
رواية المطاريد الفصل التاسع9 بقلم رباب حسين
أقسى أنواع الظلم أن تُدان أمام قلب أحببته أكثر من نفسك، أن تقف أمامه عاريًا من كل شيء إلا براءتك، تمد إليه يديك المرتجفتين، فلا يمنحك سوى الخذلان... ثم يأتي يومٌ يكتشف فيه أنك كنت بريئًا، لكن بعد أن يكون قد قتل فيك كل شيء كان يستحق النجاة.
لم تكن رهف خائنة، ولم تكن يومًا تلك المرأة التي رسمها يحيى في خياله، بل كانت فتاةً أحبته بقلب لم يعرف سواه، وظلت تحمل حبها له حتى وهي تتلقى منه طعنات لم تكن لتتحملها لو جاءت من العالم بأسره. كانت تتمنى أن ينظر في عينيها يومًا ويصدقها، أن يحتضن خوفها بدلًا من أن يكون مصدره، وأن يسمع صوت قلبها وهو يصرخ ببراءتها، لكنه اختار أن يصدق صورةً كاذبة ويكذب روحًا أحبته بصدق.
والآن... عرف الحقيقة.
عرف أن المرأة التي اتهمها بالخيانة كانت أنقى من كل ظنونه، وأن اليد التي دفعها بعيدًا كانت اليد نفسها التي أنقذت حياته، وأن القلب الذي حطمه كان القلب الذي ظل ينبض باسمه رغم كل ما فعله به.
لكن ماذا يفعل المرء حين تأتيه الحقيقة متأخرة؟ حين يكتشف أنه أمضى سنوات يعاقب بريئًا على ذنب لم يرتكبه، وأنه لم يكن يومًا ضحية خيانة، بل كان الجلاد الذي عذب من أحبته حتى لم تعد تملك دموعًا تبكيه بها؟
يا يحيى... لو كان الندم يعيد ما مات، لكان لك من الدموع ما يكفي لإحياء قلبها ألف مرة. لكنك لا تستطيع أن تعيد إليها الليالي التي بكت فيها وحدها، ولا الكلمات التي ذبحت كرامتها، ولا اللحظة التي احتاجت فيها إليك فلم تجدك. لا تستطيع أن تعود إلى الماضي وتقف أمام الفتاة التي أحبتك، وتخبرها أنك تصدقها... بعدما أصبحت المرأة التي تخاف أن تصدقك.
ويا رهف... ماذا يفعل قلب قضى عمره ينتظر أن يُنصفه حبيبه، ثم حين حصل على براءته لم يشعر بالانتصار؟ كيف تفرحين بأنك لم تخونيه، بينما الرجل الذي تمنيتي أن يكون أمانك صار أكثر من أخافك؟ وكيف تخبرينه أن حبك لم يمت، حين يكون الاعتراف بذلك أشبه بخيانة كل ليلة بكيتي فيها بسببه؟
ربما كان أصعب ما في الحكاية أن يحيى لم يتوقف عن حب رهف، ورهف لم تتوقف عن حبه... لكن الحب وحده لم يعد كافيًا.
فبعض القلوب لا يكسرها الفراق، بل يكسرها أن تظل قريبة ممن تحب، تتمنى أن يضمها إلى صدره بينما تخشى أن تكون ذراعاه هما المكان الذي ستبكي فيه للمرة الأخيرة.
اقترب منها يحيى وأمسكها من ذراعيها برفق وكأنه يخشى أن تنكسر في لحظة ضعفها بين يديه، ثم قال في رجاء والدموع داخل عينيه : أرجوكي يا رهف فهميني. قوليلي ده حصل إزاي!
نظرت إليه والدموع تغرق وجهها، ثم نظرت إلى يده وقالت : شيل إيدك، إياك تفكر تلمسني تاني. أنا وافقت اتجوزك وابقى مراتك عشان بس أثبتلك إني مش زي ما أنت كنت فاكر، عشان أضربك بدل القلم اللي إدتهوني زمان ألف قلم وإنت شايفني قدامك وبين إيدك ومش قادر حتى تلمسني.
يحيى : ماشي، عاقبيني زي ما أنتي عايزة، وأنا عارف إني أستحق العقاب، بس قوليلي مين عمل فيكي كده وأنا هاخد من قلبه تمن كل دمعة نزلت من عيني وعينك، كل وجع دبحني ودبحك لمدة ١٥ سنة.
رهف : تفتكر لو أعرف هو مين كنت سيبته عايش على وش الدنيا، وبعدين وجع إيه اللي بتتكلم عليه! شفت إيه إنت من الوجع! هربت من أهلك وعيشت لوحدك في الدنيا تترمي من شارع لشارع ومن وظيفة للتانية عشان تلاقي تمن اللقمة؟ جربت تنام في عز البرد في الشارع من غير غطا، كل خوفي وقتها إني أخسر نفسي بين كلاب السكك؛ وكده كده كنت خسرانة، كنت خسرانة كتير أوي وأولهم إنت.
كنت بتقول إني كسرتك، وإنت مش عارف معنى الكلمة، أنا أقولك الكسر معناه إيه؛ إنك تلجأ للي بتحبه وهو يستغل ضعفك، يرميك في الشارع تاني ويصدق كل كلمة اتقالت عليك.
ثم ابتسمت بإستهزاء من بين دموعها وقالت : ﻷ وجاي دلوقتي بس، بعد ما اتأكد بنفسه إني ماعملتش حاجة غلط يقولي هجيبلك حقك! لا يا حضرة الظابط، أنا مش عايزة حد يجيب حقي، أنا عيشت لوحدي، وكبرت لوحدي، وبقيت دكتورة لوحدي، وهجيب حقي لوحدي، عشان مابقتش أثق في حد غير نفسي، كله بيبيع وبيهرب في الآخر، خليك إنت في بلدك وناسك " اللي يستحقوا تقف جنبهم." وسيبني في حالي.
واه... بالنسبة للاتفاق اللي عملته مع نفسك وأنا بس سكتت عشان أعدي الحوار؛ أنا مش موافقة عليه، وهطلقني دلوقتي.
يحيى : إهدي بس يا رهف، لو نفذت اللي إنتي عايزاه ده إنتي اللي هتتأذي.
ضحكت رهف بكل قوتها ثم قالت : ده إيه الحنية دي يا حضرة الظابط! ﻷ ما تقلقش، كده كده اتأذيت من زمان. طلقني يا يحيى.
يحيى : مش هطلقك، إنتي عايزاني أسيبك بعد ما بقيتي ليا! ده إنتي حلم سنين عمري. أنا ماعرفتش أحب بعدك، كل اللي كنت بعمله ده عشان أخبي مشاعري عنك، ماكنتش قادر أقف واقولك كل اللي في قلبي، أنا بحبك يا رهف ومش هسيبك.
رهف : إنت سيبتني من زمان يا يحيى، وأنا ماعنديش حاجة ابقى عليها خلاص، ولو مش عايز تطلقني عشان سمعتك تمام، أنا هفضل على ذمتك، بس من اللحظة دي تنسى إني مراتك، وماتفكرش حتى تلمسني تاني.
يحيى بحزن : إنتي بتعاقبيني عقاب صعب أوي أوي.
نظرت إليه بحدة فأردف : أستحقه، بس عشان خاطر حبك ليا زمان قوليلي اللي حصل، فهميني يا رهف وأنا هعملك كل اللي إنتي عايزاه، بس أنا من حقي أفهم، قلبي واجعني يا رهف، عشان خاطري فهميني.
بلعت رهف غصة مريرة بحلقها وقالت ببكاء : ماعرفش حصل إزاي، كل اللي فكراه إني كنت في الدرس بليل. ليلة إمتحان آخر مادة، والمستر طول أوي في الحصة، ولما خرجت ماقدرتش أروح مشي عشان كنت تعبانة ومش نايمة كويس، فا قعدت على محطة الأتوبيس واستنيت لحد ما يجي. ماعرفش إيه اللي حصل بس حسيت إني نمت فجأة من غير ما أحس. ومافوقتش غير وراجل كبير بيصحيني وأنا نايمة في المحطة.
ساعتها إستغربت أنا نمت كدة إزاي، ولقيت عدى ساعتين وأنا مش حاسة بأي حاجة. روحت البيت جري لقيت هدومي مش مظبوطة زي ما أنا كنت لابساها، بس ماهتمتش بجد.
تاني يوم رحت الإمتحان وكنت راجعة فرحانة إني خلصت ثانوية عامة، ولما دخلت البيت لقيت بابا متعصب، وأول ما شفني كان عامل زي المجنون، فضل يضرب فيا ويزعق ويقولي جبتيلي العار، أنا ساعتها مافهمتش، لقيته طلع فيديو على الكومبيوتر وشغله، ولما شفته اتصدمت، وماعرفتش إزاي اتصور وإمتى، بس بابا ماسمعنيش ولا أداني فرصة اتكلم، وجريت من البيت وهربت منه بالعافية. رحت على عندك على طول، ولقيتك برده عرفت بالفيديو، هو ده كل اللي حصل.
أغمض يحيى عينيه بألم وغضب وقال : ليه ماقولتليش؟!! ليه ماحكتيليش كده بدل ما أنا عمال أقول كلام يوجعك وبس؟! ليييه يا رهف ليه؟!
رهف بحدة : ماكنتش هتصدقني. مهما كنت بقول مش بتصدق. ماكنتش شايف قدامك غير الفيديو ده وبس. لدرجة إنك كنت عايز تتأكد بطريقة بشعة. أضطريت أستحمل كلامك لحد ما ابقى مراتك، وساعتها هتتأكد بنفسك إني مش كده. ولا إني شمال زي ما كنت بتقولي. ودلوقتي خلاص كل حاجة وضحت والحقيقة بانت. ودلوقتي مابقاش فارق معايا حد، كل اللي عايزاه إنك تطلقني وتسيبني في حالي، أنا مش عايزة أشيل ذنب حد، مش قولتلي لما أطولك هعرف أعيش حياتي تاني؛ روح عيشها بعيد عني.
ظل يحيى يحرك رأسه يمينًا ويسارًا برفض. ثم اقترب منها ووضع جبهته على جبهتها والدموع تنساب على وجهه وقال : لا.. مش هقدر. أنا بحبك يا رهف. عارف إني قسيت عليكي وجرحتك، وماكنتش السند في الوقت اللي إحتاجتيني فيه، وكنت هعمل غلطة... بشعة. بس مشاعري هي هي ماتغيرتش من ناحيتك. أنا لسة بحبك ومش قادر أنساكي، برغم الفكرة اللي كانت في دماغي عنك ماعرفتش أشيلك من قلبي، وكنت بقول سامحها يا يحيى غلطة وعدت وخليك معاها، وكان عندي إستعداد أنسى اللي حصل وتعيشي معايا وماسبكيش. عايزاني أبعد عنك دلوقتي إزاي؟ إختاري أي طريقة تعاقبيني بيها غير دي وأنا موافق عليها.
أومأت له رهف بلا. ابتعد يحيى عنها ووقف بالغرفة وهو يزفر ثم جلس بجوارها وقال : طيب... طيب ننفذ اتفاقنا. مش قلنا كام شهر وأطلقك. وأنا مش بقولك كده عشان سمعتي زي ما بتقولي، بس أنا مش هسمح لحد يجيب سيرتك تاني.
رهف : إنت مش هتوقف الناس واحد واحد وتقولهم إن اللي إنتوا شفتوها في الفيديو دي مظلومة.
يحيى : مفيش فيديو. أنا شيلت الفيديو من علي النت من زمان. دفعت اللي معايا كله لواحد وشال الفيديو تاني يوم.
رهف : يعني إيه؟
يحيى : يعني محدش عارف حاجة عن الموضوع ده، ومش هخلي حد يجيب في سيرتك، زي ما زمان حميتك وشيلت الفيديو من الوجود.
رهف : أنا برده عند رأيي. سيبني أمشي. صدقني أنا مابقتش أنفعك ولا أنفع أي حد.
يحيى : مش هعرف أنساكي. أنا بقالي ١٥ سنة بقنع نفسي إنك وحشة عشان أعرف أكرهك، ومش عارف جاية دلوقتي بعد ما عرفت أني ظلمتك تقوليلي أسيبك! أنا مش عايز أبعد عنك. إديني بس فرصة وأنا هصلح كل حاجة.
رهف : أفهم بقى، أنا مش رهف اللي إنت حبيتها زمان. مش رهف اللي كانت عايشة الحياة مبسوطة وفرحانة وقادرة تضحك من قلبها. أنا ميتة من ساعة ما هربت من أهلي، أنا قدامك عايشة بس مشاعري وقلبي وكل حاجة جوايا ضاعت. وخلاص مش فارق معايا أي حاجة تحصلي أو تتقال عليا. يعني لو مش عايز تتطلقني عشان محدش يقول عليا كلمة لا.. طلقني ويتكملوا عليا.
وقف يحيى بغضب وقال : إنتي مراتي ورسمي كمان، ومش هطلقك يا رهف، ولو مصرة على الطلاق ومش قادرة تسامحيني مش هيحصل دلوقتي، الاتفاق هيتم يعني هيتم.
نظر يحيى إلى النافذة وقال : الفجر قرب يأذن. نامي وإرتاحي ولما تصحي هنرجع السرايا.
حمل ثيابه وتركها وغادر والغرفة، وظلت رهف تبكي، وهي تشعر بأنها قد أنهت السباق وربحت الجولة بعد عداء استمر خمسة عشر عامًا. نظرت إلى جسدها، تذكرت أنها أصبحت ملكه، هو الآن زوجها! ولكن خسر قلبها، فقد تصدع بالألم والرفض والاتهامات الباطلة، ولن تسمح لقلبها أن يهزمها مرة أخرى، فهي ترى أنه لا يستحقها. دثرت نفسها تحت الغطاء ونامت من كثرة البكاء والتعب.
ارتدى يحيى ثيابه، ثم جلس بالبهو يفكر، تذكر كل كلمة ذبحها بها، كل نظرة كل لحظة شك عبرت بصدره، وبقي الندم ينهش بصدره بلا هوادة.
بعد قليل سمع أذان الفجر، فنهض وأخذ حمام دافئ والصراع يزداد داخل عقله، يرغب في معرفة من فعل ذلك بها ولماذا؟
وبعد أن أدى فرضه أخذ يجول بالمنزل يتفقده، فهو لم يدخل ذلك المنزل منذ مقتل عمه مهران وزوجته، حتى وصل إلى غرفة المكتب الخاص بعمه، فتحه وتوجه إلى المكتب، جلس يفكر قليلاََ وهو ينظر إلى صورة عمه مهران المعلقة على الحائط، وتذكر حديثه وضحكاته، فكان طيب القلب وحنون جدًا كأمه نيرة جدة يحيى، وعلى الرغم من أنها ليست والدة أبيه؛ ولكن كانت تعطف على عزام وتعامله بحب، وكانت تعتبر يحيى بمثابة حفيدها.
لاحظ يحيى ميل أطار الصورة، فنهض وأمسك به ليستعدله، فوجد الأطار يتحرك وإذا بخزنة خلفه، تعجب من الأمر وفتحها، وجد بها ملف كبير وبعض التحاليل الطبية، لم يستطع أن يعرف ما هي، ثم رأى بالملف ورق بخط يد جده التهامي. وحين قرأه لم يفهم عن ماذا يتحدث. أخذ التحاليل وعاد إلى غرفة رهف، وقف يتأملها بصمت، الحزن يعصف بقلبه والخوف من فقدانها أصبحه الكابوس الجديد الذي يطارده.
تقدم نحوها وأيقظها من النوم. فتحت رهف عينيها عنوةً ونظرت إليه وقالت بنعاس : عايزة أنام.
يحيى : معلش بس ممكن تفوقي وتقوليلي إيه التحاليل دي ونامي تاني.
إعتدلت وجلست بالفراش وقالت : تحاليل إيه؟!
يحيى : مش عارف. بس هي بتاعت عمي مهران الله يرحمه.
أخذت رهف التحاليل وقرأتها ثم عقدت حاجبيها وقالت : دي بتاعت عمك مهران! عمك عمك يعني! أخو أبوك؟!
يحيى بتعجب : أيوة يا رهف فيه إيه؟!
رهف : دي تحاليل إثبات نسب.
عقد يحيى حاجبيها وقال : إثبات نسب! ليه؟
رهف : واضح إنها متطابقة مع حد اسمه مهران التهامي والدهشان راضي.
زادت علامات الصدمة على وجه يحيى وشرد قليلًا يحاول أن يستوعب ما تقول، ثم قال : مش ممكن! يعني عمي مهران بن دهشان. كبير المطاريد؟!
رهف : أنا ماعرفش مين دول بس التحليل اللي معايا بتقول كده، فيه نسبة تطابق ٩٩٪ بين مهران ودهشان وإنه الأب الحقيقي.
نظر يحيى إلى الملف الذي بيده وجلس على الفراش، وبدأ بقراءة ما كتبه التهامي، وبدأت الدموع تنساب على وجهه. وحين بكى لم تتحمل رهف أن تراه هكذا وزاد الفضول بقلبها، فاقتربت منه رهف وقالت : مالك يا يحيى؟ فيه إيه الورق ده؟ فهمني.
يحيى : فيه مصيبة. مصيبة هتجيب عيلة التهامية كلها الأرض.
رهف : ممكن تفهمني. أنا عايزة أعرف من بدري إيه اللي حصل بينك وبين عمار وصلكم لكده، وإزاي بقى مجرم مطارد.
نظر يحيى إليها بحزن وقال : هحكيلك. اليوم اللي جيتيلي فيه وأنا طردتك من البيت؛ بعدها على طول اتصل بيا أبويا وقالي إن جدك مات، لما رجعت البلد لقيته ماماتش موتة طبيعية. لقيت كل الناس بتقول إن عمار قتله.
رهف بصدمة : قتل جده؟! وهو يقتله ليه؟!
يحيى : عمي مهران أبو عمار اتقتل قبل جدي بكام يوم، والناس شافوا جدي وهو خارج من بيته وكان السلاح في إيده، وبعدها لقوه مقتول هو ومراته في البيت. دارت إشاعة ساعتها إن جدي هو اللي قتل ابنه ومراته.
لما عمي مهران مات ساب عمار الامتحانات وطلع على البلد ومارجعش تاني، وبعدها لقيت أبويا بيقولي إن عمار بعد موت أبوه طلع على الجبل وعاش مع المطاريد، وهو اللي قتل جدك التهامي، ومن ساعتها والعداوة بينا كبرت.
رهف : طيب جدك قتل ابنه ومراته فعلًا! طيب ليه؟
يحيى : ماكنتش عارف السبب لحد ما لقيت الورق ده. عمي مهران مش ابن جدي، والتحاليل اللي معاكي بتثبت ده. وكلام جدي اللي كاتبه بخطه بيقول الحقيقة كلها.
رهف : هي إيه؟!
يحيى : جدي اتجوز اتنين، أولهم نيرة وتبقى أم عمي مهران، والتانية تبقى ستي أنا أم أبويا. نيرة كانت بنت عم جدي، وبيقول هنا إن دهشان كبير المطاريد إعتدى عليها، وجدي اتجوزها عشان يستر عليها وشرف العيلة مايتداسش عليه. وواضح إنها حملت من دهشان وخلفت مهران، وجدي كتبه على اسمه ورباه زي أبويا بالظبط. بس فيه هنا حاجة غريبة جدي كاتبها.
رهف : إيه هي؟!
يحيى : بيقول إن دهشان هو اللي قال لمهران على الحقيقة، وخلاه يعمل تحاليل ال DNA عشان كان عايزه يطلع الجبل معاه ويبقى كبير المطاريد من بعده، ولما جدي إعترض وقاله لا مش هنفضح أمك ولا نخلي سمعة العيلة في الوحل، عمي مهران أصر إنه يجيب حق أمه من الدهشان، وبيرجح إن المطاريد هما اللي قتلوه... وبالذات رماح. لو فعلًا عمي حاول يجيب حقها من أبوه اللي إغتصبها زمان؛ مش بعيد يكونوا هما اللي قتلوه فعلًا.
رهف : ثواني، هو رماح يقرب إيه لدهشان ؟
يحيى : أخوه. يعني رماح كده يبقى أخو جد عمار؛ يعني جده. كده أنا فهمت عمار قتل جده عشان فاكر إن هو اللي قتل أبوه، والحقيقة إن المطاريد هما اللي قتلوا أبو عمار، العبيط فاكر إن طاره معانا وهو طاره مع جده اللي فوق قاعد جنبه.
رهف : بس مش منطقي إن دهشان يقتل مهران ابنه.
يحيى : صح.... معاكي حق. عشان كده جدي يبرجح إن رماح هو اللي قتله. على العموم التحقيقات هتبين كل حاجة. المهم إني مسكت طرف الخيط.
رهف : يعني عمار كده مش ابن عمك؟! بس هو مايعرفش ده.
يحيى : عمار دخل في غيبوبة، وأنا هستنى لما يفوق منها، وساعتها هقوله كل حاجة، عشان يتأكد إنه غلط وغلطه كبير كمان، وحتى حقه في الورث اللي عمال يطالب بيه مش من حقه.
تنهدت رهف وقالت : فهمت، ممكن بقى تسيبني أنام!
يحيى : مش ناوية تسامحيني طيب؟
رهف : ﻷ.
يحيى : هنشوف، قلبك هيحنلي ولا ﻷ.
نهض وكاد يخرج من الغرفة ولكن أوقفته رهف قائلة : مش هعيش معاك غصب عني. أنا مش عايزاك.
مال يحيى عليها ونظر إلى عمق عينيها كأنه يرى قلبها من الداخل وقال : عارف إنه من ورا قلبك. عشان لو ماكنتيش عايزاني ماكنتيش اتجوزتيني وسلمتيلي نفسك عشان اتأكد إنك شريفة. أنا مش مستعجل عليكي. حتى لو كرهتيني زي ما قولتي قبل كده؛ أنا واثق إنك هترجعي تحبيني تاني.
اعتدل يحيى في وقفته وظلت رهف تنظر إليه وهي تشعر بنبض قلبها يعلو داخل صدرها، فهو محق؛ هي لم تستطع أن تكرهه، وكانت تتمنى لقاءه لتثبت براءتها، ولكنها لا تثق به.
ثم أردف يحيى : قومي خدي حمام ويلا عشان نرجع السرايا وإرتاحي هناك. لازم أبلغ أبويا بالورق اللى معايا ده.
نظرت رهف إلى نفسها فوجدت جسدها عاري تحت الغطاء فقالت بخجل : طيب لو سمحت أطلع برا عشان أقوم.
أومأ لها يحيى وخرج من الغرفة وأغلق الباب خلفه، ثم ظهر على وجهه الحزن، فقد شعر بأنه حقًا خسرها، والمسافة بينهما أصبحت بعيدة للغاية. جلس ينتظر خروجها من الغرفة، ثم صدع هاتفه باتصال من أحمد، تلقى المكالمة على الفور وسمع أحمد يقول: يحيى.. عمار هرب. مش عارف فاق إزاي وهرب من المستشفى بعد ما ضرب الدكتور وخد البلطو بتاعه والعسكري ماخدش باله.
فتح يحيى عينيه مشودهًا، وقرر أن يبحث عنه قبل أن يعود إلى الجبل. فلن يجد فرصة أخرى كي يخبره بالحقيقة.