فضلت ماسك دراع ليلى وبرجّ فيها وهي بتعيط ووشها ميت من الخوف.
"فلاشة ايه انطقي!"
صرخت وهي بتشهق: "والله ما اعرف! أبويا مات من 10 سنين! كان سواق تريلا! أمي حتى معندهاش تليفون زراير عشان حد يهددها!"
سيبتها وفتحت تليفونها بسرعة.. الرسالة كانت معمولها seen من 3 أيام وهي مردتش.
يعني اللي بيدور عليها مش انا بس.
كلمت عزت تاني وانا بزعق: "بقولك ايه.. هاتلي كل حاجة عن بنت اسمها ليلى أبوها مات من 10 سنين، كان اسمه ايه؟ شغال ايه؟"
ليلى ردت بصوت واطي وهي بتمسح دموعها: "اسمه.. سعيد الأنصاري."
أول ما قالت الاسم.. أنا اتسمرت.
سعيد الأنصاري مكنش سواق.
سعيد الأنصاري كان الدراع اليمين للغراب.. المحاسب بتاعه اللي شايل كل بلاويه.. اللي اتقال انه عمل حادثة ومات ومراته خدت البت وهربت.
يبقى البت دي.. بنت الراجل اللي معاه مفتاح جهنم بتاع الغراب.
والفلاشة دي عليها كل حسابات غسيل الفلوس والسلاح.
فهمت كل حاجة.
الغراب مش عايز البت.. عايز الفلاشة.. واللي خطفوها في الأول فاكرين انها عارفة مكانها.
بصيت لليلى.. البريئة اللي جوز أمها طردها عشان 200 جنيه.. وهي نايمة على كنز يولع البلد.
قعدت قدامها ومسكت ايدها لأول مرة من غير عنف.
"اسمعيني يا ليلى.. لو فضلتي بريئة كده هتموتي انتي وأمك. الغراب مش هيسبكم."
"أعمل ايه طيب؟"
"هنعمل عليه أكبر نصباية اتعملت في تاريخ السوق."
عينيها وسعت: "ازاي؟"
"أبوكي الله يرحمه كان ذكي.. مقالش لحد على مكان الفلاشة حتى انتي. يبقى احنا هنبيعلهم الوهم."
الخطة كانت مجنونة:
1 - هنقول للغراب ان ليلى افتكرت مكان الفلاشة.. مدفونة في مقابر أبوها في الفيوم.
2 - هخلي عزت يضرب فلاشة شكلها قديم ويحط عليها فيديو متفبرك.. فيديو يخلي الغراب يجري يبوس رجل الحكومة يسلم نفسه.
3 - هنطلب منه يجيب أم ليلى معاه و 2 مليون جنيه تمن سكوتنا.. ونتقابل في نفس الفيلا دي.
ليلى قالت بخوف: "ولو عرف انها نصباية؟ هيقتلنا!"
قربت منها وابتسمت لأول مرة.. ابتسامة العقرب اللي بتخوف الكل:
"ما هو ده الفرق بين النصاب والحرامي يا بريئة.. الحرامي بيسرق فلوسك.. النصاب بيخليكي تديهاله وانتي مبسوطة. والغراب طماع.. والطماع صيدة سهلة."
في نفس الليلة.. بعتنا للغراب من تليفون ليلى رسالة واحدة:
"الفلاشة معايا في الفيوم. لو عايزها هات أمي وتعالى لوحدك. - ليلى"
الرد جه بعد دقيقة واحدة بس:
"جاي. اوعي تلعبي مع الغراب يا بنت سعيد."
طفيت النور بتاع الفيلا كلها.. وقلت لعزت يجهز الرجالة فوق السطح.
وقلت لليلى: "ادخلي الأوضة اللي جوه ومتطلعيش مهما حصل."
قالتلي وهي بتبصلي وخايفة عليا بجد لأول مرة: "وانت؟"
"أنا العقرب يا ليلى.. بقرص قبل ما اتقرص."
الساعة بقت 2 بالليل.. وصوت عربيات الغراب بيدخل من بوابة الصحراء.. كان جايب بدل العربية.. تلاتة.
واللعبة ابتدت.