الحلقة الثامنة: الصباحية.. وخناقة كوباية الشاي
الشمس طلعت على بيت أبو زين بدري كالعادة، بس النهاردة طلوعها كان مختلف..
الست أم زين صاحية من الفجر، عاملة صينية كبيرة عليها فطير وعسل وجبنة قريش وبيض، وبتزغرط لوحدها في المطبخ وهي بتقول: صباحية ورد.. صباحية بنتي اللي ربنا رزقني بيها.
أبو زين كان قاعد قدام البيت، ماسك السبحة والشاي، وكل اللي معدي يقوله: مبروك يا حاج.. عقبال ما تشيل عيالهم، يرد وهو رافع راسه للشقة اللي فوق: عقبال ما أربيهم أنا.. زين لسه عيل.
فوق..
الشقة اللي كانت ريحتها أسمنت امبارح، النهاردة ريحتها بقت ورد مغسول.
الطبق البلاستيك لسه على الأرض، والمية اللي فيه بقى لونها أحمر فاتح، والورد الأحمر اللي اتغسل نايم جنب ورد اللي نايمة على المرتبة وعبايتها البيضا متكرمشة عليها وحضناها زي عروسة لعبة.
زين صاحي من بدري، قاعد على الكرسي الوحيد اللي في الصالة، لابس جلابية بيضا نضيفة أمه طلعتهاله، وعينه على ورد ومش عايز يصحيها..
بس المنبه اللي جواه.. منبه الراجل المتجوز لأول يوم.. عمال يقوله: قوم اعمل راجل.. انده عليها تقوم تعملك شاي.. دي الصباحية.
فضل يتقلب.. يقوم.. يقعد..
وفي الآخر قال بصوت واطي وهو بيكح: ورد.. يا ورد..
ورد اتقلبت وهي نص نايمة: همم..
قال: قومي يا حبيبتي.. الساعة بقت 9.. أمك وأمي زمانهم طالعين.
ورد فتحت عين واحدة وقالت: 9 الصبح؟ احنا نمنا امتى أصلاً؟
قال: معرفش.. بس تقريباً بعد ما غسلنا الوردة التاسعة.
قامت ورد وهي شعرها منكوش والطرحة واقعة، بتدور على الإسدال، لقت عباية بيضا تانية أمها كانت حطاها لها في كيس جنب المرتبة ومكتوب عليها ورقة صغيرة: "إلبسيها في الصباحية يا وردة أمك".
دخلت أوضة صغيرة معمولة مطبخ، فيها بوتاجاز مسطح بعين واحدة وأنبوبة صغيرة وشوية كوبايات بلاستيك.
زين قاعد برا مستني كوباية الشاي بتاعة الصباحية.. اللي بيسمع عنها من وهو عيل.. أول شاي من إيد مراتك بيبقى ليه طعم تاني.
شوية وسمع صوت خبط..
ورد طالعة وشايلة صينية عليها كوبايتين شاي، واحدة مليانة على آخرها بتغلي، والتانية نصها بس، ووشها مقلوب.
حطت الصينية قدامه ورزعتها: اتفضل.
زين اتصدم: مالك؟
قالت: مفيش سكر.
قال: ازاي مفيش سكر؟ ده احنا بيتنا فوق بيت أبويا يعني خير ربنا كتير.
قالت وهي بتعيط على وشك تعيط: فتحت البرطمان لقيته فاضي.. دورت في الكيس اللي أمك جايباه ملقتش غير شوية ملح.. أنا مش عارفة أعمل كوباية شاي في صباحيتي يا زين! هتقول عليا إيه أمك؟ هتقول ورد خايبة؟
زين سكت لحظة.. وبعدين مسك كوباية الشاي النص مليانة وبص لها..
قال: دي بتاعتي؟
قالت: آه.. حطيتلك معلقة ونص ملح بالغلط على أساس إنها سكر.. دوقتها لقيتها ملح.. دلقت نصها و زودتها مية.
زين مقدرش يمسك نفسه.. انفجر ضحك.. ضحك عالي صحى الشارع كله.
ورد اتعصبت أكتر: بتضحك عليا؟ ده بدل ما تطبطب عليا؟ ده أول يوم ليا في بيتك!
قال وهو بيحاول يكتم ضحكه: يا بنتي أنا بضحك عشان ده نفس اللي أمي عملته لأبويا يوم صباحيتهم.. أبويا حكالي إنه شرب شاي بملح وقام باس إيدها وقال لها تسلم إيدك يا أحلى شاي دوقته.
ورد برقت: بجد؟
قال: آه والله.. وقعدوا شهر يشربوا شاي من غير سكر لحد ما جمعية البلد قبضت.
ورد ضحكت غصب عنها.. ودموعها نزلت.
قام زين خد كوباية الشاي المالحة وشرب منها بوق كبير قدامه وقال: الله.. عمرى ما دوقت شاي مالح بالحلاوة دي.. ده شاي الصباحية.. شاي ورد.
ورد شدتها منه: هتتعب بطنك يا مجنون!
قال: أتعب ولا متعبش.. ده شاي مراتي.
في اللحظة دي الباب خبط.. خبطتين حنينين..
أم زين وأم ورد داخلين شايلين صواني.. صينية الفطير وصينية تانية عليها برطمان سكر كبير وبرطمان شاي وكيس عيش.
أم زين أول ما شافت كوباية الشاي الملح قالت: إيه ده؟ انتوا بتشربوا مية البحر على الصبح؟
ورد وشها بقى أحمر زي الورد اللي جنبها وقالت: أصل.. أصل..
أم ورد لحقتها بسرعة وخدتها في حضنها وقالت: أصل زين من صغره وهو بيحب الشاي المالح.. مش قلتلك يا أم زين الواد ده هيتعب مراته؟
الكل ضحك.. و أم زين حطت البرطمانات وقالت: يا بنتي الصباحية مش بكوباية الشاي.. الصباحية إنك تصحي تلاقي راجل بيضحك على ملحك ومش بيعيب فيكي قدام أمه.. وإنك تلاقي ست بتحضنك بدل ما تقولك يا خايبة.
قعدوا الأربعة على الأرض.. على المرتبة.. يفطروا فطير وعسل، وزين كل شوية يبص لورد ويغمز لها: اشربي شايك المالح يا ورد.
بعد ما نزلوا، ورد لمت الصواني ودخلت تغسلهم في الطبق البلاستيك الصغير اللي كان فيه الورد..
زين دخل وراها، مسك إيدها اللي في المية وقال: سيبي المواعين.
قالت: أسيبها؟
قال: آه.. تعالي نعمل اتفاق.
قالت: اتفاق إيه؟
قال: من هنا ورايح.. أي خناقة بيني وبينك.. أي زعل.. أي حاجة.. آخرها كوباية شاي.. أنا أعملها مرة وانتي مرة.. حتى لو ملح.. نشربها سوا وننسى.
ورد بصتله وابتسمت: موافقة.. بس بشرط.
قال: قولي.
قالت: الشاي الجاي أنا اللي هعمله.. وهيبقى بسكر بجد.. عشان تفضل فاكر إن ورد بتعرف تعمل حاجة حلوة برضه.
قال: ورد طول عمرها بتعرف تعمل كل حاجة حلوة.. حتى وهي بترمي الورد في الزبالة كانت حلوة.
سكتوا لحظة.. وبعدين ورد قالت وهي بتبص من الشباك الصغير اللي بيطل على الشارع: زين.. هو احنا هنفضل على المحارة كده كتير؟
زين حضنها من ضهرها وقال: لا.. هنبيضها سوا.. وهنعلق الورد اللي اتغسل ده على الحيطة.. وكل حتة محارة هتبقى شاهدة إننا بدأنا من الصفر.
وفجأة تليفون ورد رن.. رقم غريب..
فتحت.. سمعت صوت..
فريدة بتعيط: ورد؟ والنبي سامحيني.. أنا في الشارع.. أمك طردتني وأم زين قالتلي متجيش ناحية بيتها.. ومش عارفة أروح فين.
ورد بصت لزين.. وزين سمع كل حاجة عشان السبيكر..
زين خد التليفون وقال بصوت هادي بس يخوف: يا فريدة.. احنا غسلنا الورد اللي اترمى.. بس مش هنغسل اللي عملتيه.. روحي لأهلك.. ولو شفتك تاني في شارع فيه ورد.. هخلي الشارع كله يعرف إن 30 فبراير ده كان يوم كدبك.
وقفل.
ورد كانت بترتعش.. زين خدها في حضنه وقال: متخافيش.. خلاص.. اللي فات مات.. والورد اتغسل.
ورد قالت وهي بتعيط في حضنه: أنا خايفة يا زين.. خايفة الحب اللي بدأ بخناقة ينتهي بخناقة.
زين رفع وشها وقال: الحب اللي يبدأ بخناقة كوباية شاي.. عمره ما ينتهي.. ده كل ما يعطش.. هيعمل كوباية تانية.
برا.. أم سيدة بتاعة الورد كانت بتفرش فرشتها على كوبري الجامعة وبتقول للعيال اللي معدية: النهاردة عندنا عرض.. اللي هيشتري وردة حمرا.. هياخد معاها حكاية زين وورد ببلاش!