
رواية المطاريد الفصل الحادي عشر11 بقلم رباب حسين
ليست كل الجروح تترك أثرًا على الجسد فبعضها يستقر في أعماق الروح، ويظل ينزف مهما مرت السنوات.
وحين يصبح الحب عاجزًا عن إصلاح ما أفسده الظلم، لا يبقى أمام القلوب سوى مواجهة الحقيقة مهما كانت قاسية.
والحقيقة التي خشى يحيى أن يصدقها أنه بالفعل قد خسر رهف، كان يراهن على حب قديم، نظرة اشتياق ظلت عالقة في أذهانه أبت أن تُمحى مهما مر من السنوات.
وفجأة، اكتشف أن الألم الذي كان بقلبه سابقًا؛ حين ظن أنها ليست جديرة بالحب، لم يكن سوى غضب، ولكن الآن بات يعلم معنى الشعور به، فما هو أكثر إيلامًا من أن تكون الفتاة التي يحبها ويتمنى وصلها ملك يديه وتطعنه هي بالرفض.
ترفض حبه، تراه غير جديرٌ بها، وكأنها تعطيه درسًا جديدًا ليعلم معنى ظن السوء دون دليل.
ترك يحيى الغرفة وأغلق الباب بعنف خلفه، مما جعلها تنظر إليه بحزن، هو يرى حبها بعمق عينيها ولكن لم تعد رهف قادرة على إعطاء حبها ومشاعرها والأخص ثقتها إلى أحد. وكأن الروح تشوهت بالظلم والقهر ولم تعد تملك رفاهية التعبير عما تشعر به. فقد دفنتها حزنها وغضبها وكل ما شعرت به وحدها بشغف قلبها ولم يعد يرى نور الحياة.
نزل يحيى وهو يستشيط غضبًا، فهي تغلق كل الأبواب أمامه ولا تترك له أي فرصة ليقترب منها، أو أمل بأنها سوف تعود له يومًا ما.
لاحظ يزن غضب يحيى وهو يخرج من المنزل فلحق به إلى الخارج، وجده يجلس والحزن والغضب جاليان على وجهه، فجلس بجواره وقال : هتفضل تخبي لحد إمتى يا يحيى؟! أنا أخوك، والكلام اللى هتقوله هيفضل سر بينا محدش هيعرفه. فهمني يا يحيى إيه اللي بيحصل بينك وبين مراتك، وماتقولش مفيش حاجة، عشان ده مش منظر عريس يوم صباحيته، ولا منظر واحد متجوز البت اللي حبها.
نظر إليه يحيى بصمت ولم يتحدث فأردف يزن : اه بتحبها يا يحيى، وماحبتش غيرها، وهي اللي جرحتك زمان وغيرتك بالشكل ده، وأنا قولتلها بنفسي إنها لو هتعمل فيك كده تاني يبقى تبعد من قبل ما تتجوزوا، لكن واضح إنها لسه بتتفنن في جرحك.
يحيى : هي ماعملتش حاجة.. ماعملتش حاجة خالص. هي أكتر حد اتظلم شفته في حياتي. وأنا السبب يا يزن. أنا السبب في اللي جرالها، خذلتها وجرحتها، ولحد امبارح كنت بجرح فيها وقولت كلام صعب. لحد ما خلاص بقيت متأكد إنها عمرها ما هتسامحني. أنا خسرتها خلاص.
يزن : مش فاهم، إنت خذلتها! ده أنت شايل هم ومسئولية الناس دي كلها في رقبتك بقالك سنين؛ لا عمرك إشتكيت ولا مليت؛ إزاي خذلت اللي بتحبها يا يحيى!
يحيى : صدقت كل الناس إلا هي، جات تستنجد بيا من الناس كلها وأنا ماسعدتهاش، عشان كده بعدت. كنت فاكر إني صح، إن هي اللي غلطانة مش أنا، لكن عرفت إن أنا اللي غلطان، لدرجة إني مش قادر أسامح نفسي، وأكتر حاجة وجعاني إنها بين أيديا ومش قادر أعملها حاجة، ولا قادر أنسيها اللي فات ولا قادر أسعدها، ولا قادر أرجع ضحكتها من تاني. شايف رهف اللي فوق دي؛ ضحكتها ماكنتش بتتشال من على وشها، دلوقتي مفيش في عينيها غير الحزن والكسرة وأنا السبب. كرهتني يا يزن. البنت الوحيدة اللي حبيتها في حياتي كرهتني وبسببي.
لم يجد يزن كلمات تهون عليه ما قال، لم يتخيل أن المسافة بينهما أصبحت بعيدة إلى هذا الحد، وتعجب؛ كيف يتحمل يحيى كل هذا الحزن بداخله؟!
ربت على ساقه وقال : بص يا يحيى أيًا كان المشكلة اللي بينكم إيه؛ فا أنا واثق إنها هتتحل، لأن رهف بتحبك وباين عليها جدًا. يمكن زي ما أنت بتقول زعلانة منك، لكن أنا واثق إنك هتخليها تسامحك. إنت بتحبها وهتعرف تعوضها، أصبر بس شوية وسيب الموضوع للوقت. بكرة الأيام تصلح اللي بينكم وترجع تثق فيك تاني، إنت بجد أهل للثقة، وبعدين كفاية اللي عملته عشانها لما طلعت الجبل عشان تجيبها. أهدى يا يحيى وحاول ما تتكلمش في الموضوع معاها تاني، وهي هتنسى وهتكمل معاك.
أومأ إليه يحيى وهو يتنهد، يخرج هذا الحزن من قلبه، فقال يزن : لا بيريحوا وهما بعيد ولا وهما قريبين.
نظر إليه يحيى وقال : مالك بتتكلم زي ما تكون مجرب كده؟
يزن : ها... لا أبدًا.. مش مجرب ولا حاجة.
يحيى : إنت عارف إن أنا اللي مربيك صح؟
أومأ إليه يزن وهو يشعر بأنه وقع تحت حصار يحيى، فأردف : ده غير إني ظابط، يعني بشم الكدب من على بعد.
يزن بتردد : بص... هو أنا... يعني...
يحيى : بتحب. مين هي بقى؟
ابتسم يزن وقال : ليلة بنت عم صديق.
ضحك يحيى وقال : ومالك مكسوف كده!
يزن : الصراحة كنت مكسوف أكلمك في الموضوع، عشان يعني كنت رافض تتجوز وأنا الصغير أجي أقولك جوزني. وبعدين أبوك لو كان عرف كان طردني من البيت أو ضغط عليك عشان تتجوز، فا سكت.
يحيى : وواضح إنك ساكت بقالك كتير.
يزن : ما هو المشكلة مش كده بس، عم صديق مش موافقة عليا.
يحيى بدهشة : إيه! مين ده اللي مش موافق يجوز بنته ليزن التهامي! مين يرفض يناسبنا أصلًا.
يزن : ما هو لو إنت رحت وطلبت إيدها ليا أنا واثق إنه مش هيقدر يقولك لأ.
يحيى : طبعًا، خلاص ماتقلقش، خلينا نروح نطلب إيدها.
ابتسم يزن بسعادة فربت يحيى على كتفه وقال : تعالى ندخل عشان نتعشى سوا. أنا قولت لرهف تنزل تاكل وسطنا عشان عايزها تحس إننا بقينا عيلتها، ونعوضها على حرمانها منهم.
يزن : أحسن حاجة. هي لما تقعد وسطنا هتنسى شوية وتتأقلم علينا.
ذهبا إلى الداخل، ووجدا أمينة تشرف على تحضير الطعام وأمل تساعدها، جلسوا على الطاولة، وبعد قليل هبطت رهف من أعلى الدرج. نظرت لها أمل وابتسمت لها حتى جلست بجوار يحيى على الطاولة وقالت : مساء الخير. معلش أسفة على التأخير.
عزام : ولا يهمك يا بتي. نمتي منيح؟!
رهف : اه جدًا. أول مرة أنام كتير كده من فترة طويلة.
أمينة : ربنا يريح قلبك يا بتي.
ظهر شبح إبتسامة على وجهها وقالت : تسلمي
لاحظت أمل أن رهف لا ترتدي الثياب الجديدة التي أحضرتها أمينة، ولا تزال ترتدي ثيابها التي جاءت بها فقالت : قوليلي يا رهف؛ هي الحاجات اللي ماما جيباها مش عجباكي؟
رهف : عشان مش بلبسهم يعني؟!
أمل : اه..... أنا ملاحظة إنك ماقربتيش منهم لحد دلوقتي.
رهف : الصراحة مش متعودة على كل ده، ولا إن حد يجبلي حاجة، فا حاسة إنهم مش بتوعي.
أمينة : بس أنا زي أمك دلوك. وكل حاجة جبتهالك هي ليكي وتجدري تلبسيهم براحتك، ولا إنتي مش حاسة إننا عيلتك؟!
تنهدت رهف وقالت : لا طبعًا عيلتي. بس سيبوني على راحتي، شوية شوية وهتلاقوني خدت على الوضع. معلش سامحوني.
يزن : إنتي ماعملتيش حاجة عشان نسامحك. المهم تخليكي متأكدة إنك بقيتي واحدة مننا.
ابتسمت إليه ثم قال يحيى : ممكن تبطلي رغي وتاكلي. إنتي ماكلتيش حاجة من امبارح.
أمينة : وهو كومان مراديش ياكل. يلا بسم الله.
تناولوا الطعام معًا تحت مشاغبات يزن وأمل، تعالت ضحكاتهم تحت نظرات رهف التي تذكرت حازم، وكيف كانا يتشاغبا معًا بالماضي. كان يحيى يتابع نظراتها، وكأنه يرى ألمها ويقرأ ما يدور بعقلها. فربت على كتفها بحنان، نظرت إليه فقال : كلي يا حبيبتي، ماتفكريش في حاجة.
نظرت إليه وهو يتحدث، شعرت بحنان لمسته. كم اشتاقت لتلك اللمسات! فلم يحنو عليها أحد منذ أن غادرت منزل يحيى بالماضي.
أومأت إليه وأكملت طعامها، حتى انتهوا من تناول الطعام، ثم قال عزام وهو يضحك : والله زمان يا ولاد، صحيح زي ما بيجولوا؛ الخير على جدوم الواردين.
نظرت له رهف وابتسمت قليلًا ثم أردف عزام : بعد بكرة أول الشهر يا يحيى، ماتنساش عاد.
يحيى : مش ناسي يا بوي. عديت النهاردة على الحاج عطوة وأنا راجع من القسم، وقولتله على العجل عشان يجهزه للدبح.
أمينة : ربنا ما يجطعلك عادة يا حج.
عزام : أمين. خلي الغلابة تاكل، والمرة دي عايز رهف تعمل معاكم الوكل، عشان تشارك في الثواب.
نظرت رهف إلى أمل وهي تعقد حاجبيها فقالت : أبوي كل شهر بيدبح عجل، وبنعمل أكل لأهل البلد كلهم، وبيجوا ياكلوا عندنا هنا في السرايا برا.
رهف : ربنا يجازيك خير. الناس هنا غلابة أوي.
عزام : دول أهلنا وعزوتنا، كفاية حبهم ليحيى.
رهف : اه ما أنا لاحظت حبهم ليه فعلًا.
أمل : وخصوصًا البنات.
رهف : خدت بالي برده، تقريبًا كانوا هيقتلوني لما عرفوا إني هتجوز يحيى كأني خطفت من كل واحدة جوزها.
أمل : ومين ما يحبش يحيى! ده إحنا كنا متبهدلين لحد ما خلص كليته ورجع، حمى الناس اللي برا دي من المطاريد ومن ساعتها وهو بقى بطل القرية.
شعرت رهف بالغيرة ولكنها تحكمت في مشاعرها جيدًا، وكأنها ترفض أن تضعف أمامه.
لاحظ يحيى نظراتها فقال : ربنا يديم المعروف. أنا بكرة هروح القسم عشان ماخلصتش تحقيق، وبعد بكرة هبقى معاكم عشان الدبح.
نهضوا من حول الطاولة وجلسوا في البهو، ظلوا يتسامرون وأمل تشاغب رهف حتى تتحدث معهم، وبالفعل إعتادت رهف على الحديث معها، فتذكرت صديقاتها بالماضي ودفء العائلة بينهم.
بعد وقت، صعدوا إلى غرفهم. دخل يحيى ورهف إلى غرفتهما، نظرت رهف إلى الفراش بتوتر وقالت : أنا هدخل أغير هدومي.
يحيى : وأنا هغير وأنام على الكنبة.
رهف : لا أنا هنام على الكنبة. دي صغيرة عليك، وإنت مانمتش من امبارح.
يحيى : بس الكنبة مش مريحة.
ابتسمت رهف بتهكم وقالت : لو كنت شفت أنا كنت بنام فين زمان؛ كنت هتعرف إن الكنبة دي بالنسبالي خمس نجوم. نام إنت في سريرك وأنا هنام عليها.
أومأ إليها يحيى، كلما تخيل كيف عاشن كل هذا المدة يزداد غضبه من نفسه.
دخلت رهف إلى المرحاض، بدلت ثيابها وخرجت بعد قليل، وجدت يحيى مستلقي بالفراش، فتوجهت نحو الأريكة واستلقت عليها.
بعد قليل، زفر يحيى ونظر إليها بضيق وقال : هو إنتي نايمة بعيد عني ليه أصلًا؟! إنتي مراتي على فكرة، يعني خلاص مابقاش بينا كسوف.
تنهدت رهف وقالت : نام يا يحيى. تصبح على خير.
زفر يحيى ووالاها ظهره، بعد قليل راح في نوم عميق من شدة التعب.
شعرت رهف بهدوء أنفاسه، فنهضت واقتربت منه، وقفت تنظر إليه وهو نائم وتتأمل ملامحه التي كانت تحلم بها كل ليلة، ولا تصدق أنه الآن أمامها؛ يحيى الذي حبته، ليس هذا الرجل الذي يجرحها في كل حديث يدور بينهما، تذكرت لمسته إليها منذ قليل، كانت متعطشة للحب والحنان.
انسابت دموعها على وجهها بصمت، فهي تعلم أن وجودها بجواره ما هي إلا فترة مؤقتة، وسوف يُكتب عليهما الفراق لا محال.
أما في قسم الشرطة، كان هناك بعض العساكر في القسم، وقد غادر أحمد وعاد إلى منزله.
وفي هدوء الليل وقبل الفجر، فُزع كل من بالقسم على صوت إطلاق الأعيرة النارية بالخارج، انتفض العساكر من أماكنهم وخرجوا أمام قسم الشرطة، فوجدوا رماح يصيح من بعيد في عتمة الظلام : خرجوا المطاريد من الجسم.
رفعوا الأسلحة وتأهبوا لرد الرصاص، ولكنهم لم يروا أحد، الظلام كان دامسًا. تحركوا بكل اتجاه أمام القسم، وحين ابتعدوا عن الباب قليلًا؛ تحرك جمال من خلف الحائط القريب من الباب، وتسلل إلى الداخل من خلف العساكر سريعًا.
وحين رآه رماح صاح عاليًا : أضرب عليهم، إجتلوهم.
انهمر الرصاص من كل اتجاه، وركض العساكر يحتمون خلف بعض الحواجز، لم يروا أحد منهم لذا كان من الصعب أن يطلقوا عليهم الرصاص. وفي وسط هذا الهرج، كسر جمال قفل باب غرفة الحجز بواسطة السلاح، وخرج رجال المطاريد معًا وأعطاهم أسلحة حتى يدافعون عن أنفسهم.
رفع أحد العساكر هاتفه واتصل بأحمد، وحين تلقى المكالمة سمع دوي الطلقات في الهاتف، نهض بفزع وقال : فيه إيه؟!
العسكري : إلحقنا يا أحمد بيه، باقي المطاريد بيضربوا علينا نار قدام القسم من بعيد، ومش شايفين حد ولا عارفين عددهم.
أحمد : إحموا نفسكم كويس، ماتضربوش نار عليهم وأنا هطلب تعزيزات من المديرية.
أنهى المكالمة، والعساكر ينكمشون خلف الدروع والرصاص ينهمر عليهم من كل اتجاه، حتى تفاجأ العساكر أن المطاريد يركضون خارج القسم، رفع العساكر الأسلحة بوجههم ولكن تفاجئوا بأنهم يحملون السلاح ويهددوهم به، ثم قال عزت : إحنا أكتر منيكم، يعني لو فكرتوا تضربوا واحد عنموت تنين، خافوا على روحكم وهملونا.
اقترب باقي رجال المطاريد من خلفهم وحاصروا العساكر من كل اتجاه، وبدأوا يبتعدون عنهم بحذر وهم يوجهون أسلحتهم إلى العساكر، حتى اختفوا وسط الظلام. وعاد الصمت يسود المكان.
وقف العساكر ينظرون إلى بعضهم البعض بحسرة، فالعدد كان كبير وسوف يدفعون حياتهم إذا اشتبكوا معهم.
وعاد المطاريد إلى الجبل مرة أخرى.
بعد قليل وصل أحمد إلى القسم وعلم بهروب المطاريد، وحين وصلت التمديدات من أسيوط؛ كان الأمر قد انتهى.
انتظر أحمد حتى تشرق شمس الصباح، ثم اتصل بيحيى وأخبره ما حدث. استيقظت رهف على صوت يحيى الذي يصيح غاضبًا : يعني إيه هربوا يا أحمد؟! وإزاي؟
أحمد : واضح إنهم رسموا خطة ونفذوها، ضربوا نار على العساكر قدام القسم وواحد منهم كان مستخبي ودخل هرب المساجين وإداهم سلاح، طبعًا العدد كان كبير وإنت عارف إن فيه عساكر ماتوا لما طلعنا الجبل والباقي في المستشفى.
يحيى بضيق : وياريت دمهم راح بفايدة، دمهم اتهدر على الفاضي، عمار رجع الجبل وأدي المطاريد حصلوه، يعني رجعت كل حاجة زي الأول. أقفل يا أحمد. أنا جايلك.
أنهى يحيى المكالمة ثم سمع رهف تقول : أنا أسفة، العساكر ماتوا بسببي. ماكنش لازم تضحي بيهم يا يحيى عشاني.
يحيى : بس يا رهف لو سمحتي، أنا أضحي بنفسي عشانك، والرجالة اللي ماتت ولا اتصابت طلعوا معايا بإرادتهم، هما عارفين معنى إن مراتي تبقى في وسط المطاريد معناها إيه، ومش هيسمحوا لعرض الكبير إنه يتهان، وفي الآخر ده شغلهم، كلنا بنخرج من بيوتنا ومش عارفين هنرجع ولا ﻷ.
رهف : بس إنت قولت إنك طلعت بس عشان أنا مراتك قدام الناس، ماقولتش إنك طلعت وضحيت بنفسك عشاني.
يحيى : كنت حمار، إرتاحتي كده! ماقدرتش أقولك الحقيقة وقتها عشان كنت خايف أضعف، لكن دلوقتي مش خايف أضعف قدامك، عشان حبي ليكي مش ضعف، أنا كنت ضعيف من غيرك، والدليل إني ماتجرأتش أطلع الجبل زمان لكن عشانك طلعت وأنا مش خايف.
أشاحت بوجهها عنه فأردف : مش مصدقاني؟!
رهف : ﻷ.
تنهد وقال : حقك، ياريت حتى قادر ألومك.
دخل إلى المرحاض وبدل ثيابه وخرج، ثم غادر الغرفة سريعًا دون حديث، أما رهف فوقفت خلف الستائر تتابعه وهو يغادر، تتذكر ما قاله وأنه من الممكن ألا يعود يومًا ما إذا خرج إلى تأدية عمله.
عاد الخوف يتسلل إليها، الخوف من الفقد. شعرت بأن قلبها بدأ يضعف أمامه، فتمسكت بغضبها وأشاحت بنظرها عنه، أما هو فرمق النافذة قبل أن يغادر، لاحظ أنها تبتعد عنها، فتنهد بحزن وغادر المنزل، على أمل أن يلين قلبها إليه يومًا ما