صوت طقة المسدس وهو بيحط في دماغ الست الغلبانة لسه بيرن في ودني.
الغراب عينيه حمرا ومجنونة: "افتح دراعك يا عقرب! الأمانة فيك انت!"
ليلى شهقت وحطت ايديها على بوقها: "لا!"
أنا رفعت كمي اليمين.. الوشم اللي بقاله 20 سنة على دراعي.. عقرب اسود كبير.. عمري ما فكرت ليه أبويا الله يرحمه أخدني وانا عندي 8 سنين عند واحد صاحبه يوشمني الوشم ده بالعافية.. وقالي جمله واحدة: "ده هيحميك يوم ما تحتاجه".
عزت نزل جري من السطح وهو ماسك فرد خرطوش قديم: "يا غراب لو لمست الواد هفرغ ده في دماغك.. احنا متفقناش على كده!"
الغراب ضحك ضحكة صفرا: "عزت يا كلب.. انت فاكر اني جيت عشان فلاشة؟ سعيد الأنصاري مكانش معاه فلاشة.. كان معاه سر.. سر يودي الكل في داهية.. والسر ده متشفر.. ومفتاحه وشمين.. وحمة بنته.. ووشم ابنك!"
اتجمدت مكاني.
ابنه؟
بصيت لعزت.. عزت وشه قلب ألوان ووقع على ركبته.
الغراب كمل: "ما تقوله يا عزت؟ ولا أقول أنا؟ العقرب مش ابن الشارع اللي لقيته.. العقرب يبقى ابنك من الست اللي اتجوزتها عرفي زمان في الفيوم وماتت وهي بتولده.. وانت خفت من مراتك الأولانية ف رميته في الحارة وعملتله وشم العقرب عشان تعرفه لما يكبر!"
الدنيا كلها سكتت.
بصيت لعزت.. الراجل اللي رباني.. اللي علمني السرقة.. اللي كنت فاكره أبويا الروحي..
لقيته بيعيط لأول مرة في حياتي.
قال بصوت مكسور: "سامحني يا عقرب.. سامحني يا ابني.."
ليلى جريت عليا ومسكت دراعي وهي بترتعش: "لا يا عقرب.. متسمعش كلامه.. هياخدوا الوشم يعني هياخدوا جلدك.. هيموتوك!"
الغراب صرخ في رجالته: "اكتفوهم!"
وفي اللحظة اللي رجالته بتقرب.. حصل اللي محدش توقعه.
أم ليلى اللي مرمية على الأرض.. قامت مرة واحدة.. وفتحت عبايتها..
وكان في حزام ناسف ملفوف حواليها.. والسلك في ايديها.
وقالت بصوت ثابت لأول مرة: "ولا حد هيقرب.. سعيد قالي لو اتزنقتي.. فجري الكل.. حتى أنا وبنتي.. الأمانة متقعش في ايد الغراب."
وقبل ما أي حد يتحرك.. ليلى همست في ودني بجملة خلت قلبي يقف:
"يا عقرب.. بطن العقرب مش وشمك.. بطن العقرب يبقى المقابر.. بابا دفن الأمانة جوه قبر مرسوم عليه عقرب.. وانا عارفة هو فين.. بس لو قلت للغراب هيقتلنا كلنا بعد ما ياخدها.."
بصيت في عينيها.. البريئة اللي بقت أخطر مني.
وكان لازم أختار في ثانية..
أقول للغراب على مكان المقابر واكشف كدبة ليلى؟ ولا أسيب الست تفجر نفسها بينا كلنا؟
وفجأة.. نور كشاف رابع ظهر من ورا الفيلا.. مش تبع الغراب..
عربية رابعة جاية بسرعة جنونية..
مين اللي جيه دلوقتي؟