وفجأة...
لاحظ سيف أن القبعة التي ترتديها ليل بدأت تنزلق عن رأسها، وظهرت بعض خصلات الشعر من أسفلها.
اتسعت عيناه، وتحرك بسرعة من مكانه، حتى وقف أمامها مباشرة، حاجبًا رؤيتها عن باقي اللاعبين.
سيف بحدة وصوت منخفض: إنتِ بتعملي إيه ؟! ظبطي نفسك بسرعة!
رفعت ليل عينيها إليه باستغراب، لكنها سرعان ما فهمت ما يقصده عندما شعرت بالقبعة وهي تكاد تسقط.
ليل بتوتر: أنا...
سيف مقاطعًا: مفيش أنا! ظبطي الطاقية كويس، إنتِ عايزة تفضحي نفسك؟!
أسرعت ليل برفع يدها وتعديل القبعة، ثم شدتها جيدًا على رأسها، وأعادت إدخال خصلات شعرها التي ظهرت أسفلها.
ليل بصوت منخفض: خلاص، ظبطتها.
سيف بنظرة تحذيرية: خلي بالك من نفسك، مش كل مرة هلحق الموقف.
وفي تلك اللحظة اقترب رامي منهما، وهو يمسك الكرة بيده.
رامي باستغراب: في إيه يا جماعة؟ إنتوا واقفين ليه؟!
نظر سيف إليه بسرعة، ثم أشار إلى ليل.
سيف بجدية: صاحبك كان هيخبط فيا وهو بيجري، فوقفته قبل ما يتكعبل ويبوظ لنا التدريب.
رامي ضاحكًا: يا عم ده ليث لو وقع هيقوم يكمل جري، ده شكله مش بيحس بالتعب أصلًا!
ليل بابتسامة متوترة: أيوه طبعًا، أنا تمام.
سيف بنظرة حادة: ركز في اللعب يا ليث.
ليل: حاضر.
عاد سيف إلى مكانه، بينما أطلق رامي صفارة قصيرة بفمه، ثم رمى الكرة إلى ليل.
رامي: يلا يا بطل، ورينا تاني!
التقطت ليل الكرة، وحاولت أن تتصرف بصورة طبيعية، لكن قلبها كان لا يزال يخفق بسرعة.
ليل في نفسها: يا نهار أبيض! دي كانت هتقع فعلًا... كنت هتفضح!
أما سيف فظل يتابعها من بعيد، متأكدًا من أن القبعة أصبحت ثابتة في مكانها.
بعد مرور بعض الوقت...
استمر التدريب، واشتدت المنافسة بين اللاعبين، حتى انتهت المباراة التدريبية بتقدم فريق على الآخر.
صفق ياسين بيديه، ثم رفع صوته.
ياسين: خلاص يا شباب، كفاية لحد هنا! التدريب انتهى النهارده.
أنس وهو يلتقط أنفاسه: الحمد لله! أخيرًا حد افتكر إن عندنا أرواح!
رامي ضاحكًا: إنت بالذات روحك كلها في بطنك، مش في الملعب!
أنس: والله العظيم إنت لو فضلت تتكلم هخليك تاكل الكورة دي!
ضحك الجميع، بينما كانت ليل تلتقط منشفتها وتمسح العرق عن وجهها بحذر.
اقترب منها رامي، ووضع ذراعه حول كتفها بطريقة عفوية ، ارتبكت ليل وحاولت ابعاد ذراعه عنها .
رامي: برافو عليك يا ليث! بجد إنت فاجأتني النهارده.
ليل بابتسامة: تسلم يا رامي.
أنس متدخلًا: لا لا، أنا عندي اعتراض رسمي!
ياسين: اعتراض على إيه يا أنس؟
أنس مشيرًا إلى ليل: هو إزاي لسه جديد علينا، وبيحرجنا كلنا بالشكل ده؟! أنا عايز إعادة تقييم لمكاني في الفريق!
رامي: إعادة تقييم إيه يا حبيبي؟ إنت محتاج إعادة تأهيل!
انفجر الجميع بالضحك، حتى مؤمن ابتسم وهو يهز رأسه.
مؤمن: ربنا يهديكم، مش بتبطلوا هزار أبدًا.
ياسر بهدوء: يلا بينا نرجع، الجو بدأ يسخن.
في الصالة الرياضية بالمنزل...
دخل الشباب واحدًا تلو الآخر، وألقوا حقائبهم الرياضية بجوار المقاعد، ثم بدأ كل منهم يبحث عن مكان يجلس فيه.
جلس أنس على الأريكة الكبيرة، ومد ساقيه أمامه بتعب.
أنس: أنا مش قادر أحرك رجلي!
رامي وهو يجلس بجواره: رجلك إيه؟ ده إنت لو اتحركت بسرعة هتلاقي نفسك بتدور على التلاجة!
أنس: يا ابني إنت مالك بيا؟! هو أنا واخد من مرتبك حاجة؟!
ياسين ضاحكًا: خلاص يا جماعة، ارحمونا شوية.
كان مؤمن يجلس على أحد المقاعد، يفتح زجاجة المياه الخاصة به، بينما وقف ياسر بجوار النافذة يتفقد هاتفه.
أما ليل فكانت تجلس على طرف الأريكة، تشرب المياه وهي تشعر بالفخر من أدائها في التدريب.
وفجأة وقفت، واتجهت ناحية سيف الذي كان يجلس بمفرده، يتفقد بعض الرسائل على هاتفه.
وقفت أمامه، ونظرت إليه بابتسامة صغيرة.
ليل: إيه يا كابتن سيف؟
رفع سيف عينيه إليها ببرود.
سيف: نعم؟
ليل بحماس: إيه رأيك في مستوايا النهارده؟
تأملها للحظة، ثم أعاد نظره إلى هاتفه.
سيف ببرود: حلو... حلو، مش بطال.
اختفت ابتسامتها قليلًا.
ليل: مش بطال بس؟!
سيف: أيوه، عندك شوية حاجات محتاجة تتظبط.
ليل باعتراض: إيه ده! ده أنا سجلت نقطتين، وراوغت نص الفريق!
رفع سيف حاجبه ونظر إليها.
سيف: وعايزاني أعملك حفلة عشان سجلتي نقطتين؟
ليل بغيظ: لا، بس يعني كلمة حلوة مش هتخسر حاجة!
سيف وهو ينهض من مكانه: لما تستحقيها هتسمعيها.
ثم تحرك من أمامها متجهًا إلى المطبخ.
ظلت ليل تنظر إلى ظهره بدهشة، ثم عقدت ذراعيها أمام صدرها.
ليل متمتمة: بارد! والله بارد! هو الواحد لازم يجيب كأس العالم عشان يسمع منه كلمة حلوة؟!
كان رامي قد سمع آخر جملة، فانفجر ضاحكًا.
رامي: مالك يا ليث؟ الكابتن زعلك؟
ليل وهي تلتفت إليه: ده مش بيقدر أي مجهود خالص!
رامي ضاحكًا: اتعود، ده سيف لو جابوا له كأس العالم بنفسه هيقولهم مش بطال!
ضحكت ليل رغماً عنها، بينما عاد سيف في تلك اللحظة ممسكًا بزجاجة مياه، ونظر إليهما دون أن يتدخل.
وبعد دقائق...
كان الجميع ما زالوا يجلسون ويتبادلون الأحاديث والضحكات، حتى دخل ياسر إلى الصالة بعد أن كان بالخارج.
ياسر وهو ينظر ناحية ليل: ليث.
رفعت ليل رأسها.
ليل: نعم؟
ياسر: في واحد بره عايزك.
ليل باستغراب: واحد عايزني أنا؟!
ياسر: أيوه، واقف عند الباب وبيقول إنه يعرفك.
نظر رامي إليها بفضول.
رامي: مين ده يا ليث؟ صاحبك ولا إيه؟
ليل وهي تنهض: معرفش، هشوف.
أنس: طب لو طلع جايب أكل قوله يدخل، إحنا هنا موجودين!
رامي: يا أخي إنت بتفكر في الأكل حتى وإنت قاعد!
ضحك الشباب، بينما خرجت ليل من الصالة بخطوات مترددة.
أمام المنزل...
فتحت ليل الباب، وخرجت إلى الحديقة الصغيرة الموجودة أمامه.
كانت تنظر حولها بحثًا عن الشخص الذي طلبها، حتى وقع بصرها على شاب يقف بجوار البوابة.
كان يرتدي ملابس بسيطة، وقميصًا واسعًا، وبنطالًا رياضيًا، وقد بدت عليه ملامح شاب اعتاد الحياة الصعبة.
وما إن رآها حتى اعتدل في وقفته، وحدق بها للحظات طويلة.
كريم بصدمة: ليل؟!
تجمدت ليل في مكانها، واتسعت عيناها.
ليل بصوت منخفض: كريم؟!
اقترب منها بخطوات سريعة، وابتسامة واسعة تملأ وجهه.
كريم: يا بنت اللذينة! إنتِ فين يا ليل؟! إنتِ عارفة أنا دورت عليكي قد إيه؟!
ليل بتوتر: إنت جبت مكاني منين؟!
كريم: يا بنتي إحنا قلبنا الدنيا عليكي! سألنا في كل حتة، وروحنا الملجأ أكتر من مرة، والمديرة بعد زن كتير قالتلنا إنك مشيتي وإنك في مكان تاني.
ليل وهي تنظر حولها: وطي صوتك يا كريم!
كريم باستغراب: إيه يا بت؟! مالك؟! هو أنا بقيت بخوفك ولا إيه؟!
ليل: مش وقته، إنت إيه اللي جابك هنا أصلًا؟!
كريم: إيه اللي جابني؟! جاي أدور عليكي يا ليل! هو أنا هفضل مستني لحد ما تطلعيلي من تحت الأرض؟!
ثم اقترب منها أكثر، ونظر إلى وجهها بابتسامة هادئة.
كريم بصوت أحن: وحشتيني يا ليل... والله وحشتيني أوي.
نظرت إليه ليل للحظات، ثم أبعدت عينيها عنه.
ليل: كريم، أرجوك، مش وقته الكلام ده.
كريم: طب إمتى وقته؟! أنا بقالي شهور بدور عليكي، وكل ما أسأل عنك ألاقي نفسي برجع لنقطة الصفر.
ليل: خلاص، لقيتني. اتفضل بقى روح.
اختفت ابتسامته تدريجيًا.
كريم: إيه يا ليل؟! إنتِ بتطرديني؟!
ليل: مش بطردك، بس مينفعش تقف هنا.
كريم وهو يتفحص ملابسها من أعلى إلى أسفل: استني بس... إيه اللبس اللي إنتِ لابساه ده؟! وإيه الكاب اللي على دماغك؟! هو إنتِ بتعملي إيه هنا أصلًا؟
نظرت ليل إلى ملابسها الرياضية الواسعة، ثم عادت تنظر إليه.
ليل: دي حكاية طويلة يا كريم.
كريم: طب ما تحكيلي يا ستي، هو أنا غريب؟!
ليل: كريم، أنا مش عايزة أتكلم في أي حاجة دلوقتي.
كريم وهو يقترب منها خطوة: إنتِ لسه زي ما إنتِ، حتى طريقتك في الكلام موحشتنيش غير لما سمعتها منك دلوقتي.
ليل بتوتر: كريم، خليك مكانك.
كريم مستغربًا: مالك يا ليل؟! أنا مش هعملك حاجة، ده أنا كنت مستني اللحظة دي من زمان.
ثم مد يده محاولًا الإمساك بيدها.
سحبت ليل يدها بسرعة إلى الخلف.
ليل بحدة: قولتلك بلاش يا كريم!
كريم بحزن: إنتِ ليه بتبعدي عني؟! أنا بحبك يا ليل، وإنتِ عارفة ده كويس. عمري ما قدرت أنساكي، ولا بطلت أدور عليكي. كنت كل يوم بقول يمكن ألاقيها، يمكن أشوفها تاني.
نظرت إليه ليل بتوتر، ثم قالت بصوت منخفض:
ليل: كريم، أنا مش الشخص اللي إنت فاكره دلوقتي... ومش هينفع نرجع للكلام ده.
كريم: يعني إيه مش الشخص اللي فاكره؟! إنتِ ليل اللي أنا بحبها، ولا أنا اتجننت؟!
ليل: أرجوك، صوتك!
اقترب كريم منها مرة أخرى، محاولًا أن يراها جيدًا، ثم قال بنبرة هادئة:
كريم: طب بصيلي يا ليل... أنا كل اللي عايزه فرصة نتكلم، حتى لو خمس دقايق. مش هطلب منك أكتر من كده.
كانت ليل على وشك الرد، لكنها لم تستطع إكمال كلامها.
فجأة...
جاء صوت حاد من خلفها.
سيف بجدية: ليث!
التفتت ليل بسرعة، لتجد سيف واقفًا على بعد خطوات منها، ينظر إليها ثم إلى الشاب الذي يقف أمامها.