الحلقة الرابعة: الشات اللي يوجع
ورد مسكت التليفون وإيدها بتترعش..
الشات كان بين زين وفريدة من يومين بالظبط..
فريدة: "يعني انت بجد هتتجوز بنت عمك اللي لابسة خيمة دي؟"
زين: "هعمل ايه بس يا فريدة مانتي عارفة.. ابويا ضاغط عليا والبلد كلها مستنياني.. دي جوازة والسلام"
فريدة: "والحب اللي بيننا؟"
زين: "انتي حاجة وهي حاجة.. انتي للروقان وهي للبيت.. ورد طيبة وغلبانة وهترضى بأي حاجة"
ورد قرت الكلام مرتين.. تلاتة.. حست ان الكلام اللي قاله زين من شوية في القاعة وتصقيف البنات كله كان تمثيلية.
رفعت عينيها لفريدة.. عينيها بقت حمرا بس المرادي من القهر بجد.
ورد: "انتي جايبة لي الشات ده ليه؟ عايزة تثبتي ايه؟"
فريدة ببرود وهي بتلبس النضارة: "عايزة اثبتلك انك صعبانة عليا.. انتي فاكرة انه اتغير عشانك؟ زين عمره ما هيبص لواحدة منتقبة.. هو بس مش عايز يزعل ابوه.. يومين وهيزهق منك ويرجعلي"
ورد قامت مرة واحدة، سابت التليفون على الترابيزة وقالت بصوت واطي يخوف:
"تعرفي ايه الفرق بيني وبينك يا فريدة؟ انا لما زين غلط فيا قدام الرجالة.. خليته يجي يعتذرلي قدام بلد بحالها عشان يتعلم الرجولة.. وانتي لما غلط فيكي وسماكي روقان.. جيتي تجري ورايا بالشات تعيطيلي"
فريدة اتصدمت..
ورد كملت: "اللي يبيعني في شات.. يبيعك في حضن.. فوقي"
وسابتها ومشيت.
برا الكافيه.. زين قاعد على الرصيف مستنيها زي ما قالتله.. ماسك بوكيه ورد بلدي صغير كان شاريه من ست قاعدة جنب الجامعة.
أول ما شافها جري عليها: "ها؟ اتأخرتي ليه؟ فريدة قالتلك ايه؟"
ورد بصتله.. وبصت للورد اللي في ايده.. وافتكرت كلمة "هترضى بأي حاجة"
راحت واخدة البوكيه من ايده ورميته في الزبالة قدامه.
زين اتجمد: "ورد!! انتي بتعملي ايه؟!"
ورد قالت وهي بتعيط لأول مرة قدامه من غير ما تداري:
"انت كداب يا زين.. انت معلمتش حاجة.. انت لسه زي ما انت.. بتقول كلام قدام الناس حاجة.. ومن وراهم حاجة تانية خالص.. جوازة والسلام؟ انا هترضى بأي حاجة؟"
زين فتح بوقه مش مستوعب: "شات ايه؟ فريدة ورتك ايه؟! والله العظيم ما حصل!"
ورد: "ما حصلش؟ طب اقرا!"
وراحت مطلعة تليفونها مصورة الشات بسرعة قبل ما تقوم.
زين مسك تليفون ورد وقرا.. وشه اتخض.. وبعدين ضحك ضحكة غريبة..
زين: "يا بنت المجنونة.. انتي صدقتي؟ طب بصي على تاريخ الرسالة اللي فوق خالص"
ورد خطفت التليفون وبصت..
تاريخ أول رسالة في الشات.. من 8 شهور.. قبل ما زين ينزل من السفر اصلا!
فريدة كانت عاملة Edit للشات ومغيرة التاريخ من جوا.. بس نسيت تغير أول رسالة خالص!
زين قال: "انا عمري ما قولت عليكي كلمة وحشة يا ورد.. حتى وانا مسافر وامي بتحكيلي عليكي كنت بقولها بنت عمي اشرف من الشرف.. فريدة هي اللي سابتني عشان قولتلها مش هسيب بنت عمي.. فعايزة تبوظ جوازتنا"
ورد وقفت مصدومة.. بين انها ظلمته.. وبين انها مش قادرة تصدق حد تاني..
وفجأة تليفون زين رن.. أبو ورد.
"تعالى انت وورد حالا على البلد.. كتب الكتاب الليلة بعد العشا.. خلاص مفيش تأجيل تاني"
ورد وزين بصوا لبعض.. كتب كتاب الليلة؟ وهما لسه بينهم الشات والخناق والدموع؟