الحلقة السابعة: ست فاطمة فاقت
ياسين بيخبط على باب أوضة الخدامين زي المجنون:
"زينب افتحي الباب بقولك ملمستهاش! دي اللي داخلة أوضتي من غير احم ولا دستور! افتحي بقى!"
من جوه زينب قاعدة على الأرض، ضامة ركبها، والفستان الأحمر كله شاي مدلوق، وبتعيط من غير صوت.. عياط يوجع القلب.
"روحلها يا ياسين.. روحلها هي لايقة عليك.. بنت هانم زيك.. مش بتاعة طماطم زيي"
في نفس اللحظة فوق.. الحاج سليم لسه ماسك التليفون:
"بقولك جهز المأذون 9 الصبح.. ياسين لازم يكتب على بنت عمه.. دي جوازة مترتبة من واحنا عيال"
وفجأة حد شد التليفون من إيده.
ست فاطمة!
واقفة ووشها لسه مبلول من حركة الماية بتاعة زينب، بس عنيها المرة دي مش بتمثل.. عنيها بتلمع بدموع حقيقية.
"اقفل يا سليم."
"يا فاطمة انتي مش فاهمة.. الواد هيضيع مننا والبت دي.."
قاطعته وصوتها لأول مرة عالي في السرايا:
"البت دي هي اللي سترتنا! أنا اللي كنت مرمية بكركديه وبمثل عليكم وهي الوحيدة اللي فهمت وسكتت لحد ما كشفتني بالذوق! قمر هي اللي داخلة أوضة راجل متجوز بنص الليل بقميص نوم!"
الحاج اتصدم من مراته اللي طول عمرها بتدافع عن قمر.
تحت.. ياسين لسه بيخبط.. لحد ما الباب اتفتح.
مش زينب اللي فتحت.. دي ست فاطمة نزلت بنفسها، ماسكة مفتاح أوضة الخدامين الاحتياطي.
فتحت الباب وزقت ياسين بعيد.
دخلت لزينب، قعدت جنبها على الأرض رغم جلابيتها الغالية.
"قومي يا بنتي.. الأرض ساقعة عليكي"
زينب بصتلها مصدومة: "يا حاجة؟"
ست فاطمة مسكت وش زينب بين إيديها:
"حقك عليا يا زينب.. أنا كنت ظالماكي.. كنت شايفاكي جاية تاخدي ابني مني ومن عيلتنا.. مكنتش شايفة إنك بنت جدعة بميت راجل.. اللي عملتيه معايا فوق وانتي كشفتي الكركديه من غير ما تفضحيني قدام الدكتور والناس.. ده مفيش واحدة أصيلة تعمله"
زينب عيطت أكتر.
ست فاطمة قلعت شالها الغالي ولفت بيه زينب اللي كانت بردانة بالفستان المبلول.
"قومي معايا على أوضتي.. من النهارده مفيش أوضة خدامين.. انتي ست البيت ده زيك زيي"
ياسين واقف على الباب مذهول.. أول مرة يشوف أمه بتعتذر.
طلعوا التلاتة فوق.. لقوا قمر واقفة في نص الصالة، ماسكة خصلة شعرها اللي اتقصت وبتصوت: "يا حاج سليم شوف بنت الشوارع عملت فيا ايه!"
الحاج سليم كان لسه متأثر بكلام فاطمة، بص لقمر بقرف:
"انتي ايه اللي دخلك أوضة راجل متجوز في نص الليل بقميص النوم ده؟ هو احنا معندناش رباية ولا ايه؟"
قمر اتخرست.
ست فاطمة قربت منها وقالت بصوت واطي بس يرعب:
"اسمعي يا قمر.. انا اللي مربياكي.. بس اقسم بالله لو هوبتي ناحية أوضة ياسين تاني.. أنا اللي هقصلك لسانك المرة دي مش زينب.. فاهمة؟"
قمر وشها جاب ألوان.
ست فاطمة مسكت إيد زينب ورفعتها قدام الكل:
"من النهارده زينب دي مرات ابني بجد.. اللي يزعلها يزعلني.. واللي يمسها يمسني.. وكلمتي انا اللي هتمشي في السرايا دي"
ياسين بص لزينب وابتسم.. أول مرة يحس إن أمه بقت في صفه بجد.
زينب بصتله وعنيها لسه فيها دموع ونار: "بس أنا لسه مزعلانة منك انت.. مفكرتش تدافع عن نفسك وتزقها قبل ما ادخل؟"
ياسين قرب وهمس: "والله كنت بزقها يا مجنونة.. بس انتي دخلتي في اللقطة الغلط.."
ست فاطمة ضحكت لأول مرة من قلبها: "خلاص بقى.. اطلعوا أوضتكم صالحوا بعض.. وسيبوا قمر تلم شنطها.. عشان الصبح هترجع بيت أهلها"
الحاج سليم: "فاطمة!"
فاطمة: "سليم.. كفاية ظلم بقى.. خلينا نلحق نكسب البت دي قبل ما تطفش مننا خالص"
الليل خلص.. وياسين وزينب دخلوا أوضتهم سوا.. لأول مرة من يوم جوازهم الباب يتقفل عليهم وهما راضيين.
بس بره السرايا.. قمر كانت بتتكلم في التليفون وبتعيط وبتقول:
"يا ماما.. بيطردوني عشان بتاعة الطماطم.. لا مش هسكت.. أنا هوريها.. لو ياسين مش ليا مش هيبقى لحد تاني!"