اختل توازن ليل، ووقعت بقوة على أرض الملعب، لكن قبل ما جسمها يلمس الأرض، كانت الكرة اللي سددتها قد وصلت للسلة واستقرت بداخلها!
وفي اللحظة دي...
الحكم أطلق صافرة نهاية المباراة!
فريق ياسين فاز بالمباراة!
الجمهور انفجر بالتصفيق والهتاف، واللاعبون بدأوا يحتفلوا بالفوز، لكن الفرحة ما استمرتش طويلًا.
لأن عيون سيف وقعت على ليل اللي كانت لسه واقعة على الأرض.
سيف (بفزع): ليث!!
جري ناحيتها بسرعة، والابتسامة اللي كانت على وشه اختفت تمامًا.
سيف: ليث! إنت سامعني؟!
كان باقي الفريق اتحرك ناحيتهم بسرعة، ورامي أول واحد وصل بعد سيف.
رامي: إيه اللي حصل؟! ليث ماله؟!
ليل كانت ماسكة كاحلها وملامحها متألمة.
ليل: آه... رجلي!
سيف نزل على ركبته جنبها، وبص لرجلها بقلق.
سيف: إيه اللي وجعك؟ الكاحل؟ تقدر تحركه؟
ليل حاولت تحرك رجلها، لكنها اتألمت أكتر.
ليل: مش قادر... بتوجعني أوي.
سيف (بقلق): خلاص، متتحركش.
من غير ما يفكر، مد إيديه وشالها بين دراعاته.
رامي: استنى يا سيف، بالراحة عليه!
سيف: افتحوا الطريق!
اتحرك سيف بسرعة ناحية أوضة الاستراحة، ورامي وياسر ومؤمن مشيوا وراهم بقلق.
رامي: يا رب تكون بسيطة، ده إحنا لسه فرحانين بالفوز!
ياسر: اسكت يا رامي وخليك وراه.
دخل سيف أوضة الاستراحة، وحط ليل برفق على الكنبة، وبعدها نزل على ركبته قدامها.
سيف: وريني رجلك كده.
ليل كانت متوترة ومش قادرة تخفي ألمها.
ليل: براحة يا سيف... بتوجعني.
سيف: حاضر، متخافش.
بدأ يفحص كاحلها بحذر، ورفع رجلها قليلًا علشان يشوف مكان الإصابة.
سيف: واضح إنها اتلوت وإنت وقعت. فيه ورم بسيط هنا.
رامي قرب منهم وبص لرجل ليل باستغراب، وبعدها قال بمزاح:
رامي: استنى بس... هو إنت يا ليث بتلعب باسكت ولا بتجهز رجلك لمسابقة جمال؟
ياسر بصله باستغراب.
ياسر: إنت بتقول إيه يا ابني؟!
رامي: يا عم بص! دي رجل راجل؟! ناعمة ونضيفة كأن صاحبها عمره ما نزل ملعب في حياته!
ليل رفعت عينيها ناحيته بإحراج، وحاولت تسحب رجلها ، وحاولت تغير الموضوع لتنكشف
ليل: إنت مالك يا أخي؟! مش شايفني تعبان؟!
رامي ضحك.
رامي: خلاص يا سيدي، متزعلش. أنا بس مستغرب إنك مهتم برجلك اوى كدا
سيف (بحدة): رامي، ممكن تسكت شوية؟!
رامي رفع إيديه باستسلام.
رامي: حاضر يا كابتن، أنا غلطان إني بحاول أخفف الجو!
سيف رجع ركز مع ليل، وقال بنبرة أهدى:
سيف: اسمعني، مش عايزك تحاول تقف عليها خالص دلوقتي. لازم نكشف عليها ونطمن إنها مش إصابة قوية.
ليل هزت راسها بالموافقة.
وفي اللحظة دي، باب أوضة الاستراحة اتفتح، ودخل ياسين وهو مبتسم بحماس.
ياسين: يا جماعة! إنتوا مستخبيين هنا ليه؟! إحنا كسبنا يا رجالة! مبروك علينا الفوز! والله لعبتوا ماتش عظيم!
رامي بصله وقال:
رامي: مبروك يا كابتن، بس عندنا مصيبة صغيرة هنا!
ابتسامة ياسين بدأت تختفي لما لاحظ تجمعهم حوالين الكنبة.
ياسين: إيه اللي حصل؟!
قرب منهم، وأول ما شاف ليل قاعدة على الكنبة وسيف ماسك رجلها، اتغيرت ملامحه.
ياسين: ليث؟! مالك؟! إيه اللي حصل لك؟!
سيف رفع عينيه ناحيته وقال بجدية:
سيف: رجله اتلوت وهو بيحاول يسدد آخر كرة في الماتش.
ياسين بص لليل بقلق.
ياسين: إنت كويس؟ تقدر تحرك رجلك؟
ليل ردت بصوت متألم:
ليل: مش أوي يا كابتن... رجلي بتوجعني.
ياسين: طب إزاي محدش طلب الإسعاف لحد دلوقتي؟!
سيف: أنا هتصرف، بس لازم نطمن عليه الأول.
رامي دخل في الكلام:
رامي: المهم إننا كسبنا، وليث جاب لنا نقطة الفوز... بس واضح إنه قرر يحتفل بالوقعة بدل ما يحتفل معانا!
ياسر ضحك رغم قلقه.
ياسين بص لرامي بتحذير:
ياسين: رامي، مش وقته هزار.
رامي: خلاص يا كابتن، سكتنا أهو.
سيف رجع بص لليل، وملامحه لسه متوترة.
سيف: استحمل شوية، هنروح نكشف عليك دلوقتي.
ليل بصتله، وحاولت تبتسم رغم الألم.
ليل: متقلقش يا كابتن... أنا كويس.
سيف بص لها بجدية.
سيف: أنا اللي هحدد إذا كنت كويس ولا لأ، مفهوم؟
ليل ابتسمت بخفة، بينما فضل سيف جنبها مستني المساعدة الطبية.
بعد مرور عدة أيام...
كان الدكتور كشف على ليل بعد إصابتها في المباراة، وبعد الفحص أكد إن عندها التواء في الكاحل، ومحتاجة فترة من الراحة، مع استخدام رباط ضاغط وتجنب أي مجهود أو تدريبات لحد ما رجلها تتحسن تمامًا.
وطبعًا سيف أصر إنها تلتزم بتعليمات الدكتور، ومنعها من النزول للتدريبات مؤقتًا.
وده كان أكتر شيء مضايق ليل، خصوصًا إنها كانت متحمسة ترجع الملعب وتكمل مع الفريق.
وفي أحد الأيام...
كان الفريق كله متجمع في قاعة الاستراحة، بينما ليل كانت قاعدة على الكنبة فى اوضتها، رافعة رجلها المصابة على مخدة، والرباط الضاغط ملفوف حوالين كاحلها.
كانت باصة للموبايل بملل، وكل شوية تبص ناحية الشباب من الشباك اللى بيطل على الجنينة اللي قاعدين فيها بيتكلموا ويضحكوا.
رامي كان قاعد جنب ياسر ومؤمن، وأنس قدامهم، مشغول تمامًا بأكل البيتزا.
رامي بص ناحية ليل للحظة وهى بتبص عليهم، وبعدها رجع بص للشباب وقال فجأة:
رامي: إنتوا مش ملاحظين حاجة يا شباب؟
ياسر: حاجة إيه؟
مؤمن: خير يا عم؟ في إيه؟
رامي قرب منهم شوية، وبص حواليه كأنه هيقول سر خطير.
رامي: مش معقول أكون أنا الوحيد اللي ملاحظ الحاجة دي!
أنس (وهو بياكل): يا عم قول اللي عندك، إحنا مش فاضيين للألغاز!
رامي تجاهله وكمل:
رامي: إنتوا مش ملاحظين إن ليث ده قريب من البنات شوية؟!
الثلاثة بصوا له باستغراب.
ياسر: بنات؟! إنت بتقول إيه يا رامي؟
مؤمن: إنت خرفت ولا إيه؟!
رامي: يا جماعة ركزوا معايا! أنا حاسس إن ليث ده مش طبيعي!
مؤمن ضحك بسخرية.
مؤمن: مش طبيعي إزاي؟! إنت بقى عندك شك إن صاحبنا ده بنت؟!
رامي هز راسه بحماس.
رامي: أهو! أخيرًا حد فهمني!
مؤمن ضرب كف بكف.
مؤمن: يا نهار أبيض! بنت إيه يا رامي؟! إنت شفت بنت بتلعب كرة سلة بالحرفية دي؟! وبعدين حتى لو بنت، إزاي هتقدر تخدعنا كلنا بالشكل ده؟!
رامي: يا عم أنا مش بقولك إني متأكد، أنا بقولك فيه حاجات غريبة!
ياسر: زي إيه؟
رامي بدأ يعد على صوابعه.
رامي: أول حاجة، إنتوا ما شفتوش رجله عاملة إزاي؟! ناعمة بشكل غريب!
مؤمن: يا سلام! يعني عشان رجله ناعمة يبقى بنت؟!
رامي: استنى بس، ما تقاطعنيش! كمان ساعات بحس إن صوته رقيق شوية، غير شكله أصلًا، وفي حاجة تانية...
سكت لحظة، وبص لهم بتركيز.
رامي: إحنا عمرنا ما شفنا شعره!
ياسر رفع حاجبه.
ياسر: وبعدين؟! هو لازم نشوف شعره يعني؟! يمكن مش بيحب حد يشوفه من غير الكاب!
رامي: يا أخي إنتوا ليه مش عايزين تفهموا؟!
أنس كان لسه بياكل، لكنه رفع عينه وبص لرامي وقال بجدية مصطنعة:
أنس: أنا شايف إن علاقاتك مع البنات في الفترة الأخيرة جابتلك هوس يا رامي!
ياسر انفجر بالضحك، ومؤمن ابتسم.
رامي بص لأنس بضيق.
رامي: ركز إنت بس في الأكل بتاعك، وسيبك من العلاقات اللي في دماغك دي!
أنس رجع يبص للبيتزا.
أنس: أنا مركز أهو !
رامي تنهد بضيق، وبعدها بص لياسر.
رامي: طب وإنت يا ياسر؟ رأيك إيه؟
ياسر فكر شوية، وبعدها قال:
ياسر: بص، أنا معاك إن ليث ساعات تصرفاته غريبة شوية، ويمكن فعلًا شكله ناعم عننا، بس استحالة يكون بنت. ده لعب معانا ماتشات، وبيجري وبيسدد أحسن من ناس كتير في الفريق!
رامي هز راسه باعتراض.
رامي: ما هو ده اللي محيرني!
سكت لحظة، وبدأ يفتكر موقف قديم...
لما كان سيف بيحضن ليل في أحد المواقف السابقة، افتكر وقتها إن الحضن كان مختلف شوية، وإن سيف كان بيتعامل معاها بحذر وحنية مش متعود يشوفها منه مع أي حد.
افتكر كمان تحذير سيف ليه، لما طلب منه ما يفتحش الموضوع ده تاني.
رامي ضيق عينيه وهو بيفكر.
رامي (لنفسه): استنى بس... هو سيف كان عارف حاجة؟!
بص ناحية الباب اللي سيف وياسين قاعدين بره، وبعدها رجع بص للشباب.
رامي: خلاص يا شباب، سيبوا الحوار ده عليا.
مؤمن: يعني إنت ناوي تعمل إيه؟
رامي ابتسم ابتسامة غامضة.
رامي: أنا هعرف بنفسي، ولازم أجيب آخر الموضوع ده.
ياسر: بس إوعى تعمل مصيبة يا رامي!
رامي: متقلقش، أنا عارف أنا هعمل إيه.
أنس رفع قطعة بيتزا وقال:
أنس: طب لما تعرف، ابقى عرفنا وإنت جايب معاك أكل!
رامي بصله بغيظ.
رامي: إنت مش هتبطل أكل؟!
أنس: لأ.
ضحك ياسر ومؤمن، بينما رامي فضل باصص ناحية الباب وعقله مشغول بالفكرة اللي بدأت تكبر جواه.
في الخارج...
كان سيف وياسين قاعدين على مقعدين قدام قاعة الاستراحة، وكل واحد ماسك كوب قهوة.
ياسين كان بيتكلم عن المباراة الأخيرة وبعض الترتيبات الخاصة بالتدريبات القادمة، لكن فجأة بص لسيف بابتسامة جانبية.
ياسين: على فكرة يا سيف...
سيف: نعم؟
ياسين: إنت مش ملاحظ حاجة على نفسك اليومين دول؟
سيف بصله باستغراب.
سيف: حاجة إيه؟
ياسين ضحك بخفة.
ياسين: ليل يا سيدي!
سيف: مالها ليل؟
ياسين: إنت مش ملاحظ إنك بقيت مهتم بيها زيادة عن اللزوم؟!
سيف عقد حاجبيه.
سيف: طبيعي أقلق عليها، دي إصابتها حصلت وهي بتلعب معانا!
ياسين ابتسم ابتسامة واسعة.
ياسين: آه طبعًا... طبيعي!
سيف بصله باستغراب.
سيف: إيه؟
ياسين قرب منه شوية وقال بمكر:
ياسين: إنت بدأت تحبها ولا إيه؟
سيف سكت للحظات، وبص بعيد وهو بيحاول يخفي ارتباكه.
ياسين لاحظ سكوته، فابتسم بمكر أكبر.
ياسين: إيه ده؟! أنت وقعت بقى؟!
سيف بصله بسرعة.
سيف: وقعت إيه يا عم؟! إنت بتقول كلام إيه؟!
ياسين: يا ابني أنا أعرفك من سنين! إنت اللي كنت رافض وجودها في الفريق من الأول، واللي يشوفك دلوقتي ما يقولش إنك كنت مش طايقها!
سيف ضحك بخفة وحاول يغير الموضوع.
سيف: اسكت بقى يا ياسين، وإنت مالك بيا؟! وبعدين بدل ما تتكلم عني، شوف لنا التدريبات الجاية هنعمل فيها إيه.
ياسين ضحك بصوت عالي.
ياسين: خلاص خلاص، غير الموضوع براحتك!
سيف أخد رشفة من القهوة، لكن ابتسامة صغيرة ظهرت على وشه من غير ما يحس.
ياسين لاحظها، فهز راسه وهو بيضحك.
ياسين: لا، الموضوع كبير فعلًا!
سيف: ياسين!
ياسين: خلاص يا سيدي، سكتنا!
وفي اللحظة دي، باب قاعة الاستراحة اتفتح، وظهر رامي وهو خارج منهم بخطوات هادية، لكن عينيه كانت بتدور على سيف.
رامي: أهو الكابتن موجود!
سيف بصله.
سيف: خير يا رامي؟ عايز حاجة؟
رامي ابتسم ابتسامة واسعة.
رامي: لا يا كابتن، كنت بس عايز أسألك سؤال صغير.
ياسين بصله باستغراب.
ياسين: سؤال إيه؟
رامي تجاهله للحظة، وفضل باصص لسيف.
رامي: هو إنت يا سيف... تعرف ليث من قبل ما يدخل الفريق؟
سيف إيده وقفت للحظة وهو ماسك كوب القهوة، وبص لرامي باستغراب.
سيف: وإنت بتسأل السؤال ده ليه؟!
رامي ابتسم ابتسامة بريئة مصطنعة.
رامي: لا أصل حاسس إن بينكم معرفة قديمة شوية!
ياسين بص لسيف وبعدين لرامي.
ياسين: إيه يا رامي؟ هو فيه إيه بالظبط؟
رامي ضحك وقال:
رامي: ولا حاجة يا كابتن... مجرد فضول!
لكن سيف فضل باصص له للحظات، وكأنه بيحاول يفهم هو بيفكر في إيه بالظبط.
أما رامي، فكان جواه إحساس إن فيه سر كبير محدش عايز يقوله...
والمرة دي قرر إنه مش هيسيب الموضوع غير لما يعرف الحقيقة بنفسه!
بعد دقايق رامى كان قصاد اوضة ليل دخل علطول من غير ما يخبط على الباب و...