رواية الغرور والحديد الفصل الحادي عشر11 بقلم فاطمة محمود
فجأة قرب منهم سامر شد الكرسي بكل بجاحة وقعد قدامهم
عمار بصله وهو مستغرب ومش فاهم اللي بيحصل
عمار بحدة: هو انت حضرتك إزاي تقعد كدا مش شايف إن في بنت قاعدة معايا
سامر مردش عليه بص لسيليا بابتسامة مستفزة وسيليا كانت مصدومة حرفيا ووشها جاب ألوان
سامر: وانت كراجل.. مش عيب أوي تقعد مع خطيبتي
عمار اتصدم وبص لسيليا بسرعة
عمار: انت مجنون ولا إيه
سامر ببرود: اسألها
عمار: وانت فاكر إني هصدق الهبل دا
ابتسم سامر بسخرية وقال: لو هو كلام هبل.. أمال هي مصدومة ليه ومش قادرة تنطق
هنا عمار انتبه.. بص لسيليا فعلا لقى عينيها مليانة رعب ونظرتها بتقول إنها تعرفه كويس وإنها خايفة منه بجد
سامر قام مرة واحدة ومسك إيد سيليا بقوة
سامر: قومي معايا يا روحي كفاية لحد كده.. خلتيني أغير عليكي بزيادة
عمار قام هو كمان وسحب إيدها من إيد سامر بغضب: ابعد عنها انت اتجننت
سامر وهو بيجز على سنانه: انت اللي مش بتفهم.. بقولك خطيبتي
وبعدين لف لسيليا عمار: سيليا.. هو كلامه صح ردي عليا
فضلت سيليا ساكتة دموعها محبوسة في عينيها ومش قادرة تتكلم
سامر: أكيد سكوتها رد عليك
عمار زعق: سيلياا ردي عليا
هزت سيليا راسها بيبطـء من خوفها: آه
ساعتها عمار ساب إيدها على طول كأنه اتكهرب قرب من ودنها وهمس بكلام وجعها: أنا غلطان إني صدقتك.. وصدقت حبك المزيف
وسابها أخد تليفونه ومفتاح عربيته ومشي من غير ما يبص وراه
سيليا بدموع: عمار.. استنى
لسه هتجري وراه شدها سامر من إيدها جامد
سامر: رايحة فين استني هنا
سيليا بتمنع دموعها تنزل: ابعد عني بقا
قرب منها سامر وهمس بتهديد: لو ما مشيتيش معايا وانتي ساكتة.. هفجرله عربيته دلوقتي قدام عينك.. تحبي أوريكي
سيليا اتجمدت مكانها لأنها عارفة كويس إن سامر لما بيدايق ممكن يمحي أي حد من على وش الدنيا
شدها سامر من إيدها تاني وقال بنبرة حنينة مزيفة: شطورة يا سيليتي.. امشي معايا
وشدها وراه وخرجوا من المطعم وكل الناس بتبص عليهم
~~~~~
دخل ياسر أوضته قعد على السرير ومسك تليفونه ورن على رنا
ردت عليه بعد ثواني
ياسر: انتي إيه اللي مسهرك لحد دلوقتي
رنا: مفيش كنت مع الواد بتاعي
ياسر: وحياة أمك
رنا: اللي هي حماتك
ياسر: ما هو شكله مش هييجي اليوم دا وهاخد روحك في إيدي
رنا: يا ساتر يا رب للدرجة بتحبني
ياسر: أعمل إيه أنا من مجرد كلام بغير أمال لما نتجوز هعمل إيه بتهيألي هقتلك بجد
رنا وهي مبتسمة: اممم.. موافقة
ابتسم ياسر ونام على السرير
رنا: انت إيه اللي مسهرك لحد دلوقتي
ياسر: مش عارف أنام من التفكير فيكي
رنا: دا انت لسه داخل أوضتك هنكدب
ياسر: يعني لازم أبقى لوحدي عشان أفكر فيكي ما انتي واخدة تفكيري طول الوقت.. وبعدين احنا شكلنا مركزين أوي
رنا: لا مش مركزة ولا حاجة هركز ليه
ياسر: آه يا لمضة.. بحبك
رنا: أنا عارفة
ياسر: يعني أنا بقولك بحبك عشان تقوليلي أنا عارفة
رنا: هقولك إيه يعني
ياسر: يا سلام مش عارفة بيتقال إيه
رنا: لا مش عارفة بجد
ياسر: رناااا..
رنا: بتزعق ليه
ياسر: بحبك
كتمت رنا ضحكتها
رنا: وانا كمان هقفل عشان أنام ونت كمان نام.. باي
ياسر: يعني كدا ماشي يا رنا أنا هوريكي
قفلت رنا وهي بتضحك وياسر مدايق بس مبتسم على حركاتها
ياسر لنفسه: والله البت دي بتعمل حاجات تدايقني وبرضو أضحك مش عارف ايه دا
~~~~~
في عربية سامر
سامر بعصبية: بقا أنا سامر الرفاعي تسيبيني عشان حتة عيل زي دا أنا هندمك يا سيليا على اللي عملتيه فيا من غير ما تفكري
سيليا بهدوء عكس اللي جواها: وانت مفكرتش فيا ليه لما عملت اللي عملته
سامر: يا سيليا افهمي أنا بحبك واللي بتحكي عنه دا خلص وراح لحاله
سيليا: بالنسبة لي مخلصش وانت متتشافش عندي أصلا
سامر بزعيق: يعني إيه كلامك دا
سيليا ببرود: متعليش صوتك وانت بتكلمني متنساش أنا أبقى مين وبنت مين كمان
سامر: بتهدديني يعني طيب أنا مبتهددش يا سيليا انتي كمان متنسيش أنا أبقى مين
سيليا: اعتبره زي ما انت عايزه وانت متقدرش تعمل أو حتى تفكر إنك تعملي حاجة
سكت سامر شوية وبعدين قال: ماشي.. لما هو بيحبك سابك ومشي ليه افهمي مفيش حد هيحبك قدي
بصت سيليا قدامها وعينيها دمعت
سيليا: دي حاجة أنا متأكدة منها مش محتاجة أشرحها ليك
سامر استغرب لما شاف دموعها مسك وشها وبصلها
سامر: انتي بتعيطي عشانه هو مين دا.. عملك إيه خلاكي تتعلقي بيه أوي كدا
بعدت سيليا إيده وبصت قدامها
سيليا: محاولش يبهرني زيك كان عادي جدا.. راجل بجد عارف هو عايز إيه وبيفكر في أي خطوة قبل ما يخطيها ألف مرة
بصتله سيليا:
تعرف إنه كان دايما بيصدني وعايز يبعدني عنه مع إن أي
حد مكانه كان ممكن يستغل الفرصة.. بنت حلوة وغنية..
وأنا مستسلمتش فضلت أحاول لحد ما حبني
سامر: ده انتي بقيتي جريئة جدا
سيليا: على الأقل أنا حبيته ومكانش في حد في حياتي مش زي بني آدم مقرف أعرفه
سامر: انتي بترسمي الأشخاص في حياتك على مزاجك وسامر مبيخسرش ومفيش بنت اتجرأت وسابته حتى انتي يا سيليا
سيليا: تعرف إحساس الكره اللي جوايا ناحيتك بقى أكبر من حبي ليه
سامر بابتسامة مجنونة: وأنا بموت فيكي يا سيليتي.. هتشوفي عمار ده هيرجعلك ازاي
كشرتله سيليا وبصت قدامها وسامر داس بنزين ومشي بالعربية بسرعة
~~~~~
في منزل جلال الحديدي
دخل جلال الشقة ودخل أوضته كانت آمنة قاعدة على السرير
جلال: منمتيش ليه يا حبيبتي
آمنة: مستنياك يا جلال اتأخرت كل ده ليه
جلال: أعمل إيه الشغل مش بيخلص
قامت آمنة وقربت منه
آمنة: ادخل خد شاور وأنا هجهزلك الأكل
جلال: لا مش عايز، ارتاحي انتي وأنا هدخل الحمام
آمنة: بس انت مكلتش يا جلال
جلال: أكلت في الورشة يا حبيبتي متقلقيش.. خالد رجع
آمنة: أيوا من زمان ودخل أوضته ينام
جلال: ماشي طلعيلي هدوم ألبسها
آمنة: حاضر
طلع جلال من الأوضة ودخل الحمام
~~~~~
في أوضة خديجة
نايمة على سريرها وباصة للسما من الشباك ولأول مرة تفكر في نديم
خديجة لنفسها: هو ممكن يفكر فيا أو أشغل باله زي ما هو شاغل بالي وليه ميبصليش أنا ألف من يتمناني
افتكرت كلامه ليها في الصيدلية وكشرت
خديجة: معقول يكون كل ده صدفة فعلا وهو مش بيراقبني وأنا فعلا بالنسبة له زي أي بنت
سكتت خديجة أفكارها
خديجة: هو أنا ليه بفكر في كل دا كفاية وهم وأفوق لنفسي
وحاولت تنام لكن تفكيرها وانشغالها بنديم كان أقوى
عند نديم...
قاعد على سريره قدامه اللاب توب بتاعه وصورة لخديجة لقطها آخر مرة اتقابلوا في الكلية قبل ما يتكلم معاها من غير ما تاخد بالها
ابتسم نديم
نديم: فيكي إيه يخليني مشدودلك وعايز أعرف عنك كل حاجة طول الوقت طيب وانت هتحب من طرف واحد يا عم نديم دي مش طايقة تلمحك
وبعدين رجع ابتسم بثقة:
بس مين عارف حياته هتروح لفين يمكن نتجوز ونحب بعض.. وليه يمكن أكيد هتبقي لنديم
ابتسم وهو بيبص لصورتها لآخر مرة وقفل اللاب.. ورن تليفونه برقم الشخص اللي بيجبله تفاصيل عن خديجة
~~~~~
وصل سامر الفيلا ونزل فتح الباب ومسك إيد سيليا وجرها وراه
دخلوا الفيلا
سيليا: سيب إيدي
وقف سامر قدام شاهين ومرام اللي قاعدين في الريسبشن وقاموا مش فاهمين اللي بيحصل
شاهين: انت اتجننت يا سامر
سامر: لما تعرف كانت بتعمل إيه ومع مين هتعمل أكتر من كده
مرام: رح تكون مع مين يعني أكيد مع رفيقتها نيللي
سامر: نيللي مين دي كانت مغفلاكم ورايحة وجاية مع واد صايع
شاهين: سيليا.. الكلام اللي بيقوله سامر ده حقيقي انطقي
سيليا:أيوا حقيقي ومن حقي أختار أبقى مع مين
مرام: لك انتي شو عم تقولي وسامر وينه بحياتك
سيليا: سامر ميفرقليش
شاهين بعصبية: هو إيه اللي ميفرقش معاكي يا بنت دا خطيبك نسيتي ولا إيه وكنتي طول الوقت معاه وبتحبيه
إيه اللي حصل يخليكي تعملي كدا
سيليا: أنا سبته وهو عارف دا كويس
سامر: تاني يا سيليا مش عايزة تفهمي وتبطلي الكلام الفاضي بتاعك دا
سيليا: كفاية تمثيل لو هما مصدقينك أنا عمري ما هصدقك تاني
سامر: لا زودتيها يا سيليا
سيليا بعدم اهتمام: أنا طالعة
مسك إيدها شاهين بعصبية
شاهين: كلميني زي ما بكلمك وفهميني معنى كلامك
سيليا بانفعال: الأستاذ المحترم خاني قدام عيني ومن غير
ما يراعي مشاعري أو يفكر في فيا علي الاقل
بص شاهين لسامر بعدم تصديق
شاهين: خنتها
سامر: يا أنكل في سوء تفاهم والله ما خنتها
سيليا: ما تبطل كدب يا أخي أنا قرفت منك
قربت مرام من سيليا وبصت لسامر
مرام: اهدي حبيبتي.. وانت سامر ما كنت بتوقع منك هيك
بعدت سيليا عنها وطلعت لفوق
شاهين: الكلام دا لو صح يا سامر هتشوف مني وش مشفتهوش قبل كدا خليك فاكر كلامي
سامر: أنا هثبتلك وهثبت لسيليا إنه مش صح
مرام: لك انت كيف فكرت مجرد تفكير تعمل هيك مع بنتي اسمع انت بتبعد عنها ولا بتورجيها وشك هاد مفهوم
سامر: انت موافق على كلامها يا أنكل شاهين
بصله شاهين
شاهين: تهدى سيليا الأول وبعدين نشوف هي عايزة إيه ودا اللي هيحدد علاقتكم
~~~~~
كان سايق عمار العربية وحسن قاعد جنبه على الكرسي بيبصله
حسن: عمور
بصله عمار ورجع بص قدامه
حسن: شكلك مدايق جدا في إيه مالك
عمار: مفيش
حسن: اتخانقت معاها عشان كدا متضايق من أول ما رجعت
سكت عمار ومردش
حسن: عمار مبتردش ليه
عمار: افهم لوحدك يا حسن مش عايز أتكلم
حسن: طيب ولا يهمك
نفخ عمار بضيق
عمار: متزعلش مني يا حسن
حسن: أنا مش زعلان أنا عايز أعرف مالك
عمار: اكتشفت إن مفيش حاجة اسمها حب أصلا
حسن: مش فاهم
ابتسم عمار بقلة حيلة وهو بيداري وشه
عمار: طلعت مخطوبة
حسن بصدمة: إزاي
عمار: كنت قاعد معاها وخطيبها فجأة دخل علينا أتاريني أنا كنت بالنسبة لها تضييع وقت
حسن: في بنات كتير كدا مش عارف بيعملوا كده ليه.. بس عادي كل حاجة هترجع لوضعها الأساسي
عمار: مفيش حاجة اسمها عادي.. كلمة عادي وراها ألف إحساس عمره ما كان عادي.. مش عارف أفكر غير فيها
يا حسن أول بنت أحس تجاهها بمشاعر الحب
حسن وهو بيلطف الجو: للدرجادي وقعت يا عمار
عمار: مش عايز أتكلم تاني في الموضوع دا يا حسن كفاية كدا
هز راسه حسن وبص قدامه ورجع بصله
حسن: طيب خليني أسوق بدالك بقالك كتير سايق كتفك هيوجعك دلوقتي
عمار: أنا تمام متقلقش
حسن: طيب
عدت ساعة على عمار وأكتر وهو باصص على الطريق وتفكيره مشغول باللي حصل.. حسن نام جنبه
أما سيليا كانت بترن على عمار كتير وهو شايف مكالماتها قفل الفون وسيليا ادايقت
~~~~~
واقفة سيليا قدام المراية بترتب شعرها وهدومها وتبص على
نفسها وهي بتفتكر كلام عمار ليها
أنا غلطان إني صدقتك.. وصدقت حبك المزيف
سيليا: انا بحبك بجد يا عمار مش عارفه دا حصل امتي
بس انا متاكدة من مشاعري
مسكت شنطتها وفتحت باب الجناح خرجت لقت سامر في وشها
اتخضت سيليا وبصتله بضيق
سيليا: هو في إيه كل شوية هلاقيك في وشي
تجاهل سامر كلامها وبصلها من تحت لفوق
سامر بحنية مزيفة: لسه كنت جايلك اطمن عليكي يا سيليتي
سابته سيليا ومشيت كام خطوة من قدام الجناح شدها سامر ورجعها قدامه
اتحول سامر: رايحة عنده طيب دا مش هيحصل انتي فاهمة
سيليا: هتمنعني يعني
سامر: لو دا اللي هينفع معاكي هعمل كدا
سيليا: لو مسبتنيش في حالي والله العظيم هرتكب جناية فيك دلوقتي
سامر: مش خايفة على حياته ولا إيه
سيليا: متقدرش تعمله حاجة عمار يقتلك ويدفن عشرة زيك وأنا عارفة إنك محطيتش حاجة في العربية انت رعبتني بس عشان أخاف وأنا صدقتك من خوفي عليه
سامر اتجنن من مدحها فيه زقها جوا الجناح وقفل الباب
خبطت سيليا
سيليا: افتح الباب يا زفت
سامر: شوفي هتخرجي من هنا إزاي
وسابها ومشي وسيليا كانت بتخبط على الباب وتزعق
~~~~~
في منزل قاسم الحديدي
خرجت رنا من أوضتها وقعدت على الكرسي وهدى كانت بتحضر الفطار
رنا: صباح الخير
هدى: صباح الخير.. كويس إنك صحيتي
رنا: خير يا هدهد في إيه على الصبح
هدى: بعد ما تفطري تنضفيلي الشقة دي كويس
رنا: شقة إيه دي اللي أنضفها
هدى: انتي مش شايفة كوم التراب اللي فيها
رنا: أنا شايفة إنها زي الفل ومش محتاجة أي حاجة
هدى: هتنضفيها يا رنا
رنا: يووو هو لازم يوم الجمعة ده كمان الإجازة بتاعتي تتعبيني فيه مفيش راحة أبدا
هدى: وانتي معاكي إيه النهاردة ولا أي حاجة أهو سلي نفسك
رنا: أنا كنت هفطر وهدخل أكمل نوم
هدى: والله ما انتي مكسوفة من نفسك ونتي بتقوليها
رنا: واتكسف ليه
هدى: طيب الشقة هتتنضف يا رنا ومش عايزة ألمح غبار تراب
دخلت هدى المطبخ وحطت رنا إيدها على خدها وهي بتبص في كل ركن في الشقة
رنا: ليه كدا يا هدهد
هدى من المطبخ: خليكي كدا خايبة ولا هتنفعي دلوقتي ولا لما تتجوزي أمه داعية عليه اللي هياخدك ولا فالحة في حاجة غير النوم
رنا: دي أمه دعتله في ليلة القدر هو يطول رنا قاسم الحديدي
هدى: شايفة مفيش منك اتنين لحد ما تقعي على بوزك في الآخر
رنا بهمس: لا أنا عارفة إني واقعة في قلبه أصلا
هدى: قومي ادخلي صحي أبوكي بدل ما انتي قاعدة تبرطمي
وبعدين عمار
رنا: حاضر
~~~~~
في فيلا كمال المنياوي - في المطبخ
قاعدة نيللي على الكرسي ومنى بتعملها قهوة
منى: ينفع كدا متجيش تشوفيني المدة دي كلها
نيللي: حقك عليا يا دادة كنت مشغولة في الشغل شوية بس والله على بالي ونفسي آجي أشوفك
منى: المهم إنك بخير يا حبيبتي طمنيني عليكي عاملة إيه
نيللي: الحمد لله بخير
صبت منى القهوة في الفنجان وقعدت على الكرسي اللي قصاد نيللي
منى: اتفضلي يا حبيبتي
نيللي: تسلم إيدك يا دادة تعرفي وحشتني القهوة بتاعتك أوي
منى: يا رب تعجبك يا روح دادة
نيللي: أكيد تعجبني.. قوليلي هو كمال بيه هيرجع إمتى
منى: هو النهاردة مش بيتأخر في شغله بس هو بقاله يومين مرجعش الفيلا
نيللي: ليه هو كويس
منى: خايفة وملهوفة عليه
نيللي: لا أبداً بسأل عادي
منى: لسه يا نيللي انسي اللي فات يا بنتي ده أبوكي ملكمش غير بعض في الآخر
نيللي: من معاملته ليا بقيت ناسية إنه يبقا أبويا
منى: هو آه مبيسألش عليكي يا حبيبتي والغلط عنده مش معنى كده انتي كمان تبقي قاسية عليه
نيللي: عارفة لو كان عندي إحساس إنه هيهمه سؤالي عنه كنت عملت كده.. بلاش نتكلم في الموضوع ده أنا جاية أشوفك ومش عايزة ننكد على بعض
منى: سيليا عاملة إيه
نيللي: الحمد لله رجعت مصر
منى: يا خبر أبيض، إمتى
نيللي: بقالها شهرين كدا
منى: حمد الله على سلامتها خلاص هتستقر هنا
نيللي: مش عارفة يا دادة
منى: طيب اشربي القهوة يا حبيبتي لما بتبرد مبيبقاش ليها طعم
نيللي: حاضر
أخدت الفنجان نيللي وبدأت تشرب منه
نيللي: خطيرة يا دادة أنا بفكر أفتح كوفي والناس تشرب قهوتك دي
ابتسمت منى
منى: لا القهوة دي لنيللي بس
نيللي: والله عندك حق خلاص نلغيه وأشرب أنا بس قهوتك
منى: طيب قوليلي
نيللي: أقول إيه يا دادة
منى: مبسوطة معاه
نيللي: هو مين يا دادة
منى: الشاب اللي بتحبيه
نيللي: أنا أحب يا دادة انتي كبرتي الموضوع
منى: ليه متحبيش بقا مش بني آدمة ولا مفيش عندك مشاعر
ضحكت نيللي
نيللي: لا بس مفيش أي حاجة من الموضوع
منى: ده أنا مربياكي على إيدي وعارفاكي كويس.
نيللي: وإيه اللي حسسك بحاجة زي كدا
منى: مبسوطة أول مرة ميكونش في زعل على ملامحك وباين أوي كمان إنك بتفكري فيه
نيللي: كل دا يا دادة باين عليا
منى: وأكتر
نيللي: بصي بصراحة أنا كنت رافضة تماما بس هو صمم إني أوافق مجنون شوية وطيب والأكتر من كدا أي حاجة يفكر فيها يقولها على طول
منى: إن شاء الله يا حبيبتي يكون هو الشخص اللي يعرف يحتويكي
ابتسمت نيللي وكملت قهوتها
~~~~~
اتجمعوا عيلة قاسم الاربع افراد على السفرة يفطروا الاكل البسيط اللي يفتح النفس
والفطار معداش من نغاشة رنا المعتادة وحديث قاسم وهدى
عمار كان ساكت من اول ما خرج من اوضته
خلصوا فطار وقامت رنا بتلم السفرة وهدى بتعمل شاي في المطبخ وقعد قاسم وعمار في الصالون
قاسم: قلقتيني من تأخيرك في القاهرة الشغل مكنش ماشي كويس
عمار: لا كان كويس بس الشغل كتير وحاولت اخلص شوية منه واحمد مش مقصر هو ماسك كل حاجة هناك
قاسم: ونت يا عمار كويس
عمار: انا كويس زي الفل قدامك اهو
قاسم : ليه حاسس ان في حاجة
عمار: لا مفيش حاجة متشغلش بالك على الفاضي
قاسم: وحسن منزلش ليه
عمار: تلاقيه في سابع نومة معرفش ينام طول الطريق
قاسم: طيب و
عمار: بابا ممكن تصدقني لما اقولك مفيش حاجة
قاسم: وانت عرفت منين اني هسألك
عمار: يا بابا دا انا فاهمك كويس
قاسم: هو كله فاهمني في البيت دا
عمار: ما انت سكر البيت الكل عارفك وبيحبك
قاسم: غير الموضوع يا واد وكل بعقلي حلاوة
عمار: بكرا معاد الدكتور بتاعك واسف اني اتأخرت عليك كان المفروض معاد دكتور العلاج الطبيعي الاتنين اللي فات
قاسم: يا حبيبي ولا يهمك كفاية شايل الحمل ده كله فوق كتافك وبعدين كان جلال هياخدني بس خالد طلب منه يفضل في الورشة واخدني هو
عمار: والله خالد ده طلع لو حد فينا ساب الدنيا وراه ميقلقش من حاجة هيعرف يسد كويس
قاسم: ربنا يحميه ويخليكم لينا
عمار: ويباركلنا فيك انت يا حاج
هدى: الشاي
قاسم: تسلم ايدك يا حبيبتي
رنا: بقولك يا عمار
عمار: نعم عايزة ايه يا رنا
رنا: ما تيجي تساعدني شوية في التنضيف
عمار: طيب انا هخلص شغلي وصلاة الجمعة وبعدين اجيلك ايه رأيك
رنا: اكون خلصت زمان يا عنيا
عمار: طيب انجزي ونضفي كويس متضيعيش وقت
رنا: ليه كدا يا هدهد دا انا لو عدوتك مش هتعملي فيا كدا الله يسامحك
هدى: شوفي البت بتقول ايه
قاسم: معلش يا حبيبتي ماما ملهاش غيرك برضو
رنا: ما حد مصبرني على عيشتي غيرك يا قاسومي
عملتله رنا قلب بايديها: اعمل قلب
قاسم: هتعلمه منك وبعدين هعمله ليكي
رنا: حاضر انا هخلص عشان اعمله ليك
قاسم: طيب يا حبيبتي
~~~~~
قاعد عمار في المسجد بين الناس بيصلي الجمعة هو وحسن وخالد
بعد ما خلصوا قعدوا في ركن وكل واحد تفكيره شاغل باله
خالد: أستأذن أنا يا شباب
حسن: اتفضل
مشي خالد وخرج من المسجد وفضل عمار وحسن
عمار كان ساند على عمود في المسجد
حسن: مش نقوم نشوف شغلنا وكفاية تفكير
عمار: سيبني شوية وجاي وراك
حسن: ماشي يا عمار
مشي حسن وفضل عمار بص جنبه وأخد المصحف وبدأ يقرأ سورة الكهف
عند سيليا...
كانت عمالة تلف في الجناح ومش عارفة تطلع إزاي طلعت البلكونة وبصت تحت ورجعت دخلت، أخدت ملاية السرير وملاية تانية لقتها في الدولاب وربطتهم في بعض وطلعت البلكونة وربطتهم في العمود كويس وبدأت تطلع من الناحية التانية براحة وهي هتموت من الخوف لأن البلكونة كانت عالية شوية بدأت تنزل وضحكت بهدوء فجأة
سيليا: عشان تفكر تمنعني تاني يا سامر الكلب
نزلت رجليها على الأرض ولقت حارس واقف مشيت براحة وخرجت من باب الفيلا الخلفي
وأول تاكسي لقتة وقفته وركبت
~~~~~
خرجت أمل من أوضتها وهي بتجري
أمل: ماما أنا نازلة أشوف عمار
نادية: انتي اتجننتي
أمل: ماما أنا هشوفه يعني هشوفه أنا بقالي أكتر من أسبوع مشوفتش وشه
نادية: ربنا يستر ومتهببيش مصيبة
أمل: لا متقلقيش
طلعت أمل قفلت الباب ونزلت
~~~~~
خرج عمار من المسجد ومشي عدى من قدام ورشة منصور اللي قاعد وبيبصله وفي إيده الشيشة
معملش عمار اعتبار لنظراته وكمل طريقه لحد ما وصل الورشة وشاف مشمش من برا
عمار: ازيك يا مشمش
مشمش: أهلا يا عمار باشا حمد الله على السلامة
عمار: الله يسلمك.. أخبار الشغل إيه
مشمش: والله جلال وخالد بيه مقصروش بس الشغل مالوش طعم من غيرك يا باشا
عمار: ماشي يا مشمش عن ازنك
مشمش: اتفضل يا بيه
مشي عمار ودخل عمارتهم وطلع سلمتين وسمع صوت وراه
~~~~~
كانوا نازلين نيللي ومنى على سلم الفيلا
نيللي: متتصوريش أوضتي كانت وحشاني ازاي يا دادة
منى: يبقا خلاص تسيبي الشقة اللي قاعدة فيها وترجعي تقعدي معايا وتونسيني
نيللي: تاني يا دادة احنا مش اتكلمنا في الموضوع دا
منى: عايزة أريحك يا حبيبتي
نيللي: أنا كدا مرتاحة والله
رن فون نيللي وبصت لمنى
منى: أنا هنزل وانتي ردي عليه
هزت راسها نيللي ونزلت منى
ردت نيللي على حسن وقعدت على السلم
حسن: كل ده عشان تردي
نيللي: أول ما شفت الفون رديت
حسن: انتي فين
نيللي: بتسأل ليه
حسن: هو انتي خايفة تكملي معايا يا نيللي ولا يكون انتي كمان في حد في حياتك زي صاحبتك وبتخبي
نيللي: انت بتتكلم عن إيه
حسن: سيليا طلعت مخطوبة هي مش صحبتك ونتي عارفه ولا مخبية عنك انتي كمان
نيللي: أنا مسمحلكش تتكلم عن سيليا بالأسلوب دا وهي مش مخطوبة هو اللي بيطاردها ومتنساش إن انت اللي أصريت إنك تبقى في حياتي
حسن كان هيرد عليها لقها قفلت في وشه
نزلت نيللي من على السلم
نيللي: دادة أنا همشي
منى: ما تفضلي يا نيللي شوية
نيللي: هجيلك تاني يا حبيبتي بس لازم أمشي دلوقتي
منى: طيب خدي بالك من نفسك
نيللي: حاضر محتاجة حاجة
منى: لا يا حبيبتي سلامتك
سلمت عليها نيللي وبعدت عنها ودخل كمال من باب الفيلا
كمال: أنا لو كنت أعرف إنك موجودة هنا كنت جيت من زمان
منى: عن إذنكم
سابتهم منى لوحدهم
نيللي: مبقاش تتعب نفسك وتسيب شغلك أهم حاجة عندك
كمال: طيب إيه تيم.. مستني مني أرد عليه أنا سايبك تدلعي كتير بس كفاية لحد كدا
نيللي: ما تنسى إن عندك بنت اعتبرني مت مع ماما
كمال: طيب وليه الكلام اللي يزعل دا يا حبيبة أبوكي ما انتي موجودة أهو
نيللي: حبيبة أبويا..
كمال: عارف إني مبعرفش أعبر عن مشاعري كأب بس دا ميقولش إني مش بحبك وعشان كده عايز أفرح بيكي وخلينا نرجع أب وبنته
نيللي: ليه بتحاول تمثل إنك خايف عليا بجد أنا عارفة كل حاجة
كمال: وبعدين معاكي يا نيللي ولا كدا عاجبك ولا كدا عاجبك
عايزة ايه
نيللي: سيبني في حالي وأنا هبقى كويسة
مشيت نيللي من قدامه
كمال: قدامك لآخر الشهر عشر أيام تحاولي ترجعي لعقلك وتوافقي برضاكي أحسن ما يكون بالعافية
خرجت نيللي من الفيلا وكرهها بيزيد أكتر لكمال ورن حسن تاني عليها وقفلت في وشه
~~~~~
واقفة سيليا على باب العمارة ساندة عليه بإيديها وهي بتنهج
سيليا: عمار
عمار للحظة نسي كل اللي حصل وبصلها بنظرة قلق من شكلها ونفسها اللي رايح قرب منها بسرعة ومسكها من دراعها
عمار: مالك يا سيليا شكلك كدا ليه.. تعالي اقعدي
قعدها عمار على كرسي موجود جنب السلم ونزل لمستواها وسند على ركبته
عمار: انتي كنتي بتجري
هزت راسها سيليا وهي بتبصله
عمار: عاجبك يعني شكلك دلوقتي بالمنظر دا وازاي تجري قدام الناس دي
ظهرت غيرة في نبرة عمار وسيليا ابتسمت
عمار: وإيه اللي يخليكي تجري
سيليا: أول ما شوفتك داخل العمارة جريت عشان ألحقك
عمار: ناوية تعصبيني منك يعني
سيليا: مش قصدي أنا آسفة
عمار: المهم بقيتي كويسة
سيليا: لا من وقت ما سبت إيدي وأنا مش كويسة
افتكر عمار اللي حصل وبعد عنها واداها ضهره
عمار: طالما بقيتي كويسة تقدري تمشي
كان هيطلع عمار قامت سيليا ومسكت إيده
سيليا: اديني فرصة أشرحلك عشان خاطري يا عمار أنا عارفة إني مش ههون عليك
لف ليها عمار
عمار: وانتي استغليتي دا يا سيليا أنا كنت صريح معاكي
في كل حاجة وانتي كدبتي عليا وسألتك وبردو كملتي في كدبك
سيليا: عشان مش عايزك تبعد عني كدبت عشان كده صدقني
عمار: مش قادر أصدق أي حاجة هتقوليها حتى لو كانت بجد
بعد عمار إيديها عنه طلع كام خطوة ووقف على صوتها اللي مليان عياط
سيليا: ما تبقاش قاسي عليا دلوقتي يا عمار انت الحاجة الوحيدة اللي حسيت إنها حنينة عليا أنا عمري ما حد فهمني غيرك ولا عرف يتعامل معايا أنا غلطت لما كدبت عليك بس غصب عني وأنا مش مخطوبة ليه أنا سبته من قبل ما أدخل حياتك والله.. أنا أول مرة في حياتي أخاف حد يبعد عني
نزل وقرب منها
عمار: بطلي عياط
سيليا: لا مش هبطل غير لما تسامحني
الكلمة الأخيرة قالتها وهي بتقع رجليها خانتها عمار لحقها قبل ما تقع على الأرض سندها وقعدها على أول سلمة
نزلت أمل على السلم وأول ما شافتهم رجعت وقفت تبص عليهم
عمار: آخر مرة اشوفك تعيطي بسببي
رفعت وشها ليه وعينيها مليانة دموع: انا اسفه
وقربت منه حضنتها جامد وعمار طبطب علي ضهرها
عمار وهو بيهمس: خلاص بقا خلاص يا سيليا انا هنا معاكي
من فوق على السلم كانت أمل واقفة وبتتفرج عليهم إيديها بتترعش وعينيها مليانة دموع وصدمة من اللي شايفه قدام
عينيها
بعد عنها عمار وبصلها: بقيتي كويسه دلوقتي
هزت راسها سيليا باه
بص عمار بضيق علي لبسها: احنا مش قولنا إيه عن طريقة لبسك دي
سيليا وهي بتبص على هدومها: والله ما كنت عارفة أفكر في أي حاجة جيت مستعجلة
عمار: طيب قومي معايا نطلع
امل طلعت قبل ما حد يشوفها بسرعة.. قام عمار ووقف سيليا وطلعوا علي السلم أول ما وصلوا ساب إيديها عمار بس رنا لمحتهم وابتسمت وقربت عليهم
رنا: سيليا موجودة هنا لو كنت أعرف كنت فرشت الأرض ورد، بس أعمل إيه في حماتك عاندت معايا أنضف الشقة النهاردة
ابتسمت سيليا وبص عمار على رنا وضيق عينه
رنا: قصدي هدهد.. تعالي اقعدي في البلكونة على ما أرتب الشقة شوية
سيليا: أوك
دخل عمار أوضته يغير هدومه وسيليا طلعت البلكونة مع رنا
رنا: نيللي عاملة إيه
سيليا: الحمدلله كويسة
رنا: زعلانة منك على فكرة متسأليش عني كل الفترة دي ولا ترفعي عليا سماعة التليفون
سيليا: وأنا مقدرش على زعلك يا رينو
رنا: يا قلب رينو انتي والله كنت دايماً أتمناكي تبقي مرات أخويا.
اتكسفت سيليا
رنا: متتكسفيش احنا بنات زي بعض بس قوليلي ازاي حركتي قلبه دا كان مفيش أمل فيه
سيليا: اسكتي يا رنا عمار دا صعب خالص
عمار: صعب خالص وإيه كمان يا سيليا هانم
سيليا: وقمر يا عموري
رنا: يا حلاوة عموري أنا
سيليا: عرفي السيدة زينب كلها بصوتك دا
رنا: عيب عليكي يا عمور سرك في بير يا راجل
عمار: أنا نازل خلي بالك من البت
رنا: دي في عنيا
طلع عمار من الشقة
رنا: لا أنا عندي فضول أسمع هعملك حاجة تشربيها وهجيلك على طول
سيليا: اتفقنا
راحت رنا المطبخ ورن فون سيليا ردت عليه
نيللي: سيليا انتي فين ومبترديش ليه
سيليا: في إيه يا نيللي متعصبة كدا ليه
نيللي: ازاي يحصل معاكي كدا ومتحكيليش
سيليا: كنت هحكيلك لما أرجع
نيللي: انتي عنده كمان
سيليا: أيوا
نيللي: سيليا انتي مفيش عندك كرامة ولا إيه
سيليا: اهدي دلوقتي ولما أرجع هفهمك كل حاجة
نيللي: طيب مستنياكي.. باي
سيليا: باي
قفلت سيليا الفون ودخلت رنا بصينية عليها فنجان قهوة
رنا: قهوة هدى مش هتخليكي تحبي تشربي قهوة غيرها
سيليا: باين على شكلها أوي
رنا: دوقيها الأول ويلا احكيلي
هدى: وأنا أقول البيت نور ليه
رنا: وأنا قصرت في نوره يعني
هدى: اسكتي خالص يا بت
سيليا: وحشتيني يا هدهد
هدى: وانتي كمان يا حبيبتي.. اشربي قهوتك يا سيليا
سيليا: تسلم ايدك يا هدهد
~~~~~
قاعد سامر في الريسبشن بمنتهى الروقان لابس السماعة وبيسمع مزيكا
نزل شاهين ومرام على السلم وقربوا منه
شاهين: انت بجد حبست سيليا في الجناح
بصله سامر ببرود: اه
مرام: شو مفكر حالك انت لتعمل هيك شو هالبرود يلي انت فيه
وقف سامر قصادهم: بنتكم اتجننت
مرام بتقاطعه: المجنون واقف قدامنا.. وينو المفتاح
سامر: فهمها ان اللي عايزة تعمله مش صح
شاهين: انت شايف اللي عملته صح
سامر بتمثيل الخوف على سيليا: افهمني يا أنكل انا فاهم ومقدر عصبيتها مني بس انا بعمل كل دا ليه مش عشانها وعشان علاقتنا انا وسيليا مكناش مجرد اتنين بيحبوا بعض لا احنا كنا كل حاجة لبعض
سكت شاهين: ماشي يا سامر بس أكيد مش هفضل قاعد وبنتي محبوسة فوق
سامر: انا هفتحلها الباب
مرام: قلتلك وينو المفتاح عطيني ياه
طلع سامر المفتاح ومرام خطفته من إيده وطلعت لفوق بسرعة
فوق في الطابق التاني...
مرام عم تدور بكل الجناح على سيليا ومالها موجودة طلعت على البلكونة لقت الملايات مربوطة ببعض
نزلت وهي بتنادي وصوتها مهزوز ومرعوبة:
مرام: شاهييين تعا شوف بسرعة سيليا مو موجودة بالجناح
طلع شاهين وسامر لفوق
شاهين: يعني ايه مش موجودة يا مرام
مرام وإيديها بترجف: ما بعرف دخلت الجناح لقيت الملايات مربوطة بالبرندا البنت منزلة حالها لتحت
سامر: هربت أكيد راحتله
شاهين بحدة: انا بنتي لو مش بخير مش هيجرالك كويس انت فاهم
نزل سامر على السلم وهو بيجري وخرج من الفيلا
وبعد ما سامر مشي
بص شاهين لمرام لقاها واقفة بتلف حوالين نفسها وبترن علي لسيليا وفونها مقفول ووشها أصفر من القلق
مرام بقلق: شاهين أنا قلبي مو متطمن سيليا عنيدة بس بحياتها ما خاطرت بحالها هيك أكيد هالواطي خوفها من شي
شاهين: اهدي يا مرام هنلاقيها
مرام: هي عملت هيك بسببه الله يخليك خليه يطلع من البيت ويحل عنا بقى لحتى ترجع بنتنا هي ما رح ترجع وهو هون
شاهين: اهدي لو سمحتي
طلع إلياس: هو في ايه
مرام قربت منه ومسكت إيده لتتطمن: إيلي حبيبي انت ليش رجعت مو كنت مع رفقاتك
إلياس: زهقت وقولت أرجع ايه اللي بيحصل...
مرام بتوتر: ما في شي حبيبي أختك مو هون بس شوي وبترجع
إلياس: طيب
سابهم إلياس ومشي تجاه جناحه بس وقف ودخل جناح سيليا
~~~~~
أخد الشاي عمار من مشمش وشرب منه شوية وكشر: ايه دا يا مشمش هو في شاي كدا عامله تقيل ليه يا راجل
مشمش: لا مؤاخذة يا عمار باشا دلوقتي هعملك أحسن كوباية شاي تشربها
عمار: سيبك من الشاي انت ايه اللي شاغل بالك ومخليك مش مركز بتحب ولا ايه يا مشمش
ضحك مشمش: أحب ايه بس يا باشا هي مين اللي هتبصلي
عمار: ليه ياض ما انت زي الفل اهو
مشمش: ربنا يكرم أصلك
عمار: في حاجة شغلاك أو في مشكلة معاك مش عارف تحلها
مشمش: موضوع صبحي مش بينيمني يا باشا
عمار: تاني هنتكلم في الموضوع دا احنا مش خلصنا منه
مشمش: مش عارف أطلعه من دماغي
عمار: شكوك كلها طلعت غلط وقولتلي رجع يتعامل طبيعي ايه يخليك مش عارف تبطل تفكير
مشمش: هو دا اللي بالظبط هيجنني
عمار: يا مشمش متفكرش كتير عشان متجننش بجد انا عارف انك بتجري على لقمة عيشك وصبحي زيك نعرفه من زمان مشوفتش منه أي حاجة.. عشان خاطر شغلك شيل كل الأفكار دي دماغك ك
مشمش: حاضر يا عمار باشا
عمار: استنى متزعلش بس انا بفكر لمصلحتك
مشمش: انا عارف والله عن اذنك
عمار بهزار: مش هتعملي شاي غير الشاي دا انا مش قادر أشرب منه تاني
ابتسم مشمش: حاضر يا باشا عنيا
أخد كوباية الشاي مشمش ودخل الورشة ورفع عمار عيونه وشاف سيليا واقفة ومعاها رنا وعيون سيليا كانت بتبتسم لوحدها من فرحتها بشخصية عمار اللي بتبهرها طول الوقت
ابتسملها عمار وشاور بعيونه تدخل هزت راسها سيليا ودخلت هي ورنا
قرب حسن من عمار: هي البنت دي بتعمل ايه عندكم في الشقة
عمار: في ايه يا حسن بتتكلم كدا ليه
حسن: انت لسه بتسأل هي مش طلعت مخطوبة حصل ايه دلوقتي
عمار: كان في سوء تفاهم واتحل
حسن: سوء تفاهم واتحل آه طيب بالنسبة ليا انا مش راضية ترد عليا ولا تعبرني
عمار: طيب وانا المفروض أعمل ايه ما تحاول تكلمها تاني
حسن: ما انا هببت اتخانقت معاها وهي شكلها طلعت عنيدة جامد ولا راضية تعبر أهلي
عمار: وانت هببت ايه
حسن: اتخانقت معاها عشان سيليا
عمار: انت مجنون
حسن: انا عارف ايه الجديد
عمار: دي حاجة انت مالكش دعوة بيها تتخانق معاها بتاع ايه هي دخلها بالموضوع ايه
حسن: كنت مدايق ومنفعل معرفتش بقول ايه
عمار: هتكلم مع سيليا واشوف الموضوع دا
حسن: وانت امتى قابلتها وفهمتك سوء التفاهم وبالسرعة دي رضيت عنها يا ابن قاسم ولا شكلك وقعت جامد ومش قادر على بعدها عنك
عمار: بيتقالي انا الكلام دا امال انت يتقالك ايه
حسن: انا يتقالي اني أتجوزها لأني بجد خلاص فاض بيا
عمار: طيب شد حيلك الأول وصلح اللي هببته وبعدين فكر في الموضوع دا
حسن: ربنا يهديها عليا يارب
عمار: يارب يا خويا
~~~~~~
فتحت نادية الباب ودخلت أوضة أمل اللي كانت قاعدة جنب السرير ودموعها نازلة
نادية: في ايه يا بت يا أمل من أول ما رجعتي ودخلتي أوضتك.. ايه دا انتي بتعيطي ليه
مردتش أمل نزلت نادية لمستواها وقعدت جنبها: ردي عليا بتعيطي ليه
بصتلها أمل: طلع بيحبها هي ومبيحبنيش انا
نادية: انتي بتتكلمي عن عمار
أمل: هيكون مين غيره
نادية: هي مين دي اللي يحبها
أمل بوجع: انا لسه شايفاهم مع بعض بعيني دي وهو واخدها في حضنه والحب باين في عينيه ليها قولتيلي مستحيل يحبها أهو حبها وأكيد دلوقتي هيتجوزها وانا هفضل كدا
نادية: يحبها آه بس يتجوزها دي مستحيل تحصل
أمل: بلاش تقوليلي مستحيل دي تاني
نادية: يا بت بطلي عبط وقومي امسحي دموعك دي.
أمل: انتي عمرك ما هتحسي باللي قلبي حاسس بيه
قامت نادية وسكتت شوية وبصتلها بحسرة وطلعت من الأوضة
~~~~~
عند سيليا وعمار..
وصلت سيليا بالعربية مع عمار بعيد عن العمارة بشوية
سيليا: هنشوف بعض تاني إمتى
عمار: إحنا لحقنا بالسرعة دي طيب نشتاق شوية لبعض الاول
سيليا: اتكلم عن نفسك يا عموري أنا معنديش أي مانع أفضل معاك
ابتسم عمار: ماشي يا سيليتي
سيليا: لا بلاش الدلع دا
عمار: اشمعنا
سيليا: أصل هو بيناديني بيه
عمار اتنرفز: هو إيه بقى تاني بتناديني بيه إحنا مش خلصنا منه ولا هو لسه موجود
سيليا بسرعة: قصدي كان بيناديني بيه يعني
عمار: اممم.. والله
سيليا: اهدى بس ومتتعصبش
عمار: ما أنا هادي أهو.. أنا بفكر أغير اسمك خالص أحسن
سكتت سيليا وضحكت بصلها عمار
عمار: بتضحكي كمان
بصتله سيليا بابتسامة أول ما بصت قدامها رجعت بصت لعمار بسرعة وشدته من ياقة التيشيرت لتحت
اتصدم عمار شوية وفضل يبصلها وهو قريب منها وهي
بتبص قدامها بتوتر وبتبلع ريقها وشفايفها بتترعش وعمار مركز معاها
انتبهت سيليا إنه مركز معاها بصتله
فضل عمار موطي راسه جنبها ونفسه قريب منها وقال: على فكرا الحركة اللي عملتيها دي لو حد غيرك عملها كنت هزعله بس منك انتي مقبولة
سيليا ضربته في كتفه بخفة وهي لسه ماسكة ياقته وقالت بهمس متوتر: بطل هزار بقى يا عمار أنا مرعوبة سامر واقف هناك عند أول الشارع، لو شافنا هيعمل مصيبة
عمار وبص قدامه بسرعة من غير ما يرفع راسه: هو فين
سيليا: لسه واقف قدام العمارة استنى لما يمشي
عمار: اوعي أنا هنزله
سيليا شدته ليها أكتر وبصتله في عيونه وهي ماسكة رقبته بإيديها: عشان خاطري يا عمار مش عايزة مشاكل عارفة إنك تقدر عليه بس أنا خايفة عليك
عمار: انتي كدا بتخليني مش راجل
سيليا بدلع: يا حبيبي راجل وسيد الرجالة كمان كفاية إني شايفاك كدا
عمار: مش معقول تكوني اتعلمتي راجل وسيد الرجالة في أمريكا
ضحكت سيليا: لا دي رنا
عمار: بلاش تقعدي معاها نهائي
سيليا وهي لسه بتضحك: ماشي
عمار: هشوفه موجود ولا مشي
رفع راسه عمار وشاف شاهين وإلياس واقفين مع سامر
طلعت سيليا وشها لفوق: إيلي حبيبي وحشني حاسة بقالي كتير مشوفتوش
رفع عمار حاجبه: إحنا مش خلصنا من سامر مين إيلي دا كمان
سيليا: هو وقت غيرتك دلوقتي
شدها عمار من إيديها: وقته ونص انتي عارفة أنا مبحبش أسلوبك في الكلام لما تتكلمي عن شاب كدا
سيليا: ده أخويا يا عمار
عمار: ما تقولي كدا من الأول لازم نتعصب ونزعق
سيليا: هو انت اديتني فرصة
عمار: والتاني دا ابوسك
سيليا: ايوا بابا انت أول مرة تشوفهم
عمار: ومش آخر مرة هنشوف بعض كتير ان شاء الله
ركب سامر عربيته ومشي وبعده شاهين وإلياس
طلع عمار وسيليا وقعدوا
عمار: هما كانوا بيعملوا هنا إيه
سيليا: كانوا بيدوروا عليا
عمار: بيدوروا عليكي ليه انتي مش كنتي معاهم من شوية
سيليا: لا هربت
عمار: تهربي من بيتك
سيليا: هقولك حاجة بس متتعصبش
عمار: قولي
سيليا: سامر حبسني لما شافني خارجة من الجناح وجاية لك
ضغط عمار بإيده على الدريكسيون بعصبية: وبتطلبي مني متخانقش معاه طيب أنا هروحله بنفسي
سيليا: عمار
عمار: هو إيه اللي عمار انتي خايفة منه كدا ليه
سيليا: خايفة عليك مش منه أنا بجد مش عايزة أي مشاكل تاني
عمار: لو مخبية عليا أي حاجة احكيلي دلوقتي يا سيليا
سيليا: اللي كنت مخبياه عنك انت عرفته
عمار: متأكدة
سيليا: انت مش مصدقني
عمار: لا مصدقك طبعا أنا بس بحاول أخليكي تفكي شوية الجو بقى دمه تقيل
سيليا: الجو ولا انت
عمار: أنا يا سيليا
سيليا: أيوا
عمار: وانتي إيه جابرك على أبو دم تقيل
سيليا: قدري ونصيبي في الدنيا أعمل إيه
عمار: رنا برضو
هزت راسها سيليا وهي كاتمة ضحكتها
عمار: انتي قعدتك مع رنا بوظتك خالص.. عارفة الحل إيه
سيليا: إيه
عمار: أخلص منكم انتو الاتنين
سيليا: أهم حاجة راحتك يا عمار أنا مش هدايقك تاني.. هو ده اللي عايز تسمعه مني يب لعلمك قاعدين على قلبك زي العسل وبالأصح أنا قاعدة جوا قلبك
ابتسم عمار وقرب باسها من خدها: آسف ملقتش حاجة أقولها غير إني أعمل كدا مبعرفش أقول كلام حلو
سيليا: ما انت هتعرف تقول كلام حلو وهتعرف تهتم بيا وتخرجني وتعمل كل حاجة حلوة يا عموري هتتعلم
عمار: مظنش أنا عارف نفسي كويس
سيليا: أنا نفسك وبقولك هتعرف اسمع كلامي انت وبطل غتاتة
عمار: غتاتة.. لا يا سيليا كفاية عليا لحد كدا النهاردة كفايه صدمات
ضحكت سيليا: انت لسه سمعت حاجة
عمار: كل ده ومسمعتش حاجة على العموم أنا حبي ليكي مش هيغير أي حاجة حتى لو اتغيرتي لو بقيتي سوكة العبيطة في الكلام أنا راضي
سيليا: انت مجبر عليا يا حديدي أصلا
عمار: طيب يا ستي.. متنسيش تكلمي صاحبتك حسن مستنيني أول ما أرجع يشوف عملت إيه
سيليا: متقلقش اعتبر الحوار خلصان يا معلم
ضحك عمار: اتفقنا يا ريس
نزلت سيليا: باي
عمار: باي
~~~~~
مال منصور على هشام اللي قاعد جنبه واتكلم بهمس: هو إيه الحكاية يا واد يا هشام بقالك يومين محترم ولا بتزعق ولا سامع صوتك لا وكمان حددت فرحك من غير ما تناقشني الأول وتشوف ردي
هشام بنفس الهمس: طيب وإيه مدايقك يا حاج مش كدا أحلى وبمناسبة الفرح فالآخر رأيك انت برضو لو حابب تغير موافق
منصور: لا بلاش تأخير عن كدا بقالك ٣ سنين خاطب البنت
هشام: هو ده السبب من استعجالي في قرار الجواز
منصور: بس أنا برضو مش مطمنلك يا هشام حاسس هتعمل مصيبة كدا
ابتسم هشام وسكت
منصور: سكوتك دلوقتي بيقول كتير
هشام: عايزك تطمن على الآخر هتنبسط صدقني
منصور: هنشوف.. بفكر بعد ما نخلص فرحك انت ودنيا نخطب شمس لياسر أهو البنت بنتنا وتفضل معانا وحلوة ياسر أكيد هيوافق
هشام: ياسر مش زيي يا منصور باشا وبلاش تفتح الموضوع دا هيرفض هو معاه اللي مكفيه وزيادة
منصور: يعني إيه يا واد مش فاهم كلامك
غمز هشام لمنصور: مش فاضل كتير وهتفهم كل حاجة.. عن إذنك
قام هشام ودخل أوضته وبص منصور على هاجر والبنات قاعدين حواليها بتتكلم معاهم
~~~~~
في القهوة اللي علي أول الحارة قاعد خالد وياسر
ياسر: إيه يا خالد مالك ساكت ليه
بصله خالد: مدايق شوية
ياسر: إيه مدايقك
خالد: النهاردة في الشركة واحد قل مني جامد وحسيت نفسي قليل وإني مش بشتغل في الشركة لأ خدام
ياسر: وانتي إيه يخليك تسكت ومتردش عليه
خالد: دي ناس عالية أوي يا ياسر أرد على مين دي كان ممكن أترفد فيها
ياسر: والمدير فين
خالد: المدير مقالش أي حاجه الشاب يعرفه كويس فأكيد مش هيجي مع حتة موظف
ياسر: والحق فين الشاب غلطان من كلامك
خالد: حق إيه البني آدمين بقيت بالفلوس
ياسر: خالد انت ناسي عيلتك يا حبيبي دا انتو عيلة الحديدي وما شاء الله الدنيا كويسة معاكم
خالد: أكيد مش أي حد هشوفه هقوله أنا ابن جلال الحديدي
ياسر: انت تسيب الشغل دا تمام
خالد: كنت هعمل كده بس زمايلي منعوني وفعلًا لما أسيبه لو قدمت في شركة تانية هيسألوني سبت الشغل ليه
ياسر: يا عم أنا هشوفلك شغل في الشركة اللي بشتغل فيها ومتشلش هم وأهو نبقى مع بعض انت عارف بتوحشني إزاي ومبعرفش أشوفك.
ابتسم خالد: انت عامل إيه كويس
ياسر: يعني الحمد لله.. هشام هيتجوز
خالد: ده أنا نكدت عليك بمشاكلي وانت دلوقتي لازم تفرح
ياسر: أفرح إيه أنا مش موافق على الجوازة دي من أولها
خالد: ليه بس هي مش بنت عمك كويسة والدنيا تمام
ياسر: العيب مش في بنت عمي العيب في هشام تعرف إني خايف عليها هي خسارة فيه وميستاهلش ضفرها
خالد: للدرجة كويسة
ياسر: جدا والله يا خالد طيبة وحنينة زي أمي بالظبط
خالد: طيب وإيه يجبرها تتجوزه لما هي شايفة عيوبه اللي متتطاقش دي
ياسر: الحب يا سيدي انت مجرب وعارف
ابتسم خالد: طالما قولت حب يبقى هي شايفاه ملاك وبجناحين
ضحك ياسر: مكدبتش هي فعلا شايفاه كدا يلا يمكن ربنا يهديه على إيديها
خالد: آمين يا رب إحنا نكره أخوك هشام ده الحارة كلها بتموت فيه وبتحبه
ضحك أكتر ياسر: وأنا أولهم
ضحك خالد عليه وفضلوا يتكلموا
~~~~~
في بلكونة شقة نيللي واقفة نيللي ومعاها سيليا
نيللي: سيليا قولتلك مش هتكلم معاه تاني اقفلي الموضوع دا لو سمحتي
سيليا: يا نيللي هو مكانش قصده فهم غلط زيه زي عمار.
نيللي: بس أنا غلطت إني اديتله وش من الأول أنا مينفعش أثق في أي راجل كلهم زي بعض في الآخر
سيليا: انتي هتفضلي واخدة حياتك عشان باباكي مبقاش الأب الكويس يا نيللي
اتوجعت نيللي
سيليا بسرعة: والله ما أقصد أنا آسفة يا نيللي عشان خاطري متزعليش
نيللي: عادي أزعل ليه دي الحقيقة
سيليا: بس أكيد عمو كمال مش بيكرهك انتي في الآخر بنته
نيللي: دي الحقيقة اللي مقدرش أغيرها للأسف
طبطبت سيليا على كتفها: عايزاكي تعيشي حياتك متفضليش واخدة الفكرة دي لحياتك كلها
نيللي: أنا مش عايزة أتعلق بيه يا سيليا لمجرد اللي حصل
ما صدقت... أنا هتعب أوي لما حد يقرب مني وفي الآخر يبعد مش هقدر أديله فرصة يعمل كده انتي عارفة إني مفيش في حياتي علاقات قبل كدا
سيليا: أنا متأكدة إن حسن مش هيعمل دا
نيللي: أنا هرد عليه عادي جدا وهطلب منه باحترام يبعد عن حياتي أحسن ليه وليا
سيليا: دا كويس اتكلمي معاه مرة واحدة على الأقل
هزت راسها نيللي: وانتي هتعملي إيه سامر جه يدور عليكي هنا
سيليا: شوفتهم وبابا وإيلي كانوا معاه كمان
نيللي: طيب طمنيهم عليكي مينفعش كدا مامتك قلقانة عليكي
سيليا: هما من إمتى كانوا بيفكروا فيا أصلا دلوقتي عاملين نفسهم بيحبوني عشان هربت مش أكتر
نيللي: سيليا انتي عارفة باباكي ومامتك وإيلي بيحبوكي إزاي متفرطيش في عيلتك غيرك معندوش أي حد
حست سيليا إن نيللي بتتكلم عنها قربت منها حضنتها: أنا كل الناس عندك مش كدا
حضنتها نيللي وابتسمت: أكيد
بعدت سيليا وبصتلها: ممكن أبقى أنا وحسن عادي يعني
نيللي: لا والله
ضحكت سيليا
~~~~~
نزل عمار من العربية وفي نفس الوقت خرج حسن من جوا الورشة وقرب منه
عمار: جاي تطمن عليا بنفسك
حسن: عملت إيه يا عمار
عمار: كل خير
حسن: عمار دي مكلمتنيش لحد دلوقتي
عمار: قولتلها والله ويارب تتنازل وتوافق إنها تكلمك أنا لو مكانها بلاش
مشي حسن: ماشي يا عمار شكرا على رأيك اللي محدش طلبه
عمار: استنى يا حسن بهزر معاك
وقف حسن وبصله: حقك تهزر جاي ورايق ومفيش أي حاجة معكننة عليك
عمار: ده غل ولا حسد
حسن: الاتنين
ضحك عمار: ماشي يا أبو علي ابن أخويا الصغير وهستحملك
حسن: ماشي يا عمو
عمار: اهدى كدا واتقل شويه بلاش الحب اللي هيطفح دا
حسن: هنشوف آخر نصايحك دي
خرج هشام من عمارتهم وشاف عمار واقف مع حسن: إيه الحلاوة دي جاية مظبوطة بالملي
عمار: طيب أنا هطلع أغير هدومي وهنزل
حسن: ماشي
مشي عمار من قدام حسن في طريقه للعمارة
هشام بصوت عالي واصل للحارة كلها: اسمعي يا سيدة يوم الخميس الجاي فرحي وأهلي وناسي كلهم معزومين أنا عارف إنكم مش محتاجين عزومة بس حبيت أعرفكم
مهتمش عمار اللي كان ماشي ووقف حسن وبص لهشام
بص هشام لعمار وهو مستني يشوف ردة فعله على الكلام اللي هيقوله: وعقبال أخويا ياسر على بنت قاسم الحديدي
وقف عمار قبل ما يدخل العمارة وكلام هشام بيتردد في دماغه وبصله وكان هشام بيبتسم بنصر...