قسوة رجال الصعيد part 8
﷽
سحاب بتوتر: إحنا رايحين فين
سند: اخلصي إنتِ الأول وهتعرفي رايحين فين.
بعد وقت، كانوا في الطريق لوجهتهم. كانت سحاب قاعدة جنبه، حاطة إيدها على قلبها، والخوف مالي عينيها. كل شوية تبص له وتحاول تفهم هو ناوي على إيه، لكن سند كان سايق وساكت، ولا كأنه حاسس بقلقها.
كانت خايفة يكون واخدها لبيت أهلها، لأنها مش عارفة هتواجههم إزاي، ولا هتقول لهم إيه عن اللي بيحصل بينها وبين جوزها.
سحاب بخوف: إنت موديني بيت أبوي
لكن سند فضل ساكت ومردش عليها.
سحاب برجاء: سند، والنبي رد عليا.
ما ردش برضه، وكمل طريقه من غير ما يبصلها.
وبعد دقائق، وصل للمكان ووقف العربية.
بصت سحاب حواليها باستغراب، وبعدها رجعت بصت له.
سحاب: إنت جايبني على فين
سند بأمر: انزلي.
سحاب بخوف: لاه، منزلاش غير لما أعرف إنت جايبني على فين.
سند بنفاد صبر: عند الدكتورة.
سحاب باستغراب: دكتورة دكتورة إيه
سند: دكتورة عشان تكشف عليكي وتشوفك بنت بنوت ولا لاه، وبكده أعرف سبب منعك ليا.
اتسعت عينا سحاب من الصدمة، وحست إن الأرض بتدور بيها. بصت له وهي مش مصدقة إنه ممكن يفكر فيها بالشكل ده.
سحاب بدموع: إنت بتقول إيه إنت شاكك فيا
سند: وما أشكش ليه كنتِ ملاك يعني ده اللي كان المفروض يحصل من أول يوم جواز، ومن أول ما رفضتيني. يلا عشان الوقت.
سحاب بعياط: والنبي يا سند بلاش. والله العظيم أني شريفة.
سند: الدكتورة هي اللي هتثبت ده.
بدأت سحاب تعيط بهستيريا، وجسمها كله بيرتعش من الخوف. كانت حاسة بالإهانة، ومش قادرة تستوعب إن جوزها وصل بيه الشك إنه عاوز يعرضها للكشف بالطريقة دي.
ضرب سند الدركسيون بغضب.
سند: بتتزفتي بتبكي ليه
سحاب بوجع: بلاش تعريني يا سند وتفضحني قدام حد. وحياة أغلى حاجة عندك.
فضلت سحاب تعيط، وهي بتترجاه يبعدها عن المكان. سند بص لها، ولاحظ رعشة إيديها وحالتها اللي كانت بتسوء قدامه.
سكت للحظات، ورجع بضهره لورا على الكرسي، وأخد نفس عميق. وبعدها شغل العربية ورجع بيها على البيت من غير ما يتكلم.
أما سحاب، ففضلت طول الطريق ساكتة، ودموعها بتنزل في صمت.
اذكروا الله ❤️
---
في اليوم التالي، كانت البنات في المطبخ بيجهزوا العشا.
يمني: بجد دي ما بتتكسفش أبدًا ده إيه اللبس العريان ده
صبا: بأمارة الفستان اللي كنتِ عاوزة تنزلي بيه
يمني: بلاش تفكريني والنبي. بعدين إحنا كنا نسوان مع بعض، لكن دي نازلة عادي قدام الرجالة.
صبا: على أساس إنها منظر أوي مين هيبصلها دي
يمني: يعني إنتِ واثقة في جوزك
صبا: مش حكاية واثقة، حكاية إن دي لو آخر واحدة في الدنيا مش هيبصلها، والسبب كلنا عارفينه.
يمني: أم سيف وسحاب، ما تشاركونا الرأي
سحاب: أني عن نفسي سند هيبص على أي واحدة عادي.
صبا: وإنتِ يا أم سيف
كانت مهره واقفة معاهم، لكنها غيرت الموضوع بسرعة.
مهره: بنات، حد شاف جنه ما نزلتش النهارده واصل، حتى الفطور ما نزلتوش.
صبا: لا، محدش شافها.
مهره: طب هطلع أشوفها، أحسن تكون تعبانة ولا حاجة.
سابتهم مهره وطلعت ناحية أوضة جنه، وهي قلقة من غيابها طول اليوم.
اذكروا الله ❤️
خبطت مهره على الباب، ولما سمحت لها جنه بالدخول، دخلت لقتها قاعدة في أحد الأركان، منكمشة على نفسها، وملامح الحزن باينة عليها.
مهره بخضة: بت يا جنه، مالك فيكي إيه
جنه: أم سيف، زين إنك جيتي.
وبصت لها بدموع، وكملت بصوت مهزوز.
جنه: أني واقعة في مصيبة.
مهره: مصيبة إيه كف الله الشر.
سكتت جنه شوية، وكأنها بتجمع شجاعتها عشان تقول اللي جواها.
جنه بتردد: أصل أني حامل.
اتسعت ابتسامة مهره، وقربت منها بفرحة.
مهره: يا ألف نهار مبروك هي دي مصيبة يا شيخة اتنيلي
لكن فرحة مهره ما كملتش، لما شافت جنه بتعيط أكتر.
جنه: الحكاية مش اكده، بس جواد لو عرف هيقتلني.
مهره باستغراب: ليه مش فاهمة.
جنه بخوف: أصله مانع أني أحمل أو أجيب عيال، وباخد منع حمل. بس ما أعرفش حملت كيف، يمكن نسيت أخد البرشام في يوم.
مهره: وهو يمنعك ليه مش من حقه إنتِ من حقك تبقي أم.
جنه: جواد مفكر لو جبت عيل هحبه أكتر من سما، وأبقى مرات أب وحشة. ساعديني أتخلص من اللي في بطني يا أم سيف، والنبي.
مسكت مهره إيدها بسرعة، وبصت لها بجدية.
مهره: حرام، ده قتل نفس يا جنه. بعدين اتكلمي معاه، وممكن ربنا يحنن قلبه. ده ولده، أكيد مش هيأذيكي.
جنه بعياط: أصلك ما تعرفيش جواد ممكن يعمل إيه، خصوصًا إنه محذرني.
مهره: إنتِ حامل في قد إيه
جنه: في شهرين.
مهره: خلاص، إنتِ ما تتكلميش دلوق، وأني لما ييجي أبو سيف هتكلم معاه، وهخليه يحكي معاه. وما تقلقيش، أني مش هسيبك. وإنتِ خليكي قوية، واتمسكي بحقك.
حضنت مهره جنه، وحاولت تهديها، رغم إنها من جواها كانت عارفة إن مواجهة جواد مش هتكون سهلة.
اذكروا الله ❤️
سوسن: ها، قولت إيه
فؤاد: لا، ابعديني عن الموضوع ده. دول مش ساهلين.
سوسن: هتفضل طول عمرك خايب كده
فؤاد: الكلام ده لو بنات سهلة. إنتِ مش شايفة قواية إزاي وأساسًا مش هعرف أتصرف معاهم.
سوسن: وإنت يا قلب أمك
لمي: الصراحة كلهم حلوين. أنا محتارة، بس ممكن فراس. هيبة كده وعسل.
سوسن: لا يا حبيبتي، مش هتسلكي معاه ولا مع صقر ولا حتى جواد. الله يسلكوا معاكي ياسين وسند، شوفي شغلك معاهم، وأنا هتصرف مع الباقي. تمام
فؤاد: الصراحة البنات كلهم حلوين.
بصت له سوسن بغيرة وضيق.
سوسن: حلوين إزاي دول بلدي ويقرفوا، خصوصًا مهره دي، شايفة نفسها على الآخر. مش عارفة فراس عاجبه إيه فيها. المهم، زي ما اتفقنا، عاوزين نخلص شغلنا قبل ما يعرفوا إن العقد مزور ونمشي من هنا.
اذكروا الله ❤️
كان الرجالة قاعدين في المكتب، وفراس بيتكلم مع إخوته عن وجود سوسن في السرايا.
جواد: إحنا هنعملوا إيه دلوق
فراس: خليها تجيب آخرها.
ياسين: بس وجودها عامل قلق في البيت.
فراس: لازم تخلي خصمك يجيب آخره، بعدين إحنا بنتسلى.
جواد: أني من رأيي نخلصوا من الموضوع وبلا وجع دماغ.
ياسين: إحنا نستنى كم يوم اكده، وبعدين نتصرفوا. ولا إيه
فراس: أكيد فيه حاجة. هي ما تجيش اكده من غير سبب.
جواد: ربنا يستر عاد.
فراس: صقر وسند راحوا فين
ياسين: صقر راح يسلم البضاعة، وسند ما خبرش راح فين.
فراس: سند عاوز شدة، بس لما ييجي أني هعرف أتكلم معاه.
جواد: سيبه يا خوي، بلاش تحمل عليه.
فراس: ليه هو صغير ده ده راجل متجوز ومسؤول عن بيت، وبكره يبقى مسؤول عن عيال. لازم يبقى راجل عن اكده.
ياسين: أبو سيف معاه حق يا جواد. كفاية إنه مش بيبات في البيت.
بص له جواد بغيظ، ولما لاحظ ياسين نظراته،
ياسين: مالك بتبص ليه
بعدين افتكر إن فراس واقف. اه، أني قصدي إنه بيتأخر علي ما بيرجع
فراس بغضب: والله عال مدام عارفين بده وساكتين، بكده حسابه تقل.
قام فراس وسابهم ومشي، وهو متضايق من تصرفات أخوه.
جواد: عاجبك اكده إنت لسانك فالت.
ياسين: يا عم مش قصدي. بعدين هو عاوز يتربى شوية بدل جريه ورا النسوان.
جواد: بلاش إنت تتكلم، على أساس إنك مش بتجري ورا النسوان.
ياسين بضحك: أني في المداري، مش زيه مفضوح.
جواد: الله يخيبكم إنتوا الاتنين.
اذكروا الله ❤️
---
في المساء، كانوا كلهم بيتعشوا، وسوسن قاعدة على السفرة مع أولادها.
فراس: سند، بعد العشا عاوزك.
سند: حاضر يا خوي.
سوسن: إلا قولي يا فراس، ما لقيش شغل عندك لابني فؤاد
لكن فراس ما عيرهاش أي اهتمام، وكمل أكله كأنه ما سمعش كلامها.
سوسن بغيظ: أنا بكلمك يا سي فراس
قام فراس من مكانه واتجه ناحية مكتبه.
فراس: ابقى تعالى ورايا يا سند.
سند: حاضر.
فضلت سوسن باصة لفراس باستغراب، وبعدها بصت لصقر.
سوسن: هو ما ردش ليه
صقر بسخرية: إن شاء الله لما يبقى راجل، أبقى أخلي فراس يشغله.
وبعدها قاموا كلهم من على السفرة.
مهره: منك لله يا بعيدة، كل ما تتكلمي بتسدي نفسنا عن الأكل.
صبا: وليه يا بومة
سوسن: فراسكم أعمل إيه
يمني: ههه يا شيخة، قولي كلام غير ده. فرسانا على إيه يا حلوة
فؤاد: استهدوا بالله يا جماعة، مش كده.
سحاب: هو صدق صقر لما قال يبقى راجل. هو إنت دايمًا اكده قاعد وسط النسوان
اتحرج فؤاد من كلامها، وسابهم ومشي.
لمي: هو إنتوا فاكرين نفسكم نسوان يا حرام
جنه: يا ريت تحترمي نفسك. إحنا عارفين قدر نفسنا كويس.
سوسن: بلاش إنتِ يا بومة.
مهره: والله ما في بومة غيرك يا مرا يا خرفانة. ده أني جاني حول من الألوان اللي حطاها في وشك. بذمتك ما إنتِ مكسوفة من نفسك
سوسن: يلا يا ليمو يا حبيبتي نطلع، أحسن نفسي ضاق من الأشكال دي.
مهره: نفسك ضاق من عمايلك السودة يا سوسن الزفت
