بنت وسط خمس رجالة وفي فريقنا؟! إنت اتجننت يا ياسين؟! الناس هتقول علينا إيه؟ إحنا كلنا رجالة!
كان سيف واقف قدام مكتب ياسين، ملامحه متجهمة وصوته مليان اعتراض، بينما ياسين كان قاعد على كرسيه وبيحاول يكتم ضحكته.
ياسين: — طب اهدى بس يا سيف واسمعني للآخر.
سيف بعصبية: — أسمع إيه؟! إنت بتقولّي عايز تدخل بنت الفريق وتعيش معانا كمان؟! إنت فاهم إنت بتقول إيه؟!
ياسين: — يا عم إنت فاهم الموضوع غلط خالص، وبعدين إنت لسه ما شوفتهاش أصلًا.
سيف: — ومش محتاج أشوفها علشان أقولك إن الموضوع مرفوض!
ياسين بابتسامة: — طب استنى لما تدخل، وبعدها احكم بنفسك.
سيف نفخ بضيق ورجع قعد على الكرسي المقابل، وفي اللحظة دي الباب خبط.
ياسين: — ادخل.
اتفتح الباب ودخلت بنت لابسة بنطلون رياضي أسود واسع، وتيشيرت أبيض، وفوقه جاكيت أسود، وعلى رأسها كاب أسود مخبي جزء كبير من شعرها.
دخلت بخطوات واثقة وابتسمت: — صباح الخير يا رجالة!
ياسين: — صباح النور يا ليل، تعالي.
سيف رفع عينه وبصلها من فوق لتحت، بينما هي وقفت قدامه بكل ثقة.
ياسين: — سيف، دي ليل. العضوة الجديدة اللي كلمتك عنها.
ليل مدت إيدها بابتسامة: — تشرفت بيك.
سيف صافحها ببرود: — أهلًا.
لكن ليل كانت في عالم تاني خالص!
ده قائد ولا بطل مسلسل؟! يخربيت ام عضلاتك! إيه العيون الجميلة دي؟! وشعرك النازل على وشك ده إيه؟! هو أنا جاية أنضم لفريق ولا أقابل نجم سينما؟!
ياسين لاحظ شرودها: — ليل!
انتفضت: — ها؟! أيوه، معاك.
ياسين بابتسامة: — سرحانة في إيه؟
ليل بسرعة: — ولا حاجة، كنت ببص على المكتب!
سيف رفع حاجبه باستغراب، وبعدها بص لياسين: — ممكن تيجي معايا دقيقة؟
ياسين قام معاه، وسيف أخده ناحية الشباك بعيد عنها شوية.
سيف بصوت منخفض: — إنت عارف إن الموضوع ده مش مناسب، صح؟
ياسين: — سيف، إحنا اتكلمنا في الموضوع ده قبل كده.
سيف: — وأنا لسه عند رأيي. إزاي بنت هتعيش في مكان واحد معانا؟ إحنا خمس رجالة، وكل واحد فينا ليه حياته وخصوصيته. غير إن التدريبات مش سهلة، وأنا مش هغير نظام الفريق علشان حد.
ياسين: — وأنا مش طالب منك تغير نظام الفريق. ليل مش محتاجة معاملة خاصة، وبالعكس هي بنفسها قالت إنها مش عايزة أي استثناءات ، وبعدين يا ميتا دى بنت يتيمة وملهاش اى حد وكانت عايشة فى ملجأ وانا عمرى ما هدخلها غير وانا واثق فى قدراتها.
سيف: — وإنت متأكد إنها هتقدر تتحمل؟
ياسين: — متأكد. أنا شوفتها وهي بتلعب. البنت دي عندها موهبة حقيقية، ومش هتكون عبء على الفريق.
سيف بعد تفكير : — تمام انا اللى هيخلينى ارق شوية حتة انها يتيمة دى ، وده اللي خلاني أوافق أسمع منك، بس ده مش معناه إني هقبل أي حاجة وخلاص.
ياسين: — أنا عارف، وعشان كده أنا مسؤول عنها. وهي عارفة طبيعة المكان والتدريبات وموافقة على كل حاجة.
في الوقت ده، كانت ليل بتحاول تتنصت عليهم من بعيد، وكل شوية تقرب خطوة من غير ما حد ياخد باله.
لكن سيف لف وشه فجأة وبصلها.
ليل رفعت عينيها بسرعة للسقف، وفضلت باصة لفوق وكأنها بتتأمل حاجة مهمة جدًا.
سيف: — إنتِ بتبصي على إيه؟
في مدونة كرنفال الروايات تجد كل جديد
ليل من غير ما تنزل عينيها: — السقف.
سيف باستغراب: — السقف؟!
ليل: — أيوه، جميل جدًا.
ياسين حط إيده على وشه وهو بيحاول يمنع نفسه من الضحك.
سيف رجع بص لياسين: — دي هتتعبني.
ياسين ضحك: — بالعكس، دي هتسليك.
سيف تجاهل كلامه واتجه ناحية ليل.
سيف بجدية: — اسمعي يا ليل، أنا مش بحب الفوضى ولا الهزار وقت الشغل. هنا كل واحد عليه مسؤوليات، والتدريبات عندنا صعبة، ومفيش حد هياخد معاملة مختلفة عن التاني.
ليل هزت راسها: — مفهوم.
سيف: — هتلتزمي بالمواعيد، وهتسمعي الكلام، ومش عايز أعذار كل شوية.
ليل بابتسامة واثقة: — متقلقش، أنا قد المسؤولية.
سيف: — هنشوف.
ياسين تدخل: — خلاص يا سيف، كده تمام؟
سيف رجع لمكتبه: — ياريت تكون فاهم إنت بتعمل إيه يا ياسين.
ياسين: — متقلقش.
خرج سيف من المكتب، وياسين استنى لحد ما اختفى، وبعدها قرب من ليل واتكلم بصوت واطي.
ياسين: — بصي يا ليل، فيه حاجة مهمة لازم تعرفيها قبل ما نقابل باقي الفريق ، وانا اتفقت معاها مع سيف .
ليل: — إيه؟
ياسين: — باقي الفريق مش هيعرف إنك بنت.
ليل فتحت عينيها: — نعم؟!
ياسين بسرعة: — وطي صوتك!
ليل خفضت صوتها: — يعني إيه مش هيعرفوا؟!
ياسين: — هتقدمي نفسك قدامهم باسم ليث، وهتتعاملي معاهم على إنك ولد. وأنا كمان هقولك ليث قدامهم. لازم تغيري صوتك شوية، وتاخدي بالك من تصرفاتك، ومفيش أي غلطة ممكن تكشف حقيقتك.
ليل ابتسمت: — يعني عايزني أعيش الدور؟
ياسين: — بالظبط، وعايزك تاخدي الموضوع بجد، مش هزار.
ليل رفعت إيدها بثقة: — سيبها عليّا يا ياسين. هبقى أشطر ولد شافوه في حياتهم!
ياسين بص لها للحظات وبعدها تنهد: — ربنا يستر. أنا حاسس إني ورطت نفسي في مصيبة.
ليل ضحكت: — متقلقش، هتبقى أحلى مصيبة في حياتك!
ياسين هز راسه وهو بيبتسم: — يلا بينا بقى، أعرّفك على عيلتك الجديدة.
ليل عدلت الكاب على رأسها، وخدت نفس عميق، وبعدها وقفت جنبه بابتسامة واثقة.
ليل: — يلا يا ياسين، أنا جاهزة!
ياسين فتح الباب، وخرجوا من المكتب في طريقهم للصالة الرئيسية.
أما ليل فكانت متحمسة جدًا إنها تقابل باقي الفريق، من غير ما تكون عارفة إن الأيام الجاية هتكون مليانة مفاجآت ومواقف عمرها ما تخيلتها دخلو صالة الألعاب و ....
الفصل الثاني من هنا