الجزء الثاني
خرج ياسين من المكتب ومعاه ليل، واتجهوا للصالة الرئيسية اللي كان فيها باقي أعضاء الفريق.
ياسين ابتسم وهو بيشاور بإيده: — بصي يا ستي، دول بقى عيلتك الجديدة!
ليل بصت حواليها بفضول، وحاولت تحافظ على ملامحها الهادية، وهي بتفتكر كلام ياسين.
ياسين أشار ناحية الكنبة: — ده مؤمن.
كان مؤمن قاعد على الكنبة، ماسك المصحف وبيقرأ فيه بهدوء. أول ما لاحظ وجودهم، قفل المصحف وحطه جنبه بابتسامة محترمة.
ياسين: — مؤمن من أهدى الناس اللي ممكن تقابلهم، ملتزم وبيحافظ على صلاته، ومنضبط جدًا في التمرين.
مؤمن ابتسم: — أهلًا بيك يا ليث، نورت الفريق.
ليل مدت إيدها: — أهلًا بيك يا مؤمن، ربنا يكرمك.
مؤمن: — وإياك يا أخويا، وإن شاء الله تكون إضافة كويسة للفريق.
ياسين اتحرك ناحية الكنبة التانية، وكان رامي قاعد عليها ماسك موبايله، وشعره البني متسرح بطريقة مهتم بيها جدًا.
ياسين: — وده بقى رامي... بس خلي بالك، متصدقش أي كلمة حلوة يقولها.
رامي رفع عينه من الموبايل، وأول ما شاف ليث وقف نص وقفة وقال: — إيه ده؟! مين الصاروخ الجديد ده؟!
ياسين ضحك: — مش هتبطل قلة ادبك دى مش عاتق حريم ولا رجالة ، ده ليث، العضو الجديد في الفريق.
رامي ابتسم ومد إيده: — أهلًا وسهلًا يا ليث، نورت الفريق يا نجم!
ليل صافحته: — الله يخليك.
رامي رجع قعد على الكنبة، ورفع موبايله قدامها: — طب بص بقى، بما إنك جديد، عايز آخد رأيك في موضوع مهم جدًا.
ياسين تنهد: — يا ساتر، بدأنا.
رامي تجاهله وفتح صورة بنت على موبايله: — شايف البنت دي؟!
ليل بصت للصورة: — أيوه، مالها؟
رامي: — بحاول أتعرف عليها من أسبوع، وببعتلها رسايل ومش بترد عليّا خالص! إنت شايف أعمل إيه؟
ياسين ضحك: — سيبها في حالها يا رامي، يمكن مش عايزة تتعرف عليك!
رامي حط إيده على قلبه: — إيه القسوة دي يا ياسين؟! ده أنا إنسان رقيق، ومشاعري مرهفة!
ليل قالت بهدوء: — يمكن فعلًا مش عايزة تتعرف عليك.
رامي بص لها بصدمة مصطنعة: — إيه يا عم ليث؟! إنت لسه داخل الفريق وبتحطم معنوياتي؟!
ليل ضحكت: — أنا بقولك احتمال وارد يعني.
رامي رجع بص للصورة: — لا، أنا مش هستسلم. الحب محتاج صبر، وأنا عندي صبر أيوب!
ياسين: — عندك صبر على البنات أكتر من صبرك على التمرين!
رامي تجاهله وبص لليث: — بس على فكرة، إنت شكلك وسيم جدًا يا ليث. لازم نبقى أصحاب.
ليل رفعت حاجبها باستغراب: — بالسرعة دي؟!
رامي: — طبعًا! أنا قلبي مفتوح للجميع، وخصوصًا الناس اللي شكلها حلو.
ليل ضحكت: — إنت بتصاحب الناس على شكلها؟!
رامي: — دي أول حاجة بتلفت النظر، وبعد كده بنشوف الشخصية!
ياسين شده من كتفه: — يلا يا عم الرومانسي، سيب الراجل في حاله وخلينا نكمل التعارف.
رامي رجع يسند ضهره على الكنبة: — ماشي يا سيدي، بس أنا حاسس إنكم بتحسدوني على جاذبيتي.
ليل انفجرت في الضحك، وياسين هز راسه بيأس.
بعدها ياسين أشار ناحية شاب واقف بعيد عنهم، بيرفع أوزان وبيتمرن بتركيز شديد.
ياسين: — وده ياسر.
ليل بصت له، وبعدها همست لياسين: — هو مش واخد باله إننا هنا ولا إيه؟
ياسين همس: — واخد باله، بس ده أسلوبه الاجتماعي.
ياسين نادى عليه: — ياسر!
ياسر وقف التمرين وبص ناحيتهم من غير ما يغير ملامحه.
ياسين: — ده ليث، العضو الجديد.
ياسر اكتفى بكلمة: — أهلًا.
وبعدها رجع يكمل تمرينه كأن مفيش حاجة حصلت.
ليل بصت لياسين باستغراب: — هو زعلان مني؟
ياسين ضحك بهدوء: — لا، متقلقيش. هو كده مع الكل.
ليل هزت راسها: — تمام.
ياسين اتحرك ناحية آخر الصالة، وهناك كان أنس قاعد قدام ترابيزة وعليها أكل كتير، وماسك ساندويتش وبيأكل بكل تركيز.
ياسين وقف قدامه: — أنس!
أنس رفع عينه ببطء: — نعم؟
ياسين: — مش هتبطل أكل شوية؟!
أنس بص للساندويتش اللي في إيده: — ليه؟!
ياسين أشار ناحية ليل: — ده ليث، العضو الجديد في الفريق.
أنس ابتسم بسرعة: — أهلًا وسهلًا يا ليث، نورتنا!
ليل ابتسمت: — الله يخليك.
أنس رجع بص لياسين: — هو بالمناسبة، فيه أكل زيادة ولا لأ؟
ياسين فتح عينيه: — إنت لسه واكل من شوية!
أنس بكل جدية: — أنا بسأل علشان الضيف الجديد، مش معقول نستقبل حد من غير أكل!
ليل ضحكت: — لا متشكر، أنا تمام.
أنس: — لا يا ليث، لازم تاكل. الأكل حب واهتمام وانتماء، ومينفعش حد يدخل عيلتنا من غير ما ياكل معانا.
رامي من بعيد: — يا عم إنت عايز تخلي الفريق كله تخين زيك!
أنس بص له بغيظ: — أحسن ما أفضل أصور البنات طول اليوم وأستنى حد يرد عليّا!
رامي حط إيده على صدره: — الغيرة وحشة يا أنس، الغيرة وحشة!
ليل بصت ليهم وهي بتضحك: — إنتوا كدا علطول !
ياسين ضحك: — ولسه، إنتِ ما شفتيش حاجة.
ليل بصت حواليها، وبعدها سألت: — طب هو فين الشخص الأخير؟
ياسين: — القائد. إنتِ قابلتيه بالفعل.
ليل ابتسمت وهي بتفتكر سيف واتكلمت بصوتها الانثوى: — آه، الحليوة ده؟ عارفاه، عارفاه!
ياسين لف ناحيتها بسرعة وهمس: — ليل!
ليل اتعدلت في وقفتها: — إيه؟!
ياسين: — خلي بالك من كلامك، ووطي صوتك. إحنا مش ناقصين مصايب.
ليل افتكرت نفسها بسرعة، وخشنت صوتها: — حاضر يا ياسين، مفيش مشكلة.
رامي بص لهم باستغراب: — إنتوا بتتهامسوا ليه؟ فيه إيه؟
ياسين: — مفيش، كنت بوضح لليث إن القائد مش بيحب الهزار الكتير.
رامي ضحك: — آه، سيف؟! ده لو شاف حد بيضحك كتير هيطلب منه تقرير عن سبب السعادة!
في اللحظة دي، دخل سيف الصالة بخطوات ثابتة وملامحه الجادة المعتادة.
الكل اتعدل في وقفته، حتى رامي حط الموبايل من إيده.
سيف بص لياسين: — خلصت تعريفه على الفريق؟
ياسين: — أيوه، كنت بعرفه عليهم.
سيف بص لباقي الشباب: — عايز الكل يكون جاهز لتدريب بكرة في معاده. مش عايز أي تأخير، ومش عايز أعذار.
رامي رفع إيده: — طب يا كابتن، لو كنت نايم؟
سيف بص له ببرود: — خصوصًا لو كنت نايم.
رامي نزل إيده: — طب أنا هنام إمتى كده؟!
سيف تجاهله، وبص ناحية ليث: — وإنت كمان يا ليث، أتوقع تكون مستعد للتدريبات. مفيش تدليل هنا، ولا حد هيتعامل معاملة مختلفة.
ليل خشنت صوتها وردت بثقة: — متقلقش، أنا قد المسؤولية.
سيف اكتفى بنظرة قصيرة، وبعدها قال: — كويس.
وبدون أي كلام إضافي، لف وخرج من الصالة.
ليل فضلت متابعاه بعينيها لحد ما اختفى.
يا نهار أبيض، حتى وهو مكشر شكله حلو! هو الراجل ده مش بيبتسم ليه؟! طب يبتسم مرة واحدة بس، علشان الواحد يعرف هو عنده كام سنة!
رامي لاحظ إنها سرحت، فخبطها بخفة على كتفها: — إيه يا ليث؟ سرحت في إيه؟
ليل انتبهت بسرعة: — ها؟! لا، مفيش.
رامي ابتسم بمكر: — شكلك كنت سرحان في حاجة جميلة.
ليل اتوترت للحظة، وبعدها ردت: — كنت بفكر في التدريب بس.
ياسين تدخل بسرعة: — خلاص يا رامي، سيب ليث في حاله بقى.
رامي رفع إيده باستسلام: — حاضر يا عم، هو أنا عملت حاجة؟!
بعد مرور عدة ساعات...
كانت ليل قاعدة على الكنبة، حاسة إن جسمها كله بدأ يطلب منها الراحة. اليوم كان طويل، والتوتر من مقابلة الفريق ومحاولتها إنها تفضل محافظة على صوتها وتصرفاتها خلاها مرهقة أكتر مما توقعت.
بصت لياسين اللي كان واقف بيتكلم في الموبايل، ولما خلص نادته:
ليل: — ياسين؟
ياسين بصوت واطى : — أيوه يا ليل؟
ليل: — هو أنا ممكن أرتاح شوية؟ أنا تعبت.
ياسين ابتسم: — طبعًا، تعالي أوريكي أوضتك.
قام وطلع بيها للطابق العلوي.
ياسين وهو بيشاور على أول باب: — دي أوضة مؤمن.
وبعدها أشار للباب اللي جنبه: — ودي أوضة ياسر.
وبعده: — ودي أوضة أنس.
ليل كانت ماشية وراه وبتبص على الأبواب باهتمام، لحد ما وقف قدام باب تاني.
ياسين: — ودي أوضة سيف.
ليل بصت للباب بابتسامة صغيرة، وبعدها حاولت تخفيها بسرعة.
ياسين لاحظ ابتسامتها: — إيه؟!
ليل: — ولا حاجة، كمل.
ياسين هز راسه وضحك، وبعدها أشار لآخر باب في الممر: — ودي أوضة رامي.
ليل بصت للأبواب كلها، وبعدها رجعت بصت له: — هو كل واحد فيكم عنده أوضة لوحده؟
ياسين: — أيوه، طبعًا.
ليل: — طب وأنا هنام فين؟
ياسين حك راسه: — بصي، أوضتك لسه ما اتجهزتش. محتاجة شوية حاجات، فكنت بفكر نتصرف مؤقتًا لحد ما نجهزها.
ليل نفخت بضيق: — يعني هنام فين بقى؟
وقبل ما ياسين يرد، ظهر رامي من ناحية المطبخ، وكان شايل طبق أكل في إيده وبيأكل منه.
رامي: — إيه يا جماعة؟ واقفين هنا ليه؟
ياسين: — ليث لسه معندوش أوضة جاهزة، وكنت بشوف هنعمل إيه.
رامي بص لليث، وبعدها بص لأوضته: — خلاص، هنام انا مع انس لحد ما اوضته تجهز
انس كان داخل اوضته ينام سمعه وقال :
- موافق بس بشرط مفيش كلام مع بنات طول الليل مش ناقص وجع دماغ
رامى رد عليه وقال : عاشان خاطر عيون ليث بس هستحملك إنما بعد كدا بالجزمة
ياسين بص له باستغراب وقاطعهم: — إنت هتبرع بأوضتك لليث.
رامي: — أيوه يا عم، فيها إيه؟! أوضتي واسعة ومريحة، وهو لسه جديد، يبقى ياخدها.
ياسين ضيق عينيه: — إنت مالك كريم كده فجأة؟!
رامي حط إيده على صدره: — يا أخي عيب عليك! إحنا عيلة واحدة، ولازم نقف جنب بعض.
ليل ابتسمت: — بجد؟ متشكرة أوي يا رامي.
ياسين خبط على رجليها
ليل بوجع: اه قصدى متشكر
رامي أشار لها بإيده: — ولا يهمك يا نجم، اعتبر الأوضة أوضتك. بس عندي طلب صغير.
ليل: — طلب إيه؟
رامي رفع صباعه بتحذير: — مخدتي المفضلة، محدش يقرب منها!
ياسين ضحك: — يا سلام على الكرم! سايبله الأوضة كلها وخايف على المخدة!
رامي: — المخدة دي عشرة عمر يا ياسين، إنت متفهمش!
ليل ضحكت: — حاضر، مش هقرب منها.
رامي: — كده تمام. يلا بقى، أنا عندي أكل لازم أخلصه.
ياسين بص لليل: — خلاص، اعتبري الغرفة غرفتك وارتاحي. بكرة يوم طويل.
ليل هزت راسها: — تمام، تصبحوا على خير
رامي لوّح لها بإيده: — تصبح على خير يا ليث!
دخلت ليل الغرفة وقفلت الباب وراها
في وقت متأخر من الليل...
كان سيف خارج من مكتبه، وفي إيده شوية أوراق تخص تدريب اليوم التالي.
وقف للحظة وهو بيفكر في حاجة، وبعدها افتكر إنه كان عايز يتكلم مع رامي بخصوص بعض الترتيبات الخاصة بالتدريب.
طلع موبايله واتصل بيه.
رن الموبايل كذا مرة، لكن مفيش رد.
سيف بص للشاشة بضيق: — هو رامي ده مش بيرد على تليفونه ليه؟!
قفل المكالمة، واتجه ناحية أوضة رامي.
وقف قدام الباب وخبط مرتين.
مفيش رد.
سيف خبط مرة تالتة: — رامي؟
فضل مستني شوية، لكن مفيش أي صوت.
فتح الباب بهدوء ودخل، وهو بيقول:
— رامي، إنت نايم؟ أنا عايزك في...
لكن كلامه اتقطع فجأة.
وقف مكانه، وعينيه اتسعت من الصدمة و....