رواية أحببت قائد الفريق الفصل الثامن8 بقلم هند الحجار
باب الأوضة اتفتح، ودخل رامي من غير ما يخبط!
ليل رفعت عينيها بسرعة وبصتله باستغراب.
ليل: إيه ده؟! إنت بتدخل كده من غير ما تخبط ليه؟!
رامي دخل وقفل الباب وراه، وبعدها اتحرك ناحيتها بابتسامة واسعة وقعد على الكرسي اللي قصادها.
رامي: إيه يا عم؟! هو أنا غريب؟!
ليل: لأ مش غريب، بس فيه حاجة اسمها تخبط على الباب قبل ما تدخل!
رامي: خلاص يا سيدي، المرة الجاية هجيب معايا ورد وأستأذن قبل ما أدخل!
ليل هزت راسها بملل ورجعت تبص في موبايلها.
ليل: خير يا رامي؟ عايز حاجة؟
رامي فضل باصصلها شوية، وبعدها مال بجسمه لقدام وقال بنبرة فيها خبث:
رامي: عامل إيه يا ليث؟!
ليل رفعت عينيها ناحيته.
ليل: كويس الحمد لله.
رامي ابتسم بمكر.
رامي: الحمد لله؟! طب وإيه أخبارك مع الإصابة؟ رجلك بقت أحسن؟
ليل: أيوه الحمد لله، أحسن من الأول بكتير.
رامي: طب كويس... كويس أوي.
سكت لحظة، وبعدها قام من مكانه واتجه ناحيتها.
رامي: طب تعالى بقى أسلم عليك يا عم، بقالي كتير مش قاعد معاك!
ليل بصتله باستغراب.
ليل: ما إحنا قاعدين مع بعض كل يوم!
رامي ضحك، ومد إيده وحطها على كتفها بحركة عفوية، وهو بيقول:
رامي: يا عم إنت وحشتني، وبعدين انت قاعد فترة كبيرة لوحدك موحشنكش ولا ايه
لكن في اللحظة اللي إيده لمست فيها كتف ليل واقتربت من أعلى صدرها، حس بحاجة خلت ملامحه تتغير فجأة.
سحب إيده ببطء، وبص لليل بتركيز شديد.
أما ليل، فكانت اتوترت من لمسته المفاجئة، فتحركت بعيد عنه بسرعة.
رامي عقد حاجبيه وبص لها باستغراب.
رامي: إيه ده؟! إنت بتبعد ليه؟!
ليل ارتبكت وبدأت تتكلم بسرعة.
ليل: لا... لا مفيش، بس إنت جيت فجأة كده!
رامي فضل باصصلها، وبعدها ابتسم ابتسامة غريبة.
رامي: إنت خايف مني ولا إيه يا ليث؟!
ليل: خايف منك إيه بس؟!
رامي: أمال إيه اللي حصل؟! إحنا مش رجالة زي بعض؟! مالك اتخضيت كده ليه؟
ليل بلعت ريقها، وحاولت تضحك بشكل طبيعي.
ليل: يا عم ما تتخيلش حاجات من دماغك، أنا بس رجلي وجعاني ومش عايز حد يخبط فيها!
رامي رجع قعد على الكرسي، لكنه المرة دي كان مركز معاها بشكل مختلف.
رامي: مممم... رجلك وجعاك، تمام.
ليل: أيوه، عندك اعتراض؟!
رامي ضحك.
رامي: لا يا عم، هو أنا هعترض على إيه؟!
سكت ثواني، وبعدها قال وهو بيبصلها مباشرة:
رامي: بس قولي يا ليث... إنت مخبي عننا حاجة؟
ليل اتجمدت مكانها للحظة.
ليل: حاجة إيه؟!
رامي: معرفش... إنت قولي!
ليل حاولت تحافظ على هدوئها.
ليل: يا رامي، إنت مالك النهارده؟! هو إنت داخل تحقق معايا؟!
رامي ابتسم بمكر.
رامي: لا خالص، أنا بس بحب أفهم الناس اللي حواليا!
ليل: طب روح افهم حد تاني، أنا صدعت منك!
رامي ضحك بصوت عالي.
رامي: يا سلام! ده أنا لسه ما بدأتش!
وفي اللحظة دي...
الباب اتفتح فجأة، ودخل سيف!
سيف: رامي!
رامي بص ناحيته، وابتسم ببراءة.
رامي: أيوه يا كابتن؟!
سيف بص له بضيق، وبعدها بص لليل اللي كانت ملامحها متوترة.
سيف: إنت بتعمل إيه هنا؟!
رامي: ولا حاجة يا عم، داخل أطمن على صاحبنا!
سيف اتحرك ناحيتهم، ووقف جنب الكنبة.
سيف: مش اطمنت اى مقعدك لحد دلوقتى اخرج يلا !!.
رامي رفع إيده باستسلام.
رامي: يا سيدي خلاص، حقك عليا! هو أنا عملت جريمة؟!
سيف: رامي، أنا مش بهزر!
رامي بص له باستغراب مصطنع.
رامي: إيه يا سيف؟! إنت متعصب ليه؟! ده أنا داخل أطمن على ليث، ولا هو بقى ممنوع نسأل على بعض؟!
سيف: أنا ما قلتش ممنوع، بس فيه حدود يا رامي!
رامي ضحك بخفة.
رامي: حدود إيه بس؟! إحنا أصحاب ، وبعدين إنت مكبر الموضوع ليه؟!
صوت سيف بدأ يعلى، لدرجة إن الشباب اللي كانوا قاعدين بره سمعوه.
ياسين: هو فيه إيه يا جماعة؟!
وبعد لحظات، ظهر ياسين ومعاه ياسر ومؤمن وأنس، ودخلوا الأوضة واحد ورا التاني.
ياسين بص لسيف ورامي باستغراب.
ياسين: إيه يا جماعة؟! صوتكم عالي ليه؟!
رامي ابتسم أول ما شافهم.
رامي: تعالوا يا رجالة، الكابتن سيف زعلان مني عشان داخل أطمن على ليث!
أنس: طب ما تطمن عليه يا عم، إيه المشكلة؟!
رامي أشار لسيف.
رامي: أهو، اسألوا الأستاذ!
ياسين بص لسيف.
ياسين: إنت مالك يا سيف؟! إيه اللي حصل؟
سيف كان لسه متعصب، وبص لرامي وقال بحدة:
سيف: مفيش حاجة يا ياسين انا بس خايف على ليث وهو محتاج يرتاح
رامي فتح دراعاته باستغراب ، وقرر يحكيلهم هو عمل اى مع ليل علشان يشوف ردة فعله اكتر
رامي: يا أخي إنت ليه مكبر الموضوع؟! أنا كنت بتكلم معاه وحطيت إيدي على كتفه، قام اتخض وبعد عني، فاستغربت وسألته!
سيف بص له بحدة.
سيف: وإنت إيه اللي يخليك تحط إيدك عليه بالشكل ده؟!
رامي ضحك باستنكار.
رامي بأستفزاز اكتر: إيه يا عم؟! هو أنا لمسته في إيه؟! ده كتفه! وبعدين إحنا رجالة زي بعض، إنت مالك متضايق لي؟!
رامي سكت للحظة، وبعدها بص لسيف بابتسامة جانبية.
رامي: خلاص، طالما إنت مش عايز تقولهم، أنا هقولهم!
سيف عقد حاجبيه.
سيف: تقولهم إيه؟!
رامي قرب خطوة، وبص لكل الموجودين، وبعدها رجع عينيه لسيف وقال بثقة:
رامي: اللي مزعلك أوي إن ليث مش ولد أصلًا...
سكت لحظة، ثم اكمل
: «ليث بنت يا جماعة!»
ساد الصمت في الأوضة للحظات...
ياسر بص لرامي بذهول، وبعدها بص لليل، وكأنه مش مستوعب اللي سمعه.
مؤمن: إنت بتقول إيه يا رامي؟!
أنس نزل قطعة البسكويت اللي في إيده وبص له بصدمة.
أنس: بنت؟! مين بنت؟!
أما ياسين، ففضل واقف مكانه، لكنه كان بيحاول يخفي ابتسامته من تصرفات رامي، وبص لسيف اللي كان واضح عليه التوتر والغضب.
ياسين (بهدوء): رامي، إنت متأكد من الكلام اللي بتقوله ده؟
رامي: أيوه يا كابتن، ومتأكد كمان إن سيف عارف الحقيقة من زمان!
سيف بص له بحدة.
سيف: رامي، إنت اتجننت؟! إنت بتقول إيه؟!
رامي ابتسم بثقة.
رامي: أهو! شفتوا؟! أنا مش بقول كلام من عندي!
ياسين تدخل بسرعة قبل ما الموضوع يكبر.
ياسين: رامي، إنت جبت الكلام ده منين؟
رامي: مش مهم جبتُه منين، المهم إني عرفت الحقيقة!
ياسين تبادل نظرة سريعة مع سيف، نظرة كان معناها إن الموضوع بدأ يخرج عن السيطرة.
أما ليل، فكانت قاعدة مكانها، قلبها بيدق بسرعة، ومش عارفة تتصرف إزاي.
رامي فضل واقف قدام الجميع، وعلى وشه ابتسامة انتصار، وكأنه أخيرًا قدر يوصل للحقيقة اللي كان بيدور عليها من أيام.
رامي: عشان أثبتلكم كلكم إني مش بهزر، وإن كلامي صح... هوريكم بنفسي!
ليل بصتله باستغراب وقلق.
ليل: رامي... إنت بتقول إيه؟!
رامي ابتسم بمكر، ومد إيده فجأة ناحية رأسها، وقبل ما تلحق تستوعب اللي بيعمله، كان شال الكاب من على رأسها!
ليل شهقت بفزع، ورفعت إيديها بسرعة على شعرها، اللي انسدل على كتفيها.
ليل: آآآه!!
الكل اتجمد مكانه!
ياسر فتح عينيه بصدمة، ومؤمن حط إيده على فمه، وأنس فضل باصص من غير ما ينطق بكلمة.
أما سيف...
فملامحه اتبدلت تمامًا، واتحرك ناحية رامي بسرعة، ومسكه من ياقة قميصه بعنف.
سيف (بغضب): إنت إزاي تعمل كده؟! إنت فقدت عقلك يا رامي؟!
رامي حاول يبعد إيد سيف عنه.
رامي: اوعى يا سيف بلاش اللى بتعمله ده
سيف شد ياقة قميصه أكتر.
سيف: إنت فاكر نفسك بتعمل إيه؟! إنت مين اداك الحق إنك تمد إيدك عليها بالشكل ده؟!
ياسين اتحرك بسرعة، ومسك سيف من دراعه محاولًا يبعده عن رامي.
ياسين: سيف! سيبه!
سيف كان لسه متعصب.
سيف: ابعد يا ياسين!
ياسين (بحزم): بقولك اهدى يا سيف! اهدى!
ياسر قرب منهم وساعد ياسين في إبعاد سيف عن رامي.
ياسر: خلاص يا سيف، سيبه! مش كده!
سيف ساب رامي أخيرًا، لكنه فضل واقف قدامه وعينيه مليانة غضب.
رامي عدل قميصه وهو بيبص لسيف باستغراب.
رامي: هو أنا عملت إيه لكل ده؟! مش إنتوا شايفين؟! أنا طلعت صح!
لكن محدش رد عليه.
كل العيون كانت متجهة ناحية ليل.
كانت قاعدة على الكنبة، منزلة رأسها وباصة للأرض، وشعرها نازل على كتفيها، وإيديها بتشد في طرف ملابسها بتوتر.
كانت محرجة ومكسوفة من نظرات الجميع، وفجأة بدأت دموعها تنزل من غير ما تقدر تمنعها.
سيف أول ما شاف دموعها، نسي غضبه للحظة، واتحرك ناحيتها.
سيف (بهدوء): ليل...
لكنها فضلت باصة للأرض ومردتش.
ياسين بص لرامي بضيق، وبعدها رجع بص لباقي الشباب.
ياسر (بغضب): يعني إيه الكلام ده؟! إنتوا كنتوا عارفين؟!
مؤمن: استنى يا ياسر، إحنا محتاجين نفهم الأول!
أنس: أنا مش فاهم حاجة أصلًا!
رامي: أيوه يا جماعة! أهو أنا قلتلكم من الأول!
ياسر بص لسيف وياسين باستنكار.
ياسر: إنتوا إزاي تضحكوا علينا بالشكل ده؟! إزاي تخبوا عننا حاجة زي دي طول الفترة دي؟!
مؤمن: إحنا كنا بنتعامل معاها على إنها واحد مننا! ناكل ونشرب ونتدرب ونعيش مع بعض، وإنتوا عارفين الحقيقة وساكتين؟!
ياسين رفع إيده محاولًا يهديهم.
ياسين: يا جماعة، اهدوا شوية واسمعوني!
ياسر: نسمع إيه يا ياسين؟! إنت كمان كنت عارف؟!
ياسين أخد نفس عميق، وبعدها قال بوضوح:
ياسين: أيوه، أنا كنت عارف... وأنا اللي جبت ليل هنا من البداية، وأنا المسؤول عن وجودها في الفريق.
الكل بصله بصدمة أكبر.
ياسر: إنت؟!
ياسين: أيوه أنا. وصدقوني، أنا فاهم إن عندكم أسئلة كتير، ومن حقكم تفهموا كل حاجة، بس قبل ما تحكموا على الموضوع، اسمعوني للآخر.
ياسر (بانفعال): تفهمنا إيه؟! تفهمنا إنك كنت بتخدعنا طول الفترة دي؟! كنا بنتعامل مع بنت على أساس إنها ولد! وبعدين من إمتى بنت تدخل تلعب وسط فريق رجالة؟! إنت عارف إنت عملت مشكلة قد إيه؟!
سيف اللي كان واقف جنب الكنبة، التفت لياسر وقال بحدة:
سيف: وإنتوا حسيتوا إنها بنت وهي بتلعب معاكم؟! حسيتوا بكده في أي ماتش؟! ولا دلوقتي بس لما عرفتوا الحقيقة بقيتوا شايفين إن وجودها كان غلط؟!
ياسر سكت للحظة.
سيف كمل وهو بيبص لكل واحد فيهم:
سيف: لما كانت بتتمرن معاكم، وبتتعب زيكم، وبتجري أكتر منكم، وبتدخل الماتشات وتنافس أقوى الفرق... كنتوا بتبصولها على إنها بنت؟! ولا كنتوا شايفين زميلكم اللي واقف جنبكم وبيساعدكم تكسبوا؟!
محدش رد.
سيف: طب لما الفريق بدأ مستواه يتحسن، ولما بقينا نكسب ماتشات كنا زمان بنخسرها، ولما قدرنا نوصل لمستوى عمرنا ما حلمنا بيه... وقتها حد فيكم اعترض على وجودها؟!
فضلت الأوضة ساكتة.
سيف قرب خطوة منهم، وكمل بنبرة جادة:
سيف: من ساعة ما ليل دخلت الفريق، والفريق اتغير تمامًا. مستوانا بقى أحسن، لعبنا بقى أقوى، وقدرنا نتأهل للبطولة اللي إحنا طول عمرنا بنحلم نوصلها.
بص لياسر مباشرة.
سيف: وإنت عارف كويس إن مستوانا قبل ما تدخل كان عامل إزاي. يوم نطلع لفوق وعشرة ننزل لتحت. مكناش قادرين نحافظ على مستوانا في ماتشين ورا بعض. لكن من ساعة ما ليل انضمت لينا، كل حاجة اختلفت.
سكت لحظة، وبعدها أشار ناحية ليل.
سيف: البنت دي تعبت عشان تبقى هنا. أثبتت نفسها بموهبتها ومجهودها، ومطلبتش من حد يعاملها معاملة خاصة. كل اللي كانت عايزاه إنها تلعب وتحقق حلمها.
نظراته رجعت للشباب.
سيف: مش معنى إنكم عرفتوا إنها بنت، إننا نهدم حلمها وندمر كل اللي وصلتله! مش معنى إن الحقيقة ظهرت، إننا ننسى كل اللي عملته معانا!
ياسين كان واقف جنبه، متابع كلامه باهتمام، بينما الشباب بدأوا يهدوا شوية.
سيف كمل:
سيف: وبعدين إحنا عايشين في مجتمع مش كل الناس فيه هتتقبل فكرة إن بنت تلعب وسط فريق رجالة. وده بالظبط اللي كنا خايفين منه. مش عايزين حد يحكم عليها قبل ما يشوف موهبتها، ولا عايزين حد يحرمها من حلمها لمجرد إنها بنت.
بص ناحية رامي للحظة، وبعدها رجع كمل:
سيف: أيوه، أنا وياسين خبينا عليكم الحقيقة. وأنا مش بنكر ده. بس فكروا معايا... إحنا خمس رجالة عايشين ونتدرب ونتحرك مع بعض، وفجأة تدخل وسطنا بنت. إزاي كانت هتقدر تعيش معانا بشكل طبيعي لو كل واحد فيكم عارف إنها بنت وبيتعامل معاها على الأساس ده؟!
سيف أخد نفسًا عميقًا.
سيف: كنا عارفين إن وجودها وسطنا ممكن يسبب مشاكل، وإن أي تصرف عادي ممكن يتفهم غلط، وإنها ممكن تحس إنها مختلفة عننا أو إننا مش متقبلين وجودها. كان لازم الأول تثبت نفسها كلاعبة، وتاخد مكانها في الفريق بموهبتها، مش بشفقة من حد ولا بمعاملة خاصة.
بص للشباب واحد واحد.
سيف: إحنا ما خبيناش الحقيقة عشان نضحك عليكم أو نقلل منكم. إحنا خبيناها عشان نحميها ونحافظ على حلمها، وعشان تقدر تعيش وسطنا وتكون واحدة من الفريق من غير ما كل يوم تضطر تثبت إنها تستحق تكون هنا.
سكت للحظة، وبعدها قال بنبرة أهدى:
سيف: وفي النهاية، ليل مش مجرد لاعبة دخلت الفريق وخرجت منه. دي بقت جزء مننا، ومن نجاحنا، ومن كل حاجة وصلنالها. ومش هقبل إن حد يعاملها بشكل مختلف بعد النهارده لمجرد إنه عرف حقيقتها.
ساد الصمت مرة تانية...
كل واحد فيهم كان بيحاول يستوعب كلام سيف، بينما ياسين فضل واقف جنبه مؤيدًا كلامه.
أما ليل، فكانت لسه قاعدة على الكنبة، ودموعها بتنزل بصمت، لكنها المرة دي رفعت عينيها ناحية سيف، وبصتله بنظرة امتنان وافتكرت حياتها السابقه واللى كان بيحصل فيها قلبها للحظة اترعب انها ممكن ترجع تواجه الحياة الصعبة دى تانى بعد ما شافت وجوههم وعلامات الرفض المروسومة عليها وفجأة صوت شهقاتها على وبقا اقوى فالكل بصلها وانتبه ليها و.....