- أول جريمة رسمتها بإيدي؟! إزاي يعني؟
أنا عمري ما رسمت جريمة بإرادتي!
فضلت باصة للصورة ومش قادرة أستوعب اللي مكتوب، وحسيت إن كل حاجة حواليا بدأت تلف بيا.
محمد قرب مني ومسك كتفي وقال:
- اهدي يا ورد، إحنا لازم نعرف الدكتور دا عايز يوصل لإي، ومش هنمشي ورا أي حاجة الموقع بيقولها من غير ما نفهمها.
بصيتله بقلق وقولت:
- بس هو عارف عني حاجات أنا نفسي معرفهاش، وعارف عن ماما كمان، أنا لازم أروح المصحة دي.
هز راسه وقال عشان يهديني:
- هنروح، بس مش لوحدنا، حسن لازم يكون معانا.
وبالفعل خرجنا من المبنى، ومحمد اتصل بحسن وبلغه بكل اللي حصل، وبعدها اتحركنا ناحية العنوان اللي بعتهولنا.
طول الطريق كنت ساكتة، وبفكر في أمي، وفي كل اللي حصل معاها، وفي كلام عمتي اللي اكتشفت إنه كان مجرد جزء صغير من الحقيقة.
بعد وقت وصلنا للمكان، وكانت المصحة قديمة ومقفولة من سنين، لكن الغريب إن كان في نور ظاهر من إحدى الغرف اللي جواها.
نزلنا من العربية، وبعد دقايق وصل حسن ومعاه إتنين من أفراد الشرطة، ودخلنا المبنى بحذر.
كان المكان مليان تراب، وريحة الرطوبة مالية الممرات، لحد ما وصلنا لباب أوضة كان مفتوح سِنة بسيطة.
محمد أشارلنا نستنى، وقرب من الباب وفتحه بهدوء.
وأول ما دخلنا، اتصدمت من اللي شوفته...
كانت في لوحات كتير متعلقة على الحيطان، وكل لوحة فيها رسمة مختلفة، لكن اللي خلاني أتجمد مكاني إن كل الرسومات كانت لجرائم حقيقية حصلت بالفعل!
قربت من واحدة منهم، وفضلت أبص للتفاصيل، لحد ما لقيت تاريخ مرسوم في ركن اللوحة، كان تاريخ قديم جدًا...
تاريخ قبل ما أبدأ أنا أرسم أي حاجة من اللي بتحصل معايا.
وفجأة سمعنا صوت من أخر الأوضة بيقول:
- كنت مستنيكي يا ورد.
لفينا كلنا ناحية الصوت، وظهر راجل كبير في السن، كان واقف جنب مكتب وعليه مجموعة أوراق.
محمد رفع سلاحه وقال:
- إنت الدكتور اللي كان مسؤول عن حالة والدة ورد؟
إبتسم وقال بهدوء وأريحية:
- واضح إنك عرفت كتير يا حضرة وكيل النيابة.
بصيتله وأنا حاسة إن قلبي بيدق بعنف، وقولت:
- إنت عملت إي في أمي؟!
بصلي شوية، وبعدها قال:
- والدتك كانت أول حالة قابلتها عندها القدرة دي، كانت بترسم أحداث قبل وقوعها، وفي البداية افتكرت إن الموضوع مجرد اضطراب نفسي، لكن لما بدأت الرسومات تتحقق واحدة ورا التانية، فهمت إن فيه حاجة أكبر من كدا.
قربت منه بغضب وقولت:
- وإنت بدل ما تساعدها، كنت بتديها أدوية تخليها تشوف حاجات مش موجودة؟!
رد بهدوء مستفز:
- أنا مكنتش عايز أساعدها، أنا كنت عايز أفهم قدرتها وأتحكم فيها، لكن هي رفضت تتعاون معايا، وكل ما كانت بترسم لوحة كانت بتخاف أكتر، لحد ما حالتها ساءت.
محمد قاطعه بغضب:
- وأخت زوجها؟ إنت اللي كنت بتديها التقارير المزيفة والأدوية؟
إبتسم الدكتور وقال:
- سعاد كانت مجرد وسيلة، هي كانت عندها أسبابها الخاصة عشان تتخلص من أمها، وأنا كان عندي أسبابي عشان أوصل للي عايزه.
بصيتله بصدمة وقولت:
- يعني أمي كانت ضحية اتفاق بينكم؟!
رد بنفس الطريقة الباردة وقال:
- والدتك ماتت قبل ما أقدر أوصل لكل اللي محتاجه منها، لكن قدرتها مكنتش هتنتهي بموتها، لأنها انتقلت ليكي.
حسيت برجلي بتترعش، وبصيت لمحمد اللي كان مركز معاه، وبعدها سألت:
- والموقع؟ واللوحات اللي كنت برسمها غصب عني؟
ضحك وقال:
- الموقع كان وسيلتي إني أختبر قدرتك، وكل مهمة كانت بتكشفلي جزء جديد منها، أما Black Hill فكان الإسم اللي بستخدمه عشان أتواصل معاكي من غير ما تعرفي هويتي.
محمد قرب منه وقال:
- يعني إنت اللي كنت بتحاول تقتلها؟
رد الدكتور بهدوء وتوضيح مرعب:
- أنا مكنتش محتاج أقتلها، كنت محتاجها ترسم آخر لوحة، اللوحة اللي هتثبت إن قدرتها وصلت لنفس المرحلة اللي وصلت لها والدتها.
بصيتله بعدم فهم، فقال وهو بيشاور على اللوحة المغطاة بالقماشة البيضا:
- إفتحيها يا ورد، دي أول لوحة رسمتيها وإنتِ صغيرة.
قربت منها وأنا مترددة، ومديت إيدي وشلت القماشة ببطء،
وأول ما شفت الرسمة حسيت إن نفسي اتسحب مني.
كانت صورة لأمي، واقفة قدام باب بيتنا القديم، وعلى الأرض جنبها بقعة دم كبيرة، وفي الركن كان فيه طفلة صغيرة ماسكة فرشة رسم... كانت أنا!
رجعت خطوة لورا وقلت بصوت مرتعش:
- أنا، أنا رسمت دا إمتى؟!
رد الدكتور:
- قبل الحادثة اللي مات فيها والديكِ، كنتِ لسة طفلة، ورسمتي اللوحة دي قدامي، ومن وقتها وأنا عرفت إن قدرتك موجودة، لكن والدتك حاولت تخبيكِ عني.
بصيتله بصدمة، وبدأت أفتكر مواقف قديمة مش واضحة، وأصوات أمي وهي بتطلب مني أبعد عن الورق والألوان كل ما كنت برسم.
إتكلم محمد وسأله وهو لسة متحفظ ناحيتن:
- وإي علاقة اللوحة دي بالجرائم اللي حصلت بعد كدا؟
رد الدكتور:
- اللوحات كانت بتظهر قبل وقوع الأحداث، وأنا استغليت دا، كنت بستخدم المعلومات اللي بتوصلني منها عشان أتحكم في بعض الناس وأحقق مكاسب، والموقع كان وسيلة أختبر بيها قدرتها وأخليها تحت سيطرتي.
حسن كان واقف بيسجل كل كلمة، وبعدها قرب من الدكتور وقال:
- كفاية كدا، إنت هتجاوب على كل الكلام دا في التحقيق.
لكن الدكتور بدأ يضحك بشكل غريب، وبصلي وقال:
- فاكرة إنك خلصتي يا ورد؟ إنتِ لسه مرسمتيش أخر لوحة!
أنا اللي بتحكم فيكِ وأنا اللي قادر أخليكِ ترسمي بالشكل اللي أنا عايزهُ، بعد دراستي لسنين طويلة على والدتك عرفت إزاي أتحكم في القدرة دي بالسحر الإسود عشان أوصل لكل اللي عايزهُ وأبقى الوحيد اللي بيعرف اللي هيحصل مع الناس منكم.
خلص كلامهُ وسط صدمتي من إعترافه وقبل ما حد يرد عليه فجأة سمعت صوت إحتكاك قلم بالورق من ورايا.
لفيت بسرعة، ولقيت إيدي بتتحرك لوحدها، والفرشة اللي كانت على المكتب بدأت ترسم على ورقة بيضا.
محمد جري ناحيتي ومسك إيدي، لكن الرسمة كانت بتكتمل رغم محاولته يوقفها، صرخت وأنا بحاول أقاوم ولكني كنت قادرة أتكلم المرة دي:
- محمد، مش قادرة أوقف إيدي!
فضل ماسكها وقال بتوتر وخوف عليا:
- بصيلي يا ورد، ركزي معايا، متسيبيش نفسك!
لكن فجأة وقفت إيدي والرسمة مكملتش، بصيت للورقة وأنا مرعوبة، وكانت الرسمة عبارة عن الدكتور واقف قدام باب الأوضة، وعلى الأرض جنبه مفتاح.
وفي نفس اللحظة سمعنا صوت فرقعة قوية، وبعدها انطفى النور.
حسن نادى على أفراد الشرطة، وبدأت حركة في المكان، ولما النور رجع لقينا الدكتور بيحاول يهرب من الباب الخلفي، لكن واحد من أفراد الشرطة قدر يمسكه.
أما أنا ففضلت باصة للرسمة، لحد ما محمد لاحظني وسألني:
- مالك يا ورد؟
شاورت على المفتاح وقولت:
- المفتاح دا، هو مفتاح الأوضة اللي كنا فيها؟
بص محمد للرسمة، وبعدها بص للمفتاح الحقيقي اللي كان واقع جنب الدكتور، وأخده بحذر.
حسن قرب مننا وقال:
- واضح إننا هنلاقي حاجات كتير مستخبية هنا.
وبالفعل بعد تفتيش المكان، لقوا ملفات وأوراق قديمة بتثبت تورط الدكتور في تزوير التقارير الطبية، والتلاعب بعلاج المرضى، وكمان سجلات تحويلات مالية مرتبطة بالموقع والحسابات اللي كان بيستخدمها.
أما أنا ففضلت واقفة مكاني، لحد ما محمد قرب مني وقال:
- خلاص يا ورد، كل حاجة انتهت.
بصيتله وقلت:
- يعني مش هضطر أرسم تاني؟ مش هفضل طول حياتي مستنية جريمة تحصل قدامي؟
مسك إيدي وقال بإبتسامة بيحاول يطمني:
- مش هقدر أوعدك بحاجة مش عارفها، بس أقدر أوعدك إن محدش هيقدر يستغلك أو يأذيكي تاني.
إبتسمتله رغم دموعي، وحسيت لأول مرة من فترة طويلة إني مش لوحدي.
---
عدى وقت بعد القبض على الدكتور، واتفتحت التحقيقات في كل القضايا المرتبطة بيه، وإتكشف جزء كبير من اللي حصل لأمي، واتأكدت إن عمتي سعاد كانت شريكة في إيذائها والتلاعب بحالتها، وإن التقارير اللي اتكتبت عنها كانت مزيفة.
أما الموقع فتم إغلاقه بعد الوصول للأجهزة والحسابات المستخدمة فيه، وإتضح إن ناس كتير اتورطت في التعامل معاه من غير ما تعرف حقيقته.
وبالنسبة ليا، رجعت بيتي بعد فترة، وحاولت أبدأ حياتي من جديد.
في البداية كنت بخاف أمسك أي فرشة رسم، لكن مع الوقت بدأت أرجع للرسم بإرادتي، من غير خوف ولا انتظار للحاجة اللي ممكن تظهر على الورق.
وفي يوم كنت قاعدة قدام لوحتي الجديدة، ومحمد كان قاعد جنبي بيبصلي وأنا برسم.
سألني بابتسامة:
- إيه اللوحة المرة دي؟
بصيتله وابتسمت وقولت:
- المرة دي أنا اللي مختارة أرسم إيه.
ضحك وقال:
- طب وريني كدا.
لفيت اللوحة ناحيته، وكانت رسمة بسيطة ليا وأنا واقفة قدام شباك مفتوح، والنور داخل الأوضة.
فضل يبص للوحة شوية، وبعدها قال:
- أخيرًا رسمتي حاجة من غير ما تخوفيني.
ضحكت وقولت:
- هو إنت كنت ناقص رعب تاني؟
إبتسم، وبعدها مسك إيدي وقال بهدوء:
- أنا بس كنت مستني أشوفك بتضحكي من غير ما تكوني خايفة.
بصيتله، وحسيت إن كل اللي عديت بيه رغم صعوبته علمني إن مش كل حاجة بنشوفها لازم نستسلم ليها، وإن أحيانًا أصعب حاجة ممكن نواجهها هي إننا نصدق إن لسه عندنا فرصة نبدأ من جديد.
رجعت بصيت للوحة، وحطيت الفرشة على جنب.
المرة دي مكنش فيه دم، ولا جريمة، ولا حد مستني مني أرسم نهايته، كانت مجرد لوحة عادية.
لكن بالنسبة ليا كانت أول لوحة أرسمها وأنا حرة وفي حد جنبي بيحبني بجد وبيخاف عليا.
نسيت أقولكم إن من بعد الليلة اللي إتقبض فيها على الدكتور اللي كان بيستخدم السحر الإسود عشان يتحكم فيا ويخلي قدراتي الغريبة اللي ورثتها من والدتي تبقى تحت سيطرتهُ وتطلع اسوء ما فيها وإنتهى كل دا الحمدلله بعد القبض عليه.
ولكن من بعد الليلة دي محمد طلب إيدي وأنا مترددش ثانية طبعًا هلاقي فين حد يوهبلي حبهُ وقلبهُ وحنيتهُ بالشكل دا!
تمت
لقراءة باقي الفصول اضغط هنا