رواية أحببت قائد الفريق الفصل التاسع9 بقلم هند الحجار
وفجأة، ارتفعت شهقات ليل بشكل أكبر، فالتفت الجميع ناحيتها في نفس اللحظة.
سيف أول ما شاف دموعها، اتحرك بسرعة ناحيتها، ونزل لمستواها ووقف قدامها.
سيف (بقلق): ليل... إنتِ بتعيطي ليه؟! في إيه؟! مالك بس؟!
ليل حاولت ترد، لكن شهقاتها كانت بتسبق كلامها.
سيف مد إيده بهدوء ومسح دموعها بإبهامه، وبعدها قال بنبرة حنونة:
سيف: اهدي بس، متعيطيش... إحنا كلنا معاكي، فاهمة؟!
ليل رفعت عينيها ناحيته، وحاولت تتكلم وسط شهقاتها.
ليل (بصوت متقطع): أنا... أنا اتعودت عليكم... ومش عايزة أبعد عنكم... لو مش هتخلوني في الفريق، بس خلوني معاكم... ما ترجعونيش الملجأ تاني... أنا ما صدقت إني أعيش عيشة كويسة وأحس إني عندي ناس حواليا... أنا ما صدقت أحس إني بقيت واحدة منكم!
اتجمد الجميع مكانهم بمجرد ما سمعوا كلمة «الملجأ».
بصوا لبعض بصدمة، وبعدها رجعت عيونهم ناحية ليل، وكأنهم بيحاولوا يستوعبوا اللي سمعوه.
أنس (باستغراب): ملجأ؟!
مؤمن بص لياسين، وياسر عقد حاجبيه، بينما رامي اختفت ابتسامته تمامًا.
ياسين أخد نفسًا عميقًا، وبعدها اتقدم خطوة وقال بهدوء:
ياسين: أيوه يا جماعة... ملجأ.
الكل بصله باهتمام، فكمل كلامه:
ياسين: ليل يتيمة، وعاشت واتربت في ملجأ من وهي صغيرة. وأنا أول مرة شوفتها كانت هناك، لما كنت رايح الملجأ في زيارة. وقتها لفت انتباهي وجود ملعب صغير، وشفتها وهي بتلعب مع مجموعة من الأطفال.
ابتسم ابتسامة بسيطة وهو بيفتكر الموقف.
ياسين: فضلت أراقب لعبها شوية، وبصراحة اتبهرت بأدائها. كان عندها مهارة وسرعة وتركيز، وموهبة أكبر من سنها بكتير. وقتها حسيت إن الفريق محتاج لاعبة زيها، وإن وجودها ممكن يفرق معانا فعلًا.
بص ناحية ليل، وكمل:
ياسين: اتكلمت معاها وعرفت إنها بتحب اللعبة وبتحلم تبقى لاعبة محترفة، وعرضت عليها تنضم للفريق. في البداية الموضوع ما كانش سهل، لكن هي وافقت، وبدأنا نرتب كل حاجة عشان تقدر تكون معانا.
سكت لحظة، وبعدها قال بجدية:
ياسين: وأنا عارف إننا غلطنا لما خبينا الحقيقة عنكم، بس صدقوني، ما كانش هدفنا نخدع حد. كل اللي كنا عايزينه إن ليل تاخد فرصتها وتثبت نفسها.
سيف رجع بص لليل، وقرب منها أكتر.
سيف: ليل... اسمعيني كويس.
ليل بصتله وهي بتمسح دموعها.
سيف ابتسم لها ابتسامة مطمئنة، وقال بثقة:
سيف: محدش هيمشيكي من هنا، سامعة؟! أنا قائد الفريق، وبقولك إنك هتفضلي معانا... وهتفضلي كمان بشخصيتك الحقيقية، من غير ما تخبي حاجة ولا تمثلي إنك حد تاني.
ليل بصتله بعيون مليانة دموع.
سيف كمل:
سيف: إنتِ واحدة من الفريق، ومكانك هنا، ومحدش له حق يحسسك بعكس كده.
ابتسامة صغيرة ظهرت على وش ليل، رغم دموعها.
وفي اللحظة دي، رامي رفع إيده فجأة وقال بنبرة درامية:
رامي: يا جماعة بقى! ما تحسسونيش إني وحش أوي كده! أنا نقطة ضعفي دموع الحريم، والله مش بستحمل المنظر ده!
الكل بصله، فرفع إيده التانية وكمل:
رامي: وبعدين أنا عملت كل ده عشان أعرف الحقيقة، مش عشان أعيط البنت! هو أنا كنت أعرف إن الموضوع وراه ملجأ وحكاية كبيرة كده؟!
أنس بصله بضيق وقال:
أنس: طب ما تسكت يا رامي شوية! إنت مش شايف إن البنت لسه بتعيط؟!
رامي بصله باستنكار.
رامي: إيه يا عم؟! هو أنا قولت حاجة غلط؟!
أنس تجاهله، واتحرك ناحية ليل، ووقف قدامها بابتسامة هادية.
أنس: خلاص يا ليلى، أنا موافق إنك تفضلي معانا.
ليل رفعت عينيها ليه.
أنس كمل وهو بيبتسم:
أنس: إنتِ مش هتمشي من هنا، إحنا اتعودنا عليكي، وبصراحة بقينا مش متخيلين الفريق من غيرك. وبعدين يعني، سواء كنتِ ولد أو بنت، إحنا حبيناكِ كزميلة وصاحبة لينا، وده مش هيتغير.
ليل ابتسمت وسط دموعها.
أنس: بس عندي شرط!
ليل بصتله باستغراب.
ليل: شرط إيه؟!
أنس ضحك.
أنس: ترجعي تتمرني معانا بسرعة، عشان أنا زهقت من إنك قاعدة كده وإحنا اللي بنجري في الملعب!
الكل ضحك، وليل مسحت دموعها وهي بتضحك بخفة.
رامي بص لأنس وهز راسه بإعجاب مصطنع.
رامي: الله! الله! إيه الكلام الكبير ده يا أنس؟! ده إنت طلعت شاعر وإحنا ما نعرفش!
أنس بصله بحدة.
أنس: إنت بالذات تخرس! أنا مش عايز أسمع صوتك!
رامي حط إيده على صدره بصدمة.
رامي: يا نهار أبيض! هو أنا مالي بس؟!
ضحك الشباب، لكن فجأة عيونهم اتجهت ناحية ياسر، اللي كان واقف بعيد شوية وساكت من أول ما عرف الحقيقة.
ياسر كان حاطط إيده في جيبه، وملامحه لسه جادة، ومش بيتكلم.
ياسين بصله، وبعدها قال:
ياسين: إيه يا ياسر؟! ساكت ليه؟!
مؤمن: أيوه يا ياسر، قول رأيك.
ياسر رفع عينيه وبص لهم واحد واحد، وبعدها تنهد وقال:
ياسر: إيه يا جماعة؟! ما تحسسونيش إني الوحيد القاسي هنا! إنتوا كلكم قلبتوا عليا مرة واحدة!
بعدين رجع ابتسم وقال : اعملوا اللى انتوا عاوزينوا .
رامي صفق بإيديه وقال:
رامي: الله! الله! أهو الواد ياسر ده، رغم إنه بيبان ناشف ومفيش في قلبه رحمة، بس من جواه قلبه حنين أهو!
ياسر لف ناحيته بسرعة.
ياسر: رامي!
رامي رجع خطوتين لورا ورفع إيده.
رامي: خلاص يا عم، أنا قلت الحقيقة بس!
ضحك الجميع، حتى ليل ضحكت من قلبها المرة دي، وحست إن الحمل اللي كان على قلبها بدأ يخف.
ياسين ابتسم وهو بيبص للشباب، وبعدها قال:
ياسين: خلاص يا جماعة، كده إحنا اتفقنا. ليل هتفضل معانا، ومش عايز حد يرجع يفتح الموضوع بطريقة تضايقها تاني.
سيف: متقلقش، محدش هيضايقها.
مؤمن: اعتبر الموضوع انتهى يا كابتن.
أنس: المهم ترجع لنا بسرعة.
رامي: وأنا كمان عندي طلب... محدش يشيل مني لقب مكتشف الحقيقة!
ياسر: يا عم غور من وشي!
انفجر الجميع في الضحك، وفي وسط الضحك ده، ليل كانت بتبص لهم واحد واحد، وابتسامتها بتكبر.
لأول مرة من وقت طويل، ما كانتش حاسة إنها لوحدها.
فجأة، موبايل ياسين رن.
طلع الموبايل من جيبه، وبص للشاشة، ولما شاف اسم المتصل، ملامحه اتغيرت شوية.
ياسين كان واقف بره الأوضة، ماسك الموبايل على ودنه وبيسمع كلام مدير النادي، لحد ما اتكلم فجأة باستغراب:
ياسين: إيه؟! البطولة الأسبوع الجاي؟!
سكت شوية وهو بيسمع الرد، وبعدها قال:
ياسين: بس إزاي بالسرعة دي؟! مش إحنا كنا متفقين إنها هتكون الشهر الجاي؟!
مدير النادي وضح له إن حصلت بعض الظروف، وإن تم تقديم موعد البطولة، وإن كل الفرق المشاركة وصلها الموعد الجديد.
ياسين حرك إيده على شعره بتوتر.
ياسين: تمام، تمام... خلاص، أنا فهمت. شكرًا إنك بلغتني.
قفل المكالمة، وفضل واقف مكانه شوية، وملامح القلق بدأت تظهر على وشه.
كان عارف إن الفريق محتاج وقت أكتر للتجهيز، خصوصًا إن ليل لسه ما رجعتش لكامل لياقتها بعد الإصابة، وكانوا مخططين إن قدامهم شهر كامل يستعدوا فيه للبطولة.
لكن دلوقتي، كل حاجة اتغيرت!
أخد نفس عميق، وبعدها رجع دخل الأوضة.
أول ما دخل، سيف بصله.
سيف: خير يا ياسين؟! في حاجة حصلت؟
ياسين بص للشباب وقال بجدية:
ياسين: يا جماعة، عندي خبر مهم.
رامي: خير يا كابتن؟! متقولش إن فيه مصيبة جديدة، إحنا لسه مخلصين من مصيبة اكتشاف إن ليث طلعت ليلى!
أنس ضحك.
أنس: اسكت يا رامي واسمع!
ياسين: النادي كلمني دلوقتي، وبلغني إن موعد البطولة اتحدد.
سيف: حلو، إمتى بقى؟
ياسين: الأسبوع الجاي.
ساد الصمت للحظة، وبعدها الكل اتكلم في نفس الوقت!
أنس: إيه؟! الأسبوع الجاي؟!
ياسر: بالسرعة دي إزاي؟!
مؤمن: إحنا لسه مخلصين الماتش اللي فات!
رامي فتح عينيه باستغراب.
رامي: أسبوع واحد؟! هو إحنا هنلعب بطولة ولا هنلحق قطر؟!
ياسر: مش كانوا قالوا الشهر الجاي؟!
ياسين: أيوه، وده اللي إحنا كنا متفقين عليه، لكن حصلت ظروف في النادي، وقرروا يقدموا موعد البطولة للشهر ده، وتحديدًا الأسبوع الجاي. ومدير النادي كلمني وبلغني بالقرار دلوقتي.
سيف عقد حاجبيه بتفكير.
سيف: طب وإحنا هنعمل إيه دلوقتي؟!
ياسين: هنضغط التدريبات شوية، بس فيه مشكلة تانية لازم نتكلم فيها.
بص ناحية ليل، اللي كانت قاعدة بتسمعهم باهتمام.
ياسين: ليل .
ليل: أيوه؟
ياسين: إحنا كنا متفقين إنك ترجعي للفريق، لكن دلوقتي لازم نحدد هنعمل إيه في موضوع البطولة.
سيف اتكلم من غير تردد:
سيف: هنظهرها زي ما هي. ليل هتفضل معانا بصفتها الحقيقية، ومش هنخبي حاجة تاني.
مؤمن فكر شوية، وبعدها قال:
مؤمن: طب والناس هتقول إيه لما يشوفوا بنت بتلعب وسط فريق رجالة؟! أكيد الموضوع هيعمل كلام كتير.
ياسر رد عليه وهو بيهز كتفه:
ياسر: يا عم ما لناش دعوة بالناس! الناس كلها لما تشوف مهاراتها وموهبتها في الملعب، هتعرف إنها موجودة عشان تستحق تكون هنا، مش عشان حد جاملها.
أنس: عنده حق، إحنا مش هنفضل نفكر الناس هتقول إيه وهنعمل إيه. المهم نلعب ونثبت نفسنا.
رامي: وبعدين يا جماعة، هو إحنا ناقصين وجع دماغ؟! خلونا في البطولة ونسيب الناس تتكلم براحتها!
ياسين بص لسيف بتفكير.
ياسين: طب مش المفروض نبلغ مدير النادي الأول؟! ونعرفه إن ليلى هتشارك معانا، عشان ما يحصلش اعتراض بعدين؟
سيف هز راسه بالرفض.
سيف: لا، مش لازم نبلغ أي حد دلوقتي. إحنا هنروح البطولة، وهنظهرها قدام الكل مرة واحدة، وندخلها الملعب زي أي لاعبة في الفريق.
ياسين: بس يا سيف...
سيف قاطعه بهدوء:
سيف: اسمعني يا ياسين، لو بدأنا نشرح ونبرر من دلوقتي، ممكن الموضوع يتعقد، وكل واحد يفضل يقول رأيه ويعترض قبل ما يشوف هي بتلعب إزاي. لكن لما يشوفوها في الملعب ويشوفوا مستواها بنفسهم، ساعتها محدش هيقدر ينكر موهبتها.
ياسين فضل ساكت شوية، وبعدها هز راسه بالموافقة.
ياسين: تمام، أنا معاك. بس لازم نكون مستعدين لأي رد فعل.
سيف: هنكون مستعدين.
بعدها سيف بص ناحية ليل، واتكلم بنبرة فيها اهتمام:
سيف: بس فيه حاجة أهم دلوقتي... إنتِ يا ليل، رجلك عاملة إيه؟! تقدري تمشي عليها وتتمرني؟ ولا لسه بتوجعك؟
ليل ابتسمت واعتدلت في قعدتها.
ليل: الحمد لله، أنا بقيت أحسن بكتير. الوجع قل جدًا، وبقدر أمشي عليها أحسن من الأول.
سيف: يعني تقدري ترجعي التمرين؟
ليل: أيوه، أنا كمان وحشني الملعب جدًا.
سيف ابتسم.
سيف: حلو أوي. يبقى من بكرة نبدأ التدريبات، بس واحدة واحدة، ومش عايزك تضغطي على رجلك.
ياسين: بالظبط، أهم حاجة سلامتك، مش هنستعجل على حساب صحتك.
رامي حط إيده على دماغه وقال بيأس:
رامي: آه يعني رجعنا للتدريبات تاني! أنا لسه كنت بحلم إني هاخد إجازة طويلة، يا رب هو أنا مش مكتوب عليا أرتاح أبدًا؟!
أنس ضحك.
أنس: إنت إجازتك الوحيدة لما تنام يا رامي!
رامي: حتى وأنا نايم بتطاردوني!
انفجر الجميع في الضحك، وليلى ضحكت معاهم وهي حاسة إن كل حاجة بدأت ترجع لطبيعتها.
وبكده انتهى اليوم، وكل واحد بدأ يستعد لليوم اللي بعده، واللي هيكون بداية مرحلة جديدة في طريق البطولة.
***
**في صباح اليوم التالي...**
بدأ ضوء الشمس يدخل من الشبابيك، والبيت كان هادي تمامًا.
لكن ريحة الأكل بدأت تنتشر في المكان، وكانت كفيلة إنها تصحي أي حد نايم!
ليل كانت واقفة في المطبخ، لابسة لبس مريح وشعرها ملموم، وبتحضر الفطار بحماس.
كانت مجهزة أصناف كتير، وبتتنقل بين المطبخ والسفرة عشان تخلص كل حاجة قبل ما الشباب يصحوا.
وبعد شوية، كانت السفرة بقت مليانة أكل بأشكال وأنواع مختلفة.
ليل بصت للسفرة بابتسامة رضا.
ليلى: أهو كده الفطار بقى جاهز!
وفي اللحظة دي، خرج أنس من أوضته وهو بيفرك عينيه وبيتمطى.
أنس: صباح الخير...
وقف فجأة لما شم ريحة الأكل، ورفع راسه ناحية السفرة.
أنس: إيه الريحة الجميلة دي؟! هو إحنا جايبين شيف جديد ولا إيه؟!
ليل ضحكت.
ليل: صباح النور يا أنس، تعالى الفطار جاهز.
أنس قرب من السفرة وبص للأكل بانبهار.
أنس: يا نهار أبيض! كل ده إنتِ اللي عملاه؟!
ليل: أيوه، عجبك؟
أنس: عجبني إيه بس؟! ده أنا جعان من المنظر!
مد إيده ياخد قطعة طعمية، لكن ليل خبطت على إيده بخفة.
ليل: استنى يا أنس، لسه ما قعدناش كلنا!
أنس رجع إيده وهو بيضحك.
أنس: حاضر يا ستي، هنستنى.
بدأ يخرج ياسر ومؤمن من اوضتهم وانبهروا من منظر الاكل
وبعد شوية، ظهر رامي من أوضته وهو بيتمطى، لكن أول ما شم ريحة الأكل فتح عينيه وبدأ يدور على مصدر الريحة.
رامي: استنوا... استنوا... هو أنا صاحي ولا بحلم؟!
أنس: إيه يا عم؟!
رامي قرب من السفرة، وفضل يبص على الأطباق واحد ورا التاني.
رامي: إيه ده يا ليل؟! كل ده إنتِ اللي عملاه؟! أنا ما كنتش أعرف إنك شاطرة كده!
ليل ضحكت.
ليل: طب الحمد لله إنك عرفت!
رامي بص للشباب، وبعدها قال بفخر مصطنع:
رامي: شفتوا بقى؟! وجود الحريم مهم برضه وسط الرجالة! بدل ما إحنا عايشين على السندوتشات والاندومي كل يوم!
ياسر: ما إنت اللي كل يوم بتطلب أكل من بره!
رامي: يا أخي سيبني أفرح بالنعمة!
ضحك الجميع، وليل بدأت توزع الأطباق عليهم.
وفي اللحظة دي، خرج سيف من أوضته، وكان بيقفل أزرار ساعته.
سيف: صباح الخير يا جماعة.
وبص للاكل بص لليل بحب وغمزلها ليل اتكسفت وبصت فى الأرض وبصت على الشباب يكونوا خدوا بالهم لقت الكل مشغول بالاكل بعد فترة
سيف: يلا يا رجالة، كل واحد يجهز نفسه. عندنا تدريب النهارده، ومش عايز حد يتأخر.
رامي بصله بصدمة.
رامي: هو إحنا لسه مخلصين فطار!
سيف: وماله؟!
رامي: أنا حاسس إنك مستعجل علينا ليه؟!
ياسر: عشان البطولة يا نجم، ولا نسيت؟
رامي تنهد باستسلام.
رامي: البطولة... البطولة... ماشي يا سيدي!
ليل قامت من مكانها وقالت بحماس:
ليل: أنا كمان هجهز وأنزل معاكم.
سيف ابتسم.
سيف: تمام، بس خلي بالك من رجلك.
ليلى: حاضر يا كابتن.
***
**بعد قليل – ملعب التدريب...**
كان الشباب بدأوا يجهزوا الملعب، وكل واحد فيهم بيعمل إحماء استعدادًا للتدريب.
ليل دخلت الملعب وهي لابسة ملابس رياضية مناسبة، وشعرها مربوط، وابتسامة الحماس على وشها.
غياب طويل، رجعت ليل تقف وسط فريقها من جديد... المرة دي من غير كاب، ومن غير أسرار، ومن غير خوف إنها تخفي حقيقتها عن أي حد.
كان قدامهم أسبوع واحد بس قبل البطولة، وأسبوع مليان تحديات لازم يستعدوا لها كويس.
**في صباح يوم البطولة...**
كان اليوم المنتظر أخيرًا قد وصل.
من بدري، بدأ فريق ياسين يستعد للبطولة، وكل واحد فيهم كان عنده حماس كبير إنه يقدم أفضل ما عنده ويحقق الفوز بالكأس اللي تعبوا كتير علشان يوصلوا له.
في غرفة تبديل الملابس، كان الشباب بيجهزوا ملابسهم الرياضية، وكل واحد بيظبط حذاءه وبيستعد للنزول.
رامي كان واقف قدام المراية، بيظبط شعره للمرة العاشرة.
أنس بصله باستغراب.
أنس: إنت يا عم هتلعب ماتش ولا رايح فرح؟!
رامي: يا ابني لازم أكون في أحسن صورة، ده يوم تاريخي!
ياسر: تاريخي إيه بس؟! خلصنا بقى وتعالى.
رامي: إنتوا مش مقدرين أهمية المظهر الخارجي!
مؤمن ابتسم وهو بيجهز حذاءه.
مؤمن: ربنا يستر من المظهر الخارجي ده.
في اللحظة دي، دخل سيف وياسين، وكان واضح على ملامحهم الجدية والتركيز.
ياسين: يلا يا رجالة، جاهزين؟!
الكل رد بحماس:
الجميع: جاهزين يا كابتن!
سيف بص ناحية ليل اللي كانت واقفة جنب الدولاب، وبتظبط ملابسها الرياضية.
كانت ليل قصرت شعرها وبقت عاملة قصة شعر قصيرة مناسبة ليها، وملامحها بقت واضحة أكتر، ومبقاش فيه أي حاجة تخلي حد يفتكرها ولد.
سيف ابتسم وقال:
سيف: جاهزة يا ليل؟
ليل رفعت عينيها وابتسمت بثقة.
ليل: جاهزة من زمان!
ياسين: حلو، عايز أشوف منكم النهارده أفضل مستوى عندكم. إحنا تعبنا كتير علشان نوصل لليوم ده، ومش عايزين نضيع تعبنا.
سيف: والعبوا بروح الفريق، ومحدش يحاول يستعرض على حساب التاني. أهم حاجة نلعب مع بعض.
رامي رفع إيده.
رامي: حاضر يا كابتن، بس لو جبت جون محدش ينسى يحتفل بيا!
أنس: لو جبت جون الأول نبقى نفكر!
ضحك الجميع، وبعدها خرجوا من غرفة تبديل الملابس واتجهوا ناحية الملعب.
***
**داخل الملعب...**
كان الملعب مليان بالجماهير، والمدرجات مزدحمة بالمشجعين، وأعلام الفرق المشاركة بتترفع في كل مكان.
صوت المذيع كان بيعلن عن الفرق المشاركة، والجماهير بتشجع بحماس.
وبعد لحظات، أعلن المذيع:
المعلق: والآن نستقبل فريق ياسين، الفريق اللي قدر يوصل للبطولة بعد سلسلة من المباريات القوية والمنافسات الصعبة!
دخل الفريق الملعب وسط تصفيق وهتافات الجمهور.
لكن بمجرد ما ظهرت ليلى وسط الشباب، بدأت الهمهمات تنتشر في المدرجات.
أحد المشجعين: هو إيه ده؟! دي بنت؟!
مشجع تاني: هي بتلعب مع الفريق ده؟!
والبعض بدأ يلتفت لليل باستغراب، خصوصًا إن وجودها وسط فريق من الشباب كان مفاجأة بالنسبة لهم.
حتى المعلق نفسه اتفاجئ، وبص ناحيتها باستغراب قبل ما يتكلم في الميكروفون.
المعلق: لحظة واحدة يا جماعة! هل أنا شايف صح؟! فيه لاعبة بنت ضمن تشكيل فريق ياسين؟!
بدأ الجمهور يتكلم بصوت أعلى.
المعلق: دي مفاجأة غير متوقعة تمامًا! لأول مرة نشوف لاعبة تشارك بالشكل ده ضمن الفريق!
ليل سمعت بعض التعليقات، لكنها ما اهتمتش، وفضلت ماشية بثبات ناحية الملعب.
رامي قرب منها وقال بصوت منخفض:
رامي: إيه يا نجمة؟! بقيتي مشهورة من قبل ما الماتش يبدأ!
ليل ضحكت.
ليل: ركز في الماتش أحسن يا رامي.
رامي: حاضر يا ست الكل!
سيف كان ماشي قدامهم، ولف ناحيتهم وقال:
سيف: يلا يا جماعة، ركزوا. إحنا جايين نلعب مش نسمع تعليقات الجمهور.
وصل الفريق لمكانه، وبدأ كل لاعب ياخد مركزه.
أما الفريق المنافس، فريق النسور، فكان واقف في الناحية التانية، وكان واضح إنهم لاحظوا وجود ليل، وبدأ بعض لاعبيهم يتبادلوا النظرات.
قائد فريق النسور ابتسم بسخرية وهو بيبص ناحيتها.
***
**بداية المباراة...**
المعلق: والآن تبدأ المباراة الأولى لفريق ياسين أمام فريق النسور! مين هيقدر يفرض سيطرته ويحقق أول فوز في البطولة؟!
انطلقت صافرة البداية!
الكرة راحت لفريق النسور، وبدأوا يتحركوا بسرعة ويحاولوا يوصلوا لمنطقة التسجيل.
لكن ياسر كان مستعد، وقطع الكرة من أول محاولة، ومررها لسيف.
سيف استلم الكرة، ولف بجسمه بعيد عن اللاعب اللي بيحاول يقطعها، وبعدها مررها لرامي.
رامي اتحرك بسرعة ناحية الطرف.
رامي: وسعوا بقى يا رجالة!
حاول لاعب من الفريق المنافس يوقفه، لكن رامي لف من جنبه، ومرر الكرة لأنس.
أنس استلمها، وبص ناحية ليل اللي كانت بتتحرك بسرعة ناحية السلة.
أنس مرر لها الكرة.
ليل استلمت الكرة بثبات، وبدأت تتحرك بسرعة، مراوغة أول لاعب، وبعدها عدت من لاعب تاني بحركة سريعة خلت الجمهور يتفاعل معاها.
المعلق بحماس: يا سلام! إيه السرعة دي؟! اللاعبة بتتحرك بشكل رائع!
ليل قربت من السلة، رفعت إيديها وصوبت الكرة بدقة...
والكرة دخلت السلة!
**أول نقطة لفريق ياسين!**
الجمهور انفجر بالتصفيق والهتاف.
المعلق: نقطة رائعة! وأول تسجيل في المباراة من اللاعبة ليلى! بداية قوية جدًا!
رامي جري ناحيتها ورفع إيده.
رامي: عاش يا ليل! الله ينور!
أنس خبط كفها بفرحة.
أنس: برافو عليكي!
سيف ابتسم بفخر
ليل ابتسمت، ورجعت لمكانها استعدادًا لاستكمال المباراة.
لكن على الناحية التانية، قائد فريق النسور كان واقف متضايق، وبيبص لليل بتركيز.
لاعب من فريقه قرب منه وقال:
اللاعب: البنت دي شكلها قوية فعلًا.
القائد رد بضيق:
القائد: واضح إنها مش سهلة... لازم نوقفها.
***
استؤنفت المباراة من جديد.
الفريق المنافس بدأ يضغط أكتر، وبقى واضح إنهم غيروا طريقة لعبهم، وبقوا بيراقبوا تحركات ليل بشكل خاص.
كل ما تتحرك ناحية الكرة، تلاقي لاعب بيقف في طريقها، والتاني بيحاول يقطع عليها المساحة.
سيف لاحظ ده، فنادى عليها:
سيف: ليل! خلي بالك من تحركاتهم!
ليلى هزت راسها وكملت لعب.
لكن الفريق المنافس استغل انشغال لاعبي فريق ياسين بمراقبة تحركاتهم، وبدأ هجمة سريعة.
الكرة انتقلت من لاعب للتاني، لحد ما وصلت لقائدهم، اللي خد خطوة للخلف وصوب الكرة ناحية السلة.
دخلت الكرة!
المعلق: نقطة جديدة لفريق النسور! المباراة بدأت تسخن!
النتيجة بقت متعادلة.
الفريق رجع يلعب، لكن النسور كانوا أكثر ضغطًا، وقدروا يقطعوا الكرة من رامي، وينفذوا هجمة مرتدة سريعة.
ياسر حاول يلحق اللاعب، لكن الأخير مرر الكرة لزميله اللي صوبها وسجل النقطة التانية.
المعلق: نقطة أخرى لفريق النسور! الفريق المنافس يتقدم الآن!
سيف قبض إيده بتوتر وبص للنتيجة.
رامي: إيه ده يا جماعة؟! هما ناويين يصعبوها علينا من أولها؟!
ياسين كان واقف بره الملعب بيتابع كل حركة بتركيز، وملامحه بدأت تتوتر.
ياسين: ركزوا يا رجالة! لسه الماتش طويل!
ليل كانت واقفة في الملعب، وملامحها اتغيرت وهي شايفة الفريق المنافس بيتعمد يضيق عليها المساحات.
اتضايقت من الطريقة اللي بيلعبوا بيها، وقررت إنها مش هتسيبهم يسيطروا على المباراة بالشكل ده.
استلمت الكرة من سيف، وبدأت تجري بسرعة.
لاعب حاول يقف قدامها، لكنها عملت حركة خداع ولفت من جنبه.
لاعب تاني حاول يلحقها، لكنها مررت الكرة بين إيديه بطريقة ذكية، واستعادت السيطرة عليها.
المعلق بحماس: يا جماعة، ليل رجعت من جديد! مراوغة رائعة!
ليل قربت من السلة، وقبل ما اللاعب المنافس يلحقها، رفعت الكرة وصوبتها بقوة ودقة.
دخلت الكرة!
**النقطة التانية لليل والتعادل لفريق ياسين!**
المدرجات علت بالتصفيق والهتاف.
المعلق: يا لها من لاعبة! ليل تسجل من جديد وتعيد فريقها للمنافسة! مهارات استثنائية فعلًا!
رامي جري ناحيتها وهو بيضحك.
رامي: إيه يا بنتي؟! إنتِ ناوية تجيبي كل النقط لوحدك؟!
ليل ضحكت.
سيف ابتسم، لكنه كان متابع لاعبي الفريق المنافس، ولاحظ إن نظراتهم بقت مختلفة تمامًا.
قائد النسور بص لزمايله، وبعدها قرب من اتنين منهم واتكلم بصوت منخفض:
القائد: واضح إنها هي اللي شايلة الفريق... لو فضلت تلعب بالشكل ده مش هنقدر نكسب.
لاعب: نعمل إيه يعني؟
القائد بص ناحية ليل ، وبعدها تبادل معاهم نظرات غامضة.
القائد: لازم نوقفها... ومش عايز أشوفها بتلعب تاني.
***
استؤنفت المباراة، والكرة بقت بتتنقل بسرعة بين الفريقين.
فريق ياسين بدأ يضغط بقوة، لكن النسور بقوا بيراقبوا ليل في كل تحركاتها.
سيف لاحظ إن فيه حاجة غريبة بتحصل، وإن كل ما ليل تقرب من الكرة، لاعبين من الفريق المنافس بيتحركوا ناحيتها بشكل مبالغ فيه.
سيف نادى عليها:
سيف: ليل! خلي بالك، متدخليش في أي التحام خطر!
ليل: حاضر يا كابتن!
لكن الفريق المنافس كان بدأ يفقد أعصابه.
قائد النسور بص لزميله، وأشار بعينه ناحية ليلى.
اللاعب فهم الإشارة، وهز راسه بهدوء.
وفي اللحظة اللي الكرة كانت فيها مع أحد لاعبي فريق ياسين، بدأ لاعب من النسور يتحرك في اتجاه ليل، بينما لاعب تاني كان بيجهز نفسه لاستقبال الكرة.
سيف كان بيتابع الهجمة، وياسين واقف على طرف الملعب مركز معاهم.
ليل اتحركت بسرعة ناحية الكرة، ومدت إيديها علشان تستقبلها.
لكن فجأة...
أحد لاعبي الفريق المنافس استلم الكرة، وبص ناحية ليل، وبعدها رفع إيده وصوب الكرة بقوة شديدة...
لكن بدل ما يوجهها ناحية السلة...
وجهها مباشرة ناحية وش ليل!
كل حاجة حصلت في ثانية واحدة.
ليل ما لحقتش تستوعب اتجاه الكرة، ولا تلحق تبعد عنها...
**وفجأة...**
ارتطمت الكرة بوجهها بقوة!
المعلق صرخ من الصدمة:
المعلق: أووووه! إيه اللي حصل؟!
سيف اتجمد مكانه، وعينيه اتسعت من الخوف.
سيف: ليل!!!
ورامي وأنس وياسر اتحركوا بسرعة ناحيتها، بينما ياسين قام من مكانه بصدمة.
والجمهور كله وقف من مقاعده، مش مستوعب اللي حصل و ..