رواية بين عينيك وطن الفصل الرابع4 بقلم ملك احمد محمد

رواية بين عينيك وطن بقلم ملك احمد محمد
رواية بين عينيك وطن الفصل الرابع4 بقلم ملك احمد محمد
أومأ راكان لها، ثم نهض من مقعده واتجه خلف والده، محاولًا أن يجد طريقة يهدئ بها غضبه قبل أن تتفاقم الأمور أكثر من ذلك.

نظرت العنود إلى زوجها الذي ابتعد، ثم أطلقت تنهيدة خفيفة وهزّت رأسها بأسف، قبل أن تتحدث بصوت مسموع:

العنود: الله يهديك يا أبو راكان، راكان ما قصّر معك، ليه معصّب نفسك كذا؟

لكن يحيى لم يُجبها، واكتفى بالابتعاد، بينما ظل راكان يتبعه بهدوء، محاولًا التفكير في طريقة مناسبة للتحدث معه دون أن يزيد من انفعاله.

@@@@@@@@@@@@@@@@@@@

خرج راكان خلف والده إلى الحديقة، فوجد يحيى يجلس على أحد الكراسي، ممسكًا بسيجارته وينظر أمامه بشرود.

اقترب منه راكان بخطوات هادئة، ثم جلس إلى جواره، وألقى نظرة سريعة على السيجارة بين أصابعه قبل أن يتحدث.

راكان: غلط يا بابا التدخين ده.

سحب يحيى نفسًا من سيجارته، ثم أخرجه ببطء وهو يقول بضيق:

يحيى: سيبني أطلع الضيقة اللي جوايا يا راكان.

راكان: ماشي، بس الحاجات دي مش هتحل حاجة، بالعكس، إنت كده بتتعب نفسك على الفاضي.

التفت إليه يحيى للحظة، ثم أعاد نظره إلى الحديقة، وكأنه لا يريد الدخول في نقاش جديد.

يحيى: إنت مش فاهم أنا حاسس بإيه.

راكان: طب فهمني يا بابا، يمكن أقدر أساعدك.

يحيى: أساعدني إزاي؟ أنا عايز حاجة معينة، وإنت مش عارف تعملها.

عقد راكان حاجبيه قليلًا، محاولًا فهم ما يقصده والده تحديدًا، ثم تحدث بهدوء.

راكان: هما مش عايزين يبيعوا، خلاص يا بابا، مش هنضغط عليهم أكتر من كده. إحنا حاولنا معاهم بكل الطرق، ومش كل حاجة بنتمناها لازم تحصل.

يحيى: بس أنا عايز المكان ده بالذات!

ارتفع صوته قليلًا، فالتزم راكان الصمت للحظات، ثم نظر إليه محاولًا معرفة السبب الحقيقي وراء إصراره.

راكان: طب ليه؟ يعني لو الموضوع موضوع فلوس، وإنهم طالبين مبلغ أكبر، قولي وأنا أتصرف. بدل المليون أديك مية مليون عادي، بس المهم ما تتعبش نفسك بالشكل ده.

التفت إليه يحيى بنظرة حادة، وكأنه لم يعجبه أن يختصر ابنه الأمر في المال.

يحيى: إنت لسه مش فاهمني يا راكان!

راكان: أومال أفهم إيه يا بابا؟ أنا بحاول أساعدك، وإنت مش راضي حتى تفهمني إنت عايز إيه بالظبط.

تنهد يحيى، وأطفأ سيجارته، ثم استند بظهره إلى الكرسي قبل أن يتحدث مجددًا.

يحيى: أنا والعيلة دي من زمان وإحنا بنتخانق على المكان ده. كل مرة كان بيحصل فيها خلاف بينا، كان الموضوع بينتهي من غير ما حد فينا يوصل للي عايزه. وفي الآخر، هما اللي أخدوه!

ظل راكان ينظر إليه باهتمام، وقد بدأ يفهم أن المسألة أقدم مما كان يتخيل، وأن الأمر لا يتعلق بالدار وحدها، بل بخلاف قديم لم ينتهِ حتى الآن.

راكان: يعني الموضوع مش موضوع الدار بس... دي منافسة قديمة بينكم؟

يحيى: تقدر تقول كده.

راكان: طيب، وإنت عايز تكسبها دلوقتي بأي طريقة؟

لم يُجب يحيى مباشرة، لكن ملامحه كانت كافية لتوضيح موقفه، فقد بدا واضحًا أنه لا يزال متمسكًا برأيه، ولا ينوي التراجع بسهولة.

أطلق راكان تنهيدة، ثم مرر يده على شعره وهو يحاول اختيار كلماته بعناية، فلم يكن يريد أن يتحول الحديث بينهما إلى خلاف آخر.

راكان: بص يا بابا، أنا مقدّر إن الموضوع مضايقك، ومش هقولك إنك تنساه في يوم وليلة. بس مفيش حرب بتدوم، وفي الآخر يا إما بتكسب يا إما بتخسر، ولازم الواحد يعرف يتقبل الخسارة لو حصلت. مش كل حاجة تستاهل إننا نفضل نحارب عشانها العمر كله.

نهض يحيى من مكانه، ونظر إلى ابنه بملامح لم تتغير كثيرًا، ثم قال بنبرة حاسمة:

يحيى: أنا قولتلك اللي عندي يا راكان.

ثم استدار وغادر المكان دون أن ينتظر ردًا آخر.

بقي راكان جالسًا مكانه، يتابع ابتعاد والده حتى اختفى عن نظره، ثم أطلق تنهيدة طويلة وأراح ظهره إلى الكرسي.

راكان: وبعدين معاك يا بابا؟

ظل ينظر أمامه، مستغرقًا في التفكير فيما يمكنه فعله لإقناع والده بالتراجع عن هذا العناد، لكنه لم يجد إجابة واضحة.

وفجأة، قاطع صوت هاتفه شروده.

أخرج الهاتف من جيبه، وما إن رأى اسم المتصل حتى ارتسمت ابتسامة صغيرة على وجهه، ثم أجاب.

راكان: ألو يا أستاذ!

الشاب: أيوه يا راكان ، عامل إيه؟

راكان: جاي دلوقتي تسأل عليّا؟ بعد قد إيه يا بني؟ ولا إنت نسيت إن ليك أخ أصلًا؟

ابتسم  الشاب من الطرف الآخر، ثم أجابه بنبرة مازحة:

الشاب: عادي، إنت عارف قد إيه أنا بكون مشغول. وبعدين ما أنا أهو بكلمك، أمال عايز إيه تاني؟

ابتسم راكان وهو يهز رأسه بخفة.

راكان: لا، ما أنا لازم أرخم عليك شوية، وإلا هتنساني خالص. المهم، احكيلي بقى، عامل ايه في يومك ...

@@@@@@@@@@@@@@@@@@@

في الصباح...

في منزل متوسط الحجم، كانت جود تقف في الصالة، تحمل حقيبتها وتراجع أغراضها سريعًا قبل المغادرة، بينما كانت والدتها تتابع تحركاتها من الداخل.

جود: ماما، أنا ماشية!

جاءها صوت والدتها من الداخل:

الأم: استني يا جود، رايحة فين كده من غير ما تفطري؟
التفتت جود نحوها، ونظرت إلى الساعة في هاتفها بقلق، فقد تأخر الوقت بالفعل، وكان أمامها الكثير من العمل الذي ينبغي عليها إنجازه.

جود: يا ماما، أنا اتأخرت جامد والله، وعندي شغل كتير لازم أخلصه النهارده.

اقتربت منها والدتها وهي تنظر إليها باهتمام.

الأم: طب خدي أي حاجة يا بنتي، مش معقول تخرجي من البيت كده.

جود: والله يا ماما مش هلحق، أول ما أوصل هناك هبقى أشوف أي حاجة آكلها.

هزت والدتها رأسها باستسلام، ثم اتجهت إلى المطبخ وعادت بعد لحظات تحمل بعض السندوتشات وزجاجة عصير.

الأم: خلاص، خدي دول معاكي. حطيتلك السندوتشات والعصير في الشنطة، بس أوعي ترجعي بيهم زي كل مرة.

ابتسمت جود وهي تأخذ ما أعطتها إياه.

جود: حاضر ياماما ، أوامرك.

الأم: ربنا يهديكي يا جود، إنتِ طول عمرك مستعجلة كده.

جود: ما هو لو الشغل بيخلص نفسه كنت قعدت معاكي للصبح، والله!

ضحكت والدتها رغمًا عنها، بينما أسرعت جود نحو الباب، ثم التفتت إليها قبل أن تخرج.

جود: يلا، سلام يا ماما!

الأم: مع السلامة يا حبيبتي، وخلي بالك من نفسك.

جود: حاضر.

خرجت جود مسرعة، وأغلقت الباب خلفها، ثم توجهت إلى عملها وهي تفكر في المهام التي تنتظرها، متمنية أن يمر اليوم دون أي مفاجآت تعطلها.

@@@@@@@@@@@@@@@@@@@

أمام الدار...

توقفت السيارة أمام المبنى، وترجلت منها جود وهي تمسك بحقيبتها. أغلقت الباب، ثم ألقت نظرة سريعة على المكان قبل أن تتجه إلى الداخل.

كانت تفكر في يومها المزدحم، وفي الأعمال التي ينبغي عليها إنجازها، حين أوقفها صوت مألوف بالنسبة إليها من الخلف.

راكان: استني يا آنسة جود!

توقفت جود والتفتت إليه.

وجدته يستند إلى سيارته، وقد عقد ذراعيه أمام صدره، وكأنه كان ينتظر وصولها منذ فترة.

تطايرت بعض خصلات شعرها بفعل الهواء، فرفعتها بيدها سريعًا، ثم نظرت إليه باستفهام.

اقترب راكان منها حتى وقف أمامها، بينما ظلت هي في مكانها تنتظر أن يوضح سبب استيقافه لها.

جود: ممكن أعرف حضرتك عايز إيه؟

اعتدل راكان في وقفته، ثم قال بنبرة هادئة:

راكان: طيب، أنا ممكن أتكلم معاكي شوية؟

جود: اتفضل، سامعاك.

أخذ راكان نفسًا قصيرًا، ثم بدأ حديثه مباشرة.

راكان: بصي يا آنسة جود، أنا عارف إننا اتكلمنا في موضوع الدار قبل كده، وإنك وضحتي موقفك، بس أنا بجد محتاج المكان ده، وعايز أحاول معاكي مرة أخيرة قبل ما الموضوع يتقفل نهائي.

نظرت إليه جود باستغراب، ثم عقدت ذراعيها أمام صدرها.

جود: هو إنتوا مش بتزهقوا؟ أنا قلت لحضرتك إننا مش هنبيع، وإيه اللي مش واضح في الكلام ده؟

راكان: أنا فاهم إنك رافضة، بس يمكن لو سمعتي مني السبب كله، تغيري رأيك.

جود: في مليون مكان غيرها، ليه دي بالذات؟ وإشمعنى يعني؟

راكان: عشان مكانها مميز، ومفيش مكان تاني زيها. الدار دي مناسبة جدًا للمشروع اللي إحنا مخططين له، والمكان نفسه هيفرق معانا كتير.

هزت جود رأسها نافية، ثم ردت بحزم:

جود: تمام، وأنا مقدّرة إن المكان مناسب لحضرتك، بس ده مش معناه إننا مضطرين نبيع. إحنا عندنا أسبابنا، والدار دي مش مجرد مبنى بالنسبة لنا.

تأملها راكان للحظات، محاولًا أن يجد مدخلًا آخر للحديث، فقد جاء وهو يأمل أن يتمكن من إقناعها بالتفكير في الأمر مرة أخرى.

راكان: طيب، ما أنا ممكن أسمع أسبابكم وأشوف لو فيه حل يرضي الطرفين. مش لازم الموضوع ينتهي بالرفض من أول كلمة.

جود: حضرتك اتكلمت معانا قبل كده، وأخدت ردنا. مش شايفة إن فيه حاجة جديدة ممكن تتقال.
راكان: طب ما تديلي فرصة أحاول على الأقل!
جود: يا أستاذ، أنا عندي شغل ومش فاضية للكلام ده. وبعد إذنك، عايزة أدخل.
تحركت جود لتتجاوزه، لكنه مد يده وأمسك بيدها محاولًا إيقافها.
راكان: اسمعيني الأول، أنا لسه مخلصتش كلامي!
وفي لحظة، وقبل أن يتمكن من قول كلمة أخرى، دوّى صوت صفعة جود على وجهه
تعليقات



<>