
رواية المطاريد الفصل الثاني عشر12 بقلم رباب حسين
أصابني العشق، إحتل قلبي وكياني دون سابق إنذار، كنت أراقبها من بعيد، أشاهد ضحكتها وروحها التي تزدهر بالأرجاء، تنشر بهجتها بين حقول قلبي الذي عرف معنى النبض حين رأها.
وفي لحظة واحده انهار كل شيء، أظلم قلبي نظرتها له.. اختارت أقرب شخص لدي ورمقته بالنظرة التي كنت اتمناها، لم تكن خيانة لقلبي فقط؛ بل سرقة يحيى مني. أخي ورفيقي بالحياة تحول إلى غريمي بسببها.
وكان هذا أول ما فرق بيننا وشعل الغيرة والحقد في قلبي تجاهه، حتى اكتشفت أن عمي عزام، قد استطاع أن يملأ قلب جدي بالحقد وجعله يقتل ابنه بيديه، كل هذا بسبب الميراث، جعل الأب يقتل ابنه ليسرق الأرض والمال. حُرمت من كل شيء ولم أجد سوى نيران الغضب والثأر تنهش بقلبي كل ليلة، ولم يخمدها سوى تلك الرصاصة التي استقرت في قلب جدي، ومن بعدها انتهى كل شيء. لم أعد عمار الذي عاهدته، وأصبحت مجرم مطارد يتخفى بين الصخور والرمال، وكل ما أرغب به أن أستعيد حقي الذي سرقه عزام ويحيى.
كل هذا كان يمكن تحمله، أما أنتي، يا من تركتي عشقي وقلبي، فعودتك أمامي الآن أقسى من الصخر.
تزوجها! لم اتخيل يومًا أن تعود بعد كل هذه السنوات، تطل عليا من نافذة منزل يحيى، والآن هي زوجته، حظى بها، سرقها ككل شيء سرقه مني؛ مالي، أرضي، بيتي. كل شيء. وهذه المرة لن أقف مكتوف الأيدي، أشاهد ما يحدث وأتركه يتنعم بجوارها وأنا أنام محتضنًا حطام حياتي باكيًا.
حين عاد رماح إلى الجبل بصحبة المطاريد مرة أخرى، وجد عمار يجلس شاردًا، ينظر إلى السماء وكأنه يتحدث بغضب قلبه مع النجوم. اقترب منه وقال : فهمني عاد يا ولدي، ليه زعلان إكديه؟ المفروض تفرح إن جدرنا نخرج الجالة من الجسم.
عمار : مين قال إني مش فرحان إن الخطة نجحت.
رماح بسعادة : يا ما نفسي أشوف وش يحيى دلوك، أكيد هيجن بعد ما عرف باللي حوصل.
عمار : أنا اللي نفسي أشوف وشه بس بعد ما أنفذ اللي في بالي، أنا هخليه يتكسف يرفع وشه قدام الناس.
رماح : عتعمل إكديه كيف يعني؟!
عمار : خلي كل حاجة في وقتها.
رماح : لو تجولي بس اللي في راسك! خابر إن راسك دي مالهاش مثيل، لكن جولي، فهمني عتعمل إيه وأنا عساعدك.
عمار : أهم حاجة بس دلوقتي، عايزك تاخد الرجالة وتروح على الكهف القديم، تجيب كل حاجة من هناك. وحط قدام الكهف لغم، عشان لو فكر يحيى يطلع عند الكهف تاني يستقبل العساكر إستقبال يليق بيهم.
رماح : إي والله فكرة حلوة. أنا عاخد الرجالة وأروح دلوك. وعايز اطمنك، الشحنة وصلت والكهف تاني اتملى زخيرة ووكل للرجالة، محدش كان مراجب الجبل زي ما جلت.
عمار : عارف، كانوا مطمنين خلاص إن المطاريد مش هيرجعوا ولا حد هيهددهم تاني. لكن لأ... المطاريد هيفضلوا موجودين.
رماح : مش بجولك دماغك دي كيف الألماظ، رجعنا الرجالة وخدنا الغلة والسلاح وهما مش حاسين بحاجة. عخليهم يعملوا وكل عشان تتغذى وصحتك ترجع زي اللول. عايزين نخلص على يحيى ونرتاح عاد.
عمار : هيحصل وقريب جدًا. وهرجع كل حاجة اتاخدت مني.
كان رماح يعلم أن عمار يخطط لشيء ما وازداد فضوله نحو الأمر، ولكن قرر أن يذهب إلى الكهف القديم أولًا وينقل أغراضهم إلى الكهف الجديد. بعد وقت كان يقف داخل الكهف ومعه عدد من الرجال. بعد قليل وصل فزاع ورضوان ودخلا إلى الكهف. نظر إليهما رماح وقال : واه... كنتوا فين يا ولد إنت وهو كل الفترة دي؟!
أشار فزاع إلى الرجل الذي يقيده رضوان وقال : كنا عنجيب الراجل ديه كيف ما أمرنا عمار.
نظر إليه رماح وسمع صوته من خلف ذلك الغطاء الأسود الذي يخفي ملامحه، كان يأن بصوت مرتفع وكأنه يطلب العون. فقال رماح : مين الراجل ديه؟!
رضوان : إنت ماخبرش عمار طلب منينا إيه؟!
رماح : لاه ماجاليش.
فزاع : طيب فين عمار عاد؟
عزت : الحكومة طلعت الجبل، وكانت عركة كبيرة وراح منينا رجالة كتير، بس الحمد لله نفدنا منيهم وهوربنا من الجسم. ودلوك عنسيب الكهف دي جبل ما الحكومة تطلع تاني إهنيه، عنروح الكهف التاني.
كان رماح ينظر إلى ذلك الرجل المقيد بفضول ثم قال : أرفع الغمامة ديه عنيه، خلينا نعرف إيه جصته ده كومان.
رفع فزاع عنه الغطاء ونزع اللاصق من على، فنظر حوله بذعر وقال : إنتوا مين، وعايزين مني إيه؟!
رماح : إنت خابرني، الرجالة دي خطفاك ليه؟! وإنت مين عاد؟
حازم بتعجب : إنت جايبني هنا وماتعرفش أنا مين؟! خطفني وخلاص يعني!
رماح : مش أنا اللي أمرتهم، جولي إنت مين؟!
حازم : أنا حازم عمر عرابي.
جلس رماح أمام حازم وحاول أن يعرف سر طلب عمار بإحضاره من الأسكندرية إلى أسيوط.
رماح : طيب إنت تعرف عمار منين؟
حازم بحدة : ماعرفش حد اسمه عمار. إنتوا بجد ضيعتوا وقتي.
نظر له رماح بغضب، واقترب منه الرجال وهم يحملون السلاح بإيديهم، فنظر إليهم حازم بخوف وقال : ﻷ أنا مش قصدي أزعق. بس يعني مش منطقي إنكم تخلوني أسافر المسافة دي كلها غصب عني؛ وفي الآخر ماعرفش حتى أنا جاي هنا ليه!
أشار رماح إلى الرجال حتى يخفضوا السلاح وأشار إليهم حتى يجلسوا حوله ثم قال : طيب تعرف حد اسمه يحيى؟!
حازم : لا.
صمت رماح يفكر قليلًا وتذكر حديث عمار الذي قاله قبل أن يرسل الرجال إلى الإسكندرية وبعد أن تأكد أن رهف ستتزوج يحيى : "كان نفسي تبقى حاجة تانية غير دكتورة ساعتها كنت هخلي سمعة يحيى في التراب." فنظر إلى حازم وقال : طيب تعرف داكتورة اسمها رهف؟!
اتسعت عين حازم ووقف قائلًا : إنت تعرف رهف؟! فين هي؟!
رماح : أجعد بس عاد. يبجى اللي في بالي صوح. جولي بجى إنت تعرفها منين؟!
جلس حازم وقال بخجل : تبقى أختي.
رماح بتعجب : واه.... وماجتيش الفرح ليه عاد؟!
حازم : فرح مين؟!
رماح : فرح خيتك الداكتورة ويحيى التهامي.
حازم : فرح أختي! هي اتجوزت؟! طيب هي فين؟!
رماح : عجولك بس فهمني لول، فيه المشكلة بيناتكم؟!
حازم : للأسف حاجة ماتتحكيش، معلش سامحني مش هقدر أقول.
اقترب عزت منه ورفع السلاح نحو رأسه، فنظر له حازم بتوتر وقال : خلاص... هقول هقول.
أبعد عزت السلاح، ونظر حازم إلى رماح وقص له ما حدث بالماضي، تحت نظرات التعجب من رماح ثم قال : يبجى عمار كان خابر الحكاية دي، وجابك إهنيه عشان تاخد بطارك من خيتك وتغسل عارك بيدك. هاته يا عزت وخلينا نروج لعمار، نشوف مخطط لإيه. وإنتوا يا رجالة خلصوا اللي طلبته منيكم وعاودا بسرعة.
جذب حازم من يده فقال : أنا هاجي معاك، بس توصلني ليها، وتبقى عملت فيا جميل عمري ما هنساه.
رماح : ده أنت اللي عتعمل فيا جميل البلد كلياتها عتتحاكى بيه، وعتجيب راس عيلة التهامية في الأرض. تعالى يا وش السعد.
خرج من الكهف وعاد إلى الكهف الجديد.
كان يحيى يجلس في قسم الشرطة وأحمد بجواره، يرى الغضب في عينيه، أنفاسه تتلاحق وهو ينظر حوله بضيق، فقال أحمد : هنعمل إيه يا يحيى؟!
يحيى : أنا غلطت، كان لازم أرحلهم على الديرية في أسيط، ماكنش حد هرب منهم. كده ماعنديش حل، ولو حتى طلعت الجبل تاني؛ ماعرفش هلاقيهم في نفس المكان ولا ﻷ.
أحمد : لا الوضع بقى صعب وأكيد هما واخدين حذرهم دلوقتي. وأنا مش هجازف بأرواح العساكر دي تاني.
يحيى : يعني رجعنا لنقطة الصفر، وهنرجع تاني نراقب الجبل.
ثم نهض وتحدث بغضب : هو أنا هفضل طول حياتي بجري ورا المطاريد! أنا حياتي بتضيع عليهم، والناس خلاص تعبت.
أحمد : إهدى يا يحيى، مالك متعصب أوي ليه كده النهاردة؟!
زفر يحيى وقال : مخنوق، ومش طايق نفسي.
أحمد : قوم روح يا يحيى. خد هدنة من اللي بيحصل ده، إنتوا كمان عندكم يوم طويل بكرة. خلينا نفرح الناس شوية ونفرح معاهم.
نهض يحيى وقال : بلغت المديرية باللي حصل؟
أحمد: اه.
يحيى : طيب هستناك بكرة، ماتتأخرش.
أومأ إليه أحمد وغادر يحيى قسم الشرطة. بعد وقت وصل إلى منزله، فوجد أمينة وأمل وثريا يجلسن معًا، اقتربت أمينة منه وقالت : جيت بدري ليه يا ولدي؟
يحيى : بعدين هقولك يا أما، أهلًا يا ثريا إزيك؟
ثريا : كيفك يا ولد خالتي؟
يحيى : بخير الحمد لله.
ثريا : مبروك الجواز.
يحيى : الله يبارك فيكي. ماجتيش الفرح ليه صحيح؟
تنهدت ثريا بضيق وقالت : ماعلش، أجي في فرحك التاني إن شالله.
يحيى : إيه ده! وأنا هتجوز تاني وأنا ماعرفش!
ثريا : يمكن تعرف مين اللي عتحبك بجد وتصلح اللي عملته.
يحيى : ده لو اللي عملته غلط. لكن أنا ماعملتش حاجة تحتاج تصليح.
ثم نظر إلى أمل وقال : تعالي يا أمل عشان عايزك.
أمل : حاضر يا يحيى.
لحقت به وثريا ترمقه بنظرة غاضبة ثم قالت : عاجبك إكديه يا خالتي؟! معجول يعني يتجوز المصراوية الغريبة ويرفضني أنا؟!
أمينة : يا بتي ما كنا جفلنا الموضوع ده عاد.
ثريا : بس أنا لسه عحبه يا خالتي، فيها إيه البت المصراوية دي أحسن مني؟
أمينة : إنتي زينة البنتة، بس ديه نصيب.
تنهدت ثريا وقالت : شوفي يا خالتي عايزاني أعمل إيه عشان ليلة بكرة عشان أرجع جبل الليل.
أمينة : تعالي معايا على المطبخ، وماتزعليش عاد، بكرة تتجوزي اللي أحسن منيه.
ثريا : وهي العروسة فين؟ مش عتساعد ولا إيه؟!
أمينة : لما تيجي من الوحدة.
ثريا بصدمة : واه... خرجت وهي عروسة؟!
أمينة : أيوة يا بتي، العيانين مش عيستنوا.
ثريا : يا عيني عليك يا واد خالتي، اتجوزت ومرتك سيباك وإنت عريس.
أمينة : بكفياكي يا بتي عاد. جومي جومي خلينا نشوف عنعمل إيه.
ذهبا إلى المطبخ، أما يحيى فكان يجلس مع أمل وهي تقول : أيوة كنت واخدة بالي إنه بيكلم واحدة، بس ماردتش أقول لحد، بس يوم فرحك عرفت هي مين.
يحيى : ليلة بنت عم صديق.
أمل : هو قالك؟
يحيى : اه، وعايزني أخطبها، قولت أسألك عليها قبل ما نروح نخطبها.
أمل : هي كويسة، يعني ربنا يعينها على جنان يزن.
يحيى : لا دي كلنا هندعيلها، بس طالما بتقولي كويسة يبقى هكلم عم صديق بكرة، هشوف هيقول إيه قبل ما أقول ﻷبوكي ونروح نخطبها رسمي.
أمل : يا سعدك يا يزن!
يحيى : عقبالك يا حبيبتي.
أمل : لما يجيلي واحد يعجبني.
يحيى : محدش هيضغط عليكي ما تقلقيش. هي رهف فين؟
أمل : راحت الوحدة الصحية.
يحيى : طيب، أنا هطلع فوق لحد ما بنت خالتك تمشي. مش ناقص رغي مالوش لازمة.
صعد يحيى إلى غرفته وخرجت أمل تساعد أمينة وأمل بالمطبخ. بعد وقت عادت رهف إلى المنزل، وحين دخل وجدت أمل تخرج من المطبخ ويبدو عليها الإرهاق فقالت : إنتوا بتحضروا من النهاردة؟
أمل : اه، عشان العدد كبير مش بنلحق نخلص في يوم واحد. حمد الله على السلامة.
رهف : الله يسلمك.
وصل صوتها إلى ثريا التي خرجت على الفور وقالت : واه... ده العروسة شرفت أهي. أول مرة أشوف العروسة هي اللي عتخرج تشوف شغلها والعريس جاعد لحاله في البيت.
نظرت رهف إلى أمل وأشارت إليها تسألها : مين الأخت؟
أمل : دي ثريا بنت خالتي.
رهف : مالك يا شاطرة! فيه حاجة مضيقاكي ولا حاجة؟!
ثريا : متضايجة عشان ولد خالتي اللي جاعد فوج لحاله ومرته هي اللي في الشارع برا.
رهف : وإنتي مالك أصلًا! هو كان اشتكالك ولا حاجة؟
أمل : ﻷ ﻷ، يحيى ما قالش حاجة. هي بس ثريا بتعزه أوي فا بتتكلم من عشمها يعني.
رهف : اه واضح إنها بتعزه أوي زي بنات البلد كلهم.
ثريا : وأكتر كومان، لولا بس إنه سافر ودرس برات البلد ماكنش فكر يتجوز من مصراوية.
رهف : عارفة لما بسمع الكلام ده من البنات برا بقولهم إيه؟ ولا بلاش، إنتي برده من العيلة، بس نصيحة كده على الماشي؛ خليكي في حالك ومالكيش دعوة بيا. عشان المصراوية، قصدي الإسكندرانية مش بتسكت كتير. لساني بياكلني وبرد بردود مش هتعجبك.
خرجت أمينة مسرعة وقالت : خبر إيه يا بنات! عيب إكديه يا ثريا.
ثريا بحدة : أنا ما جولتش حاجة، هي اللي عترد بتريجة. الحج عليا إني بجولها تراعي جوزها يعني.
صدع صوت يحيى الذي يهبط الدرج وقال : ماتدخليش بينا ثريا، عيب تدخلي بين الراجل ومراته.
ثم اقترب من رهف وقبل رأسها أمام ثريا التي اشتعلت عينيها بالغضب ثم قال : حمد الله على السلامة يا حبيبتي. اطلعي إرتاحي شوية.
ارتبكت رهف من اقترابه ولكن تخللت السعادة إلى قلبها بسبب ما فعل أمامها، فقالت بدلال كي تجعلها أكثر غضبًا : ﻷ يا حبيبي، هغير وأنزل أساعدهم، أنا مش تعبانة.
يحيى : زي ما تحبي حبيبتي.
ابتسمت أمينة عندما رأتهما يتحدثان بود ﻷول مرة وقالت : ربنا يسعدكم يا ولاد.
زفرت ثريا وقالت : لو عتساعدك يا خالتي عروح أنا، خليني أروح أشوف أمي يمكن تحتاجني في البيت.
ثم غادرت مسرعة، ابتسمت رهف ثم صعدت إلى الغرفة لتبدل ثيابها، فلحق بها يحيى ودخل الغرفة وقال : أحلى كلمة حبيبي سمعتها في حياتي.
تبدلت ملامحها وقالت : ليه وإنت سمعتها من حد قبل كده ولا إيه؟!
يحيى : لأ... عشان كده بقولك أحلى كلمة في الدنيا، وأصلًا لو كنت سمعتها من حد تاني ماكنتش ههتم.
رهف : واضح إن كل البنات هنا واقعين فيك.
يحيى بغرور : عاذرهم يعني.
رهف : حلو، عشان لما أمشي تلاقي عروسة على طول.
اقترب منها فخطت إلى الخلف بتوجس، ولكن يحيى لم يتوقف، أخذ يقترب منها أكثر وأكثر وهي ترتد إلى الخلف، حتى التصق جسدها بالحائط، فنظر داخل عينيها وقال بصوت خافت جعلها تذوب عشقًا أمامه : ولا بنات العالم كلهم يملوا عيني. إنتي المراد يا بنت عمر. هتفضلي في قلبي العمر كله ومش هتخرجي منه غير بطلوع روحي.
رهف : بعد ال...
ثم قطعت حديثها بخجل، استجمعت قوتها الزائفة ودفعته بعيدًا، أخذت ثيابها وتوجهت نحو المرحاض سريعًا، تحت نظرات يحيى السعيدة.
مضى اليوم في التحضير إلى يوم غد، وفي المساء صعدت رهف إلى الغرفة وهي تشعر بالإرهاق، فاستلقت على الأريكة، وما إن مر عدة ثواني حتى راحت في نومٍ عميق. دخل يحيى الغرفة، وجدها قد نامت بالفعل، كانت الأريكة صغيرة للغاية ولا تستطيع حتى أن تتحرك عليها وهي نائمة، فحملها بهدوء ووضعها بالفراش ثم دثرها تحت الغطاء ونام بجوارها، كان يتطلع بملامحها بحب واشتياق، يتمنى أن يأخذها بين أحضانه ولكن تركها تعود إليه بنفسها.
حل الصباح، وحين فتحت رهف عينيها وجدت نفسها نائمة بجوار يحيى، انتفضت سريعًا ونهضت من الفراش، نظرت إليه بعدم إستيعاب، وعلمت أنه حملها وهي نائمة. تنهدت بضيق ودخلت إلى المرحاض وبدلت ثيابها وغادرت الغرفة، وحين أغلقت الباب فتح يحيى عينيه وابتسم على ما فعلت.
كان المنزل كله يعمل على تحضير وليمة الغداء، وبدأت الناس تتوافد إلى المنزل، ويحيى ويزن وعزام يستقبلونهم، ويشرفون على الذبح.
وعند الظهيرة، كانت نساء المنزل تضع الطعام أمام أهل البلدة، ويتسامرن مع رهف التي تقف بينهم تشاهد ما يفعلن. تنظر إلى الأطفال وهم يلعبون بسعادة. تلقت رهف التهاني من نساء البلدة على زواجها، وأمل تقف بجوارها وتتحدث معها.
وحين حضر صديق، رحب به يحيى تحت نظرات يزن الذي شعر بالتوتر. ثم قال يحيى : كنت عايز أكلمك في موضوع يا حاج صديق.
صديق : خير يا كبير.
يحيى : كنا عايزين نيجي نتقدم لبنتك وناخدها ليزن، إيه رأيك؟
ارتبك صديق، هو يخشى على ليلة من طار المطاريد مع عائلة التهامي، لذا قال بخجل : ما تأخذنيش يا كبير. بس أنا خايف عليها.
يحيى : خايف عليها وهي في بيتي يا حاج! يعني البلدة كلها في حمايتي ومش هعرف أحمي أهل بيتي! ﻷ أنا كده زعلت.
صديق : لاه يا كبير، ماجصديش.
يحيى : أنا مش هقبل بأي إعتراض غير لو معترض على أخلاق يزن أو العروسة مش عايزاه.
صديق : وأنا أجدر اتحدت عن يزن! ده زينة الشباب بعديك.
ابتسم يحيى وقال : يبقى اتفقنا، هنيجي أنا والحاج عزام ونطلبها، يلا خلي الفرح يبقى اتنين.
أومأ إليه صديق ولم يستطع أن يرفض طلبه. بعد قليل حضر خالد وأحمد، وخرجت أمينة من المنزل لتقف مع رهف وأمل، وفي ظل هذه الأجواء الهادئة.. إذا بصياح حازم الذي وقف أمام البوابة الخارجية للسرايا، فحين رأى رهف أشهر سلاحه في وجهها وقال بصوت قسم قلبها خوفًا : رررررهف.
نظرت له رهف بصدمة، ركض يحيى نحوه سريعًا وأمسك يده ليمنعه عن إطلاق الرصاص، وفي آخر لحظة رفع يحيى يده إلى أعلى، فانطلقت الرصاصة بالهواء.
تجمع العساكر حولهما، ونظر له يحيى بغضب وقال : إنت اتجننت! إزاي ترفع سلاح عليها؟! إنت مين؟
توقف أهل البلدة عن الطعام. ووقفوا متأهبين لما يحدث، احتضنت النساء أطفالهن بخوف. وبكى الرضع أثر صوت الرصاص.
ركضت رهف نحو يحيى واحتمت بظهره، ثم قالت بصوت مكسور : ده حازم يا يحيى.
نظر إليه يحيى وتجمدت عينيه أمام نظراته التي امتلأت بكراهية. والآن يخشى أن يقول أي شيء يجعل أهل البلدة يظنون ظنًا سيئًا برهف.