
رواية المطاريد الفصل الخامس عشر15 بقلم رباب حسين
بالماضي دفعت ثمن خطأ لم أرتكبه؛ هربت من مدينتي، وطني الذي لا يمكن أن ابتعد عنه. وهذا بعد أن بقيت عشرة أيام أنام في المساجد، كنت انتظر ظهور نتيجة الإختبارات متمسكة بحلمي الأخير. وحين تم الإعلان عنها؛ ذهبت إلى المدرسة متخفية بملابس المنتقبات كي أسحب الملف الخاص بي. كنت ارتجف من شدة الخوف، أنظر إلى كل من حولي حتى لا يراني حازم أو أبي حتى وصلت إلى داخل المدرسة.
سحبت الملف وخرجت من البوابة،وحينها تجمدت مكاني. حين وجدت حازم يقف مع أبي وينظران حولهما يبحثان عني. استجمعت شجاعتي ومررت بجوارهما وأنا أنظر إلى أسفل، حتى ابتعدت عنهما. وكانت هذه آخر مرة رأيت فيها أبي.
سافرت إلى القاهرة، دخلت الجامعة وحققت حلمي، ولكن غابت السعادة عني.
بحثت عن عمل كي اتكفل بمصاريف تعليمي ومعيشتي، حتى أنني عملت بثلاث وظائف. كنت أذهب إلى المحاضرات دون أن أنام.
نمت بالشوارع، أكلت فتات الخبز، تحملت الكثير والكثير، ساعدني الكثير من الناس ولكن هناك من يحاول إستغلال ضعفي ووحدتي، لولا رحمة ربي الذي كان يرسل إليَّ من ينجيني منهم. أما هذا الجرح الذي كان ينبض بقلبي؛ جعلني أخاف من كل الناس، حتى من حاول مساعدتي، كنت أظن به سوء رغمًا عني، حتى ابتعدت عن الجميع، صرت وحيدة بلا رفيق أو ونيس، حتى وصلت إلى شهادة الجامعة.
كل هذا وأنا أهرب من حازم، وفي النهاية وصلت إلى حلمي الأكبر، كافئني الله بعودة أحبائي بجواري؛ تزوجت من يحيى، ورجعت إليَّ عائلتي، والسعادة ملأت قلبي بعد طول غياب خاصة بعد أن سامحني يحيى.
وحين غادر عدت أجلس بين عائلتي التي زادت عددًا، وعاد الدفء إلى قلبي من جديد، ولكن لا تزال الحياة تطعنني بسيوف الغدر.
فحين دخل يحيى المنزل ورأيت وجهه؛ شعرت بأن هناك شيء قد حدث، وليس شيئًا عاديًا؛ بل هناك صفعة جديدة ساتلقاها الآن.
دخل يحيى متجهمًا، فنظر نحوه الجميع بتعجب من هيئته، ثم اقتربت منه أمينة ووقف عزام على الفور ينظر إليه وهو يعقد حاجبيه. فقالت أمينة : خير يا ولدي! نظرتك ما تبشرش بالخير واصل.
نظر يحيى إلى رهف التي تترقب ما سيقول، ارتجف قلبه، فشعر أنها ترى ما بداخله، تعرف ما سبب الخوف الذي يقسم ملامحه، لذا حاول أن يخفي ما بعقله عنها، فهو لا يرغب أن يجعلها تعيش نفس الألم مرة أخرى. لذا هرب من نظراتها وقال : مفيش حاجة يا أما. أبوي... عايزك في المكتب.
أومأ إليه عزام وتوجه نحو المكتب، كاد يحيى يلحق به ولكن وقفت رهف أمامه ونظرت إليه، فأشاح بعينيه عنها حتى لا تنظر بداخلهما وقال : هخلص ما بوي وأجيلك.
أمسكت رهف بذراعه قبل أن يتحرك وقالت : مخبي إيه يا يحيى؟!
يحيى : هكون مخبي إيه بس! دي مشكلة في الأرض وهحلها مع بوي.
رهف : طول عمرك فاشل في الكدب، وبعدين أرض إيه اللي فيها مشكلة! مش إنت كنت رايح القسم؟
يحيى بحدة : خلاص بقى يا رهف، هقولك بعدين.
رهف بحزم : لأ هتقولي دلوقتي. ما تهربش مني وقولي حصل إيه؟ عمار عمل حاجة؟ قولي يا يحيى بقى.
ارتبك يحيى وقال : يا رهف قولتلك عندي مشكلة.
رهف : وطالما بتهرب مني يبقى المشكلة بسببي. وإنت عارف كويس إنك مهما تخبي هعرف في الآخر، فا قولي فيه إيه وما تكدبش عليا لو سمحت.
وقف عزام عند باب المكتب يسمع ما يقولان، والجميع ينظر إليهما بترقب، فقال حازم : لو عمار عمل حاجة يا يحيى قولنا، ما ينفعش تخبي علينا.
نظر يحيى إليه ثم تنهد بضيق وقال : عمار اتصل بيا. عايز حقه في الورث.
عزام : وعياخد حجه كيف وهو جاعد مع المطاريد، ولا عينزل يدير الأرض ويجعد في البيت وإنت ما تجبضش عليه عاد!
رهف : يا أما؟
نظر إليها يحيى ولم يجب فأردفت : هدددك بيا صح؟! هو إنت ليه مش عايز تقولي! مع إني أصلًا متوقعة إنه هيعمل كده.
حازم : وأنا كمان كنت متأكد إنه مش هيكست، ما تقول يا يحيى وخلينا نشوف حل سوا، إحنا دلوقتي عيلة واحدة واللي بيحصل ده يخصنا كلنا.
ضم يحيى رهف إليه بقوة وقال : مش عايزك تخافي، أيًا كان اللي بيهددني بيه مش هسمح إنه يعمله.
رهف : قالك إيه طيب؟ هيقول عن اللي حصل زمان.
يحيى : ﻷ... معاه نسخة من الفيديو... النسخة الأصلية.
عقدت رهف حاجبيها وقالت بصدمة : الأصلية! إزاي؟!
وقف عمر وحازم ينظران إلى بعضهما البعض بصدمة، ولكن أشارت لهما هبة بأن يهدئا، فالوضع مضطرب للغاية، ورهف على وشك الإنهيار. فهمست إلى عمر : استنى يا عمي شوية، حاول تهدى عشان رهف.
تمالك حازم وعمر غضبهما ولم يتحدثا. ثم اقترب يزن وعزام من يحيى وقال : كيف عاد؟!
يزن : النسخة الأصلية! يعني هو اللي صور؟!
أومأ إليه يحيى بألم يعصف بنظراته التي يبعدها عن رهف، ابتعدت عنه ولكن جذبها نحوه بقوة وقال : مش هتبعدي، مش هسيبك ولو فيها موتي.
أمينة : بعيد الشر عنيكم يا ولدي. وبعدين عاد يا حاج عزام، عنعمل إيه؟!
عزام : ما خبرش، عياخد الأرض كيف يعني؟!
يحيى : عايزنا نبيع الأرض اللي باسم عمي، وكمان نبيع بيته وياخد فلوسهم.
عزام : أبيع الأرض؟! أبيع أرض بوي! أرض التهامية! عمار عايز يجبلنا العار! وكل دي ليه! ده حتى مالوش ورث بعد ما عرفنا إنه حفيد الدهشان.
رهف : فيه حل تاني.
يحيى بحزم : ممكن تسكتي خالص، كل اللي إنتي عايزة تقوليه وبتفكري فيه تنسيه، مش هتخلى عنك عشان فلوس ولا أرض، ولو حتى هتنازل عن كل حقي في أملاك العيلة عشان أحافظ عليكي هعمل كده. يحيى التهامي مش بيرجع في كلمته، وأنا قولتلك إن مش هخلي حد يمس شعرة منك.
صمتت رهف ثم نظر يحيى إلى عزام وقال : الفلوس والأرض ولا عرض وشرف العيلة يا بوي، ولا عايز كل اللي في البلد يتكلموا على مراتي وأنا أقف اتفرج؟
عزام : لا يا ولدي، تغور الأرض والفلوس، المهم راسك تفضل مرفوعة بين الخلج، والبنية تفضل مستورة.
يزن : محلولة يا جماعة، إهدوا شوية. لو ده كمان اللي هيخلي عمار يبعد ونخلص من المطاريد؛ يبقى كأننا بيعنا اﻷرض عشان ننقذ أهل البلد منهم، وساعتها محدش هيلومنا.
أمل : ده غير إن أهل البلد عارفين إن البيت والأرض بتوع عمار، لأنهم ملك عمي مهران الله يرحمه.
أمينة : يبجى ما تضيعش وجت يا يحيى، إعرض الأرض والبيت للبيع.
يحيى : ما عنديش وقت أصلًا. هو مديني مهلة يومين.
نظرت رهف إلى أسفل بخجل، ثم تركتهم وصعدت إلى غرفتها. نظر يحيى إلى أثرها ثم نظر إلى حازم وقال : اتصرف مع أختك، أقنعها تشيل الكلام ده من دماغها، طلاق مش هطلق وخروج من هنا مش هيحصل.
هبة : أنا هطلعلها. بعد إذنكم طبعًا.
يحيى : اه طبعًا البيت بيتك.
صعدت هبة ثم اقترب عمر من يحيى وقال : ممكن بقى أفهم ليه ابن عمك عمل كده! إزاي يعمل في بنتي كده أصلًا!
يحيى : مش عارف، بس اللي فهمته إنه كان بيحبها، وعمار كان بيدرس معانا في إسكندرية، وكان يعرفها من قبلي، تقريبًا لم لقى رهف حبتني أنا اتجنن، وبعد طبعًا العداوة اللي حصلت بينا رجع إسكندرية وقرر ينتقم مني في كل حاجة، ﻷن هو عمل الفيديو ده قبل آخر يوم إمتحانات، وفي الوقت ده عمار كان أصلًا هربان وقاعد مع المطاريد، ولما رجع بعد نشر الفيديو وعرف يفرق بينا، وقتل جدي آخر يوم إمتحانات. يعني كان بيضربني من كل حتة. وده اللي مجنني ومزعلني أكتر، رهف دفعت تمن العداوة بيني وبينه، وأنا من غبائي صدقت وبعدت عنها.
أمينة : بكفياك يا ولدي لوم في نفسك. خلينا نشوف حل للموضوع ديه، البكى على اللي راح مش هيفيد عاد، وبكرة تعوضها عن كل اللي عاشته ديه. والحمد لله عيلتها رجعت جنبها تاني.
يحيى : الحمد لله، حقك عليا يا عمي.
عمر : إنت ذنبك إيه في اللي حصل! إنت دفعت التمن زيها، كفاية إنكم اتحرمتوا من بعض كل السنين دي، ووقفتك جنبها دلوقتي، وإن إنت بتحاول تحميها دي عندي بالدنيا. بس توعدني إنك هتقدر تحميها.
يحيى : أحميها بروحي. وأنا هخرج دلوقتي أشوف حد يشتري الأرض والبيت. أما خلي بالك من رهف، إياكم تخرج ولا تروح في حتة. دي مجنونة وأنا عارفها. ممكن تهرب من البيت.
أمل : ماتخفش، أنا كمان هطلع اتكلم معاها.
أومأ إليها يحيى وخرج من المنزل، ثم تنهد عزام بضيق وقال : حسبي الله ونعم الوكيل، لله الأمر من قبل ومن بعد! جيه الزمن اللي عيلة التهامية يهددوا بعضيهم بالعرض والشرف! يخوضوا في عرض البنية المظلومة! كل ده عشان الفلوس! يحرج الفلوس اللي تخلينا نوصل لكديه. حسبي اللي ونعم الوكيل.
توجه إلى مقعده في البهو وجلس متكئً على عكازه بحزن. عاد عمر يجلس معه وحازم، أما أمينة وأمل فتوجها نحو غرفة رهف. وحين دخلا وجدا هبة تحاول أن تتحدث معها، فجلست أمينة أمامها وقالت : وبعدين معاكي يا بتي! عتفضلي مشحتفة جلب الواد إكديه!
رهف : أنا مش قصدي أضايقه ولا أي حاجة من دي، بس بجد وجودي هنا أذية ليكوا كلكم.
أمل : يا ستي ما تقلقيش. يحيى هيقدر يحل الموضوع.
هبة : أنا لو منك فعلًا ماقلقش، يعني أنا لسه ماعرفش يحيى بس باين عليه من الرجالة اللي أد كلمتها، وبعدين ده طبع الصعايدة أصلًا، ومعارضتك ليه مش صح.
رهف : يعني أفضل هنا لحد ما كل حاجة تتفضح! هو إنتي ما شفتيش اللي حصلي زمان، ده مفيش حد ماكنش بيتكلم عليا، عايزني أعمل في يحيى كده!
أمينة : ومين جال بس إن هيحصل فضيحة لا سمح الله! ربنا هيدبرها، ويحيى خرج دلوك عشان يشوف بيعة للأرض والبيت، يعني عيديله الفلوس وياخد منه الزفت ديه، ونوخلص من الموضوع خالص. اصبري بص يا بتي، هملي يحيى يتصرف.
أومأت إليها رهف ثم قالت : طيب ممكن تسيبوني لوحدي شوية؟
نظرن إلى بعضهن البعض ثم تركن الغرفة، كان الخوف يسيطر على رهف حتى أصبح الهواء من حولها ثقيلًا.
أما يحيى، فذهب إلى أحد كبار البلدة، وطلب منه أن يشتري الأرض التي تخص عمه مهران، وأخبره أن عمار طلب ميراثه كي يترك البلدة، فقال وهدان : ديه أحلى خبر يا ولاد! يعني خلاص عاد؛ المطاريد عيمشوا؟!
يحيى : بتمنى يصدق، بس في النهاية ده حقه الشرعي، وإنت عارف أبوي مش بيتهاون في الحاجات دي.
وهدان : خابر زين، عزام طول عمره راجل حجاني. بس يا ولدي الطين غالي على جلبنا، طيب أنا عجولك، أنا عديك الفلوس وعاخد الأرض منيك، وعنزرها كيف ما بدك، ولما يتوفر معاك حجها تعالى أديني المال وخد الأرض. أنا مايرضنيش أزعل عزام واصل.
يحيى : كلك ذوق يا حاج وهدان، عمري ما هنسالك وقفتك دي أبدًا.
وهدان : إحنا أهل يا ولدي، وبعدين كفاية اللي عتعمله عشان أهل البلد كلياتهم، ده لولاك كان زمانا متبهدلين من المطاريد. إنت تطلب عنينا يا يحيى.
يحيى : إنتوا أهلي وناسي، ويعلم ربنا بخاف عليكم زي أهل بيتي بالظبط.
وهدان : ربنا يديم المعروف، عستناك بكرة بالعجد، وهتلاجي الفلوس اللي طلبتها. محتاج حاجة تاني؟
يحيى : لو تعرف حد ياخد بيت عمي كمان ابقى متشكر أوي.
وهدان : أيوة، سويلم كان عيدور على دوار جديد، عخبره وأردلك خبر.
يحيى : بس بسرعة يا حاج وهدان اللي يباركلك.
وهدان : بكرة هجولك وافج ولا لاه.
غادر يحيى وهو يتنفس براحة، فهو يعلم أن عزام وافق على بيع اﻷرض ﻷجله وﻷجل رهف، ولكنه يتعلق بالأرض كثيرًا، وما قاله وهدان سوف يهدأ من حزنه.
بعد وقت، وصل إلى المنزل، وجد الجميع بغرفهم، عدا أمينة التي جلست تنتظره، وحين رأته وقفت أمامه وقالت : عملت إيه يا يحيى؟ طمني.
يحيى : خير يا أما، الحاج وهدان هياخد الأرض، وقالي وقت ما يبقى معاك فلوس تعالى خدها تاني.
أمينة بسعادة : صوح يا ولدي! وهدان راجل زين بصحيح، طيب أدخل عند أبوك المكتب وخبره، أحسن متضايج جوي.
يحيى : هروحله، بس فين الجماعة.
أمينة : ناموا، كانوا تعبانين وكومان زعلوا على اللي حوصل. ورهف في أوضتها من وجتها ماخرجتش منيها.
يحيى : طيب أنا هشوف أبوي وبعدين هطلع أشوفها.
دخل يحيى غرفة المكتب، وجد عزام يجلس شاردًا وحين رأه قال : عملت إيه؟
قص له يحيى ما حدث، ثم قال : أنا قلت الخبر ده مش هيخليك تزعل يا بوي.
عزام : أنا زعلي علينا أكتر، شوف وصلنا لفين! التهامية بيهددوا بعضيهم بعرضهم وشرفهم! مش جادر استوعب اللي بيتجال ديه.
يحيى : خلاص يا بوي عشان خاطري، مش عايزك تضايق عشان ما تتعبش، وأكيد عمار في يوم من الأيام هيعرف غلطه.
عزام : أطلع شوف مرتك يا ولدي، وبراحة عليها شوي.
يحيى : عنيدة يا بوي، وأنا عارف إن دماغها ناشفة.
عزام : واه ما أنت زيها عاد، روح راضيها، كفاية إن اللي حوصل فيها ديه بسببنا.
أومأ إليه يحيى وغادر الغرفة، توجه إلى الطابق العلوي وصعد إلى غرفة رهف، طرق الباب ولكن لم يسمع صوتها، فطرقه مرة أخرى ربما نائمة ولكن لا رد، ففتح الباب ونظر في أرجاء الغرفة فوجدها فارغة، ثم لمح الخزانة ولم يجد أغراضها بداخلها، وقف مصدومًا ثم تحرك نحو النافذة، فتذكر أن أمينة كانت تجلس بالأسفل حتى عودته، فوجدها تركض بالحقيبة خارج المنزل، فهرول إلى أسفل مسرعًا وفتح باب المنزل وصاح باسمها قبل أن تخرج من الباب الرئيسي، فتجمدت محلها وسمعته وهو يقول : استني عندك.
التفتت نحوه، وحين رأت نظرته الغاضبة هربت الدماء من جسدها ووقفت تنظر إليه بقلق، ثم قال يحيى : رايحة فين؟!
لم تستطع أن تجب، فقط نظرت إلى الحقيبة بيدها وعادت النظر إليه، فأدرف : إنتي بتعصي أوامري! ده مفيش راجل بشنب في البلد دي يقدر يعملها؛ تيجي مراتي وتعملها! إنتي شكلك نسيتي إنتي نتجوزة مين!
رهف : ما هو أنا...
يحيى : أخرسي، أنا عمال أقول لنفسي معلش، استوعب اللي هي فيه، إنت اللي غلطت ولازم تتحمل نتيجة غلطك. وجيتي إنتي بنفسك الصبح قولتي أنا واثقة فيك، جاية دلوقتي تهربي!
رهف : ما هو اللي خايفة منه حصل وبيهددك بيا وبفضحتي. مش هستحمل فضيحة تانية.
يحيى : وأنا قولتلك مش هتحصل. صح ولا ﻷ؟ يبقى تصدقي كلمتي وتقعدي جوا البيت ده، وطالما ما أذنتلكيش بالخروج يبقى ما تخرجيش. كفاية هروب بقى، الأول كنتي بتهربي عشان لوحدك وخايفة، لكن أنا دلوقتي معاكي، كلنا معاكي خايفة من إيه!
رهف : خايفة عليك، مش خايفة على نفسي، أنا اتعودت على حياتي كده خلاص، اتعودت الناس تبصلي البصة اللي خايفة تشوفها أنت في عينيهم، أنا بحبك يا يحيى وحبي ليك مش هيسمحلي أعمل فيك كده.
يحيى : وأنا عشانك استحمل، وهستحمل أي حاجة بس تفضلي معايا. إنتي ليه مش عايزة تفهمي! كل حاجة تهون إلا بعدك، ماكنش فيه طعم ﻷي حاجة حلوة وإنتي مش موجودة، لكن دلوقتي حياتي بقى ليها معنى، بقى ليها سبب أحارب عشانه. حاربي إنتي مرة معايا.
رهف ببكاء : إوعى تكون فاكر بجد إن إنت لوحدك اللي اتعذبت، أنا كنت كل يوم بشوفك في أحلامي واصحى أدور عليك، ودلوقتي بقيت بين أيديا وخايفة عليك من نفسي، أنا نفسي ابقى جنبك وأنا مش خايفة بس الخوف اتكتب عليا يا يحيى، مش عايزة أخليك تعيش اللي أنا عيشته...
قاطعها يحيى حين اقترب منها وأوقف الكلمات قبل أن تنطقها، لم يتحمل بكاءها، ولا هذا الفراق الذي أرهق قلبه لسنوات. بعد لحظات ابتعد عنها وهو يتأمل ملامحها، وجدها هدأت بين يديه، ثم أشاحت بنظرها عنه بخجل، فقال : مفيش حاجة هتحصلي.
ثم مد يده وأخذ الحقيبة منها، ثم جذبها خلفه وعاد إلى المنزل، صعدا إلى الغرفة ووضع الحقيبة على الأرض ثم قال : حطي حاجتك مكانها.
كاد يغادر ولكن أمسكت رهف بيده، فالتفت نحوها وقالت : رايح فين؟!
يحيى : هنزل أنام.
رهف : مش خلاص اتصالحنا! هتنام في الأوضة التانية ليه؟
يحيى : مش عايز أضايقك بس.
شعرت رهف بالخجل في أن تطلب منه البقاء معها فقالت : وأنا مش عايزة بابا يلاحظ إن فيه مشكلة بينا.
يحيى بضيق : اااه، طيب هنام هنا.
تركها يحيى ودخل المرحاض، فنظرت رهف إلى أثره ولامت نفسها على ما قالت، ثم بدلت ثيابها سريعًا قبل أن يخرج، ونامت بالفراش.
خرج يحيى وتعجب حينما وجدها لا تنام على الأريكة. فاقترب من الفراش بهدوء ونام على طرفه حتى لا يزعجها، كان قلبه ينبض بعنف ولكن أخرسه حتى ينام، أما هي فكانت تغمض عينيها من شدة خجلها.
بعد دقائق فتحت عينيها ووجدته يواليها ظهره بعيدًا عنها. شعر يحيى بيدها تلتف حوله ودثرت وجهها به، ثم قالت : مش عايزاك تبعد أكتر من كده، تعبت من كتر ما أنا بحاول ابعد عنك، خلاص قلبي ما بقاش مستحمل.
التفت إليها وضمها بين ذراعيه وقال : ولا أنا.
هذه المرة لم يكن لقاءهما انتقامًا، أو إثباتًا لحقائق، بل لقاء يرمم جروح ظلت تدمي لسنوات، ولهيب اشتياق أطفئه عذوبة الكلمات.