رواية رشيد وكارمن الفصل السابع7بقلم ملك ابراهيم

"رشيد قرر يحارب الدنيا كلها عشان كارمن.

بس أمها كانت ليها رأي تاني.. وكانت ناوية تبيعها لواحد تاني!

يا ترى رشيد هيلحقها؟ ولا القدر هيفرقهم قبل ما يبدأوا؟" 

كارمن كانت هتمشي من قدامه لكنه مسك ايديها بسرعة وقال ليها بشغف: "خلاص انا بهزر معاكي والله عشان وحشتيني اوي."

حس بارتعاش ايديها بين ايديه، خفق قلبها بقوة، شحب وشها من شدة الخجل والتوتر ووطت وشها في الأرض.

بص لصاحبتها اللي واقفة وبتتابع اللي بيحصل بينهم باستغراب وصدمة، ابتسم ليها وقال ليها بنبرة هادية: "شكراً.. انا خلاص لقيت اللي بدور عليها."

بصت ليهم سما بصدمة. رجع ببصره لكارمن وأخد ايديها من غير ما يتكلم، مشي في طريقه لعربيته وهي ماشية جنبه في حالة من الذهول، وقف قدام عربيته بره الجامعة وقال ليها بابتسامة: "يلا اركبي."

سحبت ايديها من بين ايديه بتوتر وهمست ليه بارتباك: "هنروح فين؟!"

ابتسم ليها وجاوب بشغف: "هنروح اي مكان هادي عشان نتكلم مع بعض شويه.. انتي بقالك اكتر من شهر مبتخرجيش من البيت وانا مش عارف اوصلك عشان نتكلم!"

اتوترت كتير بعد طلبه الكلام معاها، وقالت بصوت مبحوح: "انا عارفه انت عايز تتكلم معايا في ايه.. متقلقش انا نسيت اي كلام انت قولته قبل ما تعرف اللي ماما عملته مع باباك!"

اتأملها باستغراب، مش عارف هي تقصد ايه! عقد ما بين حواجبه وقال: "مش فاهم.. انتي تقصدي ايه؟"

حست بغصة في حلقها من شدة التوتر، بلعت ريقها وتلألأت عينيها بالدموع وجاوبته بصوت مبحوح: "انا عارفه انك ندمان على كل الكلام اللي قولتهولي في المستشفى، بس صدقني انا مكنتش اعرف ان ماما اتجوزت باباك.. انا اصلا مش بعرف حاجة عن ماما."

تابع انفعالاتها بدهشة، وبعدين قرب منها ومسك بايديها بقوة وقال ليها بنبرة حادة: "ارفعي عينك يا كارمن وبصيلي."

هزت راسها بالرفض بعد ما خدعتها دموع عينيها وبدأت تتساقط رغم عنها، زاد صوته في الحدة وقال ليها مرة تانية: "بصيلي يا كارمن."

اترعش جسمها بين ايديه، رفعت عينيها وبصت ليه وهي بتبكي، اتأمل عينيها وقال ليها بصوت قوي: "انا بحبك.. فهماني.. بحبك."

وكأن كلامه رجع الروح لجسمها من جديد، حدقت بيه بقوة وهي بتحاول تستوعب اللي قاله ليها، هز راسه بالموافقة وقال ليها بتأكيد: "انا بحبك يا كارمن ومشاعري اتجاهك مستحيل تتغير، وكل كلمة قولتهالك واحنا في المستشفى مستعد اقولهالك تاني.. انا بحبك ومستحيل اتخلى عنك.. وهو ده اللي عايز اتكلم معاكي فيه."

حست بصعوبة في التقاط أنفاسها، شاورت ليه بايديها عشان تقدر تستوعب اللي بيقوله دلوقتي، ابتسمت، وبعدين وسعت ابتسامتها أكتر وهي بتبص ليه بسعادة، قلبها بقى بينبض بعشقه دلوقتي. ابتسامتها أحيت قلبه من جديد. التقطت أنفاسها وقالت ليه بسعادة: "انا مش عارفه اقولك ايه يا رشيد."

احمرت وجنتيها من شدة الخجل، تابع خجلها بنظرات عاشقة، ابتسم بسعادة وقال ليها بشغف: "قوليلي انتي بتبادليني نفس المشاعر ولا لأ؟"

هزت راسها بالموافقة وجاوبته من غير تردد: "طبعا ببادلك نفس المشاعر واكتر."

ابتسم بسعادة وهو بيسمع اعترافها انها بتبادله نفس المشاعر، أراد يقرب منها أكتر ويحضنها بقوة ويحيطها بدراعاته بين ضلوعه، وقف للحظة وبص حواليه، مازالا واقفين قدام المبنى الجامعي، طلب منها تركب جوه عربيته معاه واتجه لمقعد القيادة وانطلق بالعربية.

وقفت سما صاحبة كارمن قدام المبنى الجامعي وهي بتتابع تحرك العربية وكارمن جواها، حاولت انها تفتكر فين شافت الشاب ده، افتكرت بعد عدة محاولات، همست لنفسها بصدمة بعد ما افتكرته "افتكرته.. هو نفس الظابط اللي انقذنا"

رواية رشيد وكارمن بقلمي ملك إبراهيم. 

وقف رشيد بعربيته قدام بيت والدة كارمن، كانت كارمن بتوطي وشها بخجل وهي قاعدة جنبه، تابع خجلها بابتسامة وقال ليها بهدوء: "وصلنا قدام البيت."

رفعت عينيها وبصت اتجاه بيتها وبعدين وطت وشها مرة تانية، اتأملها بنظرات عاشقة وقال ليها بشغف: "كارمن انتي ليه متغيره كده؟ حاسس ان في حاجة غريبة بتحصل معاكي؟!"

اترعش جسمها شوية وبصت ليه بتوتر، تابع توترها بقلق وقال مرة تانية: "كارمن انتي سمعاني؟"

هزت راسها بصمت، استنى إجابتها بقلق. استرسل ليها عقلها بسرعة كلام والدتها وتحذيرها ليها انها متشوفوش مرة تانية، ازاي هتقوله انها بتبادله نفس المشاعر ومش ممكن تكون معاه!

حس ان في صراع داير جواها، وقال ليها بثقة عشان تقوله اللي بتفكر فيه: "انا عايزك تكوني صريحة معايا يا كارمن، ولو انا فهمت غلط واتسرعت في مشاعري ياريت تنسي....."

قاطعته بسرعة قائلة بتأكيد: "لا يا رشيد انا بحبك بس خايفه!"

ابتسم لما سمع اعترافها الصريح بحبه، لكن بهتت ابتسامته بسرعة لما فكر في سبب خوفها! اتعمق في النظر ليها وقال ليها بقلق: "خايفه من ايه كارمن؟"

بهتت ملامحها بالحزن، كانت في حيرة من أمرها! ازاي هتقوله ان والدتها مش عايزاه جوز لبنتها، ازاي هتقوله برفضها وتحذيرها ليها، لازم تقوله بكل حاجة عشان يساعدها على أخد القرار الصحيح، بلعت ريقها وقالت ليه بتوتر: "ماما مش موافقة على علاقتنا.. وكمان منعتني اشوفك مرة تانيه."

مستغربش كتير بعد ما قالت ليه كده، هز راسه بالايجاب بيأكد ليها انه عارف ان دا هيكون رأي والدتها ، سكتت شوية وهي بتبص له. 

حدق بالفراغ قدامه وهو بيفكر في والدتها وعيلته هو كمان، ازاي هيقول لجده انه عايز يتجوز بنت الست اللي اتجوزت والده مقابل الفلوس ويعرف تاريخها السيء كويس، وازاي هيواجه والدته بعد ما تعرف انه عايز يتجوز بنت الست اللي سرقت منها جوزها، وازاي هيواجه والده بعد ما رفض جوازه من الست دي وهو دلوقتي عايز يتجوز بنتها، عارف ان علاقتهم هتكون مرفوضة من عيلته ووالدتها، لكنه مش ممكن يتخلى عنها ويسيبها ضحية لأفعال والدتها، بص ليها بعد صمت دام لدقايق قليلة وبعدين قال ليها بثقة: "متقلقيش انا هفضل معاكي واكيد هلاقي طريقه اقنع بيها مامتك.."

تنهيدة حارة خرجت من صدره وهو بيضيف جواه: "ولازم اقنع عيلتي كمان!"

كارمن ابتسمت بسعادة ولمست ايديه بشغف: "انا واثقة فيك يا رشيد."

بص لايديها اللي بتلمس ايديه وبتتمسك بيه بثقة، خفق قلبه بقوة وبص ليها وقال بتأكيد: "وانا هكون قد ثقتك فيا وصدقيني انتي مش هتكوني غير ليا انا وبس."

ابتسمت بسعادة وهي بتسمع كلماته اللي بتسعد قلبها، وسع ابتسامته بسعادة وهو بيتابع ابتسامتها الرائعة وملامح وشها الرقيقة، قد ايه اتمناها من كل قلبه، مش عايز غيرها في العالم ده، هي بس اللي خفق قلبه عشانها، هي بس اللي شايلها جوه ضلوعه ومش ممكن يعيش من غيرها.

اتكسفت من نظراته ليها، فتحت باب العربية وهمست ليه بصوتها الرقيق: "انا لازم انزل دلوقتي عشان ماما متشوفناش مع بعض."

هز راسه بالايجاب وهو مازال بيتأملها بنظرات عاشقة، اتكسفت من نظراته وجريت بسرعة لبيتها وهي بتلتفت ليه بخفة وبتشاور ليه بايديها بتودعه بسعادة.

{فاقت من شرودها وذكرياتها معاه وهي بتجفف دموعها}

همست بحزن ودموع: معقول يا رشيد السنين نستك حبك ليا.. معقول ممكن تكون اتجوزت غيري وخلفت منها كمان. 

رواية رشيد وكارمن بقلمي ملك إبراهيم. 

عند رشيد. 

وقف رشيد بعربيته قدام برج سكني كبير في واحدة من المناطق الراقية، نزل من العربية واتجه لجوه البرج السكني حيث شقته في الدور السادس.

وقف قدام باب الشقة اللي كان متجوز كارمن فيها، مجاش الشقة هنا من أربع سنين! طلع المفتاح الخاص بيه وفتح باب الشقة ودخل بخطوات هادية، ذكرياته معاها مازالت في كل مكان حواليه، ولع الأنوار وبص حواليه باشتياق، متغيرش حاجة! كل حاجة زي ما هي من يوم ما رتبتها هي بايديها. مسد بايديه فوق الأثاث وهو ماشي جوه الشقة وبيفتكر ازاي تم جوازهم.

{أخدته الذكريات للماضي، وبدأ يفتكر إزاي أتجوز كارمن}

رشيد وقتها قرر يقول لعيلته برغبته في الجواز من كارمن. راح لأوضة جده وقعد قدامه وقال بتوتر: "انا عايز اتكلم مع حضرتك في موضوع مهم."

رحب جده بالكلام معاه وساب اللي بيعمله وقعد بيسمعه باهتمام، قال لجده من غير مقدمات: "في بنت انا عرفتها من فترة.. البنت دي كويسه جدا وفي بينا مشاعر متبادلة.. انا بحبها من كل قلبي وبتمنى تكون مراتي بشرع ربنا."

ابتسم جده بسعادة وقال بحماس: "ده احلى خبر انا ممكن اسمعه النهاردة، متعرفش انا كنت بتمنى قد ايه اليوم اللي تيجي وتقولي فيه انك هتتجوز وتحقق امنيتي واشوف عيالك قبل ما اموت."

حماس جده الزايد لفكرة جوازه خلاه يحس بالتوتر أكتر: "ربنا يخليك لينا ان شاء الله يا جدي وتشوف عيالنا وتجوزهم كمان."

لاحظ جده توتره الزايد وحدق بيه باهتمام متسائل: "في ايه يا رشيد! من اول ما قعدت قدامي وانا حاسس ان في حاجة عايز تقولها ومتردد؟"

هز راسه بالموافقة: "فعلاً يا جدي في حاجة عايز اقولها ومش عارف اقولها ازاي!"

اتأمله جده باهتمام وكمل بثقة: "اتكلم يا رشيد وبدون مقدمات."

بص لجده وكمل بهدوء: "البنت اللي انا بحبها.. اكتشفت من فترة انها تبقى..."

تابعه جده بفضول وحس ان في حاجة مهمة عايز حفيده يقولها ليه ومش قادر يقولها بسهولة، استنى انه يتابع رشيد كلامه براحة ومن غير ضغط، زفر رشيد من توتره الزايد وكمل مسرع في الكلام: "اكتشفت انها تبقى بنت الست اللي بابا اتجوزها."

انتفض جده من مكانه بصدمة، حدق بيه بذهول وصدح صوته بغضب: "دول عصابة بقى!.. يعني البنت تلف عليك وامها تلف على باباك!"

وقف رشيد معترض على اتهام جده لحبيبته وقال بثقة: "لا يا جدي.. كارمن مش زي مامتها ابدا ومتعرفش حاجة عن افعالها."

ضحك جده بسخرية وقال بصرامة: "دي شكل البنت طلعت اشطر من مامتها، انا مش مصدق انها قدرت تخدعك وتقنعك انها غير مامتها!"

غضب رشيد وقال لجده بنبرة حادة: "لو سمحت يا جدي بلاش تتكلم عنها بالطريقة دي.. كارمن غير مامتها وانا واثق فيها."

بص ليه جده بصدمة، اعتقد ان البنت دي قدرت تسيطر بمكرها وكيدها على حفيده، هز راسه بذهول وقال: "انا مش مصدق اللي انا بسمعه منك دلوقتي يا رشيد! ازاي تثق في بنت مامتها نصابه وبتستغل الرجاله وتاخد فلوسهم!"

غضب رشيد بشدة وجاوب على جده بعصبية: "بثق فيها عشان هي غير مامتها."

اشتد غضب الجد من إصرار حفيده على البنت دي، ارتفع صوته شوية وقال بصرامة: "وانا مستحيل هوافق على العلاقة دي ووالدتك لو عرفت حاجة زي كده مش بعيد تموت فيها."

حدق بجده بصدمة، سابه جده ومشي من غير إضافة كلمة تانية، وقف رشيد بيفكر بحزن؛ هيعمل ايه دلوقتي؟ هيسيب حبيبته عشان عيلته، ولا هيحارب الكل عشانها؟. قرر يأجل الموضوع كله لحد ما تخلص كارمن دراستها، يمكن يتغير حاجة ويقدر يقنع والدتها وعيلته بالجواز منها. هي في السنة الأولى ليها في الجامعة وقدامهم الوقت الكافي لحد ما تخلص دراستها وفي الوقت ده ممكن يقنعهم بالجواز.

لكن اللي حصل كان بره توقعات رشيد!

بعد كام يوم من كلامه مع جده ورفضه القاطع على الجواز ده..

كان رشيد في شغله، جت ليه مكالمة من كارمن، سمع صوت بكائها عبر التليفون وهي بتتكلم ببكاء: "رشيد الحقني.. ماما جيبالي عريس ومصممه اني اتجوزه."

انتفض من مكانه وقال ليها بصدمة: "عريس ايه ومين العريس ده؟!"

جاوبته بصوت مبحوح وهي بتبكي بشدة: "مش عارفه يا رشيد، هو هنا دلوقتي، راجل شكله يخوف.. انا خايفه اوي، وماما مصممه عليه."

ساب شغله وجري لعربيته وهو بيتكلم معاها بالتليفون: "طب اهدي يا كارمن وفهميني.. مامتك قالتلك ايه بالظبط؟"

حاولت انها تتوقف عن البكاء شوية وجاوبته: "قالتلي انها لقت عريس مناسب ليا وعيزاني اتجوزه واسافر معاه"

سمعها باهتمام وهو سايق العربية في طريقه لبيتها، كملت كارمن بعفوية وهي بتبكي بخوف: "العريس شكله يخوف اوي يا رشيد، وكان بيبصلي بنظرات وحشه اوي وخوفني."

ضغط قبضة ايديه من شدة الغضب وهو بيسمع كلماتها اللي أصابت قلبه وكأنها سكينة حادة، ازاي ممكن لراجل تاني انه يبص لحبيبته ويتسبب في خوفها وهلعها بالطريقة دي. حاول يسيطر على غضبه عشان ميتسببش هو كمان في خوفها، قال ليها بهدوء مصطنع: "طب مامتك ليه فكرت تجوزك بالسرعه دي يا كارمن؟.. انتي لسه اول سنه في الجامعة؟!"

جاوبته وهي بتبكي: "مش عارفه يا رشيد، انا قولتلها اني مش موافقه وهي مصره عليه وقالتلي انها عارفه مصلحتي وهو قاعد معاها دلوقتي وبيتفقوا على الجواز.. انا خايفه اوي ومش عارفه اعمل ايه.. ارجوك يا رشيد اعمل اي حاجة وساعدني.. انا مش عايزة اتجوز الراجل ده."

كان سايق عربيته بأقصى سرعة وكلماتها بتألم قلبه بشدة، حاول انه يطمنها بهدوء وقال ليها بحنان: "متخافيش يا حبيبتي انا مستحيل اتخلى عنك، انا في الطريق دلوقتي وجاي لمامتك وهطلبك منها للجواز وهعمل المستحيل عشان توافق."

جففت دموع عينيها ووقفت من مكانها وكملت بسعادة: "بجد يا رشيد! انا متشكرة اوي."

ابتسم وهو بيسمع عفويتها وبراءتها، اتمنى لو يشوفها جده وعيلته زي ما بيشوفها هو، من المؤكد انهم هيعرفوا انها مش شبه والدتها، لكنه دلوقتي مش قادر يستنى أكتر عشان يقنعهم بيها، لازم ياخد القرار دلوقتي. اتنهد من قلبه وقال ليها بحنان: "متشكرة على ايه يا كارمن.. انتي روحي ومستحيل هسمح لحد انه ياخدك مني."

ابتسمت بسعادة وهي بتسمع كلماته اللي أسعدت قلبها ، قال ليها بتأكيد بعد ما قرب من بيتها: "انا خلاص وصلت قدام البيت، هتكلم مع مامتك دلوقتي وان شاء الله احاول اقنعها."

جاوبته بسعادة: "ان شاء الله."

قفل التليفون ووقف بالعربية قدام بيتها، لحظات من القلق والتوتر وهو بيرتب أفكاره، عارف ان اللي بيعمله دلوقتي ده ممكن يخسره عيلته! لكنه بيحبها بجد ومش ممكن يسيبها عشان تكون زوجة لغيره، هنا مقدرش يفكر أكتر، أخد قراره ونزل من العربية واتجه لبيتها، وقف قدام البيت وقبل ما يضغط على زرار الجرس، فتحت والدة كارمن الباب وهي بتودع عريس بنتها.

بص رشيد للواقف جنبها وهي بتودعه بسعادة، كان راجل سمين وباين عليه انه في الخمسين من عمره ، حدق بيه رشيد بصدمة مش مصدق انها بتفكر انها تجوز بنتها من راجل كبير زي دا!

اتفاجأت والدة كارمن من وجوده وقالت بفضول: "خير يا حضرة الظابط؟ ايه اللي جابك عندي تاني؟!"

بص رشيد للعريس وجاوبها بغضب مكتوم: "من فضلك عايز اتكلم معاكي شوية."

ابتسمت ليه ببرود، كانت عارفة هو جاي ليه دلوقتي، بصت للراجل اللي واقف جنبها وقالت بثقة: "خليني اعرفك الاول على خطيب كارمن بنتي.. الحاج مطاوع.. مقاول كبير ومعروف في البلد."

رمقها رشيد بنظرات غاضبة، وقف عريس بنتها واستنى انها تقوله مين الشاب ده اللي جه لبيتها، تابعت كلامها وكملت وهي بتشاور لرشيد وبتقول لعريس بنتها: "وده النقيب رشيد الجبالي.. ابن طليقي."

هز العريس راسه بالايجاب وتفهم سبب وجوده دلوقتي، اعتقد انه جه عشان يتكلم معاها بخصوص طلاقها من والده، بص ليها وقال بتأكيد: "خلاص يا سهير.. انا همشي دلوقتي وزي ما اتفقنا، هنكتب الكتاب يوم الخميس الجاي واخد العروسه ونسافر على طول."

ابتسمت ليه بسعادة وهزت راسها بالموافقة، بص لرشيد وقال ليه قبل ما يمشي: "اتشرفت بمعرفتك يا حضرة الظابط."

رمقه رشيد بغضب، مشي العريس ووقف رشيد بصدمة، مش مصدق انها ممكن تدمر حياة بنتها وتعقد صفقة على بيعها وتجوزها للراجل ده اللي بيكبر بنتها بتلاتين سنة على الأقل. بصت لرشيد وقالت ليه بنبرة حادة بعد ما مشي العريس: "خير.. افندم.. ممكن اعرف سبب وجودك هنا دلوقتي؟"

حاول يخفي غضبه ويسيطر عليه وقال ليها بهدوء مصطنع: "انا جاي اتكلم مع حضرتك في موضوع مهم."

حدقت بيه للحظات بتفكر وبعدين شاورت بايديها لجوه وقالت: "تمام.. اتفضل ادخل نتكلم جوه."

فتحت كارمن باب أوضتها شوية ووقفت ورا الباب عشان تقدر تسمع كلام رشيد مع والدتها.

دخل رشيد.. وقعدت والدة كارمن براحة وقالت ليه ببرود: "خير.. اتفضل اتكلم لاني معنديش وقت."

كتم غيظه وغضبه منها بصعوبة شديدة، غمض عينيه للحظة عشان يقدر يتكلم معاها بهدوء مصطنع: "انا جاي اطلب ايد كارمن، ومستعد لأي شئ تطلبيه مقابل انك توافقي."

بصت ليه بانتصار، حطت رجلها فوق التانية بتعالي وجاوبته ببرود: "للأسف كارمن اتخطبت وانا قرأت فتحتها دلوقتي مع الحاج مطاوع.. اللي انت شوفته من شويه وهو خارج، وزي ما انت سمعت، كتب كتابهم الخميس الجاي وهياخدها ويسافروا يقضوا شهر العسل في أوروبا."

رمقها بغضب وقال ليها بنبرة حادة: "ازاي بنتك تهون عليكي وتفكري تعملي فيها كده! ازاي تفكري تجوزيها لراجل اكبر من ابوها؟ ايه المقابل اللي هتاخديه منه عشان تبيعيله بنتك بالطريقه دي؟"

رمقته بغضب وارتفع صوتها هي كمان: "وانت مالك ومال بنتي! انت جيت طلبتها وانا رفضت، ومش من حقك تحاسبني، انا عارفه مصلحة بنتي كويس."

اشتد غضبه أكتر، مقدرش يسيطر على غضبه ويتحكم في انفعاله، قال ليها بقوة: "شوفي ايه المقابل اللي هتاخديه منه وانا هدفعلك الضعف."

رمقته بقوة وجاوبت عليه بحقد: "المقابل اني احرق قلبك واجوزها لغيرك."..