رواية المطاريد الفصل السادس عشر16 بقلم رباب حسين

رواية المطاريد بقلم رباب حسين
رواية المطاريد الفصل السادس عشر16 بقلم رباب حسين
أحبك... بعينين تعشق النظر إليك.

أحبك.... بلسانٍ لا يكتفي من الغزل بك.

أحبك... إلى ما بعد الحب.

ففي حبك اشتاقك رُغماََ عن قلبي. وأهيم بك رُغمًا عن عقلي.

سأظل أحبك حتى تمل مني... وإن مللت أخبرني كي أحبك من جديد.

كان عشقهما يتجدد كل ليلة رغم المسافات، والآن لم يعد هناك ما يمنع هذا القلب من النبض، حتى وإن كان الخوف لا يزال يتملك من قلبها فألم الابتعاد عنه وهو أمام عينيها لا يحتمل.

كانت بين ذراعيه يتأمل وجهها الجميل، بالماضي، كان يلعن حسنها الذي خطف قلبه منه ولم يعد ملكه، والآن يتأمل وجهها الذي إزداد جمالًا، ويبتسم في راحة تخللت قلبه.

تململت بين ذراعيه حتى فتحت عينيها ووجدته ينظر إليها، فقال : صباح الخير يا حبيبتي.

رهف : صباح النور.

كادت تنهض ولكنه منعها، فابتسمت وقالت : مش هتروح الشغل طيب؟!

يحيى : هو حد باصصلي في الجوازة دي! أنا عريس يا جدعان.

رهف : إحنا الاتنين بنشتغل شغل مفيش فيه أجازة، لا المجرمين هيخلصوا ولا العيانين بيقلوا.

يحيى : بس أنا فرحان إنك حققتي حلمك، يمكن كنت زعلان إني ماعرفتش ابقى دكتور زي ما كنت بحلم؛ بس لما أنتي بقيتي دكتورة حاسس إنك حققتي حلمنا سوا.

رهف : بس وظيفتك مش أقل أهمية خالص، كفاية إنك بتحمي الناس دي كلها وبتدعيلك إنك مأمنهم في بيوتهم.

يحيى : وبمناسبة الناس؛ أنا قابلت راجل هنا كبير في البلد يعني وهياخد اﻷرض، بس هياخدها زي رهن، مجرد ما أرجع الفلوس هيديني الأرض تاني. حتى هنكتب عقد سوري كده ضمان للحقوق بس.

رهف : بجد! طيب دي حاجة كويسة أوي، كنت زعلانة إن عمي مضطر يبيع أرضه بسببي.

يحيى : هو مش مضايق على فكرة، أنا كلمته بليل لما رجعت. هو زعلان عليكي أكتر، شايل ذنبك كمان عشان عمار اللي عمل فيكي كده، ده غير زعله على عماروعلى حال العيلة، بس لما حاج وهدان قالي على موضوع الأرض ده حسيت إن كل حاجة هتتحل، أصل ربنا ما بيرضاش بالظلم، وإنت اتظلمتي زمان وأنا دفعت تمن بعدنا معاكي، ومش بعد ما بقيتي في حضني هياخدك مني تاني. أنا واثق إن كل حاجة هتتحل.

رهف : يارب يا يحيى، نفسي ابقى جنبك وأنا مش قلقانة عليك، نفسي ارتاح من الوجع ده.

يحيى : هترتاحي يا قلبي.
ضمها إليه وأغمضت عينيها بين أحضانه، شعور الأمان يتجدد في كل لحظة يقترب منها، وهذا كل ما كانت تحتاج إليه.

بعد وقت، كان الجميع مجتمعين على طاولة الطعام، لاحظوا أن يحيى ورهف ينظران إلى بعضهما بسعادة، ويبدو أن الأمور قد استقرت بينهما.

ابتسم عمر عندما رأى ابتسامة رهف ثم قال : عملت إيه يا يحيى امبارح؟

يحيى : خير يا عمي، الأرض هتتباع النهاردة، والبيت فيه حد هنتكلم معاه كمان عليه، يعني بإذن الله الفلوس هتبقى جاهزة في المعاد بكرة.

حازم : إن شاء الله ناخد نسخة الفيديو وننسى الهم ده كله. وترجع ضحكتك تنور وشك يا رهف.

ابتسم يحيى وهو ينظر إليها وقال : هتنور إن شاء الله.

غادر يحيى المنزل، وذهب إلى وهدان ووقع العقد معه، ثم حضر سويلم واتفق على شراء المنزل. ولم ينتظر يحيى أكثر، بل وقع على عقد ابتدائي وأخذ جزء من المبلغ. واتفق مع سويلم أن يتمم البيع غدًا. ثم ذهب يحيى إلى قسم الشرطة ليباشر عمله.

أما رهف، فكانت تودع حازم وهبة وسليم ورهف الصغيرة، فلم يستطع حازم أن يتغيب أكثر عن عمله، أما عمر فقرر أن يبقى مع رهف حتى تنتهي هذه المحنة ويطمئن أن الوضع أصبح مستقرًا بينها وبين يحيى.

حازم : أنا برده هحاول أخد أجازة وأجيلك يا رهف.

رهف : أنا مالحقتش أشبع منكم. ولا من الصغنين دول.

هبة : إن شاء الله تخلصوا المواضيع اللي عندكم دي وتيجوا تقعدوا في إسكندرية معانا كام يوم، حتى يبقى شهر عسل.

رهف : ياريت، البحر وحشني أوي بجد.

حازم : خلاص يبقى هنستناكم، ولو حصل أي حاجة كلميني فورًا. بابا مش هوصيك.

عمر : ما تقلقش يا حازم، لو إحتاجتك هكلمك أكيد.

غادر حازم وأسرته، ورهف تنظر إليهم بحزن، اقترب منها عمر وضمها إليه ثم قال : خليني بقى أشبع منك أنا كمان قبل ما أمشي.

ابتسمت إليه وجلسا معًا بالبهو. أما عمار، فكان يتحدث مع رماح بخصوص ما طلبه من يحيى، فقال رماح : يعني التسجيل ديه معاك؟!

عمار : أيوة معايا.

رماح : ديه كنز، عايز تديه ليحيى؟!

عمار : اه، عشان أخد فلوسي ونهرب برا البلد دي. مش هفضل أنا طول حياتي عايش في الجبل، ولا أنت عاجبك العيشة هنا! خلينا نخرج برا ونرتاح من الخوف اللي عشش في قلوبنا من سنين.

رماح : والرجالة! عنعمل فيهم إيه؟!

عمار : هناخد كام واحد منهم، والباقيين هنبعتهم عند الريس مجاهد. يبقوا من رجالته، بس خليني أشوف الراجل اللي بيضرب جوازات السفر ده هيعرف يعملنا كام جواز وهيتكلف كام، وعلى حسب الفلوس نظبط أمورنا.

رماح : مع إني مش عايز أسيب المطاريد، بس معاك حج، عايزين نشوف الدنيا.

عمار : ما تقلقش، برده هاخد بطاري قبل ما أمشي، مش أنا اللي أسيب حقي عشان شوية فلوس.

رماح : لو ناوي تعمل حاجة يبجى عاجي معاك بكرة.

عمار : لأ، مش عايز يحيى يشك فيا، عشان يسلمني الفلوس وهو مطمن، ﻷني كمان هخليه يطلع الجبل لوحده. هاخد معايا عزت بس عشان يحمي ضهري.

رماح : على خير، ترجع بكرة ومعاك الفلوس، خلينا نعيش عاد.

ابتسم عمار وفي عينيه نظرة تحمل المكر والغدر.
حل الليل، وعاد يحيى إلى المنزل، وحين دخل اقتربت منه رهف على الفور فأمسك يدها وقال : إنتي ما روحتيش الوحدة النهاردة ولا إيه؟!

رهف بحزن : ﻷ رحت، بس خلصت بدري ورجعت سلمت على حازم.

يحيى : إيه ده! هما مشيوا؟!

عمر : اه، حازم مش عارف ياخد أجازة عشان ضغط الشغل.

يحيى : وإنتي زعلانة عشان كده! ماتزعليش، في أقرب وقت نروحلهم.

أمل : نروح بقى كلنا، أنا إسكندرية وحشتني برده.

يزن : اه بجد. خلاص نظبطها ونروح سوا يا يحيى.

يحيى : إن شاء الله.

اقترب منه يزن وهمس داخل أذنه قائلًا : وإن شاء الله يبقى شهر عسل ليا أنا كمان.

يحيى : فاكر أنا ما تقلقش، أفوق بس كده من حوار عمار ده وهروح أطلبهالك.

يزن : أنا عارف إنك مش فاضي والدنيا ملغبطة معاك، بس أنا خايف الراجل يرجع في كلامه.

يحيى : ما يقدرش يرجع في كلمته معايا، إنت ناسي أخوك مين ولا إيه!

ابتسم يزن وقال : ﻷ طبعًا. ربنا يخليك لينا يا يحيى.

كانت رهف تتابع حديثهما بابتسامة، فنظر إليها يحيى وقال : عشان تبقى الفرحة فرحتين.

رهف : إنت فرحة البيت ده يا حبيبي.

يحيى : الله أكبر، أيوة بقى رهف حبيبتي ترجع تاني.

ابتسمت رهف إليه، هي تحاول أن تتناسى ما يحدث، أو ربما تكتسب وقتًا بجوار يحيى خوفًا من الابتعاد عنه مجددًا، فيكفيها تلك الذكريات التي عاشتها بجواره وبين يديه.
وحين دخلا إلى غرفتهما، كانت تنظر إليه وكأنه كنزٌ ثمين، تخشى أن تفقده، ولكن يحيى كان يحاول في كل لحظة أن يبث إليها شعور الإطمئنان. ولكن لم يغيب شعور القلق عنهما، فغدًا يوم فاصل في حياتهما.

حل الصباح، واستيقظ يحيى باكرًا، كان ينظر في هاتفه منتظرًا اتصال من عمار، حتى صدع الهاتف برقمه، واستيقظت رهف على صوت الهاتف وسمعت يحيى يقول : ألو.

عمار : جهزت الفلوس؟

يحيى : جاهزة. هنتقابل إزاي؟

عمار : تطلع الجبل النهاردة بليل الساعة ٧ لوحدك، تسلم الفلوس تاخد الفيديو.

يحيى : تمام.

عمار : مش هفكرك، أي غدر مش هددك بالفيديو؛ هخلص على رهف خالص.

يحيى بحدة : ما تهددنيش عشان مش هيحصل كويس، خلينا ماشيين على الاتفاق من غير كلام يزعلني عشان مازعلكش.

عمار : الغدر مش طبعي، ده طبعكم إنتوا.

يحيى : ما شفتش واحد قاتل جده بيقول إن الغدر مش طبعه. ما علينا، على معادنا الساعة ٧.

أنهى يحيى المكالمة وعمار ينظر إلى الهاتف بضيق، يتهمه أنه من قتل وهما من بادروا بقتل والده ووالدته!

أما رهف فاقتربت من يحيى وقالت : ماكنش فيه داعي تستفزه يا يحيى، عمار مش مضمون ردود أفعاله.

يحيى : بيهددني، وأنا محدش يهددني.

رهف : بلاش غرور يا يحيى.

يحيى : مش غرور، بس الناس دي لو حست إنك ضعيفة هياكلوكي، وهما كده كده عارفين إني مش بهرج.

رهف : طيب هتقابله النهاردة.

يحيى : اه الساعة ٧ هطلعله الجبل، أنا بس عايز أروح للحاج سويلم عشان أخد تمن البيت منه، خلينا نخلص.

رهف : هو إنت هتطلع لوحدك!

يحيى : هو شارط كده.

رهف : لا أنا أخاف عليك.

يحيى : ما تقلقيش، هرجعلك ومعايا الفيديو.

نظرت إليه بخوف فوضع وجهها بين كفيه وقال : اطمني، طول ما إنتي معايا إياكي تقلقي.

أومأت إليه، فقبل جبهتها ثم بدل ثيابه وغادر المنزل على الفور، ذهب أولًا إلى سويلم، أعطاه صك ملكية المنزل، ووقع على العقد بموجب التوكيل من عزام. أخذ الأموال وتوجه نحو قسم الشرطة ليباشر عمله.

أما رهف فلم تخرج من غرفتها، كانت تشعر بالقلق والخوف، لذا إعتذرت عن عملها اليوم.

كان الصمت يسود في أرجاء المنزل، الكل يجلس مترقبًا لم سيحدث، حتى يزن لم يذهب ليباشر أعمال الزراعة في الأرض، وبعد الظهر حضر خالد وجلس مع عزام وأطلعه على كل المستجدات. شعر خالد أن هناك خطبٌ ما يحدث داخل المنزل، فكان عزام شاردًا وهو يتحدث معه، وأهل المنزل على غير عادتهم، وحين خرج من غرفة المكتب وجد أمل بالبهو، اقترب منها وحاول أن يطمئن على أحوالهم، فقالت : إدعي بس يا خالد اليوم يعدي على الخير ونخلص من المطاريد.

خالد : هو يحيى بيخطط لحاجة ولا إيه؟!

أمل : هتعرفوا كلكم لما يحيى يقول.

تنهد خالد بقلق، فيحيى بمثابة أخ له، ودعا الله أن يحافظ على سلامته ثم غادر المنزل. ولكن عقله كان يفكر بيحيى، فلم يستطع أن يجلس ساكنًا، وقبل حلول الليل، ذهب خالد إلى قسم الشرطة، ولكن توقف عندما وجد حركة غير إعتيادية، ظن أن يحيى يستعد لمهاجمة الجبل، لذا وقف من بعيد يراقب بحذر.

وقبل الموعد، رأى يحيى يخرج وحده من قسم الشرطة ومعه حقيبة في يده، تعجب أنه لم يأخذ معه أحد من القسم، لذا راقبه من بعيد، وحين وجده يتجه نحو الجبل تخفى جيدًا حتى لا يراه أحد.

وصل يحيى إلى الجبل وصعده وخالد يتخفى بالظلام. حتى رأى يحيى يقف أمام عمار وبجواره عزت، شعر بالقلق على يحيى وتأهب ﻷى شيء ممكن أن يحدث.

ألقى يحيى الحقيبة أمام عمار وقال : فلوسك أهي. هات الحاجة اللي معاك.

عمار : مستعجل ليه كده! مش يمكن دي آخر مرة تشوفني فيها.

يحيى : ياريت.

عمار : من ورا قلبك. إياك تكون فاكر إني نسيت لما حامتني من رصاص العساكر آخر مرة ووقفت الضرب عشاني!

يحيى : لأ مش ناسي، أنا مش ناسي أي حاجة عملتها علشانك، ولا ناسي كام مرة مديتلك إيدي بالخير وقابلتها بالشر.

عمار : أنا عمري ما مديت إيدي ليك بالشر، أنا كنت دايمًا رد فعل للي إنتوا بتعملوه، خدت مني حبيبتي، خدتوا أرضي وورثي، أبوك خلى جدك يقتل أبويا عشان الورث. إنتوا اللي بدأتوا مش أنا.

يحيى : حبيبتك هي اللي اختارتني وأظن إنك كنت شاهد على كل حاجة حصلت. بجد إنت صعبان عليا أوي يا عمار، عايش في وهم ومصدقه، وللأسف مهما قلت عمرك ما هتصدق. بس أنا عشان عارف إنك مش هتديني فرصة اتكلم؛ سبتلك هدية في الشنطة دي، ورق يفتح عينك على الحقيقة، يمكن تلحق حاجة من اللي بتروح منك.

اقترب عمار من الحقيبة كي يفتحها فصاح يحيى : الحاجة الأول.

مد عمار يده في جيبه وقذف شريحة الذاكرة نحو يحيى، أمسك يحيى بالشريحة وقبض عليها بقوة، ثم بدأ عمار يفتح الحقيبة تحت نظرات عزت التي امتلأت توترًا وخوفًا، فصاح : إبعد يا عمار، لا يكون فيها جنبلة.

ابتعد عمار ورفع سلاحه بوجه يحيى فقال : أنا قولتلك مش طبعي الغدر، نزل سلاحك. ولو عايزني أفتح الشنطة بنفسي أفتحها.

عزت : عشان تاخد اللي فيها وتهورب إياك!

عمار : مفيش فايدة فيكم يا عيلة التهامية، هتفضلوا طول عمركم غدارين.

شد على ذراعه وصوب السلاح نحو رأس يحيى، كاد أن يضغط عليه، ويحيى ينظر حوله بتوتر، ارتعشت يد عمار وهو يصوب نحوه وينظر في عينيه.

أما خالد الذي يتابع ما يحدث بتأهب، كاد يقترب من يحيى ولكن شعر بحركة من حوله بالظلام، ثم تفاجأ بالعساكر يصعدون الجبل سريعًا ومعهم أحمد. وما هي إلا لحظات حتى اخترقت يد عمار رصاصة من بعيد، صرخ عمار متألمًا، وصدع صوت الرصاصة بالجبل، حتى وصلت إلى رماح، الذي صاح قائلًا : روحوا شوفوا اللي بيحصل يا رجالة.

اقترب عزت من عمار وحاول أن يأخذ السلاح منه كي يقتل يحيى بنفسه، ولكن هجم عليه خالد من الخلف وأسقط السلاح من يده، نظر يحيى إلى خالد بصدمة، ثم ظهر بعض العساكر وهم يصوبون نحو عمار وعزت، نظر عمار إلى يحيى بغضب، حاول أن يهرب ولكن وجد العساكر تصوب عليه، اقترب يحيى منه ووضع منديلًا على كف يده، ثم اقترب أحمد من عزت وألقى القبض عليه.
نظر يحيى إلى خالد وقال : إنت بتعمل إيه هنا؟!

خالد : لقيتك طالع الجبل لوحدك خفت عليك.

ربت يحيى على عاتقه وهو يبتسم إليه، ثم قال : إنت فاكر إني هطلع الجبل لوحدي!

ثم اقترب العساكر من عمار وألقوا القبض عليه وهو يصيح بوجه بغضب يحيى : هقتلك يا يحيى، هخلص عليك بإيدي، وإفتكر كلامي ده كويس.

ثم نزلوا من الجبل على الفور حتى لا يحدث إشتباك بين المطاريد والعساكر. وقبل أن يضعوا عمار بسيارة الشرطة، صاح يحيى باسمه وقال : استنوا.

فتح الشنطة أمامه وقال : الفلوس أهي، عشان تعرف إني ماغدرتش بيك، لكن الأهم من الفلوس هو الورق ده، خده وأقراه وإنت في طريقك للقسم. صدقني هتفهم كل حاجة بعد ما تقراه.

أعطى له نتيجة تحليل النسب، والخطاب الذي تركه جده. ثم أمر باصطحابهم إلى قسم الشرطة. نظر عمار إليه متعجبًا، عن أي ورق يتحدث، وما هو السر الذي سيغير تفكيره!

اقترب أحمد منه وقال : خطة تتدرس يا يحيى، فكرة أن العساكر يفضلوا في الجبل من قبل المعاد كانت تحفة.

يحيى : كنت واثق إن عمار هيطلب نتقابل بليل، عشان كده فكرت في الخطة دي. بس خالد عمل دوره من غير ما حد يطلبه.

خالد : إنت أخويا يا يحيى، وأبويا عزام هو اللي مربيني ومتكفل بياي، روحي فداك بس تفضل موجود في البلد.

يحيى : وإنت واحد مننا وطول عمرك عارف ده. روح بقى أنت وطمنهم في البيت وأنا هطلع على القسم.

أومأ إليه خالد وذهب يحيى مع أحمد والعساكر إلى قسم الشرطة
تعليقات



<>