الحلقة التالتة: كورس الحب
في الحلقة اللي فاتت.. زين اتذل وطلب يتأسف لورد قدام بلد بحالها، وورد شرطها كان: تيجي تعتذرلي في قلب الجامعة قدام طلبتي.. وفريدة بعتتلها رسالة: "لازم نتقابل قبل ما تتجوزيه"
تاني يوم الساعة 8 الصبح..
زين واقف قدام المراية بنفس البدلة اللي كان فرحان بيها، بس المرادي كاويها وراشش برفان وايده بتترعش. فريدة لسه عاملاله بلوك.
ورد عدت من قدام أوضته، لابسة عباية سودا وشنطة قماش مكتوب عليها British Council
وقالت من غير ما تبصله: "لو هتيجي تعال من سكات، لو مش هتيجي هنقول انك تعبان.. مش هفضحك"
قاعة 305 - كلية الألسن
القاعة مليانة، وورد واقفة بتشرح بكل ثقة.. وفجأة الباب خبط.
زين دخل، الكل بص عليه، عرقان ومتوتر.
ورد مسكت نفسها وقالت: اتفضل يا باشمهندس زين.. ده الكورس المجاني اللي بعمله لبنات المركز اللي مش معاهم فلوس ياخدوا كورسات.
زين بلع ريقه وبص للطلبة كلهم وقال بصوت عالي:
"انا امبارح قولت كلمة عيب قدام رجالة العيلة.. قولت ان المنتقبة جاهلة ومكانها المطبخ.. وكنت غلطان.
انا سافرت 5 سنين فاكر نفسي اتعلمت، بس انا متعلمتش حاجة.. الاستاذة ورد الأولى على دفعتها ومعاها شهادة مدربة معتمدة من المركز الثقافي البريطاني وبتدي كورسات ببلاش للناس الغلابة.. تبقى مش جاهلة.. الجاهل هو اللي بيحكم على الناس من لبسها.
انا اسف يا بنت عمي.. حقك عليا قدام الكل"
القاعة سكتت ثانية.. وبعدها كلها سقفت.
ورد عنيها احمرت، بس المرادي مش من العياط.. عنيها كانت بتضحك لأول مرة.
قربت منه وهمست: "كنت راجل دلوقتي"
زين لسه هيرد.. تليفون ورد اللي على المكتب نور.
فريدة: "انا مستنياكي في الكافيه اللي قصاد الجامعة.. ارجوكي تعالي لوحدك"
ورد وشها اتقلب، خلصت الكورس بسرعة وقالت لزين: "استناني برا 5 دقايق ومتمشيش"
ونزلت جري على الكافيه.
دخلت لقت بنت شعرها اصفر، لابسة نضارة شمس جوا الكافيه وبتشرب Ice Coffee.
فريدة شالت النضارة وبصت لورد من فوق لتحت: "انتي ورد بقى؟ اللي زين هيسيبني عشانك؟"
ورد قعدت وثبتت نفسها: "انا اللي هيسيبك عشاني؟ ولا انتي اللي شايفاه بنك متنقل؟"
فريدة ضحكت ببرود وطلعت تليفونها وحطته قدام ورد:
"طب شوفي ده كده.. شوفي حبيب القلب كان بيقول عليكي ايه وهو معايا من يومين بس"
ورد مسكت التليفون وقرت أول رسالة في الشات..
وشها اتخطف.. وحطت ايدها على بوقها..