الحلقة الأولى: رجوع الغايب
بعد خمس سنين غربة في دبي، رجع..
زين ولد الحاج عوض، اللي كان مسافر بهدوم مقطعة وشنطة بلاستيك، راجع دلوقتي بعربية جيب آخر موديل، لابس بدلة وعضلات ونضارة شمس، وريحته برفان يملي الشارع.
البلد كلها في سوهاج طلعت تتفرج قدام بيت الحج صالح الكبير.
الزغاريط من فوق السطوح، والحريم بتبص، والرجالة بتسلم.
الحج صالح جده حضنه حضن جامد وخبط على ضهره بعصايته:
• حمدالله على السلامة يا ولدي.. نورت دارك يا زين.. كبرت وبقيت راجل مالى هدومك.
زين باست راس جده: - داري منورة بيك يا جدي.
دخلوا المندرة، الشاي اتحط، والكل بيسأل عن السفر والفلوس والشغل في الخليج.
وفجأة الحج صالح بص للرجالة وقال كلمته اللي نزلت زي الطوبة على دماغ زين:
• اسمع يا زين يا ولدي.. انت رجوعك في وقته.. احنا خلاص اتفقنا، الجمعة الجاية هنقرا فاتحتك على ورد بت عمك عوض الله يرحمه.
الكوباية وقعت من يد زين واتكسرت.
• فاتحة مين؟! انت بتقول ايه يا جدي؟ بتهزر صح؟
الحج وشه قلب: - هزار ايه في جواز؟ ورد أمانة عمك في رقبتي من يوم ما مات، وانا وعدته انك انت اللي هتسترها، ومفيش كلام بعد كلامي.
زين وشه احمر ونسى كل الناس اللي قاعدة:
• يا جدي مينفعش! انا مرتبط! انا بحب واحدة من القاهرة بقالنا سنتين، متعلمة ومثقفة وبتساعدني في شغلي، اسمها فريدة وكنت هخطبها اول ما ارجع! • فريدة مين وبتاع مين؟ احنا معندناش بنات من برا تدخل دارنا، بنت عمك أولى بيك!
زين اتعصب اكتر وقال بسخرية وقلة احترام:
• بنت عمي مين يا جدي اللي أولى بيا؟ ورد؟ ورد اللي آخر مرة شفتها كانت في تالتة اعدادي واتنقبت وقعدت في البيت؟ اللي فاكرها جاهلة آخرها الغيط والمطبخ ومبتعرفش تفك الخط؟ انا مهندس يا جدي، عايز واحدة تشرفني قدام الناس، مش واحدة منتقبة محدش شاف وشها!
لحظة سكون.. الكل سكت.
وفجأة باب المندرة اتفتح بالراحة.
دخلت ورد.
لابسة جلباب أسود واسع ونقاب أسود تقيل، مش باين منها غير عنيها العسلي اللي بتلمع من كتر الدموع اللي حبساها، وريحة المسك بتاعها مالية المكان.
وراها كان الحج عبد الرحيم خالها، وشه احمر من الغضب وقال:
• جاهلة ومبتعرفش تفك الخط؟! يا خسارة تربيتك يا زين! دي ورد الأولى على دفعتها في كلية الألسن قسم انجليزي، وبتحضر ماجستير وبتدي كورسات في الجامعة في سوهاج، وبتترجم كتب! دي اللي انت بتقول عليها جاهلة علمت بنات المركز كله!
زين اتصدم وتنح: - نعم؟!
ورد قربت خطوة لقدام، وصوتها من تحت النقاب كان ثابت بس مجروح، وبصتله وقالت بالانجليزي قدام الرجالة كلها بطلاقة صدمت زين:
"I don't need your permission to be educated, Zayn. I was educated long before you learned how to respect a woman."
الرجالة كلها بصت لبعضها مبهورة.
كملت بالعربي وكرامتها بتنقح عليها:
• انا اه منتقبة يا ولد عمي، واه قاعدة في بيت جدي، بس عمري ما كنت جاهلة.. الجاهل هو اللي بيحكم على البنت من نقابها.. وانا بقى اللي مش موافقة اتجوز واحد شايفني قليلة وبيذل فيا قدام الناس.
زين حس انه اتهان قدام الكل، فحاول يرجع كرامته بعناد:
• كلمتين انجليزي حافظاهم من النت هتعمليلي فيها دكتورة؟ برضو هتفضلي بنت عمي اللي هتتجوزي غصب عنك!
ورد عنيها دمعت غصب عنها من تحت النقاب وقالت:
• الغصب ده ميمشيش عليا.. البيت اللي انت بتتريق عليه ده هو اللي ربى الراجل اللي واقف قدامي.. بس شكلك نسيت الأصل لما سافرت.
ولفت وطلعت تجري على أوضتها فوق، ودموعها نازلة تحت النقاب.
الحج صالح قام وقف وخبط عصايته في الأرض خبطة هزت البيت كله:
• اسمعوني انتوا الاتنين.. الجمعة الجاية قراية الفاتحة يعني قراية الفاتحة.. غصب عنكم! واللي هيكسر كلامي لا هو حفيدي ولا اعرفه!
زين طلع أوضته القديمة ورزع الباب وراه، طلع تليفونه يتصل بفريدة حبيبته بتاعة القاهرة، طوق النجاة الوحيد.
فريدة ردت ببرود: "بص يا زين انا زهقت من جو الصعيد وقراية الفاتحة ده، يا تيجي القاهرة دلوقتي وتسيبك من جوازة بنت عمك الجاهلة دي يا كل واحد يروح لحاله" وقفلت في وشه.
زين رمى التليفون.. حبيبته بتتخلى عنه، وجده بيجبره، والبت المنتقبة اللي كان فاكرها جاهلة طلعت متعلمة أحسن منه ومذاكرة أحسن منه.
وتحت في أوضتها، ورد قفلت الباب وقلعت نقابها لوحدها قدام المراية..
وش زي القمر بيعيط.. شعر أسود طويل.. وبياض يرد الروح.. وجمال محدش في البلد كلها شافه غيرها..
بصت لشهادتها المتعلقة على الحيطة وقالت بدموع:
"هيشوف.. والله لخليه يندم على كل كلمة قالها عليا"
وزين لسه ميعرفش ان البنت اللي كان بيتريق على نقابها.. أجمل من أي بنت شافها في دبي والقاهرة كلها.
يتبع