رواية المطاريد الفصل العاشر10 بقلم رباب حسين
كان الألم يرهق جسده، كاد أن يشعر بروحه تغادره مودعة، حتى جاءت رهف واستطاعت أن تنقذ حياته، وبعد أن أغمض عينيه مستسلمًا للموت؛ عاد يفتحها مرة أخرى، وحينها رأى نفسه بداخل غرفة بالمستشفى، أغلق عينيه سريعًا وحاول أن يسمع ما يدور حوله.
بعد قليل، سمع الممرضة تتحدث مع الطبيب وتقول: نعمل إيه تاني معاه يا دكتور؟
_ هو واضح إن حد أسعفه، لأن بالحالة دي أكيد كان مات، بس خليكي متابعة نقل الدم، وكمان ياخد مضاد حيوي في مواعيده، وأعتقد إنه هيفوق قريب.
أومأت إليه الممرضة وجلست تتابع حالته، كان يشعر بالألم في أنحاء جسده، فظل دون حراك حتى يستعيد نشاطه قليلًا. حتى سمع صوت أذان الفجر، وشعر بالممرضة تنزع عنه المحلول الوريدي، فتأكد أنه قد أخذ الجرعة الكافية من الدم.
خرجت الممرضة من الغرفة، ففتح عمار عينيه وتطلع حوله، رأى نفسه يرتدي الملابس الخاصة بالمشفى، نظر إلى الجرح ووجده قد توقف عن النزيف، لم يعرف كيف جاء إلى هنا وماذا حدث.
لاحظ أن باب الغرفة يُفتح فعاد يستلقى سريعًا، اقترب الطبيب منه وقام بالكشف عليه، ولكنه أمسك بيده وطرق رأسه بالعمود الذي يتم تعليق المحلول عليه، ففقد الطبيب وعيه وسقط أرضًا. هبط بجواره ونزع عنه المعطف والبنطال، ثم ارتداهما سريعًا وخرج من الغرفة وهو يواري ملامح خلف القناع الطبي، وبعد دقائق كان خارج المشفى بالكامل.
كان ضوء النهار يقطع ظلام الليل في السماء وهو يركض متألمًا، وصل عند أحد المنازل ووجد بعض الملابس معلقة بالخارج لتجف، فسرق قميص وارتداه بعد أن ألقى بمعطف الطبيب في حاوية القمامة. ثم توجه إلى ميدان سيارات الأجرة ليأخذ سيارة من هناك ليعود بها إلى القرية. مد يده في جيب البنطال، فوجد بعض الأموال، فاشترى من الصيدلية مسكنًا ومضادًا ودفع أجرة السيارة.
دخلت الممرضة غرفة عمار لتعطيه الدواء في موعده، ولكنها وجدت الطبيب ملقى بالأرض وهناك جرح برأسه، والمريض قد اختفى، فنادت على العسكري وحين دخل الغرفة اتصل بأحمد على الفور وأبلغه أن عمار قد هرب. بحث عنه في المشفى وراجع كاميرات المراقبة وتأكد أنه هرب بالفعل.
لم يستطع أحمد أن يقبض عليه قبل أن يعود إلى الجبل، فحين علم بالأمر كان عمار في اتجاهه إلى الجبل بعد أن عاد إلى القرية.
_______________________________
ليت هناك علاج لروح أنهكها الألم، فبعض الجروح لا تلتئم وإن التأمت لا تعود كما كانت، بل تصبح ندبة تذكرك كل لحظة بأن هذا الجرح قد إستنزف حياتك وقضى على كل أحلامك.
كنت أشعر بلمسته، وإن كان عاملني بقسوة إلا أن حبه قد تغلب عليه، واعترف به مع كل همسة، ولكنني لن أرضخ لحب زائف مرة أخرى. لن انخدع مرتين، فالحب ليس رواية بختامها يتزوج الأبطال بسعادة، فا ها أنا أصبحت زوجته ولكن سعادتي لم تعد تعرف الطريق إلى قلبي، وحبي أنا انتهى بصدمة لن أنساها ولن تمحيها آلاف الإعتذرات.
أخذت رهف حمام دافئ وارتدت ثيابها، حزمت أغراضها داخل الحقيبة، ثم حزمت أغراض يحيى وخرجت من الغرفة، إنتبه لها يحيى ونهض وحمل الحقائب من يدها، وأشار لها بأن تخرج من المنزل، ثم صعدا إلى السيارة وقام يحيى بقيادتها وهو شارد الذهن، يدور بعقله الكثير من الأمور، ولكن أكثر ما كان يؤلمه هو رفض رهف له.
لاحظت رهف شروده وحزنه ولكن لم تتحدث ولم تهتم، فحزنها كان أقسى من أي شيء. نظرت عبر النافذة وهو يرمقها بين الحين والآخر، ولم يعد هناك حديث يقال، فقد لاحظ رفضها الشديد له لذا قرر أن يفعل كل ما بوسعه كي يستعيد حبها.
بعد وقت وصلا إلى منزل التهامية، ودخل يحيى وخلفه رهف واستقبلهما العائلة بسعادة ومباركات، قامت أمينة باحتضان رهف وقالت : حمد الله على السلامة يا بتي. بركة إنك رجعتي بخير.
ابتسمت لها رهف بحزن وقالت : الحمد لله.
كان يحيى ينظر إليها ويرى حزنها الدائم، ونظرة عينيها المكسورة التي تتحدث بها. ﻷول مرة ينظر إليها ولا يشعر بالغضب، فلم يعد هناك ما يغضبه، فبدأ يلاحظ ما لم يلاحظه من قبل. وتأكد أنها محقة؛ فلم تعد تلك الرهف الذي عشقها بالماضي، فقد حطمتها الحياة وسرقت سعادتها. وبالرغم من أن بالماضي كان بينهما مسافات وحدود لا تعد ولكنها كانت أقرب إلى قلبه، كانا روحًا واحدة والآن؛ هي أمامه، بين يديه، زوجته؛ وأبعد ما يكون عنه.
لاحظ عزام ويزن نظرات يحيى الحزينة إلى رهف وشعرا بالقلق فقال عزام : أمل. خدي رهف وطلعيها أوضتها.
يحيى : وديها الأوضة الكبيرة يا أمل.
أمينة : أنا حطيت خلاجاتك وخلاجاتها فيها. دي الأوضة عتنور.
صعدتا أمل ورهف معًا وكان يحيى يتابع رهف بعينيه، يخاف أن يفشل في كسب ثقتها. علقت نظراته بها حتى صعدت إلى الطابق العلوي وقال عزام : مالك يا يحيى... إنت زين؟!
نظر له يحيى وقال : بخير يا بوي.
عزام : يعني ليلتك عدت على خير يا ولدي؟!
يحيى : أيوة يا بوي.
يزن : محدش عملها حاجة على الجبل صح؟!
يحيى : لا محدش لمسها الحمد لله.
ابتسم عزام بارتياح وقال : طيب فيك إيه عاد؟!
يزن : يا عم خضتني. أنا قلت حصل حاجة.
يحيى : هو حصل فعلًا.
عزام بتعجب : حوصل إيه يا يحيى! ما تنطج.
أعطى يحيى الأوراق لعزام وجلس ليقرأها.
أما أمل ورهف فدخلا إلى الغرفة وقالت أمل بسعادة : دي بقى أوضة يحيى. بابا وضبها كده لما كان هتيجوز آخر مرة وهو رفض على آخر لحظة، ومن ساعتها وهي مقفولة محدش لمسها، وهو بقى ينام تحت في أوضة الضيوف.
نظرت رهف حولها وقالت بفتور : شكلها حلو أوي.
تنهدت أمل وقالت : أنا نفسي أعرف هتفضلوا إنتي ويحيى مبوظين كده لحد إمتى، ده حتى باين أوي إن إنتوا الاتنين بتحبوا بعض من زمان. ده طلع في وسط المطاريد عشان يجيبك من هناك، ولا منظره لما عرف إنك اتخطفتي؛ أنا عمري ما شفت يحيى كده، وبعد ده كله ولسه برده زعلانة كده. نفسي أعرف سر الحزن ده إيه؟!
رهف : مش حزن، بس قولتلك قبل كده أنا نسيت الكلام من كتر ما عشت لوحدي.
أمل : ماتقلقيش... أنا رغاية وهفكرك بيه.
ابتسمت رهف على إستحياء، ثم وقفت أمام النافذة وشردت كعادتها. وبعد قليل غادرت أمل الغرفة وتركتها لترتاح بعد أن وضعت أغراضها وأغراض يحيى بالخزانة. جلست رهف بالغرفة وهي تشعر بالضيق والتعب، تتمنى أن تغفو قليلًا، ولكن عقلها يجوب به الكثير.
نظرت إلى الفراش في حيرة، فهي لن تقبل أن يجمعها مع يحيى فراش واحد، نظرت حولها ووجدت أريكة صغيرة بالغرفة، فأخذت وسادة وغطاء وبدلت ثيابها ونامت على الأريكة.
أما بالأسفل فوقف عزام بغضب بعد أن شرح له يحيى ما علمه اليوم وقال : يعني إيه! يعني مهران مش أخوي.
أمينة : معجول! ده أبوك الله يرحمه كان بيعامله زيك وأكتر.
يحيى : ما ده دليل إن جدي ماقتلوش زي ما أهل البلد قالوا.
يزن : طيب وبعدين. لازم عمار يعرف الحقيقة.
يحيى : الأهم من عمار هو رماح. أكيد عارف كل حاجة حصلت والسر عنده.
أمينة : ما أنت بتجول يا ولدي إنه هرب. عنجيبه منين عاد؟
يحيى : هجيبه. لو في بطن الأرض هجيبه وهعرف مين قتل جدي ومهران.
جلس عزام ووضع يده على رأسه، الحقيقة كانت قاسية، والأهم أنها إذا خرجت من هذا المنزل ستكون وصمة عار للعائلة بأكملها.
أما رماح فكان يجلس في كهف مغلق داخل الجبل ومعه بعض الرجال، فقال جمال : وبعدين يا كبير. عنفضل محبوسين إكديه؟!
رماح : لحد ما الحكومة تبطل تدور في الجبل. لولا عمار فكر في المخبأ ديه كان زمانا في الحجز دلوك.
جمال : العلام بيفتح المخ عاد يا كبير.
رماح : اللي جاهرني إنهم خدوا عمار وكومان عزت. ولو عزت جال أي حاجة عروح في ستين داهية.
جمال : خايف من إيه يا كبير؟!
صمت رماح وظل شارد يفكر، حتى لاحظ أن أحدًا يحاول تحريك الصخرة الكبيرة أمام باب الكهف. وقفوا جميعًا بتأهب وحملوا السلاح، حتى وجدوا عمار يصيح من خلف الصخرة ويطلب منهم أن يفتحوا له.
فقال رماح بإندفاع : إفتحوا يا رجالة، ديه صوت عمار.
حركوا الصخرة ودخل عمار وهو يضع يده فوق الجرح متألمًا، ساعده الرجال ورماح وأجلسوه بالأرض، ثم قال رماح: حمد الله على السلامة يا ولدي. إنت بخير؟!
عمار : أيوة، إيه اللي حصل؟ أنا رحت الجبل لقيت دم في كل حتة ومفيش حد منكم هناك، قلت أجي هنا يمكن ألاقي حد في المخبأ. إيه اللي حصل؟
رماح : يحيى هجم على الجبل بعد ما خطفنا مرته الداكتورة يوم فرحهم عشان تعالجك، لجينا الضرب من كل ناحية، جبض على شوية رجالة من عندينا، وفيه اللي مات كومان.
عمار بضيق : طلع الجبل عشان رهف! طيب فين عزت؟
رماح بضيق : جبضوا عليه يا عمار. لازم عزت يرجع بأي تمن.
عمار : هرجع الرجالة كلهم. سيبني بس أخد المسكن ده وبعدين أشوف هعمل إيه.
أعطاه رماح بعض الماء، وأخذ عمار الدواء وجلس ليفكر.
أما يحيى فظل يتحدث مع عزام ويزن وحاول حل لغز الماضي، حتى جاءه اتصال من أحمد
يحيى : ألو.
أحمد : معلش يا عريس بس القضية مهمة ولازم تتقفل، عشان كده بتصل بيك في يوم زي ده.
يحيى : ولا يهمك، أنا صاحي أصلًا مانمتش من امبارح.
أحمد : ااااه. طيب مش هتقدر تيجي تحضر التحقيقات، ولا أحقق أنا وإنت تقرا الأقوال وخلاص؟
يحيى : لا هجيبلك دلوقتي عشان عايز أقولك على حاجة حصلت كده.
أحمد : طيب خلاص هستناك.
أنهى يحيى المكالمة ونظر إلى أمينة وقال : ماما خلي بالك من رهف وماتسيبهاش لوحدها.
وقفت أمل أمامه وهمست قائلة : هي رهف زعلانة ليه كده يا يحيى؟!
نظر لها يحيى وظهر على وجهه الحزن وقال : أنا زعلتها. خلي بالكم منها بس لحد ما أرجع.
ذهب إلى قسم الشرطة وبدأ بالتحقيق مع أحمد. تحدثا مع المطاريد واحد تلو الآخر حتى حل الليل، وقص يحيى إلى أحمد أمر الأوراق التي وجدها في منزل عمه مهران، وبعد أن استجوبا رجال المطاريد؛ جلس يحيى وأحمد ليبحثا في الأمر وتحليل أقوالهم.
يحيى : أنا ملاحظ إن كلهم بيتكلموا عن عزت ده.
أحمد : أنا برده حسيت إن دوره كان كبير في وسطهم. تفتكر عزت ده كان قريب من رماح وعمار؟!
يحيى : بص لازم نغير أسلوب التحقيق معاهم، واضح إن عزت فارض سيطرته عليهم وخايفين يتكلموا، ده غير إن رماح مش موجود ولا عمار كمان، وده بيخلي توجيه التهم ليهم مالوش لزوم، خلينا نشوف الجنايات ونحاكم كل واحد فيهم بالقضية اللي عليه، وندور على طريقة نوقع بيها عزت ده، عشان لو فعلًا هو قريب من رماح يبقى أكيد عارف حاجات عنه ممكن تفيدني في قضية قتل مهران وجدي.
أحمد : ماشي. على العموم أنا لسه هحقق معاهم تاني بكرة، يمكن أخرج بمعلومة جديدة. روح إنت بقى ارتاح، إنت بتقول مانمتش امبارح، وبعدين إنت عريس يعني، روح لمراتك.
أومأ إليه يحيى وغادر قسم الشرطة عائدًا إلى منزله. وحين دخل المنزل سأل أمل عن رهف، وأخبرته أنها لاتزال نائمة ولم تأكل شيء حتى الآن. فصعد إلى الغرفة وفتح الباب بهدوء، وجدها نائمة على الأريكة، جثا بجوارها وتأمل ملامحه باشتياق، أكثر ما يحزنه أنه لم يعد يرى ضحكتها التى خطفت قلبه بالسابق. داعب خصلات شعرها بأنامله حتى فتحت رهف عينيها، وجدته ينظر إليها والندم يكسو ملامحه، أزاحت يده عنها واعتدلت في جلستها، ثم نظرت حولها فوجدت أن الليل قد حل فقالت : ياااااه. أنا نمت ده كله.
يحيى : إنتي مانمتيش امبارح.
رهف : عادي متعودة على كده. شغلنا مافيهوش راحة.
يحيى : أنا فرحان إنك قدرتي تحققي حلمك وتبقي دكتورة.
رهف : قلت ماتبقاش خربانة من كله. ماكنش فاضلي غير حلمي ده بس، ومسكت فيه لحد ما حققته.
يحيى : بس عملتي كده إزاي، ورحتي فين بعد اللي حصل؟!
رهف : دي حكاية طويلة أوي. ماتشغلش بالك بيا.
يحيى : لا مهم. أنا عايز أعرف عيشتي لوحدك الفترة دي كلها إزاي.
رهف : ماتهتمش كتير يا يحيى. إعتبرني ضيفة وهتمشي قريب.
اقترب يحيى منها ونظر إلى عمق عينيها وقال : هو إنتي ليه مصدقة إني هسيبك تمشي من هنا وتبعدي عني تاني؟!
رهف : عشان متأكدة إنك مش هتعيشني معاك غصب عنك.
أمسك يحيى يدها وقال بخجل : هو إنتي.... ممكن تسامحيني؟
شعرت رهف بنبض قلبها وهي تنظر إلي عينيه، كادت أن تضعف أمامه ولكن عقلها يرفض أن ترضخ إليه، هي لم تعد تثق به، فقالت : صعب، اللي بينا اتكسر من زمان، فاكر لما وقفت ودافعت عني وضربت الولد اللي كان بيعاكسني؛ وقتها كنت شايفة إنك الوحيد اللي هتقدر تحميني وتدافع عني، كنت فاكراك سند عمره ما هينهار، كتف اتسند عليه وأعيش جنبه مطمنة، لحد ما لقيت نفسي في الدنيا لوحدي.
عايز تعرف بقيت دكتورة إزاي! إشتغلت كل حاجة وأي حاجة، اتبهدلت وقعدت أيام من غير أكل، كنت بدور على الأكل في صناديق الزبالة عشان أوفر مصاريف الكلية. أول بالطو جبته كان قصاده غسيل ٨٠٠ طبق في مطعم، فاكرة لحد دلوقتي وأنا بشتريه كانت أيدي مش قادرة ترفع الشنطة. مستني مني إيه يا يحيى! أنا خلاص؛ الدنيا دي بالنسبالي بقت ولا حاجة، أنا عيشت عشان أحقق حلمي، وسعادتي بقت إني أساعد المرضى، وتقدر تقول إني عايشة بس عشان كده.
سيبني في حالي، وروح عيش حياتك بعيد عني، اللي بينا مش هيرجع وأنا عمري ما هثق في حد تاني.
تنهد يحيى وقال : أنا عارف إني غلطت، بس اللي شفته كان قاسي أوي يا رهف، وجعني، وجع فضل معشش جوايا سنين، كل أما أغمض عيني كنت بشوف صورتك قدامي.
طأطأت رأسها بخجل فرفع رأسها عاليًا وقال : إياكي تخجلي، إنتي ماغلطيش في حاجة، اللي غلط هو اللي هيتحاسب، هو اللي هيدفع تمن غلطه.
رهف : محدش هيصدق يا يحيى، الناس بتصدق اللي بتسمعه وتشوفه وبس، مهما وقفت وصرخت وسط الناس وقلت إني بريئة هيجروا ورا الإشاعات وبس.
يحيى : بس أنا جوزك، أنا أكتر واحد يقدر يشهد ببراءتك، أنا مستعد أروح لأهلك وأقولهم الحقيقة، مستعد أعمل أي حاجة عشان أرجعلك حقك، بس ثقي فيا يا رهف.
ابتسمت رهف بتهكم وقالت : بالكلام! مابقتش أصدقه، زمان سمعت جملة فضلت معلقة في دماغي، الرجولة مواقف، وإنت موقفك قدامي وحش أوي أوي.
يحيى بحدة : بكرة هثبتلك إني ممكن أضحي بروحي فداكي، بكرة تعرفي أني لسه بحبك ومش قادر أعيش من غيرك، وهثبتلك إني جدير بثقتك وبحبك اللي متأكد إنه لسه في قلبك. ولو فشلت؛ اللحظة اللي هتمشي فيها من هنا وتسيبيني هتبقى آخر لحظة في عمري. وأوعدك إنك مش هفشل ومش هتمشي من هنا.
وقف يحيى وقال : غيري هدومك وإنزلي عشان نتعشى سوا، أنا عرفت إنك ماكلتيش حاجة من الصبح.
ثم تركها وخرج من الغرفة، عتابها كان أشد ألمًا من القتل، ولم يعد يملك سوى الندم. ولكنه قرر أن لا يتركها. وسوف يفعل المستحيل كي يكتسب حبها وثقتها، وتعود ضحكتها وعفويتها التي عشقها.
وبالجهة الأخرى كان عمار يخطط من جديد، فهل سيستطيع أن يأخذ المطاريد إلى الجبل مرة أخرى؟