"المقابر ولعت.. حد سبقنا وفتح القبر!"
الجملة نزلت على دماغنا كلنا زي جردل تلج.
الغراب اللي كان ماسك الكل من رقبته من دقيقة.. لأول مرة يبقى هو الفريسة. وشه بقى أبيض كورق الكفن اللي كان بيتكلم عنه سعيد.
سعيد هو اللي فاق الأول.
مسك التليفون من الأرض وهو بيترعش.. وحطه على ودنه:
"مين بيتكلم؟ انت مين؟ الو؟ الو!!"
الخط قطع.
سعيد بص للغراب.. والغراب بصلي انا.. وانا ببص لليلى.. وليلى لسه ماسكة المطوة على كتفها ودراعي.. ايدها ثابتة بس الدموع نازلة تحفر في التراب اللي على وشها.
"مين يعرف مكان القبر غيرك يا سعيد؟!" الغراب صرخ.
سعيد ضحك ضحكة توجع: "ماهو لو كنت دفنت الهارد لوحدي كنت قولت انا بس.. بس انا مادفنتوش لوحدي يا غراب.. انا دفنته مع اللي انت قتلته.. مع ابنه."
عزت اللي كان مرمي على الأرض قام مرة واحدة كأنه اتكهرب:
"ابني؟! انت بتقول ايه؟ انت دفنت الهارد مع ابني انا؟!"
ساعتها فهمت.
أبويا عزت.. اللي رباني.. كان عنده ابن تاني غيري.. ابن مات.. والغراب هو اللي موته.
سعيد بص لعزت: "فاكر الواد الصغير اللي الغراب قالك انه هرب بالفلوس؟ مهربش يا عزت.. الغراب دفنه حي في مقابر الصدقة عشان كان شافه وهو بيسلم سلاح.. وانا كنت هناك.. مقدرتش انقذه.. بس خدته ودفنته في القبر اللي عليه العقرب.. وحطيت الهارد في كفنه.. عشان عارف ان محدش هيستجري يفتح قبر عيل."
الحوش كله سكت. حتى صوت المواتير سكت.
عزت وقع تاني.. بس المرة دي مقعش من الخوف.. وقع من الكسرة. راجل عاش عمره يخدم الغراب.. وفي الآخر الغراب دفن ابنه حي.
وهنا الغراب عمل أغبى حركة في حياته.
استغل ان الكل متسمر.. ولف مسدسه.. مش على سعيد.
على ليلى.
"يبقى مفيش خريطة ومفيش هارد ومفيش زفت.. انا هخلص على الخريطة نفسها!"
وصباعه داس على الزناد.
اللي حصل بعدها كان في ثانية.. بس ثانية قد عمر كامل.
انا مافكرتش.
جسمي اتحرك قبل عقلي.. نطيت قدام ليلى.. وخدت الطلقة في كتفي.. نفس الكتف اللي فيه الوشم.
الدم فرقع.. حامي.. نزل على الوشم.. على بطن العقرب.
ليلى صرخت.. صرخة خلت الحزام الفاضي اللي واقع على الأرض يتهز.
المطوة وقعت من ايدها.. ومسكت دراعي بايدها الاتنين.. بتحاول تكتم الدم بضوافرها اللي كانت من شوية غارزة فيه بتهددني.
الغراب اتصدم انه ضربني انا.. "عقرب!!"
سعيد ما استناش.. رفع مسدسه وضرب الغراب طلقة في رجله.. وقعه على الأرض.
الغراب وقع ومسدسه وقع جنبه.. الرجالة بتوعه لسه هيرفعوا سلاحهم.. لقوا صباح.. أم ليلى.. اللي كانت واقعة ومرمية زي الميتة.. قامت ومسكت فرد الخرطوش اللي ليلى كانت ماسكاه.. وصوبته عليهم:
"اللي هيتحرك هفرتكه.. انا مابقتش أخاف خلاص.. جوزي رجع حي!"
الغبار اللي عملته العربية الرابعة كان لسه في الجو.. بس وسط الغبار ده.. سمعنا صوت عربية خامسة جاية.
بس دي مش صوت موتور عادي.
دي سرينة.
بوليس.
سعيد وشه اتغير: "اللي فتح القبر بلغ.."
عزت قام من وسط دمه ودموعه.. زحف لحد الغراب اللي واقع بيصرخ من رجله.. مسكه من لياقته:
"قولي دفنت ابني في انهي عين يا غراب.. انهي عين في مقابر الصدقة عليها عقرب؟!"
الغراب بيضحك وهو بيتوجع: "العقرب اللي على دراع ابنك ده.. انا اللي رسمته لسعيد.. انا اللي قولتله يوشمه.. عشان يفضل فاكر انه هيفضل طول عمره تحت جزمتي.. هههههه"
انا دماغي بتلف من الطلقة.. بس كلمة واحدة نورت في دماغي.
الرسم.
الوشم.
الدم اللي نازل من كتفي على الوشم.. كان بيسيح.. والنقط اللي جوه بطن العقرب.. اللي هي خريطة النجوم.. بدأت تلمع.
ليلى بصت بدهشة وقالت: "الدم.. الدم بيظهر حاجة!"
قربت وشها من دراعي وهي بتعيط.. ومسحت الدم بايدها.
النقط الصغيرة اللي كنا فاكرينها خريطة.. مكنتش خريطة نجوم.
لما الدم جه عليها.. بانت انها حروف.
حروف محفورة بالوشم الأبيض جوه الوشم الأسود.. مبتظهرش غير بالدم.
ليلى قريتها بصوت عالي.. والكل سمع:
"القبر فاضي.. الهارد في بطن العقرب الحقيقي."
الكل بص لبعضه.
بطن العقرب الحقيقي؟
سعيد بصلي.. بص لدراعي.. وبعدين بص لليلى.. وبعدين فهم.
ومد ايده ببطء.. حطها على بطني انا.
على مكان العقرب الحقيقي اللي قرصني وانا صغير.. واللي سايب علامة لحد دلوقتي.
وقال جملة وقعت قلبي من مكانه:
"سعيد الانصاري مدفنش الهارد في المقابر يا عزت.. سعيد زرعه جوه الواد.. جوه ابنه.. العملية اللي عملهالك وهو عيل عنده 4 سنين.. وفهمك انها زايدة.. كانت زرع.. الهارد جوه جسم العقرب نفسه بقاله 18 سنة."
سرينة البوليس بقت على باب الحوش.
باب الحوش اتكسر.
ونزل منه ظابط.. مش أي ظابط.
واحد لابس مدني.. ووشه مألوف جداً.
ليلى شهقت: "أحمد؟!"
احمد ده.. اللي كان بيجي يخطبها من شهرين.. واللي هي رفضته.. واللي أبوها سعيد قاله انه شغال في النيابة.
أحمد بص لليلى.. وبصلي انا وانا غرقان في دمي.. وابتسم ابتسامة باردة.. ورفع الكارنيه..
كارنيه مكتوب عليه.. "الغراب - قطاع الأمن - الاسم الحركي: أحمد"