الحلقة الرابعة: الكلمة اللي تهد سرايا
"أمــــاااه!!!!"
الصوت رَج السرايا كلها.
ست فاطمة اتنفضت وسابت شعر زينب بسرعة كأنها اتكهربت، ووشها اتقلب في ثانية من شيطانة لأم غلبانة مظلومة.
"ياسين؟ يا حبيبي؟ انت جيت؟ كنت بنضف لها الأوضة.. البت غرقانة في الماية.."
زينب واقعة على الأرض، هدومها كلها ماية وسخة، وطرحتها واقعة، وشعرها متبهدل في إيد ست فاطمة، بتعيط من غير صوت.. خلاص مفيهاش حيل تصرخ.
ياسين مقربش.. فضل واقف عند الباب، عينه حمرا وبيبص لأمه كأنه أول مرة يشوفها.
"بتنضفي لها الأوضة.. بماية وسخة؟ و بتشديها من شعرها؟"
ست فاطمة رفعت صوتها تمثل: "ما هي اللي قليلة الأدب! قالتلي يا خدامة! قالتلي هطفشك من السرايا! أنا مرضتش أرد عشان خاطرك انت!"
زينب بصت لياسين من وسط دموعها.. مستنية.. هتصدق مين؟
لحظة صمت تقيلة..
ياسين بص لزينب.. شاف هدومها المبلولة.. إيديها اللي معلمة من شدة أمه.. والجردل المقلوب.
وبعدين بص لأمه.
وقال كلمة واحدة قلبت كل حاجة:
"اطلعي بره أوضتها."
ست فاطمة اتجمدت: "نعم؟! بتطرد أمك عشان بتاعة الطماطم دي؟!"
"مبطرودكيش.. بقولك اطلعي بره أوضتها. دي دلوقتي أوضة مرتي.. ومحدش ليه حاجة هنا غيرها."
زينب شهقت.. مرتي؟ تاني؟
ست فاطمة ضحكت ضحكة عالية مجنونة: "مرتك؟ مرتك اللي جايبها من سوق الخضار؟ انت اتجننت يا ياسين؟ انت نسيت انت مين؟ انت ياسين الهواري اللي البنات بتبوس التراب اللي بتمشي عليه!"
ياسين قرب خطوة واحدة منها، صوته واطي بس يرعب:
"وأنا ياسين الهواري اللي لما يقول كلمة مبتتكسرش.. وأنا قولت قدام الرجالة تحت انها مرتي وشريفة غصب عن أي حد.. فلو انتي شايفاني راجل قليل وعايزة تكسري كلمتي قدامهم.. خليكي وكملي اللي بتعمليه."
الضربة جت في مقتل.
كرامة ست فاطمة قدام الرجالة أهم من أي حاجة.
سكتت.. وبصت لزينب بصة كلها سم.. بصة بتقول "حسابنا لسه مخلصش".
"ماشي يا ياسين.. ماشي.. هطلع.. بس افتكر اني قولتلك البت دي هتجيب راسنا في الطين."
ورمت المقشة على الأرض ورزعت الباب وراها ونزلت.. وطول ما هي نازلة صوتها عالي: "يا لهوي يا لهوي ابني اتسحرله!"
فضل هو وزينب لوحدهم في الأوضة الغرقانة.
زينب لمت نفسها بسرعة وغطت شعرها وهي بترجع لورا لحد ما خبطت في الحيطة.
"متقربش.."
ياسين متكلمش.. قلع الجاكت بتاعه ورماه على كتفها.
"البسيه.. هتبردي."
"مش عايزة منك حاجة!"
"هتلبسيه غصب.. زي ما الجوازة دي كانت غصب."
شدها وقفها بالعافية، لف الجاكت عليها، وريحة برفانه الرجالي التقيل دخلت مناخيرها لغبطتها.
زقها برفق ناحية الباب: "انزلي.."
"أنزل فين؟"
"أوضتك الجديدة.. جنب أوضتي."
زينب وقفت: "لا.. أنا مش هنزل.. أنا هرجع دار أبوي.."
ياسين ضحك بسخرية: "دار أبوكي؟ أبوكي اللي باعك ليا عشان 50 ألف جنيه ديون؟"
الكلمة نزلت عليها زي الكف.
وشها اصفر: "أبوي معملش كده.. أبوي.."
"أبوكي ماضي وباصم.. وانتي دلوقتي على ذمتي.. ولو طلعتي من باب السرايا ده.. هجيبك.. ولو هجرجرك من شعرك قدام البلد كلها."
قرب وشها منه.. كان قريب أوي لدرجة انها شايفة الغضب والوجع في عينه هو كمان.
"فاهمة يا بتاعة الطماطم؟ انتي مرتي.. يعني تفضلي هنا.. في حمايتي.. حتى لو بتكرهيني."
وشدها من دراعها ونزل بيها السلم.
تحت.. الخدم كلهم واقفين صف.. وست فاطمة واقفة في النص بتعيط وتلطم.
ياسين وقف زينب جنبه وهي لابسة الجاكت بتاعه ومبلولة وبتترعش.
قال بصوت يزلزل:
"من اللحظة دي.. زينب هانم الهواري.. أي أكل هتاكله ست فاطمة هانم هتاكله هي.. أي حد هيكلمها هتكلمه باحترام.. واللي هيزعلها.. كأنه زعلني أنا بالظبط.."
وبص لزينب وقال قدام الكل:
"وحقك اللي حصل فوق ده.. هيرجعلك.. بس مش دلوقتي."
زينب بصتله مصدومة.. هو بيقول هيجيب لها حقها من أمه؟
ست فاطمة أول ما سمعت كده.. اترمت على الكرسي وصرخت: "يا مصيبتي! ابني هيضرب أمه عشان واحدة جاية من الشارع!"
وفجأة.. من وسط الصمت.. تليفون ياسين رن.
بص في التليفون.. وشه اتقلب 180 درجة.
كان أبوه.. الحاج سليم الهواري.. اللي مسافر بقاله 10 سنين ومحدش يعرف عنه حاجة!
فتح بسرعة: "أيوه يابا؟"
الصوت اللي طلع من التليفون خلّى ياسين يسيب دراع زينب ويقع على الكرسي:
"أنا راجع البلد بكرة الصبح يا ياسين.. وسمعت انك اتجوزت من غير ما تقولي.. جهز مراتك عشان عايز أشوفها.. ولو مطلعتش البت اللي أنا عايزها.. هطلقها منك قدام البلد كلها ولو فيها موتك."
التليفون اتقفل.
ياسين بص لزينب.. أول مرة تشوفه خايف بجد.
ست فاطمة قامت وضحكت بشماتة وهي بتبص لزينب:
"مبروك يا عروسة.. الحاج سليم راجع.. واللي جاي سواد على دماغك انتي وهو.."
زينب حست ان الأرض بتلف بيها..
مين الحاج سليم؟ وعايز مين؟
وياسين.. هيعمل إيه؟ هيطلقها عشان يرضي أبوه.. ولا هيقف قصاد أبوه عشانها؟