رواية عالم تاني الفصل الرابع4بقلم هبة محمد
مفرش ساقع تلج تحت ضهري، ريحة بخور تقيل أول مرة أشمه، زي ريحة الخشب لما يتحرق معاه ورد، ودانّي بتصفّر من السكوت.. سكوت غريب أوي، مفيهوش صوت عربيات ولا صوت ماما في المطبخ، مفيهوش أي حاجة أعرفها.
فتحت عيني بالعافية، النور اللي سحبني لسه بيوجع عيني، شوية بشوية بدأت أشوف..
سقف.. عالي أوي، عالي لدرجة إني مش شايفة آخره، متعلق فيه نجف كبير منور بنور أصفر هادي، وحيطان لونها بيچ فاتح، ستاير بيضا طويلة بتطير من هوا جاي من شباك كبير مفتوح.
أنا فين؟
حاولت أقوم، جسمي كله كان مكسر كأني واقعة من الدور الخامس، بصيت على هدومي، نفس الدرس الواسع اللي بابا خلاني ألبسه الصبح.. يعني أنا لسه أنا.
- مدام هنا أخيراً صحيتِ.
اتنفضت من الصوت، كان صوت ست.. لفيت وشي بسرعة ناحية الصوت.
كانت ست كبيرة ملامحها أجنبية، كانت بتبصلي بحنيه أستغربت منها قلت بخضه:
_ مين حضرتك؟ وأنا فين؟
قامت قربت مني ومسكت إيدي، إيديها كانت دافية.
- اهدي يا حبيبتي اهدي، انتي في بيتك، متخافيش.
بيتي؟ أنا بيتي فيه سرير دورين ومروحة بتعمل صوت، مش سرير كبير كده وقصر!
_ بيت مين؟ أنا عايزة أروح، أنا كنت في المكتبة و..
سكتت مرة واحدة، افتكرت الكتاب والثقب الأسود والنور، هو أنا اتجننت بجد ولا ده حلم؟
- عارفة انك تايهة، الدكتور قال هتفضلي تايهة شوية من الوقعة، بس الحمدلله انك بخير يا هنا.
اتصدمت لما قالت اسمي.
_ انتي عرفتي اسمي منين؟!
ابتسمت كده ابتسامة غريبة وقالت:
-هو فيه أم متعرفش اسم بنتها اللي مربياها؟
_أم؟!
قبل ما أرد، باب الأوضة اتفتح ودخل راجل طويل وعريض، لابس بدلة رسمية سودا ملامحه جامدة وفيها حده، بس أول ما شافني وشه نور.
- هنا! حمدلله على السلامة يا بنتي، قلقتينا عليكِ.
بصيت ليه بصدمة ده بابا، ايوة ده وش بابا وشكله، بس ده مش لبس بابا ولا ملامحه، ملامح بابا فيها حنيه مشفتش زيها قبل كده، ولكني قلت بتهته:
_ أنا.. أنا معرفكوش، انتو مين بجد؟ انتو خطفتوني؟
الراجل بص للست بقلق وقال:
- شكلها لسه مش فاكرة حاجة من الوقعة بتاعت الحصان يا نانا روحي كلمي الدكتور!؟
حصان؟ حصان ايه أنا بخاف من الأحصنة أصلاً.
الست قعدت جنبي تاني وقالت بحنية:
- احنا أهلك يا هنا يا حبيبتي، أنا فاطمة المُربية بتعتك وده والدك البيه حسن وولدتك الست هانم ناهد أنتِ مش فكرانا ولا إيه.
دماغي لفت أكتر من اللخبطة دي أي اللي حصل ده بابا نفس شكله ونفس اسمه بس الهيئة مختلفه والاسلوب مختلف وماما نفس الأسم ياترى هتكون نفس الشكل كمان ولا مختلفه؟
حاولت أقوم من السرير وأنا بقول بصوت عالي وبدأت أعيط من الخوف:
_ لأ انتو مش أهلي! أنا عايزة ماما! عايزة أروح لبيتنا! انتو مين وجبتوني هنا ازاي؟!
الراجل قرب وقال بزعيق بس مش ليا، كأنه بينده على حد برة:
- يا يوسف! تعال شوف أختك!
يوسف؟
دخل ولد شكله في سني تقريباً، طويل وشعره أسود وعينيه سمرا، أول ما شفته حسيت بقلبي اتقبض، معرفش ليه، بس شكله مش غريب عليا.. شبه الواد اللي خبطت فيه في المكتبة!
أول ما شافني بعيط، وقف مكانه ثابت ومتحركش.
-أنت لسه واقف عندك بتعمل ايه، اجري شوف اختك مالها ولا نادي الدكتور ولا اعمل اي حاجة؟!
متحركش من مكانه ولا كأنه سامع حاجة.
-لي كده يا ربي محدش من ولادي عدل، اوعى كده من وشي.
- هنا مالك؟ بتعيطي ليه؟ حد زعلك؟ احنا معاكِ هنا يا حبيبتي متخافيش.
سبت كل الموجودين وقلت بصوت كله خوف:
_ انت.. انت اللي خبطت فيك في المكتبة؟ صح؟ انت اللي عملت فيا كده؟ رجعني، انا عايزة أرجع بيتي!
بصلي باستغراب وقال وكأنه خرج من صدمته أخيراً:
- مكتبة ايه؟ انتي وقعتي من على الفرس الصبح واحنا في الاسطبل، ومن ساعتها وانتي نايمة.
فرس واسطبل؟ هو بيتكلم عن ايه؟
مسكت دماغي من كتر اللخبطة، كل كلمة بيقولوها بتخليني أتوه أكتر، أنا في مكان غريب وناس غريبة بتقول انها أهلي، وولد شكله يعرفني وأنا أول مرة أشوفه، والكتاب اللي وقعني هنا مش لاقياه.
- سيبوها ترتاح دلوقتي، شكلها تعبانة.
الست اللي اسمها فاطمة قالت كده وخرجوا كلهم وسابوني لوحدي في الأوضة الكبيرة.
قمت جريت على الشباك، فتحته وبصيت، اللي شفته خلاني شهقت..
مفيش عماير، مفيش عربيات، مفيش شارعنا، فيه جنينة كبيرة أوي كلها زرع أخضر ونخل، وشمس لونها برتقالي كأنها بتغرب، وصوت آذان بعيد بس مش زي اللي متعودة عليه..
أنا بجد في عالم تاني.
قعدت على الأرض جنب الشباك وضمّيت ركبي لصدري وهمست لنفسي:
_ يا ماما.. يا سهى.. انتو فين؟ أنا عايزة أروح..ط
قمت أدور على الكتاب زي المجنونة يمكن ألقيه وأرجع تاني لمكاني وبيتي ولكني قلبت الأوضة وملقتش حاجة قعدت على طرف السرير وأنا بعيط بقهر وخوف وفزع من اللي انا فيه.
سمعت صوت الباب بيتفتح تاني بالراحة، كان يوسف داخل ومعاه كوباية مية.
- اشربي.
خدتها منه وأنا إيدي بتترعش.
_ هو.. هو احنا في سنة كام؟
سألته السؤال ده وأنا خايفة من الإجابة.
بصلي كأني مجنونة وقال:
- احنا في 2026، مالك يا هنا؟ انتي سخنة ولا ايه؟
الكوباية وقعت من إيدي اتكسرت مية حتة.
_ في أيه، يعني ايه 2026،احنا في نفس الوقت والتاريخ اهو امال ايه اللي حصل، ولي كل حاجة أتغيرت كده ؟!
-مالك يا هنا، في ايه لكل ده، الواقعه مكنتش جامدة للدرجة دي أنتِ مالك، لو حاسة بحاجة وجعاكِ قولي ونروح للدكتور.
بصيت ليه بأمل يمكن يصدقني، او يقول حاجة تقولي ان كل ده حلم او بيتهيألي.
-أنتِ شفتني انهاردة الصبح في المكتبة انا البنت اللي لسه خابطه فيك في المكتبة من شويه والكتب وقعت من ايدي، صح أنت فاكرني.
_ لأ أنتِ اكيد في حاجة حصلت في دماغك، أنتِ مش طبيعية خالص إنهاردة.
-ده مش بيتي ولا أنت اخويا أنا أخواتي لسه صغيرين ودول مش أهلى، أنا اهلى مختلفين عن كده.
_لأ أنا هروح انده لماما عشان أنتِ مخك ضرب على الأخر، الخمرة لحست دماغك.
سابني ومشي وكأني مجنونة، أنا فعلاً اتجننت لأن كل اللي بيحصل ده مش طبيعي ولا فيه اي حاجة دلوقتي طبيعية.
سمعت صوته وهوا بينده من بعيد وبيقول "يا ماما تعالي شوفي هنا شكلها اتجننت على الآخر".
فضلت قاعدة مكاني مستنية حد ياجي محدش جه قمت من مكاني وروحت للشباك اخدني المنظر اللي برة للمرة التانية المكان تحفة بمعنى الكلمة زي البيوت اللي بشوفها في المسلسلات والافلام بالظبط، حتى بيوت الأغنياء عندنا موصلتش لدرجة الجمال دي أبداً، وفجأة جه في دماغي صحبتي سُهى.
_انا لازم أكلم سُهى ضروري تاجي تخدني من المكان الغريب ده.
فضلت ادور على الموبيل ملقتوش فقلت بعصبية لاخر امل في أيدي إني أرجع من هنا، أنت في بقى يارب خرجني من هنا يارب.
قلت بأمل وانا بكرر دعاء فقد الحاجة:
_اللهم يارب الضالة رد عليّ ضلتي، اللهم يارب الضالة رد عليّ ضلتي، اهو أخيراً.
كنت خلاص لقيته جنب السرير، واتحركت اجيبه لقيت صوت بينده عليا.
-هنا مالك يا حبيبتي فيكِ إيه، يوسف قلقني عليكِ اوي، بيقولي أنك بتقولي كلام غريب، مالك يا حبيبتي.
اتصدمت للمرة اللي مش عارفة كام انهاردة، دي ماما ايوة ماما بس بردو مهتلفة على ماما نفس الشبه والملامح بس الهيئة مختلفة.
أنا دلوقتي قدامي ست رشيقة وحلوة وعاملة شعرها بطريقة تحفة وحاطة ميكب مش زي ماما اللي في البيت وبتتكلم زي الهوانم اللي في
التلفزيون، دماغي لفت من كتر الصدامات اللي اخدتها انهاردة فقلت بتيهه.
_ماما، أنتِ ماما صح، أنا هنا بنتك مش كده.
-ايوة أنا ماما مالك يا حبيبتي فيكِ إيه، واي اللبس اللي أنتِ لابساه ده يا حبيبتي.
_ماله لبسي ما هوا حلو اهو.
-حلو ايه يا حبيبتي مش قولنا نبطل بقى حفلات تنكرية شوية، فين هنا بنتي الجميلة والشيك، شكلك في اللبس ده بيئة اوي أكنك زي الفلاحين بالظبط، قومي غيري هدومك يلا.
اول ما سمعت كلامها ده معجبنيش وأفتكرت كلام ماما اللي قالته ليا بعد ما غيرت الصبح " ما شاء الله يا حبيبتي زي القمر ربنا يحفظك دايمًا ويصونك دايمًا كده يارب ".
هزيت راسي بأليه، لأني مش جاهز لأي أسأله دلوقتي منها وقلت:
_حاضر، ممكن أرتاح شوية بعد إذنك لأني تعبانة اوي ومحتاجة ارتاح.
-ماشي يا حبيبتي خدي دش وغيري هدومك ونامي وانا هخلى الحجة فاطمة تصحيكِ على العشا.
قلت كده عشان انهي الموقف لاني مش عارفة لو اتكلمت اكتر من كده هيحصل ايه، اتجهت للفون على طول عشان ارن على سُهى، يمكن اكون بحلم وتصحيني من الحلم.
_ أخيراً يارب تردي يا سُهى يارب.
فتحت التلفون اجيب رقم سُهى اخدت الصدمة المليون بقى التليفون فاضي كل حاجة فاضية جهت الاتصال والواتساب والفيس وكل حاجة فاضية حرفيًا اكنك جايبه الفون جديد ومش عليه اي حاجة.
_يعني اي يا ربي كده حتى املي الوحيد طلع فاضي.
قلت لنفسي بهدوء، اهدي يا هنا وفكري كويس افتكري رقم سُهى كان ايه، قعدت كام دقيقة كده عقبال ما افتكرة، قلت أخيراً بحماس:
_ايوة افتكرت كان 010 أخيراً الحمدلله ليك يارب.
دخلت الرقم واستنيت ترد سمعت جملة خلتني خلاص انهرت حرفيًا.
" عفوًا هذا الرقم غير موجود بالخدمة ".
جربت على رقم بابا وماما بردو نفس الجملة.
" عفوًا هذا الرقم غير موجود بالخدمة ".
قلت بجنون وأنا خلاص كل الأبواب اتقفلت في وشي:
_يعني اي أنا هفضل هنا طول عمري....