
رواية المطاريد الفصل الرابع عشر14 بقلم رباب حسين
الهروب كان سبيلي الوحيد، منذ أن فقدت كل عزيزٍ لدي وأنا أهرب بكل ما أوتيت من قوة؛ أهرب من عائلتي وأصدقائي ومن أظن أنه يعرفني.
تركت الأسكندرية، وودعت البحر بدموعي وقلبٍ مكسور، وألمي الذي قتلني رويدًا رويدًا، وبقيت أهرب وأهرب حتى بات الهروب أسلوب حياتي.
والآن عليّ أن أهرب منك، فلن أدع عشقك لي يكون سبب جرحك وخذلانك أمام الجميع. ولن أسمح بأن أكون وصمة عار في حياتك، فقد تعلمت في هذه الدنيا أن لا وجود للأسرار.
فعذرًا سوف أجرحك بيدي، ولن تستطيع أن تؤثر عليّ مهما فعلت. دعني أهرب منك ولا تحاصرني بنظراتك العاشقة، وإن أصابك عشقي؛ فسوف أنزع سهامه من قلبك بنفسي.
وبالرغم من عذابي في بعدك، ولكنك كنت بطل أحلامي كل ليلة. فلم أنسى وجهك ولو للحظة، وكانت عيناك من تأنس وحشتي في ظل الوحدة وقسوة الليالي.
وها أنت صرت أمامي وأشعر بأنك أبعد مما كنت عليه. وصرت أُعاتب فيك الهجرُ والحب تمنعه. وأعجب منك الرد والقلب تصدعه. مالي أحس بأن هجرك قاتلي! حسبي وحسبك جُرحًا أنت صانعه. قل لي بربك... كيف السهد أضناني! أنت الحبيب فكيف الحب تدفعه؟ أبات أشكو وأدعو الله أن يرحمني، وأضحى الغرام عذابًا صِرت أسمعه.
طال الغياب وأصبح اللقاء من المستحيل، فمنذ ذلك الصباح وأصبح يحيى يذهب إلى العمل بالصباح الباكر ويعود بوقت متأخر من الليل. طالت ليالي الاشتياق، وعادت رهف إلى وحدتها وصمتها، صراع يقسم روحها كل ليلة وهي تنتظره، تتمنى فقط لو تراه ولو للحظة عابرة، وعقلها لا يزال يشعر بالخوف أن ينفضح سرها، وهذه المرة لن تتألم وحدها، بل سيدفع يحيى الثمن من سمعته بين أهل بلدته.
عادت رهف إلى عملها في المركز الصحي، فرفضت أن تجلس بالمنزل فقط لتنتظر عودة يحيى الذي أصبح ضيف في منزله، وإن كانت آخر محاولة لتقنع نفسها أن هذا الزواج قد انتهى بالفعل.
أما يحيى فكان مشغول في تحقيقات القضايا التي كانت معلقة دون متهم محدد، وكان يخطط مع أحمد بأن يحصلا على إذن بالصعود إلى الجبل مرة أخرى للقبض على رماح، ولكن لم يستطيعا فعل ذلك لكثرة العمل والتحقيقات وقلة عداد العساكر، وما حدث آخر مرة دفع ثمنه أرواح هؤلاء الرجال الذين صعدوا الجبل لتأدية عملهم.
في صباح يومٍ جديد، استيقظ يحيى على صوت الضجيج بالخارج، فنهض مسرعًا بعد أن انتبه إلى الساعة كي يستعد للذهاب إلى العمل مسرعًا ليهرب من لقاء رهف كعادته مؤخرًا.
أما بالخارج فقد حضر إلى المنزل حازم وزوجته وهبة وأولادهما رهف وسليم بصحبة وعمر كي يزوروا رهف في منزل زوجها، فذلك بعد أن علم عمر ببراءة ابنته، وأنها كانت ضحية مكيدة خادعة.
استقبلتهم أمينة وقالت بسعادة : زين ما عملت يا حازم يا ولدي. أهلًا يا حاج عمر، اتفضلوا بيتكم ومطرحكم. إحنا عيلة واحدة دلوك.
هبة : إحنا أسفين إننا جينا فجأة كده، بس من ساعة ما حازم قلنا اللي حصل هنا آخر مرة وإحنا هنتجنن أنا وعمي وعايزين نيجي نشوف رهف، بس شغل حازم كان معطلنا، وأول ما عرف ياخد أجازة ركبنا القطر وجينا على طول.
أمينة : إنتوا تنوروا في أي وجت ومن غير إستأذان كومان.
عمر : تسلمي يارب. هما أهل الصعيد كده أهل كرم دايمًا.
أمينة : أمال عاد. ده لو ماشلتكمش الأرض نشيلكم فوج روسنا.
حازم : تسلمي يا أم يحيى. أمال فين رهف؟!
أمينة : نايمة. كانت سهرانة في الوحدة الصحية ورجعت متأخر. هطلع أصحيها وأبلغ الحاج عزام يجي يتعرف على الحاج عمر.
ذهبت أمينة ودخلت غرفة رهف بسعادة وقالت : رهف... رهف جومي يا بتي. أبوكي تحت وعايز يشوفك.
استيقظت رهف واعتدلت في الفراش بفزع عندما سمعت ما قالته، ثم تذكرت أن لا عليها الهروب بعد الآن، لذا قفزت من الفراش وكادت تركض خارج الغرفة إلا أن أوقفتها أمينة وقالت : يا بتي غيري خلجاتك لول، مايصحش تنزلي إكدية.
انتبهت رهف إلى ما ترتديه، فعادت مسرعة إلى الخزانة لتبدل ثيابها، وهي تقول : اه صح! هلبس بسرعة وأجي.
أمينة : إلبسي الخلاجات الجديدة اللي جيبتها. إنتي لساتك عروسة عاد.
رهف : حاضر. بس هو يحيى خرج ولا لسه في البيت؟!
أمينة : لاه لساته نايم تحت.
رهف : طيب ممكن حضرتك تطلبي منه يجي يقابل بابا؟!
أمينة : حاضر يا بتي عجوله. عروح أصحي عمك وبعدين عنزله.
ذهبت أمينة وأيقظت عزام، ثم نزلت إلى أسفل ودخلت غرفة يحيى، وجدته يستعد للخروج سريعًا فنظرت له بالمرآة وهو يرتدي معطفه وقالت بعتاب : عاش من شافك يا يحيى. خلاص.. مالكش عيلة تسأل عنيهم؟!
يحيى وهو يحاول أن يركض من الغرفة قبل أن يلتقي برهف فقال : معلش يا أما عندي شغل. لازم أخرج.
كاد يذهب ولكن أوقفته أمينة وقالت : أهل مرتك برا. روح رحب بيهم لول وأجعد معاهم شوي. الشغل مش عيطير ولا هتجبض على المطاريد دلوك.
زفر يحيى وقال : مش وقتهم بجد، مش عايز أشوف حد أنا.
اقتربت منه أمينة وقالت : مش عايز تشوف حد ولا عايز تهورب من رهف؟ بجالك كام يوم مختفي كل ديه عشانها صوح؟!
يحيى : أما أنا مش عايز لا أفكر ولا اتكلم في الموضوع.
أمينة : على راحتك. بس أخرج رحب بالضيوف، مايصحش نسيبهم لحالهم إكديه.
تنهد يحيى وقال : حاضر.
أما رهف فركضت إلى أسفل حتى نزلت، وحين رأت عمر يجلس أمام الدرج تجمدت محلها، لاحظ عمر وقوفها متجمدة وهي تنظر إليه والدموع تملأ عينيها. هم بالوقوف والصمت كان سيد الموقف، نظرات عتاب مشوبة بدموع الحزن والاشتياق، بينما يبادلها عمر بنظرات الخجل والندم.
أصبحت بنتي امرأة ناضجة، كبرت بعيد عن أحضاني، ولم ترى عيناي نجاحها، لم أساندها في مشوارها، ولم أشجعها على تحقيق حلمها.
ظلت تنظر إليه والدموع تنساب على وجهها، وتجمعت الدموع في عيون عمر وبدأ يقترب منها ببطء، يتطلع بملامحها ويبحث عن ندوب الماضي التي بدلت نظراتها.
وقفت هبة وهي تمسك بيد رهف وسليم تراقب ما يحدث بابتسامة حزينة. حتى وقف عمر أمام رهف ثم وضع يديه على وجهها يتحسس وجنتيها، ثم قال بصوت مخنوق بالبكاء : كبرتي أوي يا رهف! كنت خايف أموت قبل ما يكون فيه نصيب للقا يا بنتي. سلمحيني يا بنت أبوكى... حقك عليا.
إنسابت الدموع من عينيه فلم تتحمل رهف بكائه وقالت : كده يا بابا! تصدق كده عني بردة؟!
خرج يحيى وأمينة من الغرفة ونظرا إلى رهف وهي تقف أمام عمر وتقول : كده ماتحاولش تدور عليا عشان تسألني حتى؟ مافكرتش إني ممكن أكون مظلومة؟ ماقولتش دي بنتي اللي مربيها وماتعملش كده؟
نظر عمر إغلى أسفل بخجل ودموعه تسبق حديثه، ثم عاد النظر إليها وقال : كان جوايا حاجة بتقولي رهف ماتعملش كده، بس غضبي كان بيسكتها. عارف إني غلطت في حقك، وإنتي اللي دفعتي التمن، وعارف إن من حقك ماتسامحنيش ومش هزعل منك لإن مش من حقي. أنا كفاية عليا إني اطمنت عليكي في بيت جوزك، وشفتك بعينيا قبل ما أموت.
رهف ببكاء : بعد الشر عليك يا حبيبي.
ارتمت رهف بين أحضان أبيها كطفلة ذات عامين، لا تعرف معنى الأمان إلا بين ذراعيه، وكأنه بطلها الخارق الذي يستطيع أن يحميها من أي خطر. بكت لتخرج كل الألم الذي شعرت به، تشتكي إليه قسوة الأيام، تخبره كم كانت ضعيفة وخائفة، ترغب بأن تخبره عن ما تشعر به نحو يحيى، أن تتحدث عما يؤرق قلبها.
وقعت عينيها على يحيى الذي ينظر إليها بحزن، لم تصدق أنه أمامها، فابتعدت عن أبيها ونظرت إليه باشتياق. وتلاقت النظرات لبضع ثواني حتى لاحظ عمر أن رهف تنظر بالجهة الأخر،ى وإذا برجل يقف أمامها وينظر إليها دون حديث فقال : هو ده يحيى؟!
نظرت له رهف وأومأت إليه بنعم، فاقترب منه يحيى وصافحه، وطلب منه الجلوس. وعاد عمر إلى البهو وانتبهت رهف إلى وجود هبة معه، تنظر إليها بابتسامة، وتمسك يد طفلين بين كفيها. فركضت إليها واحتضنتها بقوة وقالت : وحشتيني أوي يا هبة.
هبة : وإنتي كمان يا رهف. أنا مش مصدقة إني شيفاكي قدامي.
ابتعدت عنها بعد قليل، ونظرا إلى بعضهما حتى شعرت رهف بأحدٍ يجذب ملابسها بالأسفل، فنظرت إليه ووجدت رهف الصغيرة تنظر إليها وقالت : إنتي عمتو؟!
جثت رهف أمامهما ونظرت إليهما بابتسامة رغم الدموع التي تغرق وجهها وقالت : أنا عمتو، وإنتي رهف الصغيرة، وده سليم صح؟!
سليم : إنتي شبه رهف أوي حتى نفس اسمها.
رهف : أممممم.. طيب دي حاجة حلوة ولا وحشة؟
سليم : لو مش هتكسري ألعابي وتتخانقي معايا عشان تلعبي بلعبي تبقى حاجة حلوة.
ضحكوا جميعًا واحتضنتهما رهف، ثم أمسكت بيديهما وأجلستهما على ساقيها وقالت : هما توأم يا حازم؟
حازم : اه يا ستي ومطلعين عينينا من ساعة ما جم.
يحيى : ربنا يخليهوملك يا حازم.
حازم : عقبالك إن شاء الله.
نظرت رهف إلى يحيى الذي لم ينظر إليها وقال : إن شاء الله.
هبط عزام الدرج واقترب منهم وتعرف عليهم، ثم جلس معهم بعد أن طلب من أمينة أن تحضر الفطار. وبعد قليل هبط يزن وأمل، وتفاجئا بوجودهم فرحبوا بهم وجلسو معًا.
كان عمار يجلس أمام الكهف وينظر إلى الفراغ بشرود، اقترب منه رماح وجلس بجواره وقال : وبعدين يا عمار، من ساعة ما الخطة بتاعت حازم خربت وإنت جاعد إكديه، فهمني إيه اللي في راسك تاني عاد.
عمار : خلي عزت رضوان ينزل في البلد اللي جنبنا، يشتري تليفون صغير وخط موبايل.
رماح : ما الخط اللي معانا شغال.
عمار : ﻷ أنا عايز خط تاني مش بتاع البضاعة.
رماح : ليه؟
عمار : نفذ دلوقتي بس يا رماح وهفهمك بعدين.
رماح : ماشي. بس فلوس البضاعة اللي سلمناها آخر مرة جربت توخلص.
عمار : عارف، كل حاجة هتتحل قريب، اصبر عليا بس شوية.
تنهد رماح وذهب ليخبر رضوان بطلب عمار، فهبط رضوان الجبل من الجهة الأخرى نحو بلدة مجاورة وأشترى هاتف جديد ثم عاد إلى الجبل.
أما في منزل التهامية، فكانوا قد تناولوا الطعام وعادوا ليجلسوا بالبهو مرة أخرى.
ثم قالت أمل : إنتوا أكيد مانمتوش صح؟
هبة : اه. والمشوار بصراحة طويل أوي، بس مش مهم كفاية إن إحنا شفنا رهف.
عمر : يعز عليا أسيبك هنا وأمشي يا رهف بعد الفراق ده كله.
عزام : لاه رهف منورانا، وإنت تجدر تجعد معاها زي ما أنت رايد. البيت بيتكم في أي وجت.
عمر : تسلم يا حاج عزام، بس أنا عارف أن رهف روحها في البحر من وهي صغيرة، دي لما كانت بتعيا كانت تقعد تعيط وماتعرفش تنام أبدًا، بس أول ما أخدها قدام البحر وتسمع صوته كانت تنام على دراعي في ثواني، عشان كده متضايق إنها بعدت عنه كده. ماوحشتكيش إسكندرية يا رهف؟
رهف : وحشتني أوي أوي.
يحيى بهدوء : لو عايزة تروحي معاهم روحي.
نظرت له رهف وهي تعقد حاجبيها وقالت : أروح؟!
يحيى : اه، لو زي ما عمي بيقول يعني وبتحبي البحر كده روحي، إيه المشكلة!
لاحظ عزام نظرات رهف الحزينة والمصدومة من حديث يحيى وقال : لاه ماينفعش تروح من غيرك يا ولدي. وبعدين إنتوا لساتكم عرسان، لما تجدر تاخد أجازة من شغلك أبجى وديها أنت عاد.
نظر له يحيى وأومأ إليه ثم تنهد ونهض وهو يقول : أنا كان نفسي أقعد معاكم أكتر يا جماعة، بس لازم أروح الشغل للأسف. إن شاء الله أرجع بدري تكونوا ارتاحتوا من السفر ونقعد أكتر مع بعض.
عمر : ولا يهمك يا ابني روح شوف شغلك.
ذهب يحيى تحت نظرات رهف التي تنظر إليه بتعجب مما قال فنهضت، ولحقت به، نظر حازم إلى يزن وقال بهمس : هما لسة زعلانين؟
أومأ له يزن بنعم بحزن. فنظر حازم إلى أثرهما وشرد قليلًا.
وقفت رهف عند الباب ووجدت يحيى يهم بفتح باب السيارة، فصاحت باسمه، فنظر إليها يحيى واقتربت منه رهف، ثم نظرت في عينيه وقالت : هو إنت عايزني أمشي؟!
يحيى : أنا شايفك عايزة تروحي إسكندرية فا قولتلك تروحي عادي.
رهف : بس ده ماكنش كلامك في الأول.
يحيى : عشان كانت فاكر إنك لما تفضلي معايا هقدر أغير رأيك، بس خلاص مابقاش ليه لزوم.
كان قلبها ينبض بخوف، يحيى يبتعد عنها، تذكرت الليالي التي قضتها تتمنى رؤيته، والآن هي على وشك أن تبتعد عنه دون رجعة. اقتربت رهف منه أكثر، فخطى يحيى إلى الوراء خطوة واحدة، فنظرت رهف إليه بحزن، فقال يحيى بتوتر وهو يشيح بنظره عنها : ماتقربيش. إنتي عاقبتيني عقاب أبشع مما كنت اتخيله. طلبتي نتجوز ووافقتي على العرض اللي قدمتهولك، وإنتي عارفة إني هعرف الحقيقة وساعتها الاتفاق ده هيبقى مؤذي بالنسبالي، عشان أكيد عارفة اللي هحس بيه واللي حاسس بيه دلوقتي، ومع ذلك وافقتي، ليه؛ عشان تنتقمي مني. تخليني أطولك مرة، وأفضل أجرى وراكي بقى عشان تفضلي معايا، ما هو مش بعد ما دقت حلاوة القرب هعرف اتخلى عنك، وفي الآخر كملتي ورفضتيني قدام الناس. بس لا يا رهف، مش هسمحلك تيجي على كرامتي ولو كنتي مين.
رهف : أنا كنت عارفة نتيجة اللي بنعمله، بس خلي بالك أنا ماكنش عندي طريقة تانية أثبت بيها الحقيقة، ومهما هربت منك عشان ماسمعش الكلام اللي كنت بتقوله كنت برده بتشتغل كل فرصة عشان اسمع فيها كلامك ده، ده غير الذنب اللي كنت شايلاه وأنا شايفك كاره الستات كلهم بسببي، كان المفروض أعمل إيه! إنت اللي اقترحت الاتفاق ده وأنا لو كنت عارضت كنت فهمتني غلط، كنت هتقولي إني بستغلك عشان أستر على فضيحتي، وإنت قولت كده فعلًا.
يحيى : كل ده كنت قادر أفهمه، وكنت عارف إني أستاهل اللي بتعمليه فيا، استحملت إنك شيفاني مش راجل وماقدرتش أحميكي، قلت مع الوقت هتثقي فيا تاني، وأنا لسه عند وعدي ومش هسمح لحد يقول عليكي نص كلمة، وإنتي شفتي علمت إيه قدام حازم، ده غير اللي عملته لما طلعت الجبل عشانك، كل ده مش عشان أثبتلك عكس اللي في دماغك، بس ده أنا، يحيى التهامي اللي أهل البلد كلهم في رقبته مش هيجي على مراته ومش هيعرف يحميها، لكن توصل إنك تهينيني بالشكل ده وقدام أهلى ﻷ، أدوس على قلبي ولا إني اتهان من مراتي.
رهف : أفهم بقى أنا خايفة عليك وعلى سمعتك، خايفة تخسر أهلك والناس اللي في رقبتك بسببي. كنت خايفة تقف قدامهم وإنت مش عارف تغطيني من عينيهم ولا تبرر موقفك وتثبت إني شريفة.
ابتسم يحيى باستهزاء وقال : أهلي مين؟ ثم أشار إلى المنزل وقال : دول؟! اللي أول ما عرفوا اللي حصل وقفوا جنبك وقالولك إنتي مالكيش ذنب! وبعدين كلام ناس إيه اللي بتتكلمي عنه؟! مين هيعرف أصلًا بالموضوع؟
رهف : واضح إنك ناسي حد مهم جدًا واللي أكيد عارف باللي حصلي؛ عمار. عدوك اللي قاعد مستني أي فرصة عشان يهزمك قدام أهل البلد. وطلع معايا حق، بعت جاب حازم عشان يخلص عليا وده معناه إنه عارف، وإحساسي بيقولي إنه مش هيسكت يا يحيى.
إنت ماجربتش يعني إيه تمشي تخبي وشك من الناس عشان عارف هما بيقولوا عنك إيه، ولو سمعت كلمة واحدة عني مش هتستحمل، وهتعمل مصايب وساعتها إنت هتتأذي وبسببي.
عقد يحيى ذراعيه أمام صدره ونظر لها بهدوء وقال : مين اللي هيتكلم عليا يا رهف؟ أهل البلد! اللي عايشين في حمايتي، ده لو حد سمع عني حاجة هيقفوا يدافعوا عني، عشان هيعرفوا إن كل ده بسبب المطاريد اللي من غير ضمير ولا أخلاق. وبرده هرجع وأقولك إني قادر أحمي بيتي وعيلتي كويس بس إنتي اللي مش واثقة فيا.
رهف : مش قصدي كده خالص بجد.
يحيى : بصي يا رهف من الآخر عشان بس إنتي شايفة الموضوع من جهة وأنا شايفه من جهة تانية؛ أنا مش قليل ولا ضعيف عشان ماعرفش أحميكي، ولا أنا اللي أجبر واحدة تعيش معايا وهي رافضة، ولا أنا اللي اترفض من مراتي قدام الناس.
ده غير إني قولتك إني كنت مستعد أسامحك عشان تفضلي معايا، وقبلت على نفسي وضع مفيش راجل يستحمله، ولا يقبل يتجوز واحدة فاكر إنها مش شريفة ويفضل متمسك بيها، يعني معنى ذلك إني كنت عارف إن ممكن حاجة تحصل وتكشف الي حصل زمان، بس أنا عشان واثق في نفسي ما اهتمتش، عشان أنا متمسك بيكي لآخر لحظة لكن إنتي عملتي إيه! ماتمسكتيش بيا، ولا حتي فكرتي تقوليلي الحقيقة قبل ما نتجوز، ودلوقتي برده بتبعدي بمنتهى السهولة، زي ما يكون أنا الوحيد اللي اتعذبت في بعدك عني. عشان كده خدت قراري وهنفذلك طلبك، تروحي لحالك وتسيبيني في حالي زي ما قولتي.
كاد يحيى أن يذهب وهم بفتح باب السيارة فأمسكت رهف يده وقالت : استنى أرجوك ماتسبنيش وتمشي دلوقتي. خلينا نتكلم يا يحيى... أنا كل يوم أقعد استناك وإنت بتهرب مني.
يحيى : أنا ماهربتش منك، إنتي اللي حبيتي الهروب وبقى أسلوب حياتك، واختارتي الطريق السهل، لازم تقفي قدام الناس وإنتي واثقة في نفسك، راسك تفضل مرفوعة، عشان إنتي متأكدة إنك ماعملتيش حاجة غلط. ولو بتحبيني كنتي اتمسكتي بيا، لكن أنا فضلت أحاول وأحاول عشانك.. عشانا إحنا الاتنين، وطلعت غبي إني بحاول مع واحدة أصلًا بتكرهني ومش عايزاني.
رهف : إنت عارف إني بحبك، كل اللي بيحصل غصب عني ومن خوفي عليك، ومع ذلك واقفة دلوقتي وأنا لسه قلقانة عشان تسامحني لأني مش قادرة اتخيل إني ممكن أخسرك تاني. أنا بحبك يا يحيى وعمري ما نسيتك لحظة واحدة. كنت كل يوم أشوفك في أحلامي واتمنى تبقى حقيقة قدام عيني، ولما اتحققت لقيتك بتكرهني، وبرده حبك مانقصش في قلبي، كنت عايزة تسامحني عشان تفضل معايا، وقلبي كان مسامحك من زمان ولا عرف يقسى ويزعل منك.
يحيى : مش كان صعب تسامحيني؟!
رهف : من ورا قلبي.
تنهد يحيى وقال : طيب نكمل كلامنا بعدين.
وأمسكت رهف يده مرة أخرى قبل أن يفتح السيارة، وقالت برجاء : لا... مش هتمشي وتسيبني كده تاني. قلبي واجعني بقى ومش قادرة استحمل زعلك مني. قولي بس كلمة تريح قلبي قبل ما تمشي.
نظر يحيى بعيدًا عنها وتنهد ولم يجيب فقالت رهف : لو مشيت وإحنا كده همشي فعلًا مع بابا.
نظر لها يحيى نظرة أرعبتها وقال : ماتهددنيش.
رهف بخوف : لا مش بهددك. يوووه يا يحيى بقى، خلاص أنا أسفة على اللي قولته، وأنا واثقة فيك جدًا. ريح قلبي بقى ولو بكلمة حتى.
نظر لها يحيى وتنهد، ثم اقترب منها وقبل جبهتها بهدوء، أغمضت رهف عينيها وهي تبتسم، بعد أن قررت أن تثق بيحيى وأنه سوف يبعد كل الشبهات عنها.
فتح باب السيارة وغادر المنزل، تحت نظرات رهف التي ظلت تلاحقه حتى ابتعد عن أنظارها.
أما يحيى فكان يبتسم رغمًا عنه، لم يعد غاضبًا منها، بل عاد نبض القلب المشتاق داخل صدره.
بعد وقت وصل إلى قسم الشرطة، ثم صدع هاتفه باتصال هاتفي، تلقى المكالمة وهو يبتسم حتى سمع صوت عمار فاختفت ابتسامته حين قال : إزيك يا ابن عمي؟
يحيى : عمار؟!
عمار : هما كلمتين، لو فاكر إن الفيديو بتاع السنيورة اتمسح ومالوش وجود يبقى ذكاءك خانك يا يحيى، الفيديو معايا، النسخة الأصلية منه في إيدي.
فتح يحيى عينيه بصدمة ثم قال : هو إنت... اللي صورتها؟!
عمار : طبعًا، هو فيه غيري، بس كنت عيل ساعتها وماعرفتش أستغل الموضوع، كان لازم أخلي الشباب يكملوا المهمة، بس قلبي الرهيف بقى خلاني أوقفهم في آخر لحظة.
أسودت عين يحيى بغضب مميت وقال من بين أسنانه : لو فكرت تعمل بيه حاجة هنسف الجبل باللي فيه، وإنت عارفني يا عمار، لو عملت اللي في دماغك هخليك عبرة لأهل أسيوط كلهم.
عمار : براحة بس، مش من مصلحتي إني أفضح المدام، زمان عملت كده عشان اختارتك وسابتني، مع إني كنت بحبها من قبلك بس هي ماهتمتش. لكن دلوقتي مش فارق معايا حريم، أنا عايز أرضي وحقي في ورثي أبويا اللي أبوك خده غصب.
يحيى : هتاخد الأرض تعمل بيها إيه وإنت مطلوب للعدالة؟!
عمار : تبيع الأرض اللي باسم أبويا وتجيبلي فلوسها وبقيت حقي، ده غير البيت كمان بتاعنا، تبيعه وتديني فلوسه. وساعتها تاخد الفيديو بتاع المدام، وإلا هيبقى متعة الرجالة هنا. هتصل بيك كمان يومين تكون نفذت اللي قولته.
أنهى المكالمة ويحيى ينظر إلى الهاتف بصدمة، الغضب أعمى عينيه ولم يتحمل ما يحدث، فعاد إلى المنزل مرة أخرى.
يبدو أن ما كانت تخشاه رهف على وشك أن يتحقق.