أنا سليم.. 28 سنة.
الناس كلها شايفاني رجل أعمال وسيم وشيك، لابس أغلى بدل وراكب عربية تمنها ملايين.
بس اللي مايعرفوش الناس، اني "العقرب".
أكبر نصاب ومافيا نصب في البلد.
القاعدة بتاعتي عمري ما أنصب على غلبان.. أنا بنصب على اللي ناهبين البلد، تجار آثار، تجار سلاح، رجال أعمال فاسدين. آخد منهم الملايين وهم بيضحكوا في وشي وبيشكروني.
النهاردة كنت لسه مخلص عملية بـ 5 مليون جنيه، واخدهم من تاجر آثار وهو مبسوط على الآخر.
خرجت من المطعم الشيك وأنا مولع سيجاري ومزاجي عالي.. وفجأة سمعت صوت عياط.
بصيت.. لقيت بنت واقفة على جنب، زي القمر، عندها بتاع 23 سنة، لابسة هدوم بسيطة أوي وعنيها حمرا من كتر العياط.
واقف قدامها اتنين شكلهم بلطجية وبيشدوها من دراعها بالعافية.
واحد فيهم بيقول بصوت عالي: "بقولك المعلم الغراب عايزك يعني هتيجي معانا، بطلي شغل الأفلام ده بقى!"
البنت بتصرخ: "سيبوني في حالي! أنا معرفش حد اسمه الغراب ده! أنا معملتش حاجة!"
أنا كنت هعمل نفسي مش شايف وأمشي.. أنا ماليش في جو الشهامة ده.
بس أول ما سمعت اسم "الغراب" وقفت.
الغراب ده يبقى عدوي اللدود، المافيا الوحيدة اللي بتنافس مافيا العقرب. بقالنا سنة بنحارب بعض في السوق.
مخي في ثانية حسبها..
بنت حلوة وغلبانة كده، ورجالة الغراب عايزينها.. يبقى أكيد دي الطُعم الجديد اللي الغراب مجهزه عشان يوقعني بيه. عارف اني نقطة ضعفي البنات الحلوة اللي عاملة غلبانة.
ضحكت في سري وقلت: حلو أوي.. عايز تلعب مع العقرب يا غراب؟ طب أنا بقى هسبقك وأخطف الطُعم بتاعك.
شاورت بعيني لعزت، دراعي اليمين اللي مستنيني في العربية.
في أقل من 30 ثانية، العربية وقفت جنبهم، والبنت اتكممت واتشالت واتحطت في الكرسي اللي ورا، ولا كأن حاجة حصلت والشارع كله مكمل مشي.
في العربية البنت كانت بتموت من الرعب وبتترعش وبتعيط: "انت مين؟ هتعمل فيا ايه؟ والله العظيم أنا مظلومة، أنا بشتغل في كافيه وجوز أمي هو اللي رماني في الشارع!"
بصيتلها في المراية ببرود وقلت:
"اخرسي خالص.. من النهاردة انتي متعرفيش حاجة اسمها شارع. انتي هتفضلي ضيفة عندي في مكان محدش يعرف يوصله.. لحد ما أعرف حكايتك ايه انتي والغراب."
ودست بنزين جامد وطلعت على الفيلا بتاعتي اللي في قلب الصحراء.. الفيلا اللي مفيش مخلوق يعرف مكانها غيري أنا ورجالتي.
يتبع