رواية أحببت قائد الفريق الفصل العاشر10الاخير بقلم هند الحجار
ارتطمت الكرة بوجه ليل بقوة!
سيف: ليل!!!
في لحظة واحدة، جري سيف ناحيتها، ولحقه رامي وأنس وياسر ومؤمن، بينما ياسين اتحرك بسرعة من مكانه وهو بيبص بصدمة ناحية الملعب.
كانت ليل واقعة على الأرض، حاطة إيديها على وشها، وبتحاول تستوعب اللي حصل.
سيف نزل على ركبته جنبها بسرعة.
سيف (بخوف): ليل! ليل، إنتِ سامعاني؟! ردي عليا!
ليل شالت إيدها من على وشها بصعوبة.
ليل (بتألم): آه... أنا هنا.
سيف بص لوشها، واتغيرت ملامحه أول ما شاف المنطقة حوالين عينها بدأت تورم.
سيف: يا نهار أبيض! عينك!
رامي نزل جنبها وقال بصدمة:
رامي: إيه ده؟! هو الواد ده اتجنن؟! ده كان قاصد يضربها في وشها!
ياسر بص ناحية اللاعب بغضب شديد.
ياسر: أنا شوفت الحركة! ده تعمد يعمل كده!
مؤمن: الحكم لازم يتدخل فورًا، دي مش لعبة!
وفعلًا، الحكم كان بيتجه ناحية اللاعب المنافس، ورفع الكارت الأحمر في وشه.
الحكم: أنت مطرود من المباراة! التصرف ده مرفوض تمامًا، ومش هسمح بأي اعتداء متعمد على اللاعبين!
اللاعب حاول يعترض، لكن الحكم أشار له بالخروج من الملعب فورًا.
رامي وقف وهو بيشاور عليه:
رامي: أيوه كده! اطلع بره! وإياك أشوفك تاني!
أنس شده من دراعه.
أنس: يا عم سيبه، تعالى شوف ليل!
سيف كان لسه مركز مع ليل، وساعدها تقوم بهدوء.
سيف: بالراحة... خلي بالك.
ياسين قرب منهم وقال بقلق:
ياسين: لازم نوقف المباراة ونطمن عليها.
الحكم أعلن إيقاف اللعب مؤقتًا، وبعدها اتجه الفريق كله ناحية منطقة الاستراحة.
---
داخل منطقة الاستراحة...
ليل كانت قاعدة على الكرسي، وماسكة كمادة باردة على عينها، بينما الشباب متجمعين حواليها.
عينها كانت وارمة بوضوح، والاحمرار ظاهر على خدها.
سيف كان واقف قدامها، بيتحرك بتوتر ومش قادر يخفي خوفه.
سيف: طب إنتِ قادرة تفتحي عينك؟
ليل: هحاول.
سيف قرب منها شوية.
سيف: بصيلي يا ليل... ليل، شايفاني؟
حاولت تفتح عينها المصابة، لكنها اتألمت وقفلتها بسرعة.
ليل: آه... مش قادرة، بتوجعني أوي.
سيف اتنهد وحط إيده على شعرها.
سيف: خلاص، متحاوليش. مش لازم تضغطي عليها.
رامي كان واقف ووشه متضايق.
رامي: أنا مش فاهم الواد ده كان عايز إيه بالظبط! هو فاكر نفسه بيلعب ماتش ولا داخل حرب .
ياسر: ده كان مركز معاها طول الماتش، وأول ما لقى فرصة عمل كده.
مؤمن بص لليل وقال بهدوء:
مؤمن: أهم حاجة دلوقتي سلامتك. البطولة مش هتطير، وإحنا مش هنسيبك.
ياسين وقف قدامها وقال بجدية:
ياسين: ليل، أنا شايف إن الأفضل إنك متكمليش المباراة. الإصابة واضحة، ومش عايزين الموضوع يسوء.
ليل رفعت رأسها بسرعة.
ليل: لا يا كابتن، أنا هكمل.
سيف بص لها بصدمة.
سيف: إنتِ بتقولي إيه؟! إنتِ مش قادرة تفتحي عينك!
ليل: أنا أقدر ألعب.
سيف: لا يا ليل، مش هينفع. كفاية اللي حصل لحد كده.
ليل بصتله بإصرار.
ليل: سيف، هما عملوا كده عن قصد! هما عايزين يوقفوني . وأنا مش هديهم الفرصة دي.
سيف: وأنا مش هسمحلك تأذي نفسك عشان تثبتي لهم حاجة!
ليل: أنا مش بعمل كده عشان أثبتلهم حاجة وبس. أنا بحب اللعبة دي، وتعبت كتير عشان أوصل هنا. ومش هخرج من الملعب وأنا لسه قادرة أعمل حاجة.
سكت الجميع، وبصوا لبعض.
ياسين اتكلم بحزم:
ياسين: مفيش بطولة أهم من صحتك يا ليل. لازم تتفحصي كويس الأول، ولو فيه أي خطر مش هتلعبي مهما حصل.
ليل هزت راسها بالموافقة.
وبعد ما تم الاطمئنان عليها، اتأكدوا إنها تقدر تتحرك، لكن كان لازم تتجنب أي احتكاك إضافي، وتوقف فورًا لو الألم زاد أو ظهرت عليها أي أعراض مقلقة.
سيف فضل باصصلها بقلق.
سيف: آخر مرة هقولك، لو حسيتي بأي حاجة مش طبيعية، هتخرجي فورًا. اتفقنا؟
ليل ابتسمت.
ليل: اتفقنا يا كابتن.
رامي صفق بإيديه وقال:
رامي: طب يلا بقى! كفاية اجتماع عائلي، إحنا عندنا ماتش لازم نكسبه!
أنس ضحك.
أنس: إنت أكتر واحد عامل اجتماع من ساعة ما حصلت الإصابة!
رامي: أنا بحاول أرفع الروح المعنوية يا أخي!
ياسر: ارفعها بعيد عن وداني بس!
ضحك الجميع، وحتى ليل ابتسمت.
---
العودة إلى الملعب...
بعد انتهاء الاستراحة، رجع الفريقان يستعدوا لاستكمال المباراة.
ليل دخلت الملعب وسط تصفيق الجمهور، وكانت ملامح الإصابة واضحة على وشها.
المعلق: عادت ليل إلى أرض الملعب مرة أخرى! مشهد مثير للإعجاب، لكن الأهم الآن أن تحافظ على سلامتها وتقدم أفضل ما لديها.
سيف وقف قدام الفريق وجمعهم حواليه.
سيف: اسمعوني يا جماعة، إحنا مش هنلعب بعصبية. عايز كل واحد فيكم يلعب دوره، ويفكر قبل ما يتحرك. هما ضغطهم عالي، فلازم نلعب كفريق.
ياسر: أنا هركز في الدفاع ومش هسيب حد يعدي بسهولة.
أنس: وأنا هتحرك على الأطراف وأفتح مساحات.
مؤمن: وأنا هساعد في بناء الهجمات، وأي كرة تضيع هحاول التقطها.
رامي رفع إيده.
رامي: وأنا هجيب الجون اللي هيخلّيهم يعيطوا!
سيف ضحك رغم توتره.
سيف: إنت بس ركز في اللعب يا رامي!
ياسين من خارج الملعب نادى عليهم:
ياسين: يلا يا رجالة! عايز أشوف روح الفريق اللي اتعودت عليها منكم!
سيف بص لليل.
سيف: جاهزة؟
ليل رفعت إيدها بثقة.
ليل: يلا بينا!
انطلقت صافرة الحكم!
---
استكمال المباراة...
الكرة كانت مع فريق النسور، وقائدهم بدأ يتحرك بسرعة ناحية السلة.
لكن مؤمن اعترض طريقه، وتحرك بخفة ولقط الكرة منه في اللحظة المناسبة!
مؤمن مررها بسرعة لسيف.
سيف استلمها، ومررها لأنس اللي كان بيتحرك ناحية الطرف.
أنس جري بالكرة، ولما لاعب المنافس حاول يقفله، مررها لرامي.
رامي استلم الكرة، ورفع إيده وهو بيجري.
رامي: وسعوا يا جدعان!
لف بجسمه وعدى من لاعب، وبعدها صوب الكرة ناحية السلة...
لكنها ارتدت ، ومدخلتش جواها.
ياسر كان واقف قريب من السلة، قفز والتقط الكرة المرتدة، ومررها لمؤمن.
مؤمن بص ناحية ليل، اللي كانت واقفة في مساحة مفتوحة.
مؤمن: ليل! خدي!
استلمت الكرة، لكن لاعب النسور اتحرك ناحيتها بسرعة.
ليل غيرت اتجاهها، وعدت من جنبه، ثم مررت الكرة لسيف.
سيف استغل المساحة وصوب الكرة.
دخلت!
المعلق: نقطة جديدة لفريق ياسين! تعاون رائع بين اللاعبين، وبداية قوية لاستكمال المباراة!
الشباب خبطوا إيديهم ببعض، ورجعوا لمراكزهم.
لكن النسور ردوا بسرعة.
قائدهم استلم الكرة، ومررها لزميله، اللي خد خطوة للخلف وصوب من مسافة بعيدة.
دخلت الكرة!
الجمهور هتف بحماس.
رامي: إيه يا جماعة! هما كل ما نجيب نقطة لازم يردوا علينا؟!
استأنف الفريق اللعب، وبدأ سيف ينظم الهجوم.
مرر الكرة لمؤمن، ومؤمن خد خطوتين وراوغ لاعب، وبعدها مررها لأنس.
أنس اتحرك بسرعة ناحية السلة، لكنه لاحظ إن لاعب تاني بيقفل عليه الطريق، فرفع الكرة ناحية ياسر.
ياسر استلمها، وصوب بقوة!
دخلت!
المعلق: يا سلام! نقطة رائعة من ياسر! فريق ياسين لا يمنح منافسه فرصة للابتعاد بالنتيجة!
ياسين من خارج الملعب صفق بحماس.
ياسين: عاش يا ياسر! كملوا بنفس الطريقة!
لكن النسور كانوا مصممين يرجعوا المباراة لصالحهم.
بدأوا يضغطوا على سيف، ونجحوا في قطع الكرة منه، وانطلق لاعبهم ناحية السلة وسجل نقطة جديدة.
النتيجة بقت متقاربة جدًا.
---
الدقائق الأخيرة...
الملعب كله كان في حالة حماس، والجمهور واقف بيتابع كل حركة.
ليل كانت بتحاول تحافظ على تركيزها، لكن الألم في عينها كان لسه موجود.
سيف لاحظ إنها بتفرك عينها السليمة، فنادى عليها:
سيف: ليل! خلي بالك من نفسك!
ليل ردت وهي بتتحرك:
ليل: أنا مركزة، متقلقش!
في اللحظة دي، مؤمن قطع تمريرة من الفريق المنافس، ومرر الكرة لسيف.
سيف اتحرك بسرعة، لكن اتنين من لاعبي النسور حاصروه.
سيف بص ناحية رامي.
سيف: رامي!
مرر له الكرة.
رامي استلمها، وبدل ما يصوب، مررها لأنس اللي كان داخل ناحية السلة.
أنس خد خطوة وقفز وصوب!
دخلت!
رامي جري ناحيته.
رامي: أهو! أهو! شفتوا التعاون؟! أنا اللي صنعت الجون ده!
أنس ضحك.
أنس: ماشي يا عم، هنكتب اسمك على الكأس!
المعلق: فريق ياسين يواصل التقدم! مباراة قوية للغاية، وكل نقطة أصبحت مؤثرة في تحديد الفائز!
قائد النسور بدأ يتوتر، وبص ناحية زملائه.
القائد: لازم نلحق نفسنا! فاضل وقت قليل!
استلم الكرة وانطلق، لكن ياسر وقف قدامه ومنعه من التقدم.
الكرة ارتدت ناحية مؤمن، اللي التقطها ومررها بسرعة لليل.
ليل استلمت الكرة.
كان قدامها لاعب بيحاول يوقفها، وعلى الناحية التانية سيف بيتحرك في مساحة مناسبة.
ليل رفعت إيدها كأنها هتمرر له، لكن في اللحظة الأخيرة غيرت اتجاهها، وعدت من اللاعب.
الجمهور بدأ يصفق.
المعلق: ليل تتحرك بالكرة! يا لها من مراوغة رائعة!
قربت من السلة، لكنها لاحظت لاعب تاني بيقفل عليها الطريق.
بدل ما تتسرع في التصويب، مررت الكرة لسيف.
سيف استلمها، وصوب...
دخلت!
المعلق: نقطة جديدة! تعاون ممتاز بين ليل وسيف!
سيف رجع ناحيتها وخبط كفها.
سيف: عاش يا ليل!
ليل ابتسمت
---
الهجمة الأخيرة...
انطلقت صافرة استئناف اللعب.
الكرة وصلت لمؤمن، اللي بدأ يتحرك بيها ناحية منتصف الملعب.
لاعب من النسور حاول يقطعها، لكن مؤمن لف بجسمه وحافظ على الكرة، وبعدها مررها لسيف.
سيف استلمها، وبدأ يراقب تحركات زملائه.
أنس كان بيتحرك ناحية اليمين، ورامي ناحية الطرف التاني، وياسر بيتقدم بالقرب من السلة.
ليل كانت واقفة في مساحة مفتوحة، وبتراقب سيف.
فجأة، قائد النسور اتحرك ناحيتها، وحاول يقفل عليها الطريق.
لكن مؤمن لاحظ ده، فتحرك بسرعة ناحية المساحة المقابلة، وسحب معاه لاعب تاني.
المساحة قدام ليل بقت مفتوحة!
سيف شافها.
سيف: لييييل!
مرر الكرة بكل قوته.
ليل استلمت الكرة، والجمهور كله وقف!
بدأت تجري ناحية السلة، ولاعب المنافس اتحرك ناحيتها بسرعة.
لفت من جنبه، وبعدها رفعت الكرة بإيدها.
سيف كان بيبصلها بتركيز.
ياسين وقف من مكانه.
رامي صرخ:
رامي: يلا يا ليلللل!
أنس ومؤمن وياسر كانوا بيتابعوا الكرة وهي بتتحرك في الهوا.
ليل قفزت وصوبت...
ودخلت الكرة السلة!
وفي نفس اللحظة، انطلقت صافرة نهاية المباراة!
المعلق صرخ بأعلى صوته:
المعلق: انتهت المباراة! انتهت المباراة بفوز فريق ياسين! يا لها من نهاية مثيرة! والبطلة ليل تحسم المباراة بتسجيل النقطة الأخيرة لفريقها!
الجمهور انفجر بالتصفيق والهتافات.
رامي جري في الملعب وهو بيقفز:
رامي: كسبنااااا! إحنا كسبنا يا جماعة!
أنس جري ناحية ليل ورفع إيده.
أنس: عاش يا ليل! إنتِ عملتيها!
ياسر ابتسم وجرى ناحية مؤمن وحضنه وياسين جرى عليهم وبقا حضن ثلاثى
مؤمن قرب منها ومد إيده يخبط كفها
رامي وقف قدامها وفتح دراعاته.
رامي: طب فين الحضن الجماعي بتاع الفوز ده؟! أنا عايز احتفال يليق بالإنجاز!
أنس: ابعد يا رامي، إنت هتخنقنا!
ضحك الجميع.
أما سيف، فكان واقف قدام ليل، وابتسامته مليانة فخر، وحب لكنه أول ما لاحظ إنها بتغمض عينها من الألم، اختفت ابتسامته.
سيف: ليل، عينك عاملة إيه دلوقتي؟
ليل: أنا كويسة يا سيف، متقلقش.
سيف: خلاص، مفيش كلام. هنروح نطمن عليها تاني.
ياسين قرب منهم، وابتسم بفخر.
ياسين: ألف مبروك يا أبطال! النهارده أثبتوا إن الفريق الحقيقي مش مجرد مجموعة لاعبين، الفريق الحقيقي هو اللي يسند بعضه وقت الشدة.
المعلق كان لسه بيتكلم:
المعلق: ولا يمكن أن ننسى أداء ليل اليوم! لاعبة واجهت إصابة صعبة، وعادت لتكمل المباراة، وقدمت تمريرات ومراوغات رائعة، وأنهت اللقاء بالنقطة الحاسمة! تستحق كل التحية والتقدير!
ليل بصت ناحية المدرجات، وشافت الجمهور كله بيصفق لها وبينطق بأسمها.
ابتسمت، ورفعت إيدها بتحية بسيطة.
كانت لحظة عمرها ما هتنساها.
لكن وسط كل التصفيق والاحتفال، كان أكتر شخص لفت نظرها هو سيف، اللي كان واقف جنبها ومش بيبص لحد غيرها.بعد انتهاء البطولة بساعات...
بعد ما المباراة انتهت، سيف أصر إن ليل تروح تكشف على عينها مرة تانية، وبالفعل راحوا المستشفى، والدكتور طمّنهم إن الإصابة سطحية، وإن الورم بدأ يقل، وكتب لها مرهم تستخدمه خلال الأيام الجاية، مع ضرورة الراحة ومتابعة أي تغير في حالتها.
وبعد ما رجعوا، كان الكل أخيرًا قدر ياخد نفسه بعد اليوم الطويل والمليان أحداث.
رامي كان قاعد على الكنبة، وممدد رجليه قدامه، وقال بتعب:
رامي: أنا رسميًا مش حاسس برجلي! هو إحنا لعبنا بطولة ولا طلعنا نحارب؟!
أنس ضحك.
أنس: ما إنت طول الماتش بتجري ورا الكرة وبتجري ورا أي حد يتكلم!
رامي: معلش، دي ضريبة النجومية!
ياسر: نجومية إيه يا عم؟! ده إنت كنت هتقع على وشك في آخر هجمة!
رامي بصله باعتراض.
رامي: يا أخي إنت ليه مصمم تحطمني نفسيًا؟!
مؤمن ضحك، وبعدها بص لياسين.
مؤمن: طب ما إحنا لازم نحتفل النهارده، مش كل يوم بنكسب بطولة!
ياسين ابتسم.
ياسين: عندك حق. إيه رأيكم نخرج كلنا ونتعشى في مكان حلو؟ نستاهل ننبسط شوية بعد التعب ده.
رامي اعتدل في قعدته فجأة.
رامي: أنا موافق! موافق جدًا! وأعلن رسميًا إن القرار ده أحسن قرار اتاخد النهارده!
أنس: إنت وافقت قبل ما تعرف هنروح فين أصلًا!
رامي: مش مهم، المهم فيه أكل!
سيف ابتسم وهو بيبص ناحية ليل.
سيف: وإنتِ يا ليل؟ إيه رأيك؟ تحبي تخرجي معانا؟
ليل ابتسمت.
ليل: طبعًا، أنا كمان محتاجة أغير جو شوية.
ياسين: خلاص، اتفقنا. كل واحد يجهز نفسه، ونتقابل بعد ساعتين.
رامي وقف من مكانه بحماس.
رامي: ساعتين؟! ده أنا محتاج ساعتين لوحدهم عشان أختار اللبس اللي يليق بنجم البطولة!
ياسر: اختار أي حاجة يا عم، إحنا رايحين نتعشى مش داخلين مسابقة جمال!
ضحك الجميع، وبدأ كل واحد يدخل أوضته عشان يستعد للخروج.
---
بعد ساعتين...
كان الشباب قاعدين في الصالة، وكل واحد فيهم لابس بشكل شيك وأنيق.
ياسين كان لابس قميص أسود وبنطلون مناسب، ومؤمن اختار لبس بسيط وأنيق، بينما ياسر كان واقف قدام المراية بيظبط ساعته.
أنس كان قاعد على الكنبة، ورامي جنبه، وكل شوية يبص في موبايله.
رامي: يا جماعة، هو إحنا هنستنى لحد إمتى؟!
أنس: لسه بدري، اهدى شوية.
رامي: أنا جاهز من نص ساعة!
ياسر بصله من فوق لتحت.
ياسر: أيوه، واضح إنك جاهز من امبارح كمان!
رامي ابتسم بفخر.
رامي: الجمال محتاج وقت يا حبيبي.
مؤمن ضحك وهز راسه.
مؤمن: ربنا يستر من الليلة دي.
في اللحظة دي، سيف خرج من أوضته، وكان لابس قميص أنيق وبنطلون أسود، وساعته في إيده.
سيف: إيه يا جماعة؟! جاهزين؟
رامي: إحنا جاهزين من زمان، فاضل بس نجمة الحفلة!
سيف ابتسم.
سيف: ليل لسه بتجهز.
أنس: طب ما تطلع تشوفها، يمكن تكون محتاجة حاجة.
رامي بص لأنس بابتسامة واسعة.
رامي: أيوه يا سيف، اطلع شوفها... إحنا هنستناك هنا، متقلقش!
سيف بصله بتحذير.
سيف: رامي، ارحمنا شوية!
انفجر الشباب في الضحك.
---
في الأعلى...
كانت ليل واقفة قدام المراية، بتبص لنفسها بابتسامة صغيرة.
كانت لابسة فستان أنيق بلون هادي، تصميمه بسيط وراقي، وبيبرز جمالها من غير مبالغة.
شعرها القصير كانت مصففاه بطريقة جميلة، وخصلة ناعمة نازلة على جنب وشها، ومكياجها كان هادي وناعم، مبرز ملامحها وعينيها.
أما الورم اللي كان حوالين عينها، فكان خف بشكل واضح، واختفى جزء كبير من الاحمرار، رغم إن أثر الإصابة لسه موجود.
لمست شعرها بخفة، وبعدها ابتسمت لنفسها.
ليل: أهو كده... جاهزة!
أخدت شنطتها الصغيرة، وخرجت من الأوضة.
---
في الصالة...
كان الشباب لسه بيتكلموا ويهزروا، لحد ما سمعوا صوت خطوات نازلة على السلم.
رامي كان أول واحد يرفع عينه ناحية السلم، لكنه فجأة سكت.
ليل ظهرت قدامهم.
نزلت آخر درجة بهدوء، وعدلت الفستان بإيدها، وبعدها رفعت عينيها ناحيتهم بابتسامة.
للحظة، الكل سكت!
أنس بص لها بإعجاب.
أنس: واااو! إيه الجمال ده يا ليل؟!
مؤمن ابتسم وقال:
مؤمن: ما شاء الله، طالعة شيك جدًا!
ياسر هز راسه بإعجاب.
ياسين ابتسم.
ياسين: ما شاء الله عليكي يا ليل، منورة.
أما رامي، فكان لسه واقف مكانه، وبص لها من فوق لتحت، وبعدها رفع صباعين في بقه وصفر بصوت عالي ، وغمزلها .
الكل انفجر في الضحك.
ليل ضحكت بخجل.
ليل: إيه يا رامي؟! هو أنا عملت إيه؟!
رامي حط إيده على صدره وقال بجدية مصطنعة:
رامي: إنتِ عملتي كارثة! أنا كده مش هعرف أركز في البنات!
أنس: ما إنت أصلًا مش بتعرف تركز غير في البنات.
رامي: يا جماعة، سيبوني أعبّر عن إعجابي بالجمال في سلام!
ضحك الجميع، بينما ليل كانت بتضحك وهي بتحاول تخفي كسوفها.
لكن وسط كل التعليقات دي، كان فيه شخص واحد ساكت تمامًا.
سيف.
من أول ما ليل ظهرت، عينيه كانت مثبتة عليها، وابتسامة هادية ظهرت على وشه من غير ما يحس.
كان شايفها جميلة، لكن اللي شد انتباهه أكتر هو ابتسامتها وملامحها الهادية بعد يوم طويل كانت فيه خايفة ومتألمة، ومع ذلك قدرت تفرح وتضحك من قلبها.
ليل لاحظت إنه ساكت، فبصتله باستغراب.
ليل: إيه يا سيف؟! إنت ساكت ليه؟!
سيف ابتسم، وقرب منها خطوة.
سيف: مفيش... بس واضح إنك تعبتي نفسك في التجهيز.
ليل ابتسمت بخجل.
ليل: يعني... حلو؟
سيف فضل باصصلها لحظة، وبعدها قال بصوت هادي:
سيف: حلو؟ وسكت
ليل ادايقت من بروده ، وبدا الجميع يتحرك فى سعادة
في المطعم...
وصل الجميع إلى المطعم، واختاروا ترابيزة كبيرة في مكان هادي، وقعدوا كلهم حوالينها.
أنس كان أول واحد يمسك قائمة الطعام، وبدأ يقلب فيها باهتمام شديد.
رامي بصله باستغراب.
رامي: إنت بتقرأ القائمة ولا بتذاكر للامتحان؟!
أنس من غير ما يرفع عينه: بس يا عم، أنا عايز أختار حاجة تليق باليوم العظيم ده!
ياسر ضحك.
ياسر: هو إنت جاي تحتفل بالبطولة ولا جاي تعوض الأيام اللي فاتت من غير أكل؟
أنس: الاتنين، عندك اعتراض؟!
ضحك الجميع، وبدأوا يطلبوا الأكل.
أما رامي، فكان مشغولًا بالنظر إلى إحدى الفتيات الجالسات على طاولة قريبة.
مؤمن لاحظ نظراته، فمال ناحيته وهمس:
مؤمن: رامي... ركز معانا، إحنا في مطعم مش في رحلة صيد!
رامي ابتسم بثقة.
رامي: يا أخي سيبني أستمتع بأجواء المكان!
ليل ضحكت، بينما سيف كان قاعد جنبها، وكل شوية يبصلها بابتسامة جانبية مستفزة.
بعد شوية، وصل الأكل، وأنس نسي كل حاجة حواليه، وبدأ يأكل بحماس، وسط تعليقات الشباب وضحكهم.
وبعد ما خلصوا تقريبًا، ليل قامت من مكانها ، لانها كانت متدايقة من سيف.
ليل: يا جماعة، أنا هروح أتمشى شوية.
رامي رفع عينه بسرعة.
رامي: أجي معاكي يا ليل؟
ليل ابتسمت.
ليل: لا شكرًا يا رامي، عايزة أتمشى لوحدي شوية.
رامي: براحتك يا ستي، بس متتأخريش علينا!
سيف بص له بابتسامة جانبية، وبعدها قام من مكانه.
سيف: وأنا كمان هتمشى شوية.
رامي بصله بخبث، لكنه ما قالش حاجة.
---
بعيدًا عن المطعم...
كانت ليل ماشية بهدوء وسط ممر واسع محاط بالأشجار، والهواء الخفيف بيحرك أطراف شعرها.
سيف كان ماشي جنبها، حاطط إيديه في جيوبه، وبيبصلها من وقت للتاني.
ليل بصتله بطرف عينها، وبعدها رجعت بصت قدامها.
سيف ابتسم.
سيف: إيه؟ إنتِ لسه مضايقة مني؟
ليل سكتت.
سيف: يا ليل؟
فضلت باصة قدامها من غير ما ترد.
سيف وقف قدامها شوية، وحاول يبص في عينيها.
سيف: طب بصيلي الأول.
ليل رفعت عينيها ناحيته للحظة، وبعدها بصت بعيد تاني.
ليل: مفيش حاجة.
سيف ابتسم ابتسامة جانبية.
سيف: آه، واضح جدًا إن مفيش حاجة!
ليل: أيوه، مفيش!
كملوا مشي لحد ما وصلوا لشجرة كبيرة، فوقفوا جنبها.
سيف بص لها وقال بهدوء:
سيف: طب قوليلي، أنا عملت إيه عشان تزعلي مني كده؟
ليل بصتله باستنكار.
ليل: إنت بجد مش عارف؟!
سيف: لا، عايز أسمع منك.
ليل أخدت نفسًا، وبدأت تتكلم وهي متضايقة:
ليل: إنت طول عمرك بارد يا سيف! يعني أنا بسألك إذا كنت حلوة، تقوم تقولي حلو؟ وتسكت! هو إنت صعب عليك تقول كلمة حلوة؟!
سيف كان بيسمعها بابتسامة صغيرة.
ليل كملت:
ليل: وبعدين إنت مش عاوز تعترف بمشاعرك يعنى كل ده نازل بصات ونظرات وحركات وونت بارد يعنى مش واخد بالك انى معجبة بيك من اول يوم شوفتك فيه و مكملتش كلامها وفجأة سيف قطع كلامها بقبلة انصدمت ليل من فعلته وبعدته عنها وهى بتبصله بغضب ولكن فجأة اتكلم وهو بينهج
سيف: إنتِ تعرفي إنك أحلى بنت وأرق بنت أنا شوفتها في حياتي؟
ليل اتفاجئت، وملامحها اتغيرت.
سيف ابتسم وهو مكمل:
سيف: وإن ابتسامتك دي بتخليني أنسى أي حاجة حواليا؟ وإن كل مرة بتبعدي عني، بلاقي نفسي بدور عليكي من غير ما أحس؟
ليل فضلت باصة له، ومش عارفة ترد.
سيف رفع إيده برفق، وأبعد خصلة شعر نازلة على وشها.
سيف: أنا مش بارد زي ما إنتِ فاكرة يا ليل... أنا بس مش بعرف أقول كل اللي جوايا بسهولة.
ليل من كتر ما قلبها بيدق بسرعة مكانتش عارفة ترد
سيف بص في عينيها، وقرب منها أكتر، ولما لقى نظرتها متعلقة بعينيه، مال عليها وقبّلها قبلة رقيقة تانى .
ليل اتجمدت مكانها من المفاجأة!
وبعد لحظات، ابتعد سيف عنها بهدوء.
ليل فضلت باصة له بصدمة، وحطت إيدها على شفايفه.
سيف ابتسم، وقال بصوت منخفض:
سيف: ده اللي كنت نفسي أعمله من أول ما شوفتك النهارده... بس مكنش ينفع أعمل كده وسط الجرمأ اللى حوالينا ده
ليل زقته بخفة في صدره، ووشها احمر من الكسوف.
ليل: إنت انت قليل الأدب ، وزقته وجريت علطول وهى حاطة ايديها على قلبها
سيف ضحك بخفة .
بعد مرور عدة أيام...
عدّت الأيام، والعلاقة بين سيف وليل بقت أقوى يوم بعد يوم. اهتمام سيف بيها بقى واضح، وليل كمان بقت بتبادله نفس المشاعر، والفريق كله لاحظ التغيير الجميل اللي حصل بينهم.
رامي طبعًا ماكانش بيفوّت فرصة إلا ويعلّق عليهم، لدرجة إن سيف بقى كل ما يسمع صوته يعرف إنه جاي يرخم عليه!
لكن اللي ليل ماكانتش تعرفه إن الفريق كله كان بيخطط لحاجة كبيرة عشانها...
في المساء...
كانت ليل واقفة برا المكان بتشترى شوية طلبات ، وفجأة رامي خرج من الباب وناداها.
رامي: ليل! تعالي هنا شوية.
ليل بصتله باستغراب.
ليل: خير يا رامي؟
رامي ابتسم ابتسامة واسعة.
رامي: تعالي معايا، بس عندي طلب صغير.
ليل: طلب إيه؟
رامي طلع شريط قماش ناعم من جيبه.
ليل بصتله بصدمة.
ليل: إيه ده؟! إنت بتهزر صح؟!
رامي ضحك.
رامي: لا والله، بس استحملي معايا دقيقتين، فيه مفاجأة مستنياكي.
ليل: طب إنتوا مخبيين إيه؟!
رامي: يا ستي اصبري، هتعرفي دلوقتي.
ربط رامي الشريط على عينيها برفق، وبعدها مد إيده وساعدها تمشي.
ليل: رامي، أنا مش شايفة حاجة!
رامي: عارف يا ستي، عشان كده أنا معاكي. امشي بالراحة بس.
ليل ضحكت وهي ماشية جنبه.
ليل: أنتوا أكيد عاملين مصيبة!
رامي: مصيبة إيه بس؟! ده إحنا ناس محترمة جدًا!
فضل رامي يمشي معاها لحد ما دخلوا المكان، وبعدها وقفها في المنتصف.
رامي: خلاص، وصلنا. استعدي بقى.
وفك الشريط عن عينيها.
ليل فتحت عينيها...
وفجأة وقفت مكانها من شدة المفاجأة!
المكان كان متزين بشكل رائع، الأنوار الصغيرة مالية المكان، والورود متوزعة في كل ناحية، والبالونات بألوان هادية، وفي الخلفية لافتة كبيرة مكتوب عليها:
حكايتك لسة فى بدايتها ♥️
ليل حطت إيدها على بقها، وعينيها لمعت من الفرحة.
ليل: إيه ده؟! واااو!
وفجأة ظهر أنس ومؤمن وياسر وياسين من وسط المكان.
أنس: مفاجأة
مؤمن: تستاهلي كل خير.
ياسر: إيه رأيك؟ عجبك المكان؟
ليل كانت بتبص حواليها بانبهار.
ليل: إنتوا اللي عاملين كل ده عشاني؟!
ياسين ابتسم.
ياسين: طبعًا، إنتِ بقيتي واحدة مننا، وفرحتك تهمنا كلنا.
رامي وقف جنبها بفخر.
رامي: طبعًا، وأنا صاحب الفكرة والتنفيذ والإشراف العام!
أنس بصله.
أنس: إنت كل اللي عملته إنك ربطت عينيها وجبتها هنا!
رامي: اسكت يا أنس، متقللش من إنجازاتي!
ضحكت ليل وسط دموع الفرحة.
لكن فجأة، لاحظت إن الشباب بدأوا يبعدوا شوية ويفسحوا الطريق لحد ما ظهر سيف من وسطهم.
كان لابس قميص أنيق، وفي إيده علبة صغيرة.
ليل بصتله باستغراب، وابتسامتها بدأت تهدى من شدة المفاجأة.
ليل: سيف...؟
سيف ابتسم وهو بيتحرك ناحيتها.
وقف قدامها، وفتح العلبة، فظهر خاتم رقيق وجميل.
وقبل ما ليل تستوعب اللي بيحصل، نزل سيف على ركبته قدامها.
ليل شهقت، وحطت إيدها على بقها، وعينيها اتملت بالدموع.
سيف بص في عينيها وقال بصوت مليان حب:
سيف: ليل... من أول يوم شوفتك فيه، وإنتِ بقيتي مختلفة عن أي حد دخل حياتي. وشوفت بنت قدرت رغم كل اللي مرت بيه إنها تفضل مبتسمة وتتمسك بحلمها.
ابتسم لها وكمل:
سيف: أنا عايز أكون جنبك في كل خطوة جاية، أشاركك فرحتك، وأساندك وقت تعبك، وأكون الشخص اللي تلاقيه دايمًا جنبك مهما حصل.
رفع علبة الخاتم شوية وقال:
سيف: أنا بحبك يا ليل، وعايز أقضي باقي عمري معاكي... تقبلي تتجوزيني؟
ليل كانت بتبصله ودموعها بتنزل من غير ما تقدر تتكلم.
هزت راسها بسرعة، وقالت بصوت متأثر:
ليل: أيوه... موافقة يا سيف!
ابتسامة سيف اتسعت، ولبسها الخاتم في إيدها، وبعدها قام وضمها لحضنه.
وفي اللحظة دي، المكان كله انفجر بالتصفيق والهتاف.
رامي: الله أكبر! أخيرًا خلصنا من قصة الحب دي، أنا كنت هتجنن!
سيف ضحك وهو لسه ماسك إيد ليل.
سيف: إنت بالذات المفروض تسكت!
رامي: لا طبعًا، أنا ليا فضل كبير في اللي حصل ده. أنا اللي جبت العروسة لحد عندك!
ليل ضحكت وبصت لرامي.
ليل: شكرًا يا رامي، بجد المفاجأة جميلة أوي.
رامي حط إيده على صدره بفخر.
رامي: العفو يا نجمة، إحنا عندنا مفاجآت تانية بس بعد الجواز!
سيف بصله بتحذير، فضحك الجميع.
ليل ابتسمت وبصت للخاتم في إيدها.
ليل: عمري ما هنسى اليوم ده
سيف مسك إيدها وباسها برفق
رامى : ابوس معاكم ، انا سنجل بائس
فجأة الكل فضل يضحك عليه
---
بعد شوية...
وقف الجميع جنب بعض عشان ياخدوا صورة جماعية.
رامي رفع الموبايل وقال بصوت عالي:
رامي: يلا يا جماعة، كله يقرب! عايزين صورة تليق بأحلى فريق!
أنس: استنى بس، أنا لسه باكل!
ياسر: يا عم إنت مبتشبعش؟!
ضحك الجميع، واتجمعوا كلهم قدام الكاميرا.
سيف وقف جنب ليل، ومسك إيدها اللي فيها الخاتم، وابتسموا للكاميرا، بينما الفريق كله وقف حواليهم.
رامي: واحد... اتنين... تلاتة!
كليك!
اتصورت الصورة، صورة جمعتهم كلهم في لحظة عمرهم ما هينسوها.
ليل بصت للصورة وابتسمت، وافتكرت كل حاجة مرت بيها... من أيام الوحدة والخوف، لحد ما لقت عيلة احتضنتها، وأصدقاء بقوا سند ليها، وشخص حبها واختار يكمل حياته معاها.
رفعت عينيها لسيف، فابتسم لها، وضغط على إيدها برفق.
وفي اللحظة دي عرفت إن الحكاية اللي بدأت وسط الملعب، واتخللتها الضحكات والتحديات والمواقف الصعبة، وصلت لأجمل نهاية كانت تتمناه.
🌹🌹🌹🌹🌹🌹🌹🌹🌹🌹🌹🌹🌹🌹💚 مرحبا بكم ضيوفنا الكرام 💚
هنا في كرنفال الروايات ستجد كل جديد
حصري ورومانسى وشيق ابحث من جوجل باسم الروايه علي مدوانة كرنفال الروايات وايضاء اشتركو في قناتنا👈علي التليجرام من هنا يصلك اشعار بكل جديد من اللينك الظاهر امامك
🌹🌹🌹🌹🌹🌹🌹🌹🌹🌹🌹🌹🌹🌹
تمت بحمد الله