كان سيف واقف على بُعد خطوات منهم، عينيه مثبتة على ليل وكريم، وملامحه بدأت تتغير بمجرد ما شافهم واقفين بيتكلموا مع بعض.
اتحرك ناحيتهم بخطوات ثابتة، ولما قرب منهم اتكلم بنبرة جادة:
سيف: ليث!
ليل أول ما سمعت الاسم رفعت عينيها بسرعة ناحية سيف، وبصت له بنظرة سريعة فيها تحذير واضح، وكأنها بتقوله: أوعى تقول الاسم ده قدام كريم!
سيف فهم نظرتها في لحظتها، فبص لكريم وبعدها رجع بعينيه ليها.
سيف: إحنا محتاجينك جوا دلوقتي، يلا علشان تلحقي تنامي مع الفريق.
كريم عقد حاجبيه باستغراب وبص لليل.
كريم: فريق؟ وتنامي مع الفريق؟ في إيه يا ليل؟ إنتِ بتعملي إيه هنا؟
ليل اتوترت، وفضلت باصة لكريم من غير ما تعرف ترد.
سيف (ببرود): حاجة ما تخصكش.
كريم بص له باستغراب، وبعدين رد بنبرة مستنكرة:
كريم: إزاي حاجة ما تخصنيش؟ أنا أعرف ليل من زمان، إحنا كنا مع بعض في الملجأ، ومن حقي أفهم هي بتعمل إيه هنا!
ليل حست إنها اتحطت في موقف صعب، وبصت لسيف بسرعة، مش عارفة تقول إيه ولا تتصرف إزاي.
كريم: ليل؟ إنتِ ساكتة ليه؟ هو في إيه؟
سيف تجاهل سؤال كريم وبص لليل بنظرة حاسمة.
سيف: قوليله إنه يمشي من هنا.
ليل (بهمس): سيف...
سيف: قولتلك قوليله يمشي.
كريم بص بينهم باستغراب أكبر.
كريم: هو في إيه بالظبط؟ إنت بتأمرها بصفتك ايه ؟!
ليل أخدت نفس عميق، وحاولت تجمع شجاعتها، وبصت لكريم مباشرة.
ليل: امشي من هنا يا كريم لو سمحت، وماتجيش هنا تاني.
كريم سكت للحظات، وملامحه اتغيرت، واضح إنه اتضايق من كلامها.
كريم: إنتِ بتمشيني يا ليل؟
ليل مردتش.
كريم: ماشي يا ليل... براحتك.
بص لسيف نظرة أخيرة، وبعدها لف ومشي من قدامهم.
فضلت ليل واقفة مكانها، عينيها متعلقة بكريم لحد ما اختفى من قدامها.
وقف سيف مكانه وهو بيتابع كريم بعينيه لحد ما اختفى من قدامه، وبعدها لف وشه ناحية ليل اللي كانت لسه واقفة ساكتة.
سيف: إيه؟ مبسوطة كده؟
ليل بصتله باستغراب.
ليل: نعم؟!
سيف: بقولك مبسوطة؟ ولا كان نفسك يفضل واقف شوية كمان؟
ليل عقدت حاجبيها.
ليل: هو حضرتك بتكلمني بالطريقة دي ليه؟
سيف ضحك بسخرية خفيفة، وحط إيده في جيبه.
سيف: لا أصل واضح إن عندك معارف كتير هنا .
ليل: وإيه المشكلة؟ كريم صاحبي من زمان.
سيف: صاحبك؟! ما شاء الله... بقولك ايه شغل تربية الملاجئ والشوارع دى مش عندى هنا .
ليل اتسمرت مكانها.
الكلمة نزلت عليها زي السكينة.
ليل: إنت قلت إيه؟
سيف: سمعتي كويس. أنا بس مستغرب، إنتِ جاية هنا علشان تلعبي في الفريق ولا علشان تفضلي تقابلي معارفك؟
ليل مكانتش عارفة ترد من وجعها
وبدأت عينيها تلمع بالدموع، لكنها حاولت تتمالك نفسها.
سيف كان لسه متعصب، ومش قادر يفهم هو ليه مضايق بالشكل ده لمجرد إنه شافها واقفة مع كريم.
سيف: وبعدين إنتِ المفروض تكوني مركزة في مستقبلك بدل ما تضيعي وقتك في الحكايات دي.
ليل بصتله، والدموع بدأت تتجمع في عينيها.
ليل: لا... أنا فعلًا يا سيف بيه كنت عايشة في ملجأ.
سيف سكت.
ليل: آه، أنا اتربيت في ملجأ، والحمد لله عارفة كويس أصلح الغلط لما أغلط، وعارفة أفرق بين الصح والغلط.
صوتها بدأ يهتز.
ليل: بس هو ذنبي إني اتولدت من غير أم ولا أب؟ ذنبي إني ما كانش عندي سند، ولا حد أرجعله لما أخاف أو أحتاج حضن !
نزلت دمعة من عينيها، ومسحتها بسرعة.
ليل: أنا وعيت على الدنيا لقيت نفسي عايشة في الملجأ، وسط ناس كتير، كل واحد فيهم عنده حكايته ووجعه... بس عمري ما حسيت إني أقل من أي حد.
سيف بدأ يحس إن كلامه كان أقسى بكتير مما تخيل.
ليل: عارف إيه الحاجة الوحيدة اللي كانت بتفرحني هناك؟
سيف فضل باصصلها من غير كلام.
ليل: كرة السلة.
ابتسمت ابتسامة صغيرة وسط دموعها.
ليل: كانت الحاجة الوحيدة اللي بحس فيها إني موهوبة بجد. كنت بنسى كل حاجة وأنا بلعب، بنسى إني لوحدي، وبنسى كل اللي ناقصني.
أخدت نفسًا متقطعًا وكملت:
ليل: ولما ياسين جابني هنا، فرحت من قلبي. حسيت إن ربنا بعتلي فرصة أبدأ حياتي من جديد، وأثبت نفسي، وأعيش زي أي حد طبيعي.
بصت حواليها، وبعدين رجعت بصت لسيف.
ليل: بس واضح إني مش مرحب بيا هنا.
سيف: ليل...
ليل (مقاطعاه): لا، متقولش حاجة. النهارده مش هتشوفني في الفريق تاني.
سيف: إنتِ بتقولي إيه؟
ليل: بقولك أنا همشي. ومش هضايق حضرتك تاني بمعارفي ولا بوجودي.
لفت علشان تمشي، لكن صوت شهقتها خلاه يتحرك ناحيتها بسرعة.
سيف: ليل! استني.
هي ما وقفتش.
سيف مد إيده ومسك كتفها برفق، وخلاها تلف ناحيته.
ولما شاف دموعها اللي كانت بتحاول تخبيها، حس إن قلبه اتقبض.
سيف (بصوت هادي): أنا آسف.
ليل بصتله بعينين مليانين دموع.
ليل: عن إيه؟
سيف: عن كل كلمة قولتها. أنا... أنا ما كانش المفروض أتكلم معاكي بالطريقة دي.
سكت لحظة، وبعدين كمل:
سيف: والله أنا مش عارف إزاي الكلام ده خرج مني.
ليل: بس خرج يا سيف بيه.
الكلمة وجعته أكتر مما توقع.
سيف: عارف... وعارف إني جرحتك.
قرب منها خطوة، وحط إيده على كتفها.
سيف: بصيلي يا ليل.
لكنها نزلت عينيها.
سيف: أنا كمان يتيم.
ليل رفعت عينيها ناحيته ببطء.
سيف: يمكن حياتي كانت صعبة أكتر مما تتخيلي، ويمكن عشان كده المفروض أكون آخر واحد يوجعك بكلام زي ده.
ابتسم بحزن.
سيف: أنا عارف كويس يعني إيه الواحد يكبر من غير أب وأم، ويحتاج حد يحس بيه، ويلاقي نفسه مضطر يبقى قوي حتى وهو من جواه مكسور.
ليل فضلت ساكتة.
سيف: بس أنا النهارده تصرفت بغباء. ومش هبررلك اللي عملته.
مسح دمعة كانت على خدها بإصبعه، وبعدين سحب إيده بسرعة كأنه استوعب قربه منها.
سيف: إنتِ لاعبة موهوبة يا ليل، ووجودك في الفريق إضافة لينا كلنا. وياسين ما جابكيش هنا من فراغ. إنتِ تستاهلي الفرصة دي، ومش من حقي أخليكي تحسي إنك مش مرحب بيكي.
ليل (بصوت مكسور): طب ليه قلتلي الكلام ده؟
سيف سكت.
كان عنده إجابة، لكنه مش قادر يقولها.
مش هيقولها وهو نفسه لسه مش فاهمها.
سيف: أنا... اتعصبت. وده مش مبرر.
ليل حاولت تمسح دموعها، لكن شهقاتها كانت لسه مستمرة.
سيف فتح دراعه بتردد، وبص لها.
سيف: ممكن؟
ليل بصتله، وفهمت قصده.
ما قالتش حاجة، لكن دموعها نزلت من جديد.
سيف قرب منها وضمها لحضنه بهدوء، وحط إيده على ضهرها يطبطب عليها.
سيف (بصوت واطي): خلاص يا ليل... أنا آسف. مش هتسمعي مني الكلام ده تاني، أوعدك.
ليل كانت واقفة بين إيديه، بتحاول تهدى، وفي اللحظة دي حست إن كل الكلام اللي كانت مخبياه جواها خرج مرة واحدة.
أما سيف، فكان حاسس إنه عايز يرجع بالوقت خمس دقايق لورا، قبل ما ينطق بأي كلمة جرحتها.
على بُعد خطوات...
كان رامي خارج من ناحية الملعب، وماشي وهو بيقلب في موبايله، وفجأة عينه وقعت على سيف وهو حاضن ليث!
نزل الموبايل من إيده شوية، وبص تاني علشان يتأكد إنه مش بيتهيأله.
رامي (بهمس): يا نهار أبيض...
طلع الموبايل بسرعة، وفتح الكاميرا.
رامي: دي مش لقطة تتفوت!
تك!
اتصورت الصورة.
لكن صوت الكاميرا كان كفاية يخلي سيف يرفع راسه ويلف ناحية مصدر الصوت.
شاف رامي واقف بالموبايل في إيده، وابتسامة عريضة على وشه.
سيف: رامي!
رامي أول ما شاف نظرة سيف، لف وجرى.
رامي: سلام يا حب! 😂
سيف ساب ليل بسرعة واتجه ناحيته.
سيف: تعالى هنا يا حيوان!
رامي وهو بيجري: لا لا، مش هينفع! أنا عندي صورة تاريخية لازم أحافظ عليها!
سيف: امسح الصورة يا رامي!
رامي: مستحيل! دي ذكرى جميلة!
سيف جري وراه لحد ما وصلوا عند باقي الشباب.
ياسين كان قاعد مع مؤمن وياسر، وأول ما شاف رامي بيجري وسيف وراه، وقف باستغراب.
ياسين: إيه يا جماعة؟ في إيه؟
رامي استخبى ورا ياسين ورفع الموبايل.
سيف: ياسين، ابعد عنه
كان رامي لسه واقف ورا ياسين، ماسك تليفونه بإيده وبيحاول يخبيه، وسيف واقف قدامه بيبصله بنظرة تحذير.
ياسين بص بينهم باستغراب وقال: ـ هو في إيه يا جماعة؟ إنتوا بتجروا ورا بعض ليه؟
رامي ابتسم ابتسامة مستفزة وقال: ـ مفيش يا كابتن، ده بس سيف طلع ليه فى الجنس الآخر مكنتش اعرف انك عندك الجانب ده ، وضحك
سيف قرب منه خطوة وقال بحدة: ـ رامي... هات الموبايل.
ياسين فهم أن الموبايل فيه حاجة متعلقة بليل وسيف
رامي رجع لورا وهو بيضحك: ـ لا يا عم، دي ذكرى تاريخية! مش كل يوم الواحد يشوف سيف بيطلع منه الجانب الحنين ده!
ياسين بص لرامي وبعدين لسيف، وبدأ يفهم إن الموضوع أكبر من مجرد هزار.
ـ رامي، هات التليفون بدل ما أجيبه أنا.
رامي بص لياسين، وبمجرد ما لقى سيف بيقرب منه، استغل انشغال ياسين للحظة وخرج يجري من الصالة.
ـ يا نهار أبيض! الحقوني يا جماعة!
ياسين اتفاجئ، وبعدها جري وراه بسرعة: ـ يا ابن المجنونة! تعالى هنا!
رامي كان بيجري وهو بيضحك، لكن ياسين لحقه من ورا، مسكه من وسطه، وفقد رامي توازنه، فوقعوا هما الاتنين على الأرض.
ـ آآآه! يا كابتن! بالراحة!
ياسين مسكه من دراعه وقال: ـ هات الموبايل يا رامي!
ـ استنى بس! ده موبايلي أنا!
ـ وأنا هعرف آخده منك إزاي يعني؟!
مد ياسين إيده وخطف الموبايل منه بالعافية، ورامي حاول يقوم، لكن ياسين ثبته للحظة وهو بيضحك.
سيف وصل عندهم، ومد إيده لياسين: ـ هاته.
ياسين فتح الموبايل وناوله لسيف، اللي بدأ يدور بسرعة لحد ما وصل للصورة. أول ما شافها، اتغيرت ملامحه، وضغط على حذف، وبعدها دخل على المحذوفات ومسحها نهائيًا.
رامي اعتدل في قعدته وبصله بحسرة مصطنعة: ـ يا خسارة! دي كانت هتبقى أحلى صورة في تاريخ الفريق!
سيف قرب منه وبصله بجدية: ـ اسمعني كويس يا رامي... الصورة دي ما شفتهاش، ومفيش كلمة واحدة عنها هتطلع منك لأي حد. فاهم؟
رامي رفع إيده باستسلام: ـ فاهم يا سيدي، والله فاهم.
سيف قرب أكتر وقال بنبرة حاسمة: ـ أنا بتكلم بجد. لو عرفت إنك جبت سيرة الموضوع قدام أي حد من الفريق، مش هتلاقيني بتعامل معاك بنفس الطريقة دي تاني. وممكن أسيب الفريق كله على إني أسمح إن الموضوع ده يوصل لحد.
رامي ابتلع ريقه، وبص لياسين كأنه بيطلب منه يتدخل: ـ طب ما تهدي يا ياسين الدنيا، ده أنا حتى اتبهدلت على الأرض عشان صورة!
ياسين ضحك وهو بيقومه: ـ تستاهل، هو إنت ما تعرفش تمسك لسانك؟
رامي نفض هدومه وبص لسيف: ـ خلاص يا سيدي، سرّك في بير. ولا كأن عيني شافت حاجة.
سيف بصله نظرة أخيرة، وبعدها رجع الموبايل لرامي من غير ما يقول كلمة.
أما رامي، ففضل ساكت المرة دي، لكنه كان بيبص لسيف بابتسامة صغيرة مستفزة، وسيف كان عارف إن الموضوع مش هيخلص بسهولة مع رامي... حتى لو الصورة اتمسحت.
بالليل دخل الكل عاشان ينام ولكن سيف كان غير قادر على النوم وظل يفكر فى دموع ليل وبكائها اول مرة يحس انها إنسانة رقيقة من داخلها، ولكن تذكر جملتها انها كانت تريد أن تترك الفريق، فقرر يذهب إليها ويتأكد انها سامحته
كانت ليل فى الحمام تأخذ حمام دافئ فهى تعلم أن جميع الفريق خلد فى النوم فقررت تأخذ حريتها قليلا وهى مطمأنة ان لا أحد يدخل عليها فى ذلك الوقت
طرق سيف الباب ولكن لم يجد اى رد
سيف بص حواليه وتأكد أن احد لم يسمعه؟!
سيف : ليل انتى نايمة انا سيف
كانت ليل لم تسمعه بسبب ضغط الماء دخل سيف الغرفة ولم يجدها سمع صوتها من الحمام فعرف انها فى الحمام فجلس ينتظرها حتى تخرج ارتدت ليل روب قصير وفتحت الباب وهى معاها المنشفة وتجفف شعرها رفعت عينيها وانصدمت مما رأت