رواية بائعة البليلة بقلم سلوي عوض
رواية بائعة البليلة الفصل العاشر10 بقلم سلوي عوض
*نؤة:* هاه قولت إيه.
*رضا:* موافق طبعاً.
*نؤة:* كده أشطة، إيدك بقى على عشرين ألف جنيه.
*رضا:* ليه يعني.
*نؤة:* عربون محبة عشان أظبطلك الدنيا.
*رضا:* ماشي بس لو موافقتش.
*نؤة:* يبقى أنت متعرفنيش.
*رضا:* خدي بس حصل في الأمور أمور هاخدهم منك تاني.
*نؤة:* ماشي، سلام يا عريس.
*رضا:* يسمع منك ربنا.
لتتركه نؤة وتذهب إلى منزل جميلة لتقص عليها كل ما حدث، ثم تخرج لها المبلغ:
- *نؤة:* أنا خدت منه دوب.
- *جميلة:* أخص عليكي تاخدي فلوس حرام.
- *نؤة:* وأنتي تعرفي عني كده، بس كان لازم أعمل كده معاه عشان يصدق، لكن يا أختي حد الله بيني وبين الحرام.
- *جميلة:* أيوه كده جدعة، أستني بقى لما أتصل على حسن بيه وأعرفه اللي حصل.
وبعد أن تحدثت جميلة مع حسن عبر الهاتف:
- *نؤة:* قالك إيه.
- *جميلة:* بيقول برافو عليها عشان ميشكش في حاجة.
- *نؤة:* المفروض بقى أنا هنزله بعد المغرب وأقوله إنك هتروحي عند زوبة على الساعة عشرة وأنا هكون معاكي.
- *جميلة:* تمام، أنا فرحانة أوي إني هشوف عاصم.
- *نؤة:* أوبا وقعتي بلسانك.
- *جميلة:* لا عادي.
- *نؤة:* حبتيه صح.
- *جميلة:* صح بس أنا فين وهو فين، أنا يا دوبك بياعة فول وبليلة، لكن هو بيه كبارة وابن ناس.
- *نؤة:* كل الناس ولاد ناس، وبعدين الحب مالوش دعوة بالغني والفقر، القلب وما يريد.
- *جميلة:* اللي عايزه ربنا يكون.
- *نؤة:* هنزله أنا، المغرب بيدن أهو.
- *جميلة:* وأنا هصلي وأجهز، بس قوليلي صح أنا رايحة لزوبة ليه.
- *نؤة:* ما أنا هقوله إني عايزة أتفق معاها على خطوبتي، المهم هنعمل إيه بالفلوس ديه.
- *جميلة:* هقولك، عارفة خالتك أم خليل بتاعة البخور.
- *نؤة:* آه طبعاً.
- *جميلة:* بنتها هتولد.
- *نؤة:* أروح أنا أولدها يعني ولا إيه.
- *جميلة:* لا طبعاً، أنا قولت كده بس أصل جوز بنتها توفي وهو راجع من شغله، ويا عيني الدكتورة قالت لهم لازم ولادة قيصرية عشان الماية اللي حوالين الجنين نشفت، وكمان لازم العيل يخش الحضانة، يعني موت وخراب ديار، هي قالت لأمي هوديها مستشفى حكومي، بس لما راحت قالولها مافيش حضانات هناك.
- *نؤة:* طب أندهيلي على أمك.
- *جميلة:* ليه.
- *نؤة:* خالتي كريمة، يا خالتي.
لتدخل عليهم كريمة:
- *كريمة:* إيه يا نؤة دايماً كده عاملة صداع.
- *نؤة:* أسمعي خدي الفلوس ديه أديها لأم خليل وقوليلها إنك لميتي جمعية، ولا أقولك قوليلها دول تحويشة عمر جميلة.
- *كريمة:* والله ما أنا فاهمة حاجة.
- *نؤة:* يوه يا خالتي أعملي اللي بقولك عليه بس، هطير أنا.
لتتركهم نؤة وتنزل:
- *كريمة:* مال البت المجنونة ديه وجابت الفلوس ديه كلها منين.
- *جميلة:* هصلي المغرب وأحكيلك كل حاجة.
- *كريمة:* طيب أروح أتوضى وأصلي وبعدين أسمعك.
*أما في منزل العم ياقوت فها هو يجلس مع زوجته مديحة ومعهم فهيمة:*
- *ياقوت:* مبسوطة معانا يا أبلة فهيمة.
- *فهيمة:* الحمد لله ربنا يسترها معاكم زي ما سترتوني.
- *مديحة:* ده أنتي جيتي مليتي علينا البيت أنتي وولادك.
- *ياقوت:* الولية عفاف مش هاممها حد، الواد زيزو بيطلع يقعد معاه ويبيت كمان، واشترى مكنة جديدة وهي بتركب وراه، غير الضحك والمسخرة طول الليل، وحكاويه على القهوة للشباب حاجة أستغفر الله العظيم.
- *فهيمة:* أنا جاتني فكرة حلوة.
- *ياقوت:* خير.
- *فهيمة:* حضرتك هتقعد على القهوة وتسمع وتسجل كل اللي بيقوله، ويا سلام لو حد يسحبه في الكلام، أصل أكيد هو وعفاف ليهم يد في اللي حصلي.
ثم تسمع رنين هاتفها:
- *فهيمة:* الله ديه أمي.
- *والدتها:* أيوه أمي.
- *والدتها:* أنتي فين وإيه اللي أنا سمعته ده.
- *فهيمة:* سمعتي إيه.
لتقص عليها والدتها كل ما قالته لها عفاف:
- *فهيمة:* وأنتي تعرفي عن بنتك اللي أنتي مربياها كده.
- *والدتها:* أعوذ بالله لا يا بنتي، ده أنتي تربيتي.
- *فهيمة:* أنا قاعدة عند عمي ياقوت وخالتي مديحة لغاية ما أثبت براءتي.
- *والدتها:* يا ندامة يا بنتي تقعدي عند الناس الغرب وبيت أهلك مفتوحلك، تاكلي لقمة وترمي عشرة.
- *فهيمة:* معلش يا أما عشان أبقى جنب الحارة وأعرف كل حاجة.
- *والدتها:* طيب أديني العنوان عشان أجيلك.
- *فهيمة:* حاضر.
ثم تملي العنوان لوالدتها:
- *والدتها:* ده قريب هنا جنبنا، بعد العشا إن شاء الله هكون عندك.
- *فهيمة:* إن شاء الله.
وبعد ساعة تصل السيدة نحمده والدة فهيمة إلى منزل العم ياقوت وهي تحمل أشياء كثيرة:
- *مديحة:* أهلاً وسهلاً بالست نحمده، أتفضلي يا أختي، ده أنا مشوفتكيش بقالي ييجي شهرين.
- *نحمده:* مشاغل الدنيا بقى، حقك عليا يا أختي.
- *مديحة:* إيه كل اللي أنتي جايباه ده.
- *نحمده:* حاجة بسيطة، ميجيش من بعد خيركم، ده أنتوا أويتوا بنتي وعيالها عندكم، كتر خيركم.
- *مديحة:* والله أزعل منك، فهيمة زي بنتي وربنا اللي عالم.
- *نحمده:* أصيلة يا أختي.
- *فهيمة:* شوفتي يا عفاف عملت فيا إيه.
- *نحمده:* حسبنا الله ونعم الوكيل، ربك هيظهر الحق وقادر يخسف بيها الأرض، كله إلا سمعة الولايا.
ونتركهم ونذهب إلى منزل زوبة، فها هي جميلة قد حضرت لتجد رضا يجلس معهم:
- *جميلة:* الله أنت هنا يا معلم.
- *رضا:* إيه زعلتي عشان أنا قاعد.
- *جميلة:* أبداً بس أصلي أتاخدت شوية.
ويحدث كل هذا أمام عاصم الذي كان يستشيط غضباً وغيرة:
- *جميلة:* إيه يا نؤة مش هتتفقي على خطوبتك.
- *نؤة:* هتصل على عبده وأقوله.
لتتصل نؤة على عبده، وبعد أن انتهت من المكالمة:
- *نؤة بتمثيل الزعل:* بيقولي نأجلها شوية.
- *رضا:* طب إيه رأيك يا جميلة نعمل خطوبتنا احنا، وافقي بقى وأنا أخليكي ست الحارة كلها.
- *جميلة:* طب أديني فرصة أفكر.
- *نؤة:* متبطلي دلع بقى، الراجل شاري.
- *جميلة:* خلاص موافقة بس بشرط.
- *رضا:* شرطين تلاتة.
- *جميلة:* نخليها خطوبة في السر لغاية ما أقنع أبويا وأمي، عشان يعني أنت متجوز، وحرام أقولك طلقها.
- *رضا بخبث في نفسه:* حلو أوي كده، بديعة مش هتعرف.
- *زوبة تزغرت:* ألف مبروك، كده نعمل لكو الخطوبة النهارده عندي في الشقة.
- *جميلة:* خليها بكرة أكون أستعديت.
- *رضا:* وكمان عشان أشتري الشبكة.
ثم يخرج رزمة مالية:
- *رضا:* خدي يا عروستي عشان تروحي الكوافير وتشتري الفستان.
- *جميلة:* أيوه بس.
- *نؤة:* هات يا أخويا.
ثم يخرج رزمة مالية أخرى:
- *رضا:* خدي يا ست زوبة يا وش الخير عشان تعملي عشا حلو.
ثم ينظر إلى عاصم:
- *رضا:* مالك يا أفندي مكشر ليه.
- *عاصم:* لا أبداً، ألف مبروك.
- *جميلة:* أروح أنا بقى عشان محدش يستعوقني.
- *رضا:* بس أعملي حسابك السهرة صباحي.
- *جميلة:* آه ما أنا هقولهم في البيت إني هبيت عند نؤة.
- *نؤة:* طب يلا يا عروسة عشان نشوف ورانا إيه.
*أما في منزل عفاف فكانت تجلس مع زيزو ليمثل زيزو الحزن:*
- *عفاف:* مالك فيك إيه.
- *زيزو:* أنا مش هاجي هنا تاني.
- *عفاف:* ليه بس.
- *زيزو:* أنا مش جوز الست، أصبري بقى لما أشتري بيت وأستتك فيه، يا أما تكتبيلي البيت باسمي.
- *عفاف:* وماله أكتبهولك، ميغلاش عليك ولا تزعل أبداً.
- *زيزو:* خلاص خدي أمضي، أنا معايا العقد.
- *عفاف:* هات يا أخويا.
- *زيزو:* أخوكي إيه، ده أنتي مراتي وحبيبتي.
- *عفاف:* تسلملي، ده أنت بالأربعة اللي اتجوزتهم قبلك.
- *زيزو:* وأنتي بكل ستات الدنيا.
- *عفاف:* يخليك ليا.
- *زيزو:* طب إيه مافيش أي حاجة تحت الحساب.
لتقترب عفاف منه لتحاول أن تقبله، ليبتعد عنها زيزو:
- *زيزو:* يا وليه أنا قصدي على البرادس، حبيبك مقشف معهوش مليم.
- *عفاف:* يا واد أنت بتودي فلوسك فين، ده أنت عمال تسحب مني أد كده.
- *زيزو يمثل الحزن:* خلاص مش عايز، أنا غاير في داهية.
- *عفاف:* أستنى متزعلش، هقوم أجيبلك، مقدرش على زعلك يا زوز.
ثم تتركه وتدخل غرفتها، ليبصق عليها:
- *زيزو:* غوري جاتك داهية، وليه حيزبونة، صبرك عليا، أنا ما رميتك في الشارع مبقاش أنا الزوز، آه بس لو اللي بحبها تحس بيا، ده أنا كنت أبيع الدنيا عشانها، آه يا قلبي اللي وخداك، نؤة، أنا عارف عاجبها إيه في المشحم المزيت ابن الشحاتين ده، أخد الفلوس وأنزل وأحاول أزغلل عيونها، بنت إيه عليها جوز عيون يلوحوا الباشا، مش أم عين مدعمسة ديه اللي عايزة تهد حيلي وتاخد صحتي.
لتخرج عفاف من الغرفة:
- *عفاف:* خد يا زوز الفلوس أهيه.
- *زيزو:* يا سلام بعد إيه، مش عايز.
- *عفاف:* خد بقى متبقاش بايخ.
- *زيزو:* آه لو مكنتش بحبك يا فوفتي، أنا نازل بقى.
- *عفاف:* متخليك قاعد معايا شوية.
- *زيزو:* ما أنا هجيلك كمان ساعتين، بس وضبي أنتي المسائل وجهزي الحاجة.
- *عفاف:* عيني بس متتأخرش، أنت عارف إني بنام بدري.
- *زيزو:* ياك تتخمدي متقومي يش، بس أكون شطبت عليكي.
ثم يتركها ويذهب ليجلس على المقهى، ليجد فولة جالساً يحتسي القهوة:
- *فولة:* أهلاً وسهلاً بالعريس الزوز.
- *زيزو:* يا عم روح في داهية، ده وليه بومة، وليه قثرية.
- *فولة:* ليه يا عم، ما أنت عايم على وش الفتة أهو.
- *زيزو:* أيوه بس وليه هم.
- *فولة:* بس أنت وقعتها على بوزها.
- *زيزو:* أنا بس نفسي أوقع القمر اللي بحبها، ست البنات نؤتي.
- *فولة:* جاتك داهية في ذوقك، ديه بت لسانها طويل أوي، وكمان ديه بتحب الواد عبده.
- *زيزو:* عارف بس نفسي تشوفني وتحبني أنا، ديه كل أملي في الحياة.
- *فولة:* خلاص حاول معاها، أنا شوفتها كانت واقفة مع المعلم رضا وكانوا بيضحكوا كمان.
- *زيزو:* بجد يا فولة.
- *فولة:* آه يا عم.
وأثناء حديثهم كان يستمع لهم العم ياقوت، ثم يذهب دون أن يشعر به أحد، ليذهب إلى منزله ليقص كل ما حدث على زوجته وفهيمة:
- *فهيمة:* حلو أوي، يبقى الحل في نؤة، وهي كده كده بنت حلال وجدعة.
- *ياقوت:* خلاص أتصلي عليها، وهي اللي هتقف جنبك وتحل مشكلتك.
- *فهيمة:* حاضر.
لتتصل فهيمة على نؤة:
- *نؤة:* أبلة فهيمة أنتي فين، مش باينة.
- *فهيمة:* لما تيجي هتعرفي، بقولك عارفة بيت أهل طنط مديحة مرات عم ياقوت.
- *نؤة:* عارفاه، مش ده اللي جنب المخزن بتاع عم ياقوت.
- *فهيمة:* هو ده، تعالي عشان عايزاكي ضروري، أصل أنا واقعة في مشكلة كبيرة خربت بيتي، وأنتي اللي عندك الحل بعد ربنا سبحانه وتعالى.
- *نؤة:* يا ستار يا رب، ليه كده.
- *فهيمة:* ده اللي حصل.
- *نؤة:* طب ينفع أجيب جميلة معايا.
- *فهيمة:* آه طبعاً وماله، جميلة ديه أختي.
- *نؤة:* طيب هفوت عليها وأجيبها معايا.
- *فهيمة:* متحرمش منك يا حبيبتي.
ثم تغلق فهيمة الهاتف مع نؤة:
- *مديحة:* هاه قالتلك إيه.
- *فهيمة:* قالت جاية هي وجميلة.
- *مديحة:* جميلة بنت كريمة، ديه البت ديه مسكرة أوي، بحبها، ديه عليها حبة فول وحبة بليلة يفتحوا النفس، وكفاية أدبها وأخلاقها، طالعة لأمها، أصل أمها ديه صاحبتي ومتربين مع بعض.
وها هي نؤة تذهب إلى جميلة:
- *جميلة:* يا بنتي هو أنا مش هعرف أرتاح منك شوية.
- *نؤة:* ويعني أنا اللي دايبة في غرامك، بس أصل حصلت حاجة غريبة أوي.
- *جميلة:* خير في إيه، احنا لحقنا.
- *نؤة:* مش احنا، أبلة فهيمة عندها مشكلة وبتقول خراب بيوت، وعايزاني أروحلها بيت أهل أبلة مديحة مرات عم ياقوت، وأنا قولتلها هجيب جميلة معايا.
- *جميلة:* طب يلا نروح نشوف في إيه، وإيه اللي وداها هناك.
- *نؤة:* تعالي نشوف.
وبعد أن وصلوا إلى منزل العم ياقوت:
- *مديحة:* يا مرحب يا بنات تعالوا.
- *فهيمة:* حقكم عليا إني جيبتكم على ملي وشكم كده.
- *نؤة:* في إيه وإيه اللي قولتيه في التليفون ده.
- *فهيمة:* هقولكم.
*أما في منزل زوبة فكان عاصم يجلس يدخن سيجارة تلو الأخرى وهو في حالة غضب شديد، وهنا تتصل عليه حنان والدته:*
- *حنان:* عاصم حبيبي، أخبارك إيه، وحشتني.
- *عاصم:* وأنتي كمان وحشتيني.
- *حنان:* أنت جاي أمته.
- *عاصم:* مش بس لما أخلص اللي أنا فيه يا أمي، أقولك أنا هخلي خالد يجيبك هنا عندي.
- *حنان بفرحة:* بجد.
- *عاصم:* آه يا حبيبتي، بس عايزك تلبسي لبس شعبي عشان محدش ياخد باله منك، وخالد أنا هفهمه ياخد باله وأنتوا جايين في الطريق، وكمان عشان أعرفك على شخصية جدعة أوي وطيبة أوي