الحلقة التانية: الكِبر والعِند
صوت قفلة فريدة لسه بيرن في ودان زين.
رمى التليفون على السرير، وقلع البدلة اللي كان فرحان بيها من شوية، فضل بالفانلة.. عضلاته اللي كان فاكرها هتبهر البلد، دلوقتي حاسس انها ملهاش لازمة.
تحت في الدور اللي تحتيه، صوت عياط مكتوم طالع من أوضة ورد، بس بعد دقيقة العياط اتقطع.. وطلع صوت تاني.
صوتها وهي بتدي درس!
زين قرّب من البلكونة القديمة اللي بتطل على المنور، وسمعها بتشرح لبنتين من بنات المركز:
"The past does not define you, your present does.."
الانجليزي طالع منها زي المية، مش كلمتين حافظاهم زي ما اتريق.
زين نزل على طراطيف صوابعه، عدى من قدام أوضتها، الباب كان موارب.. لمح شهادتها متعلقة: "ورد عبد الرحيم - الأولى على دفعة كلية الألسن - جامعة سوهاج" وجمبها شهادة تانية TOT - مدربة معتمدة من المركز الثقافي البريطاني.
والأهم.. لمحها من غير نقاب لثانية وهي بتمسح دموعها.
ثانية واحدة بس خلته يتنح مكانه.
ده مش وش قمر.. ده قمر نزل قعد في أوضة في سوهاج!
رجع أوضته يجري، قلبه بيدق زي المجنون، مش من الجمال بس، من الكسوف.
بعد نص ساعة، الحج صالح نادى: "يا زين.. يا ورد.. انزلوا المندرة حالاً"
نزلوا الاتنين، ورد لابسة نقابها تاني، وعنيها حمرا، وزين عامل نفسه ماسك التليفون ومش مهتم.
الحج صالح: بص يا ولدي.. انت غلطت في بت عمك قدام الرجالة، والراجل لما يغلط يعتذر.. اعتذرلها.
زين بغرور: أنا؟ اعتذرلها؟ انا مقولتش حاجة غلط، ده كان رأيي.
ورد ضحكت ضحكة وجعت زين اكتر من الكلام:
• رأيك يحترم يا باشمهندس.. بس الرأي بيكون عن علم، وانت معلوماتك عني من 5 سنين فاتوا.. زي ما معلوماتك عن الأصل خلصت أول ما لبست البدلة.
الحج عبد الرحيم خالها قال: خلاص يا حاج صالح، احنا مش عايزين الجوازة دي، بنتنا عندها عرسان دكاترة ومهندسين تتمناها.
الكلمة نزلت زي النار على زين، معرفش ليه اتعصب!
زين: عرسان مين اللي يتمنوها وهي محدش شاف وشها أصلاً!
ورد لأول مرة رفعت صوتها: وشي مش للفرجة يا زين! وشي للي يستاهله ويصونه.. وانت لحد دلوقتي مثبتش انك تستاهل تشوف ضفره حتى!
وسكتت لحظة وقالت جملتها اللي سمّعت في المندرة كلها:
• عايز تعتذر؟ انا هقبل اعتذارك بشرط واحد.. تيجي بكرة تحضر الكورس بتاعي في الجامعة.. قدام كل الطلبة بتوعي.. وتسمعهم وانت بتقول ان المنتقبة مش جاهلة.
زين اتصدم: نعم؟ عايزاني اقول كده قدام بلد بحالها؟!
ورد: اه.. زي ما أهنتني قدام بلد بحالها.. ولا انت راجل بس وانت مسافر؟
الحج صالح خبط عصايته: اتفقنا! بكرة هتروح معاها الجامعة يا زين.. ودي أول خطوة قبل قراية الفاتحة الجمعة.
زين طلع يجري على أوضته، فتح تليفونه يبعت لفريدة: "ارجوكي ردي"
فريدة عملتله بلوك. ظهر الـ Seen واختفى.
وفي نفس اللحظة، تليفون ورد نور.. رسالة واتساب من رقم غريب:
"ازيك يا ورد.. انا فريدة.. حبيبة زين اللي من القاهرة.. لازم نتقابل، في كلام كتير اوي لازم تعرفيه عن زين قبل ما تتجوزيه"
ورد عنيها وسعت، وبصت ناحية أوضة زين اللي فوق..