رواية مهرة في عرين القحطاني الفصل السابع والثلاثون37 بقلم اماني سيد

رواية مهرة في عرين القحطاني بقلم اماني سيد 
رواية مهرة في عرين القحطاني الفصل السابع والثلاثون37 بقلم اماني سيد
بعد انتهاء الاجتماع ومغادرة التجار، ظل صفوان جالسًا في المجلس إلى جوار والده، يسترجع ما دار بينهم. كان جاسر يراقب شروده، ثم قال مبتسمًا:
- إيه يا صفوان؟ فكرت في كلام التجار ؟ 
تنهد صفوان وهو يستند إلى ظهر المقعد:
- بصراحة يا بابا، أنا ما كنتش متوقع إنهم يطلبوا مني حاجة زي دي. كنت فاكر إن الاجتماع بخصوص مشاكل تخص الشغل أو طلبات من التجار، لكن موضوع الترشح ده ما جاش في بالي خالص.
- وليه مستغرب؟ إنت ليك اسمك ومكانتك في البلد، والناس شايفة إنك تقدر تمثلهم.
- أنا مش معترض على خدمة البلد، لكن المسؤولية كبيرة، ومش عارف هقدر أوفق بينها وبين شغلي إزاي. أنا أغلب وقتي في القاهرة، والشركة هناك، وعندي التزامات واجتماعات ومتابعة يومية.
نهض جاسر من مكانه وقال:
- تعال نكمل كلامنا في الجنينة.
خرج الاثنان إلى الحديقة، وجلسا في المكان المعتاد، ثم قال جاسر وهو يتناول فنجان قهوته:
- يا صفوان، إنت مركز حياتك كلها في القاهرة، مع إن عندك هنا مصالح ومشروعات أكبر مما تتخيل. عندك المزارع والمصانع، وعندك ناس شغالة معاك  وعندك بلد كاملة محتاجة وجودك.
- بس يا بابا أنا مش غايب عنهم، إنت عارف إني بتابع كل حاجة، وبكلم التجار والناس باستمرار، وأي مشكلة بتوصلى بحاول أحلها.
- وأنا ما أنكرتش ده، لكن فيه فرق بين إنك تتابع من بعيد وبين إنك تكون موجود بنفسك. وبعدين ما تنساش أصلك، البلد هنا هي الوتد والأصل، ومهما كبرت أعمالك في القاهرة، لازم تفضل فاكر إن جذورك هنا.
صمت قليلًا، ثم أكمل:
- القاهرة فيها الشركة، وممكن تروح لها مرة في الأسبوع تتابع الشغل والقرارات المهمة، إنما وجودك هنا هيكون أفضل، خصوصًا إن عندك مصانع ومزارع محتاجة تتوسع وتتطور. مش لازم تفضل محصور في الاداره وممكن تتابعها من هنا زى مابتعمل ، ممكن تفكر في مشروعات جديدة وتستغل الإمكانيات اللي عندك.
قال صفوان مترددًا:
- أنا فاهم كلامك، بس الترشح نفسه مسؤولية، ومش عايز أكون مجرد اسم الناس انتخبته وبعد كده ما تلاقينيش موجود.
- وده بالضبط اللي لازم تفكر فيه. الناس هي اللي طلبتك، مش إنت اللي رحت تعرض نفسك عليهم. هما شايفين إنك تقدر تعمل حاجة، ودي ثقة مش قليلة.

في تلك اللحظة، خرجت مهرة إلى الحديقة، وما إن رأتهما حتى اقتربت منهما وجلست بجوار صفوان.
- بتتكلموا في إيه؟
ابتسم جاسر:
- في موضوع ترشح صفوان لمجلس النواب، لسه بحاول أقنعه يفكر فيه كويس.
التفتت مهرة إلى صفوان:
- ايه موضوع الترشح ده انت ناوى تترشح ؟
ابتسم لها:
ـ أهل البلد جم وطلبوا منى الترشح وبابا بيقولى البلد افضل 
تحدث مهره بمداعبه
ـ ايه ده يعنى انا هبقى مرات النائب 
ضحك صفوان على حماسها 
ـ اه هتمشى فى البلد يقولوا مرات النائب راحت مرات النائب جت 
ـ منا لسه مقررتش لسه بفكر 
ـ وايه اللى يمنعك 
- عندي شوية حسابات محتاج أراجعها.
- زي إيه؟
- زي إن شغلي كله في القاهرة، ومش عارف هقدر أكون موجود هنا وأتابع كل حاجة في نفس الوقت ولا لأ.
أومأت مهرة بتفهم، ثم قالت:
- بس يمكن وجودك هنا يكون فرصة أكبر ليك من وجودك في القاهرة.
نظر إليها باهتمام، فأكملت:
- الناس لسه عندها فكرة إن الصعيد متأخر، وإن مفيش فيه فرص ولا إمكانيات، لكن ده مش حقيقي دلوقتي. أغلب شباب البلد بقوا متعلمين، وفيه خريجين جامعات كتير، وناس عندها طموح وعايزة تشتغل وتثبت نفسها، لكن محتاجين فرص حقيقية.
قال صفوان:
- وده اللي بنحاول نوفره من خلال شركاتنا.
- ودي بداية كويسة، لكن تخيل لو وجودك هنا خلاك توسع أكتر. عندك مصانع قائمة، وممكن تزود خطوط الإنتاج، أو تعمل خط إنتاج تاني، وتستفيد من العمالة الموجودة هنا. بدل ما تفضل كل استثماراتك مركزة في القاهرة، ممكن تخلي البلد مركز مهم من مراكز شغلك.
ابتسم جاسر مؤيدًا:
- أهو ده اللي بقوله له.
تابعت مهرة:
- وبعدين إنت في القاهرة رجل أعمال وسط رجال أعمال كتير، لكن هنا وضعك مختلف. الناس عارفاك، وعارفة عيلتك وشغلك، ووجودك بينهم هيكون له تأثير أكبر. مش بس لأنك ممكن تبقى نائب عنهم، لكن لأنك تقدر تساعد في تطوير البلد وتوفير فرص للشباب اللي مش عايزين يسيبوا أهلهم ويسافروا عشان يلاقوا شغل.
نظر إليها صفوان مبتسمًا:
- واضح إنك عايزه تعيشى هنا فبتحاولى تقنعينى بس كلامك مقنع صراحه 😂
ضحكت مهرة:
- أنا بس بقولك اللي شايفاه. إنت عندك إمكانيات كبيرة، وممكن تستفيد منها أكتر لو بقيت موجود هنا. والقاهرة مش هتطير، الشركة تقدر تتابعها، لكن الفرص اللي قدامك هنا محتاجة منك اهتمام.
ظل صفوان صامتًا، يتأمل حديثها. لم يكن قد فكر في الأمر بهذه الطريقة من قبل؛ ففي القاهرة هو رجل أعمال ناجح، لكنه واحد من أسماء كثيرة في عالم المال والأعمال، أما في بلدته فله مكانة مختلفة، وتأثيره قد يمتد إلى حياة الناس ومشروعاتهم، فضلًا عن أن وجوده بالقرب من مصانعه ومزارعه قد يفتح أمامه أبوابًا جديدة للتوسع.
قال جاسر:
- فكر يا ابني، وماتستعجلش في الرد. إحنا مش بنقولك وافق وخلاص، لكن متضيعش فرصة زي دي لمجرد إنك متعود على حياتك في القاهرة.
أومأ صفوان ببطء:
- أنا فعلًا محتاج أعيد حساباتي. يمكن الموضوع يكون أكبر من مجرد مقعد في مجلس النواب، ويمكن وجودي هنا يفتح قدامي فرص أنا ما فكرتش فيها قبل كده.
ابتسم جاسر برضا، بينما تبادلت مهرة وصفوان نظرة قصيرة، ثم عادت تتحدث معه عن أفكاره لتطوير المصانع، وكأنها تحاول أن تجعله يرى المستقبل الذي يمكن أن يبنيه في بلدته بصورة أوضح.

وللمرة الأولى، لم يعد صفوان يفكر في الترشح باعتباره مسؤولية إضافية ستنتزع منه وقته، بل بدأ يراه فرصة لتغيير شكل حياته وأعماله معًا.

فى مكان تانى تقريبا نسيناه يزيد وشهيره 

بعد ما أخد يزيد رقم شهيرة من صفوان، فضل ماسك الموبايل فترة طويلة، متردد يتصل بيها ولا لأ. كان عارف إن مجرد سماع صوته مش هيكون كفاية عشان تنسى كل اللي حصل، وإنه مش من حقه يطلب منها ترجع له لمجرد إنه أخيرًا فهم قيمتها.
كتب رقمها، ومسحه، ورجع كتبه تاني، لحد ما أخد نفسًا عميقًا وضغط على زر الاتصال.
رن الهاتف عدة مرات قبل أن يأتيه صوتها:
- ألو؟
اتجمد مكانه للحظة، وكأن كل الكلام اللي جهزه اختفى بمجرد ما سمع صوتها.
- شهيرة... أنا يزيد.
ساد الصمت للحظات، ثم جاء صوتها هادئًا لكنه متحفظ:
- عرفت رقم تليفوني منين؟
- من صفوان. أنا عارف إنك ممكن تكوني مش عايزة تسمعي صوتي، وعارف إن آخر واحد المفروض يتصل بيكي هو أنا، بس محتاج أتكلم معاكي.
- في إيه يا يزيد؟ إحنا خلاص كل واحد في طريق.
- أنا مش عايز أفضل في الطريق ده من غيرك.
تنهدت شهيرة وقالت ببرود حاولت أن تتمسك به:
- الكلام ده كان المفروض تقوله من زمان، مش بعد ما كل حاجة باظت.

- عندك حق، وأنا مش هجادلك في حاجة. أنا غلطت في حقك كتير، وظلمتك، وبدل ما أحافظ عليكي كنت كل مرة أديكي سبب جديد يخليكي تبعدي عني. بس أنا اتغيرت، أو يمكن أخيرًا بدأت أشوف نفسي على حقيقتها، وشوفت قد إيه كنت أناني.
لم تجبه، فاستكمل بصوت أكثر صدقًا:
- أنا مش بتصل عشان أطلب منك تسامحيني في التليفون، أنا عايز أشوفك. عايز أقولك كل اللي جوايا وأنا باصص في عينيكي، ولو بعد المقابلة دي قررتي إنك مش عايزة تشوفيني تاني، مش هضغط عليكي.
ترددت شهيرة قليلًا قبل أن تجيبه:
- ممكن نتقابل، بس في مكان عام، ومش عايزاك تفهم موافقتي غلط.
- موافقتك دي عندي بالدنيا كلها.
اتفقا على موعد في اليوم التالي، ومنذ أن أغلق الهاتف لم يستطع يزيد النوم. ظل يفكر فيما سيقوله لها، وكيف سيجعلها تصدق أن هذه المرة مختلفة، وأنه لم يعد ذلك الرجل الذي يظن أن وجودها في حياته أمر مضمون.
وصل يزيد إلى المكان قبل الموعد بنصف ساعة، واختار طاولة هادئة تطل على الحديقة الخارجية. كان يرتدي قميصًا أنيقًا وساعة بسيطة، لكنه لم يكن منشغلًا بمظهره بقدر انشغاله باللحظة التي ستدخل فيها شهيرة من الباب.
وحين لمحها أخيرًا، نهض من مكانه دون أن يشعر.
كانت ترتدي فستانًا هادئًا وحجابًا بلون يناسبه، وبدت جميلة كما اعتاد أن يراها، لكن شيئًا في ملامحها كان مختلفًا؛ لم تعد تنظر إليه بتلك اللهفة القديمة، ولم تعد تبتسم لمجرد رؤيته.
اقتربت منه وقالت:
- السلام عليكم.
- وعليكم السلام... اتفضلي.
سحب لها المقعد، وجلست، ثم جلس أمامها وهو يحاول أن يخفي ارتباكه.
بدأت هي الحديث:
- خير يا يزيد؟ أنا جيت عشان أسمعك، فقول اللي عندك.
ابتسم ابتسامة خفيفة وقال:
- حتى طريقتك في الكلام وحشتني.
- بلاش تبدأ بالطريقة دي، أنا مش جاية أسمع كلام حلو.
اختفت ابتسامته، وأومأ متفهمًا.
- حاضر. أنا عايز أبدأ باعتذار، بس مش اعتذار وخلاص. أنا عارف إني كسرت حاجات جواكي، وعارف إنك استحملتي مني كتير، وكل مرة كنتِ بتديني فرصة كنت بتعامل معاها كأنها حق مكتسب ليا. كنت فاكر إنك هتفضلي موجودة مهما عملت، وإنك هتسامحيني في الآخر، لحد ما خسرتك فعلًا.
نظرت إليه شهيرة طويلًا، ثم قالت:
- إنت عارف أكتر حاجة وجعتني إيه؟ مش بس إنك غلطت، لكن إنك كنت شايف إن مشاعري مضمونة، وإن مهما زعلت هفضل مستنياك تراضيني. كنت بحس إني بطلب منك حاجات المفروض تيجي منك لوحدك.
مد يده فوق الطاولة، ثم توقف قبل أن يلمس يدها، وكأنه يستأذنها حتى في أبسط حركة.
- وأنا مش هقولك إن عندي مبررات، لأن مفيش مبرر يخليني أوجعك. بس عايزك تعرفي إني بحبك يا شهيرة. بحبك، ويمكن طول الوقت كنت بهرب من الاعتراف ده، أو مش فاهم إن اللي بينا أكبر من مجرد وجود واحدة جنبي. أنا لما بعدتي، اكتشفت إن كل حاجة كنت بعملها من غيرك ناقصة.
ابتلعت شهيرة غصتها، وحاولت أن تبدو ثابتة.
- وليه دلوقتي؟ إيه اللي اتغير؟
- أنا اللي اتغيرت. بقيت أخاف أخسرك، مش أخاف من زعلك. بقيت أفكر في إحساسك قبل ما أتصرف، وبقيت فاهم إن الحب مش إن الواحد يطلب من اللي قدامه يستحمله، الحب إنه يكون أمان ليه.
ثم أخرج من جيبه علبة صغيرة ووضعها أمامها.
نظرت إليها باستغراب، فقال:
- مش هطلب منك تقبليها، افتحيها بس.
فتحتها لتجد بداخلها سلسلة ذهبية رقيقة تتدلى منها قطعة صغيرة على شكل قلب، وعلى ظهرها نقش اسمها.
رفعت عينيها إليه، فابتسم بحنان وقال:
- فاكرة أول مرة خرجنا فيها سوا؟ كنتِ واقفة قدام محل إكسسوارات وفضلتي تتفرجي على سلسلة شبه دي، وبعدها قلتي إنها حلوة بس مش ضرورية. أنا فاكر اليوم ده بكل تفاصيله، وافتكرت إنك تستاهلي حاجة كنتِ نفسك فيها حتى لو كانت بسيطة.
لم تستطع شهيرة منع ابتسامة صغيرة من الظهور على وجهها، لكنها أخفتها سريعًا.
- لسه فاكر؟
- فاكر حاجات كتير يا شهيرة. فاكر ضحكتك لما كنتِ بتكسبي أي نقاش معايا، وفاكر إنك كنتِ بتزعلي لما أتأخر في الرد، وفاكر إنك كنتِ بتعمليلي قهوتي بالطريقة اللي بحبها حتى وإنتِ زعلانة مني. فاكر كل حاجة، بس للأسف ما كنتش بقدّرها وقتها.
ظل ينظر إليها بحب، ثم قال:
- أنا مش عايزك ترجعي عشان تفتكري الأيام الحلوة، أنا عايز فرصة أعمل معاكي أيام أحلى منها. عايز أكون الراجل اللي تطمني وإنتِ معاه، مش الراجل اللي تخافي من تصرفاته.
انخفض بصر شهيرة إلى السلسلة، ومررت أصابعها على القلب الصغير.
- أنا كنت بحبك أوي يا يزيد، وكنت بتمنى منك حاجات بسيطة، اهتمام، كلمة حلوة، إحساس إني مهمة عندك. لكنك خليتني أحس إني بطلب كتير.
- وأنا عايز أعوضك عن كل مرة حسيتك فيها كده.
- مش كل حاجة بتتعوض بالكلام.
- عارف، وعشان كده مش هطلب منك تصدقيني النهارده. اديني فرصة أثبتلك، يوم ورا يوم، إن كلامي حقيقي.
ساد بينهما صمت قصير، قبل أن تسأله شهيرة بصوت خافت:
- وإنت متأكد إنك عايزني أنا؟ مش مجرد إنك وحيد أو ندمت بعد ما خسرتني؟
مال قليلًا إلى الأمام، وأجابها دون تردد:
- أنا عايزك إنتِ. عايز أصحى ألاقيكي جنبي، وأرجع من شغلي ألاقيكي مستنياني، وأحكيلك تفاصيل يومي حتى لو كانت مملة. عايز أشاركك حياتي، مش أضيفك على حياتي وقت ما أكون فاضي. أنا بحبك يا شهيرة، وعايز أتجوزك قدام الناس كلها، وأصلح الغلط اللي عملته لما خليت علاقتنا بالشكل اللي ما يرضيكيش.
رفعت عينيها إليه، وقد بدأت دموعها تتجمع فيهما.
مد يده هذه المرة، فوضعت يدها في يده بتردد. احتضن أصابعها برفق، وكأنه يخشى أن تفلت منه.
- وحشتيني... وحشتيني لدرجة إني بقيت أشوفك في كل حاجة حواليا. حنى صفوان رحتله واتحايلت عليه عشان يدينى رقمك وحتى لما خدت الرقم  مكنتش  عارف أتصل، خايف ترفضي تسمعيني، وخايف أسمع في صوتك إنك خلاص مبقتيش عايزاني.
نزلت دمعة من عينها، فمد يده الأخرى ومسحها بإبهامه.
- متعيطيش يا حبيبتي.
ابتسمت وسط دموعها وقالت:
- ما تقولش حبيبتي بسهولة كده، أنا لسه زعلانة منك.
ضحك بخفة، ثم قبّل أطراف أصابعها قبلة رقيقة وقال:
- من حقك تفضلي زعلانة، وأنا مستعد أفضل أراضيكي لحد ما تنسي زعلك، بس أوعي تحرميني من إني أحاول.
نظرت إليه طويلًا، ثم قالت:
- أنا مش هقدر أرجع أثق فيك مرة واحدة يا يزيد.
- مش طالب منك كده. أنا هبدأ معاكي من الأول، وهخليكي تشوفي بعينك إن المرة دي أنا جاد.
سحب العلبة نحوها وقال:
- خليها معاكي، مش هلبسهالك غير لما تسمحيلي.
أغلقت شهيرة العلبة واحتفظت بها في حقيبتها، ثم قالت بابتسامة خجولة:
- شكرًا.
كانت كلمة صغيرة، لكنها بالنسبة إليه بدت كأنها باب فُتح بعد انتظار طويل.
لم تنتهِ المقابلة عند هذا الحد. ظل يزيد يتحدث معها، يستمع إلى عتابها دون أن يقاطعها أو يحاول الدفاع عن نفسه، وحين انتهيا أصر أن يوصلها إلى منزلها، فوافقت بشرط أن يلتزم بحدودها.
وقبل أن تترجل من السيارة، التفتت إليه وقالت:
- أنا هديك فرصة يا يزيد، بس مش عايزة أندم إني عملت كده.
نظر إليها بامتنان، وقال:
- أوعدك إني مش هخليكي تندمي. وأنا مش عايز فرصة أرجع بيها للي فات، أنا عايز فرصة نبدأ بيها من جديد.
ابتسمت، ثم نزلت وأغلقت الباب.
ظل يتابعها بعينيه حتى دخلت، وبعدها أطلق زفرة طويلة، 
فى بيت زيدان 
كان عتمان جالسًا في شقة شاهندة، يتناول فنجان القهوة وقرر ان يتصل بها ليخبرها انه اشترى بيت جديده 
ـ الو
ـ ازيك يا شاهنده 
ـ الحمد لله يا بابا انت عامل ايه
- الحمد لله انا حبيت اعرفك ان انا خلاص اشتريت بيت تاني.
- بيت تاني؟ فين يا بابا؟
ـ  في منطقة كويسة، وهننقل فيه أنا ووالدتك وعز خلال كام يوم. أنا مش حابب أفضل قاعد عندك أكتر من كده، وكفاية إننا تعبناكي معانا.
- البيت ده ليكم يا بابا، وإنتوا مش ضيوف عندي.
- عارف يا بنتي، بس برضه الواحد لازم يكون له بيته واستقلاله، واخوكى مش مرتاح  وبعدين أنا مش هفضل معتمد على حد طول عمري.
هزت شاهندة رأسها بابتسامة بسيطة، ثم سألته عن تفاصيل البيت، فبدأ يحكي لها عن موقعه ومساحته وما ينقصه من تجهيزات، قبل أن يتوقف فجأة وينظر إليها باهتمام.
- بس قوليلي بقى، أخبار زيدان إيه؟
تغيرت ملامحها قليلًا، لكنها حاولت ألا يظهر عليها ذلك.
- يزيد؟ الحمد لله، كويس.
- كويس إزاي؟ أقصد أخباره في الشركة. رجع يمسك شغله؟ ووالده ناوي يسلمه الإدارة ولا لسه؟
- والله يا بابا مش عارفة، هو مشغول الفترة دي.
- مشغول بإيه؟ مش المفروض إنك عارفة أخباره؟
- يا بابا، أنا مش بتدخل في شغله، وبعدين زيدان كمان مش بيحكيلي تفاصيل الشركة زي الأول.
- طب ما تسأليه! إنتِ عايشة معاه في بيت واحد، ولا بقيتوا غرب عن بعض؟
- مش حكاية كده، بس زيدان مش بيحب يتكلم في الشغل في البيت.
ظل عتمان يستمع  إليها والشك بدا يتسلل داخله، ثم قال:
- إنتِ بتوهيني في الكلام ليه؟ أنا سألتك سؤال واضح، وإنتِ كل مرة تردي عليا بكلمتين مالهمش معنى. فيه حاجة إنتِ مخبياها عني يا شاهندة؟

ارتبكت، ثم قالت بصوت حاولت أن تجعله هادئًا:
- يا بابا، لو سمحت، أنا وقفت جنبك كتير، وعملت حاجات كتير عشانك، بس زيدان عرف كل حاجة، وأنا مش عايزة أخسره.
وسكتت لحظة قبل أن تستكمل:
- أنا تعبت من المشاكل، ومش عايزة أرجع لنفس الدوامة تاني. زيدان اداني فرصة، وأنا مش مستعدة أضيّعها بإيدي.
اشتعل غضب عتمان، واعتدل في جلسته صارخًا:
- يعني إيه؟ إنتِ بتقوليلي إيه؟ خلاص بقيتي بتبيعيني؟ بعد كل اللي عملته عشانك، بقيتي تختاري جوزك عليا؟
- يا بابا، أنا مش باختار حد على حد، بس...
- بس إيه؟! يعني أول ما زيدان عرف حقيقتك، قررتي تتخلي عن أبوكي وتنسي كل حاجة عملتها عشانك؟!
حاولت شاهندة أن ترد، لكن دموعها سبقتها، فظلت صامتة وهي تستمع إلى صوته الغاضب.
- أنا مش مصدق إنك بتعملي فيا كده يا شاهندة! كنت فاكر إنك بنتي وسندي، لكن واضح إنك بقيتي مشغولة بنفسك وبجوازك وبس!
لم تجبه، واكتفت بالبكاء بصمت، حتى أنهى عتمان المكالمة في وجهها، تاركًا إياها جالسة في مكانها، تنظر إلى الهاتف بعينين دامعتين، وتشعر أن حتى محاولتها لحماية بيتها وزواجها أصبحت تهمة يحاسبها عليها والدها.

ظل عتمان جالسًا في مكانه بعد أن أنهى المكالمة مع شاهندة، والغضب يزداد داخله كلما تذكر كلماتها. لم يكن يتوقع أن تصل الأمور إلى هذا الحد، وأن تصبح ابنته التي اعتمد عليها في نقل أخبار زيدان ومتابعة تحركاته، أول من يرفض مساعدته.
أخرج هاتفه مرة أخرى، وبحث عن رقم عز، وما إن أجابه ابنه حتى بدأ يتحدث بنبرة ممتلئة بالضيق:
- إنت فين يا عز؟
- في الورشة يا بابا، في حاجة؟
- أيوه، أختك! قررت انها  بتتخلى عن أبوها!
تنهد عز وهو يعرف أن والده سيتحدث عن شاهندة، ثم قال بهدوء:
- مالها شاهندة؟ حصل إيه؟
- بتقولي مش عايزة تدخل في أي حاجة تخصني، وإن زيدان عرف كل حاجة ومش عايزة تخسره! يعني إيه مش عايزة تخسره؟ وأنا أعمل إيه؟ أنسى أنا أبوها؟ أنسى إني عملت كل ده عشانها؟

- يا بابا، سيب شاهندة في حياتها. البنت بتحب زيدان وخايفة تخسره، وهي كفاية عليها المشاكل اللي حصلت بينها وبينه. مش لازم تفضل تحطها في النص بينك وبينه.
- إنت كمان هتدافع عنها؟!
- أنا مش بدافع عنها، أنا بقولك إن كل واحد لازم يشيل نتيجة اختياراته. شاهندة اختارت جوزها وعايزة تحافظ على بيتها، وده حقها. وإنت المفروض تكون أول واحد عايزها مستقرة ومبسوطة.
زفر عتمان بضيق، ثم قال:
- طب وإنت؟ هتفضل بعيد عني لحد إمتى؟ إنت ابني، ومكانك الطبيعي معايا، مش في الورشة اللي قاعد فيها دي. ارجع عيش معايا، وتعالى نمسك الشغل سوا، وأنا هعرفك كل حاجة في الإدارة، ونبدأ صفحة جديدة ..
ضحك عز ضحكة قصيرة، لم تكن سخرية بقدر ما كانت استغرابًا من إصرار والده على نفس الفكرة.
- يا بابا، إحنا اتكلمنا في الموضوع ده قبل كده. أنا مش عايز أشتغل في الشركة، وأنا مبسوط بشغلي هنا.
- شغلك إيه يا عز؟! إنت مهندس، وداخل على التخرج، وفي الآخر عايز تفضل ميكانيكي؟ عايزني أشغلك إيه؟ تنزل تحت العربيات تصلحها؟ دي آخرتها؟ ولا تشتغل بياع في محل قطع غيار؟ هو أنا تعبت وربيتك وعلمتك عشان تبقى كده؟
تغيرت نبرة عز، لكنه حافظ على هدوئه:
- أنا مش شايف شغلي عيب يا بابا، ولا شايف إن اللي بينزل يشتغل بإيده أقل من اللي قاعد على مكتب. أنا مبسوط بشغلي، وبيكسبني فلوس كويسة، وكل يوم بتعلم حاجة جديدة. وبعدين أنا مش ناوي أفضل في نفس المكان طول عمري.
- أمال ناوي على إيه؟
- أنا شايف إن الورشة دي بداية مشروع كبير. مش هدفي أفضل عندي ورشة صغيرة ومحل قطع غيار وخلاص. أنا عايز أكبر الشغل، وأدخل معدات أحدث، وأوسع النشاط، وأعمل اسم في المجال. عندي أفكار كتير، وبشتغل على تنفيذها واحدة واحدة.
سكت عتمان قليلًا، ثم قال بحدة:
- يعني قررت خلاص؟ هتضيع مستقبلك بإيدك ومش هتسمع كلامي؟
- مستقبلي أنا اللي هبنيه يا بابا، وأنا مش بضيع وقتي. وبعدين أنا كمان قررت أستقر هنا، مش هرجع أعيش معاك.
- إيه؟!
- أيوه، البيت اللي فوق الورشة والمحل هخليه سكن ليا. ولما ربنا يكرمني وألاقي بنت الحلال هتجوز في نفس البيت، وهعيش حياتي هنا. مش عايز أفضل متنقل من مكان لمكان، ولا مستني حد يقررلي أنا أعيش فين وأشتغل إيه.
ارتفع صوت عتمان:
- يعني إنت كمان هتستقل عني؟ هو أنا عملت إيه لكل ده؟ بنتي مش عايزة تسمع كلامي، وابني مش عايز يعيش معايا! إنتوا عايزين تسيبوني لوحدي يعني؟

- يا بابا، محدش قال إننا هنسيبك. أنا هاجيلكم كل أسبوع، وهقعد معاكم، ولو احتجتوا أي حاجة هتلاقوني. بس أنا عايز يكون ليا بيتي وشغلي وحياتي الخاصة. مش معنى إني بعيد عنك إني مش ابنك.
- كل أسبوع؟! يعني هتبقى غريب عن أبوك وتيجي تزوره كل أسبوع؟!
- مش غريب يا بابا، بس دي حياتي، وأنا عايز أعيشها بالطريقة اللي تناسبني.
لم يعد عتمان قادرًا على احتمال المزيد، فصاح فيه:

- واضح إنكم كلكم اتفقتوا عليا! كل واحد فيكم عايز يبعد عني وياخد اللي هو عايزه، وأنا أفضل لوحدي!
- محدش اتفق عليك يا بابا، بس إنت لازم تفهم إن مش كل حاجة هتمشي زي ما إنت عايز.
- خلاص يا عز، مش عايز أسمع منك حاجة تاني!
وأغلق الهاتف في وجهه، ثم ألقى به فوق الأريكة بعصبية.
ظل جالسًا يحدق أمامه، يشعر أن كل الأبواب التي كان يظنها مفتوحة أمامه بدأت تُغلق واحدًا تلو الآخر. شاهندة لم تعد تنقل له أخبار زيدان، وعز يرفض العودة إليه، 
مرر يده على وجهه، ثم تمتم بغضب:
- حتى عيالي بقوا ضدي... هو أنا عملت إيه عشان كلكم تتخلوا عني؟! 😂😂😂 انت ملاك ماعملتش حاجه 😂
لكنه، رغم شعوره بالوحدة، لم يفكر للحظة أن ما يحدث معه ربما يكون نتيجة طبيعية لكل ما فعله بالآخرين، وأنه لم يعد يملك السيطرة على حياة أبنائه كما كان يتصور.
تعليقات



<>