رواية ضغينة قلب الفصل السادس6بقلم رقية الانصاري


رواية ضغينة قلب الفصل السادس6بقلم رقية الانصاري
أنا عندي اقتناع إن فيه أشخاص ربنا بيحطهم في طريقك عشان يعلموك الصبر وفيه أشخاص تانيين بيحطهم عشان يختبروا إذا كنت اتعلمت الصبر فعلًا ولا لسه محتاج تدريب، وزين عاصم السيوفي كان بالنسبة لي الاختبار النهائي اللي واضح إني هدخله كل يوم لحد ما أخلص المشروع ده، والغريب إني رغم كل الخناقات اللي كانت بتحصل بينا بقيت متعودة على وجوده بطريقة مش مفهومة لدرجة إني أول ما أدخل الموقع أبص ناحية مكتبه من غير ما آخد بالي، ولو اليوم عدى من غير ما يعترض على حاجة في شغلي أحس إن فيه حاجة ناقصة، ودي طبعًا مصيبة مش ناوية أعترف بيها لأي حد، خصوصًا ليلى، لأنها لو عرفت هتفضل تعايرني لآخر يوم في عمري.

وصلت الموقع الساعة تسعة إلا عشر دقايق، وكنت فخورة بنفسي جدًا لأني لأول مرة من أسبوع أوصل قبل المعاد، دخلت المكتب وأنا شايلة اللابتوب والرسومات وكوباية القهوة اللي اشتريتها في الطريق، ولقيت سليم واقف عند ماكينة القهوة بيحاول يصلح حاجة فيها، وزين قاعد على المكتب قدامه ملف كبير وبيتكلم في التليفون بنبرة جدية، وأول ما دخلت سليم بصلي وابتسم.

_ الله الله ملك الراوي بنفسها جايه قبل الاجتماع ولا أنا بيتهيألي؟

حطيت حاجتي على الترابيزة وبصيتله باستنكار.

_ هو إنتوا الاتنين عاملين اتفاقية ضدي ولا إيه؟ أنا مش بتأخر كل يوم على فكرة وبعدين العشر دقايق اللي بتكسبوها من حضوري بدري دي مش هتخلّي المستشفى يخلص قبل معاده.

زين كان لسه بيكلم حد في التليفون، لكنه رفع عينه وبصلي بابتسامة صغيرة قبل ما يرجع يكمل مكالمته، وسليم ضحك وهو بيحاول يفتح غطا الماكينة.

_ لا يا ستي إحنا مش متفقين بس زين من شوية كان بيسأل إذا كنتي وصلتي ولا لأ وأنا قلتله إن لسه بدري على المعجزة دي.

بصيت ناحية زين بسرعة، ولقيته قفل المكالمة في نفس اللحظة ورفع حاجبه.

_ أنا سألت عشان الاجتماع هيبدأ بعد عشر دقايق مش عشان مستني المعجزة اللي سليم بيحكي عنها وبعدين واضح إنكم فاضيين النهارده وعايزين تتخانقوا.

ابتسمت وأنا بقعد.

_ لا متقلقش يا بشمهندس أنا جاية النهارده بنية صافية جدًا ومقررة إني مش هتخانق مع حضرتك مهما حصل بس بشرط إن حضرتك متستفزنيش.

زين قفل الملف اللي قدامه وقال بمنتهى الهدوء:

_ يبقى كده الاتفاق فشل قبل ما يبدأ لأنك غالبًا بتعتبري أي ملاحظة على شغلك استفزاز شخصي.

كنت هرد عليه، لكن سليم سبقني وهو بيضحك.

_ يا جماعة بالله عليكم استنوا لحد ما أعمل قهوتي عشان اعرف أتفرج كويس أنا مش عايز أفوّت أول خناقة في اليوم خصوصًا إن زين النهارده واضح إنه ناوي يبدأ بدري.

ضحكت غصب عني، وزين هز راسه وهو بيحاول يخفي ابتسامته، وبعدها طلب مننا نجهز الرسومات عشان نبدأ الاجتماع. بصراحة اليوم كان بدايته لطيفة، ويمكن دي كانت أول مرة أحس إن وجودي وسطهم بقى طبيعي بالشكل ده، مفيش توتر البداية ولا إحساس إني لازم أثبت نفسي في كل دقيقة، حتى زين نفسه بقى أهدى معايا، وبقى ساعات يشرح سبب اعتراضه قبل ما أضطر أسأله، وده بالنسبة لشخصيته كان تطور يستحق إننا نعمله احتفال رسمي.

بدأ الاجتماع واتكلمنا في تفاصيل منطقة الاستقبال الرئيسية، وكان عندي اقتراح جديد لتوزيع الإضاءة وتعديل جزء من السقف المستعار، شرحت الفكرة وأنا بعرض الرسومات على الشاشة، وزين فضل مركز معايا لحد ما خلصت، وبعدها بدأ يسألني عن تكلفة التنفيذ وتأثير التعديل على مسارات الخدمات، ولما جاوبته على كل نقطة سكت شوية وبص للتصميم مرة تانية.

_ بصراحة التوزيع الجديد أحسن من القديم خصوصًا إنك حافظتي على الشكل العام من غير ما تزودي وحدات الإضاءة، بس محتاجين نراجع ارتفاع الجزء ده مع فريق التنفيذ قبل ما نعتمده بشكل نهائي.

بصيتله باستغراب مصطنع وقلت:

_ ثانية واحدة بس يا جماعة هو زين السيوفي قال إن التصميم أحسن من القديم من غير ما يبدأ كلامه باعتراض؟ أنا حاسة إن اللحظة دي لازم تتوثق عشان غالبًا مش هتتكرر.

سليم ضحك بصوت عالي، وزين بصلي وهو بيحاول يحافظ على جديته.

_ أنا ممكن أرجع في كلامي على فكره وبعدين أنا طول الوقت بقولك لما الشغل يكون كويس، بس إنتي اللي بتحبي تفتكري الاعتراضات وتنسي باقي الكلام.

_ لا والله أنا فاكرة كل حاجة بس حضرتك المدح عندك بيطلع بصعوبة شوية فطبيعي لما يحصل لازم نحتفل بيه.

ابتسم زين وهو بيقلب الورق، والابتسامة دي خلتني أسكت لحظة من غير سبب واضح، يمكن عشان كنت بدأت أشوف فيه جانب مختلف فعلًا، جانب مكنش بيظهر غير في اللحظات اللي بينسى فيها إنه لازم يفضل جاد طول الوقت.

خلص الاجتماع، وخرجت مع سليم نراجع بعض العينات اللي وصلت من الموردين، وقبل ما نمشي زين ناداني وطلب مني أسيب نسخة من الرسومات على مكتبه عشان يراجعها بعد اجتماع التنفيذ، فقلتله إني هبعتهاله على الإيميل، لكنه أصر ياخد نسخة مطبوعة، وفضلنا نتناقش دقيقتين في الموضوع لحد ما سليم اتدخل وقال إن الطابعة مش هتزعل لو استخدمناها، وإننا ممكن نوفر وقت الخناقة دي لحاجة أهم.

خرجنا وإحنا بنضحك، وسليم بصلي وهو ماشي جنبي وقال:

_ تعرفي إنك إنتي وزين بقيتوا متفاهمين أكتر من الأول بكتير؟ أنا بصراحة كنت فاكر إن واحد فيكم هيسيب المشروع قبل ما نخلص أول شهر.

ضحكت وأنا بعدل الشنطة على كتفي.

_ والله أنا نفسي كنت متوقعة كده بس هو طلع مش بالسوء اللي كنت متخيلاه، يعني لسه مستفز طبعًا بس فيه حاجات كويسة فيه مكنتش واخدة بالي منها في الأول.

سليم ابتسم وقال:

_ زين فعلًا مش شخص سهل بس لما تعرفيه كويس هتكتشفي إنه جدع جدًا هو بس مش بيعرف يبين ده بسهولة ويمكن عشان كده ناس كتير بتفهمه غلط.

هزيت راسي وأنا بفكر في كلامه، وبعدها غيرنا الموضوع ورجعنا للشغل، ومكنتش أعرف إن بعد ساعات قليلة هقول لزين كلام يناقض كل اللي كنت بقوله عنه الصبح، وإنه هيفضل آخر كلام بينا قبل ما كل حاجة تتغير.

•••••••••••••••••••••••••••••••••••••••••••••••••

اليوم كان ماشي كويس لحد بعد الضهر، خلصنا الاجتماع الصبح واتفقنا على أغلب التفاصيل، وكنت مبسوط من شغل ملك بصراحة، البنت عندها عين كويسة في التصميم وبتعرف توازن بين الشكل والتنفيذ، ودي ميزة مش موجودة عند كل الناس اللي اشتغلت معاهم، حتى لو هي مقتنعة إني مش بعمل حاجة في حياتي غير إني أعترض عليها.

بعد ما رجعت مكتبي لقيت تقرير من فريق التنفيذ بخصوص تعارض في بعض تفاصيل السقف المستعار مع مسارات التكييف، وكان لازم نعدل جزء من الرسومات قبل ما الشغل يكمل، اتكلمت مع المهندس المسؤول وبعدها مع الاستشاري، واتفقنا على مجموعة ملاحظات فنية، وبعت الإيميل بنفسي للشركة اللي ملك متعاقدة معاها وطلبت تحديث الرسومات قبل اجتماع اليوم اللي بعده.

كنت شايف إن ده إجراء طبيعي بحكم مسؤوليتي عن المشروع، لكن الحقيقة إني كنت مستعجل ومفكرتش إن المفروض أتكلم مع ملك الأول، خصوصًا إنها المسؤولة المباشرة عن التصميم، وده كان خطأ مني حتى لو القرار الفني نفسه صحيح.

على الساعة أربعة كنت قاعد براجع تقرير السلامة الخاص بالمعدات المستخدمة في المنطقة الغربية من الموقع، وكان فيه ملاحظة على إحدى منصات العمل المتحركة، وطلبت إيقاف استخدامها لحد ما يتم فحصها بشكل كامل، وفي الوقت ده سمعت خبطتين على باب المكتب.

_ اتفضل الباب مفتوح.

دخلت ملك وهي ماسكة شوية أوراق، ومن أول ما شوفت وشها عرفت إن فيه مشكلة، كانت متضايقة وواضح إنها جاية تتكلم في موضوع مش عاجبها، فحطيت القلم وبصيتلها مستني أسمع.

_ ممكن أفهم حضرتك ليه بعت تعديلات على الرسومات لشركة الاستشارات من غير ما تكلمني أو حتى تبلغني إن فيه ملاحظات جديدة؟

بصيت للأوراق اللي في إيدها، وبعدها قلت بهدوء:

_ مساء الخير الأول يا ملك وبعدين نتكلم في التعديلات، أنا مش فاهم إيه اللي حصل يستدعي إنك تدخلي متعصبة بالشكل ده.

اتضايقت أكتر من ردي، وقربت من المكتب وحطت الأوراق قدامي.

_ مساء النور يا زين، أنا متعصبة لأن الشركة بعتتلي إيميل بتطلب مني أعدل شغل أنا أصلًا معرفش إن حضرتك اعترضت عليه ومش شايفة إن ده تصرف طبيعي بين ناس شغالة على نفس المشروع.

اتعدلت في قعدتي وحاولت أشرح.

_ التعديلات دي نتيجة تعارض ظهر في التنفيذ وكان لازم نتحرك بسرعة عشان منأخرش الشغل وأنا بعت الملاحظات للجهة المسؤولة عن التصميم مش عملت حاجة من وراكي بقصد.

_ أنا مقولتش إنك عملتها بقصد بس النتيجة واحدة إنت تجاوزتني في حاجة تخص شغلي والمفروض إني أول واحدة تناقش معاها الملاحظات دي قبل ما تطلب تعديلها رسميًا.

كان كلامها منطقي في جزء منه، لكن طريقتها وهي بتتكلم خلتني أحس إنها جاية تحاسبني مش تناقشني، وبدل ما أقولها ببساطة إن كان المفروض أكلمها الأول، بدأت أدافع عن القرار.

_ ملك أنا المسؤول عن التنفيذ في النهاية ومش كل قرار فني محتاج نستنى عليه اجتماع كامل خصوصًا لما يبقى عندنا جدول زمني مضغوط بالشكل ده.

بصتلي باستنكار وقالت:

_ وأنا مش بطلب منك تستنى اجتماع كامل أنا بطلب منك تكلمني خمس دقايق قبل ما تبعت إيميل رسمي يخص شغلي هو ده طلب صعب للدرجة دي؟

_ مش صعب بس إنتي مكبرة الموضوع وبتتعاملّي معاه كأني بتعمد أقلل منك مع إننا اتكلمنا في تفاصيل كتير قبل كده وعمري ما تجاهلت رأيك لما يكون عندك ملاحظة مهمة.

_ المشكلة إنك شايف إن مجرد إني اعترضت على طريقتك معناه إني حساسة أو مكبرة الموضوع بدل ما تفكر لحظة إنك فعلًا ممكن تكون غلطان.

بدأت أضايق من أسلوبها، خصوصًا إنها كانت بتتكلم بسرعة ومش بتديني فرصة أكمل، فقلت بنبرة أحد شوية:

_ أنا معنديش مشكلة أعترف إني غلطت لما أغلط بس مش هفضل كل مرة أقنعك إني مش ضدك لمجرد إنك مش عاجبك قرار خدته.

سكتت لحظة وبعدين ردت وهي بتحاول تتحكم في عصبيتها:

_ وأنا مش محتاجة تقنعني إنك مش ضدي أنا محتاجة تحترم دوري في المشروع زي ما أنا بحترم مسؤوليتك لأن فكرة إنك صاحب القرار النهائي مش معناها إن باقي الناس وجودهم شكلي.

قمت من مكاني وقربت من طرف المكتب.

_ محدش قال إن وجودك شكلي لكن إنتي بتاخدي أي اختلاف في الرأي بشكل شخصي وده بيخلّي النقاش معاكي أصعب من اللازم، خصوصًا لما تكوني داخلة من البداية مقتنعة إني غلطان ومش مستعدة تسمعي السبب.

بصتلي بضيق واضح.

_ أنا سمعت السبب وفاهماه بس إنت اللي مش عايز تفهم إن المشكلة في الطريقة وبصراحة أنا تعبت من إني كل مرة أحتاج أشرحلك إن اعتراضي مش معناه إني بتحداك.

كان ممكن النقاش يقف عند النقطة دي، وكان ممكن نرجع نتكلم بهدوء، لكني كنت متعصب وهي كمان، وقلت جملة عارف دلوقتي إنها مكانتش عادلة.

_ لو التعامل معايا متعب للدرجة دي تقدري تطلبي من شركتك حد غيرك يكمل المشروع لأن أنا مش هقدر أغير نظام الشغل كله عشان كل قرار يبقى مناسب لطريقتك.

شوفت الصدمة في عيونها أول ما خلصت كلامي، وسكتت ثواني قبل ما تسألني بصوت أهدى:

_ إنت بتقولي أمشي من المشروع يا زين؟ بعد كل الشغل اللي عملته فيه لمجرد بس إني اعترضت على تصرف منك؟

حسيت إني بالغت، لكن العند خلاني أكمل بدل ما أتراجع.

_ أنا مقولتش إنك تمشي أنا بقول إن محدش مجبر يكمل في مكان مش مرتاح فيه ولو شايفة إن طريقتي مش مناسبة ليكي فده قرار يرجعلك.

هزت راسها وهي بتضحك ضحكة قصيرة مليانة ضيق.

_ غريبة أوي إنك بتتكلم عن الراحة وإنت أصلًا مش بتدي لحد فرصة يرتاح في التعامل معاك إنت لازم كل حاجة تمشي بطريقتك وأول ما حد يعترض بتحس إنه بيحاول يقلل منك.

بصيتلها بحدة.

_ إنتي دلوقتي بتتكلمي عن شخصيتي مش عن الشغل وده موضوع مختلف تمامًا وأنا مش شايف إن من حقك تحكمي عليا بالطريقة دي.

ردت وهي واقفة قدامي:

_ أنا مش بحكم عليك من موقف واحد يا زين أنا بتكلم عن حاجات شوفتها بنفسي وإنت فعلًا بتصعّب التعامل معاك حتى على الناس اللي بتحاول تفهمك.

الجملة ضايقتني، لكن اللي جه بعدها كان أصعب.

_ عارف، أنا بدأت أفهم ليه إنت دايمًا حاطط مسافة بينك وبين الناس، لأن أي حد بيحاول يقرب منك أو يتعامل معاك بشكل طبيعي بيلاقي نفسه مضطر يثبتلك طول الوقت إنه مش ضدك.

فضلت باصلها شوية، وبعدين سألتها:

_ وإنتي شايفة إنك عرفتي عني كفاية عشان تقولي الكلام ده؟ ولا مجرد إننا اختلفنا في الشغل خلاكي تقرري إنك فهمتي شخصيتي كلها؟

ردت بسرعة، وكان واضح إنها لسه متعصبة.

_ أنا مش بقول إني عارفة كل حاجة عنك بس عرفت إن التعامل معاك أصعب بكتير مما كنت متخيلة وإن الواحد مهما حاول يوصلك إنه مش بيهاجمك بتفضل شايفه كأنه واقف ضدك.

قلت وأنا بحاول أنهي النقاش:

_ يبقى وفري على نفسك المحاولة يا ملك أنا مطلبتش منك تحاولي تفهميني ولا طلبت منك تغيري رأيك فيا وإحنا في النهاية بينا شغل ومش أكتر.

اتغير وشها للحظة، وعرفت إن الجملة وجعتها، لكنها ردت وهي بتلم الأوراق من على المكتب:

_ متقلقش أنا فعلًا هعمل كده ومن النهارده كل اللي بينا هيبقى شغل وبس، لأن واضح إن دي الطريقة الوحيدة اللي تنفع معاك.

كنت فاكر إنها هتمشي، لكن قبل ما تتحرك بصتلي تاني وقالت بصوت هادي على غير المتوقع:

_ أنا بس عايزة أقولك حاجة أخيرة أنا فعلًا ندمانة إني افتكرت إن ورا طريقتك الصعبة شخص ممكن الواحد يرتاح معاه.

سكت.

مش عشان مكنش عندي رد، لكن عشان الجملة جت في مكان مكنتش متوقع إنها توصله، وفضلت باصصلها وأنا بحاول أستوعب إنها قالت الكلام ده فعلًا.

أنا اتقال عليا كلام كتير في حياتي، واتحكم عليا من ناس متعرفنيش، واتعاملت مع أشخاص كانوا شايفين إن سكوتي غرور وإن جديتي قسوة، لكن رأي الناس دي مكنش بيفرق معايا، إنما ملك كانت مختلفة، يمكن لأنها أول واحدة من فترة طويلة أسمح لنفسي أكون معاها على طبيعتي شوية، أهزر معاها وأضحك من غير ما أحسب كل كلمة، ويمكن لأني كنت بدأت أستنى وجودها من غير ما أعترف لنفسي بده.

اللي وجعني إنها مكنتش بتقول إنها زعلانة من تصرفي، كانت بتقول إنها شافت فيا حاجة كويسة وبعدين اكتشفت إنها كانت غلطانة.

بصيتلها وسألتها بهدوء:

_ إنتي فعلًا شايفة كده يا ملك؟ إنك غلطتي لما افتكرتي إن ممكن ترتاحي في التعامل معايا؟

اترددت لحظة، وده خلاني أستنى رد مختلف، لكنها في الآخر قالت:

_ أنا شايفة إن اللي حصل النهارده وضحلي حاجات كنت بتجاهلها ومش عايزة أفضل أبرر لنفسي تصرفات بتضايقني لمجرد إن فيه أوقات تانية بتكون كويس فيها.

هزيت راسي ببطء، وحسيت إن أي كلام زيادة ملوش لازمة.

_ كويس إنك عرفتي بدري عشان منفضلش فاهمين بعض غلط أكتر من كده.

بصتلي للحظة، وبعدها قالت إنها هتبعت ملاحظاتها على الإيميل ومشيت، وفضلت واقف مكاني لحد ما الباب اتقفل وراها.

الغريب إني مكنتش متعصب زي الأول، كنت زعلان، وزعلان منها تحديدًا، وده إحساس مكنتش عارف أتعامل معاه، خصوصًا إني عارف إن جزء من الخناقة حصل بسببي وإن طريقتي كانت قاسية، لكن ده مكنش بيقلل من وجع كلامها.

رجعت قعدت على الكرسي وحاولت أكمل شغلي، فتحت الملف وقريت أول سطر مرتين من غير ما أفهمه، وبعدها قفلته وحطيت إيدي على وشي، وأنا بسأل نفسي من إمتى رأي ملك فؤاد الراوي بقى يفرق معايا بالشكل ده.

•••••••••••••••••••••••••••••••••••••••••••••••••••

خرجت من مكتبه وأنا متعصبة جدًا، بس الغريب إن إحساسي مكنش إحساس حد خرج من خناقة وهو مقتنع إنه صح، كنت متضايقة من كلامه ومن طريقته، وفي نفس الوقت كل ما أفتكر وشه بعد آخر جملة قلتها أحس إني عملت حاجة غلط.

قابلت سليم في الممر، وكان واضح إنه لاحظ إني مش على طبيعتي، سألني إذا كان حصلت مشكلة، فقلتله إن فيه اختلاف في الشغل وإن الموضوع خلص، لكنه فضل باصصلي شوية كأنه مش مقتنع، وبعدها عرض يساعدني لو فيه حاجة محتاجة تتراجع، فشكرته ومشيت.

ركبت العربية وقعدت حوالي عشر دقايق من غير ما أشغلها، كنت بحاول أهدى وأرتب اللي حصل في دماغي، وكل ما أفتكر إن زين قاللي ممكن أطلب حد غيري يكمل المشروع أتعصب تاني، لكن بعدها على طول أفتكر سؤاله لما قالي إذا كنت فعلًا شايفة إني غلطت لما ارتحتله، وأحس إن نبرته كانت مختلفة عن أي مرة اتخانقنا فيها.

رجعت البيت ولقيت ماما في المطبخ، سلمت عليها ودخلت أوضتي بحجة إني تعبانة، وبعد شوية اتصلت بليلى وحكيتلها اللي حصل بالتفصيل، من أول الإيميل لحد آخر جملة بيني وبين زين.

ليلى فضلت ساكتة لحد ما خلصت، وبعدها قالت:

_ بصي يا ملك أنا مش هقولك إنك غلطانة في أصل الموضوع لأن زين فعلًا مكنش من حقه يتجاوزك في حاجة تخص شغلك، وكلامه عن إنك ممكن تمشي من المشروع كان مستفز بس إنتي كمان دخلتي في حتة شخصية ملهاش علاقة بالخناقة.

اتنهدت وأنا قاعدة على السرير.

_ أنا عارفة يا ليلى بس هو كان مستفزني بطريقة مش طبيعيه وكل ما أحاول أفهمه إني بتكلم عن أسلوبه يرد كأني بتحداه ولما قالي أمشي من المشروع حسيت إنه بيقلل من كل اللي عملته.

ليلى هزت راسها وقالت:

_ وأنا متفهمة ده بس قوليلي بصراحة، إنتي فعلًا ندمانة إنك ارتحتي له؟ لأنك من كام يوم كنتي بتحكيلي إنه بقى أهدى معاكي وإنك اكتشفتي فيه حاجات كويسة.

سكت شوية قبل ما أرد.

_ لا أنا مش ندمانة إني ارتحتله بس انا كنت متعصبة وعايزة أوصله قد إيه طريقته ضايقتني والكلام طلع مني بشكل أوحش مما كنت أقصد.

ليلى بصتلي بابتسامة خفيفة.

_ يبقى اعتذري عن الكلام ده مش عن موقفك في الشغل لأن فيه فرق كبير بين إنك تتمسكي بحقك وإنك تجرحي حد لمجرد إنه جرحك.

فضلت أفكر في كلامها، وبعدها قلت:

_ أنا أصلًا كنت ناوية أكلمه بكرة بس مش عارفة هيتعامل معايا إزاي خصوصًا إن آخر رد منه كان بارد جدًا.

_ ما هو ممكن يكون اتضايق فعلًا يا ملك ومش لازم كل مرة الشخص يزعق عشان نعرف إن الكلام وجعه ساعات الهدوء بيبقى معناه إنه مش عارف يرد.

الكلام خلاني أفتكر وش زين تاني، والطريقة اللي سألني بيها إذا كنت فعلًا شايفة إني غلطت لما ارتحتله، وحسيت بضيق أكبر، فقررت إني أول ما أشوفه تاني يوم هتكلم معاه بهدوء، وهعتذر عن الجملة دي تحديدًا، وبعدها نقدر نناقش مشكلة الشغل من غير ما نجرح بعض.

قفلت مع ليلى وفتحت محادثة زين، كتبت رسالة طويلة نسبيًا بقول فيها إني عارفة إننا اتعصبنا على بعض وإن كلامي الأخير مكنش عادل، لكن قبل ما أبعتها حسيت إن الاعتذار ده محتاج يتقال قدامه، خصوصًا إني عايزاه يعرف من طريقتي إني فعلًا مكنتش أقصد أوجعه، فمسحت الرسالة وقررت أستنى لبكرة.

مكنتش أعرف إن قرار التأجيل البسيط ده هيفضل يوجعني بعد كده أكتر من الخناقة نفسها.

•••••••••••••••••••••••••••••••••••••••••••••••••••

في مكتب زين، كان سليم قاعد قدامه وبيحاول يفهم سبب شروده، لأنه من ساعة ما دخل المكتب وهو شايف صاحبه مش على طبيعته، وزين رغم محاولاته إنه يركز في الملفات كان واضح إن فيه حاجة شاغلاه.

_ بص يا زين أنا مش هفضل أسألك إنت وملك اتخانقتوا على إيه بس واضح إن الموضوع مضايقك ولو إنت غلطت في حاجة فمفيش مشكلة إنك تصلحها ولو هي غلطت برضو ممكن تتكلموا لما تهدوا بدل ما الشغل يتأثر.

زين ساب القلم من إيده وبصله.

_ أنا عارف إني غلطت في جزء من اللي حصل وكان المفروض أتكلم معاها قبل ما أبعت التعديلات، بس الموضوع خرج من إطار الشغل وهي قالت كلام مكنتش متوقع أسمعه منها.

سليم اتعدل في قعدته.

_ طب ما يمكن كانت متعصبة وإنت عارف إن ملك لما بتتضايق بتتكلم بسرعة وده مش معناه إنها قاصدة كل كلمة قالتها.

زين سكت شوية، وبعدها قال وهو باصص قدامه:

_ المشكلة مش في الكلمة نفسها يا سليم المشكلة إن فيه كلام لو سمعته من أي حد ممكن يعدي عادي لكن لما ييجي من شخص إنت مقدر رأيه فيك بيبقى صعب تتجاهله.

سليم بصله باهتمام، لكنه فهم إن زين متضايق من حكم ملك عليه، ومخطرش في باله إن الموضوع ممكن يكون أعمق من كده، خصوصًا إن زين نفسه كان بيتكلم بحذر كأنه مش عايز يعترف حتى لنفسه بسبب زعله.

_ أنا فاهم قصدك بس متخليش خناقة واحدة تنسيك إنكم بقيتوا متفاهمين وملك مش من النوع اللي يتعمد يظلم حد يمكن لما تهدى تراجع كلامها وتعتذر.

زين هز راسه من غير ما يرد، وبعدها غير الموضوع وسأله عن تقرير السلامة الخاص بالمنطقة الغربية، وطلب منه يتأكد إن منصة العمل اللي اتبلغ عن مشكلتها متوقفة تمامًا لحد الفحص، واتفقوا إن زين هيروح يعاين المنطقة بنفسه الصبح مع مهندس السلامة.

بعد ما رجع زين البيت، قعد مع والدته شوية، وكانت ملاحظة إنه ساكت أكتر من المعتاد، فسألته إذا كان متضايق من الشغل، لكنه طمنها وقال إنه مجرد يوم طويل، وبعدها طلع أوضته وفضل ماسك الموبايل فترة.

فتح محادثة ملك وكتب رسالة بيقول فيها إنه كان المفروض يكلمها قبل ما يبعت التعديلات، وإنه مكنش يقصد يقلل من دورها في المشروع، لكنه وقف قبل ما يكمل، لأنه كان لسه متضايق من كلامها، فمسح الرسالة وقفل الموبايل.

كان نفسه الأمور ترجع طبيعية بينهم، لكنه مكنش عارف يبدأ منين، والأغرب إنه كان مستغرب أصلًا من رغبته في إنه يصلح العلاقة بينهم بالسرعة دي، لأنه طول عمره لما بيتضايق من حد بيفضل يبعد لحد ما يهدى، لكن المرة دي كان نفسه يسمع منها إنها مكنتش تقصد اللي قالته.

••••••••••••••••••••••••••••••••••••••••••••••••••••

تاني يوم صحيت بدري، وفطرت مع ماما قبل ما أنزل، وكانت مستغربة إني هادية ومش بجري في البيت زي كل يوم، فهزرت معاها وقلت إن فيه احتمال أكون بدأت أتعقل أخيرًا، فضحكت وقالت إنها مش هتصدق المعجزة دي غير لما تشوفها مستمرة أسبوع كامل.

كان عندي اجتماع مع المورد خارج الموقع، وبعده المفروض أرجع عشان أراجع العينات الجديدة مع سليم، وكنت مقررة إني أول ما أوصل هروح لزين وأطلب منه نتكلم، من غير ما أستنى هو يبدأ ولا أفتح موضوع مين غلط أكتر من التاني.

وأنا في العربية فكرت أبعتله رسالة أسأله إذا كان فاضي بعد الضهر، لكني تراجعت لما افتكرت آخر كلام بينا، وقلت لنفسي إن المواجهة المباشرة هتبقى أحسن، خصوصًا إننا محتاجين نتكلم في مشكلة الشغل كمان.

وصلت اجتماع المورد وبدأنا نراجع العينات، وكان المفروض الموضوع ياخد ساعة بالكتير، لكنه طول بسبب اختلاف في بعض المواصفات، وأنا كنت بحاول أخلص من غير ما أستعجل القرار، لأن آخر حاجة محتاجاها إننا نعتمد خامة غلط ونرجع نتخانق عليها بعدين.

حوالي الساعة الحداشر ونص، وأنا بشرح ملاحظاتي على إحدى العينات، الموبايل رن باسم سليم، فبصيت للشاشة وقفلت الرنة وبعتله إني في اجتماع وهكلمه بعد شوية، لكن بعدها بدقيقة رن تاني، ولما رن للمرة التالتة حسيت إن فيه حاجة مش طبيعية، فاستأذنت وخرجت للممر ورديت عليه.

_ أيوه يا سليم معلش كنت في الاجتماع فيه مشكلة حصلت في الموقع ولا محتاجين مني حاجة ضروري؟

سمعت صوته متغير، وكان واضح إنه بيحاول يتكلم بهدوء.

_ ملك إنتي لسه عند المورد ولا اتحركتي؟

_ أنا لسه عند المورد يا سليم بس إنت مالك؟ صوتك مش طبيعي حصل إيه؟

سكت لحظة قبل ما يرد.

_ حصل حادث في الموقع يا ملك وزين اتصاب والإسعاف نقلته المستشفى وإحنا دلوقتي مستنيين الدكاترة يطمنونا عليه.

فضلت ساكتة كام ثانية وأنا بحاول أفهم الكلام، وبعدها سألت بسرعة:

_ زين اتصاب إزاي؟ هو وقع ولا حاجة وقعت عليه؟ طب هو كويس دلوقتي وبيتكلم معاكم؟

سليم خد نفس طويل وقال:

_ هو وقع وقت معاينة في المنطقة الغربية ولما الإسعاف وصل كان فاقد الوعي والدكاترة دلوقتي بيعملوا الفحوصات وأنا مش عايز أقولك حاجة مش متأكد منها.

حسيت إن رجلي مش شايلاني، فاتسندت على الحيطة وأنا بحاول أستوعب.

_ يعني إيه فاقد الوعي يا سليم؟ هو لسه مفاقش؟ إنت شوفته بنفسك ولا حد بلغك بس؟

_ أنا كنت معاه قبل ما الإسعاف تنقله، وهو فعلًا مكنش واعي بس دلوقتي في المستشفى والدكاترة بيتعاملوا معاه فمحتاجك تهدي شوية وتخلي حد يوصلك لو هتيجي.

حطيت إيدي على بوقي وحاولت أتكلم من غير ما صوتي يبان متقطع.

_ ابعتلي عنوان المستشفى دلوقتي وأنا هاجي حالًا وبالله عليك أول ما تعرف أي حاجة عنه كلمني حتى لو حاجة بسيطة.

_ حاضر يا ملك هبعتلك العنوان وخلي بالك من نفسك في الطريق، وأنا هنا ومش هسيبه.

قفلت المكالمة وفضلت واقفة مكاني، كنت سامعة صوت الناس في قاعة الاجتماع ورايا، لكن مش قادرة أركز في أي حاجة، وكل اللي بيتكرر في دماغي إن زين اتصاب وإنه فاقد الوعي.

وبعدها حسيت إني هعيط، ففتحت الموبايل واتصلت بليلى وطلبت منها تيجي تاخدني عشان مش قادرة أسوق.

دخلت القاعة واعتذرت عن إني لازم أمشي لظرف طارئ، ولميت حاجتي بسرعة، وخرجت استنى ليلى وأنا بحاول أتصل بسليم مرة تانية، لكنه مردش، ففضلت ماسكة الموبايل ومستنية أي رسالة منه.

لما ليلى وصلت وركبت جنبها، أول ما شافت وشي عرفت إن الموضوع كبير، وسألتني بهدوء عن اللي حصل، فحكيتلها اللي سليم قاله وأنا بحاول أمنع دموعي، لكنها نزلت غصب عني أول ما قلت إن زين لسه مفاقش.

_ يا ليلى أنا مش مستوعبة أنا كنت هروح أكلمه النهارده وأعتذرله، هو إزاي من امبارح للنهارده يحصل له كل ده؟

ليلى بصتلي بقلق وهي بتتحرك بالعربية.

_ يا حبيبتي ربنا يقومه بالسلامة بس حاولي متربطيش اللي حصل بالخناقة إنتي مكنتيش تعرفي إن فيه حادث هيحصل وهو دلوقتي محتاج دعواتكم مش إنك تفضلي تلومي نفسك.

مسحت دموعي وقلت:

_ أنا عارفة إن الخناقة ملهاش علاقة بالحادثه بس آخر مرة شوفته فيها كان زعلان مني بجد وأنا شوفت ده في عيونه ومصلحتش اللي حصل وفضلت أقول هكلمه بكرة كأن بكرة دي حاجة مضمونة.

ليلى سكتت لحظة وبعدين قالت:

_ إن شاء الله هتكلميه لما يتحسن وساعتها اعتذريله وقوليله كل اللي إنتي عايزاه بس دلوقتي لازم نستنى نعرف حالته بدل ما نفترض الأسوأ.

فضلت باصة من الشباك، والطريق كان زحمة بشكل مستفز، وكل ما نقف عند إشارة أحس إني عايزة أنزل وأجري، وفي وسط الخوف ده كنت بفتكر تفاصيل صغيرة ملهاش علاقة بالحادث، ضحكته، طريقته وهو بيراجع الرسومات، كلامه عن الجمعية اللي هيعملها لتعطيل شغلي، وحتى نبرته وهو بيقولي كويس إنك عرفتي بدري.

مكنتش عارفة ليه كل التفاصيل دي بتظهر في دماغي دلوقتي، بس كنت حاسة إني عايزة أرجع لامبارح خمس دقايق بس، أرجع للحظة اللي كان واقف فيها قدامي وأسحب آخر جملة قلتها، أو على الأقل أقولها بشكل تاني، أو حتى أسكت وأمشي بدل ما أوجعه.

رن الموبايل في إيدي، ولما شفت اسم سليم رديت بسرعة.

_ أيوه يا سليم طمني عليه.

صوته كان مرهق جدًا.

_ الدكاترة لقوا نزيف داخل الجمجمة بسبب إصابة الرأس وهو دخل العمليات دلوقتي عشان يتعاملوا معاه ولسه مستنيين نعرف النتيجة.

حسيت إن نفسي اتقطع، وبصيت لليلى اللي كانت مركزة في الطريق.

_ عمليات يا سليم؟ يعني حالته خطيرة للدرجة دي؟ هو ممكن يفوق بعدها على طول؟

_ أنا مش هكدب عليكي يا ملك الدكتور قال إن الإصابة خطيرة بس هما بيعملوا كل اللي يقدروا عليه ومش هيقدروا يحددوا حاجة غير لما يخلصوا ويشوفوا حالته.

سكت شوية، وبعدها قلت بصوت واطي:

_ أنا قربت أوصل بالله عليك خليك معاه ومتسيبوش لوحده.

رد سليم بنبرة اتكسرت لأول مرة:

_ أنا مش هسيبه يا ملك ده أخويا وإنتي عارفة كويس هو بالنسبة لي إيه.

قفلت المكالمة وفضلت باصة قدامي، وليلى سألتني الدكتور قال إيه، فحكيتلها وأنا بحاول أتماسك، لكنها أول ما سمعت كلمة عمليات مدت إيدها وناولَتني مناديل من غير ما تتكلم، يمكن لأنها عرفت إن أي كلام هتقوله دلوقتي مش هيغير إحساسي.

•••••••••••••••••••••••••••••••••••••••••••••••••

في المستشفى كان سليم واقف قدام قسم العمليات، وتليفونه في إيده من كتر المكالمات اللي بيرد عليها، لكن رغم إنه كان بيحاول يتصرف بعقل ويبلغ المسؤولين في الشركة بالإجراءات اللازمة، كان كل شوية يبص ناحية الباب كأنه مستني زين يخرج بنفسه ويقوله إن الموضوع كله سوء تفاهم.

والدة زين وصلت بعد ما سليم بلغها، وكانت منهارة من الخوف، أول ما شافته جريت عليه وسألته عن ابنها، فحاول يطمنها على قد المعلومات اللي عنده من غير ما يخبي عنها إن الإصابة خطيرة.

_ يا سليم أنا عايزة أشوفه إنت بتقولي إنه في العمليات من ساعة ما جيت طب حد طلع قالكم هو عامل إيه؟ أنا مش قادرة أستحمل الانتظار ده.

قرب منها وخلاها تقعد على الكرسي.

_ يا امي أنا عارف إن الانتظار صعب بس الدكاترة قالوا إنهم محتاجين يتعاملوا مع النزيف بسرعة وإحنا لازم نستنى لحد ما يطلعوا يشرحوا لنا، وأنا معاكي ومش هسيبك لحظة.

بصتله بعينين مليانين دموع وقالت:

_ هو خرج من البيت الصبح وكان بيقولي إنه هيرجع بدري عشان نتغدى سوا، أنا حتى سألته إذا كان تعبان عشان كان ساكت شوية وقالي إنه كويس مش قادرة أصدق إن ابني دلوقتي جوه العمليات.

سليم نزل عينه للأرض، لأنه افتكر زين وهو واقف قدامه الصبح وبيتكلم عن الشغل، وافتكر إنه كان لسه متضايق من خناقته مع ملك، وحس إن اليوم اللي بدأ عادي جدًا اتحول في ساعات لحاجة محدش كان مستعد لها.

بعد انتظار طويل خرج الطبيب المسؤول واتكلم معاهم، شرح إن زين تعرض لإصابة شديدة في الرأس نتج عنها نزيف داخل الجمجمة، وإن الفريق الجراحي تعامل مع النزيف، لكن فيه تورم وإصابة في أنسجة المخ محتاجين متابعة دقيقة، بالإضافة لإصابات في الصدر بتستلزم دعم التنفس والمراقبة المستمرة.

سليم سأله إذا كان زين عدى مرحلة الخطر، لكن الطبيب وضح إن العملية كانت خطوة ضرورية وإن الساعات والأيام الجاية مهمة، وإنهم مش هيقدروا يحددوا موعد استعادة الوعي أو النتيجة النهائية في الوقت الحالي.

والدة زين بدأت تعيط وهي بتسأل إذا كان ممكن تشوفه، فقال الطبيب إنهم هينقلوه للعناية المركزة، وإنه هيكون تحت تأثير أدوية التهدئة مع تأثر مستوى وعيه بسبب إصابة المخ، وممكن يسمحوا بزيارة قصيرة بعد استقرار الإجراءات الأولية.

سليم حاول يتمالك نفسه وهو بيسمع التفاصيل، لكن أول ما الطبيب مشي سند ضهره على الحيطة وأخد نفس طويل، لأنه لأول مرة يحس إن كل القرارات اللي اتعود ياخدها مع زين ملهاش أي قيمة قدام حاجة زي دي، وإنه مهما حاول ينظم الأمور في الشركة أو يطمن الناس مش هيقدر يعمل الحاجة الوحيدة اللي نفسه فيها، وهي إنه يخلي صاحبه يفتح عينيه.

في اللحظة دي وصلته رسالة من ملك بتقوله إنها وصلت المستشفى وبتسأله هو فين، فبعتلها رقم الدور ومكان العناية، وبعدها وقف مستنيها وهو عارف إن الخبر اللي هيقولهولها مش سهل.

••••••••••••••••••••••••••••••••••••••••••••••••••

دخلت المستشفى وليلى كانت ماشية جنبي بتحاول تعرف من الاستقبال مكان العناية المركزة، لكن أنا مكنتش قادرة أستنى، أول ما سليم بعتلي رقم الدور اتحركت ناحية الأسانسير بسرعة، وفضلت طول الطريق أبص على الأرقام وهي بتتغير كأنها بتتحرك أبطأ من الطبيعي.

لما وصلت الدور لقيت سليم واقف عند آخر الممر، وجنبه ست كبيرة عينيها حمرا من العياط، وأول ما شافني اتحرك ناحيتي، لكني سبقته وجريت عليه وأنا بسأله عن زين.

_ سليم طمني عليه هو خرج من العمليات؟ الدكتور قال إيه؟ بالله عليك متفضلش ساكت كده عشان أنا من ساعة ما كلمتني ومش عارفة أتنفس.

سليم قرب مني وقال بصوت هادي رغم التعب اللي واضح عليه:

_ العملية خلصت يا ملك والدكاترة قدروا يتعاملوا مع النزيف بس الإصابة في الرأس خطيرة وهو دلوقتي في العناية المركزة، ولسه محتاج متابعة دقيقة.

بصيتله وأنا بحاول أفهم.

_ طب هو فاق بعد العملية؟ يعني فتح عينيه أو اتكلم معاكم؟ إنت شوفته؟

هز راسه بالنفي.

_ لأ يا ملك هو لسه مفاقش والدكاترة قالوا إن مستوى وعيه متأثر بإصابة المخ وهو كمان تحت أدوية تهدئة عشان حالته تستقر، فمش قادرين يحددوا إمتى ممكن يستعيد وعيه.

حسيت إن الأرض بتتحرك من تحتي، واتسندت على الحيطة وأنا بسأله بصوت واطي:

_ يعني هو في غيبوبة يا سليم؟ هو مش حاسس باللي حواليه ومش قادر يسمعنا؟

سليم بصلي بحزن وقال:

_ الدكتور قال إنه فاقد الوعي وإن الحالة معقدة بسبب الإصابة والأدوية ولسه بدري نعرف درجة استجابته، بس هو تحت متابعة مستمرة وإحنا لازم نستنى ونشوف الأيام الجاية هتكون عاملة إزاي.

فضلت باصة له شوية، وبعدها بصيت ناحية الست اللي كانت قاعدة على الكرسي، وعرفت من ملامحها إنها والدته، فقربت منها وسلمت عليها وعرفتها بنفسي، ولما قالتلي إنها عارفة اسمي من زين حسيت بغصة غريبة في حلقي، لكني حاولت أتماسك وأنا بدعيله إنه يقوم بالسلامة.

والدته مسكت إيدي وقالت وهي بتعيط:

_ أنا مش عايزة حاجة غير إنه يفتح عينيه يا بنتي أنا طول عمري بشوفه شايل هم كل حاجة ومبيشتكيش، وعمري ما تخيلت إني أشوفه عاجز بالشكل ده.

قعدت جنبها شوية وحاولت أطمنها، مع إني كنت محتاجة حد يطمني أنا كمان، وبعدها بصيت لسليم وسألته إذا كان ممكن أشوف زين ولو لدقيقة واحدة، فقال إنه هيسأل الممرضة لأن الزيارة محدودة جدًا، وفضلت مستنياه وأنا مش قادرة أبعد عيني عن باب العناية.

بعد شوية رجع وقال إنهم هيسمحوا بزيارة قصيرة بعد ما يخلص الفريق الطبي الإجراءات اللي عنده، وطلب مني ألتزم بتعليمات الممرضة، فهزيت راسي وقلتله إني مش عايزة غير أشوفه بعيني وأطمن إنه قدامي.

لما الممرضة نادت عليا، مشيت وراها بخطوات بطيئة، وكل ما أقرب من الباب أحس إني خايفة أكتر، مش عارفة خايفة من شكله ولا من إني أشوفه ومقدرش أعمل له أي حاجة، لكن أول ما دخلت الغرفة وشوفته على السرير وقفت مكاني من غير ما أحس.

كان نايم وسط الأجهزة، وفيه ضمادة على جانب راسه، ووشه شاحب بشكل خوّفني وأنبوبة التنفس موصولة بجهاز بيساعده يتنفس وعينيه مقفولين، ومفيش أي حاجة من حركته المعتادة أو طريقته الواثقة اللي كنت بشوفها كل يوم.

فضلت واقفة عند الباب ثواني لحد ما الممرضة قالتلي إني ممكن أقرب من السرير من غير ما ألمس الأجهزة، فاتحركت ناحيته وأنا بحاول أستوعب إن ده نفس زين اللي كان واقف قدامي امبارح وبيتناقش معايا بعصبية، ونفس الشخص اللي كان بيضحك الصبح على كلامي في الاجتماع.

وقفت جنبه وبصيت لوشه، وحاولت أتكلم لكن صوتي مطلعش من أول مرة

تعليقات



<>