رواية القاسي والبريئة الفصل الثامن8بقلم نورا السنباطي
بسم الله نبدأ..
━━━━━━━━━━━━━━━━━━
في قصر الجبالي... الساعة السادسة صباحًا
دخلت عربية آواب من البوابة الرئيسية، وكان يوسف قاعد جنبه، بيبصله كل شوية بابتسامة هادية.
يوسف بمرح ـ إيه يا كبير، هنفضل ساكتين طول الطريق ولا هتفتح بقك
آواب بنظرة جانبية ـ عايزني أفتح بقي أقولك إيه؟
يوسف ـ أي حاجة يا عم، احكيلي عن طفولتك، عن مغامراتك، عن خناقاتك، عن...
آواب مقاطعًا ببرود ـ انزل يا يوسف.
يوسف بصدمة مصطنعة ـ نعم؟! ده أنا لسه مخلصتش ياعم 🙃
آواب ـ وأنا خلصت صبري عليك.
ضحك يوسف بصوت عالي، ونزل من العربية وهو بيقول:
ـ ربنا يستر على أيامنا الجاية معاك يا كبير.
آواب هز رأسه بابتسامة خفيفة، ونزل هو كمان.
أول ما دخل القصر، استقبله أحد الخدم.
الخادم باحترام ـ صباح الخير يا آواب بيه.
آواب ـ صباح النور. الحاجة فاطمة فين؟
الخادم ـ في جناحها يا فندم.
آواب ـ ويوسف، خليه يفطر ويطلع يرتاح، وأي حاجة يحتاجها تتنفذ من غير ما يطلبها مرتين.
الخادم ـ أمرك يا بيه.
يوسف بابتسامة ـ تسلم يا أخويا.
آواب بصله ـ أخوك ده لو مسمعتش كلامه هيرميك في الشارع.
يوسف بضحك ـ يا ساتر! أهو ده الأخ اللي كنت مستنيه.
اتجه يوسف ناحية السفرة، بينما آواب وقف لحظة وبص للسلم المؤدي لجناحه.
افتكر إيلاف...
افتكر خوفها من صوته، ودموعها اللي نزلت أول ما صرخ فيها.
اتغيرت ملامحه، وأخد نفس طويل.
آواب في نفسه ـ حقك عليا يا بنت الناس.
وبعدها طلع على جناحه.
━━━━━━━━━━━━━━━━━━
في جناح آواب وإيلاف...
كانت إيلاف قاعدة على السجادة، لسه مخلصة صلاة الفجر، وحاطة إيديها على وشها وهي بتدعي.
سمعت صوت الباب بيتفتح، فرفعت رأسها بسرعة.
دخل آواب...
كانت أول ما شافته اتوترت وخافت، وقامت بسرعة من مكانها، وعدلت طرحتها.
إيلاف بتردد ـ ص... صباح الخير يا آواب بيه.
آواب وقف مكانه، واتأمل ملامحها للحظات.
كانت عيونها مرهقة من السهر، وتحتها علامات واضحة من كتر العياط حس بنغزة جامدة في قلبه لكن تجاهلها فورا.
آواب بهدوء ـ صباح النور يا إيلاف.
سكت شوية، وبعدها قال:
ـ صليتي الفجر؟
إيلاف أومأت بسرعة ـ أيوه.
آواب ـ ربنا يتقبل منك.
إيلاف ـ منا ومن حضرتك.
كان عايز يقولها كلام كتير، لكن مش عارف يبدأ منين.
قرب منها خطوة، فلاحظ إنها رجعت خطوة لورا بتلقائية.
وقف مكانه فورًا.
آواب بصوت هادي وحنون لاول مرة ـ متخافيش
إيلاف نزلت عيونها للأرض.
آواب ـ أنا مش هزعقلك.
رفعت عيونها باستغراب.
آواب كمل ـ وبعدين... أنا عايز أعتذرلك عن اللي حصل امبارح.
إيلاف بسرعة ـ لا يا بيه، حضرتك معملتش حاجة، أنا اللي...
آواب قاطعها بهدوء ـ متحمليش نفسك غلط مش غلطك.
سكت لحظة، وبعدين قال:
ـ أنا كنت متعصب ومخنوق من حاجات كتير، وطلعت غضبي عليكي، وده مكنش من حقي. إنتِ ملِكيش ذنب في أي حاجة حصلت.
إيلاف كانت بتبصله بعدم تصديق.
هو نفسه الراجل اللي صوته هز القصر امبارح، واقف دلوقتي بيعتذرلها!
إيلاف بصوت خافت ـ أنا بس خفت من حضرتك.
الجملة نزلت على قلبه تقيلة.
آواب نكس رأسه للحظة، وبعدها قال:
ـ وعشان كده أنا مش عايزك تخافي مني. أنا ممكن أكون شديد، وممكن صوتي يعلى وقت الغضب، لكن مش معنى كده إنك تعيشي معايا مرعوبة.
قرب الكرسي وسحبه وقعد عليه.
آواب ـ تعالي اقعدي
قعدت على طرف الكنبة بحذر.
آواب ـ نمتي
إيلاف ـ منمتش.
رفع حاجبه باستغراب.
آواب ـ ليه؟
إيلاف بتوتر ـ معرفتش أنام.
آواب ـ عشان خايفة
هزت رأسها بخجل.
طلع نفس طويل، وبعدها مد إيدة ومسح علي رأسها بحنان وقال:
ـ حقك عليا.
إيلاف بصتله، ودمعة صغيرة لمعت في عينيها.
آواب ـ إنتِ في بيتك، ومش عايز أشوفك حاسة إنك غريبة هنا. أي حاجة تضايقك تتكلمي، أي حاجة تحتاجيها تطلبيها
إيلاف وهي تشعر انها في حلم جميل ـ حاضر.
آواب ـ وفطرتي؟
إيلاف ـ لا.
آواب قام من مكانه ـ طيب يلا ننزل نفطر.
إيلاف قامت بسرعة، لكنه لاحظ إنها بتتحرك بتعب.
آواب ـ استني.
وقف قدامها وسألها بقلق:
ـ إنتِ كويسة؟
إيلاف ـ أيوه، بس حاسة بدوخة بسيطة.
اتغيرت ملامحه
آواب ـ من إمتى؟
إيلاف ـ من امبارح
آواب بجدية ـ طب ليه مقولتيش؟
إيلاف ـ مكنتش عايزة أزعج حضرتك.
آواب بص لها بعتاب.
ـ صحتك مش إزعاج، ولو تعبانة لازم تقولي. مفهوم؟
أومأت بخجل.
آواب ـ اقعدي مكانك، هخليهم يجيبوا الفطار هنا.
━━━━━━━━━━━━━━━━━━
في الأسفل...
كان يوسف قاعد على السفرة، وقدامه أطباق كتير، وبيأكل بمنتهى السعادة.
فاطمة نزلت من جناحها، وكانت ملامحها مرهقة من البكاء.
يوسف أول ما شافها قام باحترام.
يوسف ـ صباح الخير يا هانم
فاطمة ابتسمت وسط دموعها.
فاطمة ـ صباح النور يا حبيبي وبعدين اي هانم دي انت عايزني ازعل ولا اي
يوسف قرب منها وباس إيدها.
ـ انا اسف يا أمي
فاطمة بحنان ـ ربنا يباركلي فيك يا ابني.
يوسف ـ ويباركلي فيكي يا أمي.
قعدوا سوا، وبعد لحظات نزلت إحدى الخادمات.
الخادمة ـ يوسف بيه، آواب بيه بيقول الفطار يطلع الجناح.
يوسف رفع حاجبه بمكر.
يوسف ـ الجناح؟! هو مش هيأكل معانا؟
الخادمة ـ لا يا فندم، قال إن مدام إيلاف تعبانة شوية.
فاطمة رفعت رأسها بسرعة.
فاطمة ـ إيلاف مالها؟!
الخادمة ـ معرفش يا هانم، بس قالوا إنها عندها دوخة.
فاطمة قامت فورًا.
ـ حضرولي شوية شوربة خفيفة وعصير، واطلعهم بنفسي.
يوسف بابتسامة ـ وأنا جاي معاكي.
━━━━━━━━━━━━━━━━━━
في الجناح...
كانت إيلاف قاعدة على الكنبة، وآواب واقف عند الشباك بيتكلم في التليفون.
آواب بحدة ـ أيوه يا رجب، عايز تقرير الأراضي قبل الضهر، ومحدش يتصرف في شبر واحد من غير ما يرجعلي.
سكت يسمع الطرف التاني.
ـ تمام، وخلي بالك من العمال، واللي ليه حق ياخده كامل. مش عايز أسمع شكوى واحدة من حد.
قفل التليفون، ولف ناحية إيلاف.
كانت بتبصله في هدوء.
آواب ـ في حاجة؟
إيلاف ـ لا.
آواب ـ طب بتبصيلي كده ليه؟
إيلاف بخجل ـ صوت حضرتك اتغير.
ابتسم بخفة.
آواب ـ اتغير إزاي؟
إيلاف ـ من شوية كنت بتتكلم معايا بهدوء، ودلوقتي صوتك عالي أوي.
ضحك ضحكة خفيفة.
آواب ـ ده شغل يابنتي، الناس دي مش بتفهم غير لما أتكلم معاهم كد.
إيلاف ابتسمت بخفة، فلاحظ ابتسامتها.
آواب بابتسامة جانبية ومعاكسة ـ أهو...اخيرا هلت الشمس
إيلاف نزلت عيونها بخجل.
في اللحظة دي، الباب خبط.
آواب ـ ادخل.
دخلت فاطمة ويوسف.
فاطمة أول ما شافت إيلاف راحت ناحيتها.
فاطمة بقلق ـ مالك يا بنتي؟ قالولي إنك تعبانة.
إيلاف قامت باحترام ـ مفيش حاجة يا حاجة، دوخة بسيطة بس.
فاطمة حطت إيدها على جبينها.
ـ سلامتك يا حبيبتي، ليه بس متقوليش؟
إيلاف ـ مكنتش عايزة أتعب حضرتك.
فاطمة بحنان ـ تتعبي مين يا قلب أمك؟ إنتِ بنتي، ومن حقك عليا أسأل عليكي.
آواب كان واقف بيتابعهم بصمت.
يوسف قرب من إيلاف بابتسامة.
يوسف ـ ألف سلامة عليكي يا مرات الكبير .
إيلاف ـ الله يسلمك.
يوسف بمرح ـ بس أنا عندي اعتراض.
إيلاف باستغراب ـ خير؟
يوسف ـ عايز اعرف الي الحنان و إيه الدلع ده يا كبير؟
آواب بنظرة تحذير ـ يوسف!
يوسف رفع إيده باستسلام.
ـ خلاص يا عم، أنا غلطان إني اتكلمت.
إيلاف ضحكت بخفة.
يوسف بص لآواب بانتصار.
ـ شفت؟ أهو أنا خليتها تضحك، عايز مكافأة.
آواب ببرود وهو يشعر بالغيرة ولا يعلم سببها ـ انزل من وشي.
ضحك الجميع
━━━━━━━━━━━━━━━━━━
بعد شوية...
كانت إيلاف قاعدة بتفطر، وفاطمة جنبها بتأكلها
فاطمة ـ كلي يا بنتي، إنتِ محتاجة تقوي جسمك.
إيلاف ـ كفاية والله يا حاجة.
آواب من مكانه ـ اسمعي كلام يا إيلاف.
إيلاف بصتله وأومأت.
يوسف ـ ايوة ايوة اتغذي يا مرت الكبيير
آواب بغيظ ـ يوووسف
يوسف ـ لا حول ولا قوة إلا بالله هو انا قولت اي
فاطمة ضحكت.
وبعد ما انتهوا من الفطار، قام آواب وأخد مفاتيحه.
آواب ـ أنا عندي شغل، وهتأخر شوية.
بص لإيلاف وقال:
ـ لو احتجتي أي حاجة كلمي الحاجة أو يوسف، وأنا تليفوني معاكي لحد ما اجبلك تلفون .
إيلاف ـ حاضر.
آواب اتجه ناحية الباب، لكنه وقف والتفت ليها.
ـ إيلاف.
رفعت عيونها.
ـ متنسيش ترتاحي، ولو الدوخة استمرت هنكشف عليكي.
إيلاف بابتسامة صغيرة ـ حاضر.
خرج آواب، لكن المرة دي كان فيه حاجة مختلفة.
ساب وراه قلب بدأ يطمن شوية، وبنت بدأت تحس إن البيت الكبير ده ممكن يكون ليها أمانها اللي افتقدته
أما آواب الجبالي...
فكان لسه قدامه أسرار كتير، وحكايات مدفونة، وحق أخوه اللي لازم يرجعه.
لكن وسط كل ده، بدأ يدرك إن البريئة اللي دخلت حياته مش مجرد زوجة دي اللي هتكسر كل الحواجز اللي تعب كتير عشان يبنيها واخيرا نقدر نقول
🍂أن البريئة تحت جناح القاسي 🍂