب ليا.. واكتشفت ده بعد ما بقيت حامل منه وخلفت طفل".

عاليا بذهول: "يعني انتي اتجوزتي وخلفتي ومامتك ما تعرفش".

جيلان بمكر: "أصل أنا اتجوزته وأنا مسافرة بلد تانية كنت بدرس".

عاليا بدهشة: "ولسه مامتك ما تعرفش..".

جيلان: "مفيش أي حد يعرف وانتي كمان يا عاليا أوعديني إنك ما تقوليش لأي مخلوق حتى زين".

لتتابع بتأكيد: "عاليا ده شرفي وأنا أمنتك أمانة لأني كنت فعلا مخنوقة ومحتاجة أفضفض مع بنت من نفس عمري عشان تفهمني وتحس بيا".

ردت عاليا بطيبة: "ما تقلقيش يا جيلان.. أنا مستحيل أقول سرك لأي حد.. بس طفلك فين دلوقتي ومع مين؟".

ردت جيلان وهي بتدعي الحزن: "ابني دلوقتي عايش مع صاحبة ليا.. بس هي كلمتني من يومين وقالت إن هي عندها ظروف ومش هتقدر تراعي ابني أكتر من كده وطلبت مني إني أروح أخده من عندها..".

عاليا بحزن: "يعني انتي كده لازم تعترفي لوالدتك وتجيبي ابنك يعيش معاكي".

ردت جيلان بتمثيل: "ما أقدرش يا عاليا.. ماما ممكن تموت لو عرفت حاجة زي دي".

اتكلمت عاليا بحيرة: "وبعدين.. بس الطفل ملوش ذنب".

ابتسمت جيلان جواها على سذاجة عاليا وطيبتها المبالغ فيها وتابعت تمثيلها بإتقان.

جيلان: "ما أنا كلمت صاحبتي وطلبت منها تجيبهولي هنا في مصر وقررت أخد شقة هنا وأشوف مربية شاطرة تراعيه لحد ما أشوف هعمل إيه".

اندهشت عاليا جدا واتكلمت: "بس طفلك لازم يعيش معاكي.. هو ملوش ذنب وما ينفعش تكوني انتي عايشة وناس غريبة تراعيه".

لتتابع عاليا كلامها بحزن: "كده طفلك عايش زي اليتيم.. محروم من الأب والأم.. وصدقيني مفيش أي مخلوق في الدنيا يقدر يعوضه حنان الأب والأم".

جيلان بتمثيل: "عندك حق يا عاليا".

لاحظت عاليا حزنها واتكلمت بحزن: "ما تقلقيش على طفلك وإن شاء الله خير".

وقفت جيلان واتكلمت مدعية الحزن: "أنا آسفة يا عاليا لو كنت أزعجتك وأخدت من وقتك بس حقيقي أنا كنت محتاجة أفضفض مع بنت تفهمني".

ردت عاليا بابتسامة: "ما تقوليش كده أنا موجودة في أي وقت ولو احتاجتي أي مساعدة أنا موجودة".

جيلان بمكر: "ميرسي حبيبتي.. أنا هرجع أوضتي أرتاح شوية.. عن إذنك".

عاليا بذوق: "اتفضلي.. تصبحي على خير".

خرجت جيلان من أوضة عاليا واتجهت بسرعة لأوضتها وهي بتبص يمين وشمال عشان تتأكد إن مفيش حد شافها.

دخلت جيلان أوضتها واتصلت على باسل ورد عليها على طول.

جيلان: "خلاص يا باسل أنا رميت الطُعم".

باسل بفضول: "ودخل عليها".

جيلان: "طبعا".

باسل: "تمام.. يبقى يومين كده وننفذ".

جيلان بتوتر: "بس أنا قلقانة من زين".

باسل: "ما تقلقيش.. احنا هنكون بعيد عن الموضوع..".

ليتابع بتأكيد: "انتي كمان يومين كده وتعملي إنك وقعتي على رجلك ومش هتقدري تمشي عليها.. وبعد كده تطلبي منها اللي أنا قلتلك عليه".

ردت جيلان بقلق: "حاضر يا باسل.. ربنا يستر".

رواية زين وعاليا بقلمي ملك إبراهيم. 

قعدت عاليا في أوضتها بعد خروج جيلان وكانت بتفكر في مصير الطفل ده وكان صعبان عليها جداا.

دخل زين الأوضة ولقى عاليا قاعدة وبتفكر بشرود.

ابتسم وقفل الباب وراه وقرب من عاليا واتكلم بهدوء: "حبيبتي سرحانه في إيه".

بصت له عاليا بعمق وهي بتفكر تحكيله وهو يساعد جيلان لكن وعدها لجيلان منعها تتكلم..

قلق زين لما طال صمت عاليا وهي بتتأمله.. وقعد جنبها واتكلم بحنية: "حبيبتي انتي كويسة..؟".

هزت عاليا راسها بهدوء.. تابع زين كلامه بتساؤل: "فيه حاجة حصلت في الشغل الجديد زعلتك".

افتكرت عاليا الشغل وبصت على السرير وشافت الملفات الكتير اللي عليه ورجعت ببصرها لزين وهي بتفكر إزاي تقنعه يساعدها تخلص كل الشغل ده.

ابتسمت فجأة وقربت منه أكتر وهي قاعدة جنبه واتكلمت بدلع: " زين حبيبي انت وحشتني أوي".

ضحك زين واتكلم وهو بيضحك: "وانتي وحشتيني أكتر يا حبيبتي".

ليتابع بصوت همس لنفسه وهو بيضحك: "والله مجنونة".

حركت رموش عينيها واتكلمت بدلع: "حبيبي هو مش المفروض إن أي واحدة تحتاج مساعدة تطلب من جوزها".

رد زين بتأكيد: "طبعا".

لتتابع بدلع وهي بتلعب في ازرار قميصه: "وأنا محتاجة مساعدة وطبعا جوزي حبيبي هيساعدني".

انهت كلامها وقربت من خده وباسته برقة.

رفع زين حاجبه واتكلم وهو هيتجنن من دلعها ورقتها: "ممكن أعرف إيه نوع المساعدة".

حركت رموش عينيها بالطريقة اللي بيعشقها واتكلمت برقة.

عاليا: "حاجة بسيطة جدا وهتقدر تخلصها في أقل من عشر دقايق".

رد زين بدهشة: "وعرفتي إزاي إني أقدر أخلصها في أقل من عشر دقايق".

ردت بتلقائية: "زياد قالي كده".

مسك زين إيديها وقعدها على رجله وضم خصرها واتكلم وهو بيبص لها بعشق.

زين: "زياد قالك إيه بقى".

حست عاليا بإحساس جميل أوي وزين بيتعامل معاها بالحنية دي وكأنها بنته.. إحساس بيجمع الحب والعشق والحنان والأمان والاحتواء.. ابتسمت وهي شايفة قد إيه هو مهتم إنه يسمعها عشان يساعدها.

رفع إيده ومسد على شعرها بحنان وهو مستني إنها تتكلم.

اتكلمت عاليا بهدوء: "انت عارف إن النهاردة أول يوم ليا في الشغل صح".

رد زين بهدوء: "صح".

تابعت كلامها برقة. 

عاليا: "وفيه شغل كتير طلبوا مني أخلصه النهاردة وفيه مهندسة من الشركة شرحتلي الشغل ده وأنا حاولت أعمل اللي هي قالت عليه بس برضه مش عارفة حاسة إنه صعب ومش فاهمة حاجة".

ابتسم بهدوء واستنى تكمل كلامها... لتتابع بخجل..

عاليا: "وأنا مش عارفة أعمل إيه.. مش عايزة أظهر فاشلة من أول يوم".

لتتابع بغيظ: "وطلبت من زياد يساعدني وهو هرب مني وقالي إن انت تقدر تعملي الشغل ده ومش هياخد منك وقت".

ضحك زين واتكلم بهدوء: "بس كده".

هزت عاليا راسها بطريقة طفولية واتكلمت برقة: "بس كده".

اتكلم زين بتشجيع: "طب هاتي كده الملفات دي".

وقفت عاليا بحماس وأخدت الملفات من على السرير وقربت منه وهي متحمسة جداا..

أخدهم منها زين وقعدت عاليا جنبه وهي بتتابعه وهو بيفتح الملفات وبيراجع عليهم بطريقة سريعة... وبعد لحظات اتكلم معاها بجدية.

زين: "حبيبتي أنا دلوقتي هشرحلك إزاي تقدري تشتغلي على الملفات اللي من النوع ده وإزاي تخلصيها في وقت قياسي بس عايزك تركزي معايا جدا".

ردت عاليا بحماس: "تمام وأنا جاهزة".

ابتسم زين وفتح واحد من الملفات وبدأ يشرح لها بطريقة سهلة وبسيطة..

قربت منه عاليا وهي بتبص له بعشق وعينيها كانت مركزة مع كل تفاصيله.. عينيه.. شفايفه.. شعره.. طريقته وهو بيتكلم.. تعبير وشه.. كل حاجة فيه كانت بتسحرها.

بعد وقت بص لها زين واتكلم بهدوء: "إيه رأيك.. شوفتي سهل إزاي".

ردت عاليا بتلقائية: "شوفت.. زي القمر.. هو فيه كده".

بص لها بدهشة: "هو إيه اللي زي القمر وفيه كده".

اتوترت لما أخدت بالها من اللي هي قالته وارتبكت جدااا..

ضحك زين بعد ما فهم إنها ماكنتش مركزة مع شرحه وكانت مركزة معاه هو..

حط الملفات على جنب واتكلم بمرح: "انتي شكلك هتتعبيني معاكي".

ردت عاليا بمشاكسة: "آسفة يا مستر آخر مرة.. أصل انت بصراحة حلو أوي".

ضحك زين واتكلم: "حلو أوي".

عاليا بضحك: "أوي أوي يا زين بيه".

ضحك زين وأخدها في حضنه وضمها بقوة وحماية وبدأ يشعر بالخوف عليها بسبب براءتها وطيبتها الزيادة وقرر إنه يصارحها بكل حاجة بتحصل ويعرفها حقيقة جدته وكل اللي حواليهم..