رواية الوجه الاخر للرحمة الفصل التاسع والستون69بقلم عبير ادريس
ليلة بين الخوف والرحمة .
سمر : زواجة الدهر حبايب ..
يوسف : فدوة لعينج سمورة ، ربي يفرحج بفطومة وإن شاءالله تخاويها.
انتبهت عليها تغيرت ملامحها وابتسامتها غابت عن وجهها ، نزلت عيونها وردت بهدوء:
سمر : الله كريم ..
يوسف انتبه لنفسه ، وحس كلامه لمس جرح بداخلها ، فحاول يغير الموضوع حتى ما يحرجها او يجرحها أكثر.
يوسف : شنو رأيج بفستانها ؟
سمر : يجنن وريحانة زادته حلاوة.
باوعلي بنظرات خلاني أستحي وأنزل راسي ، رجعت سمر سألته :
سمر : فرحان بيها مو ؟
يوسف : تنشرب ويا المي العكر ريحانتي.
ريحانة : هذا مدح ذم ؟
التفت علية وابتسم.
يوسف : مدح والله.
باوعت لسمر وكلتلها :
ريحانة : سمر أشو اني تحسست من حجايته هاي ؟
سمر : تحسيها لغز مو بلة ؟
يوسف : ها اتفقتن علية مو ؟
سمر : فسرلها حتى ميروح بالها بعيد وتضوج منك بأولها .
التفت علية ومد إيده وسحبني لحضنه ، قرب وجهه وهمس بأذني :
يوسف : معناها مو مهم عندي شكد الدنيا عكرة وصعبة ، دام انتِ موجودة بحياتي ، حتى مرارة الأيام تصير عذبة ، مثل الريحانة من نحطها بالماي ونشربها تبقى محتفظة بعطرها ونكهتها . وانتِ هم مهما تعبتج الدنيا وتعبتيني وياج ، تبقين أجمل شي صارلي وأحلى وحدة بعيوني.
ريحانة : وبعد ؟
طبع قبلة خفيفة على خدي وكمل:
يوسف : يعني الحب الحقيقي مو شرط يعيش بس بالظروف الحلوة ، الحب ينقاس بكد ما الواحد يكدر يصمد بالظروف الصعبة ، لأن مو الصعب نحب بعض وإحنا مرتاحين ، الصعب نبقى متمسكين ببعض حتى من تعاندنا الدنيا وتقفل علينا ، ونظل نشوف حلاوة هذا الحب رغم كل المرارة اللي عشناها بسببه.
جنت ذايبة بكلامه ، موبس كلامه ، حتى قربه وعطره وطريقة احتوائه إلي جانت تسوي شعور بداخلي صعب أوصفه ، الغريب ماحسيت وياه بالخجل اللي جنت متوقعته ، جانت عندي راحة غريبة وياه ، وكأن كل المسافات اللي بيناتنا اختفت وتبخرت..
تقربت من أذنه وهمست :
ريحانة : كافي يوسف ، سمر وخالة رحيمة موجودات وهم عيب من بتول.
تقرب وهمس بأذني :
يوسف : صرفتهم.
رفعت راسي من صدره وباوعت بعيونه اللي جانت ذايبة بتفاصيلي.
ريحانة : صدك ؟
يوسف : شوفي الهول فارغ.
لفيت وجهي وباوعت ، فعلاً ماكو أحد بس اني وياه.
ريحانة : شوكت طلعوا ؟ وشلون صرفتهم واني ما أدري.
يوسف : ذايبة ياروحي وما حاسة بشي.
هنا صدك استحيت ، لعد شكد جان تأثيره واضح علية حتى ما انتبهت للي دايصير حولي ، ابتعدت عنه شوية ،بس بحركة سريعة رجعني لحضنه وهمس:
يوسف : ريحان گلبي.
ريحانة : ها حبيبي؟
يوسف : ماكو داعي نسوي عرس،خليني اخطفج لبيتي وغرفتي بعد ما أكدر أبقى بعيد عنج أكثر .
ريحانة : يعني هو عادي ؟
يوسف : اي عادي المهم عقدنا ، وباقي عقد المحكمة نروح نسويه بالأيام الجاية.
ريحانة : بكيفك.
يوسف : شنو رأيج ؟
ريحانة : ماعندي رأي بعد رأيك.
يوسف : يعني تجين وياي ؟
ريحانة : لآخر الدنيا مستعدة أجي وياك.
يوسف : تحبيني ؟ أعرف سؤال تافه بس أحب أسمع جوابه منج.
ريحانة : يعني مو هواي.
يوسف : متأكدة ؟
ريحانة : ما متأكدة كلش.
ما لحكت أكمل ، بحركة سريعة خطف شفايفي وقبلني بقوة ، ومن ابتعدنا ظلينا لحظات ساكتين ، نحاول نستوعب هاللحظة الحلوة اللي جان ينتظرها من زمان ويمكن حتى اني جنت منتظرتها.
انفاسنا تسارعت ودكات گلبنا تنبض فرح ،
حط جبيني على جبيني وهمس :
يوسف :بعدج ما متأكدة ؟
ريحانة : يوسف كافي.
يوسف : ولج صارلي كومة منتظر هاي اللحظة وميت عليج شنو كافي ؟
باوعت لوجهه لاحظت لونه متغير وملامحه شاحبة ، حتى حركة إيده حسيتها ثكلت.
ريحانة : يوسف بعدك تعبان ؟
يوسف : مومهم.
ريحانة : لا تكابر ، اذا تحتاج ترجع للمستشفى أرجع لا تتهاون بصحتك فدوة.
يوسف : لو أعرف أموت بفراشي ما أعوفج اليوم ، كل عقلج افوت هيج لحظات ؟
ريحانة : الأيام الجاية هواي واني يمك مارايحة بعيد.
يوسف : وانه ما ضامن عمري منا لباجر ، خليني عايش هاي الفرحة ولو يوم واحد .
ريحانة : ليش هيج تحجي ؟
يوسف : المنطق هيج يكول ، وانه لازم اعيش يومي يومه ما أحب أبقى أباوع لباجر وأنتظر ، لأن هواي انتظرت ، وما مستعد انتظر أكثر عذريني.
ردت أجاوبه ، بس حط أصبعه على شفايفي ومردهن بإيده، سحب إيده من انتبه اني تضايقت.
ريحانة : هاي شبيك ؟ أذيتني.
يوسف : أموت عليج.
ريحانة :مممم ليش حبيتني ؟
يوسف : لأن مخبلة.
ريحانة : بهاي حقك.
ضحك وسحبني لحضنه مرة ثانية.
يوسف : تعالي ياروحي تعالي بحضني ، ما أريدج تبتعدين عني أبد.
بقى حاضني وساكت ، حسيت الكلام لهنا وانتهى ، ما بقى عنده شي يحجيه غير إنه يضمني لروحه ويعوض أيام البعد والانتظار.
بعدها بعدني عنه وكام صاح على سمر :
يوسف : ام فطومة سمورة.
إجتي ووكفت بباب الهول ، تباوع علينا ومبتسمة بس لاحظتها شلوت تتفادى نظرات يوسف ، حسيتها مكسورة ، بس هي تحاول تبين طبيعية بس عيونها فاضحتها ، حفظتها حفظ.
يوسف : سمورة ، آخذ عروستي لو محتاجتها ؟
سمر : لا أخذها وخلصوني منكم وبعد ما أريد أشوفكم .
ريحانة : هيج بسرعة تنازلتي عني ؟
سمر : شتسوين بية بعد ؟ عندج يوسف بالدنيا كلها.
كمت ورحت حضنتها وبلا ما احس دموعي نزلت ، ما اعرف أبجي من الفرحة لو من فكرة فراكها وطلعتي من هذا البيت اللي عشت بيه وياهم بأمان وراحة صح مو أيام هواي بس ما تنسي.
سمر : هسه ليش تبجين ؟
ريحانة : شلون راح أفاركج ؟
سمر : هسه اللي يسمعج يكول بعيدة عنج ، بس تمدين راسج من الباب تشوفيني.
ريحانة : هاي اذا رجعتي لبيتج ، صدك تكونين قريبة مني بس هنا لا بعيدة.
يوسف : صدك سمر ليش ما ترجعين لبيتج ؟
سمر : لا خليني هنا مرتاحة.
يوسف : فكري بيها هناك أحسن بيتج ومكانج وغراضج وشهم ما راح يعترض بالعكس يفرح اذا عرف بيج راجعة.
سمر : هسه عوفوكم مني ورحوا عيشوا يومكم وافرحوا وانه أفكر بالموضوع بعدين.
يوسف : انه موجود شنو تحتاجين أمانة تكوليلي مجرد اتصال تلكيني يمج .
سمر : إن شاءالله ما تقصر.
يوسف : سمر مو بس حجي.
سمر : أدري بيك ويوم اللي أشوف يعكوب بين إيديكم.
يوسف : فدوة لعينج سمور.
سلمنا عليها ويوسف لبسني الصاية فوك الفستان ، ورحت لخالة سلمت عليها،حضنتني وكامت تمسح على ظهري :
رحيمة : تعلمنا عليج يمه ، كل يوم الصبح نتريك من إيدج الحلوة شلون راح نفاركج ؟
هي تحجي واني دموعي تنزل حسيت مفاركة أهلي وطالعة منهم.
ريحانة :أجيج إن شاء الله ، كل يوم تلكيني يمج.
رحيمة : سبع سعادات إن شاءالله يمه.
ريحانة : فدوة لعينج يمة.
رحيمة : بحفظ الله يمه ، عينج على زوجج ، يوسف خوش يوسف ، ديري بالج عليه ، ترى يحبج هوواي وتعب هواي.
ريحانة : إن شاءالله يمه بعيوني ، لا يظل بالج.
رحيمة : يلا روحي ويا زوجج ، بعد مالج مكان عندنا.
حجتها بضحكة حلوة تخبل مثل وجهها الحلو.
ريحانة : بس يبقى هذا بيتي شوكت ما يضوجني يوسف راجعتلج.
رحيمة : يوسف يضوج الدنيا وما يضوجج ، تعالي خطار هله بيج وأخليج بنص عيوني بس زعلانة لا ما أريدج.
سمر : هاي مو بس الج الحجي حتى انه هيج جانت تحجي وياي.
رحيمة : اي يمة ، الوحدة منا مالها غير بيت زوجها وأطفالها ، محد يفيدها بهالوكت ، يلا روحي لزوجج ينتظرج برا خطية .
التفتت أدوره ، بس ما لكيته.
ريحانة : وين راح ؟ أشو من أولها عافني؟
سمر : منتظرج بالطرمة.
بوستهم وطلعت لكيته يحجي بالتليفون وصوته عالي وضايج ، تقرب شوية وسمعت أطراف الحديث :
يوسف : شنو يعني أسترها ؟ ما أسترها والله بعد اللي سوته بطيبة وما أريدها ترجع لبيتي واذا شفتها اقتلها خلاص.
كميل : يابه الستر الستر ، شجاكم ؟
يوسف : لو ساترين أختي ، أبقى للموت ساتر أخته وما أنطي بيها بس كلشي دين.
كميل : شلون يعني يوسف؟ نبقى هيج بالمشاكل ؟
يوسف : ما أفوت حجايتها لطيبة والله وتشوف.
ماعرفت شنو جاوبه كميل لان من شافني سد السبيكر وحطه على أذنه ، خلص المكالمة وسد التليفون ، التفت علية عاكد حاجبه.
ريحانة : خير شصاير ؟
يوسف : الحقيرة رفل أكو غيرها.
ريحانة : شبيها ؟ شنو سوت ؟
يوسف : مخابرة على طيبة تكوللها من هاي فسختي الخطوبة من أخوي حتى ترجعين لليث ، بس يلا درب الجلب على الكصاب ماسامعه ؟وتكوللها باسل نظيف ومعروف بسمعته بين الناس ، مو مال ياخذ وحدة مستعملة مثلج.
ريحانة : ياااا هاي ليش هيج تحجي وياها مو حرام عليها ؟
يوسف : وهي هاي تعرف الحرام .
ريحانة : وهسه طيبة ضايجة مو ؟
يوسف : شنو ضايجة بس تبجي منهارة ، ورا ما سادة الخط منها ، دازه مسج ل _ليث كاتبتله بالعافية عليك أخوي شبع بيها ومدري شكم واحد مانعرفه ، وكميل يكولي لا تطلكها واستر عليها ، الله لا يستر علية اذا سترت عليها ، شلون شلون يريدني أباوع بوجهها بعد اللي سمعته وشفته منها ؟ شلون ؟ والله ما أكدر ، خابرني ليث يكولي طيبة منهارة وتخربطت وباقي الرجال حاير بيها مايعرف شيسوي دزيتلهم فارس ، الله يقبلها هيج تسوي بيهم ؟ وهاي عود بنت عمها مو غريبة .
ريحانة : يلا لتضوج ، هي كامت ما تعرف شنو تسوي من حركة گلبها ترى مو سهلة تتزوج عليها وتكسرها كدام أهلها وأهلك والناس.
يوسف : هي فرضت نفسها فرض علية وانه ما متذكر اذا ماخذها لو لا والله ما متذكر ، شمدريني شبيها مابيها ولبسوها براسي .
ريحانة : شوف نجحت باللي تريده ، غثتك وخربت عليكم فرحتكم انت وطيبة وليث.
يوسف : لا حول ولاقوة إلا بالله العلي العظيم ، شلون بلوة هاي ؟ وشوكت أخلص منها ؟
ريحانة : دواها اللبس ، البسها وشوف شلون تجر عدل وياك.
يوسف : يابه ما مأمن بيها إلا هيج أكولج ، خايف منها هاي مستعدة كلشي تسوي.
ريحانة : ماتكدر تسوي شي خل توليظ
يوسف : بعدج ما تعرفيها زين ، انه رابي وياهن وأعرفهن وحدة وحدة .
ظليت أحجي وياه وأحاول أهديه ، وبعدها صعدنا للسيارة ورحنا للبيت.
من وصلنا فتحلي الباب ومدلي إيده.
يوسف : يلا أميرتي تفضلي لمملكتج.
ابتسمت وحطيت إيدي بإيده ونزلت ، مشينا باتجاه البيت ، التفت علية باوعلي وكال :
يوسف : يولي هسه انتِ مرتي مو ؟
ريحانة : يكولون.
سحبني عليه وباس راسي ، راد يشيلني ما خليته لأن جان تعبان ماهان علية يتعب أكثر.
دخلنا وكعدت على القنفة ، طلع موبايله وكال :
يوسف : روحي ، كومي أصورج.
ريحانة : وحدي ؟
يوسف : هسه خليني أصورج ، وبعدين نتصور انه وياج.
بقى يصورني صور هواي ، وبعدها تصورنا سوه ، جان يحاول بكل طريقة يخليني أحس إن هذا اليوم إلي وحدي ، وماكو شي ناقصني ، رغم اني ما جنت مركزة على الصور ولا التفاصيل بكد فرحتي بيه واخيراً صرنا لبعضنا.
بعدها استأذن مني وراح للحمام ، واني دخلت للغرفة ، أول ما فتحت الباب انصدمت من المنظر .
الغرفة مزينة ومرتبة وبالنص طبلة صغيرة عليها شموع وكلاصين وعلبة حلويات وبوكيه ورد ، كل تفصيل بيها جان مرتب بعناية ، حسيته تعب حتى يهيئلي هالليلة بوقت قياسي.
وكفت كبال المراية وباوعت لنفسي .
جان المفروض أكون أسعد عروس بالدنيا ، وفعلاً جانت الفرحة موجودة بگلبي ، بس عيوني مابيها فرحة تشبه فرحة العرايس ، أكو غصة عميقة ، شي ناقصني مهما حاولت أتجاهله .
تمنيت أمي تكون موجودة ، بابا وبابا عز الدين الله يرحمهم واحد منهم يكون موجود يلزم إيدي ويسلمني ليوسف ، عيني على أخواتي تمنيتهم يشاركوني هاللحظة ، وأسمع أصواتهم وضحكاتهم بالبيت.
بس الأمنيات مرات تكون أقسى من الواقع، لأن نعرف من البداية أكو ناس نتمنى وجودهم ، بس ما راح يرجعون.
فجأة حسيت بشي غريب بداخلي ماعرفت أفسره ، حطيت إيدي على صدري غمضت عيوني ودعيت ربي يقويني ويعوضني عن كل شي فقدته.
اندك الباب.
يوسف : ريحانتي ؟ أكدر أدخل ؟
ريحانة : اي حبيبي تعال .
مسحت دموعي بسرعة ودخل ، أول ما شافني عرف بية شي.
يوسف : شبيج حبيبي ؟
ريحانة : مابية شي.
يوسف : انه مو غريب عليجج حتى تضمين عني مثل قبل.
ريحانة : والله هيج يمكن من الفرحة عيوني دمعت.
يوسف : أكيد ؟
ريحانة : اي أكيد لا يظل بالك مابية شي.
لزم إيدي وباسها ، وبعدها أخذ يبوس أصابعي واحد ورا الثاني.
يوسف :إيديج باردات ، أطفي السبلت ؟
ريحانة : بكيفك ..يوسف ؟
يوسف : نعم حبيبي ؟
ريحانة : ماعندي شي إلبسه شلون ؟
ابتسم وأشر للكنتور وكال :
يوسف : افتحيه وألبسي اللي يعجبج ، صحيح ذوقي ما يوصل لذوقج ، بس اعتبريهن تمشاية حال بين ما نطلع نشتري اللي تريديه.
رحت للكنتور وفتحته ، انصدمت من كثر الملابس اللي بيه ، ملابس بيت وطلعو وملابس نوم ، كلشي مرتب وجاهز ، التفتت عليه أضحك :
ريحانة : هاي شوكت اشتريتهن ؟
يوسف : تتذكرين من حركت ملابسج ؟
ريحانة : اي.
يوسف : وراها بكم يوم من هدأت وارتاحيت رحت اشتريتلج ملابس جدد ، جهزتلج من كلشي ، بس ما صار وقت مناسب أنطيهن إلج ،لأن من رجعت لهنا انتِ جنتِ يم شهم وتعرفين الباقي.
ريحانة : وهذني هم من ضمن التجهيز السابق ؟
أشرت على ملابس النوم ، فضحك وكال :
يوسف : لا ، هذني وصيتهن من عقدت النية ، واليوم الصبح وصلن.
ريحانة : ما تضيع شي .
يوسف : شلون لعد .
ريحانة : مممم ، زين وهذا الفستان اللي لابسته ، منين اشتريته وشوكت ؟ وشلون عرفت قياسي ؟
نزع سترته وكعد على السرير ، سند ظهره عليه ، وباوعلي مبتسم.
ريحانة : هسه ليش تضحك ؟
يوسف : بالنسبة لقياسج أعرفه من جنا بالمصح واشتريتلج ملابس تتذكرين ؟
ريحانة : اي بس ما أعرف وين راحن ومنو أخذهن.
يوسف : كلشي راح يفداج وخلي يولي لا تفكرين بيه ، وبالنسبة شوكت اشتريته من زمان .
ريحانة : شوكت يعني من زمان ؟
يوسف : بمهر طيبة ، بيوم اللي شفتج بالفستان البنفسجي وطيرتي عقلي بيومها كلت هاي البنية تصيرلي يعني تصيرلي ، إجه ببالي أدورلج على فستان لخطوبتنا ،وشفت هذا الموديل على النت وعجبني ، تواصلت ويا مصمم لبناني وطلبت منه يغيرلي بيه حتى تكونين أول وحدة تلبس هذا الفستان ، ومن كمله دزوه ، وانه ضميته على أمل تلبسيه وأشوفج بحضني بيه.
دموعي نزلت فرحانة جنت بيه وبسوالفه.
يوسف : هسه ليش البجي ؟ أبطل ما أسولف ؟
حجاها وكام حضني ، طبطب على ظهري بحنية واحتواني بشكل كلش حلو ولطيف.
يوسف : شبيج ياعمري ليش كلش شوية باجية ؟
ريحانة : ما أعرف بس كلامك واللي سويته علمودي يأثر بية كلش.
بقى حاضني وساكت بعدين همس بأذني :
يوسف : اساعدج تغيرين ملابسج ؟
ريحانة : لا اني أريد أسبح وبعدين أبدل.
يوسف : معناها انطرد من أولها ؟
ريحانة : بكيفك بعد انت وضميرك.
يوسف : اذا تجين على الضمير ميت من زمان ، بس اذا انتِ شنو تحبين انه وياج وتفداج عيونيد
ريحانة : سالمة عيونك حبيبي بس خليني اليوم أبدل براحتي فدوة لطولك.
يوسف : صار يجرالج.
ريحانة : شكراً حبيبي.
طلع من الغرفة ، واني نزعت الفستان وأخذت منشفة ودخلت للحمام ،من خلصت وطلعت ، فتحت الكنتور طلعت سيت نوم لونه أبيض قصير ، لبست القطعة الجوا تجنن بس خجلت منها مفتوحة جانت ، لبست فوكاها الروب وشديته بالحزام.
بعدها وكفت كبال المراية ، نشفت شعري وحطيت مكياج خفيف .
من خلصت فتحت الباب حتى اصيحه ، لكيته كاعد وعينه بالموبايل.
حس بحركة الباب رفع عينه علية شافني بهت .
يوسف : لج لج لج شنو هاي ؟
دنكت راسي بخجل ، وبعد ثواني لكيته واكف كبالي رفع وجهي وبقى يباوعلي ، يتنهد ويجر حسرات وحدة ورا الثانية وكأنه ما مصدك اني يمه.
ريحانة : شبيك ؟
يوسف : ما مصدك ، انه بحقيقة لو حلم ؟
ظليت ساكتة ، تحمحم وكال :
يوسف : تتعشين ؟
ريحانة : الصراحة اي لأن جواعانة .
يوسف : دزيتلج أكل من برا ، بس للأمانة المطعم هذا نظيف وأكله درجة أولى.
ريحانة : شمدريك ؟ طبخته وياهم ؟
ضحك .
يوسف : لابس ماكل منه قبل وأعرفه.
ريحانة : يلا هذا هو ناكل بس من باجر اني أسوي الغدة.
يوسف : ثواني ويكون الأكل جاهز بس انتظريني أغير ملابسي.
ريحانة : أوك أخذ راحتك.
كلت ما أسوي شي اليوم اخليه هو يسوي واني اتدلل عليه .
دخل للغرفة ، وبعد دقايق طلع لابس تراك لونه نيلي ، كف ردانه وراح للمطبخ لحگته، فتح الأكل وحطه بالصينية ، ورتب الصحون على الميز وبعدها التفت علية.
يوسف : ليش واكفة بمكانج؟ تعالي اكعدي.
رحت كعدت ، وهو كعد بصفي ، مديت إيدي وأخذت أول لكمة ، رفعت عيني عليه لكيته صافن علية وبعدين عيونه كامت تتنقل بين وجهي وملابسي كأنه مستمتع بكل تفصيل بية.
ريحانة : ليش ما تاكل ؟
يوسف : دا آكل .
ريحانة: ماشفتك مديت إيدك.
يوسف : وهاي مديت إيدي.
أخذ لكمة وقربها مني.
ريحانة : انت أكل .
يوسف : يلا هاي من إيدي افتحي حلكج.
وبقى يوكلني لكمة ورا الثانية.
ريحانة : وانت ؟
يوسف : ما أكدر آكل أكل دسم .
ريحانة: بعدك تعبان مو ؟
يوسف : شوية مو هواي .
ريحانة : شلون تسممت؟ ماكل من برا ؟
يوسف :لا والله تغديت ببيت أهلي.
ريحانة : لعد ليش تسممت ؟
يوسف : ما أعرف ورا ما كملت غدة رجعت لهنا بدلت ورحت للحلاق بس قبلها أخذت عصير جان بالثلاجة أخذته وياي بالطريق شربته ، وصلت للحلاق جان أكو واحد قبلي دا يزين ، خلص كعدت وراه ، الحلاق رتب لحيتي وبلش بشعري ، وفجأة صارت عندي لويات خفيفة ورا شوية بدت تزيد ، ما كدرت أتحمل ، كمت وطلعت أدور على حمام أفوت بيه ، شفت مطعم استأذنت من صاحبه ودخلت، بعدها كمت أعرك هواي عرفت متسمم لأن مريت بهاي الحالة قبل ، خابرت فارس إجه وأخذني للمستشفى، وطلع مثل ما توقعت متسمم.
ريحانة : يا حبيبي أسم الله عليك ، وهسه شلونك ؟شنو تحس ؟
يوسف : والله من شفتج ومن عقدت عليج وصرتي مالتي ، ما كمت أحس بأي وجع ، وحتى الوجع اللي حسيته جان تافه.
ريحانة : معقولة ؟
يوسف : ولج انتِ ما تدرين شسويتي بية ، عبالك بس انتِ بنية وماكو غيرج بعد ، گلبي قفل عليج وكال لو هي لو ماريد.
ريحانة: وانت تشوفني أستاهل كل هذا الحب ؟
يوسف : أكيد تستاهليه ولج انتِ ريحانة گلبي تعرفين شنو يعني ؟
ريحانة :زين شنو اللي خلاك تحبني وتتعلق بية ؟ يعني أشوف نفسي عادية جداً وفوك هذا مريضة جنت وانت شهدت على شغلات صارتلي غيرك رجل مستحيل .....
مد إيده وحطها على شفايفي حتى يسكتني ، ملامحه تغيرت صارت أكثر جدية.
يوسف : لا تكملين ، انه ماشهدت على شي ولا شفت شي ، كل اللي أتذكره أكو وحدة حنونة وطيبة گلب وإنسانة تعبانة على نفسها وراقية ، عيبها الوحيد باكت گلبي وسطرتني سطر.
ابتسمت وكملت عشاية ، من خلصت لمينا الأكل ورحت غسلت وفرشت أسناني ورجعنا للغرفة.
شغل التلفزيون وأختار فيلم وأخذني بحضنه ، كمنا نتفرج ، بس لا اني بالي وياه ولا هو.
كام يمهد لهاي الليلة شغل الشموع و موسيقى هادئة ورجع تمدد يمي ، بالبداية تجاوبت وياه وجنت مرتاحة والوضع طبيعي بس من بلش يتقرب أكثر ، حسيت شي بداخلي بدا يتغير
مد إيده حتى يقربني إله ، واني حاولت أبتسم وأخفي الارتباك اللي بدا يسيطر علية.
يوسف : ما أريدج تطلعين من حضني ، ياالله شكد محتاج هذا الحضن.
جسمي بدا يتشنج ، بس حاولت أتجاوز خوفي وبادرت بادلته الحضن بلهفة ، رجع يهمس :
يوسف : حلو بشلنا نتفاهم.
ريحانة : لا تصير مغرور.
يوسف : وياج ؟ مستحيل.
مرت دقايق والجو جان هادئ بس كلما يتقرب مني أكثر ، جسمي يرجع يتشنج،حاول يحجي وياية بهدوء ، وكأنه ما انتبه للتغيير اللي صار.
يوسف : اذا خايفة مني أبتعد ونأجلها.
ريحانة : لا مابية شي.
بس الحقيقة إن الذكريات أخ منها جانت أقوى مني ، جنت أحاول جاهدة أقنع نفسي إن كلشي انتهى والماضي صار وراية وبعيد ، ويوسف يختلف عن قسور مو مثله ، ولا يشبهه بشي .
بس كلما يتقرب مني أكثر تجي ببالي صور ذاك اليوم ، صورته وهو يشوفني بواحدة من أسوأ لحظات حياتي ، بيوم الاعتداء ومن قسور أخذ شرفي كدامه.
رجعت لنفس اللحظات ، لنفس الخوف ، لنفس الإحساس بالعجز لنفس نظراته وهو يحاول يبعد عيونه عني بس جان يرجع يباوع من خوفه علية كلشي صار كدام عينه وما أتوقع راح نتجاوز هذا الموضوع بسهولة.
يوسف : حبيبي خايفة مني ؟
ريحانة : لا.
يوسف : ليش أحسج تتهربين ؟
ريحانة : لا ماكو هيج شي.
حاول يكمل اللي بدا بيه بس من وصل لدرجة راح أكون زوجته ، تغيرت ملامحي وصرخت:
ريحانة : شوي عفية وخر عني.
قبل لا يستوعب دفعته بقوة وحطيت إيدي على حلكي وركضت للحمام كمت أتقيأ ، وإيدي ترجف بالكوة سندت نفسي على المغسلة ، دموعي بدت تنزل ، خربت علينا أحلى ليلة بحياتنا.
ما جنت أريد يصير هيج ، ولا جنت أتمنى تنتهي ليلتنا بهالصورة ، جان كل أملي أعيش وياه ليلة حلوة تنسينا العذاب اللي مرينا بيه ، ليلة ننسى بيها كل التعب ، ونذوب حزنا ، بس جسمي جان يتصرف وحده وكأنه بعده عايش ذاك الخوف.
رفعت راسي وباوعت بالمراية ، شفته واكف وراية وعاكد حاجبه وملامحه قلقة.
يوسف : حبيبتي بيج شي ؟
ماكدرت أجاوبه ، تقرب مني ولم بإيده شعري حتى ما ينزل على وجهي ، وبقى ينتظر لحد ما هديت شوية ، فتح البوري أخذ مي وغسل وجهي ،وبعدها سحب الخاولي ونشفه بحنية حضني من ظهري ورجعني للغرفة تمددت وهو كعد كبالي :
يوسف : انه آسف ..
ريحانة : على شنو ؟
يوسف : لأن بسببي اضطريتي تعيشين كل هذا الخوف.
نزلت عيني وهمست بضعف:
ريحانة : انت سامحني.
يوسف : على شنو ؟
ريحانة : خربت عليك فرحتك.
يوسف : تحجين صدك ؟
ريحانة : اي طبعاً أحجي صدك.
يوسف : هاي شبيج ريحانة ؟ مو مهم انه وشنو أحس ، عندي راحتج بالدنيا كلها .
ريحانة : بس يعني انت هم إلك حق ...
ودنكت راسي أبجي.
يوسف : اي ألي حق أحبج وأشتاقلج وأضمج ، وأريدج قريبة مني ، وماراح أكذب عليج وأكولج ما مشتاق ، انه مشتاقلج لدرجة مرات أحس بعد مابقى عندي صبر بس مو لازم يصير بينا الشي المتوقع حتى أحس إنج زوجتي ، المهم تكونين قريبة مني وبأمان ، ومحد يمسج بكلمة لو يضوجج بفعل.
ضحكت من بين دموعي وهمست :
ريحانة : عادي تحضني ؟
ما انتظرني أكمل ، فتح إيده ،ودخلت بحضنه ، ضمني بقوة و دفنت وجهي بصدره وهو حط ذقنه على راسي وهمس :
يوسف : ياالله شكد أموت عليج .
بقى يمسد على شعري بحنية ، ويحاول يطمني إن ماكو شي يخوفني منه.
همست بحب :
ريحانة : أحبك ..
ظل ساكت ..
ريحانة : أموت عليك ..
ابتعد عني شوية ورفع وجهي .
يوسف : شنو كلتي ؟
ريحانة :أموت عليك ..
يوسف : لا أول كلمة شنو ؟
ريحانة : أحبك .
يوسف : عيديها.
ريحانة : أحبك.
ضحك وحط جبينه على جبيني.
يوسف : عيديها خليني أسمعها ، أول مرة أسمعها منج لهذا ما مستوعب ..
ريحانة : أحبك أحبك أحبك..
يوسف : أروح فدوة لهلصوت ..
يوسف جان يحاول يسيطر على لهفته ،وكلما يباوع لوجهي أحس شكد مشتاق إلي ،و يريدني أكثر ، بس من يلاحظ ارتباكي ورجفة جسمي يرجع يهدأ ويلمني بحضنه ، بين رغبته بقربي وخوفه علية اختار راحتي بدون تردد.
ريحانة : يوسف؟
يوسف : عيونه.
ريحانة : انت ما متضايق ؟
يوسف : من شنو ؟
ريحانة : من اللي صار .
تنهد ومسح على شعري .
يوسف : أكذب عليج اذا كلت ماعندي مشاعر ولهفة قوية إلج ، انه زوجج وعاجبني أعيش وياج كل تفاصيل حياتنا ، بس مو على حساب راحتج .
ريحانة :وشلون اذا ماكدرت؟
يوسف : على شنو حياتي ؟
ريحانة : انطيك حقك.
يوسف : الايام الجاية هواي وراح نحجي بهذا الموضوع وهسه دوري أحتويج وأوفرلج الراحة والأمان ، انه ما مصدك صرتي حبيبتي ومرتي ، أكعد هسه ازعل عليج واتبطر لو اضوج منج ؟ رجاءً لا تفكرين بية بهالطريقة.
ريحانة : بس حسيتك مقهور .
يوسف : شلون حسيتي ؟
ريحانة : من وجهك .
يوسف : تقرين الوجوه وانه ما أدري ؟
ريحانة : لا بس ملامحك تغيرت عن أول ما دخلنا للبيت.
يوسف : شوفي أريدج تعرفين شغلة وما تنسيها أبد.
ريحانة : وهي ؟
يوسف : الحب مو دائماً لازم ناخذ الخطوة اللي نتمناها ، مرات الحب يخلينا نوكف عند حد معين رغم لهفتنا ومحبتنا للقرب من الشخص اللي نحبه ، حتى ما نخوفه ولا نخليه يعيش لحظة ما يتمناها ، وأحياناً لازم نتقبل ردة الفعل اللي نعرفها ممكن تصير حتى لو جانت عكس اللي نريده.
ريحانة : يعني انت جنت متوقع مني هيج ردة فعل ؟
يوسف : مو بس متوقع جنت متأكد وانه من دخلت للبيت جان ببالي أشوف شلون راح تكونين ، اذا جنتِ مرتاحة نكمل بس اذا حسيتج مو مستعدة راح أتوقف ، ومن أولها حسيت جسمج متشنج لهذا ما تماديت.
باس راسي وكال :
يوسف : تصبحين على خير .
ريحانة : وين رايح ؟
يوسف : اليوم نامي وارتاحي حتى ما أأثر على نومتج وباجر اذا حبيتي تسويلي مكان يمج راح أقبل عادي..
ريحانة : ها هيج صارت ؟
يوسف : اي ، يلا نامي حبيبي وارتاحي ولا تفكرين بأي شي ولا تضوجين نفسج ..
ريحانة : تمام حياتي ..
طلع وسد الباب وراه ، بقيت وحدي .
دفنت راسي بالمخدة وجنت كلش ضايجة من نفسي ومن الوضع لأن ما عرفت شلون أفصل بين الماضي والحاضر .
حاولت أنام ماكدرت كلما أغمض عيني تجيني صور وذكريات مختلفة ، ضليت مغمضة عيوني أحاول أهرب من الواقع بالنوم ، لحد ما غلبني التعب ونمت.
ثاني يوم فتحت عيوني وبقيت ثواني أباوع للسكف ، أحاول أستوعب اني وين ؟
بغرفة يوسف بمملكته ، بيته اللي صار بيتي ؟
تذكرت أحداث البارحة وكمت بهدوء ، دخلت للحمام غسلت ورجعت للغرفة طلعت تراك خفيف لبسته وطلعت للهول لكيته نايم على القنفة ، متغطي وإيده على عيونه ..
رحت كعدت يم القنفة بالكاع ومديت إيدي ولمست خده بحنيه ..
ريحانة : يوسف حبيبي يوسف ..
فتح عيونه ، ومن شافني ابتسم رغم النعاس ..
يوسف : صباح الخير ياوجه الخير
ريحانة : صباح النور
اعتدل بكعدته ومسح وجهه.
يوسف : ليش كعدتي من وكت ؟ اذا بعدج نعسانة أرجعي نامي..
ريحانة : يمكن من الفرحة ماكدرت أنام ..
يوسف : فرحانة لأن نمتي وحدج مو ؟
ريحانة : لا تذكرني فدوة ..
كام من مكانه وحضني.
يوسف : حبيبي لا تشيلين هم لأي شي تمام ؟
هزيت راسي بأي ، بهذه الاثناء رن موبايله تركني وراح جاوب .
يوسف : عيوني عمة صباح النور ، الله يبارك بيج ، هاي شنو ؟ خاف نسوي زحمة عليكم ؟ صار شوية ونكون يمكم ، بعيني صار صار ، الله وياج ..
سده وباوعلي ..
يوسف : هاي عمة رحيمة مسويتلنا ريوك وتكول تعالوا تريكوا يمنا ، بيج حيل نروح ؟
ريحانة : اي نروح اشتاقيتلهم ..
يوسف : شوكت لحكتي تشتاقيلهم ؟
ريحانة : ما أدري بس تعلمت عليهم ..
يوسف : يلة بدلي وانه راح أفوت للحمام.
رحت لبست عباية فوك ملابسي وكعدت أنتظره ، طلع من الحمام ينشف بشعره ، غمزلي وراح فتح الكنتور طلع ملابس وطلع من الغرفة ، ورا شوية صاح علية ..
يوسف : يلا حب انه كملت .
ضليت كاعدة بمكاني ما أدري شبية ، ليش هيج دايصير وياي جسمي ثكيل وأفكاري متشتتة.
من شافني ما طلعت رجع دخل للغرفة ، راح وكف كدام المرايا مشط شعره ورش عطر. بعدها التفت علية.
يوسف : شنو بعدج نعسانة ؟ ريحانة انتِ وياي ؟
هزيت راسي.
ريحانة : اي وياك.
يوسف : وين صافنة ؟
ريحانة : ماكو شي يمكن بعدني نعسانة.
يوسف : مو كلتلج ارجعي نامي ما سمعتي كلامي ؟
ريحانة : لو نايمة جان فاتنا الريوك مال عمة.
يوسف : اي هم صدك يلة كومي نروح عيب نتأخر عليهم.
طلعنا من البيت قفلناه ورحنا لبيت عمة رحيمة.
من وصلنا ، تلكتنا بالهلال وطشت علينا جكليت ، فطومة من شافتني ركضت علية و حضنتني ، وبعدها طلعت سمر بالكوة تمشي بعدها تعبانة وجهها شاحب ولونه أصفر سلمت علينا وترخصت ، وراحت للغرفة.
عمة حطت صينية الريوك بيها أشكال وألوان كيمر وعسل وكاهي وبيض ومسوين سياح مال تمن.
يوسف : عمة مكلفة نفسج والله.
ريحانة : اي والله هواي مسوية.
رحيمة : يايمة ما مسوية شي واصلاًَ مو من مقامكم هذا.
يوسف : لا ياحبيبتي كلج خير وبركة .
كام باس راسها ودنك على إيديها ورجع كعد ، ياكل ويوكلني ، لكمتين واكتفيت بالي يم سمر ماكدرت اتهنى بلكمتي ، تقربت من يوسف وهمست بأذنه :
ريحانة : رايحة أشوف سمر .
يوسف : كملي ريوكج .
ريحانة : شبعت ..
من كمت عمة صاحتني.
رحيمة : هاي وين ما أكلتي شي ؟
ريحانة : شبعت يمة.
رحيمة : يلة بالعافية.
ريحانة : من رخصتكم رايحة أشوف سمر ..
رحيمة : براحتج يمة ..
من طلعت ، رحيمة التفتت ليوسف وسألته :
رحيمة : ها يمة يوسف ، شلونه وضعكم زينين ؟
يوسف : اي الحمدلله .
رحيمة : يمة أريد أحجيلك سالفة بس لا تتكدر.
يوسف : كولي عمة أسمعج.
رحيمة : البارحة أبوك إجه لهنا وسوى هوسة، ووراها إجت أمك وظلت تحجي لأن ما حضرت العقد ومتخبلة لان عقدت على ريحانة .
يوسف : يعني هي ضايجة لأن ما حضرت العقد لو لأن العروس ريحانة ؟
رحيمة : اثنينهن ، وكامت تلطم وتخربطت وهاي رفل حاجية براسهم وشاحنتهم شحن عليك..
يوسف : شنو حاجية ماعرفتي ؟
رحيمة : كايلة على أساس ريحانة مو بنت بيت ومتزوجة قبلك.
يوسف : ومنين جابت هذا حجيها ؟
رحيمة : والله يمة ما أدري وطبت لهنا تعاركت ويا سمر وتكوللها : أحجيلهم الحقيقة وانتِ تدرين بكلشي وانتِ رحتي سقطتيلها الطفل وشهم طردج وهذا السبب انتِ ببيت اهلج مطرودة.
يوسف : هاي هيج الحجي ؟ سهلة سهلة.
رحيمة : يمة انه أدري هذا الحجي صحيح سمر حجتلي بيه بس أهلك المفروض ما يدرون شلون طش هذا الخبر ؟
يوسف : والله ما أعرف المفروض محد يدري غيرنا انه وسمر وشهم وفارس وإحنا الأربعة مستحيل نحجي بهذه الأمور ..
رحيمة : يمة خاف هاي البنية اللي كعدت يمها ريحانة بفترة من الفترات هي حجت لرفل ؟
يوسف : قصدج سهر ؟
ريحمة : اي هي.
يوسف : لا ما اتوقع البنية بحالها ما سمعنا منها حجاية ولا شفنا منها أذية صارلها شكد يمنا ..
رحيمة : هي تبقى احتمالات بس إحنا نحجي كلشي حتى نوصل لحل يايمة وهديهم لأهلك لاتعاديهم مهما يكون يبقون أمك وأبوك.
يوسف : عمة هاي رفل بلوة ووكعت على راسي ، فضحت طيبة وهسه رجعت على ريحانة ، هاي شلون كلشي تعرف؟ ومنين تسمع هيج أخبار راح أتخبل.
رحيمة : يمة انت مو حاط كاميرات بداخل بيتك ؟
يوسف : اي
رحيمة : خاف عرفت منهن؟
يوسف : لا مستحيل انه أمسح أول بأول ، بس لحظة !
تغيرت ملامحه وكأنه تذكر شي.
يوسف : انعل روحها اذا مسويتها صدك!
رحيمة : ها تذكرت شي ؟
يوسف : اي عمة يمكن فاتحة موبايلي بالوقت اللي دخلت للبيت وجنت سكران ومسكرنة منه ، اذا فعلاً هيج سوت فهاي مصيبة.
رحيمة : ليش نقالك شنو بيه ؟
يوسف : عمة كولي شنو مابيه ؟ محادثات بيني وبين شهم وبين فارس وعندي وي سمر ، ودكتورة طيبة جنت أحجي وياها ودزتلي تقارير الحالة مالتها وفيديوات .
سكت فجأة ، وكأن فكرة ضربت براسه وصاح
يوسف : الفديوات ؟
رحيمة : هنا تغيرت ملامحه وطلع من البيت يركض ..
ريحانة : يمة ماعرفتي وين راح ؟
رحيمة : أتوقع راحلها.
سمر : اكعدي واسكتي هو يحلها لا تروحين وراه.
ريحانة : هاي رفل شلون بلوة خاف صدك فتحت تليفونه !
سمر : مصيبة اذا فاتحته اكو كلام بيني وبينه صعب ينعرف.
رحيمة : شحاجية وياه ؟
سمر : كل مشكلة تصير وكل مصيبة نكتبها ، انه بالنسبة الية امسح كلشي بس هو المصيبة يمه اذا صدك فاتحة تليفونه كارثة.
ريحانة : لازم أرجع للبيت وأشوف شنو دايصير.
سمر : ريحانة لا تروحين اسمعي كلامي.
ريحانة : لا لازم أروح ما أريده يتهور ويسوي شي بعدين نندم عليه.
كمت لبست عباتي وطلعت رحت للبيت ، الباب الخارجي جان مفتوح دخلت فتحت باب الصالة عرفته هو جوا.
توجهت للغرفة جان الباب مردود شوية وهو واكف يم السرير شفت بإيده سجين وعلى السرير فوطة بيضة .تجمدت بمكاني.
جان يحاول يجرح أصبع رجله حتى ينزل منه دم ، وفعلاً شفت قطرات الدم على القماش، محددهة بشكل طولي.
ما استوعبت شنو ديسوي إلا من شافني ، سحب إيده بسرعة وضم السجين.
يوسف : من شوكت انتِ هنا ؟
ريحانة : من بديت تجرح أصبعك ، هاي ليش هيج سويت ؟
يوسف : انجرحت ودا أضمد إصبعي.
ريحانة : يوسف لا تكذب اني شفتك جرحت إصبعك.
يوسف : متوهمة.
ريحانة : لا ما متوهمة طلبوا منك دليل مو ؟ تريد تشوفهم هذا الدم حتى تسكتهم ؟
بلع ريكه وصفط الفوطة وحطها بجيس نايلون شفاف وراها ضمد إصبعه ولبس جواريبه.
بقيت أباوعله بصدمة ، مو مستوعبة شلون وصل بية الحال حتى يسوي هيج.
ريحانة : انت ما مجبور تبرر لأحد منهم ؟
يوسف : بس مجبور أسد حلوگهم .
ريحانة : ليش ؟
يوسف : لأن طبيعة أهلي ممكن يفسرون اي تفصيل على مزاجهم ، واذا اتعرضتي للشك والإهانة انه راح أنهان وممكن أسويلهم مشكلة ما أتحمل ينجاب طارييج بالموزين ..
ريحانة : خليهم يحجون ليش هي الناس على شنو رضت وشوكت سكتت ؟ وشنو الدم دليل على برائة البنية وعذريتها ؟ عفية إحنا وين عايشين؟ وبيا عصر ما تكولي ؟
يوسف : إحنا عايشين بقرية وناسها تحكمها العادات والتقاليد ، والحجاية اذا طشت صعب تنلم ، وانه عايش بنصهم وأكثر واحد محتك بيهم ما أكدر أسمع حجاية عايبة تمسج واسكت.
ريحانة : يعني مثلهم مقتنع بهاي الخرافات وقابل بيها ؟معقولة انت يوسف اللي عرفته هذا تفكيرك ؟ مدا اصدك والله.
يوسف : انه ما مقتنع أصلاً بهاي السالفة ولا دايرلها بال ، ولا مفكر بيها ولا تفكيري محدود بس افهميني بعض العادات الظالمة بعدها هنا عايشة بيناتنا وانه أريد أقطع الطريق عليهم قبل لا يوصلون لشي ما أحب يوصلوله..
حط إيده على جبينه وفكه كام يرجف ، لزمه دوار قوي سند نفسه على الحايط ..
ريحانة : تعبان ؟
يوسف : شوية.
أخذ الجيس اللي بيه الفوطة وطلع من الغرفة ، ما لحكت أسأله وين رايح ، بس من عرفت التفاصيل بعدين ، فهمت إنه هو قرر يواجههم بنفسه..
أول شي رايح لرفل وسحب منها التليفون بعد ما رجعه إلها بيوم اللي حذف الصور مالتنا ناطيه لأخوها بس الغلط منه ما فتشه زين .
وراها هددها اذا حجت شي يطلكها هي باقية تتوسل بيه ماخذها ورايح لأهله وهناك فاتح الموضوع وياهم ..
من وصل لأهله لكى أمه بحالة ما تنوصف.
زهرة : هذيج خذت ليث من وراية وانت انت لك شلون تزوجت من وراية وبدون رضاتنا ؟ هاي تاليها وياك يوسف هاي تاليها ؟
وكايمة تلطم وتضرب على وجهها وتخربطت ، يوشف نزل على ركباته وحطها بحضنه يحاول يهديها و يكعد بيها متقبل تكعد وبس تبجي.
دخل أبوه وأول ما شافه صاح بيه :
عبد الملك : كوم أطلع برا مالك مكان بينا.
يوسف : يابه ليش ؟ شمسوي أريد أفتهم عليش محاربيني ؟
عبد الملك : ماخذلك وحدة مطلكة وملعوب بيها لعب وتحطها بنصنا ما خجلت من نفسك وفوكاها جاي لبيتي بكل عين صلفة.
يوسف : منو كال مطلكة ؟ وبعدين شبيها المطلقة ، مو بشر حالها من حالنا ؟ اذا ماحالفها الحظ ويا إنسان عديم الضمير معناها هاهي لازم نحكم عليها بالموت ؟ مالها حق تتزوج وتكون عائلة وتحب وتنحب؟
مالك : عوفك من المثاليات واحجيلي عن مرتك شنو سالفة حملها ؟ منين حبلت منك ؟ وهاي سميرة ماخذتها للجدة حتى تطرحها !
يوسف : منيلك هاي المعلومات ؟ ماكو هيج شي
عبد الملك : لا أكو وانه متأكد.
يوسف : وانه دا اكولك ماكو هيج شي واذا عندك دليل شوفني مابيها شي من حقي أدافع عن زوجتي وأعرف اللي ألية واللي علية.
عبد الملك : مع الأسف عليك ماجنت أتصورك لهاي الدرجة غبي وبدون غيرة.
يوسف : يابه ريحانة بنت بيت وانه أول رجال يدخل عليها واللي كالك غير هذا الكلام جذاب وواجهني بيه.
عبد الملك : وين دليلك ؟ انت اثبتلي هي بنت بيت
طلع الجيس من جيبة وفرد الفوطة كدامهم وكال :
يوسف : هذا دليلي .
